طلال عفيفي .. ميّل عليهو الهوى بـ ( الحبايب )

هؤلاء ناسات طلال .. و حبايب روحو .

يا ود يا أسطى إنت و عارف و ناقش و حبوب و جواك دفيان .. و صادق .
ينصر دينك و دين دينك .
ياخي بحسدك على ده .. كل ده ..
بتقول الكلام برااااحه .. كلام " قلباوي " .. من القلب ابو لثغة و لسه بيتاتي ، عشان كده بيعرف توووووش يدخلنا و يهبش ..
هباش في جمايل الله ياخي .. و علي كيف كيفك .
مرات بقول طلال ده زول شاعر " ساكت " .. فنان و سارح في خلا ربنا .. و مطنش .
يا كمان شيوعي دغيل !! .. يمكن - مش برضو في شيوعيين دُغلا يا عصام جبر الله ؟ -
أقوم القاك ما سارح و لاشي . شايف و عارف و مستف بالهم فوق تحت و مديها الطرشا بمزاجك - يا قول عمك سعد بن زغلول : مافيش فايدة -
في فايدة يا صاحبي .. أهو ، و فايدة كبيرة كمان ..
إنك قاعد بتنقرش في لوعات روحك المجنحة دي ، و امانيك الملفلفة بالورق الملون .. ورق الخاطر و الأحلام المهيضات و منفسات .. و بتمرق لينا مما أعطاك الله و مما يقيم الأود و الصلب .
فكتر خيرك .

المهم .. مريت على حبايب طلال
فيا طلال الدين بن عفيفي .. ياخي شفتهم و حسيت بيهم و بيك ، و اتمليت راحة جوانية مركزة و مجيهة .. و دعيت ليك من صباح الرحمن ..
تصدق أنا زول كويس و عندي ظن حسن في الله .. إنه برضو يبادلني حباً بحب .. و لذلك فهو ما مقصر معاي و بيديني بكرم كبير . فله الحمد .
المهم .. أنا دعيت ليك ، و ربنا ح يستجيب بإذن واحد أحد ..
قلت من ضمن ما قلت : الله يفتحها عليك يا طلال ياخي بركة الليل الأمسى و الأوقات الخمسة .. و من واسع كمان .
.......
أقول ، هكذا نفخ طلال في صباحي - و هو صباحٌ لو تعلمون عصيٌ و بغلٌ عنيد في أن يرتبني زييّ و زي خلق الله في باقي بقاع الله -
و كل صباح أنا في ذات الحلم الآمل : يا الله هوووووووي الليلة يكون يوم ظابط و كويس ..
لكنه لا يكون .. و إن كان فهو ليس كما ينبغي .
على أي حال .. هاكم طلال و ناسو .. حبايب الروح :
ــــــــــــــــــــــــــــــــــــــــــــــــــ
حبايب الروح




يحيا الفن ويحيا التمثيل العلى حق، ربنا يديك طولة العمر ويفتح عليك يا بطل؛
....



سمير سعدي: إنسان شبه الروح تمام، بيعامل الكلام بحنان
وفي نفسه من جوه مفاتيح الحياة الصادقة: تعيش يا عم سمير
....




عبد الخالق محجوب
السوداني النابه صاحب القلب الصبي
....



فلادمير لينين: العوافي يا دكتور قضايانا المستعجلة
" ما فيش ثورة بدون نظرية" وانا فاهم كلام سيادتك
يا أفندي يا أريب، مفيش حركة بدون تفكير؛
يسلم عقلك يا لينين
ربنا يقدرنا على ما فيه الخير

نومه سعيده
....



الشيخ مصطفى إسماعيل: أحياناً بتكون الموعظة بالصوت
مش بالكلام؛
أحسنت الترتيل يا سيدي والتجويد كمان
ربنا بفتح عليك في كل مكان
....



جوان بيز، لما بسمعها بفتكر حاجات عمري ما شفتها
....



صلاح جاهين: شاعر السماوات والأرض وكاتب أحلى الكلام في العالمين؛
....



من زمان وهو بيدندش قلبي بالحلاوة والطلاوه
عم بليغ عم المزازيك
....



الشاعر
....



فيروز طبعاً
....



جون قرنق، مقاتل حرب العصابات قوي الشكيمة، ألهم السودانيين مقاتلة الحكومات
حاجه تمام
....



مهدي عامل، توطين الماركسية في فهم النزاع الطائفي
....



إدوارد سعيد، ذهن متقد ويحب المناوله
....



مسيو بيكاسو، هاو آر يو
I love you very much
....



مصطفى سيداحمد، فنان صادق وملهم، فتح قلبي على اليسار
بنضافه، وطول بال
....



كارل ماركس: قلب حكيم وعقل فنان، عرف درب الإستنارة الصادق، وعرف إن أحلام البشر في المساواة جايزة
....



سوسو يا سوسو يا ضي عنينا
عمري ما كنت أتصور إن تكون لي فتاة أحلام
وطول عمرك ياسعاد فاتحه شبابيك الحلم
....



شاعر السينما، داوود عبد السيد، أحلى صورة ممكن النفس تلتقطها في السينما
عفارم عليك
....



الشيخ إمام، جسر من الحياة إمتد جواي وعالم من الصداقة
يرحم أيامك يا شيخ
....



أحمد منيب: عمر قلبي ما يتصور إنو يعيش من غير الصوت ده
....



منير: صوتي وقلبي الحنون
....



