شاوة العيش الهجــين ..

شاوة العيش الهجين

شاذلى جعفر شقَّاق


الدَّاخرو لى سَعَدِكْ كتيير

بس جيبى من صبرِك شِوَىْ

والطَّارحو فى دربِك نضيير

ما فيهو مِنْ صَرَّة وِشَىْ

والدَّاسو لى فرحِك وفيير

ما هاجَمَنَّو العادِيـات

ما اتْخاتفَن خيراتو فَىْ

لومينى كان الَّلكنة جـات

كان تَلْكَع الشَعَرات : أَفَىْ

بس .. بس جيبى من صيرِك شِوَىْ

* * *

تابِرْ جَرِفْ عِشْقِك يقين

ما عبَّرتْ أطيارو هين

ما زيَّفَت ألحانا دين

ما شنَّفَت ألوانا عين

يا شاوة العيش الهجين

بُشراكِ خُمَّارة عجين

والدّوكه والضُّلّ التخين

مُكْمامه تغْرِف وين ووين

والكورة تِتْمدَّ وتبين

والحيطة تِتْقاصر دحين

يا نبرة الصوت الحنين

يا طلَّة الوجه المليح

الشاربة من الصبْحِ ضَىْ

فجرِك وشيك فجرِك وشيك

بَسْ ..بس جيبى من صيرِك شِوَىْ

لامتين تبشِّرْ بالصباح

والليل معَسَّم ومنْبَرِشْ ؟

لامتين تدوعِل فى الكلام

الـ ما بِهِشْ ولـ ما بِنِشْ ؟

لامتين تدودِرْ فى الغمام

والـ مَحَلْ سوَّالو عِشْ ؟

كيفِن تساويهم تمام

ناساً بِتَزْرَع وناس تَحِشْ ؟!

فوِّج خطيَّاتَك تَحِجْ

خليك رِقيِّق شان تَلِجْ

كسِّرْ تَلِجْ كسِّر تَلِجْ

بين الخلوق لازِم تَفِجْ

تفتِل من القول الَّسَّمِجْ

حبلاً تَكَرِّبُّو السَّرِجْ

ترفع نصيبَك فى الكَرِجْ

ملعون أبو القول السَّمِجْ

ملعون أبو القول السَّمِجْ

* * *

كان ما نَفَدْ

أنا صبرى ما بِبْخَل عَلىْ

كل العصافير هاجرت

يوم اصبحتْ غاباتا صَىْ

وتْجينى فى زمن الجفاف

وتْقول لِى مِن صبرِك شِوَىْ ؟!

* * *

جاييكِ فى إحرام لِواك

يا السمحة متوشِّح هواك

ما غيَّر السحنـات كِضِب

ما جفَّ ماعونِك نِضِب

لمّيت ملودِك ومُنْجَلِك

كادَنْتَ سِعْدَة جدْولِك

ما هوَّبو السرسار نَزَف

ما خاف كَرَكِّيهو ووقف

حالِف يطوف كلَّ الزَّرِع

والراعى مايْوجِّبْ ضَرِع

والصبَّ فى شعرِك غَضَب

بحراً طويل مو مقتضَب

ربَّانو لا تاه لا ضِهِب

لا راودو النوم لا تِعِب

قرَّبنا نلْفاها الضفاف

يا صابرة فوق حدَّ الكفاف

بّسْ .. بس جيبى من صبرِك شِوَىْ

أخوي

غياب وشوق
وحرف وغياب
في هجين ونسق

فعلّ رفع البوست يساهم في الحضور
لقرآءة كل حرف ندى
يكتب بكل هذا الحس


مرفق
إعجابي

إسماعيل حميم



.

Quote: فعلّ رفع البوست يساهم في الحضور لقرآءة كل حرف ندى يكتب بكل هذا الحس

مساهمة لم تثمر !!!!!!!


مرفق
محبتي

إسماعيل حميم



.

كل سنة وانت وناس المنبر (من طرف)

بألف خير الحبيب اسماعيل حميم

وأحلامكم كلها محققة ؛ قاصيها ودانيها..

ونأسف على تأخيرالرد..(آخر المراح - دايماً- فترانه ...

شكراً نميرا