وطني البغني علن .. واحبو بلا خفا......

Post: #1
Title: وطني البغني علن .. واحبو بلا خفا......
Author: أبي بكر سيد احمد
Date: 10-07-2010, 03:46 PM
Parent: #0

قال استاذي ... محمد الحسن سالم حميد

من بعض حلم اهلي المباح ..

هات الصباح

وهاك كل شئ

شجني البهدهدو فوق ايدي

همي الأبوي ... امي وإخي

زمني اللي لي

وطني البريدك مني لي

وهني البوسدو من حنان صدري بغطي بضي عيني

يالماحصل جعت ومضغتك ... وانت ماك وثني الصنيعة راحتي

يالما بصد لك بي قفاي .... يالما بفوتك بي وشي

دمي البحرسو من الصقور لحمي البحاحيلو الحدي

نغمي البلاهو ولا طيور صدحت ولا نقرش نقي

Post: #2
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-07-2010, 03:54 PM
Parent: #1

ياهوالبفيض إنساني من نهر الرسول

ما هو العريض الحاني زي حجر البتول

حلمي النقيض

وطني الخجول بالعافيه في الزمن المريض

هاك المنام من مقلتي

Post: #3
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-07-2010, 04:38 PM

وطني البغني علن .. وأحبو بلا خفا ...

وطني العديل الفقري... والعامر وفا

وطني ...و...كفا

يا مبدي بي فجر المسيح ..

مختوم بمسرى المصطفى... (ص)

Post: #4
Title: Re: وطني البغني علن .. واحبو بلا خفا......
Author: GamarBoBa
Date: 10-07-2010, 06:35 PM
Parent: #3

يا فنان..
ياخي حمد الله بالسلامة..
أمس بس لقيت نفسي مع المغيرب قريب من نادي الخرطوم جنوب،،قلت احضر لي بروفة كاربة واشوفك واسلم عليك..لقيتك مافي ..واتمني يكون كلموك..تلفوناتك ما بترد يا حبيب

لم يعد لنا وطن تغني له،،لم يعد
حتي لم تعد في الوطن حسناء تستحق أغانيكم الجميلة يا فنان
ودي الدنيا ذاتا واتقمست يا فنان..اتقسمت وما يلمها تاني غير الله و قدرة الله..خليك من من محبوبة في وطن مجوبق

اتمناك طيب

_

Post: #5
Title: Re: وطني البغني علن .. واحبو بلا خفا......
Author: الطيب شيقوق
Date: 10-07-2010, 06:35 PM
Parent: #3

ما بصدق اوع تكون انت ابو بكر السنجك؟

Post: #6
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-07-2010, 07:18 PM
Parent: #5

بوبا الجميل سلامات يا راقي ...

اكيداناما محظوظ بي شوفتك البارح..

لكن والله ليك وحشه بقامة سوامق الجبال

بوصلك انا إن شاء الله

Post: #7
Title: Re: وطني البغني علن .. واحبو بلا خفا......
Author: هاشم أحمد خلف الله
Date: 10-07-2010, 07:21 PM
Parent: #1

ابوبكر الجميل الف حمداُ لله على سلامتك
بحضورك المنبر نور ليك وحشه يا فنان يا اصيل

تخريمة :-

صاحبك مرزوق حايعمل عملية عيون في مستشفى
المغربي بجده ادعو له بالشفاء .

Post: #8
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-07-2010, 08:51 PM
Parent: #7

شيقوق الحبوب ...سلام عليك ...

ياهو ذاتووو وحياتك... مشتاقين ليكم والله

وسمعنا انك جيت البلد دي وعديت بي فوق راسنا ساااااااااكت

بعد ده إن شاء الله بنكون معاكم طواااالي ...

تحياتي ومودتي

Post: #9
Title: Re: وطني البغني علن .. واحبو بلا خفا......
Author: Elmosley
Date: 10-07-2010, 09:15 PM
Parent: #1

ياسلاااااااااااااااااااااااااااااااااااام
ياخي كم سعبد انا بوجودك هنا
والله ماغبتو من خاطري انت وصاحبك عمر جعفر
ولابد ليكم جنس لبده
ياخي داير اشكرك شدييييييييييد على ترحابك الكريم
لي في السودان وما عارف اجازيك كيف كدي قول لي بالله
مرحب يافناااااااان

Post: #10
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-07-2010, 09:46 PM
Parent: #9

يا سلااااااااام ياهاشم ...

زمن طويل والله ...

وطوااالي في البال والخاطر انت وصاحبك مرزووق ...

الف الف سلامه ليهو وربنا يبلغو العافيه الكامله ...

عليك الله نزل لي رقمو.. ورقمك في الماسنجر ...

بنلاقيك إن شاء الله ... ونتونس بمزاااااااااج تسلم يا غالي

Post: #11
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-08-2010, 01:07 AM
Parent: #10

استاذي وصديقي موصلي ...

اشواقنا تسبق كل ميكانيزمات التعبير ...

ماتتخيل سعادتنا بجيتك القصيرة للبلد

وسعادتنا الأكبر بمعرفتك ...واستشفاف ما يضوع على جوانبك من تواضع جميل بيشبه اولاد البلد

واحتفائنا الغير محدود بفكرة رجوعك تاني لينا... قريب إن شاء الله

ربنا يسلمك لينا .. ويديك الصحة والعافيه

وإن شاء الله تجينا سالم ...وناوي تستقر ...وتقبل بالوظيفه إياها...

__________________
الأيام دي مستمتعيين بوجود علي السقيد معانا...

Post: #12
Title: Re: وطني البغني علن .. واحبو بلا خفا......
Author: هشام درماس
Date: 10-08-2010, 09:35 AM
Parent: #11

حبيبنا والله بالجدمنووووووووووووووور

Post: #13
Title: Re: وطني البغني علن .. واحبو بلا خفا......
Author: محمد علي شقدي
Date: 10-08-2010, 10:08 AM
Parent: #12

تحية ود للانسان الجميل قبل الفنان المبدع والصوت الطروب ابو بكر محمد سيد احمد ود شيخنا

وطن يقتله الساسه ولا يحي الا بالحب

---------------

والله اشواق كتيره لكل ما لديك بالله ما تنقطع عنا

Post: #14
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-08-2010, 10:32 AM
Parent: #13

يا درماس ... الحاصل شنو ..؟؟؟

ويين انت يا راجل ...سألت منك قالوا لي مسافر

مشتاقيين يا درمه ...

ورينا اخبارك بالله عليك ...

إن شاء الله امورك كلها كويسه ...

تحياتي للمعاك ...

Post: #15
Title: Re: وطني البغني علن .. واحبو بلا خفا......
Author: Elmosley
Date: 10-08-2010, 12:53 PM
Parent: #11

Quote: استاذي وصديقي موصلي ...

اشواقنا تسبق كل ميكانيزمات التعبير ...

ماتتخيل سعادتنا بجيتك القصيرة للبلد

وسعادتنا الأكبر بمعرفتك ...واستشفاف ما يضوع على جوانبك من تواضع جميل بيشبه اولاد البلد

واحتفائنا الغير محدود بفكرة رجوعك تاني لينا... قريب إن شاء الله

ربنا يسلمك لينا .. ويديك الصحة والعافيه

وإن شاء الله تجينا سالم ...وناوي تستقر ...وتقبل بالوظيفه إياها...

__________________
الأيام دي مستمتعيين بوجود علي السقيد معانا..

والله يا ابا بكر
استقبالكم ولد في شخصي كم من الالحان والتوزيعات والحب لكم جميعا
ومن اول مره اقابلك فيها احسست بانني امام صديق منذ امد بعيد
بالنسبة للوظيفه ربما اعرض على الكلية تغيير الامر الى تدريس التآليف
اونلاين وهكذا ندخل الجامعة والكلية الى الالفية الثالثة والفكرة ليست صعبة اذ انني
بالفعل سآفتح هذا الكورس قريبا
السقيد ده كنكشوا فيهو قوي
وبالمناسبة ارشحك لتغني اغنيته الشاكوشيه (انتهت قصة غرامنا) وخلي الباقي علي
ياخي دي بتشبه صوتك بشكل غير عادي وبتخيل انو الشعب السوداني كلو يبكي وهو بسمعها
منك والشعب السوداني يعشق البكائيات هل تذكر لما مجذوب اونسه كان بغني يالرحتو طولتو
ولا فيصل الصحافه لمن ظهر بمسكين انا
السقيد طبعا ما زول شواكيش ولا بقدر عليها هههههه
تحياتي

Post: #16
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-08-2010, 01:10 PM
Parent: #15

شقاده الحبوب ...مرورك علينا دايماً بيسعدنا والله

Quote: وطن يقتله الساسه ولا يحي الا بالحب

يسلم تفكيرك يا شقاده ... هو كده بالضبط ...