مانو داياك: مناضل أفريقي، ناضل عشان حرية شعبه في الصحارى التعبانه المحاطه بالدول السخيفة في القارة؛
....



سيدنا الحسين، قمر الحلوين، مشغول بسيرته العالية
....



جمال عبد الناصر: تفاحة بني مر
أول كبير في حياتي، بحب صوته وشياكته وحسن ظن الناس به
....



الأستاذ جيفارا، أحلام كبيرة في قلبي تعلقت بسيرته
....



الفنان حسين شريف: أحب أبناء البشرية إلى قلبي بعد الست الوالدة. علمني وأحسن إلي إحساناً
....



علي بدرخان: وكأنك صدبق طفولة، بحر من الحياة وقلب صافي
....



جمال محمد أحمد: بمناسبة الحب يا خال، فالقلب عامر
مشتاقين لأيام فيها من ريحتك السمحة
....



صوتك.. وأغانيك خلوا الواحد على الأقل يحس معاني الحياه
لولاك، جاجات كتير كانت هتضيع عن الفهم يا بوب
....



مليت طفولتي ومراهقتي النديانة بأغانيك الحلوة
وفتحت باب الهوى على أصوله
ــــــــــــــ



يا طلال
شكراً ياخي .

معليش يا طلال ..
إعتديت على ونساتك مع روحك ..
تاني بالله اتونس بصوت عالي .. و مشاع .
بدل ما تعلمنا السرقة آخر عمرنا .

.........
ملحوظة :
التعليقات اسفل الصور لطلال .

يا سلام عليك انت وطلال
وشكرا على الواحة فى الزمن الهجير

وبراحة شوية على تيتو يا عمدة

في انتظار صور الحبايب الجد جد و التعليقات عليها.

اجمل اتنين اتابعهما بامعان وشغف شديدين
عماد الذى يصور بالكلمات,
طلال الذى يكتب بالصور..



جميل الشكر عماد
جميل الشكر طلال



تحياتى واعجابى

كبير والله ياطلال



وماقصرت ياعمده اهو خليتنا قريبين من عوالم طلال
لكما اي حاجة عايزنها

ابو خضرة الأخدراني ..
ياخي شيوعينكم ديل ما أحلاهم ..
- ما كلهم .. واحدين كده بس -
أمسك عندك : محمد خير حربش / أسامة اب شنب / مصطفى بحيري / شمس الدين بشارة / علي فضل ..
و كثيرون كثيرون لا يعلمهم الناس .. جميلين ياخي و حقيقيين و بني آدمين .

طلال واحد زول , واحد صحيح .
شكراً يا ابن خالتي ..

سلام تاني يا عمده وباشباب،
الكلام ده كلو مخلي الواحدمحرج في داخلية نفسو؛
في لزوم للحفاوة الشديدة دي؟

المسالة والله حسن ظن منكم شديد،أتمنى أرتقي ليهو
في ساعة من العمر..

خضر يا خضر، يعني إنت كنت مستني عماد يجيبك علينا؟
ما بتبالغ؟
شوف محنة الإنسان، تكون قاعد مع الزول في بلد وحده،
وتفتش ليه في الإنترنت!
عمي سألني مرة بعد تكريعه كبيرة ورا أكلة سمك:
إنتو الإنترنت ده وين؟

رحمه الله

سمندلاوي ياخ ربنا يكرمك ياخي ..
و يديك قدر مرادك .

الكلام ده كتير علينا ..
أو عليّ أنا غايتو .

يسعد مساك يا زول يا حلو .

Quote: اجمل اتنين اتابعهما بامعان وشغف شديدين عماد الذى يصور بالكلمات, طلال الذى يكتب بالصور..

كونك تجيبني في مكانة مشتركة مع عماد، فده أمر بفتح النفس
يا سمندلاوي، عماد كاتب أريب، بجوار حسن مطلعه وبدعة صنعته
في الرسم.. يعني عندو رسم البورتريه فيه محسوسية مدهشة كذا
يطبع رسمه طابعاً آسراً على النفس؛
انا قريب في السودان ما بكون شفت شي زي ده.
فكتر خيرك على التجاوز وعطف إسمي على إسمو الجميل..

لكن خليني أرجع لكلامك وأعود لكلمة شغف:
الشغف ده مفتاح من مفاتيح الحياة، بيضفي على الأشياء نضارة..
وغياب الشغف بيخليك غايب عن نفسك وغير مرتاح، فهو بيضفي شي
من الحيوية وملمس من السحر على محسوساتك..
حتى الحب، إن غاب عنو الشغف، بيكون شعور عادي.
إلا لو كنت شغوف تلقاك تحس بالرغبة وتحس بالمبادرة والصحة
والإنتعاش البهي.

ربنا يجعلنا من المحبين الشغوفين.

عُمده والأصدقاء،
في كلام جميل، قريتو من أيام وشعرت إنو معبر وصادق،
أحب يتقري..
الكلام لمريد البرغوثي، الشاعر والروائي الفلسطيني
المعروف.
هو كلام عن إستحقاق الحياة، وعن أهلية الإنسان بإنو
يكون بعيد عن العنف والأذى؛ كلام بيحيلك للغباء العام
المستشري في المسيرة البشرية، وقدرة إبن آدم على
تقويض السلاسة والدفع بالأذى.
بيقول:

لا بأس أن نموت في فراشنا
على مخدة نظيفة
وبين اصدقائنا
لا بأس ان نموت مرة
ونعقد اليدين فوق الصدر
ليس فيهما سوى الشحوب
لا خدوش فيهما ولا قيود
لا راية
ولا عريضة احتجاج
لا باس ان نموت ميتة بلا غبار
وليس في قمصاننا ثقوب
وليس في ضلوعنا ادلة
لا باس ان نموت والمخدة البيضاء
لا الرصيف تحت خدنا
وكفنا في كف من نحب
يحيطنا يأس الطبيب والممرضات
وما لنا سوى رشاقة الوداع
غير عابئين بالايام..

