Post: #1
Title: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 01:51 AM
وكان آخر ما سمعت من أصوات آدمية في مسائي هذا ضحكة صديقي عوض هرون رد الله غربته الي جانب مواء قطة صغيرة ايقظتها خطاوي مترنحة مرت بجوارها ـ كان مساءاً طيباً وقلقاً ومشحوناً بالأمنيات والأحلام ـ ياخ نحن قوم (حلامون) كما يقول صاحبي ومافي حاجة في الدنيا مؤخرانا سوي هادي الأحلام .
ما ان أعلن المدعو (خدر) عن عودته الميمونة الي وطنه حتي تناقل الناس في فيافي وصعيد وقري الوطن المهمشة والمهشمة الخبر بشوق ولهفة .
لسنوات طوال وأنا اعود (لخدر) كلما حدث قلبي هم إستجير بصوته بددت بصوته بؤس غربتي يوم كنت بالسعودية (بنين) والتي دخلتها بمهنة (نجار مباني) ما علينا اذ أن الغربة هي التي تختار (مهنتك) قبل أن تبدأ في اصطياد ما تبقي من أحلامك التي ظللت تطاردها عبثاً في وطن لا يملك سوي أن يهديك الإحباط والتشرد والـ وال وال ...... الي جانب الخمور البلدية رديئة الصنع .
عبثاً حاول رفاقي يومذاك اثنائي عن قرار ذهابي الي تلك الشواطئ البعيدة فذهبت محملاً بالجروح والهتافات البوار . يوم أن عدت وجدت الحال قد تغير والناس اصبحو مشغولين (بالمشغوليات) حتي ان (ميمي) صاحبي كان يشاغلني قائلاً : والله البلد دي بقت حاجة تمرض اي زول تسألوا وين ما ظاهر يقول ليك مشغوليات ياخ شغل شغل شغل .
كان ذلك قبل أن يغادرنا ميمي نفسه لينتهي به الحال لمواطن ينتمي لوطنه عبر صفحات الفيس بوك والتلفونات الليلية مليئة الشكوي ورسائل عبر الموبايل من حين الي آخر من رقم يبدأ أول رقميه بصفرين كبيرين تماماً كما هذا الوطن الصفر . اذن انتهي به الوطن ليتحول في خواتيمه مغترباً في دولة الامارات العربية المتحدة .
كان انساناً نادراً وفلتة من فلتات زماننا لا أدري لماذا هو بالتحديد من تذكرته من وجوه اصدقائي عابري القارات والاوطان وأنا إستمع برفقة نفر برهم الرحمن هذا المساء ليستمعوا لصديقنا (خدر) نقرشات العود ربما؟ الاحلام (احتمال أول) ؟ الحزن المقيم والأفراح المؤجلة (قطع شك) ؟ (أطيب من الحزن وإرتاح وليلي الحالك يبقي صباح ) ؟ غني طارق فتساقطت الذكريات ـ ياخ كل شئ كان مرتبكاً حتي ونحن نشق الخرطوم من وسطها الي جنوبها كان مرتبكاً وخجلاً ـ عامل بمحطة الوقود كان يلعب بموبايله راقداً كيفما تشتهي النجوم قدمناه أربعتنا خدر وقمر وأنا والعود الذي كان يرابط بجانبي طوال هذه الفوضي الخرطومية ونحن نبحث عن محطة للوقود .
قلت له : ياخ عايزين بنزين
أجابني وهو يعبث بهاتفه وراقداً ذات رقدته الميمونة : شطبنا
قالها بطرف انامله
قلت بسودانية لايوقة : عليك الله ياخ نحنا مشوارنا طويل
فلم يجبني علي الاطلاق وأبلغ الظن أنه كان قد وصل لمرحلة متقدمة في لعبة (الثعبان) ـ كنت أراقب حركة يده اليمني ـ عيناه ـ قلت في سري لابأس إذ أنني أيضاً من صرعي هذي اللعبة بالتحديد .