لولا من نحبهم لاستعصت الحياه في هذا الوطن المكلوم الى حد غير معقووول

والوطن يا صديقي ما مجرد حفنة تراب ... الوطن مجموعة معطيات اهمها من تنتمي اليهم

عشان كده ربنا يجفظكم لينا ..

تحياتي للشباب المعاك بدون فرز

تسلم يل عزيز

Post: #17
Title: Re: وطني البغني علن .. واحبو بلا خفا......
Author: احمد العربي
Date: 10-08-2010, 02:07 PM
Parent: #16

ابوبكر سيد اجمد
ياخ انت زول فنان
ويكفينا طربنا لصوتك من اول سمع

Post: #18
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-08-2010, 05:21 PM
Parent: #17

إستاذي الموصلي ...

تحياتي ..

Quote: وبالمناسبة ارشحك لتغني اغنيته الشاكوشيه (انتهت قصة غرامنا) وخلي الباقي علي
ياخي دي بتشبه صوتك بشكل غير عادي وبتخيل انو الشعب السوداني كلو يبكي وهو بسمعها
منك والشعب السوداني يعشق البكائيات هل تذكر لما مجذوب اونسه كان بغني يالرحتو طولتو
ولا فيصل الصحافه لمن ظهر بمسكين انا
السقيد طبعا ما زول شواكيش ولا بقدر عليها هههههه
تحياتي

شكراً على الشاكوشيه المميزه ... وطوالي إن شاء الله نشرع في الحفظ...

الله يديك العافيه ...

Post: #19
Title: Re: وطني البغني علن .. واحبو بلا خفا......
Author: سفيان بشير نابرى
Date: 10-08-2010, 05:42 PM
Parent: #18

حبيبنا انت وحُميد
يا ابو بكر ياخ حميد ده محل تخم
غني ساااااي ولا يهمك وكلو بيشبه
الوطن وبيشبه الولد والوالد والجنا.

بالله ما تنقطع من هنا تاني .

Post: #20
Title: Re: وطني البغني علن .. واحبو بلا خفا......
Author: إبراهيم عبد الحليم
Date: 10-08-2010, 07:10 PM
Parent: #19

بكورى

كلمة وااااحدة

مشتاقوووووووون

ابراهيم

Post: #21
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-08-2010, 07:43 PM
Parent: #19

وقال استاذي السر عثمان الطيب ...

يا راقداً قدام عيوني نهر عسل وترعة لبن

انا ليك اشابي وبيك اهاتي وضمة ماقادر اصل

حوريه من الجنه فوق وجه الأرض...

يا ااااااا دي السماحه ودا العرض

انا قلبي بيدوب حبك انت النار تحرقو

تب ...نجض..

لهفان عليك اه يا بلد ...

جاي مد ايديك جيب حضنك الدافي الحنون

ابقا لي عون انا ما وليدك ...

وخاف لي يا وطني الجنون

مابين شجون وشجون وحاتك ..

كل يوم تزداد شجون

Post: #22
Title: Re: وطني البغني علن .. واحبو بلا خفا......
Author: الطيب شيقوق
Date: 10-08-2010, 08:22 PM
Parent: #21

Post: #23
Title: Re: وطني البغني علن .. واحبو بلا خفا......
Author: الطيب شيقوق
Date: 10-08-2010, 08:28 PM
Parent: #22

Post: #24
Title: Re: وطني البغني علن .. واحبو بلا خفا......
Author: احمد العربي
Date: 10-08-2010, 09:02 PM
Parent: #23

Post: #25
Title: Re: وطني البغني علن .. واحبو بلا خفا......
Author: Elmosley
Date: 10-08-2010, 11:17 PM
Parent: #18

Quote: شكراً على الشاكوشيه المميزه ... وطوالي إن شاء الله نشرع في الحفظ...

الله يديك العافيه ...

تسلم واوعه تخليهو اتلوووووووويق
قول ليهو الموصلي مش اداك كل النجوم ورجعتي القلب يدق تاني
ومداكا مداد وقولي قولي وكلميني؟؟؟؟
ديل كلهن شالن بايديو وشديدو ولضيدو ولسه عندو نوايا حسنه للقلع
وطبعا استغل محبتي ليهو ههههه
اها وحات معزتك ومعزتي عندو تقلعها وقريهو الكلام ده

Post: #26
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-09-2010, 00:41 AM
Parent: #25

العزيز احمد العربي ...

الفين شكر ليك يا حبيب

وانا محظوظ بيكم ... وبي اشراقاتكم الفكريه النيره

وكمان انا واثق انكم البتعدلوني .. لو خالطني شئ من الميل

خالص مودتي

Post: #27
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-09-2010, 00:51 AM
Parent: #26

ياااااااااااااا سفيان بشير ..

الشوق مطر يا صديقي القديم ...

Quote: حبيبنا انت وحُميد
يا ابو بكر ياخ حميد ده محل تخم
غني ساااااي ولا يهمك وكلو بيشبه
الوطن وبيشبه الولد والوالد والجنا.

تسلم يا جميل ...

وربنا يجعلنا جميعاً ممن يوفوا جزء من حق الوطن عليهم ..

عبرك احيي كل الجميلين البشبهوك

Post: #28
Title: Re: وطني البغني علن .. واحبو بلا خفا......
Author: إدريس محمد إبراهيم
Date: 10-09-2010, 07:01 AM
Parent: #27

أبوبكر سيد أحمد ...

تحية المودة والتقدير والمعزّه ....

عندما أسمعك أيها الفنان الجميل لا يساورني شك في أن الفن السوداني لا يزال بخير ... فبمثلكم أستاذ أبوبكر ترتقي الفنون ... كتر الله من أمثالكم ذخراً للغناء الجميل .. ومرتعاً وواحة جميلة نتكيء في ظلالها الوريفة من وهدة هذا السقوط الذي نعيشه ....

دمت لنا يا حبيب ....

أرجوك راجع الماسينجر ....

مع خالص الحب والتقدير ؛؛؛

Post: #29
Title: Re: وطني البغني علن .. واحبو بلا خفا......
Author: هشام درماس
Date: 10-09-2010, 10:44 AM
Parent: #28

اخى وصديقى الحبيب ابى بكر ... لك التحيه وكيف اولادك انشاءالله بخير انابخير والحمدلله وموجودفى الدوحه لتجديدالاقامه وسوف اغادرللسودان يوم الثلاثاءالقادم واتمنى ان اقابك( فى زمن ماضى وزمن جاى وزمن لسه) وعبر التحيه و الاحترام للاستاذالراقى معلم الاجيال .. يوسف الموصلى ومبروك عليك الشاكوش وعقبالنايااااااااب

Post: #30
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-09-2010, 11:42 AM
Parent: #29

ابراهومه العزبز..

عساك مبسوط يا حبيبنا

مالك قاطع اخبارك عنا .. البلاد النازيه ماخداك مننا على الاخر

إن شاء الله مشروعك ماشي كويس ... كما نتمنى لك دائماً

اجمل مافيك انك مجتهد

تسلم يا غالي

Post: #31
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-09-2010, 11:51 AM
Parent: #30

اللذيذ شيقا ...

شكراً دايماً على تفوقك التكنلوجي ..

وإنشاء الله نردها ليك بتنزيل صور لبلاد العرييب هههههههههه

الوجيه احمد العربي :

الف شكر ليك ليك يا عزيز ...ويبدو انك منافس اصيل للقمر بوبا وود شيقوق

لا عدمناك يا صديقي

Post: #32
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-09-2010, 12:14 PM
Parent: #31

استاذي الموصلي .

Quote: وطبعا استغل محبتي ليهو ههههه
اها وحات معزتك ومعزتي عندو تقلعها وقريهو الكلام ده

وانا كمان بستغل محبتي انا ليهو في إقناعه

شكراً يا رائع ...

