lily.akol تكتب مره آخري باحرف من نار(المثقف الشمالي: اسئلة ليس للاجابه)!

Quote: المثقف الشمالي: أسئلة ليست للإجابة بقلم لِيلي البينو أكول [email protected] http://lilyakol.blogspot.com/ لماذا يكتب المثقف الشمالي بكثافة عن مشكلة الجنوب و عن الجنوبيين في هذه الفترة الحرجة جداً في تاريخهم؟ ما الذي يدفعه للكتابة؟ هل اكتشف فجأةً أن هنالك مشكلة في الجنوب؟ هل هو إيمانه بقضية الجنوب، أم هل هي صحوة ضمير متأخرة؟ هل تأكد أن الجنوب ذاهب لا محال، أم هل طغى عليه غيرة المواطن المحب لوطنه فبدأ يفعل كل ما بوسعه لحماية تراب الوطن؟ لماذا يعلو صوت المثقف الشمالي هذه الأيام داعياً للإخاء بين الجنوب و الشمال؟ لماذا يعلو صوته منادياً بنسيان الماضي و فتح صفحة جديدة بين أبناء الوطن الواحد؟! بصراحة، الإجابة على هذه الأسئلة ليست بالضرورة الملحة! فكلنا يعلم أن المثقف الشمالي، و إن اختلفت الأزمنة و الأنظمة، يظل كما هو لا يتغير. يظل فاقداً للمصداقية في تناوله لقضية الجنوب. يظل مستخفاً بعقل الجنوبيين، بل متخذاً من المكر حجة يقارع بها حجتهم. هكذا عرفناه، هكذا عهدناه! فكلما رأى أن الجنوبيين بصدد اتخاذ قرارات مصيرية، يضحى مهموماً مشغول البال، لا يهدأ ولا يغمض له جفن إلا بعد أن يجد منفذاً يحشر نفسه من خلاله في أمورهم. و بمجرد أن يجد لقدميه موضعاً بينهم، لا يتوانى في خلط الحابل بالنابل ليشغلهم بسفاسف الأمور التي تصرفهم عن القضايا الأساسية. لذلك عندما نتساءل: لماذا يعلو صوت المثقف الشمالي في غضون هذه الأيام و لم يبقى للاستفتاء إلا بضعة أشهر؟ لماذا يقيم الندوات السياسية للتحاور حول مستقبل الجنوب؟ و لماذا يكتب الأشعار الوطنية و يتغنى من جديد ب "ما في جنوب بدون شمال... كلنا إخوان"؟ عندما نتساءل، فأسئلتنا ليست للإجابة، و لكنها للتفاكر والتمعن لعلنا نجد فيها عبراً تفيد. نعم، لماذا يتحدث المثقف الشمالي عن قضايا الجنوب و هو صاحب الضمير الميت، فاقد البصر و البصيرة، أبكم عديم الكلام عندما كان الجنوب يحتاجه؟ أين كان عندما كانت طائرات الانتوف تقذف القرى الجنوبية و تقضي على الأخضر و اليابس؟ أين كان عندما قام الجهاد ضد مواطني الجنوب العزل، أيام في ساحات الفداء و" يلا يا سيف العبور...ارمي بكل الرصاص" أقطعوا رؤوسهم لتفوزوا بالجنة و بالحور العين؟ و من منا لا يعلم أين كان المثقف الشمالي آنذاك؟ كان مغموراً في اللامبالاة لأن لا صلة تربطه بالجنوبيين. كان يسير المسيرات المليونية لنصرة أشقائه العرب في فلسطين. كان ينظم الحملات الطوعية لجمع الغذاء و الكساء لأطفال فلسطين في الوقت الذي كان فيه أطفال الجنوب يرتعدون برداً و يموتون جوعاً. نعم، هذا هو المثقف الشمالي الذي نعرف. هذا هو المثقف الشمالي المعروف بانتمائه إلي تلك المؤسسة الفكرية المشئومة، مؤسسة الاستعلاء العرقي و الديني باسم العروبة و الإسلام. بل هو صانع مؤسسة الشؤم و راعيها، فكيف يأتينا اليوم "في ثياب الواعظين"؟ كيف يطلب منا أن نصغي إليه و هو الذي لم نسمع له قط صوت حق فيما يخص قضايا الجنوبيين؟ كيف لنا أن نثق به و بيننا تاريخ طويل من عدم المصداقية و نقض العهود؟ كيف لنا أن نثق به و هو أول من سيبصق في وجه "أخيه" الجنوبي إذا دقت طبول العروبة...و هو أول من سينفش ريشه و ينتفخ و يضرب على صدره، كعادته المعهودة، صارخا: أنا عربي أصيل ولد البلد أمشي يا جنوبي يا عب؟! كيف لنا أن نثق به و هو أول من سيلوح بسيفه في الهواء إذا دقت طبول الجهاد... و هو أول من سيمتطي جواده و يركض خاطباً في الناس: "أنصر أخاك ظالماً أو مظلوماً"، حيّ على الجهاد، أقتلوهم و مزقوهم إرباً إربا فهم الكفرة حطب النار؟ لن يحمينا المثقف الشمالي من بطش العروبة و لن يحمينا من سيف الإسلام. هذه هي الحقيقة التي يعيها جيداً، هذه هي الحقيقة التي نعرفها عنه! و مع ذلك، يظل منهمكاً في قضية الجنوب، متجاهلاً، مع سبق الإصرار و الترصد، أن الدين و الهوية من أهم عناصر القضية. لماذا يؤيد المثقف الشمالي فكرة السودان الجديد في الوقت الذي اقتنع فيه الجنوبيون أن السودان الجديد حلم فات عليه الأوان؟ لماذا يتحدث بشغف عن بناء دولة جديدة و هو يعلم علم اليقين أن السودان الجديد دولة لم و لن تكن في ظل هذه المساحة الجغرافية التي تحوي السودان؟ فالسودان الجديد دولة مدنية لا علاقة لها بدولة الشريعة التي نراها اليوم. السودان الجديد دولة مواطنيها سواسية، يتساوون أمام القانون و الدستور في الحقوق و الواجبات، و ليست دولة تعطي فئة معينة القدح المعلى في حق المواطنة. السودان الجديد دولة لها سيادة ممثلة في حكومتها المنتخبة من قبل الشعب، و ليست دولة تحكمها من خلف الكواليس نخبة متطرفة تركز جل جهودها في إصدار المقاييس للباس المرأة و الفتاوي التي تستهدف غير المسلمين. و لكن هذا هو المثقف الشمالي كما عهدناه، طامعاً في أخذ الجمل بما حمل: يريدها دولة عربية، يريدها دولة إسلامية، و يريدها دولة موحدة! لماذا يتنبأ المثقف الشمالي بفشل دولة الجنوب إذا اختار الجنوبيون الانفصال، و يتجاهل فشل الدولة السودانية التي هو جزء لا يتجزأ منها (هل توجد على وجه هذه الأرض دولة أكثر فشلاً من دولة رئيسها مجرم حرب تطارده المحاكم الدولية لأنه قام بقتل أكثر من نصف مليون مواطن؟)! هل أدرك المثقف الشمالي الآن فقط أن الجنوب ليس به مقومات دولة؟ لماذا لا توجد بنية تحتية في الجنوب؟ لماذا يفتقر الجنوب إلى أبسط مقومات الحياة؟ أليس الجنوب جزء من السودان الوطن الموحد منذ خروج الإنكليز في عام ١٩٥٦؟ و لكن هذا هو مثقف الشمال كما عرفناه، فاقداً للمصداقية في تناوله لقضية الجنوب. لذلك يرفض الإقرار أن ما نراه بالجنوب اليوم ما هو إلا نموذجاً مصغراً لما ستؤول إليه أوضاع الجنوب في السودان الموحد! جنوب يتحكم فيه أولاد البلد، جنوب حكومته مكبلة مقيدة الأيدي من قبل السلطة المركزية الشمالية، التي تضع العراقيل أمام كل خطوة يتخذها من يقوم على أمر مواطنيه. جنوب به مليشيات دججتها السلطة الشمالية بالسلاح و المال لخلق البلبلة و عدم الاستقرار. جنوب يُستنفذ موارده و ثرواته الطبيعية لبناء الشمال. جنوب كل ما يهم الشمال فيه أبار البترول و ليس تنمية الإنسان و تطويره. لماذا يختار المثقف الشمالي لنفسه المقاعد الأمامية ليدلي بدلوه في قضايا الجنوب كيف يشأ و حيثما يشأ؟ لماذا يعتقد أن الجنوبيين ليس لديهم من النضج السياسي و الفكري ما يؤهلهم للحديث عن الانفصال أو مخاطر الوحدة، ناهيك عن إدارة دولة جديدة بالجنوب؟ لماذا يتوهم المثقف الشمالي أن عليه هو فقط بالتفكير و التحليل و على الجنوبيين بنعم يا سيدي، أصدقت القول يا سيدي، لك السمع و الطاعة يا سيدي؟ لماذا ينعت كل جنوبي يتحدث عن الانفصال بالرجعي قليل التفكير، و يرفع من شأن أيّ جنوبي يتحدث عن وحدة السودان، حتى من كان لا شأن له، حتى من كان من ذوي النفوس الضعيفة اللذين يسعون لبيع القضية برخص التراب؟ لماذا يحاول المثقف الشمالي تمويه الرأي العام بالإدعاء أن إسرائيل هي من تدفع الجنوب للانفصال حتى يتيسر لها السيطرة على منابع مياه النيل؟ ما علاقة إسرائيل بقضية الجنوب؟ و لكن هذا هو المثقف الشمالي كما عرفناه، مستخفاً بعقل الجنوبيين، مستهتراً بمشاعرهم في تناوله للقضية التي شكلت وجدانهم لسنواتٍ طوال. لماذا يعيد المثقف الشمالي كتابة التاريخ؟ لماذا يطلب منا أن ننسى الماضي و ليس لدينا ماضٍ يُنسى؟! نحن الجنوبيين أصحاب قضية، و صاحب القضية لا ينسى حتى لا يتهاون. كيف يطلب منا أن ننسى الماضي و ليس لدينا ماضٍ يُنسى؟! نحن الجنوبيين أصحاب تاريخ والغافل فقط هو الذي يرمي بتاريخه في المذبلة، و نحن ليسنا بغفلة! كيف يطلب منا المثقف الشمالي أن ننسى الماضي و ماضي الجنوب هو حاضرنا وهو ما سنبني عليه المستقبل؟ فماذا يريد المثقف الشمالي و متى يكف عن النفاق؟

