Post: #1
Title: (الزوول) و (Elawad) شخصية واحدة
Author: عوض عبدالله طه
Date: 08-21-2010, 05:16 AM
...
السلام عليكم
...
المقصود بالعوض هو اسمي الحقيقي (عوض عبدالله طه)
وليس صديقي ونسيبي
الباشمهندس ياسر علي الشيخ العوض
الذي يكتب في هذا المنبر بإسم (Elawad)
...
وعملاً بالسلطات المخولة لي
فإنني أعلن رسمياً
عن تحرير شهادة وفاة رسمية للإسم المنبري (الزوول) العضو بمنبر سودانيزأونلاين
منذ عام 2003
وأيضاً تحرير شهادة ميلاد للإسم المنبري والحقيقي (عوض عبدالله طه)
وعليه
نعزي جميع أصدقاء الإسم المنبري (الزوول) في هذا الفقد الجلل
ونرجو أن يتقبلوا الإسم الجديد بالحفاوة والترحيب
...
ولا نامت أعين الجبناء 
....
|
Post: #2
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 05:18 AM
Parent: #1
....
وما الناس إلا هالك وابن هالك *** وذو نسب في الهالكين عريق
....
|
Post: #3
Title: Re: (الزوول) و (Elawad) شخصية واحدة
Author: Tragie Mustafa
Date: 08-21-2010, 05:20 AM
Parent: #2
حتوحشنا يا الهالكنا معاك يا الزووووول
ومرحبا بك اخي العوض.
|
Post: #6
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 05:34 AM
Parent: #3
تراجي ازيك
...
الله لا وراك وحش
...
طبعاً انتي كنتي عارفة كثير من التفاصيل
كالدراسة بمصر
وجلابيتي (من جلابة) بحكم مناكفتي لاخونا محمد سليمان
ولّ مو هيك؟ ...
....
كل سنة وانتي طيبة
...
|
Post: #4
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 05:20 AM
Parent: #2
...
السلام عليكم
....
تعريف أكثر
القرير – المديرية الشمالية
كلية الصيدلة – جامعة أسيوط
الأمارات العربية المتحدة – أبوظبي - الرويس
...
|
Post: #5
Title: Re: (الزوول) و (Elawad) شخصية واحدة
Author: تيسير عووضة
Date: 08-21-2010, 05:22 AM
Parent: #1
من دربك دا وعلى بوست أغاني وأغاني حق ود العباسية
وأنا أقول الزوول السنة دي مسجل غياب أتاريك ما بين دهاليز المواليد والوفيات
مبروك والبركة فيكم ..
ــــــــــ
صدقت والله
وما الناس إلا هالك وبن هالك 
|
Post: #7
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 05:40 AM
Parent: #5
.
تيسير ازيك ورمضان كريم
.
Quote: من دربك دا وعلى بوست أغاني وأغاني حق ود العباسية
وأنا أقول الزوول السنة دي مسجل غياب أتاريك ما بين دهاليز المواليد والوفيات |
...
حاضرين ....
وحاضرين برضو مسبقاً
لأنك يخيل لي بعد ما تقري التعريف الأضافي بتاع أبو ظبي
حا تقولي لي
من دربك ده على بوست أفطار أبو ظبي بالهوليدى إن
...
|
Post: #8
Title: Re: (الزوول) و (Elawad) شخصية واحدة
Author: haroon diyab
Date: 08-21-2010, 05:46 AM
Parent: #7
الزوول الوسيم في طبعو دائما هادي
انشا الله عوض برضو يطلع هادي
بركة الجمعت في اسمك .
لكن ياخي شايف غتاتت بكري
رجعك الروضة عدييييييييييييل
رمضان كريم
|
Post: #10
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 06:01 AM
Parent: #8
السلام عليكم
...
Quote: لكن ياخي شايف غتاتت بكري
رجعك الروضة عدييييييييييييل
رمضان كريم |
...
الله أكرم با هارون
تصدق وتأمن حالتي عمك بكري ده موصيهو
ومشدد في الوصية كمان
كدي اتخيل
لو ما كنت موصيهو !!!
كان رجعني وين؟؟
....