علم وينفذ

Post: #33
Title: Re: وطني البغني علن .. واحبو بلا خفا......
Author: Elmosley
Date: 10-09-2010, 01:46 PM
Parent: #29

Quote: اخى وصديقى الحبيب ابى بكر ... لك التحيه وكيف اولادك انشاءالله بخير انابخير والحمدلله وموجودفى الدوحه لتجديدالاقامه وسوف اغادرللسودان يوم الثلاثاءالقادم واتمنى ان اقابك( فى زمن ماضى وزمن جاى وزمن لسه) وعبر التحيه و الاحترام للاستاذالراقى معلم الاجيال .. يوسف الموصلى ومبروك عليك الشاكوش وعقبالنايااااااااب

هشام العزيز ياخي والله انا بحب الفنانين جدا وبعتز بيهم
لذا فانني ايضا احبك
لو علم بعض الذين يسوقون الفتنة احيانا بيننا ذلك لابتعدوا
ده دوما شعوري فان صغارهم هم ابنائي وكبارهم اخواني وكبار كبارهم ابائي
واي فنان جاد سبقني فهو استاذي لا محالة
اها نجي للشواكيش حضر دقنوسك (الشواكيش رااااااااقده) ههههههه
لم اكن محظوظا بالتلاقي معك فكلينا هاجر وان اختلف الزمان
غالبا نلتقي بالدوحة باذن الله
تسلم ياهشام وربنا يديم المحبة بيناتكم

Post: #34
Title: Re: وطني البغني علن .. واحبو بلا خفا......
Author: عبد الدائم سيد أحمد
Date: 10-09-2010, 01:54 PM
Parent: #33

ابوبكر
موصلى
درماس

اول مرة اشوف لى فنانين صاحيين بالنهار

ابوبكر اضفنى لقائمة اشد المعجبين
اجمل اغنية غنيتها كانت لعثمان الشفيع قبل سنتين تقريبا"
فى برنامج به كثير من الفنانين الشباب غنو للشفيع
يا ريت تذكرنى اسم الاغنية

Post: #41
Title: Re: وطني البغني علن .. واحبو بلا خفا......
Author: Elmosley
Date: 10-09-2010, 11:30 PM
Parent: #34

Quote: ابوبكر
موصلى
درماس

اول مرة اشوف لى فنانين صاحيين بالنهار

عبد الدائم
انا غايتو مفروض يسموني يوسف (السقيد) لاني بصحي اتنين الفجر
اها وعلي يسموهو (علي الموصلي للنوم)) ههههه

Post: #35
Title: Re: وطني البغني علن .. واحبو بلا خفا......
Author: هشام درماس
Date: 10-09-2010, 04:45 PM
Parent: #33

الاستاذ الموصلى .. الدقنوس جااااااهز وعلى فكره نحن اتقابلنافى دارالخرطوم جنوب يوم الاحتفال الكان عملوه ليك فى زيارتك الفائته وبعدين انا مامستقر فى الدوحه عملت اقامه وبقيت اجى اجددها وارجع وانشاءالله نتقابل قريب فلك كل الحب والمودة ولصديقى العزيزابى بكر الشكروالتقدير0

Post: #36
Title: Re: وطني البغني علن .. واحبو بلا خفا......
Author: إبراهيم عبد الحليم
Date: 10-09-2010, 05:07 PM
Parent: #35

هشام درماس

يا اخوى انت واقع بين شاكوش الشايقية - ابوبكر وشاكوش الدناقلة - الموصلى انفد بجلدك واقنع من خير فيها هذا اذا لم تكن تنتمى لاحد القبيلتيين مثلى

انفصاااااال يا ابو مرووووووة

تحياتى هشامو

Post: #37
Title: Re: وطني البغني علن .. واحبو بلا خفا......
Author: هشام درماس
Date: 10-09-2010, 05:13 PM
Parent: #36

ابراهيم ودعبدالحليم .. ليك وحشه ياراقى انا طبعا شايقى ابا عن جد بس انت خليك بعييييييييييد

Post: #38
Title: Re: وطني البغني علن .. واحبو بلا خفا......
Author: إبراهيم عبد الحليم
Date: 10-09-2010, 06:25 PM
Parent: #37

Quote: ابراهيم ودعبدالحليم .. ليك وحشه ياراقى انا طبعا شايقى ابا عن جد بس انت خليك بعييييييييييد

الليلة وووب

انا بعد ده حاترجم اغنية حمادة المنا وسافر ما كلمنا حمادة بابوا جنب بابنا
للغة الالمانية واغنيها للمستشارة الالمانية وبالالمانى كمان وحاتكم اليورو حار وما بندار هههه
غايتو اخير لينا من بلح الشمالية ده
وعاشت محمد عثمان الميرغنى
وعاشت

Post: #39
Title: Re: وطني البغني علن .. واحبو بلا خفا......
Author: الطيب شيقوق
Date: 10-09-2010, 06:59 PM
Parent: #38

http://www.youtube.com/watch?v=6GW_SrZCKPE

Post: #40
Title: Re: وطني البغني علن .. واحبو بلا خفا......
Author: خالد علي محجوب المنسي
Date: 10-09-2010, 09:17 PM
Parent: #39

ومن زمن
بسمع بالفنان أبي بكر سيدأحمد وأنه مبدع وفنان
والفن له أصوله وركائزه ( وهو سمعت عودوا راسي وضارب في الأعماق )
وسمعت أنه يدعم جمال فنه بالروح الطيبة التي يملكها والإنسانية التي عامر
به قلبه ( يعني أخو أخوان )
لم أسمعه ولم ألتقي به لكن أحببته من على البعد
لكن لأول مرة أعرف أنه أصلع ... ولا دي صورة رئيس أثيوبي سابق سبق لهيلا سلاي ( حد معرفتنا )

برجع ليك براحة يا ابي بكر هسي في ضيق من أمري
ولحين ميسرة نلتقي يا جميل
......................
دي لفة ودايس أبنص ومميل الرقبة زي ماقال شيقوق ومع برمة عمة وسفة دقار

بوبا أظهر وبان حرمت عيوني يا طيب لقاك
وسعيت لقفل تلفونك في اوسع خُطاك
يابوبا يابوبا
تحياتي ومودتي
وأول الغيث قطرة كنت الرشاش ونحن في انتظار وابل الرش ويخدر المنبر
وزي ما كان وأجمل بعود الطيور المهاجرة عن المنبر
ناس جمال أرواحهم كان يشدنا شدَِ لأدمان المنبر

Post: #42
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-10-2010, 00:10 AM
Parent: #40

صديقي ادريس محمد ابراهيم

Quote: عندما أسمعك أيها الفنان الجميل لا يساورني شك في أن الفن السوداني لا يزال بخير ... فبمثلكم أستاذ أبوبكر ترتقي الفنون ... كتر الله من أمثالكم ذخراً للغناء الجميل .. ومرتعاً وواحة جميلة نتكيء في ظلالها الوريفة من وهدة هذا السقوط الذي نعيشه ....

اشكرك يا جميل ... ونحنا والله بنعتز بمعرفة امثالك ... وهم شمعات تنير لنا دربنا

شكراُ جزيلاُ على الهديه اللطيفه...ربنا يقدرنا وننجزها كما تحب وترضى

خليك متواصل معانا رجاءً

تسلم يا عزيز

العزيز والصديق الفنان درماس

Quote: اخى وصديقى الحبيب ابى بكر ... لك التحيه وكيف اولادك انشاءالله بخير انابخير والحمدلله وموجودفى الدوحه لتجديدالاقامه وسوف اغادرللسودان يوم الثلاثاءالقادم واتمنى ان اقابك( فى زمن ماضى وزمن جاى وزمن لسه) وعبر التحيه و الاحترام للاستاذالراقى معلم الاجيال .. يوسف الموصلى ومبروك عليك الشاكوش وعقبالنايااااااااب

ربنا يجيبك لينا سالم ... ونحن في إنتظارك في زمن جاي وزمن لسه

بالنسبه لي عقبالكم ... ياخي انا واثق انك يوم تلاقي الموصلي حتكون مبسوووووط خالص

وعشان تطمئن هاااااك:-

Quote: هشام العزيز ياخي والله انا بحب الفنانين جدا وبعتز بيهم
لذا فانني ايضا احبك
لو علم بعض الذين يسوقون الفتنة احيانا بيننا ذلك لابتعدوا
ده دوما شعوري فان صغارهم هم ابنائي وكبارهم اخواني وكبار كبارهم ابائي
واي فنان جاد سبقني فهو استاذي لا محالة
اها نجي للشواكيش حضر دقنوسك (الشواكيش رااااااااقده) ههههههه

وكويس انك مجهز دقنوسك

شكراًاستاذي الموصلي ... وانا سعيد كوني وفقت راسين في الجمال

شكراًيا حبايبنا على المرور ...وماتنقطعوا ...

Post: #43
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-10-2010, 00:52 AM
Parent: #42

حبيبنا عبد الدائم سيد احمد...