ظن (فان باستن) الهولندي أن بالإمكان أن تملأ وقود سيارتك بنفسك في شوارع الخرطوم . ظن (خدر) كذلك ذلك فضحكنا أنا وصديقي قر قر قر قر .
قال صاحبي : الخرطوم مافيهاش كلام من النوع ده وياخ نحنا يادوب وصلنا المرحلة بتاعت انك تكون قاعد في العربية (السيارة) وتفتح التنك لعامل المحطة ويقوم مشكوراً بعمل الاجراءات اللازمة .
ما هي الا لحظات حتي جاء عامل آخر مستجيباً لطلبنا فغادرناه ولساننا عاجز عن الشكر ولكأن ذلك ليس واجبه المقدس . ماعلينا .
غني خدر وأمطر الحضور بأغنيات قديمات ظهرن ولكأنهن من مواليد اللحظة والتو ـ غني من اغانيه الخاصة غني لخـ(ك)اب حسن أحمد والذي هو الاخر شكل حضوراً مما أتاح للخطي أن تتسع علي اتساعها غني أرمي لي مطار فتلقفتها القلوب قبل الآذان ـ أي والله كان الحضور جميعهم يفتشرون قلوبهم أملاً في تلقف هذا الوطن المبكي ـ دمعة صغيرة لم أحسب لها حساباً طفرت وأنا إستمع لخدر وهو يستجدي قائلاً : أرمي لي مطار أرميهو يا خية . قالها بطريقة تقطع الحشا .
قلت لأزهري ها(مش) : ياخ لو الواحد حضر ميلاد الاغنية دي اسفيرياً هل ممكن يجي يحكي لأحفادو كما يفعل السر قدوور في اغانيه المكررة ؟
اني أشهد ايها الناس أن لخدر صوت لا يقاوم صوتٌ يفيق خلجات القلب يدخلك عبر المسامات تسكن رئتاك واوردتك ـ صوت يعيدك لنواحي الانسانية التي افقدتك اياها فنانو وفنانات (الجيل السادس عالي السرعة) افقتني وقوم كثر يا طارق يا ابوعبيده افقتنا والله وانت تستبيح ليالي الخرطوم بحضورك السمح الوسيم .
ـــــــ
الجدير بالذكر أن هذا التعديل يتبعه تعديلات أخر والله علي ما اقول شهيد
|
Post: #2
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 01:54 AM
Parent: #1
والشكر لكل الذين جعلو هذا ممكناً
إذن :
لا العمارات السوامق
لا الاسامي الاجنبية
تمحي من عيني ملامحك
ــــ
وهو كذلك يا حميد
|
Post: #3
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 02:09 AM
Parent: #2
والشكر موصول لعوض هارون وتلفونه الثابت 
ـــــــــ
ياريت يابكري ترسل لعوض اخونا ده باس ويرد جديد لانو ماقدر يخش المنبر وحالو واقف
|
Post: #4
Title: Re: مشاوير آخر الليل ... الي خدر وهو يستبيح سماء الخرطوم
Author: tayseer alnworani
Date: 09-24-2010, 06:27 AM
Parent: #3
Quote: اني أشهد ايها الناس أن لخدر صوت لا يقاوم صوتٌ يفيق خلجات القلب يدخلك عبر المسامات تسكن رئتاك واوردتك ـ صوت يعيدك لنواحي الانسانية التي افقدتك اياها فنانو وفنانات (الجيل السادس عالي السرعة) افقتني وقوم كثر يا طارق يا ابوعبيده افقتنا والله وانت تستبيح ليالي الخرطوم بحضورك السمح الوسيم .
|
اللهم هل بلغت اللهم فأشهد
خضر ياجميل انت عارف خدر ده جمل ليالينا
|
Post: #8
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 09:47 AM
Parent: #4
| Quote: اللهم هل بلغت اللهم فأشهد |
ونعم بالله يا تيسير
ونعم بالله
تحياتي عبرك لزوجك الواقعي .