تعرف النكتة ؟؟
اللهم اني صايم
...
|
Post: #12
Title: Re: (الزوول) و (Elawad) شخصية واحدة
Author: haroon diyab
Date: 08-21-2010, 06:12 AM
Parent: #10
Quote: تعرف النكتة ؟؟
اللهم اني صايم |
انا كان لي
امي ميته وفااااااطر
|
Post: #9
Title: Re: (الزوول) و (Elawad) شخصية واحدة
Author: تيسير عووضة
Date: 08-21-2010, 05:55 AM
Parent: #7
برلوم نبيه جداً 
|
Post: #11
Title: Re: (الزوول) و (Elawad) شخصية واحدة
Author: Elawad
Date: 08-21-2010, 06:06 AM
Parent: #9
الصديق العزيز عوض
ياخي والله زي ما بقولو كتلت لي الدش في يدي. عارف لي فترة طويلة محاول أعرف شخصية الزول الحقيقية دي منو. و قعدت زمن طويل أقرا في مداخلاتك هنا و في سودانيات و ختيت كل الاحتمالات الواردة و في زيارتي الأخيرة دي للسودان اتأكدت بنسبة عالية جدا من شخصيتك و قررت أعمل فيها ما عرفتك و أتغاتت عليك لغاية ما أفاجأك في يوم من الأيام بإني عارفك منو.... بعد التعب كله ياخي تجي ترميها كدا؟
مرحبا بك أخي عوض باسمك الجديد. طبعا يا جماعة عوض دا عم أبناء خالتي و شقيقه الأكبر اللي هو زوج خالتي من الرجال الذين قلما يجود الزمان بمثلهم و ما شاء الله يبدو أن الاستقامة و الوضوح مسألة وراثية عندهم.
|
Post: #13
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 08:53 AM
Parent: #11
..
الصديق العوض ... رمضان كريم
...
| Quote: و قعدت زمن طويل أقرا في مداخلاتك هنا و في سودانيات |
..
أول الخسائر
فقدت واحداً من قرائي الممتازين والمتابعين
...
المفكر العملاق عوض عبدالله طه
...
|
Post: #14
Title: Re: (الزوول) و (Elawad) شخصية واحدة
Author: محمد عبد الماجد الصايم
Date: 08-21-2010, 09:03 AM
Parent: #13
يا هالكـ .. حمد لله ع السلامة ياخ!!
السماية وين .. ولّ عاوز تاكلنا حنكـ!!
_
رمضان كريم
|
Post: #15
Title: Re: (الزوول) و (Elawad) شخصية واحدة
Author: osman righeem
Date: 08-21-2010, 09:08 AM
Parent: #14
الزول منه العوض و عليه العوض
نقول ميلاد نجم بفطور بورداب الامارات
|
Post: #16
Title: Re: (الزوول) و (Elawad) شخصية واحدة
Author: محمد البشرى الخضر
Date: 08-21-2010, 09:20 AM
Parent: #15
| Quote: وعملاً بالسلطات المخولة لي |
يا راااااااااجل
________________________
طبعا القرير أخوك لاقيناه قبل كم سنة في الشارقة و ادانا النجيضة
|
Post: #17
Title: Re: (الزوول) و (Elawad) شخصية واحدة
Author: الفاتح عبد الله طه
Date: 08-21-2010, 09:53 AM
Parent: #16
| Quote: طبعا القرير أخوك لاقيناه قبل كم سنة في الشارقة و ادانا النجيضة |
اخونا ( ود البشرى) ..ما كان تخليها مستورة !!
عموما...يمكنني الآن أن أجسّد ( مقولة ) انا واخوي ،على ابن عمي... وانا وابن عمّي على الغريب...
مرحبا باخونا ( عوض) ...الزول سابقا ..
الاخ ( ياسر ) لك التحية وكامل الاحترام..
|
Post: #18
Title: Re: (الزوول) و (Elawad) شخصية واحدة
Author: الطيب رحمه قريمان
Date: 08-21-2010, 09:58 AM
Parent: #17
الاتساذ الفاضل الزوووووول عوض عبدالله طه
رمضان كريم و تصوم و تفطر ان شاء الله على هير
مرحب بالعوض و اهل العوض هههههههه
|
Post: #32
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 08:06 PM
Parent: #18
.
Quote: الاتساذ الفاضل الزوووووول عوض عبدالله طه
رمضان كريم و تصوم و تفطر ان شاء الله على هير
مرحب بالعوض و اهل العوض هههههههه |
..
لك التحية استاذنا الطيب رحمة
ورمضان كريم
تعرف ...