شكراً اولاً على تشابه الأسماء (بجامع سيد احمد في كل)

وشكراً على جمالك الفياض :
Quote: ابوبكر
موصلى
درماس

اول مرة اشوف لى فنانين صاحيين بالنهار

ابوبكر اضفنى لقائمة اشد المعجبين
اجمل اغنية غنيتها كانت لعثمان الشفيع قبل سنتين تقريبا"
فى برنامج به كثير من الفنانين الشباب غنو للشفيع
يا ريت تذكرنى اسم الاغنية

هههههههههه انت من زمن الفنانين النواميين ... الغنا عندنا يا عزيز بيقيف - بأمر السلطه -الساعه

11 عشان كده ا لفنانين بقوا موظفين ....وعشان تتأكد شوف ده :-

Quote: انا غايتو مفروض يسموني يوسف (السقيد) لاني بصحي اتنين الفجر

اها وعلي يسموهو (علي الموصلي للنوم)) ههههه

يا استاذي الموصلي ..يبدو انو الحفلات عندكم (صباحي ) وظنيتك تلقط في العدادات الليل كلوهههههههه

شكراً على مروركم الجميل ... وتسلموا ان شاء الله

ابراهومه النازي ..

Quote: يا اخوى انت واقع بين شاكوش الشايقية - ابوبكر وشاكوش الدناقلة - الموصلى انفد بجلدك واقنع من

انت ما جاك الخبر ولا شنو ...؟؟؟

في نيفاشا القادمه ح يكون حق تقرير المصير عند الشمالين

نشوفك بتمشي وين بلسانك الهتلري ده هههههههههه

اسمع نصيحة اخوك هشام درماس :
Quote: ابراهيم ودعبدالحليم .. ليك وحشه ياراقى انا طبعا شايقى ابا عن جد بس انت خليك بعييييييييييد

وده كلو مابحلك :-
Quote: الليلة وووب

انا بعد ده حاترجم اغنية حمادة المنا وسافر ما كلمنا حمادة بابوا جنب بابنا
للغة الالمانية واغنيها للمستشارة الالمانية وبالالمانى كمان وحاتكم اليورو حار وما بندار هههه
غايتو اخير لينا من بلح الشمالية ده
وعاشت محمد عثمان الميرغنى
وعاشت

هههههههههههههههههههههه

شكراً يا حبيبنا وخليك معانا ....

شيقا العرييب الراقي ... شكرامره تانيه وتالته على تنزيلاتك الجباره ...

ياخي وييين باقي الحلوين ... حقو( تقدلو) بي هنا لحدي ما ود المنسي يصحا ويسوي لينا الإنجمامه

الما خمج ديك

في انتظارك يا شيقوق ومعك (سموحه )هاهاهههاهاهاهاهاهاي

يا ود المنسي ده شنو البتسو فيهو ده ..

مالك يا زول قاطع كده ...

داير ليك عيزومه والا شنو .... بعدين شنوحكاية مشغول دي

ما تصحا معانا ياخ وبطل كسل البتروليين ده

نحنا مشتاقيين ليك اااازوووول

بالله عليك وريني اخبارك اول بأول بالتلفون او الإيميل .. او الحمام الزاجل

تسلم يا غالي

Post: #60
Title: Re: وطني البغني علن .. واحبو بلا خفا......
Author: Elmosley
Date: 10-11-2010, 06:14 AM
Parent: #43

Quote: وكويس انك مجهز دقنوسك

شكراًاستاذي الموصلي ... وانا سعيد كوني وفقت راسين في الجمال

شكراًيا حبايبنا على المرور ...وماتنقطعوا ..

بس لانك انسان وفنان

Quote: .يبدو انو الحفلات عندكم (صباحي ) وظنيتك تلقط في العدادات الليل كلوهههههههه

حبيبنا ابوبكر انا هنا حفلاتي مع الكومبيوتر في التلحين والتوزيع والمهابشه معاكم
والقرايه حقت الكبر
الغنا بي هناك في الشرق الاميركي

Post: #44
Title: Re: وطني البغني علن .. واحبو بلا خفا......
Author: Elmosley
Date: 10-10-2010, 02:06 AM
Parent: #35

Quote: لاستاذ الموصلى .. الدقنوس جااااااهز وعلى فكره نحن اتقابلنافى دارالخرطوم جنوب يوم الاحتفال الكان عملوه ليك فى زيارتك الفائته وبعدين انا مامستقر فى الدوحه عملت اقامه وبقيت اجى اجددها وارجع وانشاءالله نتقابل قريب فلك كل الحب والمودة ولصديقى العزيزابى بكر الشكروالتقدير

معليش والله اتذكرت الظاهر ده الزهايمر
ولا يمكن اول تواصل بيناتنا انت كنت في الدوحه
ليك التحيه باذن الله معاكم قريب
انا اتكلمت مع محمد جعفر انو حتكون في ليله انتو تغنو وانا اناقشكم
يعني كل واحد اغنيه من اغنياتو

Post: #45
Title: Re: وطني البغني علن .. واحبو بلا خفا......
Author: محمد علي شقدي
Date: 10-10-2010, 09:04 AM
Parent: #44

بالله يا بكري غني للوطن زي ما كنت بتسمعنا من خطاب اللحن الاصيل الجميل للمحبوبه امثال ( عقلي انشغل بهواك ) كان الحجارة تلين وتبطل شرر

----------------------

استاذنا الموصلي كل الرائعين من الفنايين هنا الاكيد ان صوت بكري لا يحتاج مني ابدا لتزكيه لديكم فقط نامل دوما بالجديد والجديد المميز لنضع لوحات جادة في فراغ زحمة معرض المهرجيين

--------------------
يا ابو اسماء بوس لينا عروستنا الامورة اسماء ولكل الاهل والاحباب تحياتي

Post: #46
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-10-2010, 10:37 AM
Parent: #45

استاذي الموصلي :

Quote: معليش والله اتذكرت الظاهر ده الزهايمر
ولا يمكن اول تواصل بيناتنا انت كنت في الدوحه
ليك التحيه باذن الله معاكم قريب

لو انت عندك زهايمر ..معناها ناس (النخلي ) مفروض يكون ماتوا زمان ..من العليهم

تسلم ...

Post: #47
Title: Re: وطني البغني علن .. واحبو بلا خفا......
Author: انعام عبد الحفيظ
Date: 10-10-2010, 12:49 PM
Parent: #46

ابو بكر سيد احمد سلامات
بالله ما تطوّل الغيبة
وخليك قريب يا فنان يا جميل

ــــ
البركة فيكم في صلاح يس
له الرحمة والمغفرة

Post: #48
Title: Re: وطني البغني علن .. واحبو بلا خفا......
Author: الطيب بشير
Date: 10-10-2010, 01:35 PM
Parent: #47

.

العزيز بكري

كيف الحال

و الدنيا معاك

و العيال

مشتاقون

أبقى أظهر

.

Post: #55
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-10-2010, 10:53 PM
Parent: #48

الطيب بن الطيبين

اخبارك يا حبيبنا ...لعلك بعافيه

بشير وموحه .... وسميتنا الغاليه

معليش يا صديقي طولنا غليك ...لكن الجري الشديد ... واللههاث الغير عادي ...

لك العتبى.. وبنتلاقى قرييب إن شاء الله كان حيين

مودتي

Post: #49
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-10-2010, 01:57 PM
Parent: #47

الى كل الأحباب المتواصلين معانا

داير اعرفكم بي أحد الأشقاء الروحيين

رفيق عمر ودراسة ..و درب ... ومحبة .. ومدينه

رفقة( خلا ) .... والخلا بيوريك معادن الناس ...

اخي وصديقي محمد علي شقدي ...وهو مشرفنا في البوست دا

يمكن يكونو فيكم ناس بيعرفوهو

وللما بيعرفو انتبهوا للإسم دا لانو ح يلاقيكم حتة الرجال بيتلاقوا

_________________

شاقده الجميل ... رأيك شنو في (البروباقاندا ) دي ؟؟؟

Post: #50
Title: Re: وطني البغني علن .. واحبو بلا خفا......
Author: فاروق أبوحوه
Date: 10-10-2010, 02:47 PM
Parent: #49

أبي بكر سلامااااااااااااااااات

أسمع يا زول يا غناي. إنت .

أول تبادي تجيب لينا أغنيتك الغنيتها لينا في إحتفال سودانيز بالكدرو
من كلمات النخلي علي ما أظن

بعداك نتكلم ..

