وويـــن الناس ..؟

Post: #1
Title: وويـــن الناس ..؟
Author: tmbis
Date: 10-03-2010, 08:49 AM
Parent: #0

أنا كمشجع هلالي .. بحب الاكشن وعامل الاثارة .. ابحث دائما عن الجديد المبتكر .. في داخل هذا الموقع والمواقع الأخرى .. اتطلع إلى معرفة نفسيات الآخر .. وهو يكتب بإخلاص ويحدثنا عن امانيه العريضة من زاوية رؤيته المتعلقة بكل مباراة طرف فيها الهلال ..

Post: #2
Title: Re: وويـــن الناس ..؟
Author: tmbis
Date: 10-03-2010, 08:51 AM
Parent: #1

طيب بي صورة أوضح:
هــل الجماعة سكتووووو ..؟

Post: #3
Title: Re: وويـــن الناس ..؟
Author: tmbis
Date: 10-03-2010, 08:55 AM
Parent: #2

أم أسكتهم المهندس هيثم مسطفى .. والمرعــب سادومبــا والغزال مهند .. والحريف الفنان بشـة وراس الطلقة كاريكـا ..؟
هذا بجانب كل الكتيبة المقاتلة التي تلعب للهلال بكامل المسؤولية بدون ذكر اسماء وتحديد مهام ..؟

Post: #4
Title: Re: وويـــن الناس ..؟
Author: داليا الكباشى
Date: 10-03-2010, 08:59 AM
Parent: #3

Quote: وويـــن الناس ..؟

قاعدين ,
بس موش احتمال يكونو مشغولين , مسافرين , او عندهم سيراميك بيدقو فيهو ؟

Post: #5
Title: Re: وويـــن الناس ..؟
Author: فيصل نوبي
Date: 10-03-2010, 09:01 AM
Parent: #4

او العقرب بكري المدينة

Post: #7
Title: Re: وويـــن الناس ..؟
Author: ادريس خليفة علم الهدي
Date: 10-03-2010, 09:04 AM
Parent: #5

غايتوا يا تمبس كان ما شلتوا الكاس المرة دي الا تشيلوهو مع نجيب زيادة

وين غاتس .. مشتاقين كتير

Post: #12
Title: Re: وويـــن الناس ..؟
Author: tmbis
Date: 10-03-2010, 09:22 AM
Parent: #7

Quote: غايتوا يا تمبس كان ما شلتوا الكاس المرة دي الا تشيلوهو مع نجيب زيادة
وين غاتس .. مشتاقين كتير
.. غاتس في البطاطس يا درش .. غاطس لي اضنيني الكلام دخل الحوش اليومين دي ..

كاسنا دا يا درش طووويل عشان كدا ح نموت معاهو موت شديد .. اقلاهــا ما ندقس دقسة المرة الفاتت جوه استادنا ..
لكن لو الكاس دا رفعناهو .. غايتو نجيب زيادة تعب معاي تعب شديد .. وهذا تصريح مني بذلك

Post: #11
Title: Re: وويـــن الناس ..؟
Author: tmbis
Date: 10-03-2010, 09:18 AM
Parent: #5

Quote: او العقرب بكري المدينة
.. كوبرا دا يا نوبي .. العقرب توصلك المستشفى .. لكن دا كان ختاها ليك .. يغطوك طواااالي ..

Post: #6
Title: Re: وويـــن الناس ..؟
Author: tmbis
Date: 10-03-2010, 09:02 AM
Parent: #4

Quote: قاعدين ,
بس موش احتمال يكونو مشغولين , مسافرين , او عندهم سيراميك بيدقو فيهو ؟
السراميك ملحوق أخشى انهم يكونو راقدين ليهم فوق راي ..

Post: #9
Title: Re: وويـــن الناس ..؟
Author: tmbis
Date: 10-03-2010, 09:08 AM
Parent: #6

حــاجة عجيبة ..
والله في حقب تاريخيه ماضية .. في يوم زي دا كان تجي الصباح تلقى ليك مية وخمسين بوست ونص .. مفتوحـات .. على شاكلة:
الليلة ناس الكتاب الأخضــر ح يجيبو معاهم كسكسي .. توجد صور .. الكاتب اساسي..
جبتو المكرونـة .. الكاتب وليد لاشفت ..
غاااك ... واااك .. ووووب .. الكاتبة أميرة الشيخ
التيحــة وشايل مفاتيحة .. الليلة برشوكم في مقبرتكم .. الكاتبة مواهب ادريس

حسع الجماغعة ديل فكو لينا الفرحانين الجايين لنج ديل .. قايلين الكتابة في الهلال ساهلة .. الواحد يكتب ليهو كلمتين ويكسح يخلي البوست بتاعو مطوطح ما بين السماء والأرض ..

غايتو من هذا المنطلق احي الكاتبة مواهب ادريس .. أو بين قوسين ( تفيــده) لو لاها لما هــاجت اشجاننا في اي مباراة طرفها الهلال

Post: #8
Title: Re: وويـــن الناس ..؟
Author: أيمن دياب
Date: 10-03-2010, 09:06 AM
Parent: #3

الجماعة ما بسكتو..
بالمناسبة ياتمبس.. أمس كنت بتونس مع صاحبي مريخابي متعصب جداً..
وبكره الهلال أكتر مما بحب المريخ..
قلت ليهو لو جبنا كأس الكونفدرالية.. بترحمونا وبتخلونا
وبتسكتو عن موضوع الصفر الدولي وتمانين سنة وما أدراك..
قال لي أول حاجة أنا ما بطيق أشوف الهلال ده رافع الكاس..
وبشحد ربي الهلال يطير من كورة الهلال بتاعت الاتحاد..
عشان يفقد الأمل في دور الأربعة..
وقال لي لو جبتو الكأٍس برضو ما بنسكت..
وبنقول ليكم نحنا سبقناكم في الكأس بأكتر من عشرين سنة..

ياتمبس الهلال في كورة الليلة دي ما لاعب مع الاتحاد الليبي وبس..
لاعب مع معتصم جعفر ومع المريخ ومع مجموعة من الصحفيين العاطلين عن الموهبة..
من الذين لا يرون في الهلال شيئاً جميلاً.. ويتمنون سقوطه اليوم حتى (تتوازن الكفة)..

