نفس العدالة المنكتم!

نفَس العدالة المِنْكَتِم
شاذلى جعفر شقَّاق
دعونا نعيش دِقِن
مزروعه فى حنك الضلاله
من اجل ابنائى دقن
مجتهدة فى النوم والخماله
ما اصلو لمَّا الزول يضيق
وينكتم نفس العداله
يبقى دجَّال أو منافق
وتسرى فى دمَّو العماله
كم قلم دمعاتو سالت
لمَّا جفَّت فى حناياه المقاله؟
ختَّّوه فى زنزان مترْبس
وحرَّموا السكة المشاله
الوطن محروق حشاهو
ونارو زادت فى اشْتعاله
المصيبه اللونه أسود
جاتو تطَّوْطَوْ حباله
ارحمو الشعب الشِبِعْ
بالجوع ولِبْس الليل جهاله
كايس العيش الصِعِبْ
فى دروب الاستحاله
ارحمو الشعب التِّعِبْ
بالهم سِكِر حتى الثماله
جونا ظُلَّام الغلابه
والبلد زاد انحلاله
الفقُر طلَّق حريمه
والمرض يتَّم عياله
العزيز عاش فى مذَّله
والذليل العزَّة ناله
يروى من الطين ضعيفنا
ويشرب القوى من زلاله
قسَّموا الهم للغلابه
وبدَّلوا الهدى بالضلاله
الله بس ياهو المخيَّر
جلَّ خالق الكون تعالى
جاعل الانسان خليفتو
ليحكم الناس بالعداله
يا رسول الامَّه زيل الغُمَّه
يا خاتم الرساله
قلت احكيلكم حكاية نعمة
كيفن كان نضاله
ستَّفت شنطة هدومة
وقبَّلت شدَّت رحاله
جايه للخرطوم دراسه
واصلها الطب كان مجاله
جايه من دنيا الشرف
والعفَّه والحيا والاصاله
نعمه وصْلت وحصَّلت
وشرَّف الخرطوم وِصاله
شافت السبعه العجايب
فى البنادر وزيف خصاله
الوجوه ما زى وشيها
وفى الِّلبِس ما فيش مثاله
البنات ضِحْكَنْ عليها
ويا خلق مالكم وماله
فكَّرت توصل مداهِن
وخوفى تِنْفَلِت السِقاله
نعمه عارفه ظروف ابوها
العسَّمت ضهرو العِتاله
زهرة الاحلام بتذبل
وكل يوم يصعب مناله
لفَّت الايام ودارت
عن يمينه وعن شماله
وفوق جسيمه اتقطَّع
الهِدِم البِيَسْتُر ليها حاله
نعمه صابره مع الزمن
رغم المحن راسيات جُباله
صبرت كتير لمَّا الصَّبُر
ملَّ وزِهِج فات من قُباله
وكتين خلاص كِمل الفهم
شدَّت على صهوة خياله
سافرت رجعت بعيد
للماضى عادت فى عُجاله
اتذكَّت ايام صباها
وبهجة الدنيا وجماله
سمْعَت الاطفال يغنَّوا
وشافت الحِلَّه ورِماله
الَّا لمَّن نعمه فاقت
وعاشت الحاضر حِياله
غطَّت العينين غشاوه
والحزن غيَّب هلاله
الغموم تمشى وتجيها
والهموم شاغلاله باله
نادمت نجم المآسى
حزينه ساعة النوم اباله
فكَّرت تلقاله مخرج
للرزق ما تبقى عاله
كل الدروب اتقفَّلت
كل النتائج لا لا..لا لا
الواسطه تاكل فى رصيدها
ودايرى تاكل راسِ ماله
تبْ ما لِقَت غير توب عفافه
وقرَّرت تجْلِبْ جماله
شالة المرايا اتزيَّنت
واتروَّجت رسمت دَلاله
وزيَّف الشيطان طريقه
وساقه لى سوق الدِلاله
نعمة تاهت فى المداين
وشوَّهت صورة الاصاله
ما اصلو لمَّا الزول يضيق
وينكتم نفس العداله
ممكن يبيع شرفو المقَّدس
لحظه فى سوق الرزاله