Quote: في انتظار صور الحبايب الجد جد و التعليقات عليها.

جيب الصور لو عارف حبايب جد غير ديل يا سحس ..
و لومك بي .. أنا بعلق ليك عليها .

Quote: في انتظار صور الحبايب الجد جد و التعليقات عليها.

والله يا سحس ديل حبايب جد جد، رفاق قلب وأنـَس الليالي
.

Quote: وبراحة شوية على تيتو يا عمدة

قول الكلام ده ليهو .. و ليك ..
صاحبك ده فيهو بسم الله .. و إنت و بعانخيك برضو ..
شفت كيف ممكن شوية حاجات صغيرة تستعدل البني آدم يا عصام ؟

الله ده ما كريم ياخ .

شفت عماد يا عصام؟
شفت الإحسان واللطافة يا صحبي، غايتو ربك يديهو
هداوة البال والعافية.

طلال .. و لسان حاله :
( واحدٌ من جنودك يا " جمال " .
قطعوا يوم مؤتة مني اليدينْ
فاحتملتُ لواءك بالمرفقينْ
و احتسبتُ لوجهك مُستَشهدي ) .


.........
خلي اللوا عالي يا ابن خالتي ..
و خليك فارد روحك و متعادل زي ما رنت .

Quote: واحدٌ من جنودك يا " جمال " .

جمال عبد الناصر..
فتنة عمري يا عماد، مفتاح الهوى الأول، بسببه حبيت عبد الحليم والموسيقى،
عشان عبد الحليم بيغني لجمال، بعد كده عرف صلاح جاهين والأبنودي ونزار
قباني عشان عبد الحليم بيغني شعرهم، ثم بعد حبي لهؤلاء الشعراء أحببت الشعر،
وحبيت فكرة الإشراكية لأنها كانت مضمونة في كلامهم الحلو، ثم عرفت الخواجات
الفطاحلة، ماركس ولينين، ووقعت في شباك غرام كلامهم الميسور عن تصحيح
أوضاع الناس، والخلطة دي كلها أوقفتني على عتبات البهجة، فعرفت طعم الحب
والكتابة والنظر إلى اللوحات ومنادمة الحياة.
كنت أحب عبد الناصر وانا ولد غض غرير، وما كنت عارف إنو هو الذي ضغط
على الزرار إللي بعده تغير مسار النيل وغرقت بلادنا في النوبه، وضاعت أبريم
والديوان وكلابشه والعلاقي وكروسكو وأدندان.
الله يسامحه ، لكن لسه يظل فيني هذا التعلق الشغوف بطلته البهية ورجولته النضرة
وصوته المبهرج بالقوة ونظرة عينيه ونظافة يده وقوة شكيمته.

من أكتر الكلام الذي لمسني ، كلام العم أحمد فؤاد نجم.. حين مات عبد الناصر
قي سبتمبر 28 سبتمبر 1970.
كان نجم في المعتقل حين ورده خبر موت عبد الناصر،
لكنه كتب:
عاش ومات وسطنا
على طبعنا ثابت
وإن كان جرح قلبنا
كل الجراح طابت

...
شكراً يا عمده..

سلام عليك ياعمدة ، وعلى طلال !

عالم جميلين ، وناس أجمل مافي شك .


( أى أخلاق فاضلة - وأى عمل صادق وجميل ، إنما هو في الحقيقة دين ! )

Quote: فيا طلال الدين بن عفيفي .. ياخي شفتهم و حسيت بيهم و بيك ، و اتمليت راحة جوانية مركزة و مجيهة .. و دعيت ليك من صباح الرحمن .. تصدق أنا زول كويس و عندي ظن حسن في الله .. إنه برضو يبادلني حباً بحب .. و لذلك فهو ما مقصر معاي و بيديني بكرم كبير . فله الحمد . المهم .. أنا دعيت ليك ، و ربنا ح يستجيب بإذن واحد أحد .. قلت من ضمن ما قلت : الله يفتحها عليك يا طلال ياخي بركة الليل الأمسى و الأوقات الخمسة .. و من واسع كمان .

بختك يا طلال

بحبك

و دعا ليك

و الله بحبه

و حيستجيب ليه


و ياربي يا سيدي

يحبونا زي ما نحن بنحبهم

زي الهوى،
زي صاحبنا أبو قلبا قيافه طلال ده ،
تقعد تعدد في (محطاتو) الجبتها بالصور دي بتلقى إنها
بتسوقك لأماكن أخرى هي ما خلف الصور الفانية ،
الناس الفوق ديل كل واحد فيهم ، وإنت أعلم مني ، لافتة
لمستودع بحجم المجرة من كل ما حلمنا به ،
عندما أرى صورة ناصر أو جيفارا أرى ما لا يُكتب هنا
وخليها كده يا عماد..
سألتك بالله خليها كده..


يا عماد ، هاك مظروف وعلى طريقة الأبنودي بقول ليك :
ملحوظه: إكتب عالمظروف عزيزي الغالي الطالع بالسد العالي طلال الغالي.