كطبيعة انسانية
الإنسان مغرم بملاحظة الأشياء الشبيهة بما يملكه
يعني لو كنت اشتريت عربية أتوس هيونداي مثلاً
لما نمشي في الشارع
عينك ما تلاحظ الا العربات الشبيهة بعربيتك
ويخيل ليك ان الشارع كلو سايق اتوس
اليومين ديل
أنا يخيل لي البورد كلو اسمو العوض
لدرجة انو مفروض بكري يسمي المنبر بمنبر اهل العوض
....
|
Post: #29
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 02:57 PM
Parent: #17
السلام عليكم
...
Quote: اخونا ( ود البشرى) ..ما كان تخليها مستورة !!
عموما...يمكنني الآن أن أجسّد ( مقولة ) انا واخوي ،على ابن عمي... وانا وابن عمّي على الغريب...
مرحبا باخونا ( عوض) ...الزول سابقا ..
الاخ ( ياسر ) لك التحية وكامل الاحترام.. |
...
اتاريك شايل حالي وناقر طاري
غايتو المرة دي جبناها واضحة بى صورتها
...
طبعاً أخونا ياسر علي الشيخ العوض (Elawad)
هو الراجل "المشكور" دائماً بالتقوى والإستقامة
وهو إبن المرحوم د. علي الشيخ العوض
وحفيد حاج عبد العاطي وحاجة مومنين
أكيدعرفتو
...
|
Post: #19
Title: Re: (الزوول) و (Elawad) شخصية واحدة
Author: maman
Date: 08-21-2010, 10:05 AM
Parent: #16
الأخ عوض عبد الله
رمضان كريم
أخيرا نقدر نقول (شفنا عوض)...يعني نكلم حاتم حسن الدابي إنو عوض اتلقا؟
والزول زول الله من الصلاح الرفعت عنهم الأقلام
|
Post: #34
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 09:04 PM
Parent: #19
.
Quote: الأخ عوض عبد الله
رمضان كريم
أخيرا نقدر نقول (شفنا عوض)...يعني نكلم حاتم حسن الدابي إنو عوض اتلقا؟
والزول زول الله من الصلاح الرفعت عنهم الأقلام
. |
مامان رمضان كريم
فعلاً ملحوظة ذكية
أولها
الزوول زول الله
وأيضاً
ما شفت عوض
...
وأزيدك من الشعر بيت
تصدق كمان
في واحد من بورداب أبوظبي
اسمو (ساري الليل)
يعني كّمل الناقصي
...
|
Post: #20
Title: Re: (الزوول) و (Elawad) شخصية واحدة
Author: Gaafar Ismail
Date: 08-21-2010, 10:12 AM
Parent: #16
اخي الحبيب وصديقي العزيز عوض
رمضان كريم وكل سنة وانت والأسرة بخير وعافية.
ظل الكثير من أصدقائي بما فيهم إبني سعدالدين وسيف اليزل يسألوني دائما " من هو الزوول الذي تتبادل معه دائما مداخلات حميمة واحترام بالغ ؟" كان ردي دائما هو زوول لم يسبق لي مقابلته حتى الآن ولكنى احببته واحمل له من صميم قلبي كل الاحترام والمودة ..بعضهم كان لا يصدق وبعضهم يكتفي بهز رأسه ...أكيد الآن عرفوا من هو الزوول السمح ..احدهم اتصل بي قبل قليل ونبهني لهذا البوست وقال لي " انت غتيت بشكل "
ألف مرحب اخي الكريم باسمك ورسمك .
تحياتي ومودتي
|
Post: #21
Title: Re: (الزوول) و (Elawad) شخصية واحدة
Author: abubakr
Date: 08-21-2010, 10:27 AM
Parent: #20
يابني بس كاتل الزوول في الزمن الصعب دة مالك ؟؟؟
يبدو انك مش راضي عن فضائية قالو اسمها زي اسمك المات .؟
يعني هسع يقدموك لمحاكمة بتهمة القتل العمد وين ؟؟؟
________
رمضان كريم يا دفعة رمضانيات سابقا
|
Post: #41
Title: Re: (الزوول) و (Elawad) شخصية واحدة
Author: عوض عبدالله طه
Date: 08-24-2010, 04:55 AM
Parent: #21
السلام عليكم
....
