فضيحة ( المريخ يخسر 7 : 3 والوحدات ناقص لاعب منذ الدقيقة 3)

الله يفضحكم

بت الكلب الشعيرية

الجايات اكتر من الرايحات

Quote: الجايات اكتر من الرايحات

قصدك الغلب الجاي

الضغط ، والسكري

والهارت

احي انا
الرش الرش

المريخ يحرز الرابع
يا وليد

هلالابى

اخ

ويين من قبيل؟

و الله يا وليد ساكت ضحكتو و شمتوا فينا في الانسحاب






اسه موش كان اخير ليكم من الفضيحة و قلة القيمة دي

ما احسن ولا حاجة

نحن على الاقل عرفنا انو تيمنا قاعد في السهل
والدنيا تسجيلات

Quote: اسه موش كان اخير ليكم من الفضيحة و قلة القيمة دي

بالعكس المريخ أثبت إنه فعلاً فريق كبير ومحترم..

Quote: بالعكس المريخ أثبت إنه فعلاً فريق كبير ومحترم..

محترم مافي شك بدليل انه ما انسحب

لكن كبير دي ما اظن على الاقل الليلة

حارة ياوليد والله حارة شديد ,أهنئ الهلال لانو إنسحب بشرف بدل البهدلة دى

حاره جدا

انسحب بي شرف ؟

جديده دي

لاعبوا المريخ ادو ما عليهم
عدا الحارس اكرم
فهو كان عالة علي الفريق
وحده تسبب في ولوج خمسة اهداف

Quote: لاعبوا المريخ ادو ما عليهم عدا الحارس اكرم فهو كان عالة علي الفريق وحده تسبب في ولوج خمسة اهداف

!!!!!!!!!!!!!!!!!!!!

يا زول انت بي جدك

يا وليد ... القون الجابو الوحدات فى المريخ هنا هو العمل الفارق واقصى المريخ
لكن بصراحة مباراة كبيرة ما إنو المريخ والله بتيمو ده ما بيستاهل ينضرب 7


عموماً هاردلكم يا مريخاااااااااااااب وقالوا آخر السنة حصحاص









شول اشوانق دينق
_______________
هلالابى للدين

Quote: عموماً هاردلكم يا مريخاااااااااااااب وقالوا آخر السنة حصحاص

والله يا شول
ارد اقول ليك شنو

وبي ياتو وش ارد عليك

دي فضيحة ومافي اي عزر بمسحها

هسع عليك الله لو عملوا منتخب من سودانيز اون لاين دي

بتغلب الغلب ده
من فريق ناقص كبتنه من الدقيقة 3

ياوليد افو المريخ ينسحب كيف شيال التقيلة

يا هاشم

اها انتو انسحبوا طوالي عاد

Quote: بت الكلب الشعيرية

ولي يا صاحب،
7 يا ولي!
سبعة!
ديل لاعبين كورة ولّ "أم حفيرة"!
ياخي ده رقم كبير جداً..
__
جماعتك ديل أظنهم مشو الأردن بإحساس إنهم عيانين، أكان كنت محل الوالي، بوديهم يعملوا فحص كامل، طالما أصلاً هم في الأردن، بي كبيرهم مازدا الفاسدة..

يا طيفور

فحص شنو يا معلم

ديل طوالي مفروض يعملوا ليهم توابيت
وعلى احمد شرفي طوالي

Quote: انسحب بي شرف ؟

عمره الانسحاب ما كان شرف

الفضيحة و لا الانسحاب

على الاقل كان بعرفوا مستوى تيمهم زينا كده
ويعرفوا منو البنشطب

مع انو المريخ كله مفروض ينشطب

المريخ لعب و لعب مبارة كبيرة كمان

اذا عندك نقد مدروس مرحب بيك، اما اذا كان كلامك غلبكوكم فبلو

المريخ لعب فى تلج سايح ، و شوفت الملعب كيف ، برك برك ، المفروض المريخ يقدم شكوى ضد الملعب فورا

اكرم غلط كتير الليلة لكن برضو حارس كويس ، و ما غلطتو انو كان فى الملعب، غلطة الحيوانات البرة المسمينهم

الحارس بعد الهدف التلات او الرابع بالكتير مفروض يتبدل ،

و بالمناسبة ، المريخ كان لاعب تحت ضغط نفسى آخر، و هو ان مبارتو التجريبة فى احد ملاعب الاردن اتلغت بسبب شائعات