وإنت يا عماد ، زي ما بتدعو للحبايب ، بجاه المصطفى ربنا يديك الفي مرادك،
أنا عندي سفر ، أديني خاطرك،
وكان ما رجعت خلي الزوله السمحه الفوق دي تكتب (إسمي على رمل الطريق) فرسمي حتما إليه.

والله يا عماد أخوى
زولك مبدع أصيل ومتفرد
وقدر ما لازمتو الرقة والعذوبة برضو
زولك مسكين ساكت وبطلع فى شغلاتو . عادى ومتواضع جدا جدا .
بارك الله فيك أنت كمان يا عماد .
و يا طلال من جد ده شغل عالمى .

شي لله ياحسين

شي عجيب والله يا عماد، أسعدتني ودخلت في قلبي السرور،
الكلام الطيب زيو مافي، خليتني أحس بشي ما هقدر أوصفو..
فألف كتر خيرك..

الناس ديل مطوقين روحي بالورد والياسمين، فتحوا شبابيك الحياه
الواسعة علي، وخلوني أستمتع بالحياة وأحس بقيمتها البديعة.

تعاين فيهم وفي أفعالهم فتدرك حلاوة الإنسان وتقدمه وقدرته
الخلاقة وتلقى نفسك معتز بأنك بن آدم رغم كل البيحصل حولك..

فسبحان الله ..

الدنيا جميلة وبخير..

_____
شكرا عماد وطلال للفت النظر..

مبارك عليكي لفت النظر يا نجوان.
بس النظر شي والمعاملة شي.
المعاملة يعني التعاطي والأخذ والرد.

زمان، ولا تؤاخذيني، كنا حين نشد النفس المبارك من الجوزة المسقية
بالحشيش الطيب، يهمد جسدناونستكين.
لكن الأشاوس من ضاربي الصنف علمونا أن نفكر، ولو في السر، لمن سنهدي
النفس القادم؟
يمكن تكون أمور مساطيل، لكن مقياسهامحسوب على الحياة بكاملها.
فلو نالك من حسن الطالع مناب، إتنفسي! بس من غير ما تنسي الحولك.
وأجمل ما في الفائدة التعميم.

انا شاكر وممتن للكلمتين الصغار، لأنهم قدر الدنيا.

شكراً يا نجوان.

سلامات.

عصمان يا أخانا الذي في أمريكا ..
في حبايب تانيين كتار لطلال .. أنا مثلاص شاكي إنه وردي حبيبو
و بشرى الفاضل / سيد درويش / النبي يوسف / بيانخي ( بعانخي ) / محمود محمد طه .. و و و و .. و ناس تانية عجيبة .
زول عجيب طلال .

يا عثمان موسى تشكر على وصفي بالأوصاف الكويسه دي،
ما خليتو لي شي أقولو..

شكراً يا أخي

عثمان موسى..
دايماً متحمس كده في كلامك..
انا بشكر عماد وبشكرك لأنكم بتدوني إحساس كويس ومحتاج ليهو.
بكتب يوماتي، لكن نادراً ما أشعر بجدوى الكتابة.
كنت أحب أكون مزيكاتي، ألف وأطوف على الناس بمزيكتي، وأشعر
إنو لو كان الله قدرني على الأمر ده، هتكيف أكتر.
بس طبعاً، ربنا يديم علينا الكتابة والنظر.
كفاية علينا يا صحبي..





___________________
وردي:2008
منير: 2009

Quote: الناس الفوق ديل كل واحد فيهم ، وإنت أعلم مني ، لافتة لمستودع بحجم المجرة من كل ما حلمنا به ، عندما أرى صورة ناصر أو جيفارا أرى ما لا يُكتب هنا

يا سلام عليك يا راجل يا زوق و فهم ..
ما قلت إلا الحق يا صاحبي ..
و شفت زي كلامك ده و كلامي الإنشائي الطويل ..
طلال بيقولهم بلسان تاني , لسان صدق و محبات و عفوية ..
بيقوم الكلام يبقى ما كلام .. بيبقى زي الهمس الجواني كده ..
حلو و حبوب و أليف .

( بكره بتشتي الدِني ) ..
و يبقى وجه ربك ذو الجلال و الإكرام ..
و شوية سيرة حلوة تشهد ..
ياخي فاحسنوا إلى الحياة .

مرتضى الجميل , تتعدل عليك شقيش ما تقبل .

سلامات يا محمد المرتضى،
ممنون والله يا عزيزي
السد العالي هيفضل العقدة الغير محلولة مع ناصر.
يمكن كان مشروع قومي وكبير، لكن هدم وأغرق أعز
ما لأهلنا: أرضهم ونخلهم.
سامحه الله.

شكراً تاني كتير

و الله يا سلمى حقو تعرفي طلال ده .. اعرفيهو من قريب ..
هو زول خجول كده و براااااحه . لكن جواهو شغب بركاني من الإنسانية ..
ح تحبيهو .. أنا متأكد .

أقول ليك شي : ما تعرفيهو من قريب .. ما ضروري ..
خشي مكتبتو و أقري بالمهلة ..
ح تشبعي شبع .

ثم ليكي السلام يا بت يا كتابة إنتي .

