Post: #1
Title: قصيده مستمره في محمد فرح وعلاء الدين يوسف
Author: طارق الأمين
Date: 09-08-2010, 04:27 PM
Parent: #0
علاء جيت سالي سكينك تجرح فينا
ونحن الفينا لوتعلم بقي مكفينا
فترنا من الليالي الشوم
محل نختاها بتبارينا
وضاعت من ايادينا الاماني حزينه
اتوهطنا في بيت الفنون بالخوه اتلمينا
واتذكرنا كم ست شاي ضحكنا بكينا
قلنا الدنيا رايحه والبيفضل لينا
نمد ايد للضعيف ياريتو يشفع لينا
طلت فينا ناديه ولسه فينا انينا
تزازي من العساكر وتجري بي كرعينا
معروضاتا شاي ساواهو بي ايدينا
ورزقا من حلال لاماهو بالملينه
هاج ماج العساكر وطاردو المسكينه
من خور لي زقاق وسط المدينه رهينه
كان الامر واضح لازم تكوني سجينه
شان امن البلد من كل مناظر شينه
سقطت والجميع فراجه قدام عينا
ماتت والدموع محجوزه في عينينا
واصوات النواح شقت سمانا لعينه
ماتت وودفرح لسع يكضب لينا
ماتت ياعلاء والدنيا ماشه مشيها
واترقو العساكر من دم المسكينه
كم كمين جنيه اتباصرت في حينا
من اهلا حنان واصحاب ضماير زينه
ناس نجلاء ووهبه وانعام الحنينه
كنا مع شجونا والذكري الحنينه
جيتنا الليل مضلم وضاريت الرتينه
عمل الخيرمقدم في كل مايلينا
احساس اسره تفرح في غمرة انينا
هل جربتو مره في هذي المدينه
نحن الخير حماتو وكلماتو الرصينه
نحن الام اختنا والخاله الرزينه
نحن الحب نجومو واسرارو الدفينه
نحن الصدق وافر لو تقدر علينا
نعشق من نيالا وام در والقطينه
نعشق ناس بلدنا من غير الضغينه
من بيبور وطوكر ودنقلا والجنينه
شيل بوستيك وكسح واوعك ماتجينا
يتبع
|
Post: #2
Title: Re: قصيده مستمره في محمد فرح وعلاء الدين يوسف
Author: محمد أبوالعزائم أبوالريش
Date: 09-08-2010, 04:36 PM
Parent: #1
| Quote: ناس نجلاء ووهبه وانعام الحنينه |
لهم ولك كل الحب والإحترام
|
Post: #3
Title: Re: قصيده مستمره في محمد فرح وعلاء الدين يوسف
Author: طارق الأمين
Date: 09-08-2010, 05:38 PM
Parent: #2
| Quote: لهم ولك كل الحب والإحترام |
رشرش
مشتاقون ياخ
القصيده ح تستمر متجدده لاكثر من شهر
ماعرفنا نقول شنو مع اصحابنا ديل ياخ
سلامي الحار
|
Post: #4
Title: Re: قصيده مستمره في محمد فرح وعلاء الدين يوسف
Author: نجلاء سيد أحمد
Date: 09-08-2010, 05:50 PM
Parent: #3
طارق تحياتى وستاراتى لك مرة آخرى
|
Post: #5
Title: Re: قصيده مستمره في محمد فرح وعلاء الدين يوسف
Author: طارق الأمين
Date: 09-08-2010, 06:08 PM
| Quote: طارق تحياتى وستاراتى لك مرة آخرى |
سلام نجلاء سلام
الستاره حبابا
والشتاره ماحبابا
نحياتي واطفالك الحلوين
|
Post: #6
Title: Re: قصيده مستمره في محمد فرح وعلاء الدين يوسف
Author: الفاضل يسن عثمان
Date: 09-08-2010, 07:28 PM
Parent: #5
طارق:
استمر يا جميل،في فضح ما لايقدر علي حجب قرص الشمس
بالباطل يدافعون، وعن الشيطان نذروا انفسهم وانبطحوا
وهم منبطحون،علي الدوام.
وهؤلاء صعب عليهم ان يستفيقوا،لانهم تعدوا مرحلة الانبطاح
الي الانبراش في كل شيء.
مودتي ياجميل والي وهبة والاصيل سفيان، وحواء السودان
انعام ونجلاء.
|
|