وجود اسلحة فى الملعب ، و طبعا انتو عارفين اخونا فى الاردن الاسلحة عندهم زى اللعب


المريخ هزم نفسو بوجود هذا المتخلف مازدا فى الجهاز الادارى ،

مازدا ده ما كفاية انو ينطرد من المريخ و لا من تدريب الفريق القومى ، ده مفروض ينسحب منو الجواز السودانى

و ينفى الى جزيرة ما فيها اى حاجة مدورة المتخلف الغبى ده

مبروك للوحدات فوز مستحق ، و هاردلك للمريخ ، و الشباب لعبو و ما قصرو والله

و تحية لايداهو و تحية للسعودى و للكابتن المتميز دوما و ابدا العجب

و طــــــــــــــــز من الخرطوم ذهابا و ايابا فى مازدا

Quote: مازدا ده ما كفاية انو ينطرد من المريخ و لا من تدريب الفريق القومى ، ده مفروض ينسحب منو الجواز السودانى و ينفى الى جزيرة ما فيها اى حاجة مدورة المتخلف الغبى ده

هون عليك يا رجل

نشاطرك كلامك دا والله

يا محمد الامين

كلامك ده اخير منو تدريب مازدا

يا زول ديل سبعة
سبعة

ومن تيم ناقص من الدقيقة 3

مازده شنو وكورلة منو ؟

اذا كان مازدا مدرب ما كويس
الناس اللعبوا الكورة دي ما بعرفوا كورة ؟

ياخ نفرض انهم ما بعرفوها
ما عندهم حرارة قلب
ما عندهم نخوه

Quote: المريخ لعب فى تلج سايح

تلج!
أحي يالتلج!
هي الأردن ذاتها فيها موية عشان كمان يكون فيها تلج وكمان سايح!

__
وبالتلج.. كااااك يكا

فووووووق

Quote: على الاقل كان بعرفوا مستوى تيمهم زينا كده ويعرفوا منو البنشطب

يا ولي نحن قبل ما نسافر عرفنا فريقنا قاعد في السهلة ..
أنتو الكنتو بتكابروا....
سبب الهزيمة مازدا لأنو المريخ لم يكن بذلك السوء و لو أجري مازدا تغيرات مدرب حقيقي يفقه أبجديات التدريب لحافظ على الأقل على التعادل و تأهل..

عموماً هاردلك و عادي يا عمك روما اخد سبعة ...

يا خالد مازده شنو ؟

مازدا كعب ما قلنا شي


لكن الكانوا لاعبين ديل

لا عندهم كورة
ولا عندهم رجالة

يا خ زول يغلبوه 7 تقول لي الكعب المدرب

يا وليد ظلمتنا ظلم الحسن و الحسين

مازدا ده مافى اى حاجة اكعب منو ، يعنى حتى الكعوبية هو تحتها

الناس ديل ما جابو اربع اقوان ما حسبتها ليهم ليه !!! و فى الجو ده !!!

انت شفت المبارة شفت الكورة البتغير مسارها ، هم فى النهاية ده ما جوهم مهما كان الوحدات استفاد اكتر بعامل الجو و الجمهور

و استفاد اكتر بوجود هذا المتخلف مازدا

و مبروك للوحدات تانى

يا محمد الامين

سبعة بي عشرة لاعبين

مافي ليك اي فرقة تلتقها

بعدين انت الوحدات ده كان لاعب في ميدان تاني ؟

ما ياهو نفس الميدان الكانت بتغير فيه الكورة


والمريخ ليه ما استفاد من عامل الارض والجمهور هنا

مازدا كعب
والمريخ برضو كعب

والسبعة غلب ما بنستر
ولا بنبلع

Quote: عموماً هاردلك و عادي يا عمك روما اخد سبعة

من الوحدات الأردني يا عمك


وليد
سببببببببببببببببببببببببببببببببببببببببببببببببببببعة

والله يا علاء الدين

كتييييييييييييييييييره

الله غالب

----------


كفاره يا وليد!

ايواااااااااااااااااااااااا

يا رحاب

معانا كده


اصبري بلم فيك

Quote: تلج! أحي يالتلج! هي الأردن ذاتها فيها موية عشان كمان يكون فيها تلج وكمان سايح! __ وبالتلج.. كااااك يكا

قوية يا هالك

انت عارف، انا لي كم يوم ما موجوده ومشغوله شغله الجن و اول ما افتح القي ليك كلامكم ده،
لكن ما عجبني ليكم والله، و للسودان
مشيت افتش منتديات اردنيه، اكيد حاتكون مليانه نكت

يا وليد انت بتتكلم كيف ؟؟؟؟

الوحدات لاعب على نفس الملعب ، لكن ده جوهم و هم اكيد احسن مننا فيهو !

