Post: #1
Title: طبَّقنا فيك حَدَّ الكفاف
Author: shazaly gafar
Date: 04-17-2011, 12:49 PM
Parent: #0
طبَّقنا فيك حَدَّ الكفاف شاذلى جعفر شقَّاق
كان ليلِك الميرود يهضرب بالصباح والقِرَّة تنهش فى عِضيم مصَّوهو صاح طقَّوهو لامِن مُخُّو طار عشمان – أكان – يغشى اللسان ! اتمطَّقوا الما فيش بيان اتصنَّطوا الضُّل فى الزوال اتكرَّفوا الدم فى العِروق اتحسَّسوا الحمل الكذوب توأم سِفاح ! ريحة صُماح إبْط الفساد ترمى الصَّقُر مِنَّ السَّما ! خيل الخَمَج تردح جموح نعم المطايا مسوَّمه كُشنة وعود الجِن تفوح راعيها هايم وسايِمَه ! كُوَر الشراريب الجماجم والعضام الرامية لى قِدَّام عَمَى ! جرْح الأرامل والدمامل والدموع .. طبق الصديد طبق المصارين المتبَّله بالدِّما إدَّشُّوا ما حَمَدو الإله أدّوكى بطن المُستراح وبى صوت ممصَّر بالأنين قالوها : آآح ! طبَّقنا فيك حدَّ الكَفاف وسْط الخلوق وسْط المهابيش .. الدراويش الصعاليك والعِلوق مِنَّ القريب العين تشوف ومن البعيد العين تشوف كلَّ الطوائف – مِن طَرَف – حَجَّتْ على وجعِك نشوق واتْعجَّبوا : كيفِن يحوق ؟ أدّوكى للتاريخ عَلوق خلّوكى همبول للغشيم -يا عِبْرة – لى يوم يبعثون ! لا قُدرة لا حيلةً تجُبَّ الفات عَقَب .. لا توبة أخرست العيون ! القوَّة تحميم مِنَّنا القوَّة تبقالِك حجاب القوَّة معناها الشَّرَف واصلو الشريف دايماً عفيف الغيرنا غير الغير هَباب ! دُقَّ القراف خلِّى الجَمَل - يا زول – يخاف ! ضحِّينا بى كبش العفاف غنَّت مع الوجع السياط فى كُلْ صياح تنْتِف نياط ! (كُنَّا خِفاف) ! دكّينا عرشِك يا ضراعات يا توسُّل .. يا خطيئتنا أجمعين سمِّينا عصرك انحطاط ! يا باصقة توبتِك للرعاع الآمرين باسم البلاط وين ؟ وين طافشه وين يا مارقة من سُمَّ الخياط ؟ كان حاسبو السبب اللعين ما كان أخير ؟! كان أتَّروا العِرْق الدفين ما كان أخير ؟! إنْ دُرْتوا خير ؛ نقلع من الشَّفق الحَمار نكتب – عشان أولادنا- غير !!!!
|
|