ضغط اتحاد معتصم جعفر الهلال ولعب 3 مباريات دورية في ستة أيام..
فكانت النتيجة 16 هدف.. ودخول بكري المدينة للفورمة..
أنا شخصياً في المباريات التلاتة الفاتت خفت على الهلال من العين..

Post: #13
Title: Re: وويـــن الناس ..؟
Author: tmbis
Date: 10-03-2010, 09:33 AM
Parent: #8

Quote: قلت ليهو لو جبنا كأس الكونفدرالية.. بترحمونا وبتخلونا
وبتسكتو عن موضوع الصفر الدولي وتمانين سنة وما أدراك..
قال لي أول حاجة أنا ما بطيق أشوف الهلال ده رافع الكاس..
وبشحد ربي الهلال يطير من كورة الهلال بتاعت الاتحاد..
عشان يفقد الأمل في دور الأربعة..
وقال لي لو جبتو الكأٍس برضو ما بنسكت..
وبنقول ليكم نحنا سبقناكم في الكأس بأكتر من عشرين سنة..
.. والله يا ايمن احييك في اختيار اصحابك .. دا زول واااضح وصريح وزول نجيضة .. ما بدسدس الكلام .. ويجي يشبكك والله انا الليلة بشجع الهلال .. يا يجيك بعد نهاية الكورة والهلال غالب يكتب ليك والله بالرغم من انتصار الهلال إلا انو كذا .. وكذا ..
لكن زولك دا مريح .. بلاي تحياتي ليهو .. وقوليهو بل راسك الايامات دي الهلال بقى يلعب بي تسعة مهاجمين المعز محجوب زاتوو بقى يمشي يجيب أقوان ورا مخلنها فاضية الله كريم علينا ..
Quote: ياتمبس الهلال في كورة الليلة دي ما لاعب مع الاتحاد الليبي وبس..
لاعب مع معتصم جعفر ومع المريخ ومع مجموعة من الصحفيين العاطلين عن الموهبة..
من الذين لا يرون في الهلال شيئاً جميلاً.. ويتمنون سقوطه اليوم حتى (تتوازن الكفة)..
.. المشكلة الرئيسية في الصحفيين العاطلين من الموهبة .. القاعدين يجيبو كلامم الجماعة اياهم هنا دا .. ديل السبب في الوصل ليهو المريخ بي اسمو وحجمو الكبير .. لو بقو ناس حقانيين وناس نجيضة .. وما ناس دسدسة ونفخ في الفاضي .. كان الكفة اتوازنت .. الهلال اولادو قاعدين يعملو العليهم .. والحمد لله غلطات كل مباراة بيتم معالجته بي شكل جيد جدا .. ومستوى المنافسة داخل اللعيبة ارتفع داخل المراكز في الملعب .. مجلس إدارة من ابناء الهلال اعاد ترتيب الكثير من الأمور .. واللاعبين بيلعبو في حالة نفسية جيدة .. وشهية مفتوحــة .. وضغط التلاتة مباريات دا .. ميشو حسبو بي شكل كويس جدا على الاقل اللعيبة قريبين لي بعض ومعنوياتم في السماء واكتر من لاعب دخل الفورمة.. والجمهور انسجم معاهم انسجام تام ..
كل المعطيات دي يا ايمن بإذن الله نتيجته ح تتحدد الليلة .. لانو الليلة دا اللقاء الفيصل .. نكون في القمة من جوة استادنا ومن جوة بلدناأو لا نكون

Post: #10
Title: Re: وويـــن الناس ..؟
Author: alsngaq
Date: 10-03-2010, 09:09 AM
Parent: #2

علاء كيفك

عندي مزاج كده اتونس معاك فى الكوورة

تعرف السبب بوست كاتبه ودنوبي اعتقد قبل كم يوم
عن هيثم مصطفى انو لو اده بكري باص بجيب قوون

تعرف التعليق دا ما عارف ليه اداني احساس انو حتى
اعجابنا وتشجيعنا للكورة لسه قديم زي كورتنا.....

يعني بقصد طريقة مشاهدتنا للكورة نحن كسودانيين
مختلفة عن العالم حولنا حتى طريقة تشجيعنا
امس فى برنامج نجوم الغد واحدمن لجنة الحكام قال نحن
فى السودان دا موسيقانا والحانا عندها شكل براهو
وتعليقه كان بشكل متطرف لا يرمي الى شكل التفرد الابداعي
يعني يديك احساس كده انو زمن الابداع كان فى السبعينيات
جيل ذهبي فى الكورة فى الفن الاعلام الحكاية شنو...... يتبع

الليله يا علاء سوااااقه شديدة عامل ليك بوست زي ابوريالين
وشغال تنادي على الناس

Post: #14
Title: Re: وويـــن الناس ..؟
Author: طلحة عبدالله
Date: 10-03-2010, 09:41 AM
Parent: #10

حمدلله أنو ما مصنف على ما اعتقد مع قائمة ووين الناس
بتاعت كبير مساكين البورد المدعو تامبا ..
الواحد كدا يكون ريح نفسو من قلة أدب بعض الكائنات
العاملة فيها بتشجع المريخ من عينة البجىء يتهمك من دون
دليل في أخلاقك وأمانتك لانك بس قلت وجهة نظر مخالفة
للحاجة القاعدة في نافوخو الفاضي دا ..
لا والبحيرك أنو زول كبير في سنو وعندو بيت وأهل وأولاد
وإحتمال كبير يكون بمش يصلي المغرب في الجامع .

Post: #20
Title: Re: وويـــن الناس ..؟
Author: tmbis
Date: 10-03-2010, 10:09 AM
Parent: #14

Quote: لانك بس قلت وجهة نظر مخالفة

والله يا مسكين من غير تكسير تلج .. يعجبني المشجع أو الناقد أو المحلل أو الإداري البجي يطعن الفيل ..
إنت ما مصنف ضمن الجماعة اياهم .. لكن مرات قاعد تنظر .. والحمد لله كلما تنظر بندخل ليك جرجرة .. يحاورك في فنجان

Post: #15
Title: Re: وويـــن الناس ..؟
Author: فيصل نوبي
Date: 10-03-2010, 09:46 AM
Parent: #10

Quote: تعرف السبب بوست كاتبه ودنوبي اعتقد قبل كم يوم
عن هيثم مصطفى انو لو اده بكري باص بجيب قوون
و من الوقت داكـ إنت كاتم ؟
تنفس تنفس

Post: #16
Title: Re: وويـــن الناس ..؟
Author: طارق الكوتش
Date: 10-03-2010, 09:49 AM
Parent: #10

Quote: أو بين قوسين ( تفيــده)

تمبا ............ مبااااالغة

تفيده ادريس
امل هارون
اميره مروحه
جنابو عمر و المطر

غاااااااااااااااااااااااااااغ

Post: #17
Title: Re: وويـــن الناس ..؟
Author: محمد عبد الماجد الصايم
Date: 10-03-2010, 09:54 AM
Parent: #16

باللاي وصلتوا السراميكـ؟
طيب ح تجيب الغسالة من الحراج متين؟!