زولنا ،فردتنا ،أخونا واستاذنا أبو بكر سيداحمد
رمضان كريم
Quote: يابني بس كاتل الزوول في الزمن الصعب دة مالك ؟؟؟
يبدو انك مش راضي عن فضائية قالو اسمها زي اسمك المات .؟
يعني هسع يقدموك لمحاكمة بتهمة القتل العمد وين ؟؟؟
________
رمضان كريم يا دفعة رمضانيات سابقا |
كيف عرفت؟
تصدق !!!
طبعاً الواحد لما يمسك ريموت الرسيفر لأول مرة بيعمل تخزين لكل القنوات السودانية في (Favorites)
من أيام كدي عملت اعادة برمجة
أول حاجة عملتها حذفت قناة زول دي من القائمة
أما بالنسبة للإسم فالسبب في تغييره أشياء كثيرة لعل أقواها أنه صار بمثابة تهمة جاهزة بأنك شخصية وهمية ...الخ
عموماً سأعطي نبذة عن هذا الموضوع في هذا البوست ، وأتمنى مشاركتك
.....
|
Post: #36
Title: Re: (الزوول) و (Elawad) شخصية واحدة
Author: عوض عبدالله طه
Date: 08-22-2010, 04:42 AM
Parent: #20
.
Quote: اخي الحبيب وصديقي العزيز عوض
رمضان كريم وكل سنة وانت والأسرة بخير وعافية.
ظل الكثير من أصدقائي بما فيهم إبني سعدالدين وسيف اليزل يسألوني دائما " من هو الزوول الذي تتبادل معه دائما مداخلات حميمة واحترام بالغ ؟" كان ردي دائما هو زوول لم يسبق لي مقابلته حتى الآن ولكنى احببته واحمل له من صميم قلبي كل الاحترام والمودة ..بعضهم كان لا يصدق وبعضهم يكتفي بهز رأسه ...أكيد الآن عرفوا من هو الزوول السمح ..احدهم اتصل بي قبل قليل ونبهني لهذا البوست وقال لي " انت غتيت بشكل "
ألف مرحب اخي الكريم باسمك ورسمك .
تحياتي ومودتي |
الصديق الحبيب أبو الجعافر
كثيراً ما ينتابني الملل من سودانيزأونلاين
وأفكر في هجرها وكل المنتديات
ثم أعود لأعدد محاسن اشتراكي بها ومساؤيها
صدقني
تمثل معرفتي بك وبعض الأخوة الأفاضل حجر الزاوية في إحجامي عن الإنقطاع الدائم
بالرغم من كسلي وإنقطاعي المؤقت
فأنت وهؤلاء الأخوة تمثلون كل محاسن المشاركة في المنتديات
وأشعر وأنا أرى نشاطاتكم ومشاركاتكم الإجتماعية أنكم جزء من أسرتي الكبيرة
أفرح لفرحهم وأحزن لما يصيبهم من حزن
دمت لنا بلسما شافياً ينثر المحبة في هذا المكان
....
رمضان كريم
...
|
Post: #27
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 12:07 PM
Parent: #16
ود البشرى كيفك ورمضان كريم
...
.
Quote: طبعا القرير أخوك لاقيناه قبل كم سنة في الشارقة و ادانا النجيضة
|
...
ياود البشرى
أكيد تعرف قصة مقتل المبحوح؟
الجماعة العاملين فيها مجضمين الخطة
وأخيراً ... لقوا نفسهم معروضين في كل القنوات فيديو عديل كدي
...
الليلة عرفت أنو كمية من البشرية كانت عارفاني
وأخوك فاكر انو مجضم الشغلة
....
بالمناسبة
يوم الشارقة داك
كنت ناوي احضر الجلسة ديك
ولكن المواعيد ما كانت مناسبة لأن مشوار الرويس طويل
وأنا الأديت الفاتح (القرير) تلفونك
...
|
Post: #23
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 11:46 AM
Parent: #15
السلام عليكم
أبو رغيم قريبي كيفك
Quote: الزول منه العوض و عليه العوض
نقول ميلاد نجم بفطور بورداب الامارات |
طبعاً حضور بإذن الله
متابعين نشاطك
بالتوفيق إن شاء الله
|
Post: #22
Title: Re: (الزوول) و (Elawad) شخصية واحدة
Author: عوض عبدالله طه
Date: 08-21-2010, 11:38 AM
Parent: #14
ود الصايم ازيك ورمضان كريم
...
