عشم الهوى

عشم الهوى
شاذلى جعفر شقَّاق

بعد اندفق عشم الهوى
واتلاشى نور الالفة فى ليل النوى
غيَّرتَ سرَّ الليل عَلَىْ
بدَّلتَ قِدَّامى الصُّوى
وقفَّلت شُبَّاكاً بِجيب
تالاك من تالاىْ هوا
نتلاقى صدفة على الطريق
ماشين سوا
ومن غير سلام
اتوارى نجمك وانذوى
ويا حسرة البيناتنا كان
كيف انطوى
لمَّن عيونك شافو
عينَىْ فى الطَّريق
قبَّلت غادى وكنتَ
زى ما قادر تطيق
فجأة خلَّيت المعاك
غيَّرت دربك والرفيق
طيَّرت عصفور الحنين
كبَّلت مسدارو الطّليق
حاحيت غنيوات الأمل
طفَّشت من عينو البريق
هزيتو محجان المَحَل
حتحتَّبوالعُشَّ الوريق
فضّيت قوارير السَّمَر
طفّيت فوانيس الفريق
شقّيش أقبِّل والنجوم
سكرانة ما منظور تفيق؟
شقّيش اقبِّل والدروب
تِتْمطَّى قِدَّامى وتضيق؟
كل العوارض بايعت
تِتْحدَّى خطواتى وتعيق
أنا والحزن والذكرى
والشِّعر العتيق
سايقين قوافل الشوق
دُغُش والليل غريق
عشَّمتهِن ...عطَّشتهن
ريقِن نِشِف راقِد دقيق
قمَّحتِهن صدَّن عُقُب
دخَّان يزازيهو الحريق
وانا شان لقاك
ما لُمتهِن...لَمْلَمتهِن
مسَّكتهن درب الأمان
غفَّلتهن..دودرتهِن..أطربتهن
أدَّنى من شوقِن كمان
لمَّن قِرِب مُشرَع هواك
جيت يا الحبيب جفَّلتهن
زعزعتهن...
فى ايدى كسَّرت الكمان
راهنتَ ما تنسانا يوم
ورجعت خسران الرهان
لمَّن طِريت الكان زمان
جقلبتَ ضاق بيك المكان
قدّامَك اتوهَّط سؤال
بالله يا هاجر نسيت الكان وكان؟
كان زمان لمَّن نجيك
ترجانا فوق جمر الصَّبُر
نلقاك زى نخل الجروف
شايل سبيط شوقو التَّمُر
يتقطَّر القُنديل سلام
يدفَّق المُشرِق كلام:
-أهلاً أمانينا الخُضُر-
ويهوش جريد الفال فرح
لى الله كم سبَّح شُكُر
ياما كُنَّا على الأمل
راقدين قفا
راجين نجيمات الفجُر
لكن قبس ريدنا انطفا
وكتين محيت الكان
مدوَّن فى الصَّدُر
ورفعتَ أقلام الغرام
بى نقطة فى آخر السَّطُر
وطويت صحيفة حبى ليك
دسّيتها بينات الجمُر
لمّيت مشاعرك من حداى
أديتها لى زولاً كُتُر
كُتْ يا مُناىْ
شايلك معاىْ
لى بُكرة فى جوّاى نذُر
لا تعتذر...
ما بيكسِر المجبور شعِر
ما بيجبُر المكسور عُذُر
ما بيجبُر المكسورعُذُر