Post: #1 Title: اجمل إعلان علي تلفزيون السودان Author: خدر Date: 09-06-2010, 10:36 PM
اجمل اعلان سوداني لمُنتج سوداني
مبروك
____ ده رأئ شخصي و ليس ترويج, لاول مرة افرح بي اعلان علي الميديا السودانية
Post: #2 Title: Re: اجمل إعلان علي تلفزيون السودان Author: GamarBoBa Date: 09-06-2010, 10:40 PM Parent: #1
الفكرة جميلة يا فنان.. لكن مسروقة بالكربون مع بعض الاختلافات الطفيفة لاعلان حليب لونا في السعودية قبل ستة سنوات
_ عموما كوفتي ماركة مميزة وشركة محترمة
Post: #3 Title: Re: اجمل إعلان علي تلفزيون السودان Author: الشفيع عوض شوشتا Date: 09-06-2010, 10:47 PM Parent: #2
سلام يا خدر بالفعل زي ما قال بوبا فكرة مسروقة وعندي سؤال محيرني ليه دايما بنعتمد في اغلب اعلاناتنا على اصحابي البشرة البيضاء ؟
Post: #5 Title: Re: اجمل إعلان علي تلفزيون السودان Author: GamarBoBa Date: 09-06-2010, 11:07 PM Parent: #3
الشفيع كيفنك...ورمضان كريم ياخي
اعتقد يا خدر نفس اللمسة الموسيقية في الدعاية الفوق برضو..فالجهة العملت الشغل واحدة (حسب احساسي) في تطور في المسائل مافي كلام.. خاصة كاتب السيناريو الاعلاني بتاع فينو ده اجتهد وفيه نوع من التجديد،اللوكيشن برضو فيه استيراد من دعايات منتجات مشابهة لكن لاعبها زول فنان...عمل ليها كستمايزنق كويس في الدعاية الاخيرة. لو كان اشتغل فينو وما كرر شكل الموسيقي في الغزالتين كان بيدي تميز اكتر للمنتج الاول...التكرار النمطي مشكلة برضو...
_ ما في زمن اعدل كود الفيديو عشان يظهر بشكل كويس..كسلانين والله
Post: #10 Title: Re: اجمل إعلان علي تلفزيون السودان Author: فدياس نجم الدين Date: 09-06-2010, 11:59 PM Parent: #5
Post: #4 Title: Re: اجمل إعلان علي تلفزيون السودان Author: عبدالوهاب علي الحاج Date: 09-06-2010, 10:51 PM Parent: #2
Quote: اجمل اعلان سوداني لمُنتج سوداني
الصحيح اجمل اعلان معروض على الميديا السودانية الاعلان مصري مية مية والمنتج كيني برضو مية المية ونحنا لينا اجر المناولة وخروف السماية فقط
Post: #6 Title: Re: اجمل إعلان علي تلفزيون السودان Author: GamarBoBa Date: 09-06-2010, 11:15 PM Parent: #4
Quote: والمنتج كيني برضو مية المية
وهبه ده لم يأتي لحوار انت شفت ليك شاي بتزرع في الدمازين؟؟ لكن معاك في حكاية انو منتج العمل لو مصري طوالي يا غريب يا لبلدك...بلا أرف معاهم
_ رمضان كريم يا وهبة اول بوست نتلاقي فيه من زمن
Post: #7 Title: Re: اجمل إعلان علي تلفزيون السودان Author: Osman Musa Date: 09-06-2010, 11:32 PM Parent: #6
غايتو شراب شاى زى ده فى البلد دى ممنوع . فى البنوك وفى كل المصالح ساعات العمل للعمل الداير يشرب عندو ساعة بس فى اليوم . .. تحياتى عزيزى خدر وادينا خبرك ضرورى
Post: #8 Title: Re: اجمل إعلان علي تلفزيون السودان Author: cantona_1 Date: 09-06-2010, 11:40 PM Parent: #7
Quote: الاعلان مصري مية مية والمنتج كيني برضو مية المية ونحنا لينا اجر المناولة وخروف السماية فقط