Post: #24
Title: Re: وويـــن الناس ..؟
Author: tmbis
Date: 10-03-2010, 10:38 AM
Parent: #17

Quote: باللاي وصلتوا السراميكـ؟
طيب ح تجيب الغسالة من الحراج متين؟
...
أ،ا مش قلت ليك خشمك خفيف وما بتنفع تشتغل في الاستخبارات ..؟

غايتو بي حركاتك دي يجيك اللوتري وتمشي امريكا ما بتعمر كتير .. طوالي برحلوك .. لانو البلد ديك بتعتمد على مبدأ السرية التامة في إدارة الأمور

Post: #18
Title: Re: وويـــن الناس ..؟
Author: معتصم محمد صالح
Date: 10-03-2010, 09:58 AM
Parent: #16

نحنا كلامنا بنقولوا بعديين بعد الرشة ...

والله الزول يشوف تجدعك ده يقول غلبتو وكمان شلتو الكاس ....

Post: #25
Title: Re: وويـــن الناس ..؟
Author: tmbis
Date: 10-03-2010, 10:43 AM
Parent: #18

Quote: نحنا كلامنا بنقولوا بعديين بعد الرشة ...
.. يعني مثلا بين الشوطين زي المرة الفاتت ..؟
تعال اكتب لينا اقرار بذلك .. وتعهد
Quote: والله الزول يشوف تجدعك ده يقول غلبتو وكمان شلتو الكاس ....
.. والبشوف بوسطيك بتاع الخرطوم داك .. يقول موردابي ..

غايتو بنمتعكم بره وجــوة ..

بالنسبة لي البوست بتاع الخرطوم تلاتة .. وووين الصورة ..؟

Post: #22
Title: Re: وويـــن الناس ..؟
Author: tmbis
Date: 10-03-2010, 10:24 AM
Parent: #16

Quote: غاااااااااااااااااااااااااااغ

يا كوتش ..
ياخ الناس دي وووين الليلة ..؟
والله ما عندكم اي خـــووة .. أخوانكم المتعهدين ديل افقدوهم .. ما يكونو كمان مشو بنغازي

Post: #19
Title: Re: وويـــن الناس ..؟
Author: tmbis
Date: 10-03-2010, 10:03 AM
Parent: #10

ويينك يا ابو السناجك .. أخبارك ..؟
Quote: تعرف التعليق دا ما عارف ليه اداني احساس انو حتى
اعجابنا وتشجيعنا للكورة لسه قديم زي كورتنا.....
يا السنجك .. نحن شعب ارشيفي خالص .. نموت موت في القديم .. تجديدنا يبدا بالقديم .. بنرجع للقديم من القديم ..
لاعب الكورة لحدت الآن عندنا بيلعب بي ثقافة قاطعة من راسو .. بيأخر الزمن وهو منتصر عن طريق الدردقة في الوااطة لفترة زمنية طويلة جدا .. وما عارف انو في استوب وواتش .. لسة بيشوت لاكورة في المدرجات وما عارف إنو الفيفا عندها مية كورة برة الملعب وفي كم واحد بجيب الكورة في ثواني ..
لحدت الآن بنفتقر لي خاصية تخصيص اللاعب المناسب في المكان المناسب للحالة المناسبة .. ما عندنا لاعب بيتدرب على التهديف في المرمى وتدريبو ومعرفة امكانياتو .. ركلات الجزاء مافي شخص اختصاصي ليها ممكن يدخله مية مرة في القون وبي حسابات دقيقة جدا ..
لحدت الآن نحن بنعتمد على انجازات قديمة جدا اصحابة الآن دخلو التراب والباقي منهم بعيد عن اي حاجة ليها علاقة بالكرة .. عشان كدا كل حاجاتنا لازم تكون قديمة جدا واسلوبنا محصور في منافساتنا المحلية .. وبي دا كلو من حقنا نفرح .. مع اي نقله جديدة مهما كانت درجة السلحفائية في انجازه ..
هيثم مصطفى لاعب حريف يا السنجك .. لكن فيهو عيوب هو عارفة كويس .. وكتيرين عارفنها .. واللحظة البتمسك هيثم مصطفى من اي لاعب فريق خصم .. شكل الهلال بيكون جايط .. ودي الحاجة المخيفة جدا .. في الفترة الأخيرة هيثم مصطفى يعتبر كلمة السر في كل انتصارات الهلال والممون الأول لي الشق الهجومي .. عشان كدا الزول دا قال لو هيثم لعب باص لي بكري المدينة ..
Quote: امس فى برنامج نجوم الغد واحدمن لجنة الحكام قال نحن
فى السودان دا موسيقانا والحانا عندها شكل براهو
وتعليقه كان بشكل متطرف لا يرمي الى شكل التفرد الابداعي
يعني يديك احساس كده انو زمن الابداع كان فى السبعينيات
جيل ذهبي فى الكورة فى الفن الاعلام الحكاية شنو...... يتبع
ف الحتة دي يا السنجك بختلف معاك شوية .. الزول دا ما متطرف بقدرما هو عارف فعلا بقول في شنو.. المزيكا في السودان مليانه ملي شديد .. كبر المساحة واختلاف القبائل خلق الوان مختلفة من الأبداع الموسيقي عايز شوية ترتيب لكن هنا بقيف التنظير عائق في التطور .. هيمنة الشخص الواحد على منابع الأبداع .. دا السبب الاساسي في تدني مستوانا .. الكروي والفني وكلوووو .. امسكو من عدة جهات ح تلقى كلامي دا واقع معاش ..
Quote: الليله يا علاء سوااااقه شديدة عامل ليك بوست زي ابوريالين
وشغال تنادي على الناس
...
تعرف يا السنجك .. عندنا واحد مريخابي في الحلة كان .. ياخ دا منجضنا نجاض شديد غايتو لما المريخ دا يغلب كان إلا نشوف لينا مكان الزول دا بيكون حايم الليل كلو ويكورك في الشارع .. هو واحد بس .. لكن كان بيعذبنا ليك عذاب شديد ..
المهم يوم قمنا رشينا ليك المريخ .. ياخ نحنا طلعنا من بيوتنا زي المجانين بنفتش على الزول دا .. دقينا الباب حقهم .. ماف اي حس ليهو .. مشينا اي مكان ممكن يتلقي فيهو مافيش ..
آخر حاجة قام طلع لينا في راس البيت بتاعم وشايل ليهو علم كبير جدا بتاع مريخ وقاعد يكورك .. الكورة الجاية بنرشكم .. الكورة الجاية بنرشكم ..
اهــا حسع زي ما شايف .. الليلة الجماعة المتعهدين مافيشين .. انا قلت اشيل العلم بتاعي .. وأعمل ليهم فرش متاع لحدت بعدين يحلها الف حلال ..

