اغرب قرار لشرطة النظام العام قسم الامام مالك بامبدة

فى ظل حكومة الوحدة الوطنية
يفترض ان

يكون هناك حرية عمل
ان يكون هناك حرية تنقل
ان يكون هناك حرية رائ
ان يكون هناك حرية عبادة
ان يكون القوانين تتفق مع الدستور


ان يكون مؤسسات الدولة اكثر اندماجا وان يكون القرارات حسب التسلسل المنطقى للعمل الحكومى المؤسس الذى نعرفه جميعا

ولكن اهـ

فى دولة فاشلة
دولة فاسدة
حكامها ناهبة
لحقوق شعبها سارقة
وحريات مقيدة

ولكن اهـ

فى دولة ليس فيها حسيب ولا رقيب
دولة كل مسئول يصدر قرار (بالمزاج)
على حسب (سكرته)
على حسب (سطلته)
على حسب (مصالحه)

عادة تكون القرارت طائشة
لعباد الله قاتلة

انها دولتنا (السودان)
دولة طيش فى كل شئ (رغم حبى لها)
دولة تاتى الاولى فقط فى (اللانسانية)
دولة الاولى فقط فى (قتل) وتشريد بنيها

دولة تحكم باسم (الدين) ولكن حكم ابليس ارحم

اخوتى ابناء وبنات السودان

قبل فترة خرج علينا معتمد البطانة بقرار عجيب
بان لا يدخل البطانة غير (اهلها) وكان البطانة جزء لا يتجزاء من السودان


وايضا خرج علينا قبل ايام قرار عجيب
من قسم النظام العام (الامام مالك) بامبدة
انه قرار خاص بدائرة اختصاص هذا القسم فقط وتم تطبيقه فورا من قب العسكر

نص القرار يقول
يتم القبض على كل سائق ركشة يتجول او مارا بدائرة اختصاص شرطة الامام مالك (للنظام العام بامبدة) بعد الساعة الثانية عشر ليلا مهما كان الاسباب التى دعته للمرور بدائرة الاختصاص المعنى ويتم وضعه بالحراسة وحجز الركشة حتى صباح اليوم التالى ثم اقتياده بعد ذلك الى اقرب قسم مرور ليتم تحرير مخالفة فى حقه

لا اعرف باى حق يصدر رئيس هذا القسم هذا القرار
هل يحق لكل قسم سن قوانينه الخاصة به
هل رئيس هذا القسم جهة دستورية حتى يضع قوانين


لماذا يضايقون هذا الشعب ويعملون على قطع ازاقهم ليلا ونهارا
الا يكفيهم ما عانوه طيلة فترة حكمكم
هل اصبح السودان بهذه العشوائية حتى طالت العشوائية اقسام الشرطة
وبرضو (الشرطة فى خدمة الشعب)

بالله عليكم يا قانونى المنبر

افتونا فى هذه المصيبة التى حلت على المساكين

لا نستغرب ان يخرج علينا بعد فترة قرار بان لا نستعمل الهواء الا بعد تقديم طلب لاحد المحليات
كما خرجت قبل فترة

شهادة الحياة للمعاشين
رغم ان المعاشى يكون واقفا امام اللجنة بشحمه ولحمه ولكن ايضا يطلبون منه احضار شهادة حياة

ليثبت انه حى
وفعلا انهم على حق

لو كنا احياء لما تركناهم يحكومنا بكل هذه الظلم والاستغلالية طيلة السنوات السابقة

لكنا احياء لقلبنا عاليها واطيها على رؤسهم

ولكن للاسف نحن (اموات)

Quote: غرب قرار لشرطة النظام العام قسم الامام مالك بامبدة

تحت تحت اسمو قسم الحجاج بن يوسف!
الشينة منكورة!
جنى

جنى مساء الخير
والله الحجاج ابن يوسف ارحم منهم

لما قابل احد الاعراب الحجاج وساله فى رائه فى حكم الحجاج وكان متنكرا قاله له بصريح العبارة انه (ظالم) وعندما سال الحجاج الاعرابى اتدرى من انا واجاب الحجاج انه هو
قال الاعرابى ايضا واتدرى من اانا؟
قال الحجاج / لا
قال انا مجنون فضحك الحجاج وصرفه