Quote: أين كان عندما قام الجهاد ضد مواطني الجنوب العزل، أيام في ساحات الفداء و" يلا يا سيف العبور...ارمي بكل الرصاص" أقطعوا رؤوسهم لتفوزوا بالجنة و بالحور العين؟ اسئلة ليس للاجابه. رفعت الاقلام وجفت الصحف.

---

Post: #3 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Medhat Osman Date: 09-05-2010, 02:59 AM Parent: #2 Quote: فماذا يريد المثقف الشمالي و متى يكف عن النفاق؟ اسئلة في الصميم. ولن تجدي اجابة. لكن كان تقولي بعض المثقفين الشمالين. . . . تحية لاكول. وشكرا تراجي.

---

Post: #4 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Tragie Mustafa Date: 09-05-2010, 03:01 AM Parent: #3 Quote: تحية لاكول. وشكرا تراجي. شكرا مدحت عثمان.

---

Post: #5 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Tragie Mustafa Date: 09-05-2010, 04:56 AM Parent: #4 .

---

Post: #6 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: حمور زيادة Date: 09-05-2010, 06:32 AM Parent: #5 طرحت ليلي أكول أسئلة ترى أنها ليست للاجابة .. لكن هناك سؤال مهم يحتاج الاجابة من ليلي نفسها او ممن يحتفي بكلماتها هذه. من ه المثقف الشمالي ؟ الزميل مدحت عثمان الشمالي و ربماالمثقف احتفى ثم قال : لكن كان تقولي بعض المثقفين الشماليين. و هذه لعمري ليست مجرد جملة اعتراضية او اعتراض شكلي يا مدحت. هذه هي نقطة المحور التي قام عليها المقال و الذي يفترض أن لا تقرأه او يقرأه غيرك الا بهذه العين. أن أكول لا تنظر للبعض لكن تشمل الكل. فهي تعنيك و تعنيني و تعني غيرنا عشرات و مئات و ملايين. فلا يجي الاحتفاء بكلام كهذا بتقدير مستتر انها كانت تعني بعض لكنها لم تقل. الألفاظ قوالب المعاني. و لا فائدة ان نقوّل ليلي أكول ما لم تقله خيراً أو شراً. هي تتحدث عن كل المثقفين الشماليين. فما هي صفاتهم عندها ؟ المثقف الشمالي - أي مثقف شمالي عند اكول - صفاته هي : 1- اكتشف فجأة مشكلة الجنوب. 2- فاقد المصداقية في تناول قضية الجنوب. 3- مستخف بعقول الجنوبيين 4- يتخذ المكر حجة يقارع بها حجة الجنوبيين 5- يهتم و ينشغل باله و يحشر نفسه في امور الجنوبيين كلما رأى انهم يريدون اتخاذ قرار مصيري. 6- صاحب ضمير ميت. 7- أعمى البصر و البصيرة. 8- أبكم عديم الكلام عندما كان الجنوب يحتاجه. 9- لا مبالي بمآسي الجنوب حين كانت الطائرات تقصفه و كان مشغولا بمسيرات مليونية لدعم غزة. 10- معروف بانتمائه لمؤسسة الاستعلاء العرقي و الديني المشئومة. 11- عديم المصداقية و ناقض للعهود. 12- سيلوح بسيفه و يخرج للجهاد ضد الجنوبيين هذه بعض صفات المثقف الشمالي عند اكول .. ليس بعضهم بل كلهم .. فهي لم تقل البعض لنقول عنت مجموعة معينة او فئة محددة .. بل أطلقت القول على كل مثقف شمالي .. فالمسألة عندها عرق و ليست رؤى فكرية. فليس عند ليلي أكول مثقف شمالي مهتم حقا بالجنوب و ليس هنك مثقف شمالي له مصداقية و ليس هناك مثقف شمالي عنده ضمير. ان وصف تراجي هو أصدق وصف و إن ارادت به تراجي المدح .. انها حروف من نار. فعلا. حروف من نار تحرق الجميع. ماذا اقول انا الشمالي و يحسبني بعضهم مثقفاً حين اجد هذه الوصف و الاتهام في حقي ؟ لو صفقت طربان جذلا و قلت انها لا تعنيني بل تعني فلان و فلان فأنا غافل. لأنها ما حددت و ما اسهل التحديد. بالنسبة لي كشمالي و اظنه ايضا لمدحت فان الوصف ينطبق على جماعة المؤتمر الوطني الحاكم. ربما. لكن ألم يكن في مقدور ليلي أكول أن تقول هذا ؟ كان في مقدورها لكنها فضلت أن تقول المثقف الشمالي. ليشمل هذا الوصف كل مثقف شمال العرق سواء كان مع المؤتمر الوطني او لا. كلهم عندها بهذه الصفات. و العجيب و الغريب ان تقول ليلي أكول : Quote: السودان الجديد دولة لها سيادة ممثلة في حكومتها المنتخبة من قبل الشعب، و ليست دولة تحكمها من خلف الكواليس نخبة متطرفة تركز جل جهودها في إصدار المقاييس للباس المرأة و الفتاوي التي تستهدف غير المسلمين بينما هي تحتفي ( كما يظهر من كلامها ) بالاستفتاء و حق تقرير المصير القادم .. و هو حق وقع عليه للجنوب حكومة غير منتخبة و ديكتاتورية لا تمثل الا نفسها. لكنها وقعت للجنوب على الحق الذي لا تريد ليلي أكول من المثقف الشمالي أن يتحدث فيه. فإن كانت الدولة الديموقراطية ذات الجكومة المنتخبة من الشعب هي المطلوبة فعلام الفرح بحق منحتنيه حكومة شمولية غير منتخبة ؟ واضح انه بالنسبة لأكول : الانقاذ هي الشمال. و أن متحدث المؤتمر الوطني الجهادي متحدث باسم كل شمال السودان .. مثقفه و عامته. لذلك اعتقد ان ليلي أكول قبل أن تبدأ في اشعال النيران بحروفها تحتاج ان تعرف عن من تتكلم و من تعادي و من تخاطب. و نحتاج قبل أن نحتفي بهذه الكلمات ان ننظر في دقتها و عمومياتها. إن الظلم الذي وقع على الجنوب ليس مبررا عندي لقبول ظلم يقع من أي صوت جنوبي للشمال او الشرق او الغرب. لا يحق للمظلوم ما لا يحق لغيره. اعرف عدوك و عدونا .. ننصرك. ضعنا في خانة العدو .. إن لم نعاديك فاننا لن ننصرك و لن نحتفي بما تشعل من حروف نار.

---

Post: #7 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: حاتم علي Date: 09-05-2010, 07:35 AM Parent: #6 Quote: المثقف الشمالي - أي مثقف شمالي عند اكول - صفاته هي : 1- اكتشف فجأة مشكلة الجنوب. 2- فاقد المصداقية في تناول قضية الجنوب. 3- مستخف بعقول الجنوبيين 4- يتخذ المكر حجة يقارع بها حجة الجنوبيين 5- يهتم و ينشغل باله و يحشر نفسه في امور الجنوبيين كلما رأى انهم يريدون اتخاذ قرار مصيري. 6- صاحب ضمير ميت. 7- أعمى البصر و البصيرة. 8- أبكم عديم الكلام عندما كان الجنوب يحتاجه. 9- لا مبالي بمآسي الجنوب حين كانت الطائرات تقصفه و كان مشغولا بمسيرات مليونية لدعم غزة. 10- معروف بانتمائه لمؤسسة الاستعلاء العرقي و الديني المشئومة. 11- عديم المصداقية و ناقض للعهود. 12- سيلوح بسيفه و يخرج للجهاد ضد الجنوبيين هذه بعض صفات المثقف الشمالي عند اكول .. ليس بعضهم بل كلهم .. فهي لم تقل البعض لنقول عنت مجموعة معينة او فئة محددة .. بل أطلقت القول على كل مثقف شمالي .. فالمسألة عندها عرق و ليست رؤى فكرية. شكراٌ تراجي على إيراد المقال تحياتي و احترامي حمور دخلت هنا بعد السلام و المعايدة و الاشواق و كل ما الذي منه لأسألك : ماهو المطلوب من ليلى أكول بالضبط ؟ بمعنى ماذا قدم - المثقف المستنير الشمالي عموماً - لانسان جنوب السودان - عموما- منذ الاستقلال و حتى اليوم ؟ If you ever wear the shoes of someone whom lost everything, he gain nothing but lies and breach of Charters and covenants again and again, you have been told that they love you, you have been told that they really care about you, but it is always just talking and joking, words are easy to be told actions are hard to be taken. When you decide to walk away they never let you GO, they keep crying like children, oh baby please do not leave US,Oh we gonna miss you darling, that's will break our sweet sensetive hearts, we love you, we care about you, that’s really the funny part of the story my dear Hamour تحياتي و احترامي للجميع وعيد سعيد

