هل يحق للشماليين المطالبة بجنسية دولة الجنوب ?

ام الافضل ان يحمل كل السودانيين كلتا الجنسيتين

الاخ واصل
تحياتي
سمعت انك لو شمالي ومن مواليد الجنوب ممكن تحصل على الجنسية بالميلاد
بل ويمكنك ان تصوت في الاستفتاء ايضا

لكن اجابة على سؤالك، ما عندي فكرة اذا كان الجنوب سيقبل منح الجنسية
الجنوبية للشمالي

وللاجابه علي سؤالك، لازم في الاول نجيب على سؤال تاني:

لماذا قد يرغب الشمالي في الحصول على جنسية الدولة الجديدة؟؟

Quote: لماذا قد يرغب الشمالي في الحصول على جنسية الدولة الجديدة؟؟

اخ احمد سعى كثير من السودانيين للحصول على جنسية
دولة اخرى لتفادى المشاكل و التعقيدات التى تواجه
حامل الجنسية السودانية فى اغلب دول العالم .لا تنسي
تهافت السودانيين لحصول على الجواز الاريترى و التشادى

هناك ازمة تعريف في من هو الجنوبي ومن هو الشمالي!!
لان هناك جنوبيين من اصول شماليية وشماليين من اصول جنوبي!!
وفي الحالتين يحق لكلا ان يحمل اي الجنسيتين!!
ولكن هذا ليس ما تعنيه لاني اعتقد انك تتطرق الي هذا الموضوع من وجه نظر
المؤتمر الوطني ومن لف لفهم من الشماليين!!
الجنوبي الذي لا يحق له جنسية دولة الشمال والشمال الذي لا يحق له الجنسية الجنوبية
هما من لم يعش في النطاق الجغرافي للجهتين لمدة خمس سنين متتالية!!
وما عدا يحق الجنسية للطرفين!!

Quote: هناك ازمة تعريف في من هو الجنوبي ومن هو الشمالي!! لان هناك جنوبيين من اصول شماليية وشماليين من اصول جنوبي!! وفي الحالتين يحق لكلا ان يحمل اي الجنسيتين

البينو تحياتى
المفترض ان يكون تعريف الشمالى او الجنوبى جغرافيا و ليس عنصريا
يستوى فى ذلك الجنوبى المقيم بالشمال والرحل الذين يتنقلوا فى رحلة
الرعى صيفا وشتاء

Quote: المؤتمر الوطني ومن لف لفهم من الشماليين!!

انشاءالله ما تكون قاصدنى انا اخى الكريم عشان مافى داعى للارهاب الفكرى

الأخ / وائل السيد

السلام عليكم ورحمة الله تعالي وبركاته..

يخيل لي ، والله اعلم، انو تعرفت للهدف من وراء هذا السؤال.. فلو اخطأت صححني..

هل يحق للشماليين المطالبة بجنسية دولة الجنوب ?

اذا كان الجواب بنعم، يبقي الوحدة ح تكون موجودة فعليا فاكتساب الشماليين لجنسية الجنوب ، يعني بالضرورة ان الاغلبية اختارت الوحدة عن طريق اكتساب الجنسية، ولن يصبح الانفصال واقعا الا اذا كان الجواب (بلا)
الفرضية دي بنيتها علي اساس انو تلقائيا اغلبية الجنوبيون سيختارون الجنسية الجديدة، ودخول الشماليين في الخط(اذا سمح قانون الجنسية ) في دولة الجنوب بذلك ، يعني ان الراغبين في الوحدة وقتها سيقومون بطلب نيل الجنسية الجديدة بأعداد كبيرة، وسيتمكون من اقناع اعداد مقدرة، بالفكرة والهدف النبيل، في ظل ما يوفره اكتساب الجنسية المزدوجة من مميزات كبيرة، دون التقيد بالرحيل عن المكان الذي يتواجدون فيه او تعرضهم للضغوط السياسية والملاحقات الأمنية،،
فعلا سؤال ذكي، والاذكي منه لو قامت الحركة الشعبية باتاحة مثل هذه القوانين، عندها ستتوفر لها الاعلبية الفعلية لفرض رؤيتها علي السودان ككل...