YA EMAD AFTER ANY STORM THERE IS A RAIN BOW


TILAL IS A WOUNDERFUL AND PAINTED BY THE RAIN BOW AND MESSED UP BY SOFISTIC COLORS

HE IS ONE OF THOSE THINGS ONLY HAPPENS ONCE


I LOVE YOU BOTH

STAY HIGH
AND WELL

كان صاحبى ياعماد وكان (شيوعى جدا) كما يقول ..فى زمن مضى
كان بيننا تواصل اسفيرى وتلفونى جيد ..
حكاى ...كان يدهشنى بدقته فى اختيار التعابير والتعليقات ..
يعطيك احساس وانت تكلمه انه (برف) لهذه المكالمة التلفونية
من قبل ان تتصل عليه ...كتابتو جميلة وسلسلة ..(سهل ممتنع
تماما) ...ذهب مع الذاهبين من هذا المنبر ..واصبح تواجده
لماما ..بين الفينة والاخرى ...

استمتعت بالصور وبالتعليقات التى تحتها ..واحترت كيف
جمع طلال بين محبة هؤلاء جميعا؟!..

سلام يا عماد
طلال عندو حبيبة جميلة اسمها سعاد ابراهيم احمد
وحبيب انيق حلو السيرة والسريرة اسمو عم تجاني الطيب

واسألوه !!

ياعماد
طلال شلال طيبة وحنية وانسانية
تحوشو من هنا يطلع ليك من هناك
وفى كلو يملاك فرح مصور
ويديك امل مكتوب
وفى العينين كلام مابكمل
وسلامات

شكراً عمــــــاد
و طلال. لهذا الجمال
فإني لكمـــا من المُحبين.

السهل الممتنع
شكرا عماد

العصار لمن يقوم يقولو ده الشيطان
اعوذ بالله من الشيطان الرجيم
الجمال لمن يبتق تلقاههو يا هو طلال
طلا عفيفي
ماما في زول في الباب
ده طلال يا ماما
نمشي لي حسين شريف ...................
الله يرحمه
نلقي طلال
معاي حسان علي احمد
آآآآآآآه .....
سا آواصل
لأنقياء الدنيا
ابناء حورها

شكرا للنقاء وجمال الروح
اضيف ليك اثنين جميلين كجمال طلال عفيفى الراقى

غابرييل غارسيا ماركيز

Marcel Khalife

عماد بلا شك هولاء من ضمن قافلة طلال،،،

Quote: اجمل اتنين اتابعهما بامعان وشغف شديدين عماد الذى يصور بالكلمات, طلال الذى يكتب بالصور.. جميل الشكر عماد جميل الشكر طلال تحياتى واعجابى

خليت لينا شنو يا سمندلاوى

بالغ الاعجاب

على هذه الارض ما (و من) يستحق الحياة
تردد ابريل
طلال عفيفي
رائحة الخبز في الفجر
عماد عبدالله
آراء امراة في الرجال
و....
كتابات اسخيليوس
اول الحب
و...
و ...
.....

مع حبيب نورة في ندوة د. اشراقة مصطفي بالقاهرة .. سبتمبر 2010

شايف البورض الليلة ماشي نصيح
شكرا يا أعمامكـ على المتعة

ســلامات للكل...

لو كل زول بقول لأصحابه كلام زي دا (صادق وبستحقوه)كان شكل حياتنا اتغير بالتأكيد ...
دعونا نمسح حكاية يوم شكرك ما يجي...
طابت حياتك يا طلال وشكراً يا عماد وانت تفتح طاقات من نور تجهر بهاالاحباب

شكراً يا سلمى، ونتلاقى قريب ..
ووالله ده فعلاً كرم ..

يعشق البيوت القديمة

src=http://www.sudaneseonline.com/uploadpic10/Augest/sudans...udansudansudan37.jpg border=0 alt="sudansudansudansudansudansudansudansudansudansudansudansudansudan37.jpg Hosting at Sudaneseonline.com">

والشوارع والناس البسطاء

..
بتصدقني يا عماد لو قلت ليك اول حاجة باعملها لما افتح سودانيز اون لاين ..
اشوف اذا عندك بوست منزلو ولا .. لا ؟؟؟

اذا ما لقيت بوست ... بارجع اقرأ البوستات من الاول واقول يمكن يكون فطيت لي سطر

الليلة لقيتك ... ما شاء الله مالي البوست بي الحبايب ديل كلهم ... الله يديك الفي مرادك ..

وانا والله دعواتي مستجابة عديل كدة ..

وارقدو عافية

عماد وطلال ما أروعكم.
سبق وأن ألتقيت مع طلال لأول مره فى الخرطوم منذ عامين تقريبا فى حفل إقيم فى مدرسة أسامه داود على شرف كتاب النوبه للبروف الأمريكى الإنجليزى هرمن بيل وحفل أحياه الفنان وردى والبلابل .
وإكتشفت إن طلال عفيفى صاحب شخصية محترمة .

عماد السلام
طلال رجل فنان جدا
ومهذب ولطيف وكريم واصيل
ربنا يمتعو بالصحة ويرجع لينا بالف سلام

سلام ل
طلال عفيفي .....

آسف يا شباب ويا عمده على الإبتعاد، انابعيد عن الإنترنت
وغطسان في مهرجان سينما في مدينة في المانيا إسمها لايبزغ.
بتفرج على بدع المخاليق وحلويات الخيال وما حباهم به الله
من فن وإخلاص وصدق.. سينما مبهره وطازه تملا الفضا، بنات
زي الرياحين في كل مكان وشباب نبيه.. أحوم وأتفرج وأتأمل
وأسأل الله أن يجعل لنا من الطيب نصيب..

طلال


http://www.dokfestival-leipzig.de/v2/cms/en/home/page92.html

سلامات تاني..
ديل أصدقائي..
فلذات أكبادي..