Post: #21
Title: Re: وويـــن الناس ..؟
Author: haroon diyab
Date: 10-03-2010, 10:15 AM
Parent: #19

تامبا ياحبيب

ومشتاقين وربنا يجمع القريب

كدي امسك عندك....!!!!

اطرد الاحلام ياجميل واصحي.....

ده بعد الساعة عشرة .

مشتاقين

Post: #23
Title: Re: وويـــن الناس ..؟
Author: tmbis
Date: 10-03-2010, 10:35 AM
Parent: #21

Quote: تعرف السبب بوست كاتبه ودنوبي اعتقد قبل كم يوم
عن هيثم مصطفى انو لو اده بكري باص بجيب قوون
.. يا السنجك .. ..
اعتذر عن ايراد اسم بكري المدينة هنــا .. فبكري المقصود هو بكري تاني

لكن بيني وبينك يا السنجك .. والله كلام نوبي صاح .. عادي جدا باص قووون من هيثم بكري يدخله السيرفر

اقول قولي هذا وما خايف من اي زول هنـا

Post: #26
Title: Re: وويـــن الناس ..؟
Author: tmbis
Date: 10-03-2010, 10:47 AM
Parent: #21

Quote: تامبا ياحبيب
ومشتاقين وربنا يجمع القريب
كدي امسك عندك....!!!!
اطرد الاحلام ياجميل واصحي.....
ده بعد الساعة عشرة .
مشتاقين
اوووه هارون (مطـــرة) .. .. أحلام شنو يا هارون ياخ .. نحن ما بنحلم بنلعب بس .. بنمتع نفسنا ..
أمبارح جماعتكم قالو قدو السلك .. كان تكون عليكم عطبرة ومدني .. وفي القولد التقيت بالصديق

بعد الساعة عشرة ليييه ..؟ ما واثقين في التيحــة واللا شنــو..؟

لما القطاااار صفر وقف .. ظهرت لي صورة عطبررررررة .. عطبرة

Post: #27
Title: Re: وويـــن الناس ..؟
Author: فيصل نوبي
Date: 10-03-2010, 10:51 AM
Parent: #26

هيثم مصطفي ده لو أدي بكري أبوبكر باص بكري بيجيب قون

Post: #28
Title: Re: وويـــن الناس ..؟
Author: alsngaq
Date: 10-03-2010, 10:59 AM

اها يا ود نوبي حدد ياتو بكري انت قاااصد؟؟؟
لوووول

Post: #29
Title: Re: وويـــن الناس ..؟
Author: فيصل نوبي
Date: 10-03-2010, 11:05 AM
Parent: #28

مكتوب في العنوان الاسم بالكامل يا السنجكـ ياخ

Post: #31
Title: Re: وويـــن الناس ..؟
Author: tmbis
Date: 10-03-2010, 11:15 AM
Parent: #29

نوبي والسنجك ..
حقو الواحد يفتح فيكم بلاغ .. والله الليلة الأحد بي توقيت هنـا ..
بيكون السبت الصباح هناك .. يعني راس الحربة دا ممكن يكون فاضي حسع دي يجي يعمل ليكم فرش متاع

Post: #30
Title: Re: وويـــن الناس ..؟
Author: سيف بخيت موسي
Date: 10-03-2010, 11:13 AM

والله يا تمبس معاي اليومين دي أبوي مريخابي بشكل

اهم حاجة متفائل بيهوا ما حصل حضر معاي كورة للهلال إلا غلبنا

عشان كدة متحمل هم قعادي ساكت جنبوا أثناء المبارة

اهم شي كيفك انت ، وانشاء الله غالبين

تحياتي للجميع

Post: #32
Title: Re: وويـــن الناس ..؟
Author: tmbis
Date: 10-03-2010, 11:21 AM
Parent: #30

Quote: والله يا تمبس معاي اليومين دي أبوي مريخابي بشكل
اهم حاجة متفائل بيهوا ما حصل حضر معاي كورة للهلال إلا غلبنا
عشان كدة متحمل هم قعادي ساكت جنبوا أثناء المبارة
كيف يا ابو السيوف .. حمد الله على سلامة الحاج ..
تعرف ذكرتني ابوي ..
غايتو ما بتقدر تكمل معاهو كورة للهلال خالص .. انا ارفس بي جهة وهـو يرفس بي جهـة .. يوم نكون مضروبين دا .. ان وهو بندخل مع بعض في حتات ضيقة خـــلاص .. عندنا عمنـا داك كمان في تمارين الهلال قاعدين يربطوهو في رجل العنقريب من هـو صغير ..
عليك الله عاين مسيرة الهلال دي حافلة بالانجازات كيف ..؟

والله انا تمام التمام الحمد لله .. وكل الجماعة بخير .. وبإذن الله الجماعة ديل بنرشهم ..