محبتي

Quote: اخ احمد سعى كثير من السودانيين للحصول على جنسية دولة اخرى لتفادى المشاكل و التعقيدات التى تواجه حامل الجنسية السودانية فى اغلب دول العالم .لا تنسي تهافت السودانيين لحصول على الجواز الاريترى و التشادى

دي حقيقة، ولن اكون اكثر تفاؤلا من الاستاذ كمال عمر الامين السياسي للمؤتمر الشعبي
حين قال، اذا ما زالت نفس الحكومة تحكم الشمال فسافضل البقاء في الجنوب

يعني ح اكون كوز اكتر من الكيزان كيف وهم يهربون من اخوانهم في الشمال

ما علينا

ننتظر ونرى ونعرف قوانين الهجرة والجنسية للدولة الجديدة، تكفيني اقامة عمل

لكن الخطورة بتبقى اذا فعلا سمحت الحركة الشعبية للشماليين بالحصول على الجنسية
الجنوبية

عارف لييه؟؟

الشماليين عندهم قروش ووضعهم المالي احسن بكتير من الجنوبيين لاسباب معروفه للكل

سيهجم الشماليين وبالذات الرأسماليين على الجنوب وشراء الاراضي واقامه المشاريع
التي دمرها لهم المؤتمر الوطني في الشمال، حينها قد تخاف الحركة الشعبية على المواطن
الجنوبي من ان يصبح للمرة الثانية تحت رحمة راس مال الجلابي (اعذروني على المصطلح)

اتوقع ان تعاند الحركة الشعبية قليلا في منح الجنسية للشمالي.

او ان تفرض وتفعل قوانين النظام الاشتراكي في الاقتصاد حينها قد لا يكون الجنوب
جاذبا للشمالي.

تحياتي

اخ احمد
الجنوب-فى حالة العلاقات السلمية مع الشمال- سيكون مغرى لكثير من الشماليين للنزوح و الاستثمار و العمل
كما ان كثير من الجنوبيين ارتبطت مصالحهم بالشمال فموضوع رجوعهم للجنوب هو كارثة بالنسبة لهم

اخ جمال سلامات
الجنسية المشتركة لكل الشماليين و الجنوبيين سيسهل
موضوع التعايش السلمى بين الجاريين كما انه مدخل
لوحدة قادمة بعد زوال عوامل الانفصال

عرمان زاتو ربما لاينال جنسية الجنوب

Sister Fadwa
Salam

Quote: عرمان زاتو ربما لاينال جنسية الجنوب

how did you know that ?
by the way Arman wife is Southerner

يا وائر سلام

مفروض سؤالك يكون اكثر تحديدا.

وما مطلوق ساكت كده.

المنطق بيقول الشمالين المقيمن في الجنوب؟؟!!فقط!


وهؤلاء كما وضحوا لك اكرمهم الجنوبين بل منحهوم حتى حق تقرير المصير معهم
فهم لهم حق التصويت.



لكن خلينا نجيء لعموم الشمالين المنطق بيقول برضو حيشبه قوانين العالم
اي استيفاء زمن اقامه محدد او بالزواج او...الخ.




لكن تعال شوف نحن حاقرين بالجنوبين الاقاموا معانا
ولم يعرفوا وطنا غير الشمال قدر شنو؟؟؟



نحن نتحدث عن حقوق اعداد غفيره يرغب الشمال في حرمانهم
من حق الحياه بحرمانهم من الحقنه حتى.
تقول لي شنو؟؟!!

تراجى سلامات
الوضع السودانى هو وضع استثنائ انا
اعتقد ان اغلب الداعين للانفصال غير
مؤمنين بيهو فعشان ما نعقد الامور لانو
ان طال الزمن او قصر مصيرنا نتوحد تانى
فلحدى دة ما يحصل اذا كان كلا الشعبين بيحمل
الجنسيتين دة حيسهل الوحدة تانى

Quote: لكن تعال شوف نحن حاقرين بالجنوبين الاقاموا معانا ولم يعرفوا وطنا غير الشمال قدر شنو؟؟؟