---

Post: #8 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Asim Fageary Date: 09-05-2010, 07:58 AM Parent: #7 Quote: لكن هناك سؤال مهم يحتاج الاجابة من ليلي نفسها او ممن يحتفي بكلماتها هذه. من ه المثقف الشمالي ؟ الزميل مدحت عثمان الشمالي و ربماالمثقف احتفى ثم قال : لكن كان تقولي بعض المثقفين الشماليين. و هذه لعمري ليست مجرد جملة اعتراضية او اعتراض شكلي يا مدحت. هذه هي نقطة المحور التي قام عليها المقال و الذي يفترض أن لا تقرأه او يقرأه غيرك الا بهذه العين. أن أكول لا تنظر للبعض لكن تشمل الكل. فهي تعنيك و تعنيني و تعني غيرنا عشرات و مئات و ملايين. فلا يجي الاحتفاء بكلام كهذا بتقدير مستتر انها كانت تعني بعض لكنها لم تقل. الألفاظ قوالب المعاني. و لا فائدة ان نقوّل ليلي أكول ما لم تقله خيراً أو شراً. هي تتحدث عن كل المثقفين الشماليين. سلام لكاتبة المقال وسلام لتراجي وسلام الأخوة الأفاضل وسلام للأخ حمور وسؤالي أنا ايضاً: ماذا فعل المثقف الجنوبي للجنوب وماذا فعل لأهله في الجنوب ألم يزج بهم في حروبات متتالية وكلما يصل لإتفاق يستكين في الخرطوم في العمارات الفارهة ولا يقدم لهم مقومات الحياة الأساسية!!؟؟ لماذا فقط الشمالي هو المسؤول عن تربية الأبناء من الجنوب والتضحية من أجلهم ودفع فواتير سابقة منذ عهود الإستعمار الإنجليزي هذا إذا تناولنا الحديث بنفس مرآة (مرايا) كاتبة المقال ولكن إذا أردنا أن نتحدث عن سودان واحد قد يكون أو لا يكون فيجب التجرد قليلاً وعدم الإنحياز العرقي عند تناول القضايا الوطنية أما إذا كانت هذه العرقية والعنصرية لن تزوول وستبقى توقر الصدور فهذا أمر آخر !!! مع التحية والإحترام عاصم فقيري

---

Post: #9 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: حمور زيادة Date: 09-05-2010, 08:10 AM Parent: #7 ازيك يا حاتم يا صديق .. سألتني المطلوب من ليلي أكول شنو ؟ و لا شي و الله. اذا اصلو دا رأيها في كل مثقف شمالي فما بطالبا ابدا انها تقول غيرو. عشان كده لو تلاحظ انا ما اعترضت على كلاما هي الا في النقطة الاخيرة حقت الحكومة المنتخبة .. و استغربت طيب وكت اصلو الوطن الموحد مفروض تحكمو حكومة منتخبة ليه عايزين نفصلو باتفاق مع حكومة دكتاتورية يهمها مصالحا .. و الخلاف مع ليلي بيجي نو هي ما شكلها بتعتبر الحكومة بتعبر عن مصالحا بل عن مصالح اهل الشمال. يعني البشير يعلن الجهاد و تلبسا انت يا حاتم علي. كان ما عارف اعرف اخوي. أما انو المثقف الشمالي قدم شنو لانسان الجنوب فاظنو ده السؤال الغلط المتكرر يا حاتم .. لكنو للاسف من كترة اتكرر بقى صاح .. لكني لن أمل أن اكفر به .. شنو انسان الجنوب ده العايزين مثقف شمالي يقدم ليو حاجة ؟ هو المثقف الشمالي قدم شنو لانسان السودان ككل ؟ ده السؤال العليو الحساب. و نجي بعد داك نشوف المثقف الجنوبي زاتو قدم شنو للسودان. لكن حساب كل اتنين كيلو في البلد تقعد تقول المثقف الفلاني قدم لي شنو ؟ اها طيب المثقف البني عامراوي قدم لي شنو انا في محافظة الدبة .. تحديدا المحافظة مالي دخل بباقي الشمال زاتو. شفت كيف. يا حاتم ,, الوحدة ليست حدود جغرافية بل الوحدة ان يكون الجميع مواطنين سودانيين .. قصة انو الواحد يفضل يكون أقلية عشان يلقى تمييز ايجابي بدل يكون مواطن عندو حقوق مواطنة دي مسألة غلط بالنسبة لي. يعني عاين هسه موضوع مد حفلات المسيحيين لما بعد اتناشر. انا لو مسيحي مؤمن بالمواطنة برفضا.. هي قانون وله شي تاني ؟ مش قلتوالحفلات حداشر .. خلاص انا مواطن يسري عليّ الكلام ده. لكن تقسيم البلد لكيمان .. دي مسلمة نطلع دينا لو لبست بنطلون .. لكن دي جنوبية لو لبست ردا ما نسألا و نصفق نحن نقول يا سلام دي حقوق الجنوبيين .. ده كلام ما بيقنعني. دايرنها مواطنة ؟ الشر يعمنا لامن نلقى لينا مخرج .. دايرنها كيمان ما تقعدو تقولو لينا مواطنة و ما مواطنة. أها كلام ليلي ده بتاع المثقف الشمالي قدم شنو و سؤالك ده ياهو تأكيد انو المواطن الجنوبي ده مسيكين راجي المثقف الشمالي يقدم ليو. اناما بقتنع بالتقسيم ده .. انا عايز المثقف السوداني و المواطن السوداني الداير يقسما كيمان و يعاين ليها زي ليلي أكول و يشوف انو الشمال ضدو هو كجنوب مخير. لكن انا ما بصفق للكلام ده .. لأنو اولا ضد البلد عموما .. و لأنو بيبقى ضدي انا شخصياً. و انا لا ظلمت لي زول لا بقبل زول يظلمني. و المؤتمر الوطني لا بيمثلني لا ختيت يدي في يدو .. لكن هناك من خت يدو في يد المؤتمر الوطني و قرر معاو مصير البلد. و عايز يطلع منها يلبسني انا السوداني المسكين ليها.. لا و الله.

