Post: #1
Title: أها .. صمنا بلا حلو مر ، كمان نفطر بلا خبيز ؟
Author: الوليد عمر
Date: 09-08-2010, 10:11 PM
......
دى حالة شنو دى يا ناس ؟
و برضو يشبكوك الجماعة : (يعود عليكم يعود عليكم) ! أكان بالطريقة دى خلى يعود غادى غادى ياخ و أنا من دربى دا معيِّد فى الشغل ، على الأقل نكجِّم لينا شوية (أوفرتايم)
.....
|
Post: #2
Title: Re: أها .. صمنا بلا حلو مر ، كمان نفطر بلا خبيز ؟
Author: الوليد عمر
Date: 09-08-2010, 10:16 PM
Parent: #1
.....
أتعودنا كل سنة ، الحاجة الأربابة بت الزبير تملا ليها كرتونة مدنكلة حلومر ، و أبرى أبيض و الرقاق بتاع السحور داك ، بالإضافة لى حرابيش البهارات و الشرموط الناشف و الكركدى و الذى منو
السنة دى قامت سوَّت ليها عمرة رمضان و تكلتنا على البنيات الصغار على اليمين جلٌّونا ليك زى الما حاصل حاجة
و النتيجة :
صمنا بلا حلو مر
......
|
Post: #3
Title: Re: أها .. صمنا بلا حلو مر ، كمان نفطر بلا خبيز ؟
Author: الوليد عمر
Date: 09-08-2010, 10:23 PM
Parent: #2
.....
أحرجونى ياخ مع صديقى الذى من بلاد الشام شابكنى ليك نضمى عن التبولة و المنسف و كُبة البرغُل قلتا أردموا ليك نضمى عن الحلومر يقوم يقول لى نضوقوا ،
أجيبو ليهو من وين أنا ؟
.....
|
|