قلبي شارب من حنان هؤلاء الناس..


ده إيهاب ، إحنا بنناديه " هوبه " بشكل عام ، هو حلو
ومن غير نضاره برضو حلو!


بشير، هو طبعاً إبن آدم كبير ، وممكن كمان تعده من ضمن المكيفات،
عنده روح تسع العالم بكل ناسه وظواهره الطبيعيه وربنا عطاه من عنده
الشيء الكثير من حيث الموهبة وطلاوة الروح وكده‬.


دي الست " أم أمل " والمعاها دي ، طبعاً ، أمل ! ..
إتعرفت على أم أمل وأمل في الفيوم ،
وعرفوا في مده قصيره جداً يرشوا على قلبي طعم عجيب
من حب الحياه والمكان هناك؛‬


دي الآنسه أميره ، شقيقة أمل بنت أم أمل ، انا بحبها موت بالرغم من إنها لا تعرف مناداة
إسمي ، وبتناديني " طبل " بدل سمي إللي هو "طلال"؛ بس أنا غير مهتم بهذا الأمر، فمصيرها
تكبر وتبدي لها الأيام أسماء أصعب من إسمي.
أمل دي حالة من خفة الدم والرقة ، وهي واحشاني جداً‬.

لمن شفتها اول مره قلبي إنخطف، وأدركت أن ربنا لسه بيلاعبني ألعابه الجميله،
وإن طول ما إنت حي فإن الدهشة ممكنة؛‬


عمكم محجوب، أب لعموم السودانيين والناس الغلابه، وحين تلقاه فإنك تجد نفسك
أمام ظاهرة إنسانية شديدة الندرة؛
انا أحد مريديه المفروشين على طول هذه البلاد وعرضها.‬

مساهر ياطلال
مساهر وبعاين وبقرا الله يسألني




ــــ
عازمك ياخ
تعال بس

والله يا طلال سنة 1997
حزنت حزن شديد لموت المصور السورى التركى الكندى يوسف كارش .
وكنت كل يوم امشى اتفرج فى معارض يوسف فى جامعة نيويورك .
يا أخى . زول عبقريتو تحير
والله يا طلال الناس واقفين محتارين .
بين
صور صوفيا لورين
والملك فيصل
وبرجينيف
وريغان
ومحمد على كلاي
وكيندى .

يوسف كارش ربنا يرحمو . الامريكان قالوا الزول ده مافى منو كتير فى الدنيا .

بس أنت يا طلال والله برضو جد جد فنان ختري
ومفروض تكون معروف فى العالم كلو . اليمنع شنو ؟
مافى شىء يمنعك .
جميلة قوي صورة المجاهدة أم أمل . الله . شايف جمال الفلاحين كيف ؟



تحياتى ومتابعين معاكم .

إلي عفيفي مع الحب !


كنتُ أتحاشي كثيرا الوقوع في ( شَرَك ) هذا العنوان وطلال يدري بأنهُ طريدةً لعشقنا !
وهو يعلم بأننا نتجاذب أطراف قميصه الذي قُدَّ من حبٍّ
بل نكاد أن نُمزِّقهُ عشقاً

( سألتك حبيبي )

فيروزة هي التي فعلت !
أنا لم أفعل شيئاً سوي الإنتظار علي مضاربِ النص لأقول كلمة كنت أتمني أن لا أقولها !
ولكنها فيروز تتآمرُ ضد صمتي
تسرقُ مني لغتي
تنتهكُ حُرمة شراييني و تخبرني بأن هنالك متّسعاً من الحب !

عفيفي لشدّة ما كفرت بآلهةِ هذا الزمان أعتقدت إيماناً بأنه طلال الله المنتظر
ويحي لم أكن أدري بأنهُ المنتظر !!!!

فيروزتي هي التي تسأل
( وين راح شادِي ) ؟؟
وأنا أطفئُ لهفتي بماءِ إصطبارها علي هجرِ المغني
والفرشاة والرسام
و
طلال ...
هل أنت جينةُ مسروقةٌ من صلواتي أم تُراكَ لا تتعدّي حالة كُفري بآلهةٍ لا تعترف بصلواتنا ؟
وفي كلا الحالتين سأصلِّي لك
سأشوِي وجهي في الوادي المقدّسِ طُوي وكلما أخشاه أن يضلّني السّامرِي
و أنا أدري بأنك نبياً تتمشّي في الأسواق
ترسمُ من حُسنِهاوتنهلُ من شِعرِها
وتتمهّلُ في مشيتك علي أرصفةِ الجمال !

طلال وسيد البوست
ما تشتغلوا بي خرمجتي دي الشغلة
وحاتكم ما كنت جاييك بيجاي لولا شخبتات فيروزتاي علي جداري !

وياريتني أقدر أجيكم صاد

صاد واللا ضاد سين سلام !!!

طلال عفيفي

إلتقينا في عيد الاضحى الماضي في القاهرة

ضمن شلة وسط البلد بقيادة حبيب نورة وحمور زيادة

كان مدهشا حب وحقيقة

يحمل كاميرته يصور ما يراه هو ولا نراه نحن

ويبدع بلسانه في التصوير لحكاوي زمان

لقاءات صغيرة

في زمنها
ولكنها تمنحك مؤونة عمرك من الود


طلال مدهش بحق وحقيقة

اتمنى أن ألتقيه مجددا

في سودان المليون ميل دائماً

وشكرا عماد يا جميل

على هذا الابداع

طلال يا طلال ....
مش عارف اكتب ايه و لا ايه ....
يا سيدي الواحد كان بالجد سعيد لمن لاقاك أول مرة face to face
مع ابراهيم الجريفاوي في Goethe
و لغايت ما نتلاقى في الخرطوم ....:)

عماد وطلال سلامات

اتنين اتمنيت الاقيهم بعد عمر النبوءه

الناس الطيبه بقت عدم وانتو شباب ابيض القلب وجميل

تسلموا

(الحب سيبقى يا ولدي)

طلال وعماد ....