Quote: يا هالكـ .. حمد لله ع السلامة ياخ!!
السماية وين .. ولّ عاوز تاكلنا حنكـ!!
|
يا أب سنينة
مش لما ناكل سمايتك في الأول
ولّ (حموودي العسل) ده نكرتو حطب...
وبعدين تعال يا ود الصايم
انت ما شفت عمك هارون دياب قال لي رجعوك الروضة
طيب
وانت فائدتك شنو؟
صاحبي ومودريتور (يا قول تبارك) وما تعمل لأخوك حاجة
ما تكلم لينا عمك ده يرجع لينا تاريخ مشاركتنا على الأقل
...
بالله سلم لي على عمك فكي ماسورة وقول ليهو رمضان كريم
....
|
Post: #24
Title: Re: (الزوول) و (Elawad) شخصية واحدة
Author: محمد عبد الماجد الصايم
Date: 08-21-2010, 11:49 AM
Parent: #22
| Quote: بالله سلم لي على عمك فكي ماسورة وقول ليهو رمضان كريم |
أطرانا بالخير ياخ!!
|
Post: #25
Title: Re: (الزوول) و (Elawad) شخصية واحدة
Author: تولوس
Date: 08-21-2010, 11:55 AM
Parent: #24
الف مرحب بك اخي العزيز عوض ... لكن تصدق انو الحكاية ما فارقة والزوول باقي فينا بوجودك بيننا
|
Post: #37
Title: Re: (الزوول) و (Elawad) شخصية واحدة
Author: عوض عبدالله طه
Date: 08-22-2010, 11:28 AM
Parent: #25
.
| Quote: الف مرحب بك اخي العزيز عوض ... لكن تصدق انو الحكاية ما فارقة والزوول باقي فينا بوجودك بيننا |
..
تولوس ازيك ورمضان كريم
زمان أنا كنت عند رأيك
وأخوك بحمد الله ليس مغرماً بالشهرة الاسفيرية
ولكن
في الفترة الأخيرة
بقيت اشعر بأنا النك نيم المجهول بقى شبه منبوذ
بل ومثار للريبة والشك
خاصة بعد معارك بوستات سعيد بوكرامي وما شابهها
والواحد أصلاً ما عندو حاجة داسيها
فقلنا على ايه
....
سآتي بسرد تأريخي قصير لموضوع النك نيم المجهول
وأتمنى مشاركتك
...
تحياتي
.
|
Post: #26
Title: Re: (الزوول) و (Elawad) شخصية واحدة
Author: saadeldin abdelrahman
Date: 08-21-2010, 12:04 PM
Parent: #24
مـرحـبا بزوولنا عوض
و مشتاقين ياخ
----------
قلت لي سحبوا منك الأتوه :)
|
Post: #28
Title: Re: (الزوول) و (Elawad) شخصية واحدة
Author: Nasruddin Al Basheer
Date: 08-21-2010, 12:20 PM
Parent: #26
أخيراً وريتنا الزوول ده منو يا أبو بطناً غريقة؟
يا اخ في سودانيات زهجتنا وكرهتنا في بوست الأسايطة عشان نعرف الزول ده منو..
الحمد لله الجات منك واعترفت في النهاية..
نلاقيك يوم الجمعة في الإفطار بأبي ظبي إن شاء الله..
نصر الدين البشير (أبو حازم)
|
Post: #30
Title: Re: (الزوول) و (Elawad) شخصية واحدة
Author: ناذر محمد الخليفة
Date: 08-21-2010, 03:23 PM
Parent: #28
كدي رسل السيديهات عشان نختبر الإسم الجديد مع ناس البيت ههههه
|
Post: #45
Title: Re: (الزوول) و (Elawad) شخصية واحدة
Author: عوض عبدالله طه
Date: 08-26-2010, 03:29 PM
Parent: #30
..
رمضان كريم يا أبو النيز
| Quote: كدي رسل السيديهات عشان نختبر الإسم الجديد مع ناس البيت ههههه |
...
طبعاً جملتك دي مشفرة ...معظم الناس يكونوا ما فهمو حاجة
ومع إني حكيتها زمان ولكن في أيام البوح الأسفيري دي لا بأس من تكرارها
...