|
Post: #5
Title: Re: مشاوير آخر الليل ... الي خدر وهو يستبيح سماء الخرطوم
Author: Yassir Tayfour
Date: 09-24-2010, 07:19 AM
Parent: #3
خضر وخدر فليل؟ وفي الخرطوم؟
___
أكيد الشيطان ثالثكما!
|
Post: #6
Title: Re: مشاوير آخر الليل ... الي خدر وهو يستبيح سماء الخرطوم
Author: ناذر محمد الخليفة
Date: 09-24-2010, 09:20 AM
Parent: #5
إنت يا خضر مشيت وين أمبارح ؟؟!
ولا أنا المشيت ما عارف ؟؟؟؟!!!
غايتو كانت لمة جميلة في الخرطوم المُضلمة دي ..!!
|
Post: #7
Title: Re: مشاوير آخر الليل ... الي خدر وهو يستبيح سماء الخرطوم
Author: عبدالوهاب علي الحاج
Date: 09-24-2010, 09:28 AM
Parent: #6
Quote: إنت يا خضر مشيت وين أمبارح ؟؟!
ولا أنا المشيت ما عارف ؟؟؟؟!!! |
البتاعات عندكم والله
|
Post: #11
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 09:54 AM
Parent: #7
بتاعات شنو ياوهبة ياخ
وبعدين مالك ما جيت يافقر ؟
|
Post: #10
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 09:53 AM
Parent: #6
كان يوم جميل ياناذر والله
أنا لي فترة طويلة ما حضرت فعالية سمحة زي دي
وصلت كيف يازول ؟
|
Post: #9
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 09:50 AM
Parent: #5
اب تفة ازيك ياخ
والله الدنيا فايتاك بي جاي
يازول الكع تعال سريع .
ــ
العود ثالثنا ياخ
|
Post: #12
Title: Re: مشاوير آخر الليل ... الي خدر وهو يستبيح سماء الخرطوم
Author: ناذر محمد الخليفة
Date: 09-24-2010, 10:02 AM
Parent: #9
!!!
وهبة بتاعات شنو في الحر دا ياخ ..!!
كانت ليلة لا تنسى ..
والله يا خدر وصلت وأنا في قمة الإنتشاء من اليوم ..
زي ما بيقولوا (سكران بدون خمرة) ...
وأنا راجع شعرت بجوعة شديدة وأخوك عزابي اليومين ديل ..
غشيت أبو حمامة طلبت لي طلب فراخ مشوي .. الجرسون سمعني غلط جاب لي فرخة كاملة !!
قلت ليهو حرم ما بترجع .. نزلت فيها بي ثقلي كلو فرتكتها خليتا ليك زي كربريتر الكريسيدا ..
كلو قطعة في حتة ..!!
بعد شوبة شعرت بي عطش شديد ..
طلبت من الجرسون بيبسي برضو فهمني غلط جاب لي كرستالة كبيرة ..!!
قلت ليهو حرم ما ترجع .. وقعت فيها نوووطك نننييطك .. نوووطك ننيطك إنتهيت منها كلها ..
غايتو لحدي هسي أنا بترع ..!!
|
Post: #13
Title: Re: مشاوير آخر الليل ... الي خدر وهو يستبيح سماء الخرطوم
Author: عبدالوهاب علي الحاج
Date: 09-24-2010, 10:11 AM
Parent: #12
Quote: بتاعات شنو ياوهبة ياخ
وبعدين مالك ما جيت يافقر ؟ |
والله ياخضر حسين يطرشني ماسمعت بفعاليتكم دي ..
خدر كنا سوا اول امس لما بعد منتصف الليل
ماقال لي اي حاجة غير انو يوم السبت حيغني في بيت الفنون
كان تشد لي سلك ياخ ..
