فقع مرارة ( خرمجة .. ونسة مع الذات ...زكريات.. قد تخرج حكمة لكنها بالتاكيد غير مقصودة )

شغلني اموالي واهلي، وهم زينة الحياة الدنيا ، فانا اعمل لدنياي كانني اعيشها ابدا ، اما اخرتي ... هذا شاني وربي .

مرتضى فنجاطة
صديق قديم ومعرفة زمن الشباب .. هاجر الى هولندا ومنها مؤخرا الى دولة اوربية اخرى .
عندما هاجر الى الاراضي المنخفضة .. اسكنوه مثل الجميع في معسكر لفترة زمنية معينة ...
استكمل تلك الفترة وارادوا ان يوزعوه هو ومن معه بعد ان اعتبروهم لاجئين الى مختلف مناطق هولندا
كان ان وزع الى منطقة ريفية

دق جرس
وقال للمسئولين ..

انا ود قلبا(1) .. ود امدرمان
وما حا امشي الا لقلبا .. امستردام
يا كده يا ما مارق من المعسكر ده
عاوزين تودوني الريف مع المحطات(2) والترلولة (3)
وتودوا المحطات لي امستردام

استجاب المسئولين لرغبته
وتم توزيعه في امستردام


___________________________________
(1) ود قلبا : وصف يطلق على اولاد امدرمان ويتفاخرون به بمعني انهم اولاد قلب هذه الاراضي وهو امدرمان قلب السودان
(2) المحطات : وصف يطلقه اولاد العاصمة على سكان الريف ظهر هذا الوصف في الجامعات ويعني بانهم ابنا مناطق هي محطات للقطار الذي يحملهم في طريقهم للعاصمة
(3) الترلولة : ايطا وصف يطلق على سكان الريف والترلولة يقصد بها بوري اللوري وهو يدخل القرية فكانت اللواري قديما عند دخولها للقرى تطلق صافرات مميزة معلنة عن وصولها هكذا ترلولالا ترلولالا تااارلولالا

حلة العبيد

الركن الجنوبي الشرقي للثورة الحارة الثامنة ... اغلبية شبابها من ذوي البشرة السمراء الداكنة ..
ارجل ناس ومقطعين كل شي
علاقاتهم الاجتماعية متينة وكانهم ابناء منزل واحد – الغريبة بتشابهو زي التعاريف -
في الكورة لعابين وما بتغلبوا بالساهل .. فيهم الحرفاء وفيهم بتاعين الكنشاسات (4)
اذكر منهم
سوسيوه ، من يقابله الان سيستغرب للتسمية وهو من ظرفاء المدينة، الزنجي لعب حارس مرمي باشبال الهلال ، محمد سكسك ويشبهونه بسكسك الاصلي اسامة ادم ريحان لمهارته في اللعب ، التيوة اخوان مجدي ومعتز عز الدين الاتنين ديل كل واحد فيهم شال بطولة الجمهورية للملاكة في الوزن فوق الثقيل والتاني في الثقيل ومجدي تحديدا اعتقد انه سجل اسرع زمن في السودان وقد يكون في العالم لضربة قاضية في مبارة ملاكمة ولو كان هناك من يهتم بالاحصاءات والتسجيل لدخل موسوعة جينس كاسرع زمن لضربة قاضية في مباراة بطولة فقد كسب مبارات النهائي على البطولة من ضربة واحده يمينية سريعة سقط على اثرها المنافس مغشيا عليه ، ومنهم كذلك محسن مونج صلاح النيني الجابا واخرين ...

بالمناسبة هم انفسهم من اطلق على حلتهم اسم حلة العبيد

______________________
(4) الكنشاشة : هي الارتماء على الارض ومحاول تخليص الكرة من الخصوم بطريقة عنيفة

و المعلم ضلف وين يا وليد

سلامات فاضلابي

المعلم ضلف مذكور يا فاضلابي لكن بلقبه التاني "الجابا"
معقول تُذكر التامنة ويُنسى المعلم ضلف او الجابا
بالتاكيد لا

كيف والبنية وامها

Quote: بالمناسبة هم انفسهم من اطلق على حلتهم اسم حلة العبيد

Well said
وفرت على نفسك صداع وجدل كتير

هاك دي برضو من غير قصد بس حكمة

زمان ياوليد فى الحي بتاعنا كنا قاعدين بعد إنتهاء عرس وهاك يا ونسة مع الجكس بتاع الحلة فرصة يا عمك لاتعوض المدسية تمروق اليوم دأك الممنوعة من المروق. مولد يا عمك ونحنا بنطق الحنك مع الجكس والمناسبة دي صاحبك مسخو فى نص القعدة دي .عندنا وأحد مسكين مابتاع حنك ولا حاجةزول الله ساي
من غير أى سبب قام أتمطة ورفع إدينو فوق دليل على التعب والسهر وقال أنا ماشي أنا( موراهق) شديد والجماعة ماعرفو يمشو وين وهو يقصد أنا مرهق
شديدوخرب لينا القعدة والجكس شتت والحنك طار ...