والحكاية يا جماعة باختصار
ناذر ده فردتي (اسفيرياً يعني )
لكنه يعرف اسم الزوول فقط لا غير
ومرة كده كان مغرود في سيديهات
فقمت رسلتها ليهو مع واحد قريبنا ساكن في الصافية (قريبنا ده ما عندو أي صلة بعالم المنتديات)
ورسلت ماسنجر لناذر يمشي يستلمها من قريبنا وزودتو بتلفونو
عمك ناذر مشى للصافية ودق الجرس جوهو الجماعة
قال عايز السيديهات
فالجماعة كنوع من التأكيد سألوه رسلها منو؟
وتعال شوف الإرتباك الدخل فيهو أبو النيز
لما قعد يقول ليهم والله اسمو الزوول
وهو صاحبي ووووو ...
وطبعاً الجماعة قعدوا يعاينو ليهو ساي
وهو داخل في ضفورو
غايتو بعد صرف كلام كتير
وافقوا يدوها ليهو
...
|
Post: #43
Title: Re: (الزوول) و (Elawad) شخصية واحدة
Author: عوض عبدالله طه
Date: 08-24-2010, 02:35 PM
Parent: #28
نصر الدين ازيك و رمضان كريم
....
Quote: أخيراً وريتنا الزوول ده منو يا أبو بطناً غريقة؟
يا اخ في سودانيات زهجتنا وكرهتنا في بوست الأسايطة عشان نعرف الزول ده منو..
الحمد لله الجات منك واعترفت في النهاية..
نلاقيك يوم الجمعة في الإفطار بأبي ظبي إن شاء الله..
نصر الدين البشير (أبو حازم) |
تصدق ... واحدة من اسباب الإعتراف
هجومك في سودانيات
ويمكن أكون انتبهت لأنو الحركة دي مضايقة الناس
بس تعرف حاجة
ناس بوست الأسايطة كلهم ناقشين الفيلم
تحياتي
|
Post: #39
Title: Re: (الزوول) و (Elawad) شخصية واحدة
Author: عوض عبدالله طه
Date: 08-23-2010, 05:24 AM
Parent: #26
السلام عليكم
...
أبو السعود ازيك ورمضان كريم
...
Quote: مـرحـبا بزوولنا عوض
و مشتاقين ياخ
----------
قلت لي سحبوا منك الأتوه :) |
...
وكمان زولي ود الصايم
الكنت قايل عندو مراقة
طلعت بت ديناري ساي
....
|
Post: #31
Title: Re: (الزوول) و (Elawad) شخصية واحدة
Author: عاطف عمر
Date: 08-21-2010, 04:06 PM
Parent: #1
الدوام لله وحده
ياخ في شهر الرحمة دا تجي ( تغتال ) أحد احب الشخصيات الإسفيرية لقلوبنا
تغير إسمك ... إنت مخير
بكري يعصر عليك وتستجيب / ترضخ ( للضغوط الدولية ) برضو إنت مخير
لكن أن تلغي شخصية ( الزوول ) الحبيبة لقلوبنا من الوجود فهذا لا تملك ( كل الحق ) فيه
فهذا ( الزوول ) ظل مصدر فرح لكثيرين أنا منهم
أحس بفرح طفولي وأنا فقط أطالع إسمه بالبورد.. دع عنك تواجده في بوستاتي
_________________
نرحب بالأخ العوض
وأرجو أن يطيب له المقام بيننا
وأن نكون عند حسن ظنه
رمضان كريم
تقبل الله صيامك وقيامك وطاعاتك
وأعاده عليك بالخير والبركات
|
Post: #33
Title: Re: (الزوول) و (Elawad) شخصية واحدة
Author: Ashraf el-Halabi
Date: 08-21-2010, 08:57 PM
Parent: #31
رمضان كريم يا زول
|
Post: #47
Title: Re: (الزوول) و (Elawad) شخصية واحدة
Author: عوض عبدالله طه
Date: 09-08-2010, 04:54 AM
Parent: #33
السلام عليكم
...
أشرف الحلبي ازيك
...
اتذكرتني بالقهوة الشهيرة
...
بس تعرف من فترة كده
طبعاً غيرت صورة البروفايل القهوجي دي
للصورة الحقيقية تمشياً مع التعريف الكامل بالزوول
بس بيني وبينك خرمان ليها شديد
وحا أرجع ليها قريب
...