خدر زول جميل وغناي
حسدتكم والله وخسوسااني قضيت الخميس دا والكهربا قاطعة تصدق ؟
|
Post: #15
Title: Re: مشاوير آخر الليل ... الي خدر وهو يستبيح سماء الخرطوم
Author: ناذر محمد الخليفة
Date: 09-24-2010, 10:14 AM
Parent: #13
وهبة ..
Quote: خدر كنا سوا اول امس لما بعد منتصف الليل
|
البتاعات ما عندكم لكن ...!!
|
Post: #18
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 10:26 AM
Parent: #15
انتو البتاعات دي شنو ياخوانا
شابكننا البتاعات البتاعات
|
Post: #16
Title: Re: مشاوير آخر الليل ... الي خدر وهو يستبيح سماء الخرطوم
Author: معاوية عبيد الصائم
Date: 09-24-2010, 10:18 AM
Parent: #13
يا خضر طبعا طارق ابو عبيدة
ثروة قومية لدولتين نرجو المحافظة
عليها .؟لانو مشروع سياسى للدواتين
مستقبلا ؟
بقدر المستطاع ينوم بدرى يوميا قبل
الساعة 3 صباحا
معجب بالصلعة ؟
|
Post: #19
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 10:30 AM
Parent: #16
يامعاوية
ياتو دولتين ياصديق ؟
ومن ناحية اخري ياطارق الزول ده بنوم من اتناشر ونص
عشان المحافظة وكده
والله حيفرق معانا ياخ
حنساهو يقعد نهائي لكن يبدوا لي انو ناس بلاد برة ديل
ما عندهم خروج نهائي .
ــــــ
ياخ انت زاتك جاي متين
|
Post: #17
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 10:22 AM
Parent: #13
والله يا وهبة من ناحية فاتتك ففاتتك
حاسدنا مالك ياخ
انت ناس بحري ديل كدول عالم اول
قاعدين تسووا فعاليات كتيرة
ونحنا قاعدين بي جاي (منتظرين الكهرباء) وكده
ـــ
غايتو الكلاكلة ما شة تتحول لي عاصمة للثقافة الهولندية
حاول تعال لينا يازول
|
Post: #14
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 10:13 AM
Parent: #12
والله بالغت لكن ياناذر ههههههه
انت الوداك ابو حمامة شنو ياناذر
انت عارف الحركة العملها ليك الجرسون غالباً تكون مقصودة
انا ملاحظ الحركة دي في المطاعم ليهم فترة
تمش تقول ليهم بالله واحد فول واتنين شطة
يجيبوا ليك وانت قاعد في محلك واحد كبدة واتنين شهية
وفي النهاية الواحد بلقي نفسو امام الامر الواقع
بالهنا يا ناذر
|
Post: #20
Title: Re: مشاوير آخر الليل ... الي خدر وهو يستبيح سماء الخرطوم
Author: طارق جبريل
Date: 09-24-2010, 10:30 AM
Parent: #14
خياناتكم دي يوم بتكتلكم
|
Post: #21
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 10:33 AM
Parent: #20
ياطارق ياخ
انت عمرك ده كلو قاعد خاينا في المغرب
في زول قال ليك حاجة
غايتو ناس جاحدة بشكل
تعال نتبادل ياخ
|
Post: #22
Title: Re: مشاوير آخر الليل ... الي خدر وهو يستبيح سماء الخرطوم
Author: طارق جبريل
Date: 09-24-2010, 10:37 AM
Parent: #21
وحاتك يا صديق انا زي خيانة خدر دة من الله خلقني ما شفتها
ياخي دة متفق معاي نمشي سوى عيد الضحية
ان شاد الله تعضيهو كديسة
|
Post: #23
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 10:40 AM
Parent: #22
نفهم من ده انك جاي الضحية ياطارق
مفكر اضحي في الشمالية
خرفان البلد دي من هسي عروضها ظهرت
