أحمد البنا..... أسم البنا أسم كبييييير أرعي بي قيدك

تحية طيبة

الاخ طارق ميرغني ، اتفضل ده اللقيتو فى الشبكة العنكبوتيه

ده تعليق ( الجقر)

Quote: والد الفنان أحمد البنا: لتختار عائلة البنا الاسم الذي يرونه مناسباً لابني مثل كوهين أو ابن قريضة على خلفية رفض الفنان عاصم البنا لأن يحمل الفنان الشاب أحمد البنا لقب العائلة، رد والد أحمد الفنان محمد حسن الشهير بالجقر، مؤكداً شكره وحمده لله على لقب الجقر والافتخار بحمله بين الناس لمعرفة كل الناس بالسودان لهذا الاسم من الغفير وحتى الرئيس. وأوضح الجقر أن أمنيته لو كان عاصم البنا يجيد الكلام مثل ما يجيد الغناء وتأسف على الزج باسمه في الصراع داخل عائلة البنا لأن أحمد منهم وفيهم لحمهم ودمهم والواحد مافاضي للمهاترات ولكن عاصم أثبت أنه مغنواتي وليس فنان لأن الفنان ينأى بنفسه عن صغائر الأمور. وأكد الجقر أن ابنه أحمد يربطه الاسم فقط بالعائلة ولم يغني أي أغنية لعائلة البنا وليختارو هم لأحمد الاسم الذي يرونه مناسباً مثل كوهين أو ابن قريضةّ!! source 1

ده تعليق ( عاصم البنا )

Quote: عاصم البنا يصالح أحمد ووالده .. والجقر يقول بقت صافية لبن قام الفنان عاصم البنا بطي صفحة الخلاف الأخير الذي حدث بينه والفنان أحمد البنا ووالده الذي أثير على صفحات الصحف مؤخراً. وسارع عاصم بتقديم اعتذار للفنان محمد حسن الشهير بالجقر وابنه أحمد عما بدر منه من اساءة غير مقصودة مؤكداً أن ما حدث بينهما من خلاف عبارة عن لحظة شيطان فقط ولن تتكرر مرة ثانية. وكشف الفنان محمد حسن في حديثه لصحيفة فنون زوال المشكلة واسباب الخلاف بينهم في العائلة إلى غير رجعة لأن الذي يجمعهم أكبر بكثير من هذه الأمور وختم حديثه بقول : بقت صافية لبن. source 2

و ده تصريح حديث من ( احمد البنا )

Quote: أحمد البنا : نلبس سلاسل ولا ما نلبس شئ يخصنا وانتو عليكم بغنانا !!..فهموني غلط لما قلت لا أعرف الكاشف وصف الفنان الشاب أحمد البنا الهجوم الذي شن عليه بسبب تصريحه في قناة هارموني بعدم معرفته بالفنان الراحل ابراهيم الكاشف بالظالم وغير المبرر .. وأوضح أحمد في حديث لصحيفة فنون عدم فهم الناس القصد من قوله بصورة كاملة وهو عدم معرفته في مرحلة الطفولة بالفنان الراحل ابراهيم الكاشف وسماع اغنياته لأول مرة بصوت جمال فرفور، مضيفاً معرفته فيما بعد بالكاشف ولكل الرواد بعد أن كبر في العمر. وأكد أن لبسهم كفنانين شباب شئ شخصي (يلبسو سلاسل ولا ما يلبسو شئ يخصهم وعلى الناس بالغناء المقدم لهم فقط) وكشف عن رضاه التام للمشاركة في سهرة ذوق جيل بقناة هارموني واقتناعه بما قدمه من اغنيات غير هابطة وهي من الحانه وكلمات مهدي مصطفى وهما: واجهني بتحداك - خليتك لله. وتمنى أحمد اعطاء الفرصة الكافية للفنانين الشباب للوقوف على أرجلهم بدلا من محاربتهم وهم لازالوا في بداية الطريق source 3

