خيانة عظمى

جبل هجرانِك

شاذلى جعفر شقَّاق

لمَّا لقيتِك فى عينيهو
وكان متحكِّر فى عينيك
شايل قلبك يلعب بيهو
وقلبو بيلعب بين ايديك
سايل ريقك يجرى عليهو
نسيتى السايل ريقو عليك
كرهت اليوم الشفتك فيهو
وكل قصيدة كتبتها فيك
* * *
لمَّا لقيتك تايهه معاهو
وليكم كان الغدر دليل
لقيت النور الشقَّ دجاهو
وكل البينّا محاهو الليل
ضاع الأمل الكان نرعاهو
زىَّ الزَّبد الشايلو السّيل
ندهت العهد الخانّى صداهو
نسيت الذكرى بوادى الويل
* * *
لمَّا لقيتك تدفنى فىَّ
وروحى بتنفُض فى أدرانك
جيتك جارى وشايل الدِيَّه
الّا قرينك هزم انسانك
مجنى عليك وجنيتى علىَّ
أريتك تنعمى بى سلطانك
قلبى السافر خلّى وصيه
بارك فيها جبل هجرانك

_________________________________________________________________

الأخ شاذلي جعفر
أنا أحد المعجبين بكتاباتك
معجب

شاذلي هذه قصيد تنضح بالمصارحة وعمادها المواجهة
جريئه قويه
لامواربه فيها

العزيز الموصلى ،

تحية وسلام وشوق ،

أتمنى أن تستأذن الأخ شازلى فى تلحينها ...

ست البنات .

أخى المُلَّا:
تحية الشعر الندية لك
كل الحب والتقدير والمنى


البلبل الموصلى
كثيراً ما أحتسى خمر الرمز
ولكن المواجهة اقتضتها الضرورة
آه...لو تدرى


ست البنات اخيتى
ام لساناً طاعم
ست الرجال لا حدهم
كل المودة والاحترام

شاذلى