ــ
عازمك ضحية هناك
|
Post: #24
Title: Re: مشاوير آخر الليل ... الي خدر وهو يستبيح سماء الخرطوم
Author: GamarBoBa
Date: 09-24-2010, 12:02 PM
Parent: #23
ليلة كانت في منتهي الروعة
شكرا لكل من ساهم فيها
طارق الفنان
ازهري ونادية والترتيب الجميل
الحضور الزاهي باهي
جميعكم لكم الشكر ان جعلتم ذلك ممكنا في كآبة الخرطوم كما أسلف ناذر
وياخي شكرا شعبي زاتو...الواحد كدة عمر وجدانه عام كامل
|
Post: #28
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 06:43 PM
Parent: #24
يا قمر أديني من نورك وميض
الا رحم الله العميري ياصديقي
أزهري ونادية الجدعة يوم شكرهم ما يجي انشاء الله
|
Post: #25
Title: Re: مشاوير آخر الليل ... الي خدر وهو يستبيح سماء الخرطوم
Author: Elmosley
Date: 09-24-2010, 12:11 PM
Parent: #1
التحية لطارق ولك
ولليل الخرطوم ونهارها
ولسوداننا الحبيب
|
Post: #26
Title: Re: مشاوير آخر الليل ... الي خدر وهو يستبيح سماء الخرطوم
Author: طارق جبريل
Date: 09-24-2010, 12:14 PM
Parent: #25
يا خضر العيد في البركل هناااااااااااااااك فوق في شبا
|
Post: #27
Title: Re: مشاوير آخر الليل ... الي خدر وهو يستبيح سماء الخرطوم
Author: الوليد محمد الامين
Date: 09-24-2010, 02:49 PM
Parent: #26
يا خضر
" ونحن نحب الحيالة اذا ما استطعنا اليها سبيلا ......"
أو كما قال محمود درويش !
خطر لي وانا اكتب هذه الكتابة مقطع قد\يم لقصيدة قرأتها قبل زمن بعيد : كانت الخرطوم واقفة علي ساق تغني ....
اظنه للصادق الرضي ان لم تخني الذاكرة ....
تسمع طارق ابوعبيدة فتنتشي ويأخذك الجمال ، ثم انك ولا شك ممتن لاولئك الناس الذين جملوا وجه هذي البلاد بالكلمات الجميلة والشجي والشجن : ما بين ظل الايك ... ونفحة الياسمين
الي لدن : أرميهو يا خية !
بعدها عليك ان تواجه واقعك القبيح ممن لم يقدروا اغنياتنا يوما فلم يقدرونا تاليا ، ومن ارتفاع سعر الرغيف وكيلو الطماطم !
شكرا يا خضر وياخي سعدت خصوصا بمقابلة قمربوبا وجها لوجه ......
|
Post: #37
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-25-2010, 06:11 PM
Parent: #27
الوليد ياصاحبي
كما قلت لك
كنت بصدد الكتابة أكثر لكن عاد شن نسو ـ كانت ليلة عظيمة بحق وحقيقة ليلة ليلاء
ومن النادر أن يجود الزمان بمثلها ـ غني خدر وأطربنا ـ كنت أراقب انفعالات الحاضرين
رأيت الكثير في تلك العيون ياصديقي .
اكتب بالله
|
Post: #30
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 06:54 PM
Parent: #26
يا طارق
لو جيت بي جاي صدقني ياني المرافقك للبركل
فياخ تعال بسراع
|
Post: #29
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-24-2010, 06:50 PM
Parent: #25
لك التحية ايضاً عزيزنا الموصلي
وللخرطوم امثالها
كن بخير
|
Post: #31
Title: Re: مشاوير آخر الليل ... الي خدر وهو يستبيح سماء الخرطوم
Author: بدر الدين اسحاق احمد
Date: 09-24-2010, 07:11 PM
Parent: #29
غايتو الزول دا بيبالغ ....
يا ريت يأخــى الواحد كان عرفو فى مكان غير المنبر دا ...