عيدك مبارك
..
|
Post: #46
Title: Re: (الزوول) و (Elawad) شخصية واحدة
Author: عوض عبدالله طه
Date: 08-29-2010, 08:57 PM
Parent: #31
السلام عليكم
....
Quote: الدوام لله وحده
ياخ في شهر الرحمة دا تجي ( تغتال ) أحد احب الشخصيات الإسفيرية لقلوبنا
تغير إسمك ... إنت مخير
بكري يعصر عليك وتستجيب / ترضخ ( للضغوط الدولية ) برضو إنت مخير
لكن أن تلغي شخصية ( الزوول ) الحبيبة لقلوبنا من الوجود فهذا لا تملك ( كل الحق ) فيه
فهذا ( الزوول ) ظل مصدر فرح لكثيرين أنا منهم
أحس بفرح طفولي وأنا فقط أطالع إسمه بالبورد.. دع عنك تواجده في بوستاتي
_________________
نرحب بالأخ العوض
وأرجو أن يطيب له المقام بيننا
وأن نكون عند حسن ظنه
رمضان كريم
تقبل الله صيامك وقيامك وطاعاتك
وأعاده عليك بالخير والبركات |
....
الله أكرم حبيبنا عاطف
غايتو بعد كلامك الفوق ده الواحد ما عارف يقول شنو
لكن تصدق يا حبيبنا
انت لك دور كبير في اغتيال شخصية الزوول
أنا أعرف ذاكرتك القوية
كدى أرجع بيها شوية كده سنتين تلاتة
مرة كدى ...الزوول علق ليك على صورة في لمة بورداب في الشارقة
فكان ردك حسب ذاكرتي الخربة نوع من اللوم والعتاب على أخفاء الزوول لنفسه
لم أنسى هذه المداخلة أبداً
وفعلاً رجعت لنفسي ووجدت أنه من الظلم أن تخاطب أناس مكشوفون لك
بعناوينهم ...تلفوناتهم ...صورهم
وأنت تخاطبهم من خلف حجاب
هذا ظلم أفهم أن يتحمله شخص تمر ببوستاته مروراً عابراً فيجاملك بكلمة عابرة
ولكني لا أعرف كيف يتحمله شخص تربطك به علاقة خاصة جداً مثل عاطف عمر وجعفر اسماعيل (الياباني) وأخونا Elawad
كثير من الأصدقاء الاسفيرين تخلوا عني عندما رأوا اصراري على اخفاء نفسي
ولم يبق الا القليل
غايتو أعفوا لي
...
هسه في ذمتك يا عاطف ..زي لمة البورداب الأخيرة الكانت في أبو ظبي
مش تستاهل يضحوا ليها بالنك نيم الزوول ؟؟
....
|
Post: #35
Title: Re: (الزوول) و (Elawad) شخصية واحدة
Author: Haytham Abdulaziz
Date: 08-21-2010, 09:19 PM
Parent: #1
أخيرا يا عوض ... والله كنت محيرنا....
لكن زي ما قال ود البشرى خبرك عندنا من قبل سنتين من القرير....
لكن والله زعلتنا بتغيير أحب الألقاب في المنبر....
لكن عاد نقول شنو حكم القوي على الضعيف يا زول....ً
و عليه العوض و منو العوض يا (عوض)....
و مرحب بيك....
|
Post: #38
Title: Re: (الزوول) و (Elawad) شخصية واحدة
Author: ملكة سبأ
Date: 08-22-2010, 12:27 PM
Parent: #35
قبل بومين كدا ماعارفة في رؤية؟
في منام هلاويس ساكت في نهار رمضان دا؟
صح سمعتو في الرادي ولا اتخيل لي ساكت ؟
المهم الوصل لي انو الزوول دا عبد الله محمد الحسن المذيع الليل التلفزيون
ويامؤمن يامصدق خلاص اقتنعت بكدا
وقلت ياكا عبد الله ياكا عبد الله
والذكرة جات بسبب الاسطوانات القاعد يقول فيهن نازر
المهم ازيك يالعوض ياخي ورمضان كريم يازوول
|
Post: #40
Title: Re: (الزوول) و (Elawad) شخصية واحدة
Author: فدوى الشريف
Date: 08-23-2010, 08:17 AM
Parent: #38
لا حولتن ، بلغيسس.. هجمتيني
ماشااااااااءالله تبارك الله
كدي لمن افضى ليك
حمدلله ع السلامة
_____________________
عوض ، الزووول (كم واو هي كانت)
من خلال مداخلاتك غايتو ياك زاتك ،
اهم حاجة انو يكون..نو جينج
الغريبة كان في (زول) بالانجليزي و(الزول زاتوو) و (الزووول) وكلهن فارزنهن !