السبعة تقيلة ما عليها كلام، لكن ما تهدر جهود اللعيبة ساى فى الهوا الجماعة برضو سجلو اربع اقوان

و بعدين و ين المدرب !!! هم ناقصين لاعب نحنا ناقصين مدرب يا عمك

هم لاعبهم المطرود اعتمد على زمايلو ن و احنا اتكلنا فى التدريب على حيطه مايلة

المريخ ك لاعبين قدمو و قدمو ، هم كالاسود يقودهم خروف بقرون كمان

يا محمد الامين انت البتتكلم كيف

ناس الوحدات ديل موشجو ولعبوا معانا هنا في السودان

في ارضنا البنعرفها
ووسط جمهورنا البنعرفوا

ليه ما غلبناهم 7 مع اننا تامين

فلنفرض انهم سجلوا اربعة اقوان

السبعة اقوان دي دخلت في فنيلت مازدا؟

ما دخلت في نفس اللاعبين الجابوا الاربعة اقوان ديل

ما تقول لي اتكلوا على مدرب

الاردنين كان عندهم لعيبة رجال في الميدان

11: لاعب
قصاد عرة لعيبة

مدرب شنو وكورة منو

لو اتغلبنا واحد صفر من 10 لعيبة قول لي المدرب

مازدا كعب ما اختلفنا
لكن ديل ما ليبة ولا يحزنون البتغلبو 7 من تيم ناقص من الدقيقة 3

Quote: والله يا شول ارد اقول ليك شنو وبي ياتو وش ارد عليك دي فضيحة ومافي اي عزر بمسحها هسع عليك الله لو عملوا منتخب من سودانيز اون لاين دي بتغلب الغلب ده من فريق ناقص كبتنه من الدقيقة 3

بصراحة يا وليد ... إنت ما محتاج ترد والله لانك ما بتكابر وبتطعن بحكمة فى الفيل عديل.
المريخ إتغلب من فريق ناقص من الدقيقة 3 وفى الشوط الأول النتيجة كانت 3/3 ... يجوا فى الشوط التانى يدوهم اربعة ويكون النتيجة 7/4 اصلو دى نتيجة فضيحة.
وعلى الناس ما ح يفرزوا بين ديل مريخاب وديل هلالاب ولا يحزنون ... المريخ مشى الأردن لاعب بإسم السودان .. الناس بتعرف إنو المريخ السودانى ده إنضرب 7/4 ومن فريق ناقص لاعب من الدقيقة 3 وده وصمة عار فى جبين السودان والسودانيين قبل المريخ والمريخاب والله.
بعدين مازدا ده يا عمك احسن ليهو يحترم نفسو ويسيب البشتنة المبشتن بيهو السودان والمريخ ده ياخ ... الزول ده ادو راسو!!!!

صراحة انا من ضمن الناس الما مصدق النتيجة ده لانو المريخ الشايفو ده ما من المفروض يتغلب سبعة ومافى زول يقول لى الميدان مستنقع ولّ بطيخ ... الناس ديل جابو الاقوان السبع ده كيف؟!

عموماً الغلب ده رجع الرياضة فى السودان لحقب سوداء لمن كان المريخ والهلال بيتلطشوا خمسة ولى فوق ... والزمن كنا قربنا ننساه إلى ان جاءت الفاجعة فى مباراة الليلة.


شول اشوانق دينق
__________________
إنشالله يكون إتعشيت قبل الكورة

يا شول

Quote: إنشالله يكون إتعشيت قبل الكورة

اخوك لاعب كورة قديم
ما بزعل الا وكت يتغلب وهو جوه الميدان


بتعشى عاااااااااااااااااااااااااااادي

وليد

هاردلك

اى السبعة كتيرة لكن الكورة ياخوانا مدارس مش فك وتسجيلات فقط

وزى ما انت قلت الحكاية فى اللاعب السودانى وكيفية ال come backوالتكتيك من داخل الملعب

معقولة فريق متعادل بره ارضة وبهدفين يخش فيه الرعة اهداف ويظل يلعب بنفس الوتيرة

معليش يا ويلى كبر الدى وظبط الجى

ويبقى الزعيم زعيماولو تمردت الرعية

يا حامد

Quote: ويبقى الزعيم زعيماولو تمردت الرعية

ما قلنا ي

لكن الزعامة عندها اسسها ومقوماتها
ما ونسة

عان المريخ يفضل زعيم
لاذم يراجع حساباته

وده المقصود

الحق يا وليد
عبد المجيد عبدالرازق في النيل الأزرق قال المريخ أتغلب بسبب الفنايل اللابسها!!!!!