---

Post: #14 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: حاتم علي Date: 09-05-2010, 09:28 AM Parent: #9 طيب يا حمور أفهم من كلامك دا : Quote: اذا اصلو دا رأيها في كل مثقف شمالي فما بطالبا ابدا انها تقول غيرو إنتا معترض على Stereotyping العملتو ليلى اكول لكل المثقفين الشماليين ؟ ومن هو المثقف الشمالي ؟ طيب زي ما كتار من الشماليين بينظروا للجنوبيين بأنهم - عبيد - للأسف لليوم الفهم دا مستمر برضو ليلى اكول دي نظرتها لمثقفين الشماليين عموماً ، و ما تنمطي معاكم مثقف بالله يا حمور ! أنا (مهندس) بائس على باب الله ساكت يا اخوي Quote: شنو انسان الجنوب ده العايزين مثقف شمالي يقدم ليو حاجة ؟ هو المثقف الشمالي قدم شنو لانسان السودان ككل ؟ تعرف دي زي المغالطة القديمة أيهما أولاً البيضة ام الدجاجة المثقف الشمالي لم يقدم لشمال السودان شيئاُ المثقف الشمالي لم يقدم لعموم السودان شيئاُ المثقف السوداني يعاني من جميع الحكومات الديموقراطية و الملكية و الثيوقراطية وخلافه وبالتالي المثقف الشمالي مطلوب منه nothing لجنوب السودان بالمنطق دا هو لاقي ياكل ياخي لمن يقدم حاجة ! ننسى او نتناسى يا حمور ان اطول حرب اهلية في القارة الافريقية كانت تدور في جنوب السودان على مدى خمسين عاماً ننسى ان هناك 4 مليون انسان ماتوا نتيجة لهذه الحرب اللعينة ننسى مجزرة الاثنين الاسود و الاحد الاسود و مجزرة قطار اويل و مجزرة الضعين الخ ..... ننسى تراث الرق ، المعاملة غير المتساوية للجنوبيين في الشمال و العنصرية - المستترة - و التعالي ما أضحكني يا حمور بعد اتفاقية السلام صدور قانون يحكم بالجلد و الغرامة على من يتفوه بلفظ عنصري مثل كلمة (عب) الخ ... يا سبحان الله ! هو الناس دي الا يمنعوها بالقانون من جنس الفعل دا ! و بعدين السياسيين العظام ديل من الاستقلال لحدي الانقاذ ديل كانوا جنوبيين ؟ ما ياهم - فضلة خير - مثقفي الشمال و بعض العسكر المسئولية التاريخية لابسة (المثقف الشمالي) من راسو لحدي كرعينه با حمور والصلاة يوم القيامة العصر ما بتنفع ، و الاستغفال زمنوا انتهى خلاس ! بالغلط فتحتا قناة سودانية - لقيتهم بغنوا للوحدة - ياللبؤس عديل كدا ! وحدة بالغناء !! ياخي دي ناس لا بتختشي لا بترحم عديل كدا ! وين الاعتراف بجرائم الماضي القريب و البعيد ؟ و ين الاعتذار ؟ ياخي جنوب افريقيا لمن الغت التمييز العنصري عملوا ثقافة (الاعتذار و المحاسبة) ، نحنا عملنا شنو ياها خكاية حبيبنا قصي مع الشافع الجواط داك دقاني بكا و سبقني اشتكى و دق الاضينة و غني ليهو كمان:- بلسناك تقول لي تعال و تعال بعيونك تقول لي لا مافي مجال ! Quote: قصة انو الواحد يفضل يكون أقلية عشان يلقى تمييز ايجابي بدل يكون مواطن عندو حقوق مواطنة دي مسألة غلط بالنسبة لي. مين قال ليك الجنوبيين دايرين تمييز إيجابي ؟! هو وينوا التمييز الإيجابي دا عليك الله وريني ليهو ?!! داير تقول لي القوانين الفارغة بتاعت الحفلات البعد الساعة 12 !! ياخي دا حنك ما جايب همو ياخي ، دا لا يساوي ابادة قرية واحدة او مدرسة في جنوب السودان هو قال ليك الجنوبيين ديل التمييز الايجابي ليهم يمدوا ليهم زمن الحفلات !!! تعرف دا الكلام البخلي ليلى أكول تكتب - فينا - جنس كلاما الفوق دا Quote: Denial - by definition - is simply refusing to acknowledge that an event has occurred. The person affected simply acts as if nothing has happened, behaving in ways that others may see as bizarre.z In its full form, it is totally subconscious, and sufferers may be as mystified by the behavior of people around them as those people are by the behavior of the sufferers. It may also have a significant conscious element, where the sufferer is simply 'turning a blind eye' to an uncomfortable situation.z Denial is a form of repression, where stressful thoughts are banned from memory. If I do not think about it, then I do not suffer the associated stress have to deal with it. However, people engaging in Denial can pay a high cost in terms of the psychic energy needed to maintain the denial state. z

---

Post: #10 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Mohamed Suleiman Date: 09-05-2010, 08:30 AM Parent: #7 شكرا للأخت تراجي لنقلها مقالة ممتازة للأخت ليلي أكول .. و شكرا للأخ حاتم علي علي مداخلته الثرّة .... كتب الأخ حمور زيادة: Quote: لذلك اعتقد ان ليلي أكول قبل أن تبدأ في اشعال النيران بحروفها تحتاج ان تعرف عن من تتكلم و من تعادي و من تخاطب. و نحتاج قبل أن نحتفي بهذه الكلمات ان ننظر في دقتها و عمومياتها. إن الظلم الذي وقع على الجنوب ليس مبررا عندي لقبول ظلم يقع من أي صوت جنوبي للشمال او الشرق او الغرب. لا يحق للمظلوم ما لا يحق لغيره. اعرف عدوك و عدونا .. ننصرك. ضعنا في خانة العدو .. إن لم نعاديك فاننا لن ننصرك و لن نحتفي بما تشعل من حروف نار. الأخت ليلي أكول قصدتكم كلكم يا مثقفي الشمال ... لأنها جربتكم كلكم لأكثر من نصف قرن و لذلك خرجت من تجربتها معكم بتلك القائمة التي هي مواصفات المثقف الشمالي في تعامله مع قضايا وطنه في نصف قرن ... الكرة في ملعب المثقف الشمالي الآن ... و هي قد أوضحت غرضها من تلك الأسئلة .. بأنها أسئلة لا تنتظر لها جوابا ... ليلي أكول تقول لكم بعد أن رأي الجميع الآن هستيريا كتابات و رغي المثقف الشمالي عن الجنوب و الإستفتاء الآن علي الأبواب .. ليلي تقول لكم: كنتو وييين؟؟! لقد خذل المثقفون الشماليون و الساسة و الحكومات .. خذلوا الجنوب لأكثر من نصف قرن .. لقد خدع الرعيل الأول الذي رفع علم إستقلال السودان ... خدعوا الجنوبيين ... ناس أزهري و المحجوب و السيدين و مبارك زروق و الشنقيطي .. و حكومة عبود أعدت عدة الحل النهائي ... حرق الجنوب .. ثم أتي أبو كلام بمائدته المستديرة ... و كان رغيا و ثرثرة عن الجنوب ... و أغتيل وليم دينق ... ثم الأحد الدامي بالخرطوم ... و ثم خدعة نميري بإتفاقية أديس أبابا .... و فيها تمت رشوة قادة الجنوب بوظائف وهمية ... لينفجر الوضع مرة أخري و دخول قرنق الغابة ... ثم مزايدات الميرغني و معاندة أبوكلام ... ثم الإنقاذ أتت لتدفع الامور الي ما نحن فيه ... هل تريد يا حمور أن تضيع ليلي أكول نصف قرن آخر لتتعرف علي من هو عدوها و من هو صديقها من مثقفي الشمال .. و هم (حتي أولئك الذين يدعون أنهم أنصار قضيتها) لم يقدم مثقف واحد أو سياسي واحد مستحقات أن يكون الجنوب مقتنعا بالوحدة ... حتي و لا مشروع إعتذار رسمي و شعبي للجنوبيين و ترجمة ذلك الإعتذار في شكل خطوات عملية للتكفير عما لحق بأهل الجنوب ؟!! أسئلة ليلي أكول لا تريد بها أن تعرف من هو عدوها أو من هو صديقها ... من مثقفي الشمال .... لقد فات الأوان علي ذلك .... هي لا تريد أن تنسي الماضي ... فماضيها هو تاريخها ... هي تريد أن تقول لكم وداعا ....

---

Post: #11 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: علاء الدين يوسف علي محمد Date: 09-05-2010, 08:45 AM Parent: #10 و جاءكم غراب الشُّؤم مصّاص الدِّماء آكل الميتة حمادة تش مولد زي دة لا يفوته فهو كما الذُباب حينما يجد جُرْحاً مفتوحاً و لماذا لم تسأل أكول عن يوم الإثنين الأسود حينما قُتِل قرنق بطباخة موسفيني و بعلم قيادات الحركة حينما حمّل الجنوبيين الشّماليين ذنب موت قرنق فقتلوهم و هم في بيوتهم آمنين دبّروا خُطّة المذبحة بليل و الشمالييون نيام هجموا على نساءهم في المنازل و اغتصبوهن حرقوا من فرّوا وتجمعوا في دكاكين و محال و تجارية و غُرف لينجوا بأنفسهم حرقوهم أحياء و هُم يتلذّون برائحة شواءهم بعضهم نشأ و تربّى مع أُسر شمالية و أوّل ما فعله أن ذبح من ربّاه و وفّر له السّكن فغرز فيه السِّكين و أعطاه المأوى فقابله بفعل بن آوى فقأوا أعين كثيرين .. نحروا كثيرين من الأذن للأذن فماذا قالت أكول عن ذلك!!!؟ ربكونا و مجازرها المُستمِّرة ضد تجار الشّمال "المندوكورو الجلابة" إنتهاك جنود الجيش الشّعبي لحرمات المسلمين من مساجد و خلاوى و تدنيس المصحف الشريف و تبوّلهم فيه بينما كنائسهم لم يُلْقى عليها ولا حتى حجر واحد في الشّمال أين كانت أكول من هذا!!؟ Quote: هي تريد أن تقول لكم وداعا .... قول ليها قشّة ما تعتِّر ليك

