Post: #1
Title: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: صلاح ليون
Date: 09-08-2010, 08:34 PM
Parent: #0
على حسب الإعلان الصادر بجريدة الراية (عدد أمس) .. من الجالية السودانية بقطر
بشرى سارة .. والاسعار حلوة جدا .. بالنسبة لي درجة أولى .. ما معقولة!!
ناس الأسعار . . عايزين رايكم ؟؟
|
Post: #2
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: بكري عباس علي
Date: 09-08-2010, 09:52 PM
Parent: #1
شكرا يا صلاح علي الخبر الجميل دا
وكل سنة وانت طيب
وشكرا لاعضاء الجالية وتحديدا لجنة الاراضي علي جهودهم الطيبة التي اثمرت ذلك الجهد المقدر وهناك فقط بعض الملاحظات ارجو ان ينتبهوا لها
مطلوب من اللجنة احضار شهادات البحث خالية من الموانع معهم وتسليمها لاي شخص يدفع القيمة كاملة
كما ارجو ان تكون هناك خرطة توضيحية محددة للمنطقة معتمدة من المساحة لانه الوادي الاخضر دا خشم بيوت وبعض المناطق لازالت بها منازعات وبعضها لا يصلح للسكن اصلا (عشان الزول يكون عارف ريالاته ماشه وين )
كما ارجو ان تواصل الجالية بالتنسيق مع الجاليات الاخري التي اشترت في نفس المنطقة (السعودية وامريكا) الضغط من اجل توصيل الخدمات فورا دون تاخير حتي ينتفع بها اصحابها ولا تكون مثل اراضي الخوجلاب التي مازالت بورا ونهبا لعديمي الضمير
|
Post: #3
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: عثمان جلال الدين
Date: 09-09-2010, 00:49 AM
Parent: #2
سلام يا ليون وكل عام وأنتم بخير
أها ناس الاقاليم يأكلوا نيم ..
سؤال: هل للاراضي المعينة أ يعالقة بتلك التي سمعنا أن الوزير كرمنو أوقف بيعها في زيارة له لمباني الجهاز؟
تحياتي..
|
Post: #5
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: صلاح ليون
Date: 09-09-2010, 09:13 AM
Parent: #3
| Quote: أها ناس الاقاليم يأكلوا نيم .. |
يا عثمان .. ايام التسجيل كان فعلا النيم ماكلنو
لكن ارجع واقرا المنشور في الجريدة ده كويس
تلقى في سطر بيقول انو الاراضي شاملاهم
وعن وقف بيع الأراضي سمعنا انو الوزير وقف الفي مكتب المغتربين بالخرطوم
يعني الموضوع بتاع ناس جاليتنا ديل ماشي كويس ..
|
Post: #7
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: عثمان جلال الدين
Date: 09-09-2010, 02:42 PM
Parent: #5
يا ليون:
التعميم المقصود في الجزء الأخير من الاعلان أظنه يعني معاملة أبناء الخرطوم المقيمين بقطر مثل رصفائهم بالولاية ويقف مع كلامي هذا التمسك بشرط احضار شهادة سكن (مواطنة) من اللجنة الشعبية (بعد دفع المعلوم) ومن ثم التوثيق من المحلية (بعد دفع المعلوم) وهكذا..
عموماً:
1. أين موقع الأراضي وهل من اراضي خالية بولاية الخرطوم؟
نريد خرط ومخططات واضحة المعالم والمقاييس.
2. ماهي القيود الزمنية لتزويدها بالخدمات ؟؟
فالبنية التحتية مسئولية الدولة من كهراباء ومياه وصرف صحي..
3. ماهي العقود الملزمة لهكذا التزام؟
حتى لا يكون الموضوع جمع مليارات الجنيهات تحت شعار المسألة نشوف ليها تصريف بعد سنين عددا كما حدث في مرات سابقة لأناس سلموا أراضي خلاء ولا زالت كذلك..
وبين هذا وذاك يظل السؤال قائماً لعناية من يحسبون انهم أولى الأمر:
- هل تريد الجكومة بالتعاون مع جالياتها وسفاراها وجهاز مغتربيها ترحيل الشعب السوداني للعاصمة بهكذا تحيز .. واين موقع مدن الولايات من هكذا أحداث وتوزيع للاراضي زراعية أو سكنية أو صناعية وغيرها وهو أمر يسهل التنسيق حوله بين الوفد القادم والجهات المعنية بالولايات قبل حضورهم أم المسألة نكتل الجدادة ونخم البيض .. سلامي
|
Post: #9
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: صلاح ليون
Date: 09-11-2010, 09:24 PM
Parent: #7
يا عثمان .. سلام وتحياتي وكل سنة وانت بالف خير
موقع الارضي يُشاع إنها في الوادي الاخضر وشايف الحكومة ماشة في الوادي الاخدر ده شديد
يعني تقريبا هسه بكون وصلو البطانة .. أو ما معروف تكون دقت وين..
