قصيدة/شملة الحكم الشمولى

شملة الحكم الشمولى
شاذلى جعفر شقَّاق
أنا ما مشيت منِّك براىْ
جرَّتْنى منِّك جيم وسين
أصبح وشِىْ يلعن قفاىْ
فى غربة القلم السجين
يا صالحة وييييييييييييييييييين
يا صالحة وينِك انتِ وين
أن يا غُناىْ
دفَّقتَ فيك شعرى الحزين
طنبورى لا خاف لا فِتِرْ
لا زيَّفتْ أوتارو دين
طنبورى لا تاه لا وِدِرْ
لا جمَّلتْ ألحانو شين
طنبورى لا داخ لا عِتِرْ
فى سكَّة المال والبنين
وانا يا مُناىْ
ما شِلتَ غير حبِّك متاع
مرْدوم على أكتافى دين
هوووووووووووووووىآصالحة
كوركْتَ لِكْ
جانى الصدى المليان حنين
دفرونى من بابِك غصِبْ
ظلمونى فيكْ ظلم الحسين
فى دكَّة السوق والرِبِح
أدّوكِ رفْ ضربوكِ عين
لفّوكِ لَفْ
بى شملة الحكم الشمولى
الطلَّعتْ زيت العوين
ورِجوكِ صَفْ تفّوكِ تَفْ
فى خندق الآه والأنين
وكِتِلْتَ فيكِ انا ياام سماح
لا كوكى بالحنَك السنين
تفّوكى فى خطبة وداع
للراجى جيْتِكْ من سنين
غدّوكْ غُنا وعشّوكْ شِعار
صِبْحت غنيواتِكْ طنين
شافوكْ حِلِمْ سمْعوكِ صَىْ
قادوكى يا ام شوفاً ضنين
قفلوكْ هنا وباعوكْ هناك
غشّوكِ بالفتح المبين
أدوكْ حمار ورماكِ عارْ
مين يرْفَعِك الليلة مييين
ْلِبْسوكْ خمار مَلَصوكى عار
قطعوا الرَّحَطْ تِحْتَ الجنين
خلّوكى سَىْ وَىْ ووب وحَىْ
غَدَروكِ حُرَّاس العرين
ما قلْتَ لِكْ يا صالحة خلّيهو الكِجارْ
وَحَمِكْ صِبِح زيتون وتين
فى ذِمَّتِكْ ما كان أخير
لالوبة أو قُضّيم وطين؟
خانوكِ دايرين الخلود فى جنَّتِك
غشَّاهم ابليس اللعين
وجوَّنِّى فى بلد النجيع
ودَّرْ وراىْ دربى الحنين
وانا يا هَناىْ من ناس هِناى
ماضُقْتَ نوم ما شُفْتَ زين
لكنى راجع مافى شَكْ
جاييكِ لمَّا الصِّحْ يبين
دافِر عليك شوق انحَدَر
من قمة الحزن الدفين
أغْنيكِ بى خدمة ضراع
أبْنيكِ بى عرق الجبين
ناذر غُناىَ وروحى ليكْ
أرْويكِ بى دمَّ الوتين

فوق

وفوقين كمان
ياشاذلي
تسلم

تسلم عينك ياموصلى يا رائع
كل الحب والاعجاب والموده
شاذلى

قصيدة رائعة.. واسمح لي أن أنقلها إلى بوستات أخرى من أجل مزيد من القراءة..

وأهديك هذا البوست:
من العطش النص اتوفى.. وباقي النص الفضّل جيفة
قصيدة "الرواسي" غناء جعفر السقيد وكلمات حاتم حسن الدابي

تسلم من كل بلية يا دكتور

هدية جميلة ومقبولة
منك وليك
ومنى لكل الغُبُش
كل المنى

الأخ الشادلي
تحياتي

النص عميق و منساب بجمال ملحوظ ..
المزيد من هذا الألق و وفقك الله

أخى ابو جهينة
آيات الشكر الندية لك
وكل المنى
شاذلى