حـاجه خاصَّه

حـاجه خاصَّه
شاذلي جعفر شقَّاق


حاجه خاصًّه

حاجه تِتْحدَّى الخصاصه

تحْلِب الغيمة العطوفه

تَبْرَى وديانها الولوفه

تَرْوِى مِيرِيها وجروفها

الصَّبُر تربال خريفها

وجَنَّتو الدانيات قطوفها

حاجه خاصَّه

******

حاجه خاصَّه

مامُهِم َّ الزول يشوفها

ما مُهِمْ يسمع ظروفها

ما مُهِمْ ينْضُمْ حروفها

ما مُهِمْ يجرى ويطوفها

المُهِم إحساسو يَكْبَرْ

بالصباحات الشغوفه

كلَّما يشْتَدْ كسوفها !

حاجه خاصَّه

******

قيمة الزول فى مقامو

شمسِ تَشْرِق فى كيانو

كِلْمة تَنْبُتْ فى لسانو

غِنوة تَشْربْ من جَنانو

خطوة تِتْجاوز مكانو

وبالعزيمة

كبوة تِتْحدَّى الهزيمه

لمَّا يِتْسنَّم زمانو

لمَّا يحلم بالثريَّا

لمَّا تِتْحكَّر أمامو

ولمَّا تَنْعم بى أمانو

حاجه خاصَّه