Post: #1
Title: قصيدة/فجُر ليل الغلابه
Author: shazaly gafar
Date: 01-20-2005, 05:47 AM
Parent: #0
فجر ليل الغلابه
شاذلى جعفر شقَّاق
يا فجُر ليل الغلابه
يا متربس فى دهاليز الكآبه
شمسك المسجونه فى ديجور غيابه
دايرة تطلع دايرة ترجع لى شبابه
بالبهجة تشبع لمَّا ترتع فى رحابه
ليها أشفع شوفها كيف طوَّل عذابه
يا فجر ليل الغلابه
السما الراجنِّو ناسك شوفو عدمان السحابه
الحجارالتشوى نارا جنبهم سمَّوها غابه
والسراب الفى الصحارى شربوا منِّو الاستجابه
ليه بتبخل بى صباحك؟ وانت عارف لمَّا تابه
السؤال يقعد يهضرب بى سبب حمى الاجابه
يا فجر ليل الغلابه
العزائم ال فى الشوارع حرَّشت فيهن كلابه
الفرح مفتاحو صبرك وسكَّتوالفلَّست بابه
يوم هجمتَ على حروفو وجفَّ قاموس الكتابه
يوم ضحكتَ على مصيبتو ال الله جابه
حطَّمتْ باقى الأمانى وشيَّعتْ صلة القرابه
يا فجر ليل الغلابه
قبلِ ما الأحزان تعنِّس فى بيوتات التعابه
كلِّم الفرح المسافر فى نغم وتر الربابه
يبقى للأحزان شريكه ويملى بالأفراح جرابه
شهِّل الفرح المسافر شيِّلو الشوق والصبابه
شان يجى الجيل المناضل لابس الحق والصلابه
|
Post: #2
Title: Re: قصيدة/فجُر ليل الغلابه
Author: Elmosley
Date: 01-20-2005, 05:54 AM
Parent: #1
ياسلااااااااااااااااااااااااااااااااااااااااااااااااااااااااااام
|
Post: #3
Title: Re: قصيدة/فجُر ليل الغلابه
Author: shazaly gafar
Date: 01-20-2005, 06:09 AM
Parent: #2
حبيبنا الموصلى
كل سنة وانت طيب
ربنا يجمعك والامانى
فى سجسج الواقع الاخضر
شكرى وكل حبى
شاذلى
|
Post: #4
Title: Re: قصيدة/فجُر ليل الغلابه
Author: عماد شمت
Date: 01-20-2005, 02:40 PM
Parent: #3
الاستاذ الشاذلي كل سنه وانت طيب
رائع رائع.. وما في كلام
اتمني ليك العافيه وطول العمر عشان تبدع اكتر واكتر
مني ليك ورود المحبه والفين سلام
|
Post: #5
Title: Re: قصيدة/فجُر ليل الغلابه
Author: shazaly gafar
Date: 01-22-2005, 11:48 AM
Parent: #4
أخى شمت
كل عام وانت بألف خير
وربنا يحقق الامانى دانيها وقاصيها
شكرى وتقديرى
وكل المنى
|
|