|
Post: #42
Title: Re: (الزوول) و (Elawad) شخصية واحدة
Author: جمال محمود
Date: 08-24-2010, 07:49 AM
Parent: #40
رمضان كريم و تصوم و تفطر ان شاء الله على خير
|
Post: #44
Title: Re: (الزوول) و (Elawad) شخصية واحدة
Author: أمين محمد سليمان
Date: 08-25-2010, 03:33 AM
Parent: #42
الزوول يا حبيبنا ، السلام عليكم و رمضان كريم و إن شاء الله تكون و من معك بخير
أنا غايتو (عوض عبدالله طه) أب نضارات و جلابيه ده ما بعرفو و لا عندي بيه قضيه ، أنا بعرف الزوول حبيبنا و فنجانو بتاع القهوه ...
|
Post: #48
Title: Re: (الزوول) و (Elawad) شخصية واحدة
Author: اسامة الكاشف
Date: 09-08-2010, 10:52 AM
Parent: #44
أنا طبعاً كشفت نومتك
من أول يوم
يعني اسبوتنج مضروب
|
Post: #50
Title: Re: (الزوول) و (Elawad) شخصية واحدة
Author: عوض عبدالله طه
Date: 09-23-2010, 04:43 AM
Parent: #38
Quote: قبل بومين كدا ماعارفة في رؤية؟
في منام هلاويس ساكت في نهار رمضان دا؟
صح سمعتو في الرادي ولا اتخيل لي ساكت ؟
المهم الوصل لي انو الزوول دا عبد الله محمد الحسن المذيع الليل التلفزيون
ويامؤمن يامصدق خلاص اقتنعت بكدا
وقلت ياكا عبد الله ياكا عبد الله
والذكرة جات بسبب الاسطوانات القاعد يقول فيهن نازر
المهم ازيك يالعوض ياخي ورمضان كريم يازوول |
الملكة شخصياً
طبعاً انت من الشخصيات القليلة الكان مفروض اقابلها ايام الأختفاء تحت الأرض ( يا عملات الشعوعين)
السبب كنت جاييك مع قريبي اباذر الكامل (عكود سودانيات)
لما كنت شغالة في ابو جنزير
ما عارف الحصل شنو الوقت داك
لكن تلفونك اظنو لسه عندي
طبعاً عندي عادة سيئة جداً
أشبه بهلاوسيك دي
انو اقوم اخطط لموضوع معين
ومن كترة التخطيط ...يخيل لي انو تخطيطي ده حصل ( بغض النظر انو حصل ولّ لا)
فعشان كده كنت خاتيك في جملة الناس القلائل القابلتهم شخصياً
...
بعدين يا بلقيس
مش عبدالله محمد الحسن ده جعلي
كيف يكون الزوول ؟
وأنا أكتر من مرة ...كنت بتداخل معاك وأوصف ليك مروي شرق بالتفاصيل
ومرة كده جبت صورة لبيتكم ...صاح
....
تخريمة:
صورة بتك حلوة عديل كدي ...
...
|
Post: #49
Title: Re: (الزوول) و (Elawad) شخصية واحدة
Author: عوض عبدالله طه
Date: 09-15-2010, 01:58 PM
Parent: #35
حبيبنا هيثم
Quote: أخيرا يا عوض ... والله كنت محيرنا....
لكن زي ما قال ود البشرى خبرك عندنا من قبل سنتين من القرير....
لكن والله زعلتنا بتغيير أحب الألقاب في المنبر....
لكن عاد نقول شنو حكم القوي على الضعيف يا زول....ً
و عليه العوض و منو العوض يا (عوض)....
و مرحب بيك.... |
وتتصور يا هيثم يا أخوي
زي لماتكم دي
والكنت مختفي فيها بسبب قناع الزوول
كانت من أهم الأسباب لميلاد عوض عبد الله طه
مش بيقولوا
وإيه الدنيا غير .. لمة ناس في خير .. أو في ساعة حزن
وسعيد أنا (بانضمامي) لبورداب الأمارات الجميلين
....
|
|