اخت تراجى
و نجى للشماليين (الما ) موجودين بالجنوب ...
عل لديك فكرة عن حجم وجودهم قبل و بعد نيفاشا ؟
فى تقديرى الشخصى و نتيجة للمضاياقات (مش المضايقات بس بل الموت قتلا )
التى تعرضوا له للاسف من الجيش الشعبي نفسه(المفترض انو منضبط( ناهيك عن المواطن العادى
موظفين كثر فى شركتنا شماليين ليسوا على استعداد للذهاب لاى مأمورية فى الجنوب حتى لو كان البونس 5 الف دولار
و نتيجة لذلك بقينا نجيب اجانب .
منطقك يا اختى معووج :نعطى الجنسية للشماليين فى الجنوب و الجنوبيين فى الشمال (المزدوجة ) و هم يضايقون الشماليين فى الجنوب
فالمستفيد من الشماليين فى احسن الفروض لا يزيدوا عن 1% بينما ملايين الجنوب فى الشمال يحملون الجنسية المزدوجة لا يقلون
بحال عن الاحوال عن 30% او 50 % من الجنوبيين .
الكلام دة بيسموه (حشفا و سؤ كيل )

ورد اليوم بجريدة الرأى العام :

Quote: أكد الفريق أول هاشم عثمان مدير عام قوات الشرطة، عدم التخوف من حدوث أي إنفلاتات تُصاحب إجراء الاستفتاء في يناير المقبل، وأشار إلى أن أجواء تلك العملية تكثر فيها الشائعات، مطمئناً المواطنين بعدم مُغادرة العاصمة أو أماكن عملهم لأيّة جهة كانت. وقال هاشم في حوار مع «الرأي العام» يُنشر لاحقاً، إنّ الشرطة ستساعد المواطن الجنوبي الذي سيظل بالشمال، وزاد: من أراد أن يذهب للجنوب فهو حُرٌ. وقال هاشم، إنّ الجنسية السودانية ستُسقط عن أهل الجنوب إذا تم الإنفصال، ونفى بشدة أن تكون جامعة الرباط قد فصلت طلاباً جنوبيين لأسباب سياسية، وأكد هاشم أن الشرطة تعمل بتنسيق مع شرطة الجنوب لتأمين الشماليين الموجودين بالجنوب، وزاد: إن الجنوب تعهد بحماية الشماليين في الإقليم، وأكد مقدرة الجنوب لحماية المواطن الشمالي في الجنوب، وكشف عن ترتيبات داخل الشرطة للضباط والأفراد الجنوبيين في الشمال حال الانفصال

الاخ وائل
سلام
شوف اخر لحظة برضوا جايبة شنو :

Quote: وعلمت «آخر لحظة» بأن نقاشاً يدور في أروقة الوطني حول منح بعض الجنوبيين الجنسية السودانية عقب الانفصال بالإضافة لمنحهم حق تملك العقارات بالشمال.. وقدر قيادي بالمؤتمر الوطني عدد الجنوبيين بولاية الخرطوم بـ «مليون» و «70» ألف مواطن منهم «180» الف يمتلكون منازل بالولاية و «10» آلاف موظف و «21» ألف طالب بالجامعات و «27» ألف بالمرحلة الثانوية.. وثلاث اضعافهم بمرحلة الأساس.. وقال عبد السخي عباس القيادي بالوطني لـ «آخر لحظة» إن «11» مليار دولار من عائدات النفط تم صرفها لصالح عودة الجنوبيين من الشمال الى الجنوب معرباً عن أسفه من أن التقارير الواردة من الجنوب تفيد بأن الذين تم ترحيلهم مؤخراً يواجهون مصيراً مجهولاً وأوضاعاً مأساوية بحسب تقارير منظمات دولية.

سلامات يا مدثر

Quote: وقدر قيادي بالمؤتمر الوطني عدد الجنوبيين بولاية الخرطوم بـ «مليون» و «70»

اذا ديل قعدوا فى الشمال و اخدوا الجنسية كلهم الفضل منو فى الجنوب .
و مشكلة نحن مواطنيين درجة تانية و الاضطهاد و العنصرية حتظل قاعدة و حنكون لسة فوق صفيح ساخن .
لكن لو كان الحل متبادل يعنى كل الشماليين ياخدو جنسية دولة الجنوب ة العكس
الفايدة حتكون مزدوجة للطرفيين .

وائل شوف كلام نافع منشور في الراي العام اليوم

Quote: ووصف المطالبة بمنح الجنسية المزدوجة بالمنطق الأعوج وعدم الحياد، وقال إنّ الحركة تستند في دعواها للانفصال باضطهادهم في الشمال، وقال على الحركة ألاّ تخدعهم بالدعوة للتصويت للإنفصال والحصول على الجنسيتين، وقال: (إذا حدث إنفصال، الجنوبي في الجنوب والشمالي في الشمال)، وتابع: «الحديث عن شعب واحد في بلدين قول باطل أريد به باطل»

حبيبنا مدثر
طبعا كلام نافع فى اطار سياسة لى الزراع و محاولة الظهور بمظهر المتشدد
حتى ينال اكبر المكاسب و طبعا دة اسلوب بيجيدوا الطرفين .