ولكن هولاء القوم يمكن ان يخرجوك من قبرك لانهم لم يقتنعوا انهم ظلمومك 100%

Quote: شهادة الحياة للمعاشين رغم ان المعاشى يكون واقفا امام اللجنة بشحمه ولحمه ولكن ايضا يطلبون منه احضار شهادة حياة

دي مبالغة يا حيبنا دوت
قوية بالجد
من نوع شر البلية



بس زول النظام لعام دا بفتح بلاغ تحت ياتو قانون
علما بأنه القرار دا خاص بمنطقة سيادتو بس
في الدول البتحترم القانون و مواطنيها لا توجد عقوبة علي فعل لا يمنعه القانون بدون اعتبار لرأي كائنا ما كان
قبل كم سنة كان شرودة مستشارالمانيا و في نشاط حزبي في مدينة مانهايم بعد الندوة كان المستشار الفدرالي بوقع اوتقرامات علي كتابه حديث الصدور

احد اعضاء الحزب وقف في الصف و لمان وصل قدام الطاولة الجالس عليها المستشار مدة ايدة كأنه عاوز يحي شرودا لكن صاحبنا رش ليك شرودا كف ابو كديس
ظل المستشار جالس و كل مافعله انه حرك يدة امام وجه في اشارة تعني انه يتساءل من صحة المهاجم النفسية و العقلية
ذهب شرودا زيو و زي اي مواطن عادي لمركز الشرطة و فتح بلاغ ضد الزول الضربه و المحكمة حاكمت الرجل بشهر سجن مع وقف التنفيذ
اتخيل لو دا حصل في السودان

اخونا دوت مجاك ..
سلامات...

فعلا الحاجات البتحصل دى ماممكن تحصل فى رقعة من الارض..
فوضة بمعنى الكلمة .. تفتكر بكونو وقفو الرقشات من
التحرك بعد الساعة 12 لية؟؟؟ طيب التكاسى برضو ممنوعة؟؟
كويس الحافلات كيف ؟؟ دى حقارة بالرقشة عشان صغيرة وجاهلة ؟!!
ولا الحاصل ده شنو يا ربى يا سيدى يا مولاى !!!!

Quote: احد اعضاء الحزب وقف في الصف و لمان وصل قدام الطاولة الجالس عليها المستشار مدة ايدة كأنه عاوز يحي شرودا لكن صاحبنا رش ليك شرودا كف ابو كديس ظل المستشار جالس و كل مافعله انه حرك يدة امام وجه في اشارة تعني انه يتساءل من صحة المهاجم النفسية و العقلية ذهب شرودا زيو و زي اي مواطن عادي لمركز الشرطة و فتح بلاغ ضد الزول الضربه و المحكمة حاكمت الرجل بشهر سجن مع وقف التنفيذ اتخيل لو دا حصل في السودان

هااااااى انسى بس .....

Quote: لماذا يضايقون هذا الشعب ويعملون على قطع اراقهم ليلا ونهارا

لا حولا ولا قوة الا بالله........دا اسواء شئ

الأخ الـحـبيب الـحـبوب،
دوت مـاجـاك،

تـحـية طـيبـة،

قـوانـيـن سـبتمـبـر 1983 مازالت تـحـكم البلـد. لاتسـتغـرب مـن ظـهـور اي قـوانيـن جـائرة او فـيها انتـهاكات لـحـقوق خـلق اللـه.

اسـوأ وزيـر عـدل مـر عـلي السـودان هـو الـموجـود حاليـآ فـي وزارة العـدل!!.

طـبعآ سـمـعـت بـحـكايـة الأم حـواء وتـصـرفات رجـال الشـرطة مـعـها،
وحـتـي الأن ماسـمعـنا باعـتقالات لـمرتكبـي الـجـريـمة او اجـراء اي تـحقيقات حـول الـحـادث!!.

بلـد ماعـنـدها "سـيـد" كـل مـسـؤول يـعـمل فيـها أسـد!!!.

Quote: يتم القبض على كل سائق ركشة يتجول او مارا بدائرة اختصاص شرطة الامام مالك (للنظام العام بامبدة) بعد الساعة الثانية عشر ليلا

و دى حلتها شرطة الامام مالك ... طيب شرطة الملالى تعمل شنو .. تصلبو من خلاف!

ياسلااااااااام اخوي دوت مجاك وقعت لي في جرح
عشان احكي ليك موقف حصل لي مع نفس هذا القسم الذي تتحدث عنه

في يوم من الايام وانا سائق عربيتي متجه من ودالبشير في اتجاه الخرطوم
في محطه ود البشير وقفني واحد عشان يتقدم معاي ووقفت ليه شويه قدام شفت المسافه بعيده عليه فرجعت خلف مع العلم انو راجل كبير في السن واثناء ما انا راجع للخلف اسمع صوت ضرب علي السياره
نزلت اشوف في شنو وفجاءة واحد ومعاه زميله ومن غير اي سبب وقعو فيني شتيمه وانت وانت وانت ..
اتكلمت معاهم بهدوء مانفع اها طلعو شغالين في قسم الشرطه المذكور اعلاه ولابسين ملابس عاديه ومشينا قسم الشرطه
فكانت المفاجاءة والفاجعه في وقت واحد
.....
نتم بكره

لا يحق له ذلك فالقانون يعطى لرجل الشرطة متى وجد شخص فى ظروف غير طبيعية أو مريبة أن يتقدم إليه ويسأله عن عن سبب وجوده فى هذه المنطقةوفى ذلك الوقت... على أنه متى قدم مبرراً لذلك وكشف عن هويته فعلى رجل الشرطة التحرك فورا ولا شأن له به...
وفى حال عدم إثباته ذلك يحق لرجل الشرطة إقتياده للقسم والتحرى معه على أن يخلى سبيله متى كشف عن شخصيته..



ده القانون البعرفه...

ياخى هى البلد دى كلها عبارة عن مختلى عقول ... اى واحد يلقى فرقة صغيرة يعذب الامة

شوفوا حسه دى ،البلد مقفلة بالبوليس... الشوارع التقاطعات الخخخ .... حتى مرافق الدولة ياخى شركاتهم ذاتها ما بتقدر تمشى جنبها او توقف عربيتك قدامها..

فى زول بقدر يمشى بالصباح ساااااكت جنب بوليس واقفين ولا تقطع قريب منهم ؟؟؟ والله قال بقولك ، ياخى انا قبل شهر ماشى الخطوط الكينية فى عمارة الفيحاءمستعجل شديد وقصص كده .. قطعت قدام البوليس الحارس السفارة .. ولا خاتين علامة ولا اشارة بس خالفين رجلينهم، بس وتعال شوف من الحكمدار للمستجد .. شكلة لرب السماء على الطلاق الشارع وقف

فى النهاية....لمن شديتهم قالوا تابع لى وين ورخوا شوية كده....
شوفوا التفاهة أول ما تجوط وتشدها للفارات ديل يفتكروك كومندان ولا كده


عرفوا انى محام وقعدوا يتكبكوا شوية كده عشان شديتها ليهم




ياخى بتاعين الهدف بيقلوا ادبهم مع انه ماعندهم سلطات عامة!!!!!!!!!!!!!!!!!






غايتو

رمضان كريم

الجماعة بتاعين قسم الامام مالك ديل معاهم حق يعني هم مش بتاعين النظام العام يعني بيسهرو علي راحة المواطن (داخل دائرة الاختصاص) ويبعدو منو اي حاجة تعكر نظامو الماشي علية ،طيب بما انو الرقشة صوتها عالي وبتزعج الناس وهم نايمين يبقي ممنوع تمر داخل دائرة الاختصاص بعد اتناشر بالليل لانو مرورها بالليل خدش للنظام وتعكير صفو المواطن النايم يعني الموضوع من صميم اختصاص عمل القسم بس الما فهمتو لية يودوة قسم المرور الصباح لية ما يودوة من ليلة داك ولا المرور ما بيفتح بالليل

الاخوة الاعزاء
فى وطن غابت فيها ابسط مقومات الانسانية هذه عى افرازاتها
وهى نتيجة طبيعية لغياب العدل فى الوطن

الاخ الزبير
لا اعتقد ان الركشة تسبب كل هذا الازعاج حتى يتم منعها بالمرور طالما انه حق شرعى وطالما ان هذا الشارع رصف اساسا لمرور المركبات

بالتالى لا يوجد نص قانون يمنع الشخص من المرور بهذا المنطقة طالما انه لم يرتكب جرم يعاقب عليه

دوت مجاك تحياتي
تحياتي انا ختيت نفسي مكان ناس الامام مالك ديل وقعدت اخمن يكون السبب شنو يا اللة ، مكن يكون شنو السبب المابيخلو الرقشة تمشي بالليل علشانو ما لقيت غير انو ممكن صوتها العالي ، ولو لقيت سبب تاني كنت قلتو لكن غولب حماري

الاخ العزيز دوت ماجاك
سلام
قالو في واحدة ممرضة من العباسية كانت شغالة مع المرحوم عوض دكام في مستشفي الاسنان يوم لقاها تبكي قال ليها مالك قالت ليه الناس ديل شابكني تعالي يا خادم العباسية امشي ياخادم العباسبة اقيفي يا خادم العباسية اقعدي يا خادم العباسية
قام ضحك وقال ليها..هسه عشان قالو ليك خادم العباسية زعلتي...والله ديل ما خلو خادم الحرمين الشريفين
وذهبت مثلا
والله يرحم عوض دكام

ديل قانون شنو ودستور شنو واخلاق شنو البتعلموها في سنتين بعد نيفاشا دي
في مثل يمني عندنا هنا يقول(يموت الزمار واصابعه تلعب)
وربنا يرفع البلاء

دوت مجاك
سلام
يا أخزي زي ناس النظام العام ديل ما ناس الحيطة القصيرة.

مهما كانت الأسباب ومنها زي ما قال أخونا الزبير الإزعاع!!! فالركشه هي الحيطة القصيرة فلا صاحبها من الكبار ولا سائقها كذلك.

لكن كدي خلي بتاع مرسيدس ولا حتى هايلوكس 2000 وما فوق يحي منطقة الإختصاص ويعمل إزعاج الدنيا والآخرة وكدي ناس النظام ديل واحد يفتح خشمه، بل سيقفون ويضربون تعظيم سلام.
يا أخ البلد بقت إقطاعيات ومقامات، والله يستر على الغلابة.

الشايقي

فاوضني بلا زعل

الاخ الزبير قال :

Quote: الجماعة بتاعين قسم الامام مالك ديل معاهم حق يعني هم مش بتاعين النظام العام يعني بيسهرو علي راحة المواطن (داخل دائرة الاختصاص) ويبعدو منو اي حاجة تعكر نظامو الماشي علية ،طيب بما انو الرقشة صوتها عالي وبتزعج الناس وهم نايمين يبقي ممنوع تمر داخل دائرة الاختصاص بعد اتناشر بالليل لانو مرورها بالليل خدش للنظام

انت قصدك بواليس القسم البكونو نائمين مش كده
مواطن شنو الهمهم راحتو والله انت مسكين وطيبان

الأخ دوت مجال:
غياب دولة القوانين وتسلط جماعة الموتمر الوطني ، لا رقيب ولا حسيب على قرارتهم و أقوالهم وأفعالهم ... الشغلانة زيادة (مواعين) التحصيل للمحلية المذكورة ... جبايات لا أكثر ولا أقل .. وقرارات المحكمة الصادرة في مثل القضايا لا تقبل الطعن بالاستئناف .. ولدينا تجارب عديدة مع محاكم وشرطة أمبدة منذ العام 1990 م ..
مودتي
الشفيع إبراهيم

يا جماعة النناقش الموضوع من زاوية اختصاص او عدم اختصاص الناس ديل باصدار قرار زي دة
اولا دي شرطة النظام العام يعني التي تشرف علي سير الاخلاقيات في الشارع
ثانيا الرقشة مونث (حرمة يعني) لو كان القرار قاصد الدفار او الباص كنا احتجينا لانو الاتنيين ديل ضكر وعلية يمكن الفهم هنا ان القرار الصادر من القسم بتاع الامام مالك دة قرارا من صميم اختصاصة بعدم حوامة الحريم بعد اتناشر بالليل وبعدين تعالو هنا البمرق لية مرة من بيتها بعد اتناشر بالليل شنو

الزبير اخوى
مرات الواحد بيجى راجع من مكان عمله متاخر وبيطر ياخد ركشة
ومرات تكون فى مشوار او اى شئ اخرك
يعنى هم خلاص قدروا للنظام تب ما باقى ليهم الا الركشة

هم فى نفسهم عايزين تنظيم

الشفيع
ديل بياكلو اى شئ
وبعدين قرارت محاكمهم زى ما قلت ما بتعرف الاستئناف
والقضاة بتاعنهم خصومك
يعنى هو الخصم وهو الحكم (معقولة) العدالة هنا حتجى كيف