Post: #33
Title: Re: وويـــن الناس ..؟
Author: khaleel
Date: 10-03-2010, 11:34 AM
Parent: #32

نحن قاعدين يا حاج تمبس

منتظرين متين الدوام يخلص الساعة ستة نجي ناخد لينا حمام ونتوكل ناس عمر بوب

عشان نشوف الكورة المسجلة دب

Post: #38
Title: Re: وويـــن الناس ..؟
Author: tmbis
Date: 10-03-2010, 11:58 AM
Parent: #33

Quote: منتظرين متين الدوام يخلص الساعة ستة نجي ناخد لينا حمام ونتوكل ناس عمر بوب
يا خليل ..
مع عمر بوب ما بتجيك الحبـه .. منصرين إن شاء الله .. لكن بس اعمل حساب الطابور الخامس

Post: #34
Title: Re: وويـــن الناس ..؟
Author: عمر صديق
Date: 10-03-2010, 11:36 AM
Parent: #32

تمبس يافنان

سلامات

الجماعة يشكون الم الاحتضار وارجو ان تدعو لهم بحسن الخاتمة الرياضية

فحالهم يغني عن سؤالهم والدليل اخونا الجميل هارون دياب فله التحايا لان فيه بعضا من ملامح سيد البلد

Post: #39
Title: Re: وويـــن الناس ..؟
Author: tmbis
Date: 10-03-2010, 12:02 PM
Parent: #34

Quote: الجماعة يشكون الم الاحتضار وارجو ان تدعو لهم بحسن الخاتمة الرياضية
فحالهم يغني عن سؤالهم والدليل اخونا الجميل هارون دياب فله التحايا لان فيه بعضا من ملامح سيد البلد
يا عمر صديق .. والله الحال ما بيسرنـا .. الناس ديل تعبانين شديد .. الدخلت فيهم من اتنين كاريكا ومهند ما بتطلع بالساهل .. لكن واله عايزنهم يشدو حيلم معانا شوية على الاقل ننافس بي فريقين ليهم خبرة وتجارب في المحافل الخارجية .. ما تبقى فرمالتم الواحدة نحن جبنا الكاس .. سنة كم كدا ما عارف .. وغنتو صفر لحدت الآن ..
هاروون دياب أو هارون مطرة .. والله كان كويس .. خرب لينا علاقتو معاهو مهند الطاهر وكاريكا

Post: #35
Title: Re: وويـــن الناس ..؟
Author: بدر الدين اسحاق احمد
Date: 10-03-2010, 11:46 AM
Parent: #32

Quote: اقلاهــا ما ندقس دقسة المرة الفاتت جوه استادنا ..

ما انتو طوالــى كــدا ... واكبر انجاز افريقــى ليكم لعبتو فى الفاينل

لكن المقولة المشهورة من زمن عمنا ابو العائلــة الله يرحمو

الجماعة ديــل كلام الفلاتى راكب فيهم

كاس تشيفــي ولا تشيلــي

Post: #37
Title: Re: وويـــن الناس ..؟
Author: حسين عوضاى
Date: 10-03-2010, 11:53 AM
Parent: #35

Quote: وبإذن الله الجماعة ديل بنرشهم

ياريت ياااخ والباقي علينا تب .. ماكننى جنس مكنه الجماعه ديل ..

علاء ازيك يا جميل ..

Post: #43
Title: Re: وويـــن الناس ..؟
Author: tmbis
Date: 10-03-2010, 12:31 PM
Parent: #37

Quote: ياريت ياااخ والباقي علينا تب .. ماكننى جنس مكنه الجماعه ديل ..
ازيك يا عريس .. ومنور البوست والله ..
الجماعة ديل يا حسين هم ممكونين لكن ما عندهم قبلة يقبلو عليها ..
لذلك
إنت احتسب .. ومتعم البقولوهو ليك كلووو قول ليهم ايوة كلامكم صاح .. حتى لو قالو ليك نحن الكاس دا شلناهو زماااان .. والفرمالة التانية بتاعت .. الفتوح بي خمسة أو ستة جواكر بتاعت الاسبوع الفات
فزي ما شايف المسالة متطورة .. مع تطور فرقة الهلال

Post: #40
Title: Re: وويـــن الناس ..؟
Author: tmbis
Date: 10-03-2010, 12:08 PM
Parent: #35

Quote: ما انتو طوالــى كــدا ... واكبر انجاز افريقــى ليكم لعبتو فى الفاينل
يا بدرالدين اسحق ,, ياخ دا ما انجاز كبير الحبه دي .. دا انجاز كبير جدا .. إنت عاين البطولة اسمه شنو وبعدين الفاينل ياتو القاصدو ..؟ بتاع لاراش ..؟ ياخ داك خلينا منو نحن زاتو ما قاعدين نتذكرو .. لانو التاريخ مسجلو بي حروف لونه زرقاء بي ابيض ..
اهــا
إنتو الشلتو كاس قبال كدا .. حسع دي قاعدين خشمكم ملح ملح .. ناس الامل عطبرة يطقطقو فيكم زي الما حصل حاجة .. وتعملو زغبير من اهلي مدني .. ولسة ارجو الراجيكم لي قدام ..
والله انا لو منكم .. اعمل صندوق دعــم المتعة .. البتلموهو دا عافينو ليكم .. اشتروهو قصب سكر .. وفول حاجات وتعالو اقعدو لينا في المدرجات شوفو نمتعكم كيف بي باصات سيدا .. والهوبــا بتاعت مهند .. واقوان المعز ..
طبعا ما عايز اجيب ليك سيرة الجماعة الباقيين .. بتتعبك اليومين دي

Post: #36
Title: Re: وويـــن الناس ..؟
Author: الصادق صديق سلمان
Date: 10-03-2010, 11:52 AM

تامبا

الهلال لديه فريق ولديه جال يقفون ورائه
سجل صلاح ادريس هؤلاء الرجال
وجاء بميشو وبعده ارادالله ان يجعل امر الهلال
في ايادي رجال مهرة يعلمون ما يفعلون ويخططون
بدءاً بالمهندس رئيس النادي ونائبه الرمح الملتهب قاقارين

الهلال لديه رجال مثلك وعمر فاروق وطارق الكوتش واحمد الريح وودالصائم
وخليل ومعاوية حسين وقمر بوب يكتبو ويحللون ولا انسى دكتور صلاح البشير

الهلال يملاء فمك عندك ما تقول الهلال

الصادق

------------------
لكن يا تمس اخوك خايف من كورة الليلة دي يامان
ومن الصباح ما اشتغلت لي ولا حاجة (هل تصدق؟؟؟؟؟؟)

Post: #41
Title: Re: وويـــن الناس ..؟
Author: معاوية عبيد الصائم
Date: 10-03-2010, 12:21 PM
Parent: #36

اصدرت جماعة غاغاغاغاغغغغغا
البيان التالى
سوف يكون يوم 3 اكتوبر من كل عام
يوم غاغاغاغا !!!!
الدولى وسوف يتم الاحتفال به فى جو بهيج
يجمع الصفوة و التصفوية فى نادى الطوب
الطقيعى!!!!

