Post: #1
Title: كم فداناً إشترى السودانيون في مصر؟؟
Author: عمر الفاروق
Date: 09-07-2010, 11:58 AM
الأرض دي إلا لي الزراعة ؟؟؟
كم عدد السودانيين في الأراضي المصرية ؟
أكثر من تلاتة مليون سوداني مقيم في مصر ..
لا يهمني عدد المقيمين ولكن ما يهمني عدد الشقق التي يمتلكها السودانيون في مصر!!
نعم شقق تملييييك !!
انا متأكد فييي المنبر ده في أكتر من واحد بيجعجع عن المليون فدان وهو مشتري ليهو شقة شقتين في مصر بيمشي ليهم كل صيفية ونظام قضرة لي الشباب والله الإجازة دي ح نقضيها في القاهرة ..
خلااااص يعني حرقتكم قصة يجو مصرين يزرعو؟؟
اعملو جرد حساب ونجي نشوف عدد الأمتار اللي امتلكها السودانيين في مصر وعدد الفدانات اللي حا يجو المصريين يزرعوها وبعد داك نشوف ..
اها يا جماعة في زول عندو إحصائية للموضوع ده ؟
|
Post: #2
Title: Re: كم فداناً إشترى السودانيون في مصر؟؟
Author: أحمد ابن عوف
Date: 09-07-2010, 12:11 PM
Parent: #1
امشي للحكومة المصرية وقول ليها انا سوداني وعايز ارض زراعية في مصر
زمان في المسلسلات المصرية الواحد يكون متابع نص الناس في المسلسل يموتوا
في قيراطين وللا تلاتة
اها لمن كبرنا وعرفنا القيراطين ديل قدر شنو والله لمن خجلت من نفسي من متابعة
المسلسلات المصرية
خليك من مصر، هسع ممكن امشي لندن واشترى شقة، وامشي برلين وللا امشي واشنطن واشتري
المشكلة شنو، والشقق في مصر بيعها ليس حكرا على السودانيين، كل من هب ودب ممكن يشتري
شراء الشقق ما عنده علاقة ببيع اراضي زراعية وتحكم في عصب اقصاد البلاد
الجنوب دا كان انفصل، عندنا شنو تاني غير مشروع الجزيرة
يبقى مصدر رزقنا الوحيد نديه للاجنبي الكان مستعمرنا زاتو قبل 50 سنة ما غيرو
|
Post: #4
Title: Re: كم فداناً إشترى السودانيون في مصر؟؟
Author: محمد زكريا
Date: 09-07-2010, 05:42 PM
Parent: #3
|
Post: #5
Title: Re: كم فداناً إشترى السودانيون في مصر؟؟
Author: محمد إبراهيم علي
Date: 09-07-2010, 06:16 PM
Parent: #4
ولانني واحد من البجعجعو في المنبر وملاؤوه صراخا افيد سيادتكم انني لا امتلك شقة في مصر
بل ولا امتلك حواشة في المشروع ولا يمتلك ابي ايضا (اولاد موظفين)
عمر الفاروووغ ما ممكن تقارن شراء الشقق في مصر بالاستيلاء على مليون فدان من مشروع الجزيرة وتحويلها لارض لانتاج اعلاف الدواجن وبنجر السكر لكي تامن مصر غذائيا ويجوع السودانيين
مزارعي الجزيرة خبرتهم في زراعة الذرة ، القطن ، القمح، والخضروات زمان نميري حاول يزرع الارز وفشل فشلا زريعا لانو الارض غير صالحة للارز والكلام ده قالوهو ليهو ناس البحوث الزراعية وكالعادة هو مشى كلامو ومشى وجا راجع تاني لكلام الناس البتعرف
طبعا انت ممكن تكون قريت الخبر طشاش وماشفت باقي الخبر والشروط الجزائية ارجع امشي اقراها كويس وتعال اتكلم عن الشقق وياريت تجينا بامثلة لناس الشقق ديل عشان ما تكون بترجم بالغيب ساي
هسي انت في السعودية دي امشي قول داير اشتري شقة زول بقول بغم مافي لكن الله يقدرك تمشي تقول ليهم عاوز اشتري لي ارض زراعية كان ما لقيت نفسك بتغني ظلموني مع السر قدور في اغاني واغاني رمضان الجاي
|
Post: #7
Title: Re: كم فداناً إشترى السودانيون في مصر؟؟
Author: على ميرغني
Date: 09-07-2010, 06:25 PM
Parent: #5
| Quote: الأرض دي إلا لي الزراعة ؟؟؟ |
نعم إلا الارض الزراعية .. اصلك ما لاحظت لعبارة دائما تاتي مع ذكر مساحة السودان او التعريف بالسودان في كل مواقع المعلومات عن السودان ....