عندو حاجــة عجيبــة فى صوتو وكت يفكو ما عارف ليــه بذكرنــى بـيه محمود على الحاج ( بتاع الحقيبة )
رنــة حــزن عجيبــة وغريبة
والغريب كمان حافــظ ومتذكر حاجات عجيبة الزول الا ينحــت فى الذاكرة كـدا حتى يلقاها ...
الصقــت أذنــى بعوده ثم استلقيــت استقبل ما يدندن بــه
اسعدنــى جدا اسعاده للاخت الكريمة اشراقــه مصطفــى الى درجــة الفرح الطفولــى
. وسطر جديد
كمان المحيرنــى الزول دا قال طالبنــى حاجات كدا ليها عشرين سنــة وقال ما عندو مانع يدينــى اغنية
لحــن قصيدة ...
شكراً يا خــدر ياخ
وشكرا يا خضــر ياخ
قايتو الشوايعد ديــل بــس يطلعو ليك من ( عباس ) بيبقو حاجــة ما بتخلــص
|
Post: #32
Title: Re: مشاوير آخر الليل ... الي خدر وهو يستبيح سماء الخرطوم
Author: قصي مجدي سليم
Date: 09-24-2010, 07:19 PM
Parent: #31
حتي ان (ميمي) صاحبي كان يشاغلني
إنت متأكد من الإسم، ولا غلطان في الصفة والفعل
-----------------------------------------
| Quote: اني أشهد ايها الناس أن لخدر صوت لا يقاوم صوتٌ يفيق خلجات القلب يدخلك عبر المسامات تسكن رئتاك واوردتك ـ صوت يعيدك لنواحي الانسانية التي افقدتك اياها فنانو وفنانات (الجيل السادس عالي السرعة) افقتني وقوم كثر يا طارق يا ابوعبيده افقتنا والله وانت تستبيح ليالي الخرطوم بحضورك السمح الوسيم . |
وانا معك من الشاهدين
|
Post: #33
Title: Re: مشاوير آخر الليل ... الي خدر وهو يستبيح سماء الخرطوم
Author: Ahmed Abdallah
Date: 09-25-2010, 06:11 AM
Parent: #32
يا اخوانا ادونا خبر معاكـم في خرطوم السجم دي
بنجي ببتاعاتنا ما بنضايكـم
|
Post: #34
Title: Re: مشاوير آخر الليل ... الي خدر وهو يستبيح سماء الخرطوم
Author: محمد عبد الماجد الصايم
Date: 09-25-2010, 07:30 AM
Parent: #33
يا خضر .. طلعتوا روحنا والله!
خدر يغني بالعود .. وخضر يغني بالكيبورض!!
إن شاء الله ينفعكم ياخ!
_
| Quote: إنت متأكد من الإسم، ولا غلطان في الصفة والفعل |
قصي .. أنا بأكد ليكـ قبل عمكـ خضر!!
كلو في السليم
|
Post: #35
Title: Re: مشاوير آخر الليل ... الي خدر وهو يستبيح سماء الخرطوم
Author: ريهان الريح الشاذلي
Date: 09-25-2010, 10:07 AM
Parent: #34
حد الانتشاء زاتوووو
الود ده طلع غناي غناء شديد والله غناي لدرجة انو الواحد بكون داير يقالدو ويبكي ....
-
او كما قال خالد ماسا لخبطة شديدة ....
|
Post: #36
Title: Re: مشاوير آخر الليل ... الي خدر وهو يستبيح سماء الخرطوم
Author: Mahassin Ibrahim
Date: 09-25-2010, 10:49 AM
Parent: #35
ريهان : كيفك ؟
انتي برضو مشيتي ؟ انشاء الله ينفعكم
طيب الحاجات المبرمجه تحت تحت دى ادو الناس اللي بتبكي دى خبر عشان ينفعكم .