صورة للراعى الرسمى للغاغاغاغا بالبورض

الصفوة الصفية اميرة الشيخ ومن اصتف
فى صفها

ولانامت اعين التصفوية

Post: #49
Title: Re: وويـــن الناس ..؟
Author: tmbis
Date: 10-03-2010, 02:05 PM
Parent: #41

Quote: الصفوة الصفية اميرة الشيخ ومن اصتف
فى صفها
والله يا معاوية .. أميرة الشيخ ليها كم يوم مافيشة .. من ايام الخمسات والستات والعشرات دي ما ظاهــرة ..
انا خايف بس تكون اتعوقت من باصات هيثم دي ..
والله اقوليك حاجة ..؟
حسع تلقاها بتقرا بي عين ومغمضة العين التانية ..

Post: #42
Title: Re: وويـــن الناس ..؟
Author: خالد العطا
Date: 10-03-2010, 12:24 PM
Parent: #36

Quote: أخشى انهم يكونو راقدين ليهم فوق راي ..

تمبس

جبتها من الاخـــــــــــــــــــــــــــــــــــــــر

Post: #44
Title: Re: وويـــن الناس ..؟
Author: بابكر التوم
Date: 10-03-2010, 01:35 PM
Parent: #42

تمبس ...

والاهلة دوما منتصرين ...

دى مداخلة فى بوست نوبى ونفس الفكرة فى بوست عمر الفاروق ....

Quote: نوبى ...

بالله شوف محمد عبدالماجد بتغزل فى هيثم كيف الباصات دى متعة .

Quote: ومِن صحْيَة جروف النيل

مع الموجَهْ الصباحيَّه

ومن شهقَة زهور عطشانَهْ

فوق أحزانهْا

متْكَّيهْ

بتَطْلَعى إنتِ من صوت طِفلَهْ

وسط اللمَّهْ منْسيَّهْ

{ عارفين البتطلع من صيحة جروف النيل مع الموجة الصباحية ..ومن زهور عطشانة فوق احزانها متكية ..ومن صوت طفلة وسط اللمة منسية دي شنو؟.

{ دي تمريرة البرنس.

{ الموضوع دا عاوز ليه قعدة.

{ تمريرة البرنس ..المعز بقي يجيب منها قون.

{ طبعا كالعادة عاوزين تغالطوا.

{ انتوا ما شفتوا في ضربة الجزاء الاولي ..هيثم مصطفي (حفظه الله ورعاه) مسك الكورة ونادي المعز.

{ اها البركة كانت في (المسكة) دي.

{ المعز لقي السكة سالكة ..كورة يمسكها هيثم مصطفي ما تجي قون.

{ انتوا بتلعبوا وإلا شنو؟.

{ الفيفا مفروض تحسم الموضوع دا.

{ هيثم مصطفي تمريريتو ...زي (فاجأني النهار)..المهاجم لو ما صاحي من النباه الاول ..ما بستوعبها.

فاجأنى النهار

وأنا ماشى بيناتا

أتساقط باقي حنين

لسه عيونك ياها عيونك

تكسر باب الدم السرى

وتجرى تنعس عشب القلب

وتبكى سماهو فراش

يا ناعس بين الخلوه وريحة الصندل

فلت الطين ... النيل قصاها ضفيرتو

وشراها رماد ... وفجا حنين

{ فاجأني النهار ..اغنية عقد الجلاد التي فاجأنا بها الراحل مجدي النور ..الذي تفاجأنا يوم ان رحل في حادث حركة اليم ...فشاع بيننا الحزن ومده الي اجل غير مسمي.

{ وتمريرة هيثم تشبه (فاجأني النهار).

{ يعني بالواضح كدا (المهاجم) لو ما كان شاطر في (الجغرافيا) ما بعرف يتصرف مع (التمريرة).

{ بتلخبط ..ويقعد يطقطق في اصابعينه.

لو مابالغنا قلنا تشافى عديل اليومين ديل المشكلة فى المباريات الخارجية بركزوا علية عشان كدا ميشو

لازم يكون عندة تكتيك مختلف ويفاجئ بالعب بالاطراف ياحليل يوسف محمد زمان بس خليفة الان نار منقد ...

دو الاربعة محسوم اجلا ام عاجلا بس حنلاقى دول شمال افريقيا (الفتح الرباطى أو الصفاقصى ) وديل 4- 4 - 2

الله يستر منها سواها فينا ريكاردو ومشى وجاء نظر وا عجائز البرازيل من بعدوا فى مشتقاتها لية مانلعب 3 - 5 - 2

فى دور الاربعة بعرفوها ناسنا والمصريين متسيدين بيها افريقيا حتى الان وحاتك الاهلى فارقها الليلة مزنزق زنقة ######

اتمنى ميتشو وطارق ينتبهوا للحتة دى عشان نشيل الكاس دا باريحية لانو انا ماخايف الا من ديمبا معز

Post: #45
Title: Re: وويـــن الناس ..؟
Author: tmbis
Date: 10-03-2010, 01:47 PM
Parent: #44

والله يا بابكر التوم .. ود عبد الماجد دا الله يخدر ضراعوو قاعد يمتعني ليك بشكل ..
يمتعني انا بي هنـا .. وبي هناك مزمل ابو القاسم يجقلب
محمد عبد الماجد دا اي حاجة عندو بي نظام

Post: #46
Title: Re: وويـــن الناس ..؟
Author: ادريس خليفة علم الهدي
Date: 10-03-2010, 01:49 PM
Parent: #45

Quote: وهذا تصريح مني بذلك

ليك علي نقلبوا محوري

Post: #52
Title: Re: وويـــن الناس ..؟
Author: tmbis
Date: 10-03-2010, 02:23 PM
Parent: #46

Quote: ليك علي نقلبوا محوري

والله انا بفضل .. البخاخــات يا درش ..
البخاخ كويس

Post: #47
Title: Re: وويـــن الناس ..؟
Author: طارق جبريل
Date: 10-03-2010, 01:50 PM
Parent: #45

غايتو هضربة الرشاشات بطالة خلاص

Post: #53
Title: Re: وويـــن الناس ..؟
Author: tmbis
Date: 10-03-2010, 02:30 PM
Parent: #47

Quote: غايتو هضربة الرشاشات بطالة خلاص
...

