قمــرية ..!!

قمرية

شاذلى جعقر شقَّاق



ما همَّــأك زمـن

سرق الغُنا اتهنَّابو

ما لولاك غصُــن

نوَّم غناك دولابــو

أكان يجيب الشالو

أو يرجع يشيل الجابو

ما هشَّاك قــدر

يرفع عليك نشَّــــابو

وانتِ تغنِّى يا قمرية

للحارس الحزن أبوابو

تنسجى للأمل غنوات

يشد حبل الصبر كرَّابو

فتح لحن الخلود سرسار

مسك جُوَّاىَ ديدابو

قطع ضهر النشوق دوباى

حلب ضرع الدَّمَر شرَّابو

مسح عين الصباح بالضو

وقف قِدَّامــو صلاَّبـو

مدح غيم الهوى المدرار

عزف بالناى وغنَّابــو

لفح شال السفر مسدار

رقص شاشاى وهزَّابــو

فَرَدْ توب الشراع للريح

نهز مجدافو عدَّابو

رمت مركب صعيدك نَوْ

نده صاريكِ أحبابو

وجَرَد سبحة هــواك بالليل

نضم لالوبه عدَّابو

مراكبية وحصـادم بَوْ

الاَّ غُناكِ تيرابو

هيا قمرية وين لحن المقيل

والقهوة فى الراكوبه؟

وين الشبَّه فوق الحيطة

يا قمرية وين زينوبه؟

وين غنواتِك الحلوات

على شفق الفجُر مسكوبه؟

على الترباس ...على حبل

الهــدوم قوقــاى ..

وفوق سبلوقة مقلوبه ..!

تخلِّى الشِعبة والمُعلاق

وتمشى تغنى للطوبه ؟!

تسيبى الدّوكه والنقَّاع

وتمشى تزوزى مرعوبه ؟

تهْجُرى عُشِّك النشــوان

تقول عينيك معصوبه !

(عمارة) إيه تخلّيكْ تنسى

أحبابك جنازة ذكرى مصلوبه

أكان انطوتْ أيامنا يا قمرية

أو قلب الزمان الهوبه

لا زالت خيام الماضى

فى جُوَّاىَ منصــوبه

حليل حبوبتِك الـ كانت

على دفتر صباى مكتوبه

كُنَّا نجيهـا فى غمضة

مقيل حبوبـه

فى الوديان نلاقيها

ونقُجْ أشراكنا فى الرّوبه

ندودِرْ سربها الغرقان

مع الفحل الـ بدور فى النّوبه :

أووو الدّباسه

أم حلقاً مُواسه

أدّينا المريسه

نشرب نقــوقى

البحـر زلّــوقى

أووو الدّباسه

وتقدل ساااىْ وما همَّاها

خازوقنا الـ بِشِلْ عرقوبه

ولمَّن كَفْ جناحها يرِفْ

تقوم حبوبه مرعوبه

هيا المسكينه فكّوهــا

عشان جنياتها فى الحوبه

وتموت جُوَّاى ألف قصيدة

لمَّا الريح تشيل توبه

هيا قمرية يانى حبيبك

الصادق وجيتِك ليهو محبوبه

والـ شفتيهو برجاً فوق

وحات ريدتنا أُكذوبه

اذا مطر الخريف حاحاك

تعالى نجدِّد التوبه

وتعالى نجدِّد التوبه..!

شكرا الشاذلي

علي هذه اللوحة

تحياتي

أشكرك أخى عصــأم

ومن عمق أعمــاقى أُحييك ..

تسلم

up

أخى عصـــام

حزمـــة من القوقــاى

وأردب من الســلام ..

وفوق من أجل الراكوبه ..