Post: #51
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-10-2010, 04:52 PM
Parent: #50

انعام عبد الحفيظ

إزيك يا ست الكل ... شوق شديد

مابننقطع تاني إن شاء الله

Quote: ..البركة فيكم في صلاح يس
له الرحمة والمغفرة

نسأل الله ان يتقبله ..ويتغمده بواسع رحمتة ,,,

________________________________________

وصلاح يس لمن لايعرفة هو راعي منتدى النادي العائلي لفترة طويلة ..وقد قدم للحاصل الثقافي الكثير

Post: #52
Title: Re: وطني البغني علن .. واحبو بلا خفا......
Author: إبراهيم عبد الحليم
Date: 10-10-2010, 06:57 PM
Parent: #51

بكور

كدى شوف آخر انتاجاتنا الفنية دى
الشعر لاخونا مدنى النخلى
سمعت قالوا بقى جعلى صنديد

Post: #53
Title: Re: وطني البغني علن .. واحبو بلا خفا......
Author: خالد علي محجوب المنسي
Date: 10-10-2010, 08:11 PM
Parent: #52

والله مشتاقين يا سنجك
رقمي
تتصل ونقول ليك ألو منو أهلا سلاااام
00971501546277
والايميل [email protected]

Post: #54
Title: Re: وطني البغني علن .. واحبو بلا خفا......
Author: ناذر محمد الخليفة
Date: 10-10-2010, 09:37 PM
Parent: #53

Post: #56
Title: Re: وطني البغني علن .. واحبو بلا خفا......
Author: خالد عبد الحليم سعيد
Date: 10-10-2010, 11:14 PM
Parent: #54

ابوبكر سيد احمد
ياخ حمدلا الف على السلامه
انا جيت خاشى البوست وشاكى دا تكون انت
واتوكلت على الحى القيوم وجيت دافر ، اذا بى اجدك
مع تغيير بسيط فى اسمك الذى تعودنا عليه .
كنا ثله من الاصدقاء من متابعى حراك المدينه على قلته
ولكن استوقفنا مجمع طلعت فريد بالخرطوم 2 الذى كان يضج بالحركه
امل ان يكون مواصلا نشاطه بتلك القوه
واتاح لنا ملاقاه اميز الفنانيين والشعراء والادباء
وهى اول مره استمع فيها الى شخصك حيث اصبحت من مدمنى طريقتك فى
الاداء، وانت كنت كثير التردد لدى ذاك المنتدى .
ودائما ما اجد معك زميل الدراسه بالمرحله الثانويه بالحاج يوسف
( تبا لتلك الذاكره التى لم تعد تختزن المفيد من الاشياء)
وعلى ما اتزكر انه كان يدرس بجامعه سنار وانه من ابناء الدناقله
او شى كهذا .

عموما كانت ليالى لاتنسى ونحن نقطع كبرى المسلميه كدارى بعد قضاء سهره
ممتعه الى موقف الحاج يوسف القديم جوار مطعم ابوالعباس والذى نتاول
عنده وجبه العشاء ونمتطى اخر دفار متوجه الى الحاج يوسف .

كن بخير

Post: #66
Title: Re: وطني البغني علن .. واحبو بلا خفا......
Author: Elmosley
Date: 10-11-2010, 03:49 PM
Parent: #56

Quote:
ابوبكر سيد احمد
ياخ حمدلا الف على السلامه
انا جيت خاشى البوست وشاكى دا تكون انت
واتوكلت على الحى القيوم وجيت دافر ، اذا بى اجدك
مع تغيير بسيط فى اسمك الذى تعودنا عليه .
كنا ثله من الاصدقاء من متابعى حراك المدينه على قلته
ولكن استوقفنا مجمع طلعت فريد بالخرطوم 2 الذى كان يضج بالحركه
امل ان يكون مواصلا نشاطه بتلك القوه
واتاح لنا ملاقاه اميز الفنانيين والشعراء والادباء
وهى اول مره استمع فيها الى شخصك حيث اصبحت من مدمنى طريقتك فى
الاداء، وانت كنت كثير التردد لدى ذاك المنتدى .
ودائما ما اجد معك زميل الدراسه بالمرحله الثانويه بالحاج يوسف
( تبا لتلك الذاكره التى لم تعد تختزن المفيد من الاشياء)
وعلى ما اتزكر انه كان يدرس بجامعه سنار وانه من ابناء الدناقله
او شى كهذا .

عموما كانت ليالى لاتنسى ونحن نقطع كبرى المسلميه كدارى بعد قضاء سهره
ممتعه الى موقف الحاج يوسف القديم جوار مطعم ابوالعباس والذى نتاول
عنده وجبه العشاء ونمتطى اخر دفار متوجه الى الحاج يوسف .
كن بخير

[Email]

خالد اخوي
مالك كاتب باللون الابيض
اها انا عملت كوت عشان ابي بكر واصحابه يقدرو يقروا كلامك
كل الود

Post: #57
Title: Re: وطني البغني علن .. واحبو بلا خفا......
Author: مصدق مصطفى حسين
Date: 10-10-2010, 11:22 PM
Parent: #54

أيها الفنان الضخم أبوبكر سيدأحمد
فرصه جات لحدّى عندى لأعبر لك عن إعجابى الشديد
بصوتك الجميل المليان تطريب حد التخمه ( إن جاز لى التعبير ) ،
لك الأمنيات بالصحه و طول العمر و الكثير من الإبداع .

Post: #58
Title: Re: وطني البغني علن .. واحبو بلا خفا......
Author: Sabri Elshareef
Date: 10-11-2010, 02:51 AM
Parent: #57

ابي بكر

تحياتي الطيبه

ومرحب بيك هنا

هل انت ود محمد شيخنا اخو حسن وام بله عليها الرحمه

عموما انا في شك انك هو انتظر في كلا الحالات اهلا وسهلا اتابع في غناك ومعجب به

حضرت لك حلقة تلفزيونية مع الشاعر كامل عبد الماجد

عموما لحدي صباح بكره اجيييك غايتو اعتقد ان بدر الدين قال لي انك بكور الزمااان داك

انتظر في وداعة الله

Post: #59
Title: Re: وطني البغني علن .. واحبو بلا خفا......
Author: الطيب شيقوق
Date: 10-11-2010, 05:44 AM
Parent: #58

السنجك

Quote: دي لفة ودايس أبنص ومميل الرقبة زي ماقال شيقوق ومع برمة عمة وسفة دقار

المنسي السجم دا اطردو لينا من البوست دا بيخرب علينا الفرحة دي

قال سفة دقار المسنوح !!!!!

اخليكم انا ماشي اسمع السنجك بالفيديو ###### في اغنية ( دار ام بادر يا حليلااااااااا)

انا يا سنجك ما كنت فاكرك بتعرف ركوب الجمال ! لكن لقيتك هيييييييييييييع في الفديو ###### داك

Post: #61
Title: Re: وطني البغني علن .. واحبو بلا خفا......
Author: الصادق خليفة
Date: 10-11-2010, 07:14 AM
Parent: #59

الفنان المثقف ود سيد أحمد

لك من الامنيات أعذبها و أطيبها

حقيقة لا امتلك ناصية الكلام ولكن انت فنان بمعني ما تحمل الكلمة من معني
صوت أداء و فوق ذلك تجذبني ثقافتك العميقة .
أترى الوطن الذي نغني له هو الوطن الموحد ام وطن الشتات؟

نسلم يا ذوق

Post: #62
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-11-2010, 01:29 PM
Parent: #61

العزيز فاروق ابو حوه

Quote: أول تبادي تجيب لينا أغنيتك الغنيتها لينا في إحتفال سودانيز بالكدرو
من كلمات النخلي علي ما أظن

الغنيه اسمها( صباحيه ) هي من كلمات النخلي ... الحان الجميل يسري صلاح

شكراً على مرورك الجميل .. وابقى واصل معانا

__________________________

ابراهومه العزيز ...

ياخي ده كلام جميل ... وانا سبق وقلت انك مجتهد ...ومؤكد بتلقى نصيبك كامل إن شاء الله

كلام ولحن وصوره حاجة تمام

ربنا يوفقك ...

____________________

شكراً يا ناذر على مرورك رغم انو مرور كرام ...

لكن عموماً مشتاقين ليك وابقى تعال لينا في جنوب

تسلم يا غالي

______________________________

يا خالد عبد الحليم ... عاش من شاف صورتك ياخي ...

Quote: ولكن استوقفنا مجمع طلعت فريد بالخرطوم 2 الذى كان يضج بالحركه

حقيقة كانت ايام لا تنسى ...ومعانا عمادالماحي ... وعبد الله حسان ..ووبقية العقد

ايام كان لايزال في دنيا الثقافة بعض من الق

للأسف يا صديقي المنتدى وفق بعد الزمن داك بي شويه ... ولا زالت ايامه عالقة بالذهن

شكراً على مرورك اللطيف .. ويا ريت نشوفك تاني وتاني ....

____________________

العزيز مصدق مصطفى حسين

Quote: أيها الفنان الضخم أبوبكر سيدأحمد
فرصه جات لحدّى عندى لأعبر لك عن إعجابى الشديد
بصوتك الجميل المليان تطريب حد التخمه ( إن جاز لى التعبير ) ،
لك الأمنيات بالصحه و طول العمر و الكثير من الإبداع

ياصديقي ان شاكر جداً وممنون لهذا الإطراء اللطيف .. ولعلى ورفقائي نستمد القبس من جمالكم ..والهامكم

وطالما الناس البيسمعوا ويقيمو زيك موجودين ... فتأكد انو الجذوه لن تنطفئ ...