يا خدر سلام.. كلام الأخ عبد الوهاب علي الحاج صحيح، الإعلان مصري 100% .. الناس الفيهو كلهم مصريين ومصريات بما فيهم الأطفال. الشاي إنتاج كيني... وعندنا شاي في أبو جبيهة لم يتم تطويره زراعياً ولجأوا للإستيراد. وفي سنين إنعدام العملة الحرة وإنعدام الشاي من السوق تسابقت الشركات على مدينة أبو جبيهة. ولكن بمجرد توفُّر العملات الحرة زاغوا من المزارع وتركوها خاوية على عروشها. ممكن الاسم سوداني والشركة سودانية... غير ديل تاني فضّل لينا شنو في الإعلان؟؟
كبـّـاشي الصـّـافي
Post: #9 Title: Re: اجمل إعلان علي تلفزيون السودان Author: زينب التجاني Date: 09-06-2010, 11:45 PM Parent: #7
سلام وتحية الاعلانينمن تنفيذ شركة طارق نور للدعاية والاعلان وهى كما معروف من الشركات الكبيرة وليها خبر طويلة بس طورو طريقتهم وممكن نقول اسشتغلومعانا بامانة اكتر واضافو كوادر جديدة بنتمنى المزيد
Post: #11 Title: Re: اجمل إعلان علي تلفزيون السودان Author: GamarBoBa Date: 09-07-2010, 00:18 AM Parent: #9
اتوقعتها كما اسلفت انها جهة واحدة ولم يخيب ظني
Quote: بنتمنى المزيد
بس وصيهم ما يترسوا الافكار من الاعلانات العالمية وبرضو ما يكرروا الجمل الموسيقية والمؤثرات بشكل مشابه عشان يدوا كل منتج شخصية مختلفة ما يبقوا علينا هم وكمان دعايات شركة الاتصالات الخلتنا نكره قنوات الاف الام من كترة الكواريك المتكررة في كل اعلان.
خليهم يبدعوا افكار جديدة وما يكربنوا لشركات محترمة في قامة كوفتي افكار تم تنفيذها من قبل...عناصر الكرييشن موجوده في طبيعة السودان وهم لو خبرتهم كبيرة يعملوا هارموني من بين مقاييس عالمية مع الواقع السوداني دون اللجوء الي التكرار
تحياتي
Post: #12 Title: Re: اجمل إعلان علي تلفزيون السودان Author: خدر Date: 09-07-2010, 00:48 AM Parent: #9
عشان تعرفوا الهجرة دي بتعمل شنو فينا وانا مبسوط لي كم يوم عشان في إعلان سوداني ناجح و صلح لي مزاجي (و انا مزاجي ده ما بتصلح بي اخوي و اخوك) المزيكة جيدة و ناجحة جدا - الاخراج جميل - إنتقال الكاميرا جميل اتاريهو الشغل طلع مصري :) شكرا يا اوغاد علي الاحباط
Post: #13 Title: Re: اجمل إعلان علي تلفزيون السودان Author: GamarBoBa Date: 09-07-2010, 01:39 AM Parent: #12
والله يا خدر لا احباط ولا يحزنون... وانا شخصيا لما حضرت الدعاية اول مرة عرفتها مترسة(TRACED) لكن (بتصرف) زي ما بقولوا ولما نزلت البوست انا خشيت أعلق بس احتراما لكوفتي ولو كانت علامة تجارية سودانية تانية صدقني ما بكتب،لسبب بسيط انو العلامة سودانية وصرفة وناجحة وعندها ethics عالية في البزنس وحرام تتجوبق بالشكل ده في زمن الماركات العالمية،بالاضافة لاعتبارات تانية.مع العلم انني لا علاقة بالماركة المذكورة غير اني سوداني وهم سودانيين.
الشي تاني يا خدر لو تلاتة مبدعين اتلموا (كاتب سيناريو دعائي،وزول فنان،وملحن ) يعني مثلا مثلا انت وعماد وسلمي الشيخ صدقني لو ردموا ليكم 20 دعاية بداية بخيول المارلبورو ونهاية بأرنب انيرجايزر ممكن العمل التالت ليكم يكون اجود من كدة يعني الموضوع ما صعب علي المبدعين،والاتعمل ده انا شخصيا غير اللحن ما شايف فيه اي مشهد جديد يعني مشاهد مكررة اتنقلت .قد تواجه الناس مشكلة وهي في الاجهزة لا اكثر لا اقل. والغاظني اكتر انو اي دعاية فيهم في زمن اضافي من 15-30 ثانية زيادة وده بيدل علي قصور في الكتابة المضغوطة البتوصل فكرة الاعلان الا عن طريق لحن ودي بتكلف الشركات قروش وبتزهج المشاهد ودي كلها شركاتنا م واعية ليها وبليسوا ليها من طرف وخلاص..
عموما ما داير انق أكتر في الموضوع وكدي بطل الاحباط البلا سبب وابقي مارق تعال
Post: #14 Title: Re: اجمل إعلان علي تلفزيون السودان Author: cantona_1 Date: 09-07-2010, 01:43 AM Parent: #12
Quote: شكرا يا اوغاد علي الاحباط
يا خدر ما تخلينا من حكاية المزيكة دي.. قول ركّزت في اللحم الأبيض وبعدين البطيخة طلعت حمراء. نحبط 100 زيك ... ما تفرح ساكت.. معليش تكبر وتاخد غيرها. تحياتي
كبـّـاشي الصـّـافي
Post: #15 Title: Re: اجمل إعلان علي تلفزيون السودان Author: Ashraf el-Halabi Date: 09-07-2010, 03:12 AM Parent: #14
يا مولانا تكون طالبة معاك Reggae!
Post: #16 Title: Re: اجمل إعلان علي تلفزيون السودان Author: محمد البشرى الخضر Date: 09-07-2010, 07:08 AM Parent: #15
اعلانات سوداني و ثابت من اجمل الإعلانات حاليا - خاصة بتاع مستشفى مجانين الإنترنت يليهم إعلام مياه صافية رغم انو الفكرة ما سودانية خالص لكن على الأقل الممثلين سودانيين إن شاالله يطلع الإنتاج و الإخراج سوداني كمان
Post: #17 Title: Re: اجمل إعلان علي تلفزيون السودان Author: Ammir Mohamed Date: 09-07-2010, 07:28 AM Parent: #1
سلامات يا خدر رمضان كريم وعيد مبارك
فعلا إعلان جميل
بمناسبة المواد الإعلانية السودانية أنا طبعا في دعاية بتاعت زيت صباح دي بتظعطني عديل!! ....لو متذكرا البامية ما ياها!!! كيفين! البامية ذاته ...الخ! تعرف أحلى حاجة الزول الفيها ده بذكرني وليد مبارك .. ليه .. ما عارف!!.. على العموم أعتقد إنو ده فن من فنون الإعلان إنو يخلو الصورة متعلقة في ذهنك بغض النظر عن إعجابك أو كرهك للإعلان!
أمير
Post: #18 Title: Re: اجمل إعلان علي تلفزيون السودان Author: سامى عبد الوهاب مكى Date: 09-07-2010, 07:42 AM Parent: #17
إعلان صافية الأجمل (وجهة نظر)
Post: #19 Title: Re: اجمل إعلان علي تلفزيون السودان Author: Tabaldina Date: 09-07-2010, 08:53 AM Parent: #18
.. .
Quote: وهبه ده لم يأتي لحوار انت شفت ليك شاي بتزرع في الدمازين؟؟
معليش يا قمرنا لكن والله لو شفت مزارع الشاى القايمة فى رشاد ( الجبال الشرقية بكردفان ) والله تدى ربك العجب .. قايمة كدا خلقه التقول الخواجة الكينى جا مارى بهناك وشتت بزرة وما رجع تانى تقطع من النبته وترمى جوه الكافتيريا طوالى لا يدخل مصنع لا تضاق=ف ليهم محسنات ..
الغريبة كانتونا جا مارى من هنا وما قال المعلومه دى ليه عن الايريا بتاعتهم :)
-------------
سلام يا خدر .. حقيقة نعانى من الابتكار والابداع فى الاعلانات السودانية نتيجه لعوامل عديدة وكل الباقى ببقى سرقات وتقليد اعمى .. لا يسع الزمن لنقاشها ..
وحمدلله على السلامه ؛
Post: #20 Title: Re: اجمل إعلان علي تلفزيون السودان Author: فدياس نجم الدين Date: 09-07-2010, 10:55 AM Parent: #19
خدر
كويس إنك جيت الأيام دي لو جيت قبل فتره قصيره
كنت لقيت إعلانات تسد النفس من عينه (رانجوووووو .. جربتوووووو
أنا ضقتوووووو)
وده إعلان إذاعي لمشروب لك أن تتخيل إن الإعلان مبني على هذه الكلمات الغبيه
يرددها ولد ومعاهو كورال ثم تدخل بت لتقول نفس الكلام مع مط كلمه أنا ضقتووووو
ثم طفل صغير وأخيراً صوت للأب
الشئ المحيرني الإعلان ده كان بيتذاع من أغلب الإذاعات عادي جداً
برضو كان في إعلان غبي جداً لسوداني شركه الهاتف السيار
لو مانسيت الكلام الفيهو كان كده مع ديكور ولبس بائس وإخراج أكثر بؤساً
سوداني سوداني ما كتير ح ادفع رصيدي ما ح يقطع نجمة صفر مربع
سوداني سوداني ما كتير ح ادفع رصيدي ما ح يقطع نجمة صفر مربع