1. خرط ومخططات ماااأظن .. واهو منتظرين
2. من متين في قيود زمنية لتزويد مناطق وخطط اسكانية بالخدمات .. لكن قريب منها أو بداخلها توجد مدينة النخيل
وهي مزودة بجميع الخدمات .. وطبعا ده كان على حسب نفوذ شركة سوقطرة المالكة لمدن النخيل
3. عقود .. قالوا تدفع وتستلم شهادة البحث طوالي
|
Post: #4
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: صلاح ليون
Date: 09-09-2010, 09:04 AM
Parent: #2
العفو يا بكري .. وربنا يحقق الاماني
فعلا طلباتك منطقية وافتكر ده الحيحصل بالنسبة لشهادة البحث
لكن يا بكري السعر ده ما حيرك.. يعني 20% خصم معناتو السعر كان 10000 ريال .. ده لي درجة أولى
ومعناتو بالسوداني حوالي 7 مليون ونص .. وطبعا حكاية انو الارض في الوادي الاخضر دي لي هسه
ما اعلنو عنها .. والبعرفو الوادي الاخضر درجة اولى اغلى من كده ..
|
Post: #6
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: عثمان دغيس
Date: 09-09-2010, 10:23 AM
Parent: #4
اها والزول الإسمو عثمان دغيس
والكان في اجازة في السودان ايام التسجيل وطبعا ما سجل
يكون اكل نيم برضو ولا كيف ؟؟؟؟
|
Post: #8
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: عثمان جلال الدين
Date: 09-09-2010, 04:47 PM
يا ليون
حسب المعلومات المتوفرة أن من سجلوا لدى الجالية بقطر حوالي 12 الف في 10 ريال = 120 الف ريال لصالح الجالية والناتج الاجمالي للولاية في 8 الف ريال لكل قطعة درجة اولى = 96 مليون ريال ..
لذا لا بد من توفير خدمات الكهرباء والمياه والصرف الصحي في قيد زمني محدد قبل الشروع في استلام اي مبالغ مالية بتعهد والتزام لا نكوص عنه يتم تضمينه في شهادة البحث أو أي عقد..
فهل يمكن توفير هكذا ضمان؟؟
|
Post: #10
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: صلاح ليون
Date: 09-11-2010, 09:57 PM
عثمان دغيس ازيك .. وكل عام وانت بخير
Quote: اها والزول الإسمو عثمان دغيس
والكان في اجازة في السودان ايام التسجيل وطبعا ما سجل
يكون اكل نيم برضو ولا كيف ؟؟؟؟ |
لا لا .. التسجيل ما عندو اي علاقة بإنك حتكون من ملاك هذه الأراضي من عدمو
كان الموضوع عبارة عن حصر .. وجمع عشرة ريال .. وتجي توريهو ورقة ورقتين
وتمشي .. ممكن هسه من يومك ده تطلع شهادة السكن وتوثق وتجيب الباقي .. ولما
البعثة تصل الكلام يادوب حيدخل الحوش .. وحتشوف الحياكل نيم منو ..
|
Post: #11
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: صلاح ليون
Date: 09-11-2010, 11:03 PM
Parent: #10
عثمان جلال مرة اخرى .. مرحب بيك
| Quote: حسب المعلومات المتوفرة أن من سجلوا لدى الجالية بقطر حوالي 12 الف في 10 ريال = 120 الف ريال لصالح الجالية والناتج الاجمالي للولاية في 8 الف ريال لكل قطعة درجة اولى = 96 مليون ريال .. |
لا نديك نحنا المعلومات المتوفرة لدينا..
نقول المسجلين 10 ألف شخص منهم انطبقت عليهم الشروط
أها قال ليك الجايات فقط .. فقط 300 قطعة .. تصدق !!
السؤال حتتوزع كيف ..
قيل .. تحت تحت .. اولا حيشوفو الناس الاشتغلت أو خدمت في حكومة السودان
وتانيا .. أتحت من التحت .. ده بنقولو ليك في التلفون ..
تحياتي
|
Post: #12
Title: Re: لعناية ناس الدوحة .. وأسعار الأراضي.. وفد الأراضي بولاية الخرطوم يصل الدوحة يوم 18 الجاي
Author: صلاح ليون
Date: 09-12-2010, 07:10 PM
Parent: #11
فوق..
لعنابة بوست اسعار الاراضي في الخرطوم لمزيد من الاطلاع
|
|