نسأل الله ان يجعلني ..وكل زملائي عند حسن ظنكم .. ويمتعنا بي أرائك النيره ..

شكراً يا عزيز ولك الود

Post: #63
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-11-2010, 02:18 PM
Parent: #62

عزيزي صبري الشريف ...

Quote: هل انت ود محمد شيخنا اخو حسن وام بله عليها الرحمه

عموما انا في شك انك هو انتظر في كلا الحالات اهلا وسهلا اتابع في غناك ومعجب به

بالحيل ...انا ياني ولد محمد شيخنا .. بيتنا في مدني وحسن شيخنا وحاجه ام بله الله يرحمها.. اعمامي

وبدون قصد مني بقيت ابوبكر سيد احمد .. والسبب في كده صديقنا المخرج فؤاد عبد الرحيم

لما كنا شغالين في فيديو كليب بتاع (دار امبادر) .. فهو الأطلق السم دا ... ومنها بقى كده

شكراً جزيلاً يا عزيزي ... وبجيك راجع تاني بإذن الله

____________________________________________

توضيح لابد منه : انا اسمي ابوبكر محمد سيد احمد ... إذاً فؤاد المخرج المزكور سابقاً قام بحزف (محمد)..فأصبحت ما تعرفون ... و (شيخنا ) هو لقب لجدي سيد احمد..
هذا ما لزم توضيحه عشان ناس ود شيقوق والمنسي ما يطشوا..... هههههاي
_____________________________________________

العزيز الصادق خليفة

Quote:
حقيقة لا امتلك ناصية الكلام ولكن انت فنان بمعني ما تحمل الكلمة من معني
صوت أداء و فوق ذلك تجذبني ثقافتك العميقة .
أترى الوطن الذي نغني له هو الوطن الموحد ام وطن الشتات؟

صادق مودتي وشكري ..وانت تصفني ( بالمثقف) ... فإن اصبحت كا تقول .. فسأستعير مقولة

كافور الإخشيدي والي مصر في ذيانك الزمان القديم ...(اللهم إني اعوذ بك من بلوغ الحاجه )

كتر خيرك كتير يا عزيز ..ولك من التحايا انضرها ...

Post: #64
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-11-2010, 02:51 PM
Parent: #63

الوجيه ود شيقوق :-

Quote: المنسي السجم دا اطردو لينا من البوست دا بيخرب علينا الفرحة دي

قال سفة دقار المسنوح !!!!!

اخليكم انا ماشي اسمع السنجك بالفيديو ###### في اغنية ( دار ام بادر يا حليلااااااااا)

اي نعم المنسي زول مسنووووووح ..لكنه الوحيد البيتصل بي لما يجي السودان ...مش زي ناس كده

يجوا ماشين فينا زي ساكت زي المقابر ..ولا بيدونا حتى الفاتحة ....

هسه انا لوكنت (............) كنت اتصلت بي اول ما تجي البلد دي يام راساً مدوقس ...

وين بقية الناس يا شيقا ... ورينا اخبارهم بالتفصيل ...

دمت يا غالي ...

_____________________________

ود المنسي

نحن لسه منتظرنك ... فلا يطيب المقام بدونكم ( وشيقا كان ما عاجبو اليشرب من ترعة الدندر)

______________________

يا قمر بوبا ..

الحاصل شنو؟؟؟ وينك يا عزيز ..مالك رايح مننا كدي ..؟؟

Post: #65
Title: Re: وطني البغني علن .. واحبو بلا خفا......
Author: صديق الموج
Date: 10-11-2010, 03:02 PM
Parent: #64

ابى بكر الغناى

على الطلاق ازيك

وحات زهورى اليانعه وما طالبنى حليفه

انت من اكثر الاصوات التى سمعتها موخرا شدوا وشجوا

وصيتى ليك من حميد البتلقى كلو لحنو..

فى غياب الكلام السمح امسك فى الحقيبه قوى

ولن تضل...

ماتجى تشكرنى وتقول لى اخجلتم بطيخنا وحركات ده حقك يا ود القبائل..

رعاك الله من نسمه وسيمه،،،،

Post: #69
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-11-2010, 11:23 PM
Parent: #65

الموح .... الموج ...الموج ...يا سلاااااااااااااااااااااااااااااااام ياخ

الرجل الإستثنائي ... اولاً بالتبادي مشتاقين والله

وليك وحشه كبيييييييييييييييييره

اخبارك؟ .... لعلك عافيه

حميد يا عزيزي بيني وبينه كلام كتيييير ... وواحده من الأعمال المشتركه

استهلالية هذا البوست ... ويتسمعها ان شاء الله

بجيك راجع ..وعندي معاك كلام كتيير ..

تسلم يا حبيب

Post: #67
Title: Re: وطني البغني علن .. واحبو بلا خفا......
Author: Elmosley
Date: 10-11-2010, 03:54 PM
Parent: #45

Quote: استاذنا الموصلي كل الرائعين من الفنايين هنا الاكيد ان صوت بكري لا يحتاج مني ابدا لتزكيه لديكم فقط نامل دوما بالجديد والجديد المميز لنضع لوحات جادة في فراغ زحمة معرض المهرجيين

ومالو يا محمد ياخ
البحر ما بيابا الزياده
اصلو فنانين السودان ديل فقرانين ماليا
شرايطهم تنزل السوق الليله بكره المزورين يتمو الناقصه ولا حسيب
ولا رقيب
فضل ليهم حبكم ده ولو لاه لماتو جميعا من الحسره
تسلم

Post: #68
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-11-2010, 11:13 PM
Parent: #67

استاذي الموصلي :

Quote:
فضل ليهم حبكم ده ولو لاه لماتو جميعا من الحسره

ايوه نعم ... لانوالحاصل الأيام دي في سوق الغنا بيخلي الزول - لو محترم نفسه وفنه- يبقى مارق

ويسد واحده بي طينه وال...... بس شوية الناس البتستمد منهم ثقتك في التجارب الجاده ..بيبقوا هم

الألهام والدافع عشان تصبر .. وتقول لا بد يجي يوم الحاله تنعدل ..

شكراًً استاذي .. وشكراًمن قبل لي العزيز شقدي ...

Post: #70
Title: Re: وطني البغني علن .. واحبو بلا خفا......
Author: Sabri Elshareef
Date: 10-12-2010, 00:58 AM
Parent: #68

ابي بكر ود شيخنا

انا جيران اولاد وبنات الشيخ يا لطيف

وحسن شيخنا وبابكر ومحمد اخوال لي

يا سلام عليك وعلي غناك

Post: #71
Title: Re: وطني البغني علن .. واحبو بلا خفا......
Author: محمد علي شقدي
Date: 10-12-2010, 07:08 AM
Parent: #70

اقتباس في شكل برواز
Quote: الى كل الأحباب المتواصلين معانا
داير اعرفكم بي أحد الأشقاء الروحيين
رفيق عمر ودراسة ..و درب ... ومحبة .. ومدينه
رفقة( خلا ) .... والخلا بيوريك معادن الناس ...
اخي وصديقي محمد علي شقدي ...وهو مشرفنا في البوست دا
يمكن يكونو فيكم ناس بيعرفوهو
وللما بيعرفو انتبهوا للإسم دا لانو ح يلاقيكم حتة الرجال بيتلاقوا

دي شهادة كبيرة منك اعتز بيها جدا يا اعز الاحباب
------------------
صاحبك الشفيع الايام دي سعيدين بـ عذابو لينا و مشاوير فرحو
وهو مقدم اشواقو وجايكم يوم الاربعاء

Post: #72
Title: Re: وطني البغني علن .. واحبو بلا خفا......
Author: الطيب شيقوق
Date: 10-12-2010, 08:20 AM
Parent: #71

Quote: اي نعم المنسي زول مسنووووووح ..لكنه الوحيد البيتصل بي لما يجي السودان ...مش زي ناس كده

يجوا ماشين فينا زي ساكت زي المقابر ..ولا بيدونا حتى الفاتحة ....

هو انت حسين خوجلي بدي فيك فرقة سلام؟ بعدين نحن ناس الضهاري ديل جننا وجن الواحد يوقفوهو في خشم الباب ويقولوا ليهو انت منو ؟ وبطاقتك ويني ؟ وماشي لمنو؟ دى حركاتكم يا ناس البندر البتخلينا نجي فيكم دايسين ابنص سااااااااااى ومحل رهيفة تنقد .

Quote: هسه انا لوكنت (............) كنت اتصلت بي اول ما تجي البلد دي يام راساً مدوقس ...

