سفير بريطانيا في مجلس الامن : رئيس الجنوب سلفا كير يعتزم اعلان الاستقلال من جانب واحد

Quote: جوبا (السودان) (رويترز) - قال سفير زائر للسودان من الامم المتحدة ان رئيس جنوب السودان أبلغ مبعوثي مجلس الامن التابع للمنظمة الدولية أن منطقته ربما سيكون عليها اجراء استفتائها الخاص حول الاستقلال اذا أفسد الشمال الاستفتاء الرسمي المزمع اجراؤه في العام المقبل. ومن المقرر أن يدلي أبناء الجنوب بأصواتهم في استفتاء بعد نحو ثلاثة أشهر حول ما اذا كانوا سينفصلون عن السودان أم سيبقون في اطار واحد مع الشمال بعد انتهاء الحرب الاهلية التي دارت بين الجانبين لعشرات السنين في 2005 . وقال مارك ليال جرانت سفير بريطانيا في مجلس الامن للصحفيين ان رئيس الجنوب سلفا كير "لا يعتزم اعلان الاستقلال من جانب واحد." وأضاف "لكن اذا حدث تعطيل.. تعطيل سياسي متعمد من حزب المؤتمر الوطني (الحزب الحاكم في الشمال) للاستفتاء.. فربما يكون من الضروري على الجنوب أن يجري الاستفتاء الخاص به."

http://ara.reuters.com/article/topNews/idARACAE6960CO20101007

الحكومة اتورطت ورطة كبيرة باتفاقية نيفاشا

والضغوطات الانضغطتها جعلتها تتنازل عن كل شيئ لكل انسان

سواء للجنوبيين او ناس الشرق او الغرب

وفي رايي حتي الحكومة ما مفروض يكون عندها تخويل للتفاوض عن الانفصال

وليست لديها او للحركة الشعبية حق لفصل الوطن او مناقشة اي استفتاء

المواضيع الزي دي ليس مخول لاي انسان ان يتناقش فيها

لانها خط احمر لا يجب عقد مفاوضات للنقاش عنها

وطبعا التنازلات الاكثر لما يسمي بالمجتمع الدولي

اكبر تنازل كان السماح للقوات الدولية بدخول السودان

زمان اتذكر في بداية عهدها اول ما الحكومة دي جات ادت الناس كلها العين الحمراء

بتذكر جنابو عمر عثمان كان ملازم اول

قابلتوا جنب السفارة السعودية في العمارات

وقال لي شالوه للصالح العام

افتكر نزل معاش برتبة نقيب

لكن المهم كل الملازمين اوائل نزلوهم معاش

وبعدها سمعت ورأيت الكثيرين من مختلف الوظائف شالوهم للصالح العام

طبعا انا ما كنت بعرف موضوع ولاء وكده لكن زعلت جدا لذلك

وطبعا جابوا ناس ما عندهم كفاءات وادوهم الوظائف

وده من اكبر المواضيع السبب عداوات كثيرة للحكومة

فتوزيع ثروات البلد فقط للموالين ما موضوع هين

المهم اتضح انهم قاعدين فترة طويلة ولازم يغيروا اي زول واي حاجة

ويختوا ناسهم والمواليين ليهم

الكلام ده طبعا فهمتوا بعدين

وانا اصلا البلد دي ما قعدت فيها كتير عشان اقيم الحكومة

لكن طبعا حاضر اعدام شهداء رمضان ومجدي وجرجس وغيرهم

مجدي انا مشيت في جنازته واندفن في مقابر فاروق

وشهداء رمضان برغم انهم عملوا انقلاب ما يستاهلوا يقتلوا

بالكتير في رايي يسجنوا كمعتقلين سياسيين منهم خوف

كما حدث لاخرين عملوا ايضا محاولات فاشلة

ومجدي ده انعدم ظلم في رايي

لكن طبعا فهمت انه الحكومة من البداية عايزة تضبح الكديسة للناس

والناس ديل لازم يكونوا عظة عشان تاني الناس تعمل الف حساب لها

وفعلا نجحت في ذلك وجابت ناسها كلهم

لكن خسرت اشياء اخري كثيرة

والتنازلات الكتيرة والمسيخة القدمتها الحكومة دي ما في حكومة قبلها قدمتها

وبعد ده كله يا ريت الناس رضت عنها ولا المجتمع رضي عنها

بالعكس اسوا حاجة عملتها الحكومة دي هي استخراج البترول

السودانيين ما شبه بترول وعز ونعيم

ولما ناس الغرب شافوا الثروة كلها كابينها للجنوب

شهروا السلاح في وجه الحكومة

وطبعا المعارضة الوهم عندما كانت في قمة عزتها

تحالفت مع الحركة الشعبية وفي النهاية الحركة باعتها والمعارضة طلعت ملوص

المهم سياسات هذه الحكومة الخاطئة بما فيها نيفاشا والقوات الدولية

هي التي ادت الي وصول البشير للمحكمة الجنائية

واعتقد انه كان من الافضل تسليم هارون وكوشيب

ربما كان افضل من هذا الوضع الذي نراه الان

حتي وان كانت النتائج المتحصلة واحدة

لأن المتهين كلهم سيتم مسائلتهم

ولن يسلم قادة التمرد من عدم توريطهم

اعتقد انو موضوع الانفصال ده ما في صالح البشير

لانه لو كان لعبها صاح كان قايض الاستفتاء بانهاء الجنائية

لكن حسع العالم كله منكب علي السودان

فقط لفصل الجنوب وتدمير السودان

وهم يعرفون الان انهم محتاجين للبشير

عشان كده بوزعوا البسمات هنا وهناك

لكن اول ما ينفصل السودان

حا تبدأ مطاردة الجنائية للبشير

وكل الشايفينهم منكبين علي السودان الان حا يندسوا

غايتوا نتيجة السياسات الخاطئة دي لا بد للحكومة ان تتحملها

كل ما اتذكر الكلام ده اقول يا حليل نميري

ما كان سمح لمصر بأخذ حلايب

وما كان ليعطي فرصة للمجتمع الدولي التدخل في السودان

الحاجة التانية المستغرب ليها

كل الناس هنا تتحدث عن جرائم البشير في دارفور

لكن لا احد يتحدث عن جرائم عبد الواحد وخليل

كما تم تماما تناسي مجزرة امدرمان

كل المسؤلين مسؤلين ولا احد يجب استثنائه

سواء كان من الشمال , الجنوب , الشرق ام الغرب



ـــــــــــــــــــــــــــــــــــــــــــــــــ


الكلام ده كان في قلبي من زمان

حسع لقيت فرصة لكتابته

شكرآ لصاحب البوست