نماذج لـ بعض اعمال احمد البنا

الأخ محمد الأمين
تحية ورمضان كريم
شكراً لرفدك البوست بمواضيع ذات صلة
لكن والله العظيم لم أسمع بأي خلاف الا من هذا البوست
والذي دعاني لكتابة البوست حلقة رأيتها الأسبوع الماضي بقناة هارموني وأخري مساء أمس
وبصراحة الولد ماعجبني خالص
ولم أزعل من الفنانين المعاهو في الحلقة سوى قرقوري ولا نزار المهندس ....الخ
لأن دي طريقتكم كده وكل فولة وليها كيال
لكن أن يأتي فنان من عائلة البنا بهذا المظهر والجوهر ، فهذا ما حّز في نفسي
عائلة البنا من الشيخ عمر البنا لادريس البنا للفرجوني للأمين لمبارك لسعد لعاصم وحتي نادية كلهم احترام للفن وللمتلقين
خاطبوا وجدان الشعب السوداني فأحببناهم
وصار اسم البنا مرادفاً للفرح و الابداع و كل جميل
لذلك كان استنكاري لهذا المسخ الفني
فان كان يريد أن يكون كما هو الآن فليترك اسم البنا ويعود لاسمه أحمد الجقر. قال تعالى (ادعوهم لآبائهم هو أقسط عند الله)صدق الله العظيم
والله فرحت بموقف عاصم الفنان الملتزم
ولكن أسفت لأعتذاره وكان يجب أن يقف موقف أصلب
ففي أسم البنا لا يجب أن يجامل أبداً

إذا الجقر مبسوط من هذه الأغاني
أنا أقترح يغيروا لأحمد إسمه الفني ليكون
أحمد الجقر بدلا عن أحمد البنا، حتى تظل صورة أولاد البنا
الفنانين (الفرجوني والجقر والأمين وعاصم) ناصعة في أذهاننا.
شكرا للأخ محمد الأمين على المعلومات والأغاني

مالنا كل ما لينا نحن بنو السودان ماشين مرخرخين
الني لي النار
إنكرب يا جنى وشد حيلك
أنجّض
أخوك يا فاطمة
هيييييع
كلها أحرف كلمات إنمحت من قاموسنا
فأصابنا ما أصابنا
الوليد بقى مو أخو البنيات بقى تالتن

حليل الولد القال
أنا رحل الكحل وكتين إميل
أنا المرض البخلي العين تسيّل
أنا الدابي إن رصد لي الزول يعيقو
أنا المأمون علي بنات فريقو

وين القال ليهم
يا متحاشكين حشكي البيوت خلو
يا ضايقين حلوها مرها ضوقو

ووين طه الضرير يوم قال

ولداً يطبق المسرة فوق المسرة
يخلف ساقو فوق ضهر اب قمائر ويسرى
خلف قربينو في جرباتو ختّا أب كسرة
فرقاً شتّى من ناس يما زيدي الكسرة

وقال أخر
عريسك انتي شبهو برا
وعريسك يشبه القمرا
يخالطك في التوليت
وفي الخمرة
وحت عند حقرة الدخان
يقولك يا اختي زحي كدي

وزي ما قلنا الني لي النار
والله انكسارة الراجل تب ما حايلا
الراجل خايلا فوق المقدرة وخايلا فوق الهيبة وخايلا فوق الضكرة والقدامية

وهووي يا وليد
يا دلوعة يا مرنوعة
أعدل إيدك المفدوعة
وإتلحلح
واقيف دوغري
وهات صدرك معا صدري

اول مرة اشوف فيديو للمدعو أحمد البنا

نقولها بأعلى صوت

من هذه المياعة
ياولدي أولى رجوعك

عود العود أحمد لسيرة أهلك أهلك رجال أهل درق وسيف
عود ترعرع في بطانة اهلك تكسيك هيبة وشكرة
عود وشد حيلك الشادي حيلو بجبر وبرقع

Quote: الوليد بقى مو أخو البنيات بقى تالتن

وفي الدِلكه
والدُخان
مِخالتِن

Quote: إذا الجقر مبسوط من هذه الأغاني أنا أقترح يغيروا لأحمد إسمه الفني ليكون أحمد الجقر بدلا عن أحمد البنا، حتى تظل صورة أولاد البنا الفنانين (الفرجوني والجقر والأمين وعاصم) ناصعة في أذهاننا. شكرا للأخ محمد الأمين على المعلومات والأغاني