---

Post: #13 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: حمور زيادة Date: 09-05-2010, 08:59 AM Parent: #10 حبابك يا محمد سليمان .. زي ما قلت لحاتم انا ما عايز من ليلي أكول حاجة .. لا عايزا تنتظر لا عايزه تقرر تمشي .. هي صاحبة القرار .. لكن لو كان لي ان اتمنى لمتنيت انها تشوف نفسها مواطنة سودانية .. و ليست مواطنة جنوبية تنتظر من مثقفي الشمال ان يفعلو شيئاً. لو عايز تتكلم عن ظلم الحكومات ممكن ندخل في هذا الباب .. و هو يطول. لكن ممكن اديك فيو بس كلمة للقائد ياسر عرمان سمعتها باذني في ندوة من اسبوع هنا في القاهرة .. قال انهم حين زاروا ولاية نهر النيل التي منها اغلب اعضاء الحكومة وجدوا تهميشا و ظلما و فقرا .. ثم قال : يعن يا جماعة الناس المن الشمال ديل لمن يمارسو التهميش اول شي بيمارسوهو على أهلهم و مناطقم. ثم اخذ يبرر بعد ذلك ان الشمال المقصود ليس هو الشمال الجغرافي بل هي النخبة الحاكمة . و هو تخريج لطيف لكن يشكل عليه سؤال صغير : ما الداعي لاستعمال لفظ مباشر الدلالة للاشارة الى معنى بعيد يحتاج شرح و توضيح ؟ ليت ليلي أكول يا محمد سليمان نظرت لنفسها انها مواطنة سودانية في بلد فيه مشاكل في كل مناطقه .. جنوبه و غربه و شرقه و شماله و وسطه ايضا . ليتها احبت هذا الوطن كله و ارادت له واقعا افضل اذن لاعنتها انت و اعنتها انا و اعانها غيرنا كثر. لكن طالما هي تنظر لنفسها كمواطنة جنوبية فقط و تسأل ماذا فعل المثقف الشمالي للجنوب .. فانت مثلا اما انك تبع هذا الشمال او انت غير معني اساسا بكل القضية. فانت من الشمال باعتبار الوطن شمال و جنوب. او تخرج نفسك باعتبار انك غرب فلا انت تبع الظالمين و لا تبع المظلومين. شفت النظر لأنفسنها بجهوياتنا بيضيق علينا و على الاخرين كيف ؟ ليلي أكول عايزه تعرف ماذا قدم المثقف الشمالي للجنوب .. لكنها غير معنية هل قدم المثقف "السوداني" شئ لانسان الشرق .. البشاري الراكب جملو او البنعامراوي التحت جبلو .. ديل ما خصاها بيهم. عرفت انا المزعلني شنو ؟ لمن نقسم الوطن كيمان. ليلي تسأل عن نصب الجنوب و انت تسأل عن نصيب الغرب و انا اسأل عن نصيب الشمال الانا عارفو مهمش و عينو طالعه ..ياخ لمن الحكومة " الشمالية " جات تعمل تنمية في الشمال عملت سدود غرقتنا بيها و هجرتنا و ضربتنا بالرصاص .. عاين كدي لصورة بروفاي مدحت عثمان دي عشان تتذكر شكل التنمية في الشمال عامل كيف. مثقف الشمال الافتراضي ده الما قدر حمى مواطن كجبار الشمالي زيو و ما قدر ينصر المناصير الغرقوهم و هجروهم ليلى أكول عايزه تحاسبو على الجنوب فقط ليه ؟ عشان البيهمها. ما بيهمها الوطن كلو. عديلة عليها. اقول ليها شنو انا عاد ؟ وكت شايفه انو الانتماء للوطن بيحددوهو ليها اخرين مخيره .. لا أملك الا ان احزن. و لا املك الا ان استغرب من زول شايف انو المثقف الشمالي بيعتبر الجنوبيين ما بيقدرو يقررو لانفسم لكنو في نفس الوكت بيسأل المثقف يقول ليو عملت ليهم شنو. يا محمد يا اخوي .. البلد دي ما حقت زول .. البلد دي بلدنا كلنا.. لا حقت الازهري لا المحجوب لا السيدين لا البشير .

---

Post: #12 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: عبد اللطيف عبد الحفيظ حمد Date: 09-05-2010, 08:59 AM Parent: #1 مقال تفوح منه رائحة العنصرية والتعميم..... طالما الأمر كذلك أنا أيضاً عندي أسئلة ليست للإجابة!!!!! أليست الحركة الشعبية ممثل الجنوبين على طريقة كومي وكومك شريك في الحكم وفي ممارسة ما تسمونه جرائم؟؟؟؟ لماذا دائماً تصوروا أنفسكم مظلومين وأننا ظالمين؟؟ ما هي الجرائم التي ارتكبها مثقفو الشمال في حق الجنوب؟؟؟ لماذا يسترخص المواطن الجنوبي نفسه ليبيعها لحكومات الشمال الانتهازية ؟؟؟؟؟؟ ولماذا يرضوا أن يشاركوا

---

Post: #15 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: أحمد ابن عوف Date: 09-05-2010, 12:05 PM Parent: #12 سلام للعزيزة تراجي ليلى اكول انا منتظرها بهناك انا مع حمور في الحتة دي: Quote: و المؤتمر الوطني لا بيمثلني لا ختيت يدي في يدو .. لكن هناك من خت يدو في يد المؤتمر الوطني و قرر معاو مصير البلد. و عايز يطلع منها يلبسني انا السوداني المسكين ليها.. لا و الله اولا: احمد الله انني لم ولن اصنف نفسي تبع المثقف الشمالي سلام يا حمور ويقول ليك ختمي وانصاري وشيوعي وبعثي دي حركات تمثيلية ساكت من الجلابة ديل الناس ديل كلهم كيزان ومؤتمر وطني فتصبح شمالي = مؤتمر وطني

---

Post: #16 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Deng Date: 09-05-2010, 12:32 PM Parent: #15 الاخت تراجي. شكرا لنقلك هذا المقال الهام وشكرا لكاتبته الاخت العزيزة ليلي أكول. شايف بعض مثقفاتية الشمال جو جارين ليكتبوا بعض التبريرات ولكي يتنكرون لمسؤليتهم التاريخية. ردود الفعل والغضب على هذا المقال هي نفسها عقيمة ولا فائدة ترجى منها.

---

Post: #17 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Elawad Eltayeb Date: 09-05-2010, 01:18 PM Parent: #12 ليلى أكول والطيب مصطفى وجهان لعملة واحدة. احدهما جنوبي والثاني شمالى والاثنان يفتقدان لإحساس المواطنة. الفرق أن أحدهما الجلاد والثاني الضحية، وشراكتهما أمر حتمي لتغييب الآخر.

---

Post: #18 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: doma Date: 09-05-2010, 03:58 PM Parent: #17 نتمني للاستاذه lily Akol دوله مستقله عن شمال السودان ومستقبلا مشرقا

---

Post: #19 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Elawad Date: 09-05-2010, 06:28 PM Parent: #18 لا شك أن الشمال (مثقفوه و سياسيوه و عسكريوه بل حتى مواطنوه) يتحمل مسئولية كبيرة جدا عن ما آلت إليه أحوال السودان كله جنوبه و شماله. لكن هل هذا يعفي الآخرين من مسئولياتهم؟ هل يعفي أبناء الأقاليم المهمشة الذين نالوا ما ناله أبناء الشمال من تعليم ثم هجروا أهلهم؟ إليكم فقرات من مذكرات السياسي الجنوبي سيد ستانسلاوس عبد الله بايساما: Quote: بعد ذلك (أي بعد سقوط نظام عبود) عقد في الخرطوم مؤتمر دولي لمناقشة الوضع في الجنوب (1965). أثناء ذلك طلب مني آلاف الناس الإنضمام (إلى المؤتمر) لكن قادة سانو وجبهة (الجنوب) رفضوا. كنت أحاول ألا أدع السيد كلمنت أمبورو يكون حزباً جديداً. دعه يأخذ حزب الأحرار. وكنت أحاول إقناع سيد (وليام) دينق بأن الأفضل أن ينضم الإثنان لحزب واحد يكون أحدهما رئيسه والثاني سكرتيره وأن يستمر هذا الترتيب لمدة سنتين من أجل وحدة الجنوب. لكن اتضح لي أنهما غير قادرين على الوصول إلى تفاهم: كلمنت ووليام دائماً يقفان ضد بعضهما البعض. كنا على وشك أن نحصل على حكمنا الإقليمي بحضور هؤلاء الأجانب (في المؤتمر، كشهود). كان هناك حوالي خمس دول ولكن بسبب الخلافات لم يتحقق أي شئ. اقترح وليام أن يكون رئيس البلاد جنوبياً وطالب بترقية الجنوبيين وظيفياً وعودتهم لإدارة البلاد فعارضه كلمنت. بعد ذلك عينت اللجنة (المؤتمر) مفوضية من اثنى عشر رجلاً من الشماليين والجنوبيين. بعد سقوط عبود ضغط علي الكثيرون لأتولي قيادة حزب الأحرار لكنني رفضت حيث أنني ما كنت أرى أملاً في توحيد الجنوب وحتى لو أمكن توحيد الناس هناك فإنهم غير قادرين على توحيد أنفسهم في البرلمان. كان هناك المال.. أموال طائلة من الحكومة وحزب الأمة. وكلما جاءت إنتخابات يتم تخريبها بهذه الطريقة. وهكذا لم تستطع لجنة الإثنى عشر أن تعمل. كان عندي أصدقاء شماليون قالوا لي مع بداية المؤتمر:" لماذا لا تطلب من ناسك أن يتفقوا؟" حتى أزهري قال ذلك وعبد الله خليل قال إذا توحد للجنوبيون في حزب واتفقوا على شئ واحد فيمكن إعطاؤهم أي شئ يطلبون. السيد عبد الرحمن دعاني مرة لحفل شاي مثلت فيه جميع الأحزاب، حتى أزهري كان هناك. سألني السيد عبدالرحمن قائلاً: ستانسلاوس هل تريدون الإنفصال؟ قلت لا. نحن سودانيون وهذه البلاد التي نعيش فيها تمت إلي السودانيين. نحن لا نريد الإنفصال. قال: إذن ما هو مطلبكم؟ قلت مطلبنا أن نحصل على الحكم الذاتي المحلي لنتدبر إدارة البلد. قال السيد عبد الرحمن( .. أزهري هل تسمع؟ عبد الله خليل هل تسمع؟ لماذا إذن لا تفعلوا هذا؟. أرجوكم إذهبوا وناقشوا هذه الأشياء. اعطوهم ما يريدون. أنظروا هنا، لما جاءت الحكومة التركية هنا لم تستطع السيطرة على الجنوب. والدي، المهدي، لم يتمكن هو أيضاً من إخضاع الجنوب لحكمه وفعل ذلك البريطانيون بصعوبة شديدة. قد تسمعون بين الحين والآخر عن قتل مسئولين بريطانيين أو قتال ضد الحكومة أو ضد هذه القبيلة أو تلك، هل ترون؟ دعونا نجلس، اجلسوا جميعاً من فضلكم وناقشوا مشكلة الجنوب هذه حتى نجد لها الحل المرضي). حسناً! لقد انفضوا ولم يعقد أي إجتماع ثم جاء الشماليون ليقولوا لنا: نرجوكم إجعلوا كلمنت ووليام يتفقان، على الأقل داخل لجنة الإثنى عشر". لكنهما لم يتفقا أبداً. جلست كرئيس لإجتماعات للفريقين مرتين أو ثلاث مرات ولكن ما أن يتحدث شخصان أو ثلاثة حتى يقع الشجار ولا يكون أمامي إلا فض الإجتماع. وحينما يطلبان مني عقد إجتماع آخر أقول لهما: لا. إنكم لن تتوصلوا لإتفاق أبداً". ما كان كلمنت يستمع إلي أبداً، فبدل تشكيل حزب جديد (جبهة الجنوب) كان الأفضل العودة إلى حزب الأحرار. كان الناس يستمعون إليه كلهم لأن حزب الأحرار كانت له قاعدة متينة هنا في الجنوب. وكان الناس يلتفون حوله ونحن أنفسنا نقوم بدعاية قوية له. دارفور كانت تستمع إلينا وكذلك كردفان وعلى وجه الخصوص النوبة، كل السود. Quote: الوضع السياسي الراهن إنني أنظر إليه بتشاؤم كبير ولكن، مع ذلك، يراودني الأمل بأنه (قد يتحسن) بعد بعض الوقت. ما حدث في الجنوب يحتاج إصلاحه بالكامل زمناً. هناك أولاً مؤتمر أديس أبابا (1972) الذي رغم أنه كان ناجحاً إلا أن ممثلي الجنوب لم يبذلوا جهداً أكبر من أجل تحقيق المزيد، في الجانب الإقتصادي، على سبيل المثال. وعندما جاءوا إلى جوبا ظل السيد أبل ألير يعمل ما في وسعه لكنه كان متهاوناً ولم يقدر على التدخل لوقف الفساد. كان الوزراء فاسدين ففسد الآخرون في المواقع المختلفة. أخذ الناس يتصارعون على النفوذ وفي صراعهم ذاك دمروا كل شئ. وماداموا يجرون وراء مصالحهم الشخصية والقبلية فإن الجنوب لن يتقدم. الآن طال الإحتيال والفساد كل المرافق، حتى المدارس والمستشفيات، لأن من نصبوا مسئولين عنها ينزعون إلى تحقيق مصالحهم الذاتية. وهذا شئ جديد علينا وربما تتحسن الأمور بعد مدة تتراوح بين 15 و 20 سنة. الإنصاف يقتضي أن يتحمل كل مسئوليته.

