قريـب دا حأخنق لي زول..لا محالة.

قريـب دا حأخنق لي زول..لا محالة.


06-23-2009, 01:03 PM


  » http://sudaneseonline.com/cgi-bin/sdb/2bb.cgi?seq=msg&board=310&msg=1285865097&rn=69

Post: #1
Title: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:03 PM
Parent: #0

تلك الفتاة القصيرة ذات الرأس الكبير والشعيرات المستعارات الملصقة بهذا الرأس ، تطلق هذه الفتاة من حلقومها قنابل صوتية حادة ، وصوتها أقرب وصف له هو اجتماع سبعة وتلاتين سخلة حديثي الولادة ينادون أمهم.. جبناا حلواا حبشياا و..وووب وووب وووب و..الصاااااااااااااافقة ويناااااااا ، مع الرقص المقزز بالمؤخرة العظيمة ،
غوونبلااا ترارااا تاااا ااااااااااه غوووووونبولاااااااا
حلاوة الزول في الطول والوووووووولاااااا غووووووونبوووووولاااااااا
وعازف الأورغ الذي يعزف لهذه "الاستاذة" سينال نفس العقاب بلا شك
رغبة الانتقام التي ظلت تتراكم عبر السنين منذ أيام سايقها صلاح ستطفى قريباً
وسينتهي كل هذا ان شاءالله عندما اطبق عدالتي
الجمهور الموجود احتمال بسيط يناله القصاص العادل والاحتمال الثاني ان يصحو ضميري الذي سيظل ينادي..ياخ مالك ومالهم؟
Post: #2
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:05 PM
Parent: #1

سائق الحافلة الهايس الشاب والذي تتلبسه حالة ما عندما يكون مشغل ال mp3 المركب في مكان الولاعة وتستجيب له السماعات الضخمة الموجودة تحت الكنبة ، وبيده اليمنى فقط وفي نفس الوقت يغير التعشيقة ويتعامل مع الام بي ثري ويرتب الطبلون ويصلح السفة, وباليد اليسرى فقط وفي نفس الوقت يصلح المراية ويسلم على زملاءه السابقين من الجوكية بتاعين الركشات ويرمي عقاب السيجارة ويتكلم في الموبايل ويبرم شعره ويمسك ال ديريكسووون
كل هذا لا يستوجب تطبيق العدالة ولكن عندما تتملكه هذه الحالة ، واسمها "الحضرة الهايسية" نسبة للهايس اليابانية يتخيل هذا الوليد السائق أنه..(أرجل منك
، وأسوق منك ، وأقوى هايسياً منك) وأن من حقه الذي تكفله له الدولة أن يتخطاك و"يكتل ملف قدامك" ويبهدلك ويخليك تخش في التروتوار ويوريك عجاجه كمان لمن تخش في الهينو القدامك.
Post: #3
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:07 PM
Parent: #2

الموظف الشاب الوجيه الذي لا ينفك أن ينهر ويهدر في كل من أمامه في الشباك ولا يفرق طبعاً بين العم والخال والسر وحسين ، والغريب أنه يرق ويحنو صوته وربما تدمع عيناه حينما يهمس في أذنه ذلك الرجل ذو العمامة الكبيرة أو ذلك الرجل ذو الشنب الكبير والنجوم المتلألأة في كتفه ، والأغرب أن من في الطابور ناس السر والعم والخال وحسين لا يبدون أدنى اعتراض على أن هناك من دخل بالباب عديل وليس بالشباك وقدم ملفه وانتهى من شغلته وشرب بارد واخد بوسة من الموظف الشاب الوجيه الذي لا ينفك أن...
Post: #4
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:08 PM
Parent: #3

ذلك الشاب الذي يلبس بنطلون استرس ماركة كونز الصينية الاصلية ، ونظارة جميلة قيمتها 3 جنيه كاملة ، واللحية المحلوقة كرسم هندسي غير بالغ التعقيد في جضمه ، ذلك الشاب عندما يقف في المحطة ويشاغل البوابير والقطع والسنغنغ حسب قاموسه.
Post: #5
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:11 PM
Parent: #4

النموذج التالي تم الانتقام منه وقد شطب من قائمة الخنق..
موظفة استقبال مطار الخرطوم الدولي التي ردت علي في الهاتف بعد محاولات مضنية مع الخط المشغول..
- ألو ..لو سمحتي داير استفسر عن مواعيد الطائرة الكينية الجاية من ....
- لسة ما نزلت
و.. كركرب..تيت تيت تيت
لسة ما نزلت؟ دا جواب هسي؟ (قلت في نفسي)
وفجأة أتتني فكرة خبيثة بعد أن ظلت بطني تفور وسوسة عقلي تنخر ..
اتصلت على الرقم وصبرت حتى فتحت نفس الموظفة الخط وقد تأكدت من صوتها الغير دافئ..
- الي سلاامو أليكمو
- وعليكم السلام
american embassy ..may I know at what time ............... ?
- (أخبرتني طبعاً الموظفة بمواعيد قدوم الرحلة وبتاريخ الخطوط الكينية وبعدد بوابات المطار وارقام تكاسي المطار)
- حيييييي أنا ، الا يقولو ليكم بالانجليزي يا معقدين يا شنو ما عارف
و..كركرب..تيت تيت تيت انقطع الخط ولكن بطني كانت قد بردت
Post: #6
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:15 PM
Parent: #5

أما هذا فدعني له "فخنقتي" له فستكون كارثية..


ذلك "المكوجي" الأحمق.. فأنا منذ الصباح أفكر في "عرس صاحبي" بالمساء فأتيت باكراً الى المنزل لأنعم بقسط من الراحة ثم تأكدت بعدها من "الصابونة" في الحمّام موجودة وأن زجاجة العطر في "الدولاب" "مقنطرة"..وألقيت نظرة أخيرة على "جزمتي" الجديدة وهي تشتهي "كرعيني" بشدة وخرجت الى "المكوجي" الذي سلمته في حين غفلة مني كل ملابسي قبل يومين وأنا أفكر أيهما أجمل في "التشنطية"! القميص الأسود المخطط مع "البنطلون" الرمادي أم القميص "البمبي" مع الكحلي؟ حلها صعب ولكن لا بأس..ثم حتى إذا وصلت إلى الدكان أجده مغلقاً..لم أصدق أذني وأحد الجيران يخبرني بأن "المكوجي" سافر في زيارة قصيرة الى البلد.. (يقصروك يا يابا بمقص شجر).
Post: #7
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:20 PM
Parent: #6

المجموعة التي أجلس بينها والتي استغرقت عندها "الونسة" عن "الموبايلات" أكثر مما يجب ، أكثر مما يجب لدرجة "الطمام"..فذلك الموبايل "كمرتو" أحسن ، وذاك "صوتو أقوى" وذاك "ذاكرتو بتضرب" وذاك "سعرو نزل" وذاك "ما أصلي" وذاك "بهسهس" وذاك "بلحلس". ياخي......
Post: #8
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:28 PM
Parent: #7

ذلك العم الذي يصر على أن يأتي الى الصلاة بـ"العراقي" الخفيف و"سروال" داخلي لا غير ، فتشيح بنظرك عنه إذا سجد ، أما إذا صلى أمامك فلا باقيات صالحات تتذكرها ولا ركعتين سنة فعليك بالمخارجة ، وهو بلا شك أسوأ من ذلك الرجل الذي يصلي بجانبي ويتكرع كععععع فتملأ رائحة الطبيخ "المعفن".
Post: #10
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:34 PM
Parent: #8

ذلك الخصم الأسفيري الذي جعلك تذوق ويلات الصبر في الرد عليه وتوجعك أصابعك وأنت تطقطق في الكيبورد وينتابك "طشاش" عيون وصداع نصفي وأنت تنحت مخك برد طويل وكلام تحاول فيه أن يكون منطقياً وتستدعي فيه كل قاموسك من اللغة العربية وعبارات التحذلق ونظريات المنطق ظانناً أنك قد أفحمته ومسحت به الأرض مسحاً فتنتظر رده بفارغ الصبر..
فيأتي (أتخيله وقد وضع رجل فوق رجل) بكل برود ويكتب كلمة واحدة ً كـكلمة "لماذا؟" أو مثلاً عبارة كعبارة "ودي وتقديري" أو الخالدة دوماً "شكراً على المرور".
Post: #9
Title: Re: قريـب دا حأخنق لي زول..لا محالة.
Author: محمد عبد الماجد الصايم
Date: 06-23-2009, 01:33 PM
Parent: #5




باللاي أخنق معاكـ أي مسنجر لافي
الظروف ما معروفة يا عمكـ!
Post: #11
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:44 PM
Parent: #9

ود الصائم

ورينا الشمار كامل ، أخوك مسطح في البلد دي

قلت لي الماسنجر نغمتو ليه؟
Post: #12
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:51 PM
Parent: #11

ودا..أحييييي

جارنا الوجيه الذي قدم لنا إقتراحاً جميلاً بهياً بأن نردم الشارع الذي نتقاسمه فقد آذت "الحفر" سياراتنا وسيارات المارين وقد قامت جميع "نسوان" الحلة بعملية "الزحلقة" المميتة فيها وقد شارفت إحداهن على كسر ترقوتها لولا لطف الله..فقمنا بعملية "الطقطقة" وجمع "القروش" فقام بإحضار "قلابين" ردمية يسدان عين الشمس ، ومعها نفر من العمال الأشداء ، وبعد حين إكتشفنا الحقيقة..تصورا أن جارنا ردم جهة "حوشه" من الشارع وترك الحفر كما هي؟!
Post: #13
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 01:58 PM
Parent: #12

ودا..

ذلك الظريف ، اللطيف ، الحريف ، الشفيف الذي الذي...خلوها مستورة.
Post: #14
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 02:10 PM
Parent: #13

المهم
Post: #15
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 02:20 PM
Parent: #14

كان الله حيانا بكرة نتم الجرس

البوست دا حدو الأرشيف
Post: #16
Title: Re: قريـب دا حأخنق لي زول..لا محالة.
Author: محمد عبد الماجد الصايم
Date: 06-23-2009, 02:21 PM
Parent: #14

Quote: ود الصائم

ورينا الشمار كامل ، أخوك مسطح في البلد دي

قلت لي الماسنجر نغمتو ليه؟



إييييييييييكـ يا عمكـ
ألحق نفسكـ
ياخ هنا الإيميل بحفظوهو لمن ريحتو تعتت!
عشان لو يوم جيت خرخرت ولا قلت بغم
يجيبو ليكـ (تااااح) في وشكـ!


فيا عمكـ
بطل مسنجرات حفظكـ الله وسدد خطاكـ!ّ
Post: #19
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 02:30 PM
Parent: #16

ود الصايم والله نصيحتك تخوف عدييييل

ونعتبرها نصيحة مستقبلية لانو الحمدلله الى الآن ماسنجري فااااااااااضي

يازول انت ما مصدق. اخوك في البلد دي طييييرة
Post: #17
Title: Re: قريـب دا حأخنق لي زول..لا محالة.
Author: Maawya Hussein
Date: 06-23-2009, 02:21 PM
Parent: #14

لو دا زولك




انت والخمستاشر الدايرين يموتوا ديل ما بتخنقوهو ..الا تشركو ليهو بي مسنجر غليييييييييييييد
Post: #20
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 02:32 PM
Parent: #17

لوووووول
يا مغربي

بالذات في الصورة دي..فتش عن الرقبة



__________
اسمع انا بهظر الزول دا لسانو سليط
Post: #22
Title: Re: قريـب دا حأخنق لي زول..لا محالة.
Author: محمد عبد الماجد الصايم
Date: 06-23-2009, 02:38 PM
Parent: #17

Quote: لو دا زولك



بتاع المحطة ولا المكوجي .. ولا يا ربي قاصد بتاع الجوالات؟










___________
أنا شخصيا أرشح بتاع المحطة ما فيها من بوابير وقطع وإلخ إلخ
Post: #18
Title: Re: قريـب دا حأخنق لي زول..لا محالة.
Author: ممدوح أبارو
Date: 06-23-2009, 02:22 PM
Parent: #14

ياعمك بركة الشوفه

بي طريقتك دي حتخنق البلد كلها
Post: #21
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-23-2009, 02:34 PM
Parent: #18

أبارو
انت أبقى الحجّاز
Post: #23
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 06:58 AM
Parent: #21

طيب..

الشابان اللذان يجلسان في ركن الشارع منذ جلوسهما عصراً والى أن يشاء الله..يحفظون الآن أنك تذهب الى البقالة مرتان في اليوم..وتزور ناس "خالتك" في الشارع الثاني مرة واحدة..وأنك بـ"تزوغ" من أسامة "البراي" مرات عديدة..ويعرفون أيضاً أن الشبشب القديم "اتقطع" وانت راجع من المسجد ، تسلم عليهم مرة و"تفطهم" كم مرة ، يتابعوك منذ خروجك من المنزل حتى رجوعك..وعند المرور أمامهم يتشاغلون بشئ آخر. على كل حال بالأمس اضطررت أن أذهب الى البقالة في الواحدة صباحاً ولم يكونا موجودين..الحمدلله أظنني سأقوم بكل أعمالي بعد الواحدة.
Post: #24
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 07:12 AM
Parent: #23


ذلك الرجل الذي يظهر أمامك فجأة في الشارع..وجهه مألوف ولكن بالتأكيد ستحتاج الى اختراع اشعاعي مضاد للألزهايمر حتى تتذكر أين رأيت هذا الوجه..وبمحاولة لا تنجح في الأغلب تتحاول أن تتفاداه وتتشاغل بشئ آخر وأنت تتحرك بتكتيك حربي بالغ الدقة الى الجهة الأخرى من الشارع. وفجأة كالصاعقة تسمع اسمك..
الكثير من الأحضان وأنت تهتف "أوووووووو" مع الأكثار من "وين هسي باللاي" وأنت طبعاً تنحت مخك وبدل أن تتذكر الرجل تضيع أكثر وأنت تركز في وجهه.
كل هذا لا يستدعي "الخنق" طبعاً..ولكن سؤاله التالي اللذي لا بد أن يسأله..
"ما اتذكرتني مش؟"
Post: #25
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 07:40 AM
Parent: #24

..
Post: #26
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 08:25 AM
Parent: #25

زميلنا الموظف الذي يصر على "كشح" كل الأطباق الموجودة أمامنا على "تربيزة" الفطور في الفووول!
Post: #27
Title: Re: قريـب دا حأخنق لي زول..لا محالة.
Author: سارة كرودى
Date: 06-24-2009, 09:24 AM
Parent: #26

Quote: الشابان اللذان يجلسان في ركن الشارع منذ جلوسهما عصراً والى أن يشاء الله..يحفظون الآن أنك تذهب الى البقالة مرتان في اليوم..وتزور ناس "خالتك" في الشارع الثاني مرة واحدة..وأنك بـ"تزوغ" من أسامة "البراي" مرات عديدة..ويعرفون أيضاً أن الشبشب القديم "اتقطع" وانت راجع من المسجد ، تسلم عليهم مرة و"تفطهم" كم مرة ، يتابعوك منذ خروجك من المنزل حتى رجوعك..وعند المرور أمامهم يتشاغلون بشئ آخر


عليك الله اخنقم لى معاك .. .. وله اقلع اللستك وله كلم ناس اللجنة الشعبية وله دفار الالزامية .. ..

وش مبسوط .. ..
Post: #28
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 09:44 AM
Parent: #27

Quote: وش مبسوط


الخنقة بي 10 جنيه ، واليومين دي عاملين تخفيض 4 جنيه

انتو قايلين الخنق دا ساهل؟
Post: #29
Title: Re: قريـب دا حأخنق لي زول..لا محالة.
Author: سارة كرودى
Date: 06-24-2009, 09:50 AM
Parent: #28

Quote: الخنقة بي 10 جنيه ، واليومين دي عاملين تخفيض 4 جنيه

انتو قايلين الخنق دا ساهل؟


يبقه عندك عندنا 12 جنيه ( ).. ..

القوسين دى اللسته حقتى .. ..
Post: #30
Title: Re: قريـب دا حأخنق لي زول..لا محالة.
Author: شول اشوانق دينق
Date: 06-24-2009, 10:42 AM
Parent: #29

Quote: ذلك الرجل الذي يظهر أمامك فجأة في الشارع..وجهه مألوف ولكن بالتأكيد ستحتاج الى اختراع اشعاعي مضاد للألزهايمر حتى تتذكر أين رأيت هذا الوجه..وبمحاولة لا تنجح في الأغلب تتحاول أن تتفاداه وتتشاغل بشئ آخر وأنت تتحرك بتكتيك حربي بالغ الدقة الى الجهة الأخرى من الشارع. وفجأة كالصاعقة تسمع اسمك..
الكثير من الأحضان وأنت تهتف "أوووووووو" مع الأكثار من "وين هسي باللاي" وأنت طبعاً تنحت مخك وبدل أن تتذكر الرجل تضيع أكثر وأنت تركز في وجهه.
كل هذا لا يستدعي "الخنق" طبعاً..ولكن سؤاله التالي اللذي لا بد أن يسأله..
"ما اتذكرتني مش؟"


يا سلام عليك ياخ هههههههههههه




100%
Post: #31
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 11:20 AM
Parent: #30

مش عليك الله يا شول؟

شكلو لاقاك الزول دا كتير
لوووول
Post: #32
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 12:52 PM
Parent: #31

للربا والتلاف
Post: #33
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 02:33 PM
Parent: #25

تاني
Post: #34
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-24-2009, 03:48 PM
Parent: #33

آخر أبديت..

أي زول يجيب لي سيرة المشروب الجابو المسلمي
Post: #35
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-28-2009, 03:21 PM
Parent: #34

الارشفة قربت
نلحق نتم القائمة
Post: #36
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-28-2009, 03:33 PM
Parent: #35

بدون ذكر أسماء..

* نادية الجندي
* عمر الجزلي
* "كاتب مريخي كبير"
* مدير البرامج في التلفزيون القومي السوداني (هو والقبليهو والقبليهو..."
Post: #42
Title: Re: قريـب دا حأخنق لي زول..لا محالة.
Author: العوض المسلمي
Date: 06-29-2009, 03:26 PM
Parent: #34

Quote: آخر أبديت..

أي زول يجيب لي سيرة المشروب الجابو المسلمي
Post: #49
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-30-2009, 08:57 AM
Parent: #42

العوض

ياخي عندي غنمايات حال عليهم الحول ، اها بتأجر تيسك بي كم؟
Post: #37
Title: Re: قريـب دا حأخنق لي زول..لا محالة.
Author: عزاز شامي
Date: 06-29-2009, 01:47 PM
Parent: #1

الأخ القرصان محمد يوسف الزين


تخيل قعدت اعمل كوت للكلام العجبني لقيتني عملت
بوست مواز للبوست الأصلي و معاكس له في لون الخلفية

عاد الله يسألك ده بوست يقعد غاتس
امشي القاهو في الازقة الخلفيةللبورد؟
هو الانحراف بيبدى كيف؟ ما بنوع ده ...

عموما ....
لا تفوت لا تموت خليتني اضحك كما المجنونة في المكتب و شرقت بالموية

عندي عدد من الشخوص بصدد الخنق، بجي اشرهم ليك بعدين
وأرجو ان يتسع المكان ...
Post: #38
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-29-2009, 02:25 PM
Parent: #37

عزاز شامي
نيا هاااااااا هااااااا (دي ضحكة جون سلفر طبعاً)

ياخي جيبي ناسك ديل نخنقهم خنقة جماعية


Quote: امشي القاهو في الازقة الخلفيةللبورد؟


والله جيبتيهو من الازقة ما قصرتي

دايرة تزيدي سيئاتنا ساكت


يديك العافية ، وايدين غولاد زي بتاعين ود الصايم (هو الخنق دا قايلنو ساهل؟)
Post: #39
Title: Re: قريـب دا حأخنق لي زول..لا محالة.
Author: محمد عبد الماجد الصايم
Date: 06-29-2009, 02:34 PM
Parent: #38

ماشة معاكـ حلاوة لكوم!
Post: #40
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-29-2009, 02:46 PM
Parent: #39

Quote: ماشة معاكـ حلاوة لكوم!


أعمل نايم يا عمكـ

زول فضيحة خلاس
Post: #41
Title: Re: قريـب دا حأخنق لي زول..لا محالة.
Author: نادية عثمان
Date: 06-29-2009, 03:18 PM
Parent: #40

Quote: الشابان اللذان يجلسان في ركن الشارع منذ جلوسهما عصراً والى أن يشاء الله..يحفظون الآن أنك تذهب الى البقالة مرتان في اليوم..وتزور ناس "خالتك" في الشارع الثاني مرة واحدة..وأنك بـ"تزوغ" من أسامة "البراي" مرات عديدة..ويعرفون أيضاً أن الشبشب القديم "اتقطع" وانت راجع من المسجد ، تسلم عليهم مرة و"تفطهم" كم مرة ، يتابعوك منذ خروجك من المنزل حتى رجوعك..وعند المرور أمامهم يتشاغلون بشئ آخر. على كل حال بالأمس اضطررت أن أذهب الى البقالة في الواحدة صباحاً ولم يكونا موجودين..الحمدلله أظنني سأقوم بكل أعمالي بعد الواحدة.


ديل الخنق شوية عليهم ياخ !

أنا خليت ليهم مدخل حلتنا كلو كلو وبقيت أجي بي حلة الجيران !!


البوست ده حرام يتأرشف والله العظيم !
Post: #43
Title: Re: قريـب دا حأخنق لي زول..لا محالة.
Author: محمد عبد الماجد الصايم
Date: 06-29-2009, 03:47 PM
Parent: #41

بعد دا أخنق وخلص الموضوع
الأمور ممكن تطلع من إيدكـ يا عمكـ
Post: #44
Title: Re: قريـب دا حأخنق لي زول..لا محالة.
Author: حنين للبلد
Date: 06-29-2009, 04:52 PM
Parent: #43

ياقبطان البوست ده ما منقول للربع الجديد... مقروضين في..
Post: #45
Title: Re: قريـب دا حأخنق لي زول..لا محالة.
Author: حنين للبلد
Date: 06-29-2009, 04:52 PM
Parent: #43

ياقبطان البوست ده ما منقول للربع الجديد... مقروضين في..
Post: #46
Title: Re: قريـب دا حأخنق لي زول..لا محالة.
Author: سارة علي
Date: 06-30-2009, 05:51 AM
Parent: #45

يا ود الزين...


بوست تبيع؟؟؟؟
Post: #47
Title: Re: قريـب دا حأخنق لي زول..لا محالة.
Author: Abdlaziz Eisa
Date: 06-30-2009, 06:48 AM
Parent: #46




يا ود الزين


سلام


بوستك رائع.. ولو مشى الأرشيف نضيف الريس في قائمة الخنق!!


وانا منتظر التخفيضات الجاية بعدين ازودك بلستة ..

تحياتي
عبدالعزيز
Post: #48
Title: Re: قريـب دا حأخنق لي زول..لا محالة.
Author: محمد عبد الماجد الصايم
Date: 06-30-2009, 08:38 AM
Parent: #47

أها يا عمكـ
أسقف على كــدا
Post: #54
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-30-2009, 10:58 AM
Parent: #48

Quote: أها يا عمكـ
أسقف على كــدا


طبعاً من قبيل لافي ولافي بطنش فيك

اها














ياخ مالك ومالي؟
Post: #55
Title: Re: قريـب دا حأخنق لي زول..لا محالة.
Author: محمد عبد الماجد الصايم
Date: 06-30-2009, 11:08 AM
Parent: #54

Quote: ياخ مالك ومالي؟


أكتر من كــدا بعمل ليكـ كوفاااار
Post: #53
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-30-2009, 10:26 AM
Parent: #47

أووو الباشمهندس المعماري عزو


البوست دا آيل للسقوط ، حصل
Post: #52
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-30-2009, 10:20 AM
Parent: #46

سارة علي

Quote: بوست تبيع؟؟؟؟


نوهااائي

عندك "خنّاق" جاهز؟
Post: #51
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-30-2009, 09:11 AM
Parent: #45

حنين للبلد
اسمك دا زاتو داير ليهو خنق

بلد شنو البحن ليها أنا

Quote: ياقبطان البوست ده ما منقول للربع الجديد... مقروضين في..


عاملين حملة هسي ، وين يافطتك؟
Post: #50
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-30-2009, 09:04 AM
Parent: #41

نادية عثمان

نمشي نحنس الـBoss

اتاريهو الأرشفة أصعب من الخنق
Post: #56
Title: Re: قريـب دا حأخنق لي زول..لا محالة.
Author: عزاز شامي
Date: 06-30-2009, 12:10 PM
Parent: #1

سوف سديق ... انتي في ودي هزا بوست روبوء هزا في يجي
انا في نفر كتير في سوي جنجال بس انت في جيب هزا بوست


كلاص في اتفاق؟

حمودي الأسل ... كلم هزا نفر انت سوا سوا سديق
Post: #57
Title: Re: قريـب دا حأخنق لي زول..لا محالة.
Author: محمد يوسف الزين
Date: 06-30-2009, 02:44 PM
Parent: #56

يا معشر الخانقين

استراحة.. دا موقف حصل لي وخنقت فيهو روحي انا زاتي..

وانا في موقف الاستاد..

والجوع ضاربني ضربة عجيبة ، ما غطى على كوارك بطني الا صوت الابنصات. ..
المهم..راجيني مشوار بتاع مجاملة..واحد والدتو ربنا ياخد بيدها عملو ليها عملية في واحدة مستشفيات أم درمان ، فسريع سريع وبعدين نرجع...أيوااااه ياهو زاتو.
وقبل ما أتلب في واحدة من الحافلات قلت ياخي ناكل لينا اي حاجة ان شاءالله بسكويت كابتن ماجد ، بركت الجيب لقيتو فاضي. مشيت صراف قريب وصرفت لي خمسين جنيه ، بتأكلني وتوصلني وبتشتري لي علبة حلاوة محترمة لزوم الزيارة ، وبتجيب حق اللبن بعدين ،
المهم..
لفيت لف الجن وما اقنعتني حتة اكل منها ، المطاعم كلها الفي المنطقة المباركة دي ما شاءالله عليها ، كل ذرات الغبار والعوادم ، بعدين تحت تحت واحد قال لي اوعك من الشاورما الفي المطاعم دي لأنو الجداد بتاعهم بتعمل ليك كدا وكدا وكدا واللحمة كذلكا كدا وكدا وكدا ، وأووعك من البرقر كمنجا لأنو كذلكا ..... وزيت الطعمية برضو كذلكا ....... ، وقالو لو الزول القاعد في الكانون سفتو وقعت في الصاج عااااااادي بلخها ليك في الزيت.
ثم أن الأكل برة البيت أصبح من المكروهات التي ترقى الى المحرمات عند حكومتنا الموقرة.
المهم...
تلبت ليك في الحافلة الماشة الموردة ، على حسب الكمساري الذي كورك .. الموردة الموردة
المهم..
اول حاجة لاحظت ليها والحافلة متوجهة صوب الكوبري وبعد الأعععععن أعععععععنننن ، انو الناس كلها صارة وشها ، بعد شوية كدة حسيت بحاجة بتفرفر في كرعيني ، بسم الله..وأعوذ بالله من الشيطان الرجيم ، أعاين تحت..القى ليك "عتوت" في رواية أخرى "عمبلوق" وفي أخرى "سخل" وفي أخرى "ابن الماعز" وهذا المذكور بفرفر في كراعي وبعد شوية انفجر ليك بالكوراك.
اتجاوزت الموضوع دا وعملت نايم ،
المهم..
ونحن في شارع الأربعين طقطق الكمساري
طلعت فكة حديد وأديتو
قال لي..دا شنو؟ النفر بألفين
يا راجل؟!..صاح انا طولت لكن ما بتكون حصلت
فجأة كدا طقت لي وسألتو..انتو الحافلة دي ماشة وين؟
وبصوت واحد جهوري جداً شاركو فيهو كل الناس الصاريين..
"انقولا"
انقولا؟ اتذكرت ليك طوالي جريدة قون والمنتخب الوطني والنقل الاذاعي الحي والحاجات دي.
- ياخي كمساريكم دا قال موردة.
- لا لأ
- وبورندي دي وين؟
- شيفت شارئ سوق ليبيا؟ نأم..أها بيغادي لي..

- يا راجل؟! ياخي ام درمان دي حفظت الشهدا والبسطة بالرجالة خلاص نزلوني وهاك دي الالفين وربنا يوصلكم بالسلامة.


ما يستفاد من المعطة دي...
- أخوك لمن تحنسو يسوقك بالعربية مشوار ويقول ليك مافي طريقة نط ليهو في حلقو ، لازم يوديك.
- مافي داعي تطلع من البيت بدون فطور وتعمل فيها مستعجل.
- دوس يازول أي حاجة ، لأنو الجوع حيخليك تسمع "موردة" بدل "انقولا".
- لازم تتعلم كيف تخلي "العتان(جمع عتوت)" تسكت ، الزمن ما مضمون.
- ناس انقولا ديل ناس صارين وشهم طوالي.
- مافي زول مفتح ومقطعها ، عاااادي ممكن تطلع وهم ساكت.
- مافي داعي تفتح علبة الشكولاتة الاشتريتها لناس صاحبك في المستشفى وتاكل منها قبل ما تصل ، حتى لو جعان لازم توصلها وهي مقفولة!.
Post: #58
Title: Re: قريـب دا حأخنق لي زول..لا محالة.
Author: سارة علي
Date: 07-01-2009, 06:25 AM
Parent: #57

ههههههههههههههههههههههههههههههه
دة لازم يمشي ال(ربع) الجديد..
Post: #59
Title: Re: قريـب دا حأخنق لي زول..لا محالة.
Author: أميرة فاروق عبد العال
Date: 07-01-2009, 09:25 AM
Parent: #58

غايتو للضمان كدي أنا يلاقيكم بي هناك،
عشان ما أدفق مويتي على الرهاب..
باقي خنقتي (أقصد مخنوقي) مهمة شديد..
Post: #60
Title: Re: قريـب دا حأخنق لي زول..لا محالة.
Author: محمد يوسف الزين
Date: 07-01-2009, 01:40 PM
Parent: #59

أميرة فاروق..

Quote: عشان ما أدفق مويتي على الرهاب..


الكلام الكبار كبار دا بنعرفو

اشرحي لينا بالعربي ، عندك زول دايرة تخنقيهو؟ ولا ما عندك؟



______________

خنقة سريعة..

الموظفة الجديدة التي تعمل معنا في المكتب..تلك الرقيقة التي تملك وجه بطلة هندية والتي يشبه سلامها نسمة خريفية و..(الباقي في سري ..البورد دا مراقب من الأمن الوطني بتاعنا ""عاااارفك"")
هذه الرقيقة طرقت بابي اليوم صباحاً ، ومنذ مقدمها شكلت نقلة نوعية (لكي أقرب الفهم كأن يلعب كريستيانو رونالدو مع الأمل العطبراوي) فهذه الشركة كل موظفاتها من نوعية "راجل إلا" وبعضهن يملكن صوتاً أخشن من صوتي وخطوة أسرع من خطوتي وفي رواية أخرى "ضراع أكبر من ضراعي وبونية أكبر من بونيتي"..وقام هذا الرقاق المملح بـ"الزبادي الساااقط" بسؤالي "يا هندسة ياخي اللايبتوب بتاعي بايز والويندوظ فيهو خستكة ممكن تصلحو لي؟" ، فأجبتها مسرعاً متكبكباً مجهجهاً..
"جدن ياخ ، اصلحو ليك طوالي" (لوووول)
فقامت "الرقاق" باحضار اللابتوب ، وما أن حمل شاشة الوندوز فهمت أنه ملئ بالفايروسات فابتسمت ابتسامة الرجل الواثق الذي لا يشق له غبار في حروب الفايروسات وتصليح الوندوزات..
وما أن "قشطت" اليو اس بي فلاش وقمت بتنصيب الأنتي فايروس ملأت الشاشة الحروف الهروغلوفية ورسومات حضارة الإنكا ثم "علق /هانق" وحلف بستين يمين أن لا يحمل ثانية..والليييييييلة..
حاولت مراراً وتكراراً أن أقوم بعمل شئ لانقاذ الويندوظ
قمت بعمل "فورمات" سريع للجهاز الذي به "درايفر" واحد وهو الـ C ، وأنزلت ويندوز جديداً بهياً يسر الناظرين...
التلفون الداخلي .. وبخفة راقص الباليه..تعالي صلحت ليك الجهاز,
وانهالت علي عبارات الشكر والمدح بالصوت الذي يشبه نسمة خريفية و....(الباقي في سري.. البورد دا مراقب من الأمن الوطني بتاعنا ""عاااارفك"")

وماهي الا لحظات واكتشف "الرقاق" أن اللايبتووب بتاعها اتفرمط وأن ملفاتها الهامة والتي تحتوي على أسرار الكون كلها قد ولت الى غير رجعة.
طبعاً الانسة "رقاق" تحولت في الحال الى "مذؤب" وتفتلت عضلاتها ومدت عنقها للاعلى وأطلقت العواء الشهير واللعاب ينزل من بين أنيابها وقالت بصوت جدير بمذؤب محترف..."خسرتو؟ وضيعت علي حاجاتي كلها مش؟، انا من قبييييل ما مطمنة"
وخرجت وهي تضرب باب المكتب وراءها ، وتركتني مذهولاً من الظاهرة ، هل هي احدى ظواهر التي تدرس في علوم الرقاقولوجي والتي نسمع بوجودها؟
وأنا..
وأنا أجلس في ركن المكتب مسكيناً خائفاً مرتعباً امسح العرق واتمتم "بلا ياخدك"

Post: #61
Title: Re: قريـب دا حأخنق لي زول..لا محالة.
Author: محمد يوسف الزين
Date: 07-01-2009, 02:39 PM
Parent: #60

..
Post: #62
Title: Re: قريـب دا حأخنق لي زول..لا محالة.
Author: Abdlaziz Eisa
Date: 07-01-2009, 05:52 PM
Parent: #61

Quote:
أووو الباشمهندس المعماري عزو


البوست دا آيل للسقوط ، حصل


الأخ محمد زين

سلام

باشمهندس عديل كده...
يا أخي انا تشكيلي وكمان أشكي لك!!

خلاص نشوف للبوست ده أعمدة اغريقية ونسده بالمرمر..

الأرشيف جايينا في غفلة المرة هذه زي التسونامي..
فلو ما خنقت ليك زول أسرع حصل.. الجماعة في الركعة الأخيرة!!

تحياتي
عبدالعزيز
Post: #63
Title: Re: قريـب دا حأخنق لي زول..لا محالة
Author: محمد يوسف الزين
Date: 07-02-2009, 10:46 AM
Parent: #62

التشكيلي عبدالعزيز عيسى

والله شرف لي بأن أعرف أنك تشكيلي (وتغالطني وأغالطك واخنقني واخنقك) ولكن..

ولكن هذا يعني أنك من الفئة الصفوة الذين يمثلون النسبة الأقل من السودانيين


وهي من الفئات التي تمنيت "خنقها" في الماضيً لعقدة نفسية متجذرة في نفسي اتجاههم

فنحن معشر المهندسين والاطباء والعمال والاساتذة ناس مساكين

فالتشكيليين فازو بكل "الفهم" وتركوا لنا الفتات


Quote: ونسده بالمرمر..

بما أنو مرمر دي بت أختي
فأظنك هنا قاصد بيها تحلية بعد الغدا




_______________
هذا كان ما قبل تسونامي الذي لا يبقي ولا يذر

Post: #64
Title: Re: قريـب دا حأخنق لي زول..لا محالة
Author: سارة علي
Date: 07-02-2009, 05:06 PM
Parent: #63

.
Post: #65
Title: Re: قريـب دا حأخنق لي زول..لا محالة
Author: عمر عبد الله فضل المولى
Date: 07-02-2009, 06:43 PM
Parent: #64

Quote: .يا معشر الخانقين

استراحة.. دا موقف حصل لي وخنقت فيهو روحي انا زاتي..

وانا في موقف الاستاد..

والجوع ضاربني ضربة عجيبة ، ما غطى على كوارك بطني الا صوت الابنصات. ..
المهم..راجيني مشوار بتاع مجاملة..واحد والدتو ربنا ياخد بيدها عملو ليها عملية في واحدة مستشفيات أم درمان ، فسريع سريع وبعدين نرجع...أيوااااه ياهو زاتو.
وقبل ما أتلب في واحدة من الحافلات قلت ياخي ناكل لينا اي حاجة ان شاءالله بسكويت كابتن ماجد ، بركت الجيب لقيتو فاضي. مشيت صراف قريب وصرفت لي خمسين جنيه ، بتأكلني وتوصلني وبتشتري لي علبة حلاوة محترمة لزوم الزيارة ، وبتجيب حق اللبن بعدين ،
المهم..
لفيت لف الجن وما اقنعتني حتة اكل منها ، المطاعم كلها الفي المنطقة المباركة دي ما شاءالله عليها ، كل ذرات الغبار والعوادم ، بعدين تحت تحت واحد قال لي اوعك من الشاورما الفي المطاعم دي لأنو الجداد بتاعهم بتعمل ليك كدا وكدا وكدا واللحمة كذلكا كدا وكدا وكدا ، وأووعك من البرقر كمنجا لأنو كذلكا ..... وزيت الطعمية برضو كذلكا ....... ، وقالو لو الزول القاعد في الكانون سفتو وقعت في الصاج عااااااادي بلخها ليك في الزيت.
ثم أن الأكل برة البيت أصبح من المكروهات التي ترقى الى المحرمات عند حكومتنا الموقرة.
المهم...
تلبت ليك في الحافلة الماشة الموردة ، على حسب الكمساري الذي كورك .. الموردة الموردة
المهم..
اول حاجة لاحظت ليها والحافلة متوجهة صوب الكوبري وبعد الأعععععن أعععععععنننن ، انو الناس كلها صارة وشها ، بعد شوية كدة حسيت بحاجة بتفرفر في كرعيني ، بسم الله..وأعوذ بالله من الشيطان الرجيم ، أعاين تحت..القى ليك "عتوت" في رواية أخرى "عمبلوق" وفي أخرى "سخل" وفي أخرى "ابن الماعز" وهذا المذكور بفرفر في كراعي وبعد شوية انفجر ليك بالكوراك.
اتجاوزت الموضوع دا وعملت نايم ،
المهم..
ونحن في شارع الأربعين طقطق الكمساري
طلعت فكة حديد وأديتو
قال لي..دا شنو؟ النفر بألفين
يا راجل؟!..صاح انا طولت لكن ما بتكون حصلت
فجأة كدا طقت لي وسألتو..انتو الحافلة دي ماشة وين؟
وبصوت واحد جهوري جداً شاركو فيهو كل الناس الصاريين..
"انقولا"
انقولا؟ اتذكرت ليك طوالي جريدة قون والمنتخب الوطني والنقل الاذاعي الحي والحاجات دي.
- ياخي كمساريكم دا قال موردة.
- لا لأ
- وبورندي دي وين؟
- شيفت شارئ سوق ليبيا؟ نأم..أها بيغادي لي..

- يا راجل؟! ياخي ام درمان دي حفظت الشهدا والبسطة بالرجالة خلاص نزلوني وهاك دي الالفين وربنا يوصلكم بالسلامة.


ما يستفاد من المعطة دي...
- أخوك لمن تحنسو يسوقك بالعربية مشوار ويقول ليك مافي طريقة نط ليهو في حلقو ، لازم يوديك.
- مافي داعي تطلع من البيت بدون فطور وتعمل فيها مستعجل.
- دوس يازول أي حاجة ، لأنو الجوع حيخليك تسمع "موردة" بدل "انقولا".
- لازم تتعلم كيف تخلي "العتان(جمع عتوت)" تسكت ، الزمن ما مضمون.
- ناس انقولا ديل ناس صارين وشهم طوالي.
- مافي زول مفتح ومقطعها ، عاااادي ممكن تطلع وهم ساكت.
- مافي داعي تفتح علبة الشكولاتة الاشتريتها لناس صاحبك في المستشفى وتاكل منها قبل ما تصل ، حتى لو جعان لازم توصلها وهي مقفولة!.


بوست جميل ومريح
Post: #66
Title: Re: قريـب دا حأخنق لي زول..لا محالة
Author: سارة علي
Date: 07-04-2009, 02:54 AM
Parent: #65

محمد الزين..
ممكن أأجرك لي خنقة؟؟
Post: #67
Title: Re: قريـب دا حأخنق لي زول..لا محالة
Author: محمد يوسف الزين
Date: 07-05-2009, 10:10 AM
Parent: #66

مرحباً بكم في الربع الـ
(الربع ونجاة غرزة)


سارة علي..
محمد الزين..
ممكن أأجرك لي خنقة؟؟

ما تقولي الايامات دي طاقاني ليك جنس فلسة!




Quote: بوست مريح


عمر فضل المولى
الله يريحك دنيا واخرة
Post: #68
Title: Re: قريـب دا حأخنق لي زول..لا محالة
Author: Abdlaziz Eisa
Date: 07-05-2009, 10:31 AM
Parent: #67

Quote: وهي من الفئات التي تمنيت "خنقها" في الماضيً لعقدة نفسية متجذرة في نفسي اتجاههم



ود الزين يا زين



سلام

الكلام الفوق ده ارهبني..

وقلت محمد ده حيخلي البوست يمشي الإرشيف.. لا رد ولا خبر..

لكن زي ما يبدو.. الخنقة مباريانا في الربع الغالي!!


الصفوة لو كانت بحق صفوة لما كانت خوازيق وكوابيس البلد الفوقنا دي لابسانا بالسنين..


لما نشوف نخب البلاد التي تستضيفنا كيف هم يحبوا وطنهم وكيف يحترموا الإنسان عندهم أحس بالحسرة والمرارة..
صفوتنا.. لا أخلاق ولا وطنية ولا دين..

تخنق منو وتخلي منو!!



تحياتي
عبدالعزيز
Post: #69
Title: Re: قريـب دا حأخنق لي زول..لا محالة
Author: محمد يوسف الزين
Date: 07-07-2009, 03:09 PM
Parent: #68

Quote: تخنق منو وتخلي منو!!


حكمة أبدية يا حبيب
تعبر عنا في السودان



المهم...

هذا ما نقلته لاصدقائي في موقع آخر عندما حدثت لي هذه القصة العم الماضي...

قصة الماسورة...


احداث هذه القصة انتهت بالامس الساعة 8 مساءً
بدأ الكابوس عندما قرر الجميع فجأة أن موسم الأمطار قد اقترب ولا بد من تعلية "الحوش" ، وبما أن المنزل يحتاج الى بعض الصيانة و"الميك أب" لزوم اقتراب احدى المناسبات العائلية في منزلنا الذي خاصم الأفراح زمناً كان لابد من الخطوة العملاقة "ردم الحوش" ،
قمت بالاتصال صباحاً باحد الوسطاء الذين لا (يمتنعون) وطلبت شاحنة "ردمية" ، انتظرت الشاحنة العملاقة التي افرغت التراب أمام المنزل ، لبست ملابسي "المكوية" الأنيقة ووضعت عطري الباريسي (لوووول) وخرجت الى العمل ، القيت نظرة سريعة على "التل" الذي انشأ أمام الباب استعداداً للنقل واذا بي أرى احدى خوارق الطبيعة ، نبع يتفجر في أعلى التل ويتدفق بقانون الجاذبية والانحدار الى الاسفل في الشارع.. الماسورة طرشقت ، !!!!!!!! ، واللييييييييلة والليلة ، خط الأنابيب 4 بوصة يتفجر أمام المنزل بفعل ضغط الشاحنة وسنصطاد السمك قريباً هنا في شارعنا إن لم أتدارك الموقف ،
كأي مواطن غبي يصدق الحكومة أحضرت دفتر "الاجندة" وبحثت عن رقم طوارئ المياه...
تووووووت. تووووووت. توووووووووت
يبدو أن الموظف يتناول وجبة الفطور ، أو في الحمام ، أكيد الموظف سيعود سريعاً ليرد علي ، فلا يمكن أن لا يرد أحد على رقم الطوارئ..
تووووووووت . تووووووووووت
لم يرد أحد ، ركبت مع جاري العزيز وانطلقنا ننفذ الحل الثاني..مركز خدمات المياه في المنطقة ،
- السلام عليكم
- ............
- "داير أبلّـغ لو سمحت"
بدون ان يرفع الموظف رأسه وبكلمات أقرب الى "النهرة"
- اسمك منو؟
- "اسمي فلاني الفلاني" ، الماسورة طرشقت قدام البيت وهسي نحنا أ....
- ساكن وين؟
- "الحتة الفلانية" رقم المنزل كذا الحي كذا ، انت عارف الماسورة أ....
- خلاص
- الحالة ارجنت يا استاذ والله و
- قلنا خلاص

توكلت وذهبت الى العمل وأنا مطمئن كأي مواطن غبي يصدق الحكومة بأن المشكلة ستحل ،
بعد صلاة الظهر اتصلوا "ناس البيت" يخبروني بتفاقم الأوضاع وبأن أطفال الحي يتعلمون السباحة الآن في بركتنا الجميلة. أخبرتهم بأن الحكومة سيأتون الآن ويحلون الموضوع في دقائق.
بعد انتهاء الدوام ذهبت الى المنزل واذا بي أفاجأ بالأمواج المتلاطمة منذ بداية الشارع ، قليل من "الرملة" وسيكون ال"بيتش" يجنن.
أخذت نفسي مسرعاً الى حيث سجلت بلاغي. تفاجأت بالهدوء وبعض زقزقة للعصافير التي تسكن الاشجار أمام المباني الحكومية هذا الجو الذي يميز المصالح الحكومية بعد أن تغلق أبوابها.
خاطبت الغفير وحكيت له مشكلتي وعيوني الفزعة قد بلغت منتصف رأسي من فكرة ألا تحل هذه المشكلة هذه الليلة. أخبرني أن آتي بالصباح وألا أحضر سباكين لأن فيها غرامة بملايين الجنيهات ان اكتشفت.
بالطبع لن أعود الى الحي فأنا مطلوب الرأس حالياً هناك ويوجد جائزة لمن يقبض علي متلبساً بعدم احضاري للمختصين. "التقول طرشقتها أنا"
قمت بزيارة أحد الاصدقاء المرضى ورجعت متخفياً الى المنزل ماشياً أقصد "خائضاً" وصوت "الماسورة" "شلالات نياجارا".
في الصباح عاودت الكرة ومن أغرب الاشياء التي صادفتني في حياتي أن قصة اليوم الماضي أعيدت بالتفصيل في اليوم التالي..
الموظف..البحيرة..الغفير ، ربما قد يكون مشهد الباخرة التي رست أمام المنزل هو الجديد.

الصباح والى الادارة القومية للمياه "عدل" ،
-السلام عليكم
- وعليكم السلام (كويس ديل بردو)
- داير المدير
- مدير شنو؟
- المدير زاااااااتو ، مدير البرنامج دا كلو
- عندك مواعيد؟
- ما عندي اي مواعيد وداير المدير هسي (لا ادري لماذا تذكرت شخصية "كبسور" التي قدمت في التلفزيون)
- الموضوع شنو يعني؟
- ياخ عندكم ماسورة و بلغت و ... وبعدين و..... وياخي انعل ابوال ..... و
- خلاص الموضوع دا بنحلو ليك. سجل بلاغك بس

رجعت الى المنزل وانا الهث من الغضب ، لا شئ الا الغضب ، لا احباط ولا تعب ولا غيره. فقط غضب + سباحة

بالمساء توقفت تاتشر (ما تخافوا التاتشرات خشم بيوت) وهبط رهط من الرجال الأشداء يحملون المعاول و
و5 دقائق فقط انتهى الموضوع
ايوي يووي يوووووووووووي
زينب ولدت؟ لأ الماسورة صلحوها

خضت البحيرة مزهواً بنفسي لأني انهيت الكابوس الذي ارعب الحي أخيراً ، ووقفت لاشكر احد رجال التاتشر و
حقنا يااااا
اتسعت عيني باندهاش واذا بي افاجأ بأني تسلقت "حيطة" المنزل وصرخت..
حقنا؟ حقكم كيف يعني؟ تلاااتة يوم الماسورة غرقت الحلة وما دايرين تجو وتقولي حقنا؟؟؟
ياخي انت مش بتاخد ماهية على الكلام دا؟ حقك كيف يعني؟
والله العظيم وعلي بالطلاق ووحاة الله ووأقسم بالله العظيم ما اديك مليم احمر ، داير تكسر الماسورة تاني اكسرها لكن على جثتي كان اديك قرش.

"كبسور" ، يبدو ان الرجل تلبسني بحق.

اسرع الرجال بعد انفصامي المفاجأ الى السيارة واداروا المحرك وانطلقوا ، واذا بي اسمع احدهم يهتف من بعيد..
"حقنا دا ربنا بياخدو منك"
Post: #70
Title: Re: قريـب دا حأخنق لي زول..لا محالة
Author: Abdlaziz Eisa
Date: 07-07-2009, 06:05 PM

يا ود الزين

سلامات


ده ما كسير تلج..

صراحة كدا انت رجل خنّاق..
خنقتني في بوستك ده وما قادر أمشي رغم اني مستعجل

ياخي اسلوبك الظريف ده غيره مش كل مرة نقعد نقرأ ونقرأ والزمن يفوت
بجيك راجع لكن...

تحياتي
Post: #71
Title: Re: قريـب دا حأخنق لي زول..لا محالة
Author: Mashaier Ahmed
Date: 07-08-2009, 01:38 AM
Parent: #70

الأخ الكريم محمد يوسف الزين
بوست جميل ومعبر
بالرغم من المواقف المأساويةإلا انه يدخل البهجة في النفس
فإسلوبك فكاهي وسلس

تقديري
Post: #72
Title: Re: قريـب دا حأخنق لي زول..لا محالة
Author: محمد يوسف الزين
Date: 07-08-2009, 08:12 AM
Parent: #71

مشاعر أحمد (كتبت الاسم صاح؟)

شكراً للتشجيع



------------

عبدالعزيز عيسى
الراجل الطلع تشكيلي صفوي

اعفي لينا ياخ ، وشكراً على الدعم المتواصل

انت شكلك أكبر خناق ، تابت صور "البيض" المنقوش امس النزلتو بيغادي
لمن قربت أفوت مواعيد الغدا
Post: #73
Title: Re: قريـب دا حأخنق لي زول..لا محالة
Author: Abdlaziz Eisa
Date: 07-10-2009, 11:39 AM
Parent: #72

Quote: انت شكلك أكبر خناق ، تابعت صور "البيض" المنقوش امس النزلتو بيغادي
لمن قربت أفوت مواعيد الغدا




الأخ محمد يوسف الزين

سلامات

انا صفوي؟؟

ياخي مصر على الخنق!! ياخي شوف ليك واحد نخبة جد جد وأخنقو!! انا من العامة ومهمش حتى في الغربة..


جميل انك تابعت صور البيض المنقوش في ذلك البوست.. لكنك ما شرفت بوست المعمار حول العالم بزيارة تانية ربما هناك مساهمات ممكن تفوتك الغداء والعشاء كمان..
وهذه واحدة منها:





لك الود يا ودالزين


تحياتي
Post: #74
Title: Re: قريـب دا حأخنق لي زول..لا محالة
Author: محمد يوسف الزين
Date: 07-12-2009, 05:17 PM
Parent: #73

عشان عبدالعزيز عيسى البقى صاحبي (يا بختك يا ابو حميد اصحابك تشكيليين وكدا)

وعشان بوست المعمار بتاعو الماخشيتو وان شاءالله نخشو

وعشان الخنق زاتو كمان - عندي قائمة جديدة
Post: #75
Title: Re: قريـب دا حأخنق لي زول..لا محالة
Author: Abdlaziz Eisa
Date: 07-13-2009, 04:50 PM
Parent: #74

Quote:
وعشان بوست المعمار بتاعو الماخشيتو وان شاءالله نخشو

وعشان الخنق زاتو كمان - عندي قائمة جديدة




العزيز محمد الزين

سلام

انت سجلت حضور في بوست المعمار وبي مساهمة قيمة.. لكن عشمنا في المزيد وكمان تشارك البقية في مداخلاتهم..

بس مسألة الخنق دي أجلها شوية لما بعد الإنتخابات... أقصد بعد الإنقلابات..


"أصحابك يشكوا لك.. وأنت لازم تشكي ليهم..


تحياتي..
Post: #76
Title: Re: قريـب دا حأخنق لي زول..لا محالة
Author: ombadda
Date: 07-13-2009, 05:21 PM
Parent: #75

محمد يوسف
معظم ما ذكرته مررت به بطريقة أو ما..ياخى حكاويك من كبد الحقيقة..

عندنا واحد فى الحلة من ما تصبح يجر كرسيه ويصنقر فى الشارع..عند ذهابى للمستشفى فى الصباح الباكر
لابد أن أمر عليه -منزلهم قرب الشارع الرئيسى. مجرد رؤيته وهو جالس فى كرسيه بشيل هم..(يا دكتور والله عندى
نفاخ مكرهنى العيشة خصوصا لمن أملى الكرش دى)..لاحظو الكلام دة فى الصباح الباكر وأنا ذ اهب للمستشفى..وفى
أحيان كثيرة يتكلم عن إبن أخيه الطبيب (دفعتى فى الكلية) والذى فتح الله عليه فى بلاد المهجر معددا ما قدمه لأهله
من خير..دائما أردد فى سرى(ياخى أنا راضى بالسودان دة وفى السودان راضى أمبدة وما فايتا)..دة النوع البيقفلا معاك
من أول الصباح..وخايف بالجد يوم من الأيام أخنقوا..
قررت أن أغير الشارع.كبرت اللفة..ولكن نفس المشكلة هناك فى الشارع الجديد ست شاى لا هم لها سوى دس أنفها فى كل شىء
تتعمد أن تسلم على بصوت عالى حتى وإن لم ألق عليها التحية (سلام يا دكتور)فليتفت العطالى المتحلقين حولها ليروا هذا الدكتور
..الحل هو سيارة مظلله ..بس المشكلة منين يا حسرة..
عربة الحكومة بسائقها ..لكن لا أستعملها فالمنصرف على العربة يفوق الوصف...


فى المسجد
عند تسوية الصفوف ذلك الذى يعفص كراعك بحجة تسوية الصفوف..ألتفت إليه بحنق وأزيح قدمى منه فما يلبث أن يعفص بشدة..وبحجة
تسوية الصفوف أضاع ركنا وفرضا فى الصلاة ألا وهو الخشوع والطمأنينة..
أخشى أن أخنق هذا الشخص وكمان أثناء الصلاة..
Post: #77
Title: Re: قريـب دا حأخنق لي زول..لا محالة
Author: تبارك شيخ الدين جبريل
Date: 07-13-2009, 06:03 PM
Parent: #76

Quote: "حقنا دا ربنا بياخدو منك"


وجب التنويه ... بأن لوائح المنبر ... تمنع منعاً باتّاً .... التهديد بالقتل (خنقاً)








(تشكيلى صفوى آخر من أصدقاء الباشمهندس المخالف للائحة)



... المهم ....
Post: #78
Title: Re: قريـب دا حأخنق لي زول..لا محالة
Author: Abdlaziz Eisa
Date: 07-14-2009, 09:31 AM
Parent: #77

Quote: وجب التنويه ... بأن لوائح المنبر ... تمنع منعاً باتّاً .... التهديد بالقتل (خنقاً)




العزيز/ تبارك

سلامات

ودالزين ما يقدر يخنقلوا حتة كويز!!

خليه يتنفس شوية هنا وننعم نحن بصحبته..

تحياتي
عبدالعزيز
Post: #80
Title: Re: قريـب دا حأخنق لي زول..لا محالة
Author: محمد يوسف الزين
Date: 07-14-2009, 11:09 AM
Parent: #78

عبدالعزيز يا فردة

ياخي حليت أخوك من رد أبا يجيهو كلو كلو لي تبارك شيخ الدين دا

الزول دا يا ظريف لمن مسيخ يا حكيم لمن ظريف

دا كان ردي والحمدلله المسحتو


تبارك...


انت تشكيلي؟

طالعني برة
Post: #79
Title: Re: قريـب دا حأخنق لي زول..لا محالة
Author: محمد يوسف الزين
Date: 07-14-2009, 11:06 AM
Parent: #76

أووووو
أم بدة بيجاي

صديقي خلف الله ، طلعت دكتور؟

ياخي الدكاترة ديل من المهمشين المساكين وكدا (على الاقل الشباب)

إذاً أنت معنا ياصديقي مع الخناقين

طبعاً عملنا عضوية استثنائية للتشكيلي عبدالعزيز عيسى ،

________________
خنقتك لست الشاي معتبرة ضحكتني ضحك ما عادي
أما زولك البعفصك في المسجد دا ، دا زولي زاااااتو

لووووووووووول

ياخ يديك العافية
Post: #81
Title: Re: قريـب دا حأخنق لي زول..لا محالة
Author: Abdlaziz Eisa
Date: 07-14-2009, 06:17 PM
Parent: #79

Quote: الزول دا يا ظريف لمن مسيخ يا حكيم لمن ظريف



يا ود الزين

سلامات

تبارك ده لما كان برلوم كان ظريف خلاص ويبدو الحتة دي زادت مع العولمة..

Quote: طبعاً عملنا عضوية استثنائية للتشكيلي عبدالعزيز عيسى



طيب لو انا بطلت أشتكي!!!




تحياتي
Post: #82
Title: Re: قريـب دا حأخنق لي زول..لا محالة
Author: محمد يوسف الزين
Date: 07-26-2009, 01:13 PM
Parent: #81

جاري الجديد..
وهو نسخة عن ذلك النموذج..ذلك النموذج العجيب من أبناء بلدي..
لا بد أن يكون "طويلاً" و"نحيلاً" ويلبس نظارات "قعر كباية"..و..
و"وناااااس"..رجل ونّـاس جداً..ويملك الوقت الكافي للـ"الونسة"
في السياسة..بعض الأدب..
عيبه الوحيد..أنه عاطل..!

إذاً لا يغرنك أبداً معرفته الموسوعية بالذات حول الاستثمارات المجدية
ورؤس الأموال والجديد في عالم "البزنزس"..

بجيب أجلك


ربما نعود لقصته التي خنقت فيها نفسي
Post: #83
Title: Re: قريـب دا حأخنق لي زول..لا محالة
Author: محمد يوسف الزين
Date: 07-26-2009, 02:33 PM
Parent: #82

..
Post: #84
Title: Re: قريـب دا حأخنق لي زول..لا محالة
Author: محمد يوسف الزين
Date: 10-03-2010, 07:52 AM
Parent: #83

ثم مرت سنة..
Post: #85
Title: Re: قريـب دا حأخنق لي زول..لا محالة
Author: محمد يوسف الزين
Date: 10-03-2010, 01:09 PM
Parent: #84

Quote: ثم مرت سنة..


ثم مرت سنة وثلاثة أشهر
Post: #86
Title: Re: قريـب دا حأخنق لي زول..لا محالة
Author: خالد العطا
Date: 10-03-2010, 02:44 PM
Parent: #85

محمد

بوست جميل


تحياتي




موظفي ديوان الضرائب + البلدية والمحليات


عليك لو ما فشيت لي مغستي فيهم كان اصلا ناوي تخنق ديل اولى وبالذات ناس الضرايب
Post: #93
Title: Re: قريـب دا حأخنق لي زول..لا محالة
Author: محمد يوسف الزين
Date: 10-20-2010, 10:26 AM
Parent: #86

خالد العطا

صراحة كدا يا عمكـ

ناس الضرايب ديل لا بتنخقو ولا بكضب عليك
Post: #87
Title: Re: قريـب دا حأخنق لي زول..لا محالة
Author: محمد الطيب يوسف
Date: 10-03-2010, 02:54 PM
Parent: #85

ياعمك
قروشي هسع ناو ولا بجي بحنقك !!
Post: #88
Title: Re: قريـب دا حأخنق لي زول..لا محالة
Author: ombadda
Date: 10-03-2010, 09:31 PM
Parent: #87

محمد يوسف زين

سلامات

تسجيل حضور ومتابعة
Post: #90
Title: Re: قريـب دا حأخنق لي زول..لا محالة
Author: محمد يوسف الزين
Date: 10-04-2010, 08:14 AM
Parent: #88

Quote: ombadda


يا دكترة ، ياخي وحاة الله مشتاقين


الموفيز أخبارها شنو؟
Post: #89
Title: Re: قريـب دا حأخنق لي زول..لا محالة
Author: محمد يوسف الزين
Date: 10-04-2010, 08:07 AM
Parent: #87

Quote: محمد الطيب يوسف


يا دكتور
ياخ وين انت في اجتماع عاجل في الفيس بوك بخصوص مشكلة ( The webpage cannot be found )

مطلوب حضورك بالله سريع
Post: #91
Title: Re: قريـب دا حأخنق لي زول..لا محالة
Author: ombadda
Date: 10-10-2010, 06:27 PM
Parent: #89

منتظرين الحكى..
Post: #92
Title: Re: قريـب دا حأخنق لي زول..لا محالة!
Author: محمد يوسف الزين
Date: 10-20-2010, 10:06 AM
Parent: #91

خنقة..
ياراجل يا فاضل

دخلت الى القاعة عبر مدخل المبنى الضخم بعد أن تنحنحت قليلاً أمام افراد "السكيورتي" والذين اعطوني بدورهم بعدها اشارة بسيطة بأن أمـُر..
تقدمت في ثقة الى المصعد في نهاية القاعة الخالية وانا منتشي بصوت وقع حذائي على الأرضية الرخامية وأنا أنظر الى أضواء الثريات المعكوسة عليها ..
قبل أن ينغلق المصعد وأنا اختار الطابق السادس دلف أحد الأشخاص يلبس عمامة بيضاء تسر الناظرين ويحمل في يده حقيبة جلدية سوداء ، لحيته المستديرة يتوزع فيها الشيب بحكمة وكرشه بارزة قليلاً ، ويبدو أنه رش على نفسه حديثاً من العطور النفاذة رش من لا يخاف الفقر، ولمعان خدوده وبياض عينيه المثالي يوضح أنه قد نزل للتو من سيارة فارهة كاملة الفورهة..!

ابتسم الرجل في وجهي ابتسامة وضّائة
- السلام عليكم ، الطابق السادس برضو؟!
- اح اح احو احو أيوة

انفتح باب المصعد على الطابق السادس ونظرت الى اللافتة المكتوب عليها "المدير العام" واتجهت نحوها ، كان الرجل يسبقني بخطوتين الى نفس الباب والذي يجلس بجانبه "سكيورتي" يبرز من جانبه سلاح ضخم.
دخلنا سوية الى المكتب الكبير والذي يجلس عليه شاب أنيق وفتاة يبدو أنها السكرتيرة ، وما أن رآنا الشاب حتى قام ناحيتنا
مرحب مرحب المدير في انتظاركم
قام الشاب وفتح لنا الباب ، ودخلت مع الرجل الى داخل المكتب

"ماشاء الله مدير الشركة دا مجيه روحو تمام ياخي مكتب ولا في الاحلام اكيد حاعمل معاهو بزنزس كويس"

قام رجل من خلف مكتبه يلبس "بدلة" سوداء مع ربطة عنق بلون فاتح وشد على أيدينا ، وفي ما عدا "البدلة" وطوله الفارع فانه يشبه الرجل صاحب العمامة في كل شئ! مثلاً..
اللحية ، الابتسامة ، الشيب ، الكرش ، التحية
و "جزاك الله خيراً"
و "سبحان الله"
وبدأ الحديث..
"صهيب وحذيفة والبراء وأمهم" كيف عاملين؟
ومحمد حسن؟.. راجل فاضل (هنا رددت في نفسي [B"فاضل كم؟" )
وشيخ حسين راجل فاضل (كم؟)
مولانا السنيارتي فاضل (فاضل كم؟)

وعباس؟ عباس دا حرامي
(عباس ليس رجل فاضل وانما حرامي ، جيد!)

وأبوطالب؟! ابوطالب ياخ راجل فاضل
(فاضل كم؟ خلصونا)

****

جلست في الكرسي ورأسي يدور وكل ما فعلته هو أني حاولت أن اجد مكاناً لقدمي وحذائي الذي يعلوه الغبار بعيداً عن نظر الرجلين ، لم أكن أعلم أن حذائي يملؤه الغبار الى هذه الدرجة الى أن جلست هنا في مكتب الطابق السادس!
وقد بدت الصحيفة التي احملها سخيفة مع الموقف فحشرتها بين طيات المقعد الوثير وجلست ابحلق في الرجلين واستمع لحديثهم في انتظار أن ينتهي الرجل لأبدأ موضوعي مع سيادة المدير العام ثم..


- تلاتة مليار دي ما بسيطة؟ ما تصلحها شوية يا ابو صهيب

وبعدها أغمي علي

عندما استيقظت (ويبدو أن الرجلان لم ينتبها لاغمائتي المفاجئة ، تلاتة مليار!

بدون أن أشعر تحسست الجنيهات باقي "الكمساري" والموجودة في جيب قميصي ، يبدو أنها كانت مهترئة فقد انفصلت بين اصابعي ، لا بد أن يقتنع الكمساري في الحافلة القادمة بأن الجنيهات المهترئة "نمرتها" كاملة ولا ضرر إن أخذها وأن...
خرجت من سهوي ورجعت الى المسرح (ماهذا الذي أفكر فيه الآن)..
سريعاً لكي لا يفوتني مشهد..

- مجموع الشيكات الفاتت دي كانت مليار ونص، المرة دي اقبلو بالشيك دا.. الحالة بقت صعبة والله يا ابوالدرداء

"تكرفس" وجهي و"تعفص" (ونبتت لي أذنا الحمار التي اشتهرت بهما كلما تنبت!)
وهتفت في نفسي صعبة؟ "صعبة دي يعني شنو؟"
ياخي انت بليد؟ احتمال في مجتمعات تانية وفي الطوابق السادسة بكون عندها معنى تاني. غير الصعبة بتاعتنا

تشربو شنو؟

كان السؤال من المدير وهو يحمل سماعة الهاتف..
- ولا خلاص عندنا تبلدي خطير هنا

- ياخي راجل فاضل
(احيييييييييي)

- سبحان الله هاهاهاهاهاها
- راجل فاضل شديد والله هاهاهاهاهاها
- جزاك الله خير
- جزاك الله خير

تناول المدير من صاحب العمامة ورقة خضراء مستطيلة وهو يقول..
- جزاك الله خير ، وانما هي نعمة من عند الله ، خلاص عشان خاطر صهيب وحذيفة والبراء وأمهم وعشان الراجل الفاضل ........ قبلناهو
بالمناسبة المعاك دا مش أبو ذر الغفاري السواق بتاعك؟..ازيك يا ابوذر يا ابني؟

تلفتّ أنا حولي ولم اجد أحد ، اذاً الى من يشير سعادة المدير؟

- لا لا ياخ ابو ذر الغفاري السواق بتاعي قام ماليزيا مع مدير العلاقات بتاعي في الشركة حقتي ،
- أمال دا منو؟

جحظت عيوني وأخذت ابحث عن الجريدة فقد تذكرت اني وضعت فيها الأوراق التي من المفترض أن...

تكلم صاحب العمامة وهو يتناول العصير الذي أتى الآن وقال..

-الراجل الفاضل دا ما جا معاي شكلو عندو مصلحة معاك.
"فاضل كم؟"

تكلمت حينها وقلت..
- حقيقة انا جاي بخصوص الكرساقات الكلمتكم بيها في التلفون و..
- -كرساقات؟ (الرجل صاحب البدلة)

نحن ما شغالين كرساقات يا ابني!!..
كدي اتفضل على مصعب بن عمير مدير مكتبي البرا دا واشرح ليهو وبعداك نشوف الحاصل شنو. جزاك الله خيراً


خرجت من المكتب ورأسي يدور فعلاً ، توقفت عند الرجل الذي يحتل المكتب في الخارج وتحدثت معه عن مقابلتي التي جئت من أجلها..

- ياخي انت قاصد شركة "كواوير"؟ ، ديل في الطابق الثالث ، ونحن في السادس.
!!!!!!!!!!!!!!!
طيب معليش ، ما عا ليــ أأأأأأه ايش
خرجت من المكتب والذي لم اشرب فيه "التبلدي"أبداً! وقفلت الباب من الخارج و"السكيورتي" ينظر الي من اعلى الى اسفل وأنا اسمع من بعيد..
مية وخـمسين مليار رايك شنو؟
Post: #94
Title: Re: قريـب دا حأخنق لي زول..لا محالة
Author: محمد يوسف الزين
Date: 10-20-2010, 10:39 AM
Parent: #89

اقتراحات؟!
Post: #95
Title: Re: قريـب دا حأخنق لي زول..لا محالة
Author: صلاح أبودية
Date: 10-20-2010, 11:11 AM
Parent: #94

ود الزين
لك التحية والإحترام
وحقيقة أنا أول مرة أشوف البوست ده الليلة ولازم أقول ليك حاجة ..
هذا البوست هو أجمل ماقرأت فى هذا المنبر !
ياخ إنت كنت وين وما بتكتب ليه ؟
Quote: اقتراحات؟!

أكتب يا زول أكتب ..
إنت مشروع كاتب كبير ، ما تستهون بى نفسك
وما فى زول يغشك بى كلام غير كده
لو فضيت نفسك للكتابة ستقارغ الكبار
Post: #96
Title: Re: قريـب دا حأخنق لي زول..لا محالة
Author: محمد يوسف الزين
Date: 10-20-2010, 11:19 AM
Parent: #95

Quote: أكتب يا زول أكتب ..


اتخيل يا ابو صلاح دي النجيضة الكنت مستنيها من سؤالي

جني والله وجن البوست لمن يترهل ويفقد قيمتو

شكراً على الاطراء الذي لا نستحق
Post: #97
Title: Re: قريـب دا حأخنق لي زول..لا محالة
Author: محمد يوسف الزين
Date: 10-20-2010, 12:49 PM
Parent: #96
Post: #98
Title: Re: قريـب دا حأخنق لي زول..لا محالة
Author: محمد عبد الماجد الصايم
Date: 10-20-2010, 12:56 PM
Parent: #97

أخنق البورض دا كلو يا زول!!
Post: #99
Title: Re: قريـب دا حأخنق لي زول..لا محالة
Author: محمد يوسف الزين
Date: 10-20-2010, 03:42 PM
Parent: #98

Quote: أخنق البورض دا كلو يا زول!!

والله يا حبيب بورديكم دا حالتو بقت شلش!

افلاس ما طبيعي

شكلنا حنخش الكهف ونجيكم السنة الجاية كان ربنا حيانا
Post: #100
Title: Re: قريـب دا حأخنق لي زول..لا محالة
Author: عرفة محمد سعيد
Date: 10-21-2010, 08:48 AM
Parent: #99

Quote: أخنق البورض دا كلو يا زول!!


كدي قبال ما تخنقو البورض كله دقيقة اولا التحية للزول الكتْاب جدا

محمد يوسف الزين

القومه ليك وانت تحرك شحنات من ثورات كامنة ورغبات ملغومة في خنق من يستحق الخنق وعلى راسهم


ام حمودي


وما ادراك ما حمودي

لا ادري أية كآبة غامضة تحركها في نفسي جملة معليش والله تعبناكم معانا حمودي متشبك قال إلا لازم نجيبو ليكم...

حمودي الولد الوحيد القادم بعد انتظار ثمانية سنوات تبالغ امه في الاحتفاء به فهو في عينها اجمل غزال عمره خمسة سنوات

حمودي يااخوانا تسونامي مباغت لاتجد اجهزة الارصاد فرصة للتنبؤ به

يبدأ هذا التسونامي افعاله مجرد فتح الباب واثناء ادعائي الترحيب بامه يكون حمودي قد قطع نصف الشوط الاول من مباراه التدمير الشاملة

وتبدأ تنبؤاتي تواسيني مسبقا على مصير الضروريات والكماليات من اثاث البيت

ويبدو علي الارتباك

وتبدو على ام حمودي البلاهة وهي ترحب بنفسها وتسرع الخطى نحو الداخل بينما اقف انا عند الباب على امل ان يكون الطارق كابوس آخر غير حمودي وامه

يأتيني صوتها غبياً

اسئلة متلاحقة :

شفتي الليله الحر ده كيف؟

ماشاء الله وشك ناااير

عاملة فيهو شنو؟

حُلبة؟

غايتو الحلبة دي سرها باتع خلاص

الشئ الوحيد الذي لم اكن اتنبأ به او اتوقع عواقبه علي ان يفرغ حمودي محتويات حقيبة يدي على الارض ويلقي ببطاقة الصراف في غياهب فرن البوتجاز
بينما انا اتصنع الاصغاء باهتمام لاسرار الحلبة الباتعة

يضج البيت باصوات متباينة

تسعفني كذبة بنفسجية ادعي ان بيتنا مكهرب حتى تهرب بوحيدها عني

اقاطع تسلسل فوائد الحلبة:

دقيقة كدي اشوف حمودي لانه عندنا اسلاك مكشوفة يقوم يتكهرب ولا حاجة

ترد علي ببلاهة ما بجيهو شي اقعدي

يكسيني ردها استياء لا حد له واذهب لارى ما يفعل حمودي

استبسل في تخليص الثلاجة من براثن حمودي بعد ان قام بخلط حابل الادوية بنابل غداء بكرة وبعده

ويستمر حمودي في محاولة تطبيق نظريته الدمار من اجل الدمار

وام حمودي تلك البلهاء لا تحرك ساكناً!!!!

يعني بالله عليكم زي حالة ام حمودي دي

ما حالة تستحق الخنق؟».
Post: #101
Title: Re: قريـب دا حأخنق لي زول..لا محالة
Author: محمد يوسف الزين
Date: 10-25-2010, 04:15 PM
Parent: #100

Quote: عرفة محمد سعيد


Quote:
ويستمر حمودي في محاولة تطبيق نظريته الدمار من اجل الدمار

وام حمودي تلك البلهاء لا تحرك ساكناً!!!!





ياخي حمودي وأمو ديل ، اكتر ناس بستاهلو الخنق!

اتخيلي حمودي الضيف زولك دا زااااااتو قبل كدا جا بيتنا وشال موبايلي ورماهو في جك العصير!
ونحن أنا ومرتي شغالين اهئ واهئ ، وقعدنا نضحك! اتخيلي؟ موبايلي اصبح خردة بفضل حمودي ابو تلاتة سنين ونحن بنضحك!
أول مرة اشوف الضحكة والعرق الفي الرقبة الاتنين عندي!
وأم حمودي ولاااااااا كأنه!!!

الغريب في الموضوع انو مرتي ما زعلت بالجد وبان عليها الا لمن حمودي كسر الفاظة البـ30 جنيه ، وما زعلت قدرها في موبايلي أبو 400 جنيه!

ياخي في السودان دا لو الزول عمل "هومر سيمبسون" ردود الفعل حتكون كيف؟!


_________________
حبابك عرفة والله
وخليك معانا لمن ننتهي من كل القائمة
وشكراً على الضحكة الحلوة وقصة حمودي وامو
(انتي غايظك اكتر حمودي ولا أمو)؟
Post: #102
Title: Re: قريـب دا حأخنق لي زول..لا محالة
Author: محمد يوسف الزين
Date: 10-25-2010, 04:30 PM
Parent: #101
Post: #103
Title: Re: قريـب دا حأخنق لي زول..لا محالة
Author: محمد يوسف الزين
Date: 10-25-2010, 10:16 PM
Parent: #102

خنقة قديمة أيضاً.. وهي موقف حقيقي كحال كل المواقف التي حكيتها في هذا البوست



"الاصـــلي" يا ولدنا..

قبل يومين وبعد اسبوع كامل من وعد رأسي الوجيه بحلاقة تبرز وسامتي الضائعة! بعد أن استحالت محاولات التهذيب و"التسريح" الى محاولات شبه مستحيلة ،
أخيراً دخلت لمحل حلاقة بالقرب من مكان العمل ألاحظه لاول مرة ، جلست على الكرسي وأنا انظر للمرآة الكبيرة ببلاهة وبعيون فعل فيها يوم من التحديق في شاشة الكمبيوتر مافعل..غير مصدق بانتهاء دوامة "الليلة ، بكرة ، الليلة ، بكرة"..
جائني الأخ الحلاق هاشاَ باشـــاً وهو رجل في الثلاثينات تقريباً..بالكاد يرتفع كتفيه من مستوى رأسي وأنا في وضعية الجلوس أمامه.. يتحدث بلهجة سودانية فصيحة رغم سحنته الارترية التي لا تخطئها عين ، ولاثبات جدارته بالمهمة قام ببضع حركات أعتقد انها تهدف لترك انطباع بأنه حلاق خبير لا يشق له غبار.
أمسك الأخ ماكينة الحلاقة وبدأ البداية الخالدة.. "أزززززز" و "إزززززز" ، وأنا انظر يمنة ويسرة لاتأكد من الوضع "الوجيهي" لرأسي ، والموسيقى المنسابة التي خالطت صوت "مكيف الموية" ، وبدأت بالسرحان حيث المرتب الذي دنى يومه وحيث الـ.. ، ..فجأة توقف الأخ ورائي وهو ينظر لأعلى رأسي في رعب ، تحولت نظرة الرعب الى وجهي وانا انتفض من الكرسي واصرخ في الأخ من خلال انعكاس صورته على المرآة.. "يا أخينا مالك؟"
رد قائلاً "مافي حاجة"..
انتابتني رغبة في خنق الرجل بحق وانا انظر اليه وهو يحدق في اعلى راسي بتلك النظرة!. "مالك يا أخينا انت؟ وقفت الحلاقة مالك في شنو؟!!" ،
"مافي حاجة بس انت عارف شعرك دا بدا يتساقط وشكلو فيهو قشور"!
اتساقط!
، تهالكت على المقعد وأنا بين خنق الرجل وبين أن انفجر ضاحكاً لغرابة الموقف،
"يا اخوي شنو يعني بدا يتساقط شعري يا هدا كويس بعدين قول اتساقط ولا وقع وشي وراسي كلو ، خليك في حلاقتك" ، فما كان من الرجل الا ان تحول وجهه المبحلق الى ابتسامة غريبة!!! ، وقال:
"شعرك دا لازم تلحقو بمستحضر الجميك"
"شنو؟ (الجميك)؟!!!" "دا شنو الجميك دا يا معلم؟ بعدين (جميك بالكا)؟" ،
؟؟؟؟؟؟؟؟؟؟؟؟؟؟؟؟؟؟؟؟
فجأة ترك المقص والماكينة وابتسم واثقاً من نفسه وقال: "والاصلي يا ولدنا"
ثم استدرك "ولازم تشتريهو الليلة قبل بكرة" ، لم أدري بماذا أرد على الرجل وهو ينتظر اجابتي وزاد من توتري توقف الحلاقة وابتسامة الرجل الغريبة ، هممت أن انهي الموضوع واطالبه أن يستكمل عمله وينسى حكاية المستحضر الذي سأموت من دونه ، وبدلاً عن ذلك بادرته بالسؤال "قلت لي الجميك دا شنو؟" ، وكأنه ينتظر السؤال ليلقي محاضرة عن مستحضر "الجميك" وفوائده العظيمة ومستحضر الجميك الذي ليس له في العالم من مثيل و ..و... "أوكي" (العبارة الاخيرة مني والتالية ايضاً) .."بلقوهو وين البتاع دا؟" ،
زاد الرجل من ابتسامته وقال "لو عاوزو هسي عندي. ااا قصدي عند واحد اخونا بيجاي..بس ب40 ألف " ، دار رأسي مع سماعي للمبلغ المهول (بالقديم طبعاً) خاصة وأن الدنيا آخر شهر! ، ولم يتركني الرجل في الاسترسال بافكاري عندما قال "وحق الحلاقة خليهو يوم تاني" و "كان ما نفع رجعو لي" و "دا آخر واحد" و "وشعرك دا لازم تلحقو" و"الاصلي يا ولدنا" و..أدخلت يدي في جيبي واخرجت ما بقي معي من مال وهو عبارة عن مبلغ 50 جنيه اعطيت الرجل ال40 بيد وبيدي الأخرى كنت أتحسس أذنا الحمار التي نبتت لي.
أسرع الرجل وخرج من المحل واحضر معه قارورة شبيهة بـ"فتيل الدوا" ليست بها ديباجة ، ثم سكب القليل من السائل الاخضر في يده وقام بدهن شعري وبدون توقف أيضاً عن المديح طيلة العملية. فاحت رائحة عجيبة واصابتني بالغثيان. (أووووع) "ريحتو كدة ليه؟" وكانت الاجابة بالطبع "الأصلي يا ولدنا". انتهت الحلاقة و"نعيماً" معها بعض الالفاظ الجميكية!.
خرجت من المحل وأنا لم استوعب شيئاً بعد..ركبت المواصلات و"الفتيل" القيم في يدي بالطبع وأنا أخرج رأسي من نافذة الحافلة حتى لا يُكتشف مصدر الرائحة.


ما يستفاد من القصة:
-نصائح لابد العمل بها:

- لا تدخل محل حلاقة لا تعرفه.
- لا تحمل ما تبقى من المرتب في جيبك.
- لو اصبح شعر رأسك شديد الخشونة وكل شعرة على حدة فاحسن الظن.
- لو كان الجميك مكون من زيت الحنظل وخليط المصران وبصاق السحالي فهو الاصلي يا ولدنا.
- لا تترك "فتيل" يشبه فتيل "الجلسرين" في الحمام فجدتك الكبيرة في السن لا تعرف الفرق.
- ماذا يمكن أن يفرغ في البالوعة أفضل من مستحضر غالي الثمن؟!.
- تريث في الانتقام يجب أن تدرس نقاط ضعف الخصم.
- اذا حدث وأن حكيت القصة لاخرين فلا تذكر اسم المستحضر الأصلي ، فجزء من الانتقام أن يدقس غيرك
Post: #104
Title: Re: قريـب دا حأخنق لي زول..لا محالة
Author: محمد يوسف الزين
Date: 10-26-2010, 06:47 PM
Parent: #103

..
Post: #105
Title: Re: قريـب دا حأخنق لي زول..لا محالة
Author: محمد يوسف الزين
Date: 11-02-2010, 08:07 AM
Parent: #104

Back
Post: #106
Title: Re: قريـب دا حأخنق لي زول..لا محالة
Author: محمد يوسف الزين
Date: 11-08-2010, 01:25 PM
Parent: #105

مناضل دارفوري يجلس خلف لابتوبه ويكتب عن استيلاء حركة العدل والمساواة لاحدى المدن السودانية ،
يدوس المناضل على آيكون (اضف الموضوع) ، ثم...