والله كلامك 100% ياخى بى سلاسلو وختمه حيخرب سمعة عائلة البنا

يبدو ان الغناء لما يغلب الواحد

يبدا ويقول ناس الخرطوم ولا بحري ما بيعرفوا غنا

او انه لم يسمع بالكاشف

وانا في رايي ان من لم يسمع الكاشف او لم يسمع به

ليس جديرا ان يغني ولا ان نستمع له ولو كان زرياب

ولا اظن ان الكاشف او اسرته يتشرفون بان يعرفه هذا المسخ المشوه

وعاصم البنا له الف حق فيما قال

وهو بكل صراحه نوارة ال البنا

أحمد البنا لا يمثل آل البنا فهؤلاء تربية خلا عرفوا البطانة وخبروا دروبها والجقر نجار وبابو مخلع ...ربنا يعدل حال الفن والأدب والشعر وأذواق الناس ..شكراً يا قرضابي بوست في التنك

.

على الطلاق لا اعتذرته ولن اعتذر لكن عشان تعرفو لمن يقولو ليكم كلام جرايد تصدقو تاني

وليست لى اي تحفظات او ملاحظات لان الماده غائبة اصلا ... تتصور قصة اعتذارى دى قريتها كم مره وطنشتها لكن فى صفحتكم دى بالذات جمع بزة مشيت وجيتها راجع متلاعن ليس الا وما اخطا طوابع...

طالبت بسحب الاسم هاجموني سكت لا لاني اهوي السكوت بل لان خير من اجابته السكوت ولعلى اثق في فطنة المستمع وخاصة بعدما يصبح مشاهدا ...
البنا ليس مدينة او محطة او لقب البنا قبيلة لها ارثها وتاريخها الممدود على عاتق الزمن ناصع وحافل بما فيه من عطاء اجيال واجيال واذا كان احمد الجقر مدعاة اللشتيمة والاشمئزاز لهذا الاسم فمن الافضل ان يسمى نفسه احمد الخور ولا فرقعت هو حر ولكني اكرر رائ وبوضوح لم ولن اعتذر لاي على اي كلمة طالما كنت علي حق ... والدليل هذا البوست ... كان من الاولي ان يكون عن سيرة او مسيرة اي من اباء او ابناء او احفاد البنا.. فحبذا لو اطلقتم عليه احمد الجقر حتي لاتنهال الاساءة على البنا المسكين بلا سبب يتحمل السبب بضم السين

لكم حياتي

Quote: كان من الاولي ان يكون عن سيرة او مسيرة اي من اباء او ابناء او احفاد البنا.. فحبذا لو اطلقتم عليه احمد الجقر حتي لاتنهال الاساءة على البنا المسكين بلا سبب يتحمل السبب بضم السين

Quote: على الطلاق لا اعتذرته ولن اعتذر

كلام صح بعتزروا لا منوا يخى دا فنان ولا بعرف الفن قال احمد؟

اسرة البنا اسرة عريقة يجى واحد زى دا داير يبشتنا

مشكور القرضابى .. بوست موفق

Quote: البنا ليس مدينة او محطة او لقب البنا قبيلة لها ارثها وتاريخها الممدود على عاتق الزمن ناصع وحافل بما فيه من عطاء اجيال واجيال واذا كان احمد الجقر مدعاة اللشتيمة والاشمئزاز لهذا الاسم فمن الافضل ان يسمى نفسه احمد الخور ولا فرقعت هو حر ولكني اكرر رائ وبوضوح لم ولن اعتذر لاي على اي كلمة طالما كنت علي حق ... والدليل هذا البوست ... كان من الاولي ان يكون عن سيرة او

يا عاصم شيلو منو الاسم دا سريع...قبال ما يرتبط في اذهان
ناس الزمن دا...ويجي زمن يلخبطوا بين احمد البنا واحمد
الفرجوني...وانا وغيري نعلم الفرق الغير قابل للقياس
اصلا بين الاتنين...فاذا كان احمد الجقر مفتكر فرفور الكاشف
معجبينو"واكيد بكون ليه معجبين في الزمن الكعب دا"

حا يكونوا مفتكرينو...البنا...الببني طوبة حب...ويرمي مونة
محنة...وتانين مفتكرينو اخوك...وآخرين قرأوا عن جده في
كتب المدارس...(الحرب صبر)...شيلو الاسم دا سريع....
لأنو أحمد الجقر لا يشبه أحمد البنا...وحا يشوه عليكم
الاسم العائلي في اذهان الناس...

