Post: #1
Title: جون قرنق هل كان سيظل وحدويا..لو كان حياً؟
Author: محمد النيل
Date: 10-18-2010, 03:59 AM
ناس الانقاذ شابكننا جون قرنق كان وحدويا
كان وحدويا وما ادراك
كانه سبب الانفصال سلفاكير وحده.
جون قرنق لو كان عايش
تصرفات الانقاذ دى كان ح تحولو لانفصالى
خاصة الخج والتزوير فى الانتخابات اللى شهد المراقبون واقروا بمهزلتها.
بس جارين عاملين الحركة وسلفا شماعة
انا زاتى لو كنت جنوبى كنت ح اصوت للانفصال
للانعتاق من نير الانقاذ
يا جنوبيين الله اداكم.
والله معاكم
|
Post: #2
Title: Re: جون قرنق هل كان سيظل وحدويا..لو كان حياً؟
Author: مهيرة
Date: 10-18-2010, 08:49 AM
Parent: #1
يالنيل ياخوى ناس الانقاذ ديل الجن زاته يتعوذ منهم
هاك الشعر دة جانى بالاى ميل :
الـفار فرفر في الفـروة
شابكنا يومـاتي فـتاوي!
كم أرنـب جوه الطاقيـة
مستني منـديل الحـاوي!
الحاجـة اليـوم تتحـرم
وينكتلو علـشانا شـباب!
تتحلل في اليـوم التانـي
ويـقولو لي ناسا حـباب!
الجـن من جنـو اتجنـن
واتعـوذ مـن الـجايات!
@@@
والهـون رفـع التلفـون
في لحظة ضرب البليـون!
والهـم واقــف طابـور
من تصبح ما نلقى فـطور!
الفــات فات لف اللـفات
فـي جـيبو الكـنجالات!
من مافـي ركب العربات
جالوصو أصبح صرايات!
والفـلة وقعت في البـير
محروسة بي كم خـنزير!
لا محاسب لا كشف حساب
لا ذمــة لا إقــرارات!
@@@
الحالـة بس زي الطـين
في جيبـنا مافيش مليـن!
وأي سـعر أصبح سعران
ما بـنقدر ندخـل دكـان!
والسـوق أصبح مطلـوق
وأي قرش أصبح ممحوق!
يا حلـيلو زمن الضـيفان
ما بنقـدر نعـزم إنسـان
على فطـرة بمـوية فول
لا جبـنة فيـها لا زيـت
لا سلـطـة لا طعمـيات!
@@@
بترولنا بى نسمـع بيهو
بس منو ما ضقنا ثمـار!
العـائد أكـبر مجـهول
وتوزيعو ســر الأسرار!
أفتــونا يا مـدنيـيـن
ورونا يا نـاس الـجيش
لى جدادنا ما نلقى العيش!
لى غنمنا مافـيش برسيم
لو جعـنا بس ناكل نيـم!
كم ليلـة القـوى بتناهو
وأصبحـنا زي الحطبات!
@@@
ورسوم راجياك بيـجاي
وجباية حارساك بيهـناك!
على راسك تدفع دقنـية
النبقة مقسـومة مـعاك!
وضرائب حولك تتـحاوم
لو تجري تلـقـاها وراك!
التـور ذاتـو يحلبــوه
الأرحم عهــد الاتـراك!
باى باى سوولا رسـوم
تحصيلا بدون إيصـالات!
@@@
الكـان مستـور الحــال
الليلـة مقـطوع الـراس!
وابليـسنا سارح بي غنمو
وغـنمو سارحات بالناس!
الفاطـي سطـرين وتلاتة
الفاطـي كـل الكــراس!
لا يحلـو الشيخ الجعلـي
لا تحـلو سيطان كـدباس!
@@@
@@@
الطالـب طالـب مـن الله
كيف يصـبح من الشطار؟!
كل همو بقى بس في بطنو
كيف يقطع كـمين مشوار!
الجامعة يا حليل الجامعـة
لا صـفرة لا داخلــيات!
الجـامعة يا حليل الجامعة
لا مـعامـل لا مختـبرات!
@@@
@@@
في الغـربة بتلاقي مصايب
في الغــربة بتلاقي ماسي!
دكـتور شــغال جرسون
ومهــندس شـغال تكاسي!
واحـدين ساكنين مقطورة
كان أحـسن سكنة تنقاسي!
واحـدين ساكـين الميتـة
ما شبـعو من الـصدقات!
@@@
في النـظري طالعين الاول
في العملي طالعين الطيش!
في الـشارع أجيال بتضيع
وكل كـيلو نقطة تفتـيش!
الشـعب ممنوع ما يرقص
ما يفرفش وسط الحفلات!
والكاكي يرقص على كيفو
بي عصاية وبي رشاشات!
يابـلة كيفـــن نتحـلا
شربكـنا زولن اتشـربك
واتورط جـوه الـشبكات!
@@@
الريس اصـــبح مطلوب
كايسنلو نـسوان راجلات!
ما بنفـع غزغيز الـريش
ما بتنفـع كل الجـوطات
ما بنفـع طـرد البيـغيثو
ما بنفع هرش الخـواجات
ياريس بس اركـب عجلة
ما تفكـر في الطيـارات!
@@@
القـالو عقـلاني وفـاهم
في راسـو اصـبح عيان!
بيقـول قبــل الإنقــاذ
كان بشحد شعب السودان!
يا راجل بس عاين حـولك
اتلـفت فـي كـل مكـان
ملايـين عايشـين باغاثة
في الفاشـر في امدرمان!
@@@
الصورة الكاملة بتزعـجنا
وتفصـيلا اكبر ازعـاج!
تفـكيرنا دايـماً مشـلول
فوق راسنا سيف الحجاج!
وجـهتنا دائماً مجـهولة
رؤيـتنا ملـيانة عجـاج!
الأمـة ساكتـة بتـتفرج
ومثقـف ساكن الابـراج!
ومصيرنا معلق بي شعرة
وقعـتنا صبـحت وقعات!
@@@
نـادوس يا رمز الطـيبة
نـادوس يا وش الخـير
نـادوس يا سكة عديلـة
نـادوس يا خـط السـير
خلصنا مــن الكـابوس
انـقذنا مـن الـكســير
زودنا ببصارة وحـكمـة
شان نبقى يوم بكرة اخير
ونتحـرر مـن الأوهـام
ونتخارج مـن الـورطات!
2009 ( )
تحياتى
|
Post: #3
Title: Re: جون قرنق هل كان سيظل وحدويا..لو كان حياً؟
Author: محمد النيل
Date: 10-18-2010, 10:49 AM
Parent: #2
الاخت مهيرة
تحية طيبة
شعر يثير الحزن
ويغبر عن واقع مؤلم
الله يكون فى العون
واشكرك كثيرا على الاضافة المعبرة
واكيد قرنق لو فشل فى اجبار الانقاذ عن تغيير مسارها
اكيد كان ح ينفد بجلد الجنوب من تحت مظلة الانقاذ
لك التحايا
|
|