Quote: «الحديث عن شعب واحد في بلدين قول باطل أريد به باطل»

بس الكلام دة ما هو الحل
هناك اشكاليات و مصالح لكثير من الناس مرتبطة بالشمال و الجنوب
فما هو الحل

حينما انفصلت تشكسلوفيا
الى تشيك و سلفاكيا خير
الشعب بي تلاتة خيرات
1ـ ان يحمل الجنسية التشكية
2- ان يحمل الجنسية السلوفاكيا
3- ان يحمل الجنسيتين
كل هذا بغض النظر عن جنسيتك الاصل

Quote: حينما انفصلت تشكسلوفيا الى تشيك و سلفاكيا خير 1ـ ان يحمل الجنسية التشكية 2- ان يحمل الجنسية السلوفاكيا 3- ان يحمل الجنسيتين كل هذا بغض النظر عن جنسيتك الاصل

فيسولى سلامات

Quote: و سلفاكيا خير

انا قريتا سلفاكير.

Quote: الشعب بي تلاتة خيرات 3- ان يحمل الجنسيتين

انا شايف انو ده الحل الأمثل فى حالة السودان
زول الشمال كان ماعجبو الحال فى الشمال يشيل جوازه ويمشى يعيش فى الجنوب
وزول الجنوب كان ماعجبو الحال فى الجنوب يمشى يعيش فى الشمال مع احتفاظ كل زول بحقوقه اللى كفلها ليهو القانون فى البلدين . وده حل اقرب للوضع الفيدرالى باختلاف ان كل كل اقليم له مساحة سياديةاعلى من سقف الفدرالية الموحدة . واعتقد ان الحركة الشعبية اقترحت الحل ده على المؤتمر الوطنى ورفضه.
ولا ادرى ان كان اقتراح الحركة الشعبية قد عنى ان يشمل ازدواج الجنسية الشمالين ام يقتصر على الجنوبيين.

الاخوان فيصل و عبد العزيز
ما ذكرتماه هو عين ما ادعو اليه
بس نتيجة للاحتقان الحاصل فى البلد ما حيتطبق
المشكلة الان ما فى الحكومتين بل فى عامة الناس اللى رافضة الطرف الاخر
فى اى نقاش مع اى مواطن شمالى بيقول ليك لو حصل انفصال ما دايرين نشوف جنوبلى حايم بالشمال
اما الوضع فى الجنوب فأسوأ كتير

وائل السيد
يا وائل أخوي طبعا ما ممكن لأن الجنوب سيكون بعد الانفصال دولة مستقلة ذات سيادة ولديها قوانين ونظم ووزارة
داخلية تكون مسؤولة من حكاية الهجرة والمواطنة.. وعشان تحمل جنسية الحنوب فلازم تستوفي شروط المواطنة واقدم طلبك
وحكومة الجنوب ستضع الشروط والمتطلبات لذلك,, لكن أظن ان سكان المدن الشمالية المتاخمة للحدود الجنوبية سيكون لهم وضع خاص
وحكومة الجنوب ستعطيهم بطاقات للدخول للجنوب بدون تأشيرة دخول...
لكن هسع المناقشات دائرة في اختيار اسمين لدولة الشمال ولدولة الجنوب.. فإنت اقتراحك شنو؟

الاخت اميرة
سلامات

Quote: وائل أخوي طبعا ما ممكن لأن الجنوب سيكون بعد الانفصال دولة مستقلة ذات سيادة ولديها قوانين ونظم ووزارة داخلية تكون مسؤولة من حكاية الهجرة والمواطنة

ونفس الحاجة فى الشمال بعد الاستفتاء و دة ما حيحل مشكلة الجنوبيين الفى الشمال.
حترفض الحوكمة منحهم الجنسية و ان كانت ستمتن عليهم بالاقامة كمثلهم من الاجانب (مصريين -اريتريين ....الخ )

Quote: لكن هسع المناقشات دائرة في اختيار اسمين لدولة الشمال ولدولة الجنوب.. فإنت اقتراحك شنو؟

شمال السودان و جنوب السودان على الاقل يبقى فى امل للوحدة و لو طال الزمن