---

Post: #20 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Tragie Mustafa Date: 09-05-2010, 06:47 PM Parent: #19 صدقت ليل اكول فيا حمور زياده لم تحركك الا كلمة المثقف الشمالي تنشر هنا يوميا عشرات الاحزان يكتب عن مذابح سودانيه للجنوبين وغيرهم وانتم متفرجين يشتم الجنوبين يقال لهم ستنزع جنسياتكم التي نلتمونها بالميلاد وانتم متفرجين!! تكتب ليل اكول نفسها عن المظالم التاريخيه فلا تتداخلون مناقشين او مفندين.... بس تكتب المثقف الشمالي تطلوا متدافعين!! يا للبؤس!! اهي كلمة السر اذن؟؟!! حتى متى و الاغلبيه ذاتين ونرجسين؟؟!! يا لبؤس دولة هؤلاء مثقفيها. لو تعرف يا حمور ماذا يفعل بعض مثقفي العالم احده اسمه اريك ريفز يقاتل السرطان منذ اكثر من 6 سنوات ويكتب يوميا من داخل قسم السرطان عن دارفور!! يوميا لما فوق ال 6 اعوام!! لك ان تتخيل من يعرف ان يختار طريق رفض الظلم الانساني. ماذا قدمت انت بمعدلات اريك ريفز للجنوب؟؟!! فكر في ارشيفك فقط هنا واترك الباقي!! كفايه صمتك عن امثال راشد عبد الرحيم والهندي عز الدين!! ليلي اكول لك التحيه الحقيقه موجعه!!

---

Post: #21 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: حمور زيادة Date: 09-05-2010, 07:06 PM Parent: #20 Quote: ماذا قدمت انت بمعدلات اريك ريفز للجنوب؟؟!! ماذاقدمت يا تراجي انا بمقياس اي شئ لوطني كله ؟ ماذا قدمت لأي بقعه فيه ؟وله وطني ما فيو مآسي الا في الجنوب ؟ ماذا قدمت لقريتي في صحراء الشمال ؟ Quote: كفايه صمتك عن امثال راشد عبد الرحيم والهندي عز الدين!! كتبو راشد و الهندي ؟ كلميني بدون ما تنقلي لي كلامم .. لأني ما قاعد اقرا ليهم و لا مستعد اضيع لحظة في تتبع كلامم. و كان قبل تتهميني بالسكات عن كلامم تسأليني قريتو اساسا وله لأ. لكن هسه ما فات شي .. ما قريت ليهم حاجة .. وريني قالو شنو. و وريني هل انتو القريتو رديتو عليهم وله لأ ؟ لو رديتو يبقى كتر خيركم تاني مفروض انا اعمل شنو ؟ وله هو كشف عرس ؟ لازم كلنا نشارك ؟ لو ما رديتو كلميني عشان اشوف هل في رد مفيد ممكن اقولو وله لأ. عشان ما اهتف ضدهم ساي او اشتمم ساي و يكون ما رديت على كلامم.

---

Post: #22 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Abdulgadir Dongos Date: 09-05-2010, 07:45 PM Parent: #21 + نتمني للاستاذه lily Akol دوله مستقله عن شمال السودان ومستقبلا مشرقا القول ما قالته الخالة دومة، الأخت للي لم تكتب مقالها ساعية للمحاورة أو نصب حفل شواء آدمي لمثقفي الشمال، والدليل أسئلتها الأستنطاقية التي أجابت عليها بنفسها مشكورة. يا صحاب للي لا تسعي لمحاورتكم فقد رفعت الأقلام وجفت الصحف، لقد مر نصف قرن زائدا خمسة أعوام بالتمام والكمال وهي أكثر من كافية للتحاوروالتثاقف وبناء دولة الوحدة والأنتماء. للي أأتها السانحة بعد أن رأت بأم أعينها نفاق أهل الشمال وخاصة متعلميهم في تحركاتهم في الزمن الضائع ليوحدوا بلد مثل السودان. للي تقول أضعتم الزمن في الفارغة وطق الحنك وغربة الأنتماء عندما تتضامنون بأسم الأنسانية مع مقاتيل العراق وفلسطين، وفي آن واحد تذبحوا ذوي القربي. للي تقول لكم وفروا جهودكم لما هو آت بدلا من الأستمرار في اهدار الوقت. للي لا تسعي لتجريمكم أنتم من تجرمون بحق أنفسكم. للي عبرت عما يجيش بخاطرها وكتبت لكم القليل عن ماضيكم التعيس، ليتكم أنتبهتم لواقعكم ومستقبلكم بدلا من النعيق بأسم وحدة لا تحسونها. مع الخالة دومة أتمني لأهل الجنوب الحرية والأمن والرخاء، ودون ك سيظلون أخوة وأخوات حتي وان صوتوا لأنفصال السودان. دنقس.

---

Post: #23 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Abdulgadir Dongos Date: 09-05-2010, 07:59 PM Parent: #12 + تراجي الجميلة، تحيات مباركات، شكرا لمانلوج الأخت للي، فقد عبرت بصدق عما يجيش بصدور أغلب أهل الجنوب. نتمني لهم التوفيق والسداد، وأعتقد أن دولتهم ستكون أنجح مما تبقي من سودان طالما المتشاطرين هؤلاء يسيطرون علي مقاليد الأمور. أنفصال الجنوب سيتبعة صداع سرطاني، ربنا يستر من الحرب الشاملة. دنقس.

