قصيدة/كتَّاحة الزمن الأغبر

كتَّاحة الزمن الأغبر

شاذلى جعفر شقَّاق

يا كتَّاحة الزمن الأغبر
أهلاً وسهلاً قرِّبى جاىْ
ما بكْشَحْ لِكْ كوز الموية
ولا بتْوسَّل شُوفى سِواىْ
مانى الداخل منِّك جُوَّه
ولا الحدَّاث المو سَوَّاىْ
مانى الشايف الَّلَعوَجْ دُغرى
وجنب الَّلعوَج قاعِد ساىْ
مانى وِليد الطين والتُرعة
قعد اطَلْبِجْ أبوىَ حِداى
يانى كريق العِرِق البِلْوى
الرّاكب الموج المو رسَّاى
يانى رفيق الدرب الواعر
ما بِتلفَّت ضُمَّه وراى
ما بكشح لِك كوز الموية
ان جيتى عجوزه وجِبْتى صِباى
جوز الخلوى قدُر ما ينْشِل
كوز البلوى كتير عبَّاى
يا (تِلْقيحة)الزمن الأغبر
سارقة حصين القدر الأشتر
فارَّه جناحك للهبباى
حايمه تلخبِطى فى الانساب
هجَّنتى الحنضل بالباباى
مارقة تقفِّزى تمر الصِّيص
بى بيض الدِّيك المو عوعاى
يا كتَّاحة الزمن الاغبر
يوم اكْتحْ لِكْ هينْ فى خشْمِكْ
تمشى تلوكى تضوقى أساى
أمى وابوى بيناتم رحلة
شايله عصاتا صباح ومساى
ترْمى خرافة الكوز البدعة
تقول القرْعة:ا
أمان القِرْبة على الوكَّاى
تقيف الحالة تقوم من وقعة
وضيف الهجعة
وحِسّ الشافِع البكَّاى
سوق المغرب طفَّفْ كيلو
وشايَلْ عيبو مع النقَّاى
يا العِلِّيف الما بتِتْحَتْحَتْ
بالمُحْجان المو دلَّاى
تَهَدِر فيك ذخيرة تَخرْتَكْ
من حُضن امَّك تصرخ واى
ترتعْ فيك غنيم ابليس
وبدون بوليس
الرّاعى يصفِّر للجرَّاى
يا (تِلْقيحة)الزمن الأغبر
كلَّ الدنيا بِقَتْ كَنْجاله
وصوت المدفع أصبح ناى
يا..المِنْ جُوَّاك قالْعِنِّى أنا
ويا الزَّارْعِنِّكْ فى جُوَّاى
كم جوَّدتِكْ فى الدّوبيت
وكم تيربْتِكْ فى الدّوباى
وكم بوَّغْتِكْ فى الجرَّارى
وكم دفقَّتَ عليكى غُناى
أنا الغَنَّاى غناوى المَسْرة
ساعة النَّفْرة والقوقاى
يانى الفيكى بناضل
وجايبِك ليكى هدية معاى
من تالاىَ ارُقْدِى قَفا
ما بِخْرَبْ بيتِكْ من تالاى
ومن تالاكى حباب المحنة
حباب الليل المو هدَّاى

_________________________________________________________________
The new MSN 8: advanced junk mail protection and 2 months FREE* http://join.msn.com/?page=features/junkmail