دائما يقال مساحته مليون ميل مربع ... الصالح منها للزراعة كذا مليون فدان ... فكرك العبارة عن الصالح للزراعة دي كانت كتر كلام ساكت ولا لزوم ما لا يلزم
وبعدين فكر مرتين ولو غلبك اسأل ... الاراضي الصالحة للسكن هي كل العالم حتى مياه المحيطات وبعض شعوب آسيا تعيش في مساكن عبارة عن عوامات في البحار ... بس عمرك شفت ليك زراعة بمساحات واسعة في ارض غير صالحة للزراعة ...
خايفك تجي تقول لي ممكن نزرع في الزهريات .. وبرضو على قول كانتونا ون راي
|
Post: #6
Title: Re: كم فداناً إشترى السودانيون في مصر؟؟
Author: cantona_1
Date: 09-07-2010, 06:21 PM
Parent: #1
Quote: الأرض دي إلا لي الزراعة ؟؟؟
كم عدد السودانيين في الأراضي المصرية ؟
أكثر من تلاتة مليون سوداني مقيم في مصر ..
لا يهمني عدد المقيمين ولكن ما يهمني عدد الشقق التي يمتلكها السودانيون في مصر!!
نعم شقق تملييييك !! |
الأخ عمر الفاروق سلامات نرجو أن تكون فاروقاً في الحق. وعليك مقارنة المشابه بالمشابه. أو كما يقول الأنجليز Compare like to like. يعني حكاية أحلى العسل ولا أسرع الحصان غير ذات معنى. قد تكون عالماً أن الميزان التجاري بين مصر والسودان كان ولا زال وسيستمر لصالح مصر منذ عهد الملك فاروق. والأسباب بدهية ولكن لم يأت بعد حاكماً سودانياً يعمل على تصويبها. مصر بلد سياحية تعتمد على السياحة كمصدر دخل لها مع قناة السويس وتحويلات المغتربين والبترول وقليل من الصادرات الصناعية والزراعية. مصر تستورد 8 ملايين طن قمح سنوياً. نصفها يأتي من أميركا بالمجان ولكن الظروف الأميريكية ليست كما كانت للأسباب المعروفة للجميع.
حديثك عن شراء الشقق لا مجال لمقارنته ببيع مشروع الجزيرة. مشروع الجزيرة يتعيّش ويتكسّب منه ما لا يقل عن ستة ملايين نسمة وربما أكثر لو حسبنا العمالة الموسمية. زائداً عمالة النقل والتصنيع والخدمات المصاحبة. السؤال المباشر: أين يذهب هؤلاء الناس وهم سودانيون 100%؟ أما شراء شقّة في مصر فلا يتضرر منه مصري، لأن الشقق المعروضة لا يشتريها المصريون لغلاء سعرها. كما أنّ شراءها لا يضر معيشة مصري بل يكون سبباً في إضافة دخل جديد لأكثر من مصري يقدمون الخدمات الضرورية لصاحب الشقة الأجنبي.
هل تعلم أن دخل مصر من السياحة السودانية بأنواعها أكثر من دخلها من كل دول الخليج مجتمعة؟ سبب هذا هو أنّ السودانيين يزورون مصر خلال العام باستمرار على مدار 12 شهراً في السنة. لكن جماعة الخليج يحضرون في الصيف فقط. هل تلاحظ أن هنالك 3 سفريات يومياً بين الخرطوم والقاهرة؟ أما عن أموال السودانيين المودعة في البنوك المصرية فلها بوست منفصل إن شاء الله. تحياتي.
كبـّـاشي الصـّـافي
|
Post: #8
Title: Re: كم فداناً إشترى السودانيون في مصر؟؟
Author: يوسف السماني يوسف
Date: 09-07-2010, 08:24 PM
Parent: #6
| Quote: اعملو جرد حساب ونجي نشوف عدد الأمتار اللي امتلكها السودانيين في مصر وعدد الفدانات اللي حا يجو المصريين يزرعوها وبعد داك نشوف .. |
عمر الفاروق
البوست دا اعور لان عين السياسة فيه عمياء . ولكن خلينا نبصر بالعين التشوف طشاش .
عمر السودانيون اشتروا من حر مالهم كأفراد شقق في مصر والسعوديون والكويتيون وجميع العرب وغيرهم علي مستوي الإفراد .
ولكن المصريون لم يشتروا أراضي زراعية ولكن منحتها لهم حكومة الإنقاذ مقايضة مع الحكومة المصرية كم قايضت حلايب بقضية محاولة اغتيال حسني مبارك إنشاء الله تكون فهمت الفرق . أنصحك شوفا ليك موضوع تاني أغاني بنات دلوكه وخلي الكلام المابتفهم دا
|
|