الشارع واقفِ ومتمحِّن !
شاذلى جعفر شقَّاق
أشَّرتِ يمين
خشِّيتى شمـــال
جَهْجَهْتى اتنين
والتالت شال
منِّك شبَّال
شبَّالاً زين
والناس هايمين
واحدين عايشين
واحدين دايشين
واحدين شاربين
العزَّة زلال
والشارع واقف
ومتمحِّن
الشارع واقف
عاد لامْتين ؟!
المشدوهين
بى لُقمة عيش
والمدهوسين
تحت الكرعين
بلْحيل ضايقين
والفوق فايقين
فاتلين المهَلَة حبال
أنا من ياتُن ؟
يا قَعدة بُنْ
هبَّابة وقَنْقَرْ
وقلاَّية
راكوبة حنينة
ولولاية
تبروقة وسبحة
ومصلاية
والضُل ونَّاس
والناس رايقين
والروقة يقين !
أنــــا مِنْ يـاتُنْ ؟
يا بت يا نــال
رقَّاص ونضير
مهرِك شوتال
يا جرتِقْ
فاح العصريَّة
يا بت يا فال
أنا مِن ياتُن؟
يا بِتْ يا غير
يا قولة خير
يا شيلة
مشهَّلة زييين
يا سيرة
تشويِمْ بالكرعين
ها الكتِف
الهايِشْ بِلْحيل
مِن فوقو
مخنَّقة دلّوكة
دلّوكة محنَّنة
بى قلبين
يِتْناقز فوقها
الشلْشال
يا بِتْ ترْيانة
كما الصلْصال
يا فَكَّة ريق
لى زول قرَّاع
فى شمْس الصيف
الـ عينها قويَّة
الـ واقفة قصادنا
بلا قُرْقاب !
والصيف حرَّاق
تِتْجارى هجيرتو
رهاب ورهاب
يا مسْرة
زراعتِك بالرّوكة
مطمورتِك – قطعاً- مبروكة
يا السمحة
ضُراعِك جيَّاب
يا السمحة
جُرابِك أدَّاىْ
يا قعْدة كيف
بى فوق القيف
يا صُرَّة شاى
فى جيب ترْبال
أنا مِن ياتُن ؟
أنا مِن ياتُن
خلِّيهو الجاب
خلِّيهو الشال
والقيل والقال
أنا مِن ياتُن ؟
يا واضحة
ملامحِك ومخفيَّة
يا جالْبة
الغنوة المسبيَّة
يا ناجعة
بلودِكـ وين ؟
ها زولة
بلودِك وين ؟
مُشهادِك راقِد
بين شاهدين
وقفاكِ اللعوج
بين مويتين
الـ سمح
الـ أصبح شين
يتقدَّل
عِزَّ الضُهرية !
والنَّاس شايفين
الـ موكضّاب
صاحب بالين !
والـ مو وقَّاع
راكب سرجين !
أنا من يا تُن
أنا مِن ياتنْ
ياقعدة بُن
فات منَّها واحد
والباقين
يتْمَلْملوا سااااااكِت !!
والساكتين خايفين
الواحِد يبقى اتنين
واللتنين
ما تبقى نهاية !
يا بت يا آية
يا راية
مرصَّعة بالأمجاد
تهتف أجدادك
والأحفاد :
يا قِبلة كلَّ
الألوان
يا نيل هيمان
يا ضُل فنَّان
أنــا ما اتْمنِّيت
الجايى عليك
نكاية !
ولا اتمنِّيت
الـ فيك قاعدين
وكتين انعدم
الفرح الـ كان بالدين
قالوها : كفاية !!
أنا ما شاهدت
صُفاح محرابِك
واللنداية !
أنا ما هزِّيت
النخلة الـ حتَّتْ
فوق صنقورِك
هين سفَّاية
والصيص الخايب
والكَرْموشْ !
أنا ماطلَّقت
غُناى غشيماً
جاتو وشاية
أنا ما سمِّيت
يوم موتِك بوش !!