الله يجازيكم .... مالكم علينا ....

ياخ إنتو ناس حلوين.

وزول بيسمع دي:

Quote: جوان بيز، لما بسمعها بفتكر حاجات عمري ما شفتها

أكيد زول فنان بالميلاد.

سلام

الأخـوة أســاتـذة الـشـــعـور

عــمـاد عــبـدالله وطـلال عــفــيــفــى

والـمـتــداخــلـيـن مـمـن أحـســوا بـالـجـمـال.

عــجــبـت لــتـطابــق الــرؤى،

ووحــدة الـشـــعــور حــيـنـمـا يــكـون صــادقــا.

نــبـهــنـى إلـى هـذا الـمـنـهــل الشـــهـى الأســتـاذ ابــو الـريــش

حــيـنـمـا عــلـم بـنـيـتـى فـى بـدايــة مــوضــوع عـن

الــفـن والإلـــتـزام

أنــوى أن أوثــق فــيـه لــمــريــم مـاكـيـبا

وديـــمـس روســــس

ومــرســيـديــس ســـوســـا

وفــيـروز الشـــرق

وفــيروز الــغـرب (جـون بــايـيـز)

و هــارى بــلافـــونــتـى ونـانـا مـيـسـكـورى.
Harry Belefonte
وهــو مـوضـوع كـنـت قـد بـدأتـه مــع قـصـــيـدة

قــبـل ســنـوات طـالـت حـيـنــمـا كـنت أدرس كـورســا

عـن الإنـتـاج الـفـكـرى فـى الـدول الـنـامـيـة.

وقـد تـعـلـمـت فـيـه مـن طـلـبـتـى مــن الـدول الـنـامـيـة

مـالـم يـخـطـر بـبـالـى. فـكــان أجـمـل كـورسات حــيـاتـى.

دلـفـت فــيـه إلـى عـوالـم الـحـب والـجـمـال والإلـتـزام؛

ووحــدة الــوجــد لــكل مـن أحــب الـشــعـوب بـصــدق.

وصــادقــت فــيـه بـخـلاف مـن ذكــرت عـالـيـه

فـيـلـســوف ثــورة غــيـنــيــا بـيــســاو وقـائــدهــا أمـيـلـكار كـابـرال

وتــعــمـقــنـا فـى ســمـيـر أمـيـن وأدورد ســـعـيـد

والأب الـشــرعـى للــثـورات الأفــريـقـيـة والأســيــويــة

الـشــاعـر الـمـســرحـى الـمـفـكـر الـصـحـافـى مـحـمـد عــلـى دوســة

وفـيـلـســوف ثــورة الـمـســحـوقـيـن فــرانــز فـانــون

وداعــيـة الـعـلـم مــن أجــل الـتــحـــرر الـبـرازيـــلـى بـاولــو فــيـريــرى

والقـس الـكاثـولـيـكى الـماركـسى الشـاعر الأديـب (شــاعـر الـثـورة وضــمـير الأمـة)

الـثـورى آرنـســتو كارديـنال وزيـرثـقافـة نـيـكاراجـوا الأســبـق

وأديــب الـبـيـرو مـاريــو فـارهـاس يــوســـا

وشــعـر طـاغــور وحــافـظ الـشــيـرازى.

وكــثـر غــيــرهــم إســـتـرجـعـت ذكــراهــم بــمـا صــغــتـمـاه مــن حــروف الـولــه

وقــوة الــــوجــــد وإنـســانـيـة الإلــتـزام.

لــقـد أكــدتــمـا لــى مــاكـان يــقـولـه لــى صــديــقـى الـفــنـان هــبـة عــنـايـة:

"يــاعــبـد الـدنـيـا دى مــلـيـانـه جــمـال ونـاس حـلــويـن للـى عـايــز يـشـــوف!"

فــشــكـرا لـكــمـا لــهـذا الإمــتـاع الإنـســانـى اللامــتـنـاهــى الــحــدود..

مـــرســيـديــس ســـوســــا فـى واحــدة مــن أخــلـد أغــنـيـاتــهــا



مـــرســـيـديــس ســـوســـا مــع جــوان بـــايــيـــز

فـيــلـســوف الـثــورة الأفــروأســــيــويـــة مـــحـــمــد عـــلـى دوســـة




فـيــلــســـوف ثــورة الـمـعـــذبــيــن فـى الأرض فــرانـــز فـــانـــون





شـــاعــر الــجــمــاهــيـر والــثــورة الـقــس إرنـســـتــو كــارديــنـال



فـيــلـســوف الــثــورة الأفـــريـــقــيـة أمــيـلـكار كـابــرال

شكرا ياعماد على البوست الرائع،

وتحية للعزيز طلال... واسمح لى بإهدائه هذه المجموعه التى تشكل الظلال السلبية والحيه:




.