والله الليلة حلاقة شديدة .. غايتو بختك يا طارق .. حلاقتك سريعة خلاص ..

Post: #51
Title: Re: وويـــن الناس ..؟
Author: tmbis
Date: 10-03-2010, 02:22 PM
Parent: #42

Quote: جبتها من الاخـــــــــــــــــــــــــــــــــــــــر

بس بعدين ما ينومو يا ود العطــا .. الليلة نوم مافي

Post: #48
Title: Re: وويـــن الناس ..؟
Author: tmbis
Date: 10-03-2010, 02:01 PM
Parent: #36

Quote: الهلال لديه فريق ولديه جال يقفون ورائه
سجل صلاح ادريس هؤلاء الرجال
وجاء بميشو وبعده ارادالله ان يجعل امر الهلال
في ايادي رجال مهرة يعلمون ما يفعلون ويخططون
بدءاً بالمهندس رئيس النادي ونائبه الرمح الملتهب قاقارين
.. الشباب ديل كلهم على قدر المسؤولية يا الصادق .. بتحس إنو في شغل حاصل .. المسالة لو بقت قروش .. والله اولاد الهلال مليانين قروش للحلقوم .. المشكلة كلها حلحلة الأمور الادارية ودي عايزه ليها قعدة .. وحسع اولاد الهلال قعدوا مع بعض .. وح يقعدوا الدور والباقي على اللعيبة .. واللعيبة ماشاء الله معنوياتم في السماء .. غايتو إلا يدخلم نوع من الغرور .. دي الحتة الوحيدة المفترض يتعمل ليها الف حساب .. عايزين شوية توعية وسط اللعيبة .. يعني الهبوط بي وتيرة اللعب في حال الفوز دا كلام ما كويس .. تضييع الفرص قدام المرمى دا كلام ا كويس .. فتح ثغرات في الدفاع دا كلام ما كويس ..
يازول اشتغل شغلك والله الحبه ما بتجيك ..

Post: #50
Title: Re: وويـــن الناس ..؟
Author: Osman Musa
Date: 10-03-2010, 02:18 PM
Parent: #48

عزيزنا تمبس
يا أخى سلامات
والله جد الواحد متكيف كيف شديد .
وعليك الله بعدين عصر يوم الاحد عندكم جيب لينا التسجيل .
عشان الدنيا هنا تتفرج فى الشغل العجيب .

Post: #54
Title: Re: وويـــن الناس ..؟
Author: tmbis
Date: 10-03-2010, 02:34 PM
Parent: #50

Quote: عزيزنا تمبس
يا أخى سلامات
والله جد الواحد متكيف كيف شديد .
وعليك الله بعدين عصر يوم الاحد عندكم جيب لينا التسجيل .
عشان الدنيا هنا تتفرج فى الشغل العجيب .
حبيبنا عثمان ..
الله يبسطك كمان وكمان .. إن شاء الله الاولاد ديل الليلة يبسطوك زيادة .. التسجيلات ح تكون بي طرفك إن شاء الله ..
وإن شاء الله نحتفل بيها هنا دا ..

Post: #55
Title: Re: وويـــن الناس ..؟
Author: osman righeem
Date: 10-03-2010, 03:30 PM
Parent: #54

عارف يوم 28 ده عيد ميلاد رغيم

لكن الولد الصغير دايما بيسألني

يا بابا عمو طارق بتاع حفرة الدخان

عنده صلعة ومريخابي كيف يعني؟؟؟

احرجني الولد وعصر علي شديد اضريت

اقول ليهو حكاية قدح المونة وخريق الشعر

من تساقط الاسمنت .....

انا غايتو اليوم في الخرطوم و سجن سجن غرامة غرامة

Post: #56
Title: Re: وويـــن الناس ..؟
Author: داليا الكباشى
Date: 10-03-2010, 03:47 PM
Parent: #55

Quote: عارف يوم 28 ده عيد ميلاد رغيم

غايتو نادغين ما بتتبلا في خشوما فولـه

---------
كل ما اكون جاياكم في البيت نادرين تحميني وتقول لي : نحن صايمين (^_^)

Post: #57
Title: Re: وويـــن الناس ..؟
Author: haroon diyab
Date: 10-03-2010, 03:50 PM
Parent: #56

غايتو انا من ناحية زعلان

زعلاااااااااااااااااااان......!!!!!

Post: #58
Title: Re: وويـــن الناس ..؟
Author: حيدر بشير
Date: 10-03-2010, 03:53 PM
Parent: #55

الاخ تمبس

متعك الله بالصحة و العافية و أدخل اليك الفرح السرور بنصر مؤزر اليوم للهلال بإذن الله

اليومين ديل الجماعة ديل ماسكين فى الخمسات و الستات الله يستر على التيحا و نتمناها كذلك

و الجماعة لابتين و منتظرين الهزيمة للهلال فى المقبرة لكن كان غيرهم اشطر و المرة لن نرضى بغير الكاس

Post: #59
Title: Re: وويـــن الناس ..؟
Author: Osman Musa
Date: 10-03-2010, 09:04 PM
Parent: #58

يا أخى جد ترليون مبروك

Post: #60
Title: Re: وويـــن الناس ..؟
Author: nazar hussien
Date: 10-03-2010, 09:17 PM
Parent: #59

بلاي عابن ديل؟؟؟

بقول ليك السنة دي لو ما شلتو الكأس؟

كأس شنو؟

أكتر من كدهّّّّ!!!!!!!

الفريق الطلعكم من البطولة ...نحن ماشبن نتونس ونتمرن معاهم
ساكت.... تقولوا لينا كأس...

انت بروزوا الكأسات دي واتفرحوا في ناس سادومبا وبشة وهيثم
مصطفي...بلاي دي اهداف بجيبوها ناس نصاح؟؟؟؟

وبعدين بعني لو ما جبنا كاس انتو حا تظلو في كرريكم
تحدثوا عن رجال والل شنو الموضوع بتاع الكاس دا
بالضبط؟؟؟ غايتو يوم الليلة دا كان ما مرقتو النصيحة..
بتكونوا صديتوا زي كاسكم

Post: #61
Title: Re: وويـــن الناس ..؟
Author: nazar hussien
Date: 10-03-2010, 09:19 PM
Parent: #60

Quote: غايتو انا من ناحية زعلان

زعلاااااااااااااااااااان......!!!!!