قال دي فنايل صيف !!!!

اها فت جنس الصحفيين ديل
اخير منهم مازدا


سمعنا بي كدارات مطر تكون عزر

لكن فنايل صيف ؟

هو زاتو عبد المجيد ده لعبها وين عان يعرف الفرق بين فنايل الصيف وفنايل الصقط

Quote: اثاره منذ اول هجمه حتى الهجمه الاخيره , ولان التاهــل لواحد اخذنا من طـرف الخنجر النصـــل .. مبروك لشلبايه واخوانه هاردلك نجوم المريخ ..

Yassir Tayfour

انت جادى و لا ما شفت المبارة

انت فاكر المبارة دى فى كتب الجغرافيا !!!!

شوف الملعب و بعدين اتكلم

يا محمد الامين

ناس بريمة لعبوها في ملاعب افريقية ده بالنسبة ليها مفروش موكيت
والمطرة صابة المباراة كلها


يا زول الملعب ده لاعبين فيه التيمين سوا
يعني ما عزر للمريخ

يا وليد يا وليد رجالة شنو البتتكلم عنها ، داخلين كورة و لا شكلة ؟؟؟ و انت زول لاعب قديم بتفكر كده كيف يا اخى

و بعدين تعال هنا ، مجموع الاهداف دى 7 لى 8 ، المريخ مدخل 7 اهداف فى شباك الوحدات ، اذا ال 7 دى عاجباك شديد كده

و فى ارضنا غلبناهم برغم وجود مازدا برضو ، و بعدين ما تفرض هم فعلا دخلو الاقوان دى فى فنيلت مازدا ، اللعيبة تعمل شنو

اذا فى خروف بقرون بره قاعد بيستفرغ ، و كان للرجالة لعيبتنا رجال و الارجل منهم الجمهور الكان معاهم لاخر لحظة

فخليك منطقى و شوف المشكلة وين ،

و كان للرجاله يا زول بما انك فى الخرطوم اهه ورينا الرجاله ، منتظر الزيدى ده ارجل منك

ارقع مازدا ده بجزمة و لك منى جزمتين بدلها من الماركة و المقاس البتختارو

عشان انا لاعب كورة قديم بفكر كده
ما برمي لومي كلاعب كورة على المدرب

عشان انا لاعب كورة قديم لو اتغلبت اكتر من تلاته بعرف انو العيب فيني انا في المقام الاول

الرجالة الواحدة دي البتكلم عنها
حرارة القلب الما بتخلي الواحد يتغلب 7

Quote: و بعدين تعال هنا ، مجموع الاهداف دى 7 لى 8 ، المريخ مدخل 7 اهداف فى شباك الوحدات ، اذا ال 7 دى عاجباك شديد كده

لالا
المقارنة غير واردة

هم غلبوك بي 10 لاعبين
لمدة 87 دقيقة بدون ما احسب الزمن الضايع

وانت غلبتهم ولاعبيك تامين كاملين

Quote: اللعيبة تعمل شنو

تعمل شنو ؟
تحمي مرماها ما يدخلوا فيه 7 اقوان من فريق نافص
دي صعبة
لو صعبة عليه يشوفوا ليهم شغلة تانية

بعدين ديل ما قون ولا قونين
عشان نقول دخلوا صدف
ديل سبعة اقوان
معقولة هم كلاعبين ما قادرين يتصرفوا لحدي ما يدخلوا فيهم 7 اقوان

Quote: فخليك منطقى و شوف المشكلة وين ،

انت الما منطقي وعاطفي ساكت



اما منظر الزيدي يا عزيزي
ارجل مننا كلنا
ما مني براي

وقبلي ما يترقع مازدا مفروض يترقع كل لاعبي المريخ ما عدا ايداهور

يا شباب عليكم الله ساعدونا بالسُــــــكات
والسفن آب الباااااااااااااااااااااااااااااردة







_____

وليد والله شغلك صاح

انت يا وليد لمن كنت لاعب ، بتلعب من دماغك و لا بتسمع كلام المدرب ؟؟

كيف يعنى المدرب دخلو شنو ؟ و كيف المقارنة ما واردة نحنا مدخلين 7 اقوان و هم مدخلين 8 انت بتتكلم كانو الواحدات ده مدخل 7 و نحنا ما جايبن ولا قون !

الناس دى لاعبه و فى مدرب متخلف بخرب عليهم ، انت العاطفى و ماشى مع الموجة ساى ، لحدى اسه ما شفتك اتكلمت عن مازدا بخير او شر

اوعى يكون عاجبك بس اسلوبو ، انا ما عارف اللعيبة يعملو شنو اكتر من كده، بشاهده المذيع و المحللين المريخ لعب اليوم و اللوم كلو ختهو فى المدرب و الحارس

و انا بقول المدرب بس، لانو المدرب كان ممكن يغير الحارس ، اللعيبة خامتهم كويسه و بينا الاهداف الجابوها ، المريخ مسجل 7 اهداف فى مرمى الوحدات فما تتعامل معاهو

كانو ما مسجل شى !

ولّّي ما تهري و تنكت في روحك كدا
المذيع قال أكرم ماشي يعمل عملية عين سمكة بعد المباراة مباشرة في مستشفى يملكه (الدكتور ) جمال الوالي رئيس النادي
لمشكلة كلها من السمكة

من فترة طويلة تهتم ادارة المريخ بتسجيل مهاجمين.(.ليس لحوجة الفريق انما نكاية في النادي المنافس ...).حتي اصبح ثلثي اللاعبين

مهاجمين صرف ولم تنتبه الي تسجيل مدافعين يجيدون الدفاع

فحاليا لايوجد سوي سفاري كمدافع صريح....حتي موسي الزومة كل همه هو الهجوم والانطلاق للامام فقط دون تأمين الجانب الدفاعي

وحاليا في التسجيلات الحالية لم تترك ادارة المريخ عاداتها في تسجيل المهاجمين

في احدي المباريات لعب المريخ بثمانية مهاجمين...واذكر انه لعب ايداهور كمدافع ايمن

الاعزاء

تألمت كثيراً لهذه المباراه الغريبه و الهزيمه الكبيره
و أعتقد أن سبب الهزيمه حاجتين أولاً و أخيراً كبتن مازدا
و ثانياً أكرم الهادي سليم لإضطرابه و عدم ثباته في أي كوره في المبارأه يعني أي هجمه كانت ممكن تنتهي بهدف و كان المريخ سينال هزيمه أكبر من دي.
كان واضحاً منذ بدايه المبارأه وجود خلل في عمق دفاع الوحدات و ذلك بسبب طرد المدافع في أول هجمه مريخيه في المباراه يعني نقص عددي كبير في الدفاع.
المريخ كان يحتاج لهجمه من بله جابر في الجناح مع وجود السعودي و إيداهور فقط في وسط مدافعي الوحدات ليحرز هدف.
أما الوحدات فكان يحتاج لمهاجم وحيد وسط كماشه دفاع المريخ ليحرز هدف.

لماذا لم يفطن مازدا للخلل الموجود في متوسطي دفاع الوحدات و لو كان إستقلها لنأت شباك الوحدات بالكثير, في حين عمل و إستقل مدرب الوحدات الخلل الكبير في متوسطي الدفاع المريخي مع سؤ الحارس في إحراز أهداف كبيره و كثيره في وجود مهاجم واحد فقط.
النتيجه كما هي لا تعبر عن سير المبارأه و أعتقد النتيجه العادله هي 3/3 و الاهداف الاردنيه ال3 هي الثاني و البلنتي و السابع.
مازدا مدرب فشل فشلاً ذريعاً في إداره المباره كما فشل في قياده المنتخب القومي.
مازدا ليس مدرب فاشل و إنما رغماً عن ثقافته الاكاديميه العلميه فهو لم يتدرج التدرج الصحيح ليصل لمرحله المريخ و المنتخب القومي يعني مفروض يقعد كم سنه مدرب لفريق الإنتصار درجه ثالثه في ام درمان.
أكرم الهادي حارس مرمي صغير السن و أتمني ان لا تحطمه هذه المباراه معنويا و رغم ذلك أقول بأنه لم يتدرج التدرج الصحيح ليصل لحراسه عرين تيم كبير كالمريخ و لولا سؤ تسديد لاعبي الهلال للضربات الترجيحيه لما كان له مكانا اليوم في هذه المباراه المهمه, أكرم محتاج يخللي النطيط و يرجع سنه سنتين لنادي أبوعنجه ثم سنه سنتين في أحد أنديه الوسط في الدوري الممتاز فلنقل الميرغني كسلا الصاعد هذا الموسم للدوري الممتاز ثم يقعد كإحتياطي ثاني 3 سنين في المريخ ثم بعد داك اليبقي الحارس الاول لكن مش علشان صد البلنتيات السيئه من لعيبه الهلال لتغدق عليه الاداره الاموال و السخافه (الصخافه) الرياضيه الالقاب.
هجوم المريخ ما شاء الله عليه أحرز 4 أهداف 3 منها جميله و ملعوبه و الرابع إستروبيا
هزيمه قاسيه و مؤلمه بكل المقاييس فكيف بالله تنؤ شباك المريخ بخمسه اهداف في شوط المدربين
و هذا يدل علي سؤ الدوري الممتاز السوداني فالمريخ في كل المباريات التي لعبها في الدوري دخلت شباكه 8 أهداف بينما الوحدات و باقل مجهود و نقص عددي مؤثر أحرزهم في مباراتين.
أما أبراهومه ده قصته شنو ما عارف لا عايز يقتنع بأنه لاعب معتزل و لا عايز يخللي الفنيين يقوموا بدورهم و أقترح يكون مدير كروي في فريق تريعه البجا.
أما كروجر فده ما منه فائده و أول مره في حياتي أسمع بخواجه يأخد إجازه أثناء فتره عمله عشان ود أخوه مات في حادث يا رأأأأأأأأأأأجل و الله تلقاه ما عارف إسمه, الإنضباط المارسه طوال حياته لقي هنا المياعه و رعي فيها. ياراجل لينا سنين شغالين مع الخواجات بالكثير بيأخدوا يوم إجازه للوفأه.

حرام و الله البيحصل ده بسمعه السودان.
نحمد الله للهلال إنسحابه من البطوله و رحم الله إمرئ عرف قدره.
البطوله دي لا تقدم و لا تأخر للهلال أو المريخ يجب أن يشارك فيها ثوالث الدوري الممتاز الياخدوا عشره, منها سفر و منها فسحه.

لكي نفوز لازم نعرف الانضباط و الثقافه الكرويه و نفهم الاحتراف بجميع معانيه الحقوق و الواجبات.

أنا حزين و مكتئب.

فى شنو..؟؟

اللــــــــــــــه......... 7 : 3
قدونا قد
اللهم لا شماته ..
والوحــــــدات ناقص كمان ..

الفضيحه بجلاجل

3

Quote: هسع عليك الله لو عملوا منتخب من سودانيز اون لاين دي بتغلب الغلب ده من فريق ناقص كبتنه من الدقيقة 3

رغم انو كلامك جاء على صيغة المبالغة لكنه صحيح 100%
عموما اللاعب السودانى مستواه صفر حتى لو لعب مع اليمن مريخابى

ياوليد هون على نفسك المشكله فى ماذدا

مفترض يحترم نفسو ويقادر

ياخ دا دمو تقيل بشكل <دلم>


للاضافة

عارف يا وليد اجمل ما فيك انك حقاني ، والهزيمة فعلا حارة لكن ، اعتقد انها فرصة للمريخ عشان يعرف
نقاط ضعفه. النتيجة كبيرة وفضيحة ... اقول ليك انت وشهاب بشكل خاص هاردلك .

Quote: حارة ياوليد والله حارة شديد ,أهنئ الهلال لانو إنسحب بشرف بدل البهدلة دى

اود ان اقول للكاتب الكلام اعلاه ، انا كهلالابي ، احسن لي الهلال ينهزم بعشرة من هذه فضيحة الانسحاب ، انا ما عارف ليه الناس تنسي ان
هذه رياضة ، واجمل ما فيها هي المتعة ، واذا كان الانسحاب شرف ، فهنا يجب ان نسميها اي شي غير الرياضة ، كرة الفدم رياضة اخلاقية في الاساس ، يجب ان يتعلم فيها الجميع احترام القانون الذي يحكمها ...

اسوأ ما في هزيمة المريخ انها ستجعل انسحاب الهلال قرار يسحب لصلاح ادريس بدلا ان يحسب عليه ...

الإنسحاب عمرو ما كان شرف ... الزول وكت ما قدر الشئ ليه من الأول مشارك
بديت حاجة تمو ... موت موت حياة حياة










شول اشوانق دينق
________________________
صلاح إدريس ده الله يفكنا منو بس.