نان ات عندك بضاعة بجوها ؟؟؟

Quote: وين بقية الناس يا شيقا ... ورينا اخبارهم بالتفصيل ...

والله لحكمة يعلمها الله امبارح سماح Sama7 اول مرة تجي وتكتب لي رسالة ع المسنغر - بداية غيابها معاك وجات صادة معاك الكلام دا هيك؟

Quote: نحن لسه منتظرنك ... فلا يطيب المقام بدونكم ( وشيقا كان ما عاجبو اليشرب من ترعة الدندر)

اكان رجاك في المنسي خم وصر

Post: #73
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-12-2010, 01:03 PM
Parent: #72

اخي الذي لم تلده امي .. صبري الشريف ..

Quote: ابي بكر ود شيخنا

انا جيران اولاد وبنات الشيخ يا لطيف

وحسن شيخنا وبابكر ومحمد اخوال لي

يا سلام عليك وعلي غناك

اعزرني يا اخي إن لم تسعفني ذاكرتي بمعرفتك ...ربما لطول الزمن

لو كانت هنالك صوره ربما احدثت فرق ....

ولكني حين سألت عنك فيصل الشيخ عرفني بك .. وتاريخ الإشلاق

.. وحتي منزلكم الحالي القريب من منزلنا ....

لك الشكر الجزيل على هذا التعريف ... فأنا وانت اولاد محمد شيخنا ....وحاجه ام بله

عليها الرحمه .. ود.عبد الله شيخنا عليه الرحمة (انتقل الى الدار الأخره قبل اشهر )

بنكون متواصلين إن شاء الله دائماً..

مودتي

Post: #74
Title: Re: وطني البغني علن .. واحبو بلا خفا......
Author: معاذ الهادي
Date: 10-12-2010, 01:55 PM
Parent: #73

ود سيد احمد

قليلون هم الذين يطربونا هذه الايام
وانت منهم ان لم تكن اولهم

...............
راجع الماسنجر ياحبيب

Post: #75
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-12-2010, 05:47 PM
Parent: #74

شقاده الجميل

طبعاً كلنا متوقعين جيت العريس الشفيع

وكنا والله بنتمنى انكم تكونوا موجودين معانا ... عشان تبقى اللمه دسمه ..

لكن انا اريد وانت ..........

تحياتي واشواقي لي (علوب ) وام علوب ... وكل المعاك ...

______________________
ابونعامه دار الجوكي ... عشنا فيها ملوكي .....

Post: #76
Title: Re: وطني البغني علن .. واحبو بلا خفا......
Author: هشام درماس
Date: 10-12-2010, 08:40 PM
Parent: #75

ابى بكر .. غدا الاربعاء سوف اكون معكم فى السودان فالى الملتفى ياغالى

Post: #77
Title: Re: وطني البغني علن .. واحبو بلا خفا......
Author: خالد علي محجوب المنسي
Date: 10-12-2010, 09:03 PM
Parent: #76

يا سنجك
سلاااام يا طيب وفنان

Quote: والله لحكمة يعلمها الله امبارح سماح Sama7 اول مرة تجي وتكتب لي رسالة ع المسنغر - بداية غيابها معاك وجات صادة معاك الكلام دا هيك؟

طرب رابّو .........
ومعناها بلغة الجِن
هذا المرءُ كذابو

قال ايه يا سنجك ؟

تحياتي أستاذ الموصلي يا راقي

Post: #78
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-13-2010, 00:21 AM
Parent: #77

شيقا الملعوووووووون :

Quote: دى حركاتكم يا ناس البندر البتخلينا نجي فيكم دايسين ابنص سااااااااااى ومحل رهيفة تنقد .

ات خرفت يا زوول ولا شنو ...

يا منسي سامع زويلك ... المسأله بقي فيها ضهاري .. وبنادر

وهامش و مركز ....

هوووي يا شيقا... مبرراتك جيعاااانه ... ات بس قول ما فاضي لينا ساي .. وانا عارف

البيشغلك شنو.....

Quote: ] والله لحكمة يعلمها الله امبارح سماح Sama7 اول مرة تجي وتكتب لي رسالة ع المسنغر - بداية غيابها معاك وجات صادة معاك الكلام دا هيك؟

اها دي ردها جاهز عند ود المنسي ...دواك .. والعارف مراقدك

Quote: طرب رابّو .........
ومعناها بلغة الجِن
هذا المرءُ كذابو

ايوووووه يا منسينا ... يمين بلاك خربانه ....هيييييييييييييييييييييع

يا أخينا الكذابو ... عشان ما تحاول تستغل غيابي عن المنبر ..وتلفق .. وتألف ..

يا فيصل خليل ... وعم كيمو .. وبوبا .. ما تحضرونا ...

___________________________

منسينا الكلس : عافي منك يا ابو ضراع ... ومحل رهيفة .. التبقى ارهف ..هههههاي

ونحنا لسه منتظرنك ...

_________________________________

الرطاني ...والله مشتاقين ليك وفاقدنك ....

أدينا إماره .....

Post: #79
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-13-2010, 00:29 AM
Parent: #78

ونظم الأستاذ المجيد... شمس الدين حسن خليفه :

بنعشق شمسها الحراقه

بتلهب في القلوب دفاقه

انحنا شعارنا حب وصداقة ...

للناس الصفت اخلاقها

****************

انحنا بلدنا بي خيراتها

البلد البتشبها ياتا؟؟؟

هي حياتنا .. واحنا حياتا

وما بندور بلاها وحاته

Post: #83
Title: Re: وطني البغني علن .. واحبو بلا خفا......
Author: Mohamed Bannaga
Date: 10-13-2010, 02:07 PM
Parent: #79

اخي العزيز ابى بكر
تحياتي لك و لضيوفك الكرام
و أنا ايضا احد المعجبين بى فنك و ادائك الرائع
الله يديك العافية و تبدع اكثر و اكثر
و ليك مني القصيدة دي في شان السودان الحبيب .. كتبتها في متاهات الغربة

مع خالص تحياتي و تقديري
محمد بدوي بانقا

Post: #80
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-13-2010, 00:39 AM
Parent: #77

معاذ الهادي

Quote: قليلون هم الذين يطربونا هذه الايام
وانت منهم ان لم تكن اولهم

الكلام ده وكتين يجيك من زووول من ام ضواً بان ... حقك تفرح جد جد

لانو مناطق العيلفون ..وام ضواً بان .. والدبيبه ...دي مناطق المغنا السمح ...

والسمع السمح ...

تحياتي لاسرة ود الرضي .. وجميع اهلنا ...

جزيل شكري يا صديقي ..

Post: #81
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-13-2010, 12:30 PM
Parent: #80

درماس ....

Quote: ابى بكر .. غدا الاربعاء سوف اكون معكم فى السودان فالى الملتفى ياغالى

بالسلامه يا عزيز ...

منتظرك....

Post: #82
Title: Re: وطني البغني علن .. واحبو بلا خفا......
Author: الطيب شيقوق
Date: 10-13-2010, 12:57 PM
Parent: #81

المنسي وحياتك خالتك سماح جات وكتبت رسالة على المسنغر

اجيب ليك الرسالة تتبرك فيها؟

السنجك

شاغلني شنو ؟

ات ماك عارف لكل حديث عندهن بشاشة وكل قتيل عندهن شهيد؟

ان شاء الله انت ومنسيك تفطسوا

Post: #84
Title: Re: وطني البغني علن .. واحبو بلا خفا......
Author: خالد علي محجوب المنسي
Date: 10-13-2010, 07:50 PM
Parent: #82

أخي الفاضل أبي بكر السنجك

كدي ندخل في لب الموضوع

شيقوق دا كفاية علي ( طرب رابو )

للأسف يا سنجك نحن قوم ( إلا مارحم ربك ) وطنيتنا فقط تشتعل عندما نستمع
لشعر القدال وحميد ومحجوب شريف وخليل فرح والدوش وكل شاعر ثوري

وتهمد فينا هذه الوطنية مجرد أن وصل الشاعر لنهاية القصيد

نخرب وننخر في روح الوطن وكأنه غريب عنّا ( وطنية تك )

هسي صاحبك شيقوق دا كدي ادي منصب والله بكرة يبقى شئ تاني
وينسى الأخرة ويوم الحساب ويقول هذا من فضل ربي
ويكون نهب وسلب

..............
ديل يختفوا اللقمة
إن حفّت
من جنحين الملك رفت
وسيدها يموت بي الفاق
..................

شيقوق دا ما خلا نور سالم في عمود وإلا كسرو ( نبلتو صايبة لا تخطي )

عربات القطر قطع تنجيد كراسيها

برجع ليك والعبرة والحسرة قطعت البلعوم

تحياتي يا سنجك

Post: #85
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-14-2010, 10:12 AM
Parent: #84

محمد بانقا ...