احمد معتصم
سلامات

زولكم قلشة قلشة عدوك
هاهاهاهاهاهاههاهاهاهاهاهاهاهاها


تسلم

Quote: Well said وفرت على نفسك صداع وجدل كتير

يا معلم نحن بقينا خبره
وبنعرف ناس الغرض السيئ بفتشوا لي شنو
يلقوها عند الغافل

خالد الشلن (5)

ود نشيط خلاص ... نحيف ومسلوع وبشبه فيدوديدو الدمية .. حتى شعر راسه غالبا ما يكون منكوش (6) الى الاعلى كما فيدوديدو
الشلن ده زول حبوب ومحبوب للحد البعيد ...
زاملته في سنوات الدراسة الجامعية وكان صديق لجميع الدفعة بمختلف شللياتها
وعلاقاته ممتده خارج محيط الطلاب حتى انه كان صديق الاساتذه والادارة
اذكر انه في مرة ونحن في الكفاتريا الرئيسة
سال احدى الزميلات
فقال : الساعة كم يا فلانة؟
ردت عليه بحسن نيه : ما لابسة..
رد الشلن بسخرية وخبث ودود : ميطي (7) يعني يا فلانه

انفقعنا من الضحك .. حتى فلانة صاحبة القصة والمشهورة بجديتها تفاعلت معها بدون ان تتحسس او تضمر شيئا في نفسها لان الشلن معروف عنه انه زول سااااكت


الشلن ده زول نقي ..
نعم هو عنده لغوسته ..
لكن يغلب النقاء فيه على ما دون ذلك

__________
(5) الشلن : لمن لا يعلم هو العملة المعدنية القديمة فئة الخمس قروش
(6) منكوش : غير مهذب وممشط
(7) ميطي : بدون ملابس كما ولدك امك

Quote: رد الشلن بسخرية وخبث ودود : ميطي (7) يعني يا فلانه

برضو ياوليد
ملعوبة

عامر ان شاء الله دايما ضاحك

فعلا يا حبيب الشلن لعاب ولعبه مقبول ما فيه فاولات خطره

ليه بتاعين البنقو والمومسات صداقاتهم متينة وصافية وراسخة وممتده اكتر من غيرهم ؟
ليه في صداقاتهم يميلون للعطاء اكتر من ميلهم للاخذ عكس الاخرين ؟

مجلة صباح

مجلة سودانية 100% ... كنا نستمتع بقراءتها ونحن صغار
كل شي فيها ينضح سودانوية الرسومات الالوان التعليقات التعابير الكاركتيرات
هي بيئة سودانية خالصة
تمتعنا فيها مع اولاد الحلة
فنجاط ومدامه
الكوتش
وحكايات وقصص اخرى


لماذا توقفت ؟

حلة الباطنية :
الثورة الحارة 13 ..
ديل ناس عجيبين جداً يا وليد حلة صعبة خلاص وأتحدى لو في زول سمع بي عرس في الحارة 13 تم بسلام ودون مشاكل خصوصاً لو كان في الباطنية ..
ياخ انا مرة كنت ماشي بالليل أجيب فول فجأة سمعت ليك صوت :
يا زووووووول هييييي أقيف هنا ..
وسمعت ليك صوت الجماعة بيقولوا أرحكاكم نكسّر الزول ده ..
لمن وصلوني واحد منهم قال لي:
ده إنت يا عمر شيخ الدين ؟؟؟
أحححححححححححي منك أسة ضيعت علينا دقّة زول ..

قال لي والله ما عندنا موضوع قلنا البيجي بي هنا ندقو ونبرمج بيهو ..
إتخيلت روحي لو كنت ماشي في حلة تانية وناسا ما بيعرفوني


تخريمة :
عجبتني مومسات دي ..

عمر الفاروق يا صديق

اخبارك

بعرفها الباطنية موش حلة ناس عبد السلام حميده ولا ما ياها ؟

بالمناسبة حلة الباطنية الاصلية تقع في الركن الجنوبي الشرقي للثورة الحارة السابعة حلة اولاد شمس الدين ناس تبارك تماضر رشا المقداد ... الخ ( ربنا يحفظهم )

Quote: عجبتني مومسات دي ..

يا عمك قلنا نطعمها شوية ما نختها ناشفة يقوموا يحزفوا البوست
اعتبر نفسك بتقرا في ترجمة فلم اجنبي

تبا لك ...

الحبيب الشفت
تحياتى وكيف الاولاد وامهم
كعادتك تمارس الكتابه الشقيه الممتعه
وفعلاً صدقت و الله الشلن زول سااااكت
مستمتع وبجيك

شبكه يا فرده
الاولاد تمام
انت اخبارك شنو وناس البيت خصوصا ابو صلعة الكبير

في انتظار مرورك يا حلو

حكي جدا ممتع يا شفت
متابعين يشغف

Quote: ليه بتاعين البنقو والمومسات صداقاتهم متينة وصافية وراسخة وممتده اكتر من غيرهم ؟ ليه في صداقاتهم يميلون للعطاء اكتر من ميلهم للاخذ عكس الاخرين ؟

بس يا ريت لو تشرح بتفصيل أكتر
وتطعمو بشوية أمثلة

ولي يا صاحب يا جميل ..
حكاوي رائعة في الإجتماع والرياضة والمثاقفة..
لكن خليك تفتيحة .. كشف لي جنس ده..

Quote: بس يا ريت لو تشرح بتفصيل أكتر وتطعمو بشوية أمثلة

مثل ميت .. و أعمل نايم
طير الكورة بره .. خليها تطلع تماس



















---------------------------------------
مولانا الخضر .. مشتاقون يا عمك .. لكن لقيتك حريف في الكرات المعكوسة

دا بوست جميل
يروق الاعصاب رغم انو كاتبو الشفت ..

عادل يا راقي ومهذب
مرورك يسعدنا بالتاكيد

لكن يا عادل انا بقيت لبطة للدرجة دي

ود نور يا فرده
لكن عبايتك ما شرط
بالمناسبة رئيسكم كان ود حلتنا حتى اسأل سينما الرابعة وعيسى الحلاق
ويوسف الخبير ( يوسف عيدابي) لحدي هسع عنده كراس بتاع حريق ووست محتفظ بيه لانو الرئيس دبي ما ضي في العشرات الشايلها
( لاي صاحب غرض اللعب كان غير مطعم ودي بفهموها بتاعين العشرات بس )
هاهاهاهاهاهاهاهاهاهاهاهاهاها
__________
صحبك خدر عاوز يشربكني
لكن يا معلم
الكورة واطا.. وبلنتات مافي
والحكم دافعين ليه
خلي يشوف ليه شغله تانية

ود البشرى
مشتاقين وبس

Quote: حكي جدا ممتع يا شفت متابعين يشغف

عبد المحسن
تشكر يا مان

Quote: ليه بتاعين البنقو والمومسات صداقاتهم متينة وصافية وراسخة وممتده اكتر من غيرهم ؟ ليه في صداقاتهم يميلون للعطاء اكتر من ميلهم للاخذ عكس الاخرين ؟

ليـــــــــــــه؟

انور يا كنق
سلامات

موش حاجة غريبة وعاوزه تفسير !

مدرسة جمال عبد الناصر الثانوية

كانت لاولاد المدارس المصرية كانت افضلية على امثالهم من طلبة المدارس السودانية بمقايس الشباب وذلك للاسباب :
1) اغلب المدراس المصرية طابقين ومبنية كويس - عمارات يعني -
2) لا يوجد زي مدرسي موحد لطلبة المدارس المصرية عكس السودانية
3) الرقابة في المدارس المصرية اقل كثيرا من تلك التي في السودانية
4) كثير من المدارس المصرية مختلطة
5) توجد في المدارس المصرية الوسائل الترفيهية المساعدة في العملية التليمية والمكملة لها وكانت مكتملة مثل ( قاعات رياضية ومعداتها ، مكتبات متكاملة ، ادوات موسيقية ، ... الخ )

كنا نقشر(8) ونحن ماشين المدرسة .. وكنت ادخلها الساعة الثامنة لاخرج منها الساعة التاسعة لاجلس بقية يومي امام المدرسة مع الاصدقاء .. وكانت كل سبل الدك (9) متاحة .. جامعة الفرع بايامها المفتوحة واركان نقاشها ومظاهراتها .. قاعة الصداقة ... المتحف وحدائق مايو .. السوقين العربي والافرنجي .
حتى الدك في مدرسة جمال عبد الناصر مفيد مقارنة بالدك في غيرها من المدارس السودانية .. المعنى انو الطالب بدك ويقضي يومه في ركن نقاش ولا في يوم مفتوح يحي حفلاته محمد وردي .. ولا يحضر ليه فلم في القاعة .. اما طلبة المدارس السودانية فدكهم قعاد تحت الشجر لتدخين السجاير - حمراء ولا خدرا - ولا الذهاب الى الحفر او البحر

كمان تجد ان اغلب طلبة المدارس المصرية نزعتهم السياسية قومية ، وذلك بسبب عدم وجود التكتلات الحزبية داخل اتحادات المدارس المصرية لانهم طلاب سودانيين ضد ادارة ومدرسين اجانب ان جاز وصف العلاقة بين الطلاب والادارة بالضدية ، اما طلاب المدارس السودانية وبما انه لاتوجد قومية اخري منافسة لهم في مدارسهم اتجهوا الى المنافسة فيما بينهم والانتساب الى تكتلات حزبية او قبلية او جهوية .
اذكر انني فصلت 15 يوم بسبب مشكلة مع معلم التربية الوطنية ، حيث انه في كل حصة تربية وطنية ياتينا ليحكي لنا عن مصر وماثرها وعظمتها .. مرة عن الاهرام ، ومرة عن السد العالي ، ومرة عن حرب اكتوبر ... في يوم دخل علينا ليحكي لنا عن حرب اكتوبر وشجاعة الجندي المصري وذكاءه .. فقاطعته وقلت له :
يا زول احكي لينا عن السودان نحن هنا في السودان ونحن سودانيين
لم يتقبل الحديث فانفعلنا وتطور النقاش حتى كاد ان يحصل اشتباك - بلادة حقت طالب مراهق ضد معلمه -
في الاخر فصلت اسبوعين وحرمت من دخول حصة التربية الوطنية طيلة العام - احسن زاتو-
لكن كمان على الصعيد الاكاديمي طلاب المدارس المصرية مقارنة بنظرائهم في المدارس السودانية كانو ميحي(10) وقاعدين في السهلة(11)

___________
(8) نقشر : نجتهد في اللبس ونتهندم
(9) الدك : هو التسرب من اليوم الدراسي للطلاب والهروب من الحصص
(10) ميحي : لايمتلك شيئا
(11) السهلة : مكان فسيح ممتد خالي من اي شي

سمر (القمر)

سمر القمر هي احدى جميلات جامعة النيلين في التسعينات .. علم على راسه نار .. نص الطلاب مكسرين(12) فيها .. لكنها كالقمر عالية تُرى ولا تُطال
احد المعجبين كان يستغرب كيف لسمر في يوم كتاحة(13) وغبار والناس كلها مغبره .. كيف لها ان تكون نظيفة ؟ .. وحقيقة حتى في ايام الكتاحات تظل سمر نظيفة وضاءة وكان الغبار ياتي عندها يقبلها ولا يعلق بها حتى لا تتسخ .

في يوم ونحن نجلس كالعادة في كافتريا المواني البحرية
جاءت سمر فاشتعل المكان .. الكل يتهامس وينظر اليها
احد الجالسين معنا زول ساخر سأل سوال سخيف شوية وقال :
انتو يا جماعة سمر دي بتسوي زي الناس؟ (14)
رد علية من هو اسخر واسخف منه :
امال الطحنية الفي الدكاكين البتاكل فيها دي مصدرها شنو !!!

______________
(12) مكسرين فيها : معجبين بها
(13) كتاحة : رياح قوية تاتي في فصلي الخريف والشتاء تحمل معها كميات كبيرة من التراب
(14) : بتسوي زي الناس : تخرج فضلات الطعام كما الخلق المعنى هل هي تتبرز

على خلفية هزيمة المريخ من الصفاقصي في مباراته بالخرطوم 4 : 2
تسرى الان نكته جميلة ويقال فيها :

انه وعلى خلفية ان المريخ كان يفترض به ان يقابل الانتر ذلك الفريق الايطالي العريق وبعد دخول الهدف الرابع في مرمي المريخ
تحرك مدافع المريخ الايسر موسى الزومة الى كابتن الفريق وهساله بجديه

انت يالعجب با اخوي : ده الصفاقصي ولا انتر ملانو ؟

في برنامج دبلاج بمزاج - فكرته دبلجت الافلام الاجنبية باصوات سودانية لاغراض فكاهية - للرائع عوض شكسبير احدى الحلقات فيها تهكم في الهلالاب وتخصصية العجب فيهم
في تلك الحقة الظريفة والتي كانت شعار للبرنامج يسال احد بائعي البقالة احد المشترين
زكريا زكريا العجب كيف ؟
يغضب المشتري من السوال الخبيث ويهتاج ويكسر المحل

رد الهلالاب على الحلقة بنكتة ترسل على المحمول تهكما في حارس المريخ المتسبب في كل خسائر مباريات الفريق الاخير فحواها

زكريا .. زكريا..
بهاء الدين كيف ؟

Quote: كنا نقشر(8) ونحن ماشين المدرسة .. وكنت ادخلها الساعة الثامنة لاخرج منها الساعة التاسعة لاجلس بقية يومي امام المدرسة مع الاصدقاء .. وكانت كل سبل الدك (9) متاحة .. جامعة الفرع بايامها المفتوحة واركان نقاشها ومظاهراتها .. قاعة الصداقة ... المتحف وحدائق مايو .. السوقين العربي والافرنجي .

و كافتيريا حنقة ياوليد

يا معلم شكلك كنت بتشرك لبنات القبطية

كشفت روحك يا مان

Quote: مدرسة جمال عبد الناصر الثانوية كانت لاولاد المدارس المصرية كانت افضلية على امثالهم من طلبة المدارس السودانية بمقايس الشباب وذلك للاسباب : 1) اغلب المدراس المصرية طابقين ومبنية كويس - عمارات يعني - 2) لا يوجد زي مدرسي موحد لطلبة المدارس المصرية عكس السودانية 3) الرقابة في المدارس المصرية اقل كثيرا من تلك التي في السودانية 4) كثير من المدارس المصرية مختلطة 5) توجد في المدارس المصرية الوسائل الترفيهية المساعدة في العملية التليمية والمكملة لها وكانت مكتملة مثل ( قاعات رياضية ومعداتها ، مكتبات متكاملة ، ادوات موسيقية ، ... الخ ) كنا نقشر(8) ونحن ماشين المدرسة .. وكنت ادخلها الساعة الثامنة لاخرج منها الساعة التاسعة لاجلس بقية يومي امام المدرسة مع الاصدقاء .. وكانت كل سبل الدك (9) متاحة .. جامعة الفرع بايامها المفتوحة واركان نقاشها ومظاهراتها .. قاعة الصداقة ... المتحف وحدائق مايو .. السوقين العربي والافرنجي . حتى الدك في مدرسة جمال عبد الناصر مفيد مقارنة بالدك في غيرها من المدارس السودانية .. المعنى انو الطالب بدك ويقضي يومه في ركن نقاش ولا في يوم مفتوح يحي حفلاته محمد وردي .. ولا يحضر ليه فلم في القاعة .. اما طلبة المدارس السودانية فدكهم قعاد تحت الشجر لتدخين السجاير - حمراء ولا خدرا - ولا الذهاب الى الحفر او البحر كمان تجد ان اغلب طلبة المدارس المصرية نزعتهم السياسية قومية ، وذلك بسبب عدم وجود التكتلات الحزبية داخل اتحادات المدارس المصرية لانهم طلاب سودانيين ضد ادارة ومدرسين اجانب ان جاز وصف العلاقة بين الطلاب والادارة بالضدية ، اما طلاب المدارس السودانية وبما انه لاتوجد قومية اخري منافسة لهم في مدارسهم اتجهوا الى المنافسة فيما بينهم والانتساب الى تكتلات حزبية او قبلية او جهوية . اذكر انني فصلت 15 يوم بسبب مشكلة مع معلم التربية الوطنية ، حيث انه في كل حصة تربية وطنية ياتينا ليحكي لنا عن مصر وماثرها وعظمتها .. مرة عن الاهرام ، ومرة عن السد العالي ، ومرة عن حرب اكتوبر ... في يوم دخل علينا ليحكي لنا عن حرب اكتوبر وشجاعة الجندي المصري وذكاءه .. فقاطعته وقلت له : يا زول احكي لينا عن السودان نحن هنا في السودان ونحن سودانيين لم يتقبل الحديث فانفعلنا وتطور النقاش حتى كاد ان يحصل اشتباك - بلادة حقت طالب مراهق ضد معلمه - في الاخر فصلت اسبوعين وحرمت من دخول حصة التربية الوطنية طيلة العام - احسن زاتو- لكن كمان على الصعيد الاكاديمي طلاب المدارس المصرية مقارنة بنظرائهم في المدارس السودانية كانو ميحي(10) وقاعدين في السهلة(11)

ياوليد والله ايام بالجد كانت ولا اروع
خصوصاً نحنا في الكلية القبطية اكان برنامجنا
السبت والخميس فيلم هندي في قاعة الصداقة ويوم الاحد اجازه
حفلات المكتبه القبطية ودفار الكلاكله الكان بقيف جنب بيت عمك وقيع الله
بتاع البوفيه ...

وليد تعرف رغم نديتنا في التعامل مع ذلك الاستاذ الوافد
لكنه حقاً زودنا بالكثير من المعارف في الفلسفة والاجتماع
بالاضافة الى تلك الاركان الفتية للنقاش بجامعة النيلين
وغيرها وغيرها من مآثر المدارس المصرية وجامعة الفرع
كانت الاساس الفكري لنا حتى الان



ياربي وين المجموعة بتاعت دفار الكلاكله

البصاص غايتو اتجدعنا زمان

والحمد لله لا كان عندنا صول ولا كان في جلد


والله نحن في جمال كانت اجازتكم حقت الاحد ماغسانا جنس مغسة

بس عزانا الوحيد انكم كنتو عزابه
ونحن مطعمين في التجارية

Quote: بالمناسبة حلة الباطنية الاصلية تقع في الركن الجنوبي الشرقي للثورة الحارة السابعة

حلة ناس الجثة؟؟

بتعرف يوسف الخبير كمان؟؟ ((ابو حبيرة)) وعيسى الحلاق!! وناس الرابعة((النجمة وزائير))

أكون يا وليد زمان خميتك كنشاسا ماتقول لي كنت قون!!

أكيد بتعرف معتز ابو الجاز!!

انت يا سامي كنت بتشجع المريخ ده من منازلهم
يا عمك نحن اولاد اشبال المريخ في الثورات كنا اعلام بارزه هناك
اكيد كنت بتكون معجب بي وبتقف وبتجي تتفرج فيني مخصوص
هاهاهاهاهاهاهاهاهاهاهاهاها
انا يا سامي كنت قون اشبال المريخ من 91 لحدي 95 وكابتنهم اخر سنتين لعبتهم


ابوحبيره فردتي
وابو الجاز فردتي للدين
كمان ناس خدر نقد ووليد عباس وابوعكر
كل القروب داك فردي

انت بتعرفهم من وين ؟

وليد

Quote: يا معلم شكلك كنت بتشرك لبنات القبطية

يعنى بتقيف فى السور اليوم كلو ملح ساى لا بتمشى
حنقة ولا كافتيريا الوداد تسالى ساى

نحن الجكس كنا محددين وكتو بالترحيل بس
خلاف كده وكتنا كله للفرد

انا من رواد الوداد بقعد في مسطبتها ديك بالصباح
لمن يجي الضهر والشمس تقلب
بقعد تحت النيمة وكشك المكتبة الشلعوه داك
ولو خلاص فترت بدخل انوم في الجامع الوكت داك ما كان تامي

صحيح ان امدرمان ساخنة اكثر من رصيفاتها الخرطوم والخرطوم بحري ..
السبب انها تستمد سخانة اجوائها من سخانة حرارة قلوب رجالها ودفء احضان نسائها

والما عاجبو يشرب من البحر

يا وليد,

ونستك مع الذات والذكريات جميلة جداً
والخرمجة دي تستحق المواصلة
وما تخاف, ما في أي حكمة بتخرج منها !!

بس ,
وده طلب من قاريء

صلح لي الترقيم بتاع التفسيرات في حكاية المدرسة
أخوك بينضرس من الحاجات دي !


ـــــــــــــــــــــــــــــ
الواحد ما عارف مداخلاتو بقت زي ملاسي ليه
مسيخة, وما منها فايدة

معتز يا حلو

Quote: صلح لي الترقيم بتاع التفسيرات في حكاية المدرسة أخوك بينضرس من الحاجات دي !

تم الاجراء
وشكرا على التنبيه

Quote: وما تخاف, ما في أي حكمة بتخرج منها !!

طمنتي يا معلم
كده يا دوب الواحد يقدر يسرح ونفسه مفتوحة

Quote: الواحد ما عارف مداخلاتو بقت زي ملاسي ليه مسيخة, وما منها فايدة

ارايتو يشبه ابو

اتاها يركض وهو مبسوط وفرح وقال لها:
الليلة جبت ليك ورد

ردت عليه ببرود :
وده بسلقوه ولا بشوه...!!

الكلوب

كل من لعب الدافوري (15) يعرف ما هو الكلوب ... والكلوب لمن لا يعرفه هو حذاء رياضي سوداني من جيل السبعينات والثمانينات مصنوع من البلاستيك الجاف جدا .. وهو قاسي عند لبسه بل هو قاسي جدا ... وضربته تودي الى المدرجات .
مميزات الكلوب انه طويل الاجل .. ولا يحتاج الى صيانه لانه لا يفتح ولا يتشقق
كمان انه يذهب الشقوق التي في الارجل ويجعلها ملساء نظيفه
عيوبه ان يخزن الدم في اطراف الاصابع وكل المناطق المرتفعة والناتيئة في القدم فتصبح سوداء اللون داكنة وخشنة.. مؤلم للحد البعيد..ويخرج روائحة نتيه كريهة ...وبطفش الكور
_______________
(15) الدافوري : هي منافسات في كرة القدم في الاحياء الشعبية او نحوها وتكون في العصريات او ايام العطلات صباحا ولا تخضع لقوانين كرة القدم 100%

رجاء ( بت كسلا )

بت ضكرانه بي 100 راجل .. وده ما كلام ونسة .. زميلة دراسة ودفعة زيها زي خالد الشلن .. هي من بنات كسلا اضطرهم العلم الى النزوح غربا للخرطوم ..
ورجاء هذه حسناء جميلة فيها ريحة الحبش مثلها مثل اغلب بنات كسلا

تعرض لها احد زملائنا بسوء .. وهو ود زوات ولين شوية ..
لانها وحدها في الخرطوم وانها جميلة واريحية وتشبه الحبش اعتقد انه قد ينال منها ما يريد .. كيف لا.. وهو ود الزوات الثري جدا وابن الاسرة المعروفة

لم تسكت رجاء كما يفعل البنات في تلك المواقف ويتحاشون السخفاء حتى لا تتعرض سمعتهن الى رشاش الموقف .. بل وقفت في منتصف الكافتريا .. وانهالت عليه بالسباب والاساءات والضرب كذلك .. تدخل بعض الزملاء لفض الاشتباك وسالها احدهم
ماذا حدث

ردت بكل ثقة وحكت الواقعة كما هي بدون نقصان
غضب الزميل وتحرك ليقتص لها من الثري السخيف

اوقفته رجاء وقالت له

زي ده ما بدقوه الرجال
زي ده بدقو انا بي فردت جزمتي دي .. وقلعت نعلها وضربته به على راسه

ثم قالت بثقه وفخر :

انا اهلي عشان واثقين مني فكوني من كسلا وخلوني اقطع ثلاثة كباري لحدي ما اصل هنا ( حنتوب - والقوات المسلحة - وشمبات )
انت اهلك ساكنين بحري دي
ما بخلوك تجي براك الا يجيبك السواق بالعربية ويرجعك

علمنا حينها انه قد تعدل المرأة اكثر من رجلين احيانا

يا عمك كنت ماشي كويس في ديل

Quote: ونسة مع الذات ...زكريات

مالك بديت الـ

Quote: خرمجة

Quote: السبب انها تستمد سخانة اجوائها من سخانة حرارة قلوب رجالها ودفء احضان نسائها

و

Quote: فقع مرارة

Quote: والما عاجبو يشرب من البحر

Quote: قد تخرج حكمة لكنها بالتاكيد غير مقصودة

حكمة شنو ياعمك
دي خرجتها درابة عديل


و مشتاقون بالأكتر
عامل وشك (الصبوح) دا

البوست اسمو فقع مرارة

الباقي كلو داخل بين قوسين يشرح فقع المرارة ده
واول حاجة الخرمجة

وقع ليك يا حلو

Quote: ودفء احضان نسائها

انا عارف دي العقدتك يا حبوب
لكن اذا ساء فعل المرء ساءت ظنونه
قد يكون حضن المرأة حلالا بلالا بل يفترض به ان يكون كذلك
انت مالك سرحت بعيد
وقد يكون الدف في الحضن ما لي اغراض جنسية
ممكن تكون اغراض ود وكده
يعني زي قلدة الام لطفلها
ده بسموه حضن دافي

اي يا معلم امدرمان سخنة بحرارة قلوب رجالها ودفء احضان نسائها العفيفات حلالاً
والما عاجبو يشرب ما اقرب ترعه جمبو

اسمع يا ود البشرى ان بتحاحين فوقي عاوزن توديني التوج انا عارف

الشوق بالكراتين مستف

Quote: انا عارف دي العقدتك يا حبوب

فهمتني غلط ياشفت

Quote: لكن اذا ساء فعل المرء ساءت ظنونه

وفي دي إنتهيت مني عديل يا عمك
يا حبيب الخرمجة الأنا قاصدها هي الوهمة بتاعة أولاد امدرمان دي وإنو امدرمان هي البتاع و هي الشنو ماعارف

يمين لو ما الهلال وسوق العناقريب وكلية التربية أمدرمانكم دي كان وقعت لينا في كرتلة ما دايرنها
قوموا لفوا ياخ

Quote: اسمع يا ود البشرى ان بتحاحين فوقي عاوزن توديني التوج انا عارف

العفو ياخ بوست ظريف زي دا يمشي التوج كيف ؟

بالمناسبة جدا أُجبت بشخصية بت كسلا

عليك كان لاقيتها حييها لي معاك

ود البشرى يا حلو
والله انتو امدرمان دي قاطعة فيكم عرق

حيييييييي انا

قلت لي الهلال وسوق العناقريب

نسيت المطار
نسيت الازاعة
نسيت التلفذيون
نسيت ياقي كليات جامعة الخرطوم
نسيت مستشفى الخرطوم


هاهاهاهاهاهاهاهاهاهاهاها

Quote: بالمناسبة جدا أُجبت بشخصية بت كسلا عليك كان لاقيتها حييها لي معاك

يوصل ان شاء الله

Quote: ليه بتاعين البنقو والمومسات صداقاتهم متينة وصافية وراسخة وممتده اكتر من غيرهم ؟ ليه في صداقاتهم يميلون للعطاء اكتر من ميلهم للاخذ عكس الاخرين ؟

Re: الحقوا رجال السودان بدول الخليج من ضياع مدخراتهم بس...ات اثيوبيا الجميلات

ٌذا علاقة!

تسلم انور

ايضا صحيح ان امدرمان مغبره ووساخنه
السبب ان اهلها يهتمون بنظافة نفوسهم على حساب نظافة مدينتهم

هل لو تعدى اي سوداني الخطوط الحمراء في برطانية كانو برحموه ؟
كم مسلم مسجون الان في سجون الغرب وذنبه الوحيد هو الاسلام ؟

وليد عليك الله

كدي ذكرنا حفلات المكتبة القبطية
وايام كان الهادي الجبل في قمتو

وجماعة الجو الرطب

يااااه والله ايام يازمن



ياربي شباب الكلاكله صنقعت
هسي الدنيا شن سوت فيهم

Quote: انت يا سامي كنت بتشجع المريخ ده من منازلهم يا عمك نحن اولاد اشبال المريخ في الثورات كنا اعلام بارزه هناك اكيد كنت بتكون معجب بي وبتقف وبتجي تتفرج فيني مخصوص هاهاهاهاهاهاهاهاهاهاهاهاها انا يا سامي كنت قون اشبال المريخ من 91 لحدي 95 وكابتنهم اخر سنتين لعبتهم

هههههههه

لا الوقت الإتدهورت فيه الكورة دا أنا كنت بره السودان الحمد لله!!

لو الاشبال كانو بيلعبو لحدي ما عمرهم يصل طرادة(25) تكون مصيبة..

ابو حبيرة مولود سنة 58 اقل شي وابو الجاز مولود سنة ام كلثوم جات السودان(( ابو الجاز رغم الحصل ليه كان قون النجمة وحريف جداً)) الخبير منظراتي درجة اولى((واوعك تحلق عند عيسي))

يا ولي مريخ شنو البشجعو من منازلهم..

اقول ليك شي من منازلهم معناها على بعد 300 متر من مكان ميلاد المريخ...

Quote: ابوحبيره فردتي وابو الجاز فردتي للدين كمان ناس خدر نقد ووليد عباس وابوعكر كل القروب داك فردي

الشياب ديل أصحاب ابوي بعرفهم لاني عشت فترة في نفس الحي قبل ما ابو الجاز يبقى ود ((راهات)) ما راحات..وابو حبيرة يبقى بتاع((طاولة))

برضو تقول لي

Quote: انت بتعرفهم من وين ؟

هههههههههه

من زمان اعاين للصور المقلبنة دي واقول المجرم دا أنا شفته وين!!

بلاهي البورد ملان عصابات اتاريه

Quote: لا الوقت الإتدهورت فيه الكورة دا أنا كنت بره السودان الحمد لله!!

وعامل لي فيها ود صغير
ياخ انت مغترب من شنة 91
وتقول لي ابوحبيرة اكبر منك

هسي يا ولي لو كنت من رابطة معجبي كتاباتي ومذكراتي في الهند كان أحسن ليك من التصنيفات الواقعة فيك دي مرة سلفي ومرة ضلالي ومرة شنو كدا ما عارف

91 قلنا ليكم طلعنا نقرااااااااااااا إغتراب شنو يا عمك!!

ناس نوبي ديل لمن طلعو أنا كنت في الابتدائي!!

المهم أنا عرفتك ومكسب كبير وفعلاً إنت يبدوا جيل جديد من نوكيا!!

الجيل التالت!!

أشبال المريخ كانو العب من تيم الهلال الاول!!

معليش كترت ليك ((الوشوش الضاحكة)) إتعلمتها قبل يومين((نقطتين فوق بعض ودا دجاجة!!))

ما بتشارك في منتدى المريخ مالك؟؟

ولا زي اساسي مشترك من سنة 2005 وكاتب 4 بوستات وتجي تعمل لينا فضائح هنا!!

Quote: أشبال المريخ كانو العب من تيم الهلال الاول!!

صدقت

هاهاهاهاهاهاهاها

Quote: ما بتشارك في منتدى المريخ مالك؟؟

يا معلم نحن بنشجع من بعيد وبدون تعصب
اخير كده

الاخ وليد...ولدنـا..
بوست جميل مع ايام جميله..
أديك حاجتين منى
خريستو...
ومن لايعرفه بامدرمان?..

من ضمن ما اشتهر به ,قراءه الصحف فى بيوتالاعراس والمآتم,فقد كان يتظاهربالقراءه وهو لايفهمها,بل وينفعل معها...
أكتشفت أن معانا اكثر من خريستو ومازلوا يكتبون..
التانيه
دى عشان تفك بيها القرفه والزهج واليك الطريقه:
1.افتح المنبر العام.
2.لاتفتح أي بوست.
3.اقرأالعنوان والذى يليه-مع بعض.
4.تصلح هذه الطريقه بقراءه ,ثلاثه عناوين مع بعض,اقرأعنوان وفط عنوان ,من تحت لفوق,حسب الشكه العشوائيه حتموت من الضحك...جرب وشوف

محمد مكي اخبارك

Quote: من ضمن ما اشتهر به ,قراءه الصحف فى بيوتالاعراس والمآتم,فقد كان يتظاهربالقراءه وهو لايفهمها,بل وينفعل معها...

كيف ياخ ما بعرفو خرستو
ايضا كان يحضر جميع مباريات دار الرياضة
وبين الشوطين يمسك الصحيفة ثم يقرا بصوت عالي .. وعندما يتوقف لاخذ النفس ومواصلة القرأة .. يرد عليه رواد دار الرياضة هاااااااااااااا

فتكون اللوحة التالية
خرستو : لسلسنتسبتين ستنبنتنبتنمبتسيبتنسيب
رودا الدار : هااااااااا
خرستو : جججاجاجحبااحاحلبحاباحبحالب
رودا الدار : هااااااااا
خرستو : لسلسنتسبتينليبليبلنمنفنرتتب
رودا الدار : هااااااااا

ثم تتسارع وتيره القراءة والهاهات من الوارد حتى تختلط ببعضا ولا تفرز

يا عمنا تشكر على الوصفة لفك الزهج حا نجربها ونفيدك

تسلم

ابروف ( سمع وشوف )

البحر .. خالد العجلاتي .. الحدادين .. صناعة المراكب .. الاناتيك.. مستلزمات الكبرته ... مقابر ابو حبيب .. حسين جاك او بله بتاع السمك .. بكاسي الخدار .. حي الهجرة .. الواحة للفول .. نادي ابروف .. نادي النداء .. سوق الشجرة ( هسع بقى عفراء مول ) .. اولاد الحلاب .. اولاد نافع .. الحواته ... زريبة الحطب ..

جاياكم صور

___________
صناعة المراكب في ابروف
وهي صناعة في طريقها الى الزوال
قديما كانت هذه المنطقة حجرية زحف عليها الطمي .. وكانت تتم فيها صناعة المراكب بكميات كبيرة واحجام مختلفة تصل الى ما يقارب الـ 20 متر .. وتلك هي المراكب التي كانت تسافر عن طريق النيل الابيض الى مدينة جوبا
الان وجدت في تلك المنطقة مركب واحد في طور التصنيع وهذه هي صورتها

_____________
هذا هو المنشار الذي تشقق به كتل الاخشاب لتصنيع المراكب

_____________________

ودي سوق مستحضرات الكبرته(16) ( شاف و طلح (17)، نطوع (18) ، ازيار (19)، الخ )

(16) الكبرته : بعض الطقوس التي تؤديها الانثى بغرض التزين لبعلهاومستحضرات الكبرته من المحفزات الجنسية الشعبية ومفعولها اكيد في ذلك
(17) شاف وطلح : نوعين من الاشجار وهي اشجار يستخرج منها الصمغ العربي لهذه الاشجار رائحة ذكية وتظفي على الجسم نعومة ولون زاهي كما انها تتسبب في شد الجسم الطلع يصبغ الجسم بلون محبب لكن رائحة الشاف اذكى من رائحته
(18)نطوع : جمع نُطُع وهو بساط يفرش على الارض ليجلس عليه
(19) ازيار : جمع زير وهو انا فخاري يستخدم لحفظ الماء وتبريده ويستخدم كذلك في طقول الكبرته بدفنة في الارض وايقاد حطب الشاف او الطلع بداخله

___________
ابروف من السماء
شكرا لقوقل ايرث

لو اي زول في الدنيا يوم سالك عليا
قولي :
باكر ايوه راجع جائي ليا

عبد العظيم ادم نملة ( الدش ) عليه رحمة الله

أولا ادعوا معي له بالمغفرة والرحمة والجنة

نعم هو حارس المريخ والفريق القومي ومن قبلهما حارس فريق نجوم ابوسعد عبد العظيم الشهير بالدش .. ضخم الجثة مكفهر الوجه قاسي الملامح اسود اللون هذا هو شكله الخارجي .. أما في دواخله فهو ... لين العريكة ودود هادي الطباع ابيض القلب ..
عبد العظيم حريف كورة وفنان وإنسان .. وصديق مخلص لمن عاشره أو حظي بمعرفته ..
مهارته في حراسة مرمي كرة القدم معلومة للجميع
لكن غير المعلوم انه فنان وشاعر وخطاط ورسام
نعم كان عبد العظيم يكتب الشعر ويرسم ...
وله خط رائع جميل

كثير الضحك دائم الابتسامة .. ابعد من يكون عن الحده والعنف إلا داخل المستطيل الأخضر.. وهناك يرعب الخصوم ويستغل شكله الخارجي ومهارته في اللعب أيما استغلال
توفي عبد العظيم متأثرا بمرض في كُليتيه عاد به من مدينة بوتسودان التي لعب لمريخها .. أظن أن الماء المالح قد اضر بهما


ربنا يسكنه الجنة .. ويكفيه عزاب القبر وعزاب يوم القيامة
رحمك الله صديقي عبد العظيم ادم نملة ( الدش )

Quote: ربنا يسكنه الجنة .. ويكفيه عزاب القبر وعزاب يوم القيامة

[[[[[[[[[[[[[[[[[[[[[[[[[[[

بجيك راجع نتونس عن ابوروف وبيت المال والشاطى واالنهضه والزهره والاصلاح.


-------------------
يأخوناواخوتنا الماعارفين,الفوق ده مابرنامج عمل سياسى,ده أسماء انديه وفرق كوره ...

محمد مكي مستنيك

بالمناسبة فريق الزهور اخيرا صعد الدرجة التانية السنة دي

شربنا قهوة الصباح على هذا البوست الظريف
شكرا يا وليد على المتعة والتشويق..

بس راي ودالبشرى دا في ام درمان ما تجهلو

احمد ابو هريرة

سلامات يا بوب

شكرا ليك انت على الكلام الحلو

لكن يا فردة امدرمان دي اختاها

اولاد الحلاب!!

مشتاقين يا ولي!!

يحكي أن جد ال الحلاب اتى من مصر لزيارة إبنه وفي ذات صباح وهو جالس أمام المنزل خرجت مجموعة من أبناء الحلاب ((الوان مختلفة)) تشكيلةاصفر احمر اخدر..بسبب زواج ابنه من سودانية...فتعجب ونادى على ابنه..يا حلاب يا حلاب مالهم عيالك زي عيال الكلب كدا

تعرف يا ولي محمد خليل الحلاب واخوانه من اشهم سكان منطقة سوق الشجرة..اتمنى لهم التوفيق.

محمد خليل الحلاب صديق عظيم!!

بس رشاشة فظيع..



تحياتي لهم ولكل اولاد الحلاب فرع((الشجرة))

يا سامي

تتصور اول امس وانا بقرا في كلامك ده كنت بقرا فيه من جهاز استاذ نزار الحلاب من كلية المشرق اخو محمد الكبير


هاهاهاهاهاهاهاهاهاها

يا معلم الغريبة كل الناس البتعرفم بعرفهم جدا
وما نتقابل كيف ما عارف

Quote: امال الطحنية الفي الدكاكين البتاكل فيها دي مصدرها شنو !!!

مبااااااااااالغــــة يا وليد .. ..
أضحك الله سنك

غباشي ان شاء الله دايما ضاحك

صديقا لي

ودوه الخدمة الالزامية
امو جات لقتو بوضب في شنطته ماشي المعسكر
قالت ليه: بتجهز في الشنطة ماشي وين يا ولد
طبعا صاحبي ممعوط من البرنامج بتاع الخدمه ده فرد عليها باقتضاب

ماشي المرخيات ..

امو : عشان تسوي شنو ؟

صاحبنا: عشان نشِدها يا امي ...