---

Post: #24 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: شول اشوانق دينق Date: 09-05-2010, 10:41 PM Parent: #23 Quote: ماذا فعل المثقف الجنوبي للجنوب وماذا فعل لأهله في الجنوب ألم يزج بهم في حروبات متتالية وكلما يصل لإتفاق يستكين في الخرطوم في العمارات الفارهة ولا يقدم لهم مقومات الحياة الأساسية!!؟؟ Quote: لماذا فقط الشمالي هو المسؤول عن تربية الأبناء من الجنوب والتضحية من أجلهم ودفع فواتير سابقة منذ عهود الإستعمار الإنجليزي يا عاصم فقيري بالله لما الزول يكتب ما يجي يكتب أي كلام والسلام!!! ده شنو يا زول؟ هل تفتكر المثقف الجنوبي هو من زج بأهله في الجنوب في حروبات متتالية؟! بالجد كان الموضوع كده نكون نايمين علي حيلنا ساي وما عارفين التكتح! وشنو كلو يومين يجي زول يكتب حكاية العمارات الفارهة دي! هل في فهمكم العمارات دي حكر علي الشماليين؟! ثم من متين الشمالي هو المسئول عن تربية أبناء الجنوب وأي تربية تقصد؟ ومتي ضحي الشمالي من أجل أبناء الجنوب ودفع فواتير سابقة بالنيابة عنهم منذ عهود الإستعمار؟ عاصم!!! ماذا تعرف عن الجنوب؟! Quote: هذا إذا تناولنا الحديث بنفس مرآة (مرايا) كاتبة المقال ولكن إذا أردنا أن نتحدث عن سودان واحد قد يكون أو لا يكون فيجب التجرد قليلاً وعدم الإنحياز العرقي عند تناول القضايا الوطنية أما إذا كانت هذه العرقية والعنصرية لن تزوول وستبقى توقر الصدور فهذا أمر آخر !!! عرقية شنو يا عاصم ومنبركم هذا يحتفي بالكلام العنصري العرقي من الدرجة الأولي ويقام المشانق لمن يعترض علي هذا الكلام العنصري الواضح والصريح. عنصرية شنو البتتكلمو عنها وتنعتو بيها الكاتبة؟! العنصرية هنا في هذا المنبر وفي السودان بصورة عامة تمشي علي رجلين وبقت عندها عضلات تبش والناكر خليهو ينوم نومه. ----- حديث حمور لابد من تعقيب عليه لذا سأعود حتماً. شكراً الأخت للي اكول علي المقال شكراً العزيزة تراجي علي جلب المقال.

---

Post: #25 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: doma Date: 09-06-2010, 00:39 AM Parent: #24 والله انا مستغربه للنفير البعملو فيه الشماليين دا لصالح الوحده يا اخي حرام عليكم توحدوهم معنا عشان شنو؟؟؟ وعشان نحن عمارنا شنو؟؟ دعوهم يشقون طريقهم لبناء دوله علمانيه تحقق احلامهم من تقدم ورفاهيه . امنعوا شروركم عنهم هذا هو المطلوب منكم وبس.

---

Post: #26 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: شول اشوانق دينق Date: 09-06-2010, 04:12 AM Parent: #25 Quote: والله انا مستغربه للنفير البعملو فيه الشماليين دا لصالح الوحده يا ريت لو كان نفير لصالح الوحدة ... ده محاولة إصلاح خطأ بطريقة خاطئة في الساعة خمسة وعشرين. ده محاولات جلب الوحدة بطريقة خاطئة بدون ادني محاولة لمعاجلة أسباب المطالبة بالإنفصال وده قمة الإشكال. رمضان كريم.

---

Post: #27 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: doma Date: 09-06-2010, 04:52 AM Parent: #26 Quote: ده محاولات جلب الوحدة بطريقة خاطئة بدون ادني محاولة لمعاجلة أسباب المطالبة بالإنفصال وده قمة الإشكال. رمضان كريم. يا شول يا ولدي عمرهم ما ح يستطيعوا معالجه المشكل الاساسي ولن يستطع اي منهم المطالبه بفصل الدين الاسلامي عن اداره الحكم في السودان بمختلف مسمياتهم احزاب دينيه اسلاميه بما فيهم الحزب الشيوعي الاسلامي السوداني . ما في اي سبب لاي مواطن جنوبي غير مسلم يصوت للوحده للبقاء في دوله شمال السودان الاسلاميه . اتمني ان يتحقق الانفصال لاقامه دوله علمانيه ترضي تطلعات وآمال الاخوه بجنوب السودان . و اي مقترحات للوحده بغير تطبيق الدوله العلمانيه بتكون ضياع زمن .

---

Post: #28 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: حمور زيادة Date: 09-06-2010, 06:32 AM Parent: #27 يا شول .. ازيك يا طويل انت ياخ .. عاين .. عشان لمن تجي انا غالبا حاكون مافي .. فبراحة على اخوك .. سمح ؟ عموما انا معاك في تحسرك على المطنطين بالوحدة حسب ما سمعت من طنطنة. و بفتكر انها كلها مهما بلغت جديتا فهي في الزمن الضايع للاسف. و انا زاتي المع الوحدة كان سألتني حاديك اسباب عاطفية حقت السودان و نضيع بلد نقسما اتنين و ليه ياخي و دي ياتو قوة قلب التخلينا نعمل كده .. لو ما قادرين نعمل ليها حاجة كويسه نسلما للبعدنا يعملو منها لكن ما نقرر مصير اجيال و اجيال .. ناهيك عن حتة انو ياخ ما المؤتمر الوطني العندو حق يقرر مصير البلد دي و نحن نفرح .. يعني حق تقير المصير ده لو كان في حكم ديموقراطي بعد محاولة جادة من كل اطراف البلد دي بدل المحاولات النص كم بتاعة أهي ماشه الكانت البلد ماشه بيها زمان كان يمكن بطني تبرد فيو شوية و اقول حاولنا بجدية و ما قدرنا. لكن لمن يحصل شي زي ده تحت حكم المؤتمر الوطني و بدون محاولات جادة لرفع البلد بعد البلاوي الحصلت البتقول يا تتعدلو يا تخرب و ما لقنا فرصة نعمل شي من فرجيخة الكيزان فوقنا و نظرم لمصالحم على حساب الوطن .. بيخليني متجرس بدل المره مليون. ياخ عمر البشير ما هو الزول المن حقو بأي شكل من الاشكال يخاطب كيان بيمثل جزو من الوطن باسم باقي الوطن. البشير لا بيمثل الشمال لا الشرق وأكيد ما الغرب. فبياتو منطق افرح انو هو جعل الانفصال ممكن ؟ و انا عارف و انت عارف و ماما دوما عارفة و البشير زاتو عارف انو الكيزان هسه حريصين على الوحدة ما عشان البلد لكن عشان البترول يكب في جيوبم. لا همهم مظالم تاريخية لا تاريخ يحكم عليهم. همهم الاستمرار في السلطة. لمن أعلنوا الجهاد اعلنوهو عشان يلقو مبرر للحكم .. و لمن وقعوا نيفاشا وقعوها عشان يلقو مبرر للحكم .. و هسه كان بقى يا البترول يا الحكم بيفصلو الجنوب في تلت ساعة و يحلبو الخلا الباقي ده .. و الله الموية يبيعوها بالجغمة و يصدروا الرمله لدول اسكندنافيا. بلاوي البلد عارفا .. و مغسة الجنوبيين عارفا .. و حرقة الغرب شايفا .. لكن البيزعلني انو القى جنوبي بيعاين للبلد الموحدة كتجربة دولة مشتركة مع اخر .. زول غيري مافي شي رابطني معاهو لو ما حكمني سمح بمشي اخليهو. ليه ياخ ؟ البلد دي من نمولي لحلفا البيغنو ليها دي ما حقت حمور يا شول .. لأنو لو بالحقوق انا شن وداني نيمولي ؟ البلد دي حقت شول و حمور. كون انو حمور كريه و كعب ده ما سبب في رايي يخلي شول يقول البلد ما حقتي اقسمو لي النمشي. ياخ زنوج أمريكا الساقوهم عبيد مخطوفين غيرو ليهم دينم و عذبوهم لامن طلعو ليهم الدين الجديد الجبروهم عليو ده العاقلين فيهم ابو يمشو ليبريا و قعدو ناضلو و صممو لحدي ما بقى ليهم في امريكا شلية. و كل يوم حقوقم بتزيد. لسه ما بقو مواطنين كاملي الدسم .. لكن ماشين في السكة يا قول الشيوعيين. لكن القالوا ما دايرين ادونا قروشنا و رحلوهم ليبيريا عاين ليه .. ياهم في سجم افريقيا و رمادا .. انقلابات و فساد و بشتنه و ما لاقين واطا يرقدو فيها زتو. ده المزعلني يا شول. اني اشوف سوداني حرد و داير ينزل .. و لمن داير ينزل كمان ما حينزل براو .. حيقرر معاو مصير بلد .. عرمان قال انو الجنوبيين ما لأول مره يواجهو خيار مصيري .. لكن لأول مره يكون قرارم حيأثر على بل كاملة بدل يأثر عليهم. يعني لمن اتفقوا مع نميري كان قرار مصيري .. و لمن بعض منهم اقنع نميري ينط كان قرار مصيري .. لكن القرارين كانو في راسم اكتر مما في راس كل البلد .. الموت و القتل في ارضهم للاسف .. فهم الاتكووا .. لكن هسه .. شرمة البلد دي في راسنا كلنا. هل بكاي ده انانية ؟ لأ .. لأنو الحرب بتقيف و الخساير بتنجبر بشكل او اخر .. ده ما صاح .. لكنو البيحصل. لكن البلد البتتشرم ما بتتلتق تاني. يا الله ياخ بس عليك دينك فكر انو لو انت مثلا ماشي تصوت لوحدة او انفصال انو قرارك ده حيشمل كم مليون طفل سوداني جنوبي شمالي غرباوي من الشرق حلبي عربي ابن ###### .. اي جنس . ديل كلهم معلق مستقبلم في ورقة اقتراعك. في ذمتك ما بتخاف ؟ بركة الكلام المتعصب الطيب مصطفى ما قبلوهو لمن قال يستفتو الشمال في الوحدة عشان يقول هو الما داير. ياخ بياتو قلب اقرر مستقبل اجيال بوحدة ترمدم او انفصال يسجمم ؟ انا بتكلم عن روحي .. عن حمور .. بشكي ليك و بفتح ليك قلبي. انا ممك اسلم البلد سجمانة للاجيال الجاية زي ما استلمتها و اقول ليهم فشلت تب حاولو اعملو حاجة. لكن ما بقدر اديها ليهم نص و اقول ليهم و الله انا ادوني ليها كبيرة قصقصتها و ده الفضل هاكم اتصرفو فوقو. انا ما عندي القلب ده .. عشان كده عمري ما حاكون زعيم جماهيري او قائد أممي .. عشان بخاف اقرر مصير أجيال. بالنسبة لليلي أنا ماني ناكر كلاما .. انا ناكر انها شايفة الشمال كل واحد متجانس. ياخ مثقفي الشمال ديل فيهم ناس تبع جناح الشمال. ما شمال وله ما مثقفين ؟ ديل ياهم اللو كان مدو راسم يوم موت قرنق كان قطعو ليهم بغض النظر عن الافكار الفيو. يوم احداث الاتنين انا في الشارع .. واجعني موت قرنق .. لكني جاري لأنو لو لمو فيني الساطور ما بيميز .. الساطور داير جنا عرب ده الكتل دكتور جون. ده عيب خطاب ليلي البيعمم. البيخليني عندها عدو و انا ما عدو. البيخلي ليلي تعاين للحاج وراق و كمال الجزولي وعلي محمود حسنين و الطيب مصطفى انهم كلهم حاجة واحدة. حسن فور اوول بيقول شنو ؟ يا ديجانقو افرز ؟ ياهو زاتو. اعرف عدوك لأنو عدوي. ما عشان شمال و جنوب .. عشان البلد كلها. انا و انت سوا .. ياخي .. ياخي .. ياخي الله يرضى عليك انا كنت ديت اتعالج من وجع السودان ما ترجعني ليو. اقسموهو .. شرطوهو .. فرزوهو بالمتر .. دقو فوقو جرس .. حقي عافيهو ليكم. بس اريت الجايين يعفو للكيزان وللمشو وراهم و اعتبرو انو الكيزان ادوهم حقهم المهضوم. حق الجنوب ما استفتاء .. حق الجنوب تنمية و مواطنة. لكن نيفاشا و الشريكين ما كانوا حريصين. شفت هرشوهم كيف لمن قالو ليهم لو ياسر عرمان ما انسحب يبقى مافي استفتاء. سحبوهو زي الكأنو أي كرت خمسين. كف. طار برهالتربيزة. ياخ وكت عايز وحدة و بلد عندك فيها حق ليه تهرشبالاستفتاء ؟ ما هدي الانتخابات النزتها و قلت الصندوق كانت فرصة وحدة و تغيير. طلعوا الكيزان ملاعين ؟ ما من يومم الجد شنو ؟ لكن انت عايز الاستفتاء ما عايز الوحدة و بلد عندك فيها زي ما عند الجعلي و الشايقي و الرباطابي المسيخ. انت ما انت يا شول. ما تتحسس. انت ده واحد تاني قاطعو من راسي في مغسة صباح الله الما معروف لونو ده. انا ماشي ياخ . تعال رد. بس عليك الله قول لليلي ما تعاين للشمال كوم واحد ياخ. و قول ليها حمور زيادة و زيو ملايين كان ما مثقفين لكن شماليين و الاعلنو عليكم الجهاد ديل ما بيعبرو عننا. انا و انت مظاليم .. مظاليم الهوى. لكن هي شايفه الجعلي يرقص في التلفزيو قايلا ياهو ده الجابتو بطن بنات جعل. قول ليها الله لا ضوقك حرورة اليبقى ظالمك ود بطنا جابتك. و قول ليها كان في الشارع قالو ليك يا عب ما معناها تحرد بلدك و تقول افصلو لي نصي. و كان الجعلي فرحان انو عربي خلي الدينكاوي يفرح انو دينكاوي. المافي شنو يا قول قيقا. و كان برضو دايره نصيبا و تنزل انا ما بيدي احميها. لكن ما بيدها تحميني أبكي وراها .. لا بتعرفني لا بعرفا. لكنها سودانية ... ماشه و شايله معاها تلت البلد. أكان ما جعتني هي .. بتوجعني البلد البقت بلدين. و وحات الله هي واجعاني زاتا. مع السلامة ياخ