يشهد الله انا من ما قريت اسمو وسمعتو...عرفتو ملصق البنا دي
بي صمغ ساكت...

اكتبوا تعميم لكل الصحف والتلفزيونات دي تسميه احمد الجقر...
وابوه راجل فنان وموسوعه...حقوا يعتز بيه بدل ما يلصق ليه
بنا بي صمغ...

بعد مداخلة الأخ عاصم تمنيت لو كان عنوان البوست:

أحمد الجقر.....اسم البنااسم كبيييير أرعى بي قيدك

يا جماعة كدى بعد اذنكم سؤالين

لكن قبل السؤال النقول ليكم الولد أحمد ما بعرف يغنى و ما عندو مؤهلات صوت تخليه يندرع فى الشغلانة دى
اللهم انه ود لا يخلو من مياعه و الغناء لا تجلبه المياعه ... و اٍن كانت لا تمنعه.

السؤال: هل الجقر ابو الولد ده من عيال البنا يعنى هل ابوه اخوا ناس عصام ديل ولا الزول ده متلبط ساكت؟

الأخ أبوبكر
أحمد الجقر ينتسب لآل البنا من ناحية الأم
الجقر الكبير تشرف بنسب آل البنا
والجقر الصغير ما عاجبو لقب الأبو
بالاضافة لأسم البنا يعتبر جواز مرور لقلوب الشعب السوداني
لذلك اختار أن يكون أحمد البنا
والله لو كان قدر الاسم ما كان حايكون عندنا أي أعتراض على أن يختار اسم أهل أمو
فهم بحق يشرفو
ولكن البنا وسلاسل وختم و غنا هابط؟؟؟
والله ما راكبة تب

لا بنا لا جقر الزول ده ما بنفع يغني .

بركة الوقعت ليكم وانا واثق من وعيكم دائما ... والله ثلاثا انا واحد من الناس لم اذكر اسمه من قريب او بعيد والغائب عليكم ان الموضوع بدايته انه فى جريدة الدار فى لحظة تجلى نشر احمد الجقر انه غير مقتنع بى عاصم البنا ولولا برامج اغاني واغاني لم يجد كل هذه الشهرة والقبول وانهن يقدم لى نصائح فى البت وانه يسمعها من هنا ويخرجها من هنا ... ناسيا هذا الاهطل باني قبل برنامج اغاني واغاني مثلت السودان فى جيبوتي فى مهرجان القرن الافريقى وشرفنا بالمركز الاول بحضور سفير الايقاد وسفير السودان بجيبوتي . فالشهرة من احمد الجقر اخير منها مشوار احمد شرفي والاغرب الوالد الجقر تابع ابنه وانهال على بالشتم بالجرايد بدلا من تقويم ابنة والان هو يتودد للاعتذار ولكن كل اناء بما فيه ينضح ..

قريبا سنصدر بالصحف اليومية مقالا مشترك من ابناء واحفاد البنا لتوضيح مسالة الاسم دى للجميع واتنبيه الاجهزة الاعلامية رسميا بمراعاة حقوقنا كاسرة .. واذا اراد احمد ان يردف اسم البنا للشهرة فاليكن على قدر المسؤوالية ولن يجد من يعارضه حتى لو كان مابعرف لان التقييم عند المتلقي ولكن هناك ملا يضينا هنا لنا وقفة .. تاخرت بسبب تصورنا بان الامر سوف ينتهى منه وله ولكنه استشرى ودخل الاعلام والغريبة الاعلام ارخص من كده مافي . والله نحن يومي بنتشتم بى سببه طوال رمضان الغنا يطير ويسلم البنا الخلانا لينا مكانة فى المجتمع سمحةوخط طريق البطلع منو ما من البنا وربنا يسهل بالمناسبة ابحث فى قوقل تجد اكتر من احمد البنا هناك اخرين ايضا يسمون بالبنا التكية ده .

