هاشم صديق انت الحاكم والمسئول

.
.

[qb]
من عن زول ، لي عن جيش
ومن عن جيش ، لي عن زول
تتساسق فكرة عن الإنسان
تعيش في الموت ، تموت في العيش
تتماحك
فيما بين الهم ، والقول
بي جاي تتضاحك
وبي جاي ....
..... بتصُر

والزول من طبعتو حر
ما بتلفت
لما الروح جواو تتفتفت
بخضع لي سنتو هو
وبكتب دولتو هو البي خدمتو أحرى
ما خمج الدولة البرا
بالحب مزدهرة ، وآمنة ، وحرة

ماالزول من طبعتو فوق
مليان بالهم والشوف والذوق

وما بين جيشا ما شغال
وشاعر حر فعال
قامت حرب ضروس
لا داحس والغبرا
ولا بتتشابى إليها بسوس
بشراك يا هاشم
يالدايم ، مهما نفتش ومهما نكوس
نلقاك براك
انت الفينا بتمشي
وقدامنا وراك
كان دم ولا شوارع
أوحلما متلك ومتلنا فارع
بي حرفك يوت بتسارع
في آمالنا وفي آلامنا
حرفك
في أمننا هو الشغال
في خبزنا هو الشغال
في عدلنا والحرية
ما زي جيشنا العاطل
وين الحق؟؟
ووين الباطل

يوم ولدوك ولدوكا مناضل
ويوم حتموت ، حنمشي فنعشك نبكي
وانت تواصل
(لما يطل في فجرنا ظالم)
(نحمي شعار الثورة نقاوم)
ويوت بنشوفك
للحب والحق والخير
بتهب وتقوم وتداوم
ويوت شايلنك في في الوجدان
أسى ، وخطوات ، وأشجان
بندورك تبني (وكتفنا كتفك) وطن الغد
وتهدم (وحرفنا حرفك) لي قلاع الظلم الوغد
ياالمهما تقصر عنك إيدنا بحرفك فوقنا تطول
والمهما نسكت يبقى بحسك صمتنا قول
انت الحاكم والمسئول
مالقاعدين في الكرسي مغس
وعاملين لو حرس
حرسك حرفك والايمان والعدل
وانت الجيش الحامي نفوس وعقول
مالقاعدين في الثكنةوعزل من كلماتك ديل
ما ا نت حوار اكتوبر
وما انت فقيه إبريل
جاين من وين
عدوك مسكين
وانت نديد النيل
مالن قايلنك هنت علينا
وانت لدينا
خاتي الشق نقي الإحساس
لا بعت المبدا وخنت
لا اتواطيت
لا طاطيت الحرف الراس
لي سراق عاملين حراس
وانت لدينا
الخير الفاضل فينا
زول الله حبيب الناس
ومن تبيت
زي شمشين ، وتلاتة
نورت بحسك ليل البيت
وحروفك فينا الصادقة ، حلاتة
في أعماقنا بنت وبنيت
أوطان من علو الشان
من فرح ، أشكال وألوان
ويعني شنوالانسان؟؟؟
الانسان الحب الشامخ
فوق جبل العدل الراسخ

والليلة ، ودرسك واضح ياأستاذ
كيفن في حصاناًراكبو عدوك بتفكر
وكيف لي سيفاً شايلو عدوكا تشكر
كيفن يا زول تفتيحة
ينقاد للأعمى العينو نصيحة

آجيش !
فد زول؟؟؟
يا فرحتنا بجيشاً زعزعو زول
واطمئنانا بسيفاً حطمو قول
آهاشم
انت الحاكم والمسئول
أقرا لنا بيانا الأول
واصرف لينا شعرنا أوامر
نطلع على طول
ومعاكا نطول

طيب

يافتحي القصيده جميله خليتنا نتلخبط دي من تأليفك ولا تبع هاشم صديق
لك كل الود والورد

الاخ بحيرى


لك الشكر على القصيدة الرائعة
انا من المعجبين " بعمق " باشعار المبدع هاشم صديق

و لكنى اعتقد ان " تمجيده لذاته " فى هذه القصيدة كان ينبغى ان " يأتى من غيره " لا من هاشم صديق .. فما عهدناه نرجسيآ

لك تحياتى

انا قصدت تركيز القضية فيما ينفع

صراعنا وصراع هاشم مع النظام

بعد ما أوشكت تنجرف فيما يضر
وأحاول التوثيق هنا
مدارات ؛ منبر الثقافة السودانية على
الإنترنت

ولا اعتقد ان هناك لبس في انها ليست من تأليف هاشم


شكرا لكما بعمق

اخي الرائع بحيري
شكر لك وانت تربطنا بي هاشم صديق
يديك العافيه










********************************
البناتنا حياتنا جهاتنا طلوع الوقت الما كضاب

اكثر من رائعة يابحيري ودا قول الحق والحق ما ضاع

وانتما ايضا لكما الشكر
ولهاشم التحايا لا تزال

الاخ فتحى بحيرى

احييك باسم هاشم صديق

وتاكد ان كل ما كتبته عنه قد وصله واطلع عليه

ثق تماما ان هاشم لازال هو هاشم

لكن اظن ان الوطن سيضيف اسما جديدا لقائمة المهاجرين عنه

كم هو محزن ان يصبح الوطن طاردا لابنائه ...وأى ابناء

تسلم

أشكرك جدا دريم
واشكر هاشم
ووالله ان هاشم احق بالبلد من 1000نظام وحكومة
وياليت
"
الله يكضب الشينة