وخضر حسين : بس يكاوى ويخلي الناس تنجعر وبس؟
وكدى ابقي فالح وامش البركل كان تناني رجعت لاقيني
انشاء الله ينفعكم الخروف يا طارق وما تنس صاحبك دا تملاه ......... لمن يقول كفي.
|
Post: #44
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-25-2010, 07:19 PM
Parent: #36
يامحاسن
والله لو عندي ليكي اي وسيلة كان كلمتك شكلك موجوعة شديد
يازولة والله فاتتك وما ظنيت تتكرر (غايتو انا خدر ده قريب
ما شفتو بغني بالمزاج داك)
الزول ده قرب حاولو لاقيهو لايفوتكم
|
Post: #49
Title: Re: مشاوير آخر الليل ... الي خدر وهو يستبيح سماء الخرطوم
Author: Mahassin Ibrahim
Date: 09-26-2010, 06:46 AM
Parent: #44
خضر : سلامات واريتو حالك زين
شكرا علي لطافة ردك بس في ظروف بتمنعني من الحضور ...لكن لازم اداخل لان الجلسه كانت مستفزه لدرجة الجرسه.
خضر : احب ان اسجل هنا اعجابي باسلوبك في الكتابه ومنذ مداخلاتك تللك في بداية رمضان ودق الجرسه الذى جعل بعض اهل القرى يتكالبون عليك وانا كنت واحده منهم لان الموضوع كان شيق وحاولنا نرفه عن نفسنا شويه في نهارات رمضان تللك
المهم انا كنت مستمتعه بتلك المساجلات للغايه وما حدث بعد ذلك اني في يوم 16 رمضان فقدت شقيقي الحبيب ( محمد) ....ربنا يرحمهم ويغفر ليهو.
الظروف ما لمتنا ببعض لكني سماعيا اعرف عنك الكثير كرطاني وحبيب وصديق اصدقائي ...كدى اسال ازهرى.
اتمني يا خضر انت تكون مادام ساكن الكلاكله وبترطن بتكون بتعرف اعظم شخصيه قابلتها في حياتي والذى اتمني ان يكون بخير وعافيه حتي التقيه(( محمد احمد عبدالمنان)
تحياتي له وتحياتي لاسرتك وتحياتي للمدام ولكل الرطانه من صوارد وحتي عبرى وجزيرة صاى ونلوته و.....الخ
|
Post: #43
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-25-2010, 07:17 PM
Parent: #35
ماسا بالله قال لخبطة شديدة يا ريهان
والله بالغ هو زاتو اليوم داك غايتو
كان في حاجات ما مفهومة خالص
ـ
غايتو خدر ده غناي حد النشاء يا ريهان
النشاء ده مرحلة بعد الانتشاء
|
Post: #40
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-25-2010, 06:21 PM
Parent: #34
ودالصايم
والله الحاصل بي جاي شئ لايصدق
شئ خدر وشئ كيلو الطماطم بقي بي الفين ونص بس
وشئ استفتاء وشئ عود ومشاوير اخر الليل
غايتو انصحك انك تحصل السوق ياصاحبي البتاع ده قرب يشطب
|
Post: #42
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-25-2010, 07:14 PM
Parent: #33
والله يا احمدعبدالله كان بقيت قاعد في الخرطوم
تكون اتلومت معانا جملةً وتفصيلا .
يازول العيدمبارك عليك
|
Post: #39
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-25-2010, 06:18 PM
Parent: #32
قصي ازيك ياخ ازيك
ضحكتني والله
يازول انحنا اي زول اسمو محمد بنسميهو ميمي تيمناً (بميمي صفية) وهو سواق عريق
من أوائل سائقي اللواري وهسي كان ما اخاف الكضب سايق ليهو بص سياحي (الخرطوم عبري حلفا)
وميمي صاحبي ده برضو سواق (سواق احلاك ياقصي) .
يازول انت قاعد في البلد دي والواحد مالامي فيك ـ نجيك وين ياخينا نجيك وين ياقصي .