ابناء الشيخ عبدالله البنا المغنين / الفرجوني , والامين , وسعد , ومبارك
واحفاد عبدالله البنا / حاتم ,وعاصم ,وكان امين محمد عبدالله البنا رحمة الله علية
والشاعر يوسف عبدالله البنا شاعر البادية , والعقيد سيف الدوالة عبدالله البنا له اسهامات بسيطة وهو متخفي .
احمد الجقر والدتو بت الشيخ عبدالله البنا يعني ابن عمتي ا

وغير ذلك الا البنا يكون استنسخ
والسلام [/B

ولايهمكم

الأخ عاصم بصوتك السمح ده وغناك المقعد ده عليك الله خليك من الجقر والفار ديل

علي الطلاق أنت والفرجوني تتطربوا بلد

بس لو ما غنيت للمؤتمر الوطني في الحملة الأنتخابية كان ما تخلص

لكن الله غالب

أول مرة أسمع بالزول الإسمو الجقر دا غايتو كلامو دا بدل على مستوي فهمو:

Quote: وأكد أن لبسهم كفنانين شباب شئ شخصي (يلبسو سلاسل ولا ما يلبسو شئ يخصهم وعلى الناس بالغناء المقدم لهم فقط)

بالله دا كلام بتاع زول عامل فيها فنان ..؟
تلبس سلسل تلبس خاتم تلبس من غير هدوم فعلا دا شىء شخصي بعود ليك انت .. بس لو كان في بيتك
لكن ليس في التلفزيون يا اللخو .

.

يعني المشكلة في الاسم ولا في الغنا والاداء ؟!!

اول مرة اعرف الاسم ممكن يبقى حكر ..يعني هو مايحق ليهو يتسمى بإسم جده او اسم امه ؟!!! ..الواحد يوم القيامه ينادوه بإسم امه ...واحمد البنا مهما كان راى الاخوان فيه وفي غناءه وتصرفاته فذلك لا يمس مكانة البنا سيد الاسم والتاريخ الذي يحترم ...

الأخ القرضابي
تحياتي

معليش محتاجين شوية تفصيل شوية..
وياريت الأخ عاصم كمان يتبرع ويساهم في شرح الصورة شوية..

اسم البنا كبير وغير مُختلف عليه دي مافيها أدنى شك.
انحدر من هذه الاسرة عمالقة ايضاً مافي شك.

الشئ الغير مفهوم هنا .. هو سر الغضبة والإمتعاض تجاه المغني احمد البنا(الجقر)!!
هل هذا نابع من طريقة الغناء والأداء؟
أم حديثة عن جهله بالعملاق الكاشف؟
ام ان اﻷمر مربوط بلبس السلسل والخاتم وما الى ذلك!!!!؟
لأن عدم التوضيح من بداية البوست جعلت كل متداخل يتداخل من مفهوم مختلف عن اﻵخر

---------
ملاحظة هذه هي المرة الأولى التي أتعرف فيها على المغني احمد البنا (الجقر)
هذا وتقبل احترامي

ياعاصم بدلا عن هذا اتمني ان تتبنى هذا الشاب ..اعتقد انه يملك صوتا جميلا
وينقصه التوجيه فقط لغناء كلمات جميلة والتزام بمظهر يحفظ اسم عائلتكم.

انا ما سمعتا الزول دا

لكن الجقر ذاتو
كرهنا الغناء والفضائيات
منتشر ويستضاف بشكل مكثف

مرة يتكلم عن الحقيبة وكرومة وسرور
مرة يستضاف يتكلم عن الابل وخصائصها البيولوجية زى اخطر عالم حيوان
ومرة يتكلم عن الرياضة والجمباز

غايتو تلفزيون جمهورية السودان الامدرمانى

الأخ الفاضل
عاصم البنا
لك كل التحايا النواضر وانت تمتلك قلوب الناس بأخلاقك السمحة وصوتك الطروب وأناقتك البهية
اتمنى الا يجرفك القضب للبوح بمفردات قد تحسب عليك لاحقا
وهذا لا يعني أن تحيد عن قناعاتك الشخصية
مودتي

إسم البنا كبيير مافي شك ..


لكن الهجوم قاسي شديد وفيهو ريحة قبلية ..لو كان الشاب ده من آل البنا أبا عن جد وما موهوب كان حيتقال ليهو الكلام ده كلو ؟!ولا كان الناس جاملوهو ..




ـــــــــــــــــــــــــــ

مع العلم لا سمعتو ولا شفتو إلا في البوست ده



القرضابي

كيفنك