شكراً جزيلاً يا عزيز على مرورك اولاً ...

وكلامك اللطيف ثانياً

Quote: و ليك مني القصيدة دي في شان السودان الحبيب .. كتبتها في متاهات الغربة

وعلى النص المعبر اخيراً ...

خالص تقديري

Post: #86
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-14-2010, 08:49 PM
Parent: #85

شيقا المسنووووووووووووح

Quote: ات ماك عارف لكل حديث عندهن بشاشة وكل قتيل عندهن شهيد؟

عشان كده بتجي ماري فينا فووووووووووو ...

سامع يا منسي ؟؟؟

زولك زول شهاده فيهن ....

Post: #87
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-15-2010, 06:54 PM
Parent: #86

خالد المنسي :

Quote: للأسف يا سنجك نحن قوم ( إلا مارحم ربك ) وطنيتنا فقط تشتعل عندما نستمع
لشعر القدال وحميد ومحجوب شريف وخليل فرح والدوش وكل شاعر ثوري

وتهمد فينا هذه الوطنية مجرد أن وصل الشاعر لنهاية القصيد

نخرب وننخر في روح الوطن وكأنه غريب عنّا ( وطنية تك )

ده لانو احنا عندنا محبة الوطن مقارنة بما اعطانا الوطن ...

وكتير ما تسمع مقولة: البلد دي قدمت لينا شنو؟؟ عشان نحبها

ودي نظره فيها من السذاجه ما فيها ...

كأنما الوطن هو البينهب في الثروات ... وهو البيشرد في اولاده

وهو الضاغطنا تحت خط الفقر ...

نتمنى يجي يوم ونعرف انو مشاكلنا الحاصله علينا بسببنا احنا

( ما بين حاكم شمولي ...ومحكوم خايف ..او لا مبالي ..او نجع من بلاده )

دمت يا وجيه

Post: #88
Title: Re: وطني البغني علن .. واحبو بلا خفا......
Author: معاذ الهادي
Date: 10-16-2010, 07:28 AM
Parent: #80

Quote: لانو مناطق العيلفون ..وام ضواً بان .. والدبيبه ...دي مناطق المغنا السمح ...

والسمع السمح ...
]

سمح ات..وسمحة اخلاقك

Post: #89
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-17-2010, 08:49 PM
Parent: #88

معاذ الهادي ياصديقي ...

Quote: سمح ات..وسمحة اخلاقك

تسلم ...

Post: #90
Title: Re: وطني البغني علن .. واحبو بلا خفا......
Author: الطيب شيقوق
Date: 10-18-2010, 08:13 AM
Parent: #89

Quote: زولك زول شهاده فيهن ....

عايزني اموت في جلهاك ؟

مسنوووح

يا اخي بصوتك الحلو دا جربت نمة الدوبيت؟

اكان عندك شريط منو وما رسلتو لي تاني لا بيني ولا بينك

Post: #91
Title: Re: وطني البغني علن .. واحبو بلا خفا......
Author: فاروق أبوحوه
Date: 10-18-2010, 02:24 PM
Parent: #90

يا وطن أصبحنا بيك نصاح
إنت البتعجب في الأمر
إن كان غلط بنشوفو صاح
يا نكهة الشاي المُطاع
نعناع مزاجنا الإصطباح
يا قهوة الشوق المُشاع
عِب الشجن مفتوح وطن
وجهة و زواده وحيل شراع
يا معلم الغيم الهديل
أهطل عديل نيلين وسيل
ما فينا حيل نرجاك أمس
باكرنا في الغيب منغمس
حاضرنا فيك
وإنت العليك
تطرح وشيك
تملانا بيك
عافيه ومروه و انصياع
حس يا قزح ..
لوّن جدارك والمتاع
فاطنه ورزازك في الدرب
ما شين عليك فرحاً وشيك
أفرد جناحك مرحباب
لملم عذابك والصراع
في الباب سحاب
لا بيك فشل لا ظنو خاب
عشمان أمانك للصحاب
يلا أنستر ..
توبك هداك فوق التساب
أمرق بياضك للخريف
قربان من الشوق العفيف
شالك حلالك يا شفيف
الستره والعرق النضيف
ما يهمك الصمت الأسيف
نحنِح غناك قوماك كب
طوِّل ضراك ضد أي زيف
صوتك صبي أو قول نبي
بسراعك النيل إنتظار
في شراعك الريح إنتظار
وإنت اليراعك انتصار
في ضراعك الخير إنشطار
أفرح سمح الفيك مزار
أقفل منافيك و القلاع
يا نمه في حلق الزمن
بيت من مسامك إتساع
أبنينا في هذا الشجن
قدر الوطن
هذا العتيق
المستطاع

فاروق أبوحوه
أبوظبـي
الجمعه - 15 أكتوبر2010

Post: #92
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-21-2010, 07:00 AM
Parent: #91

شيقا المسنوووووووووووووووح

Quote: عايزني اموت في جلهاك ؟

مسنوووح

يا اخي بصوتك الحلو دا جربت نمة الدوبيت؟

اكان عندك شريط منو وما رسلتو لي تاني لا بيني ولا بينك

هههههههههههههه

اه ياملعون... مووت بالجيهه البتريحك ..

ما عندي اي تسجيل دوبيت يا ود شيقوق ... لكن نعملو عشان خاطر العرييب

تسلم يا غالي

Post: #93
Title: Re: وطني البغني علن .. واحبو بلا خفا......
Author: أبي بكر سيد احمد
Date: 10-22-2010, 01:16 PM
Parent: #92

Quote: يا وطن أصبحنا بيك نصاح
إنت البتعجب في الأمر
إن كان غلط بنشوفو صاح
يا نكهة الشاي المُطاع
نعناع مزاجنا الإصطباح
يا قهوة الشوق المُشاع
عِب الشجن مفتوح وطن
وجهة و زواده وحيل شراع
يا معلم الغيم الهديل
أهطل عديل نيلين وسيل
ما فينا حيل نرجاك أمس
باكرنا في الغيب منغمس
حاضرنا فيك
وإنت العليك
تطرح وشيك
تملانا بيك
عافيه ومروه و انصياع
حس يا قزح ..
لوّن جدارك والمتاع
فاطنه ورزازك في الدرب
ما شين عليك فرحاً وشيك
أفرد جناحك مرحباب
لملم عذابك والصراع
في الباب سحاب
لا بيك فشل لا ظنو خاب
عشمان أمانك للصحاب
يلا أنستر ..
توبك هداك فوق التساب
أمرق بياضك للخريف
قربان من الشوق العفيف
شالك حلالك يا شفيف
الستره والعرق النضيف
ما يهمك الصمت الأسيف
نحنِح غناك قوماك كب
طوِّل ضراك ضد أي زيف
صوتك صبي أو قول نبي
بسراعك النيل إنتظار
في شراعك الريح إنتظار
وإنت اليراعك انتصار
في ضراعك الخير إنشطار
أفرح سمح الفيك مزار
أقفل منافيك و القلاع
يا نمه في حلق الزمن
بيت من مسامك إتساع
أبنينا في هذا الشجن
قدر الوطن
هذا العتيق
المستطاع

فاروق أبوحوه
أبوظبـي

يا سلام عليك يا ابو حوه .....

الله يديك العافيه يا راجل ...

وارجوا ان نتلاقى عند اول فرصة متاحه ..

تسلم

Post: #94
Title: Re: وطني البغني علن .. واحبو بلا خفا......
Author: فاروق أبوحوه
Date: 10-22-2010, 03:25 PM
Parent: #93

Quote: وارجوا ان نتلاقى عند اول فرصة متاحه ..

تسلم يا (بوكا) يااااخ.
إن شاء الله سأكون بأرض الوطن يوم 14/11/2010 لو ربنا رفع القدم.
سنلتقي إن شاء الله.

---------
0912811534

Post: #95
Title: Re: وطني البغني علن .. واحبو بلا خفا......
Author: هند محمد
Date: 10-22-2010, 10:11 PM
Parent: #94

كل الجمال هنا

صوت وأداء وكلمات

تحية لفنك الجميل أخي ابوبكر

Post: #96
Title: Re: وطني البغني علن .. واحبو بلا خفا......
Author: Sabri Elshareef
Date: 10-28-2010, 01:37 PM
Parent: #95

****

Post: #97
Title: Re: وطني البغني علن .. واحبو بلا خفا......
Author: فدياس نجم الدين
Date: 10-28-2010, 01:45 PM
Parent: #96

فنان جميل

من القله التي نراهن عليها لمستقبل الغناء