---

Post: #29 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: doma Date: 09-06-2010, 06:56 AM Parent: #28 Quote: كون انو حمور كريه و كعب ده ما سبب في رايي يخلي شول يقول البلد ما حقتي اقسمو لي النمشي. ياخ زنوج أمريكا الساقوهم عبيد مخطوفين غيرو ليهم دينم و عذبوهم لامن طلعو ليهم الدين الجديد الجبروهم عليو ده العاقلين فيهم ابو يمشو ليبريا و قعدو ناضلو و صممو لحدي ما بقى ليهم في امريكا شلية. و كل يوم حقوقم بتزيد. لسه ما بقو مواطنين كاملي الدسم .. لكن ماشين في السكة يا قول الشيوعيين. لكن القالوا ما دايرين ادونا قروشنا و رحلوهم ليبيريا عاين ليه .. ياهم في سجم افريقيا و رمادا .. انقلابات و فساد و بشتنه و ما لاقين واطا يرقدو فيها زتو. ده المزعلني يا شول. دقيقه يا حمور يا اخي من غير اطناب في الحديث الجنوبي اليوم له خيار انه يمش ويقيم دولته حسب تصوره هو شنو البجبرو عشان يكابد تاني ويناضل ويعاني عشان ينال بعض الحقوق في دولتنا الاسلاميه ؟؟!! ما هم قالوا لينا مطلبهم واعلنها باقان اموم اكثر من مره واي مسلم شمالي لو قيل له لا للشريعه الاسلاميه بقيف الف احمر ويقول لا حكم الا بكتاب الله . يا اخي دعهم يتخارجوا والشمال مبروك علينا وشريعنتا مبروكه علينا. بعدين بالجد فشلت فهم مقاربتك بين ليبريا ومصير دوله جنوب السودان وامريكا وشمال السودان .اتمني ان تكون تجربه جنوب السودان تجربه ناجحه لانه والله كفاهم من the quagmire of north Sudan politics

---

Post: #30 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Asim Fageary Date: 09-06-2010, 08:25 AM Parent: #24 Quote: عاصم فقيري بالله لما الزول يكتب ما يجي يكتب أي كلام والسلام!!! يا شول اشوانق دينق الكلام الفارغ هو البتكتبه كاتبة المقال التي تحمل المثقفين الشماليين المسؤولية وتنعتهم بما نعتتهم به وبالجملة والكلام الفارغ هو الدفاع من منطلق عاطفي بمعنى أن كل ما يكتبه فلان صحيح لأنه صديقي أو صديق صديقي وكل ما يكتبه فلان خطأ لأنه ليس في حزبي أو تنظيمي أو لأن هناك جزئية في حديثه تنتقد موقف من مواقفي أو مواقف أصدقائي إن الشلليات في الكتابة والحوار هي مثلها مثل الإنتماء الطائفي الذي يتبع دون تفكير وإنما لمحبة وصداقة وعواطف شخصية وهكذا هذا ليس أي كلام والسلام هذه وجهة نظر وكلام أنا مقتنع به زي ما إنت مقتنع بإنتقادات الكاتبة للمثقف الشمالي والبخلي كلامي هذا كلام أي كلام والسلام بخلي كلامك لا طعم له ولا رائحة هذا رأيي وأنا مقتنع به رضيت أم ابيت Quote: عاصم!!! ماذا تعرف عن الجنوب؟! ما أعرفه عن الجنوب كثير وما أعرفه عن الجنوبين أكثر وهذه أيضاً تريد أن ترمي كلاماً على عواهنه فيها دون أن تعرف أني أعرف أم لا وكمان بعلامات تعجب، أنا أعرف عن الجنوب الكثير وليس عن الجنوب فحسب بل كل السودان من جنوبه إلى شماله ومن شرقه إلى غربه ولعلمك فقط أنا لست من أولئك الذين كانوا معلبين في حي من أحياء السودان مع تحياتي وإحترامي لرأيك عاصم فقيري

---

Post: #31 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: شول اشوانق دينق Date: 09-06-2010, 10:20 AM Parent: #30 Quote: Quote: عاصم فقيري بالله لما الزول يكتب ما يجي يكتب أي كلام والسلام!!! يا شول اشوانق دينق الكلام الفارغ هو البتكتبه كاتبة المقال التي تحمل المثقفين الشماليين المسؤولية وتنعتