مجلة صباح ( للاطفال ) لماذا توقفت ؟!.. وهل من سبيل لاعادتها ؟

من منا لم يقراء مجلة صـــباح .. من منا يم ينفعل معها فتعالت قهقهته فخاله الاهل قد مسه الجنون ... هي مجلة ســــودانية خالصة ... ســــودانية من الغلاف للغلاف ... ســــودانية في تعابيرها ... سودانية في مفرداتها .. ســـودانية في رسوماتها .... ســــودانية في شخصياتها ... سودانية في أُطُرها وكوادرها ... ســـودانية حتى النخاع.

اعتقد انها اول من تجاسر واستخدم العامية الســـودانية في تعليقاتها ورسومهاعلى مستوى المجلة ككل .. ولم يسبقهم الى ذلك إلا الاستاذ شرحبيل في الشخصية النمطية ( عمك تنقو ) لكن تنقو كان ســـوداني خالص لوحده في المجلة الرائدة على مستوى الوطن العربي (الصبيان) .. ولا ننسى المريود لكنها كانت فيها جرعات تثقيفية عالية جــــدا منفرة للاطفال

صــباح .. كانت تســتخدم تعابير سودانيه في المواقف فكنا نقراء .. ككككككككفففف ... تفووووووو.. زووووووووط .. لخخخخخخخ... جيييييييط .... بل كنا نسمعها عديل كده ونحن نقراءها

من منا لم يضحك مع

فنجاط
مدام فنجاط
كِلِوي
عجيب الرَّباط
الكوتش
اولاد الحلة
عزو
فالكوني
والاخرين


علاء الدين يا صـــديقي ارجوا ان تفكر في محاولة احياء هذه الشـــخصيات .... وعرضها على اطفالنا في قالب جديد .... قالب تستخدم فيه الوسائط المتعددة والتقنيات الحديثة .. من خلال مشــروعك الرائد الذي تدعوا له، و بعد اخذ الاذن بالطبع من مبتدعيها .... فكل شخصية تصلح ان تكون محور كارتون منفصل ولحلقات عده

التحية للتيم الذي انتج صباح
ونتمناها ان تعود

Quote: فنجاط مدام فنجاط كِلِوي عجيب الرَّباط الكوتش اولاد الحلة عزو فالكوني والاخرين

فطوم واخوها شوقي ..........

يا وليد وقفت متين ؟ امس ولا الليلة. ان شاء الله ترجع و تقراها بتك الامورة ديك.

يا سعد الدين

مالك عاوز تجهجهني

Quote: يا وليد وقفت متين ؟ امس ولا الليلة

المجلة دي لسع بتصدر ولا شنو ؟

فعلا يا عمر

فطوم واخوها شوقي

لعناية علاء الدين

ياريت ترجع

والله يا وليد قبل ما أقرأ إسمي بس من العنوان فتحت لأشارك
طيب يا حبيب أنا جاهِز موية و نور
و أصلاً تجربة تنقو دي كانت مجرد إظهار للمقدرات و أعتقد إنها وجدت بعض الاستحسان
إنت ما تعمل لي فيها مشغول و كل يوم عامل ليك شريحة جديدة
أفضى لي شوية و شوف كان ما عملناهو خلال فترة بسيطة جداً
بس مسألة الحقوق دي أهم حاجة

رابط تنقو في اليوتيوب:

http://www.youtube.com/watch?v=jSDNGP6Mk9M

يا ابو علوه

اخوك خلاص القبول قرب
تاني راسي ما بقدر احكه

موضوع الماستر تأجل

امين يا شبكة

بوست اكثر من رائع
للصديق حميده

http://sudaneseonline.com/cgi-bin/sdb/2bb.cgi?seq=msg&b...d=161&msg=1189551966

فنجاااااااااااااااااااااااط

<EMBED SRC="http://www.herosh.com/up/73952/585680525.rm"; VOLUME="75" HEIGHT="100" WIDTH="280"TYPE=Audio/x-pn-Realaudio-plugin EXTS=RA,RAM MASTERSOUND CONTROLS=SMALLCONSOLE AUTOSTART="TRUE">

>>>>

الاخ وليد والاخوة المتداخلين
تحياتي
رغم انني لست من جيل صباح .. ولا حتى الصبيان .. لكن اعتقد ان ثقافة الطفل ضرورية .. وهذه المجلات ليست سوى وسيلة تربوية وتثقيفية اضافية للطفل
ربما توقفت المجلة عن الصدور بسبب عدم اهتمام الاباء بمكتبات الابناء .. وهذه مسألة تناقش في مكان اخر
ولكن بالنسبة لصباح فأن عودتها ليست صعبة ولكن تبقى مسألة الجدوى .. اجتماعيا لا شك في جدواها ولكن ماهي الجدوى التجارية في وقت ازدحمت فيه المكتبات بالصحف .. وازدادت المنافسة من مجلات اطفال عربية
وكانت هناك بعض المحاولات من الاخ اسماعيل مبتكر بعض شخصيات المجلة لنشر بعض الاعمال في بعض الصحف .. ولا ادري مدى نجاحها
اما بالنسبة للحقوق .. فهي تخص الاستاذ نزار عوض عبدالمجيد .. هو الوحيد الذي يستطيع الاجابة على اسئلتك ..
والاستاذ نزار رجل ذو فكر مبدع في مجال الصحافة فبالاضافة الى صباح كانت له تجارب رائدة مع الصحافة الاجتماعية والنسائية

مرحب الاخ / الفاضل

تسلم ياخ

في الحقيقة التثقيف الورقي دوره في انحسار وخاصة عند الطفل ، وحل محله التثقيف المرئي والمسموع ، عبر استخدام الوسائط المتعدده ( حاسوب ، تلفزيون ، راديو ، MP3 ، ايبود ، محمول ) .. الطفل اصبح غير مهتم بالكتاب والمجلة الى حد كبير ، واتجه الى التفزيون والحاسوب وما اليه .. عليه كنت ارجو ان يُعاد اصدار المجلة في ثوب جديد ، قابل للنشر عبر الوسائط المتعددة مع صدورها ورقيا. واعتقد انه ان انتجت في قالب جديد قابل للنشر عبر الوسائط المختلفة ستكون لها جدوى مالية وفائدة تجارية واقتصادية .. المعنى تنتج المجلة او شخصياتها كمسلسل تلفزيوني كارتوني ثاني او ثلاثي البعُد ، وتحمل على اقراص مدمجة ، تصمم لها صفحات وب ، هذا مع اصدارها ورقيا ..

لو الناس اقتنعت بالفكرة .. يمكن تتبناها جهة ما مع مشاركة اصحاب الفكرة الاساسية ( عوض عبدالمجيد ،اسماعيل ) في انتجاها في ثوب جديد عصري ومقبول وذو فائدة اقتصادية .

كل الود

وليد ازيك

شكرا علي البوست الخفيف

انا بالمناسبة كنت صحفي في مجلة صباح واعرف الاستاذة صباح زات نفسها

المجلة موقعها كان في الخرطوم 2

ولم تستمر الا حوالي كم واربعين عدد فقط علي ما اذكر

وكل ما اذهب للسودان ابحث عنها لانني عامل فيها لقاءات صحفية كثيرة

اذا عندك اعداد قديمة ارجوا اخباري

وبعدين اخبار صباح شنو؟؟ لسه حية؟؟؟؟؟

وهل ممكن المجلة ترجع تاني؟؟؟؟؟؟؟؟

مرحب اخونا اشرف

تسلم ياخ

تصدق انا ما كنت قايل صباح دي شخصية حقيقية !!!!
الا هسع من كلامك ده
ما عندي معرفة بيها
بس كنت متابع جيد لمجلة صباح

Quote: اذا عندك اعداد قديمة ارجوا اخباري

يا ريت والله

شكرا للرد يا وليد

صباح فعلا شخصية حقيقية

وتشبه بالضبط صورتها في المجلة

بنت شابة ..جميلة وصغيرة في ذلك الوقت

وحتي الان عندي بطاقتها الصحفية

واعرفها شخصيا

وكنت اعمل لقاءات مع مدراء المدارس وضباط شرطة ورؤساء الاقسام وقضاة ومسؤلين حكوميين

وكلهم موجودات في مجلات صباح

Quote: وتشبه بالضبط صورتها في المجلة

ماشاء الله عليها

زمان ما كنت قايلها شخصية حقيقية
وكانت صباح ( المجلة ) عاجباني وراسم صورتها في دولابي
لكن اصلي ما اتخيلت انها شخصية حقيقية

ما بتعرف ليك طريقة يا وليد نبحث عنها في السودان بواسطة الاعلام او غيره

ونجيبها لبكري بيجاي يديها عضوية؟؟؟؟؟؟؟؟؟؟

ما ممكن تسال من تعتقد انهم يعرفونها؟؟؟

والله يا اشرف يا ريت

لكن بما انك كنت صحفي معاهم

اكيد بتقدر تلم في دربها

بعد بحث في الاســـافير توصلت الى الاتي

الاسم : مجلة صباح للأطفال
الوصف : شركة الآفاق الجديدة للنشر والتوزيع المحدودة
العنوان : الخرطوم - شارع البرلمان - عمارة أبوالعلا الجديدة الطابق الثالث
تلفونات : 780138 - 7735111 (0183)

المصدر : http://www.ftesh.com/dalil/detail.php?siteid=344

شكرا وليد

اتصلت بالارقام واحد ما شغال والتاني برن ومافي رد

احاول غدا انشاء الله

ولو كنت في السودان كان المهمة بتكون اسهل

لكن نعمل العلينا

تسلم يا حبوب

العنوان : الخرطوم - شارع البرلمان - عمارة أبوالعلا الجديدة الطابق الثالث

الاخ وليد
تحياتي
العنوان هو نفسه وما يتوه.. ولو كنت في الخرطوم ممكن توصل للمكتب .. ولو كنت تبحث عن البريد الالكتروني فابحث عن صحيفة فتاتي التي كانت تصدر حتى مغادرتي البلاد قبل عام .. والمؤسف انني ضيعت العنوان ..

الاخوين اشرف والفاضل

تسلموا يا حلوين