مودتي
|
Post: #38
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-25-2010, 06:15 PM
Parent: #31
| Quote: غايتو الزول دا بيبالغ .... |
صدقت والله يا بدر الزول ده غناي عديل وصوتو سمح بالحيل وبختار كويس
بعرف الغناء البهبش الروح . ياخ كان تجي وتنبسط معانا .
ــــ
اها الشيوعيين عرفناهم عباس ده منو يابدر ويمرقوا منو كيف وبدخلوهو زاتو كيف ؟
|
Post: #41
Title: Re: مشاوير آخر الليل ... الي خدر وهو يستبيح سماء الخرطوم
Author: بخاري عثمان الامين
Date: 09-25-2010, 06:48 PM
Parent: #38
|
Post: #45
Title: Re: مشاوير آخر الليل ... الي خدر وهو يستبيح سماء الخرطوم
Author: خضر حسين خليل
Date: 09-25-2010, 07:21 PM
Parent: #41
يا باخ
ازيك ونجلاء
انت تشابه عليك الصور ولا شنو
الزول ده كان لابس تي شيرت يا باخ
القميص الابيض ده يوم الخاتم
ــ
ياخ ما ترمي الصور خلينا نشوف
|
Post: #46
Title: Re: مشاوير آخر الليل ... الي خدر وهو يستبيح سماء الخرطوم
Author: معاوية عبيد الصائم
Date: 09-25-2010, 09:30 PM
Parent: #45
تحيا الصداقة الهولندية السو دانية ؟
اضعف الايمان
شكرا يا خضر
|
Post: #47
Title: Re: مشاوير آخر الليل ... الي خدر وهو يستبيح سماء الخرطوم
Author: معتصم محمد صالح
Date: 09-25-2010, 09:46 PM
Parent: #46
خضر يا وغد.. ياخ ما قلنا ليكم مربوطين في السرير .. وناس الكرين كراعهم ما انقطعت من الكلاكلةرغم بعد المسافة .. وحتى وهبة قطع المشوار من الشعبية .. وسبقتهم انعام حيمورة وزوجها واشراقة .. وانت يا ما عندك خوة قاعد على بعد خطوات وسايق خدر ولافي بيهو ..طبعا الحارقني انو خدر يجي ويمشي وما الاقيهو .. انت طبعا متوفر ..
|
Post: #48
Title: Re: مشاوير آخر الليل ... الي خدر وهو يستبيح سماء الخرطوم
Author: Ashraf el-Halabi
Date: 09-25-2010, 10:46 PM
Parent: #41
خدر بالضاد سلامات
أما عن خضر بالدال فحدث ولا حرج
خدر لمن يغني تقعد تشرب تشرب تشرب (قصدي: تسمع تسمع تسمع) ويكون مافي أي حاجة، وفجأة تلقى نفسك إتلحستا
غالباً يا خضر الزول دا كابي في صوتو حاجة!.
لكن الغريبة الراجل، بالإضافة لإنو فنان، طلع زول زينا كدا!
وود بلد كمان!
إجازتو كلها قضاها واجبات اجتماعية
فواتح وعيادات مرضى وصلات طيبة ومجاملات للسميعة
أراهنك يا خضر إنو اللاعب موضوع الشكوى دا ما قعد ساعتين على بعض مع ناس بيتهم
ما مشكلة، في ميزان حسناتك وليس عداداتك يا فنان
ـــــــــــــــــ
يا خدر لو في يوم قصرت في الحاجات الفوق دي ما تقلق
يكفيك كفنان تجويدك للغا
ويكفيك أنك لسة قادر تتعب وتجتهد وتنتج غنا خاص حتى وإنت في الغربة
ويكفيك صوتك الكابي فيهو بنج حصين دا
|
Post: #50
Title: Re: مشاوير آخر الليل ... الي خدر وهو يستبيح سماء الخرطوم
Author: الوليد محمد الامين
Date: 09-26-2010, 10:08 PM
Parent: #48
عاليا الي حين عودة ....
|
|