ما جبت شي من عندك يا هارون

Post: #62
Title: Re: وويـــن الناس ..؟
Author: Mohamed Foto7li
Date: 10-03-2010, 09:20 PM
Parent: #61

وفوق فوق هلالنا فووووووووووووق

Post: #63
Title: Re: وويـــن الناس ..؟
Author: الصادق يحيى عبدالله
Date: 10-03-2010, 09:29 PM
Parent: #62

Quote: وفوق فوق هلالنا فووووووووووووق

Post: #64
Title: Re: وويـــن الناس ..؟
Author: سناء عبد السيد
Date: 10-03-2010, 09:34 PM
Parent: #62

انتوا مغلوبيين تحننوا و غالبيين تكرهوا ..ديل شنو ديل ياخ!!

Post: #65
Title: Re: وويـــن الناس ..؟
Author: محمد البشرى الخضر
Date: 10-03-2010, 10:10 PM
Parent: #64

مبروك يا تمبس ياخ
والله أنا من الصباح قريت البوست دا ومداخلاتك في بوستات الوصيفاب قلت الزول دا مالو الليلة
ما عوايدو يكتب قبل الكورة كتير إلاّ كان داخلاك خوفة
أتاريك راقد فوق راي
رش يا معلّم قدر ما الله يديك فوق عديلك
هلالابي وسيد بلد ومتصدر البطولتين وكورتك الجاية تمرين لناس النعيم ونادر الطيب

Post: #66
Title: Re: وويـــن الناس ..؟
Author: nazar hussien
Date: 10-04-2010, 06:52 AM
Parent: #65

Quote: رش يا معلّم قدر ما الله يديك فوق عديلك

وخاصة خاصة ...أساسي وهارون كااااااااك...
الترزي البلدي...

الذي حاول ان يفصل قمصان BHS
بمكنته الفي مدني.

قال اهداف المريخ في التيحا (مدني)

Post: #67
Title: Re: وويـــن الناس ..؟
Author: tmbis
Date: 10-04-2010, 07:31 AM
Parent: #65

فوق يا اسياد البلد لحدت ما اجيكم راجع .. خلوني اخلص من الحفلة حقتي دي .. واتفقد رعايانـا المساكين ديل .. نشوف المعوق فوقم منو والقلبو واجعو منو والسكريهو فوق منو ..
والله الهلال دا يقعدوا يتابعو فوقو مباراة مباراة كدا دا .. بعقوم .. بعوقم

ملحوظة:
ابشر جماهير ومحبي الهلال .. انه تم انتقالهم مباشرة إلى مباراة الكاس .. وذلك في آخر تصريح للمساكين الحايمين هنا دا ..
يعني بي صورة أوضح:
الجماعة ديل قفلو صفحة كابس والجيش والتيحا نظرتم بقت مستقبلية على المدى البعيد

انا احبك يا هلال لما تضغط شديد وتجيب للمساكين حقهم

Post: #68
Title: Re: وويـــن الناس ..؟
Author: haroon diyab
Date: 10-04-2010, 07:44 AM
Parent: #67

ياتامبا

شايفك من الصبااااح شغال رفع سااااااكت

ده مالو......؟

شاهد ....خماسية الاحمر الوهاج..... في مرمي ( التيحا) مدني ...فيديو

ولا كرينك مابقدر عليهو.....؟

اقوان زي المطرة.....

Post: #69
Title: Re: وويـــن الناس ..؟
Author: Abdulrahman Gorashi
Date: 10-04-2010, 07:53 AM
Parent: #68

الاخ هارون،

صباح الخير> شنو امبارح شابكني توثيق وما توثيق، هاك وثق المزيكا الامبارح دي

Post: #70
Title: Re: وويـــن الناس ..؟
Author: ارصد محمد جلال
Date: 10-04-2010, 07:53 AM
Parent: #68

كالعادة

جعجعة في الفــــاضي
والكاس تشموها قدحــــــــــــة

التونســـية في بوســـتك الجاي

تحـــية ومودة

Post: #71
Title: Re: وويـــن الناس ..؟
Author: لؤى
Date: 10-04-2010, 08:01 AM
Parent: #1

Quote:
أنا كمشجع هلالي .. بحب

يا تامبا
صباحك أبيض

وبس كدا كفاية
جملتك الفوق دي كفاااااااية
ومبروووووووووووك زرقااااااااااء

تـحاياي

Post: #72
Title: Re: وويـــن الناس ..؟
Author: الامين موسى البشاري
Date: 10-04-2010, 08:11 AM
Parent: #71

تمبس

ســـلام .. كالعادة وزي كل مرة الهلال دا برفـــع ليكم سقف الأمنيات للسماء
وبعدين في اللفة الأخيرة بدق بيكم الدلجة وباحـــلامكم
المهم العبرة بالخواتيم وحــدنا معاكم لما تصلوا الميس وتكون النهاية سعيدة

التونسية منتظراكم

Post: #73
Title: Re: وويـــن الناس ..؟
Author: Amira Elsheikh
Date: 11-15-2010, 09:12 PM
Parent: #72

.

Post: #74
Title: Re: وويـــن الناس ..؟
Author: محمد الامين احمد
Date: 11-15-2010, 09:17 PM
Parent: #73

Post: #75
Title: Re: وويـــن الناس ..؟
Author: عبدالعزيز الفاضلابى
Date: 11-15-2010, 11:02 PM
Parent: #74

برضو جداد لنج ياتمبس ياخوى?

امانة فى ضمتك انا مانى قاعد اكتب
من يومك الـعرفتنى ,, اها هسع جداد ولا حمام
غنيتو يلا يا منقة ولا لسه ,,
هارد لك ,, المرة دى بالجد الهلال لعب بروح عالية
لكن نسو شنو الكورة بتريد العرب ,,

Post: #76
Title: Re: وويـــن الناس ..؟
Author: Amira Elsheikh
Date: 11-15-2010, 11:55 PM
Parent: #75

ووووووووووين انت مابنت وانا