يا عماد و طلال
مولانا ده رأيكم فيهو شنو؟

الحكاية هى البصيرة يا عماد.، فالبصيرة هى النور, وهى الهادى.
لو ربنا أداك نعمة سلامة البصيرة بيكون أداك كل شئ.
طلال عنده بصيرة, وعنده وفاء, وعندو حب للناس, الكائنات والأشياء,
عشان كده بيكون فايض دايماً بالطلاوة والحلاوة دى.
زول ناصع شديد, وحلو زى كريم الكراميل, أو أشد.
وإنت يا عمدة برضك زول ما هين, فيك زيو الكتير,
والواحد بيطمئن لما يقراكم.
الله يخليكم لينا.

محبة لعماد عبدالله من ناس مدني حي القبه


ومثلها لطلال عفيفي اشترك معه في معظم الصور

الا جمال عبد الناصر فهو حسن النية لكنه ديكتاتور نشر المشاريع الديكتاتورية في المنطقه

السودان ليبيا سوريا اليمن وغيرها


غايبه بالنسبة لي صورة الاستاذ محمود وهيبته ومساهمته في الفكر الانساني

وغاندي ومارتن لوثر


من الكتاب حسين مروة ومحمد شكري وخبزه الحافي ولويس عوض

شعراء السياب امل دنقل وعبد الصبور

تشكيل اللباد وناجي العلي واسماعيل عبد الحفيظ وخالد كودي

وعماد الفنان بتاع كلو

والله طمام البطن عند عماد سمح

بدفق درر ويغطي رقراقات الكلام القبيح المنتشر هنا
لضبط مين او ضبط فلانه
وزيطه وعيطه

وناس هلمجرا

تعرف يا عماد طلال دة عنده حاجات كدة بنقرشها براهو
والله والله اتمنيت يكون صاحبي
بس الله غالب ((المضهبين)) الزين ديل ما ممكن يصاحبو النجوم

طلال عفيفي قاعد يخاف من الكاميرا

سلام عماد وطلال

ولا عمّك يوسف, صاحب الخال الشهير,
وسيد السينما المغايرة, والمشاهدة المتعبة

الفاضل عماد عبدالله وضيوفه

تحياتي

العزيز طلال عفيفي سلام

كنت في البورد دا زمان وانقطعت ومرة جيت من برة لقيت موضوع لطلال عفيفي هنا شفت صورته استغربت الزول دا انا بعرفه اتذكرته كان ولد صغير (مع حبي واحترامي ليه ) لمن شفته ساكن كوبر الواحة بيته قريب من بيتنا جارنا يعني اتكيفت جدا انو الزول يلقى ود جيرانهم رغم انه ساكن الواحة ونحنا ساكنين كوبر لكن برضه الجار للجار رحمه وهسع مطمن بيه رغم انه مابكون متذكرني ولا بعرفني لكن اتشرف بيه

يا طلال نحنا اولاد جيرانك جنيك هنا عبدالعزيز وعلى جلاس سندك وضهرك وانت سندنا وضهرنا وابقى معانا

يا عماد عبد الله
كلم طلال صاحبك دا يجي يرد على الكلام الفي البوست دا

أحلِف بالذي خلقني من تُراب ثم من نُطفة ثم سوَّاني رجُلا...هو وائل طه محي الدين

وكما قول ليه الهروب ما بحلك

عالم فاكاها في روحا ودايرة تفكها فينا

معتز رجاءا لا تفسد هذا البوست






ـــــــــ
راسل طلال فى الخاص لو شئت

ايزابيلا تحياتي واحترامي

Quote: معتز رجاءا لا تفسد هذا البوست ـــــــــ راسل طلال فى الخاص لو شئت

ما قاله طلال لم يكن في الخاص
بل قاله في المحكمة


يعني في العلن ...

اذن عليه الرد في العلن

وسألاحقه أينما حل


مع ودي واحترامي

يا ايزابيلا

طلال ووائل افسدا على انسانة حياتها
فهل تستكثرين علي افساد بوست

؟؟؟؟؟

لينصفا هذه المظلومة وليحكيا ما شاءا

ميريام ماكيبا Miriam Makeba الذكرى الثانية للرحيل

up

Quote: فهل تستكثرين علي افساد بوست

ليس هنا يا معتز ..
أفسد ما شاء لك . لكن ليس في " بوستي " ..
ليس هنا .. رجاء

Quote: أفسد ما شاء لك . لكن ليس في " بوستي " .. ليس هنا .. رجاء

لغة عالية عماد


بالله يا جماعة واصلوا في موضوع الصور العجيبة دي

you know the name

amal dugal

true..for true people

بوستك يا عماد مما شاء لي ان افسد

فهو باسمه فحتما سيعود اليه مزهوا

مع اعتذاري لك ولزوارك

مودتي ومعزتي التي تعلم

Quote: بوستك يا عماد مما شاء لي ان افسد

!!!!!
خير ..
كما تشاء .

****

Quote: اجمل اتنين اتابعهما بامعان وشغف شديدين عماد الذى يصور بالكلمات, طلال الذى يكتب بالصور.. جميل الشكر عماد جميل الشكر طلال تحياتى واعجابى

صدق سمندلاوي عليه الرحمة فيما قال


شكرا طلال
شكرا عماد على الجمال

غريبٌ أمر أرواحنا يا أيها
تحمل الورود والورود تحملها
لكنا
حين نود أن نضعها
يهربُ أريجها قبلها
إلي المكان

فلكما وللعابرين الأريج
ولتبقى الورود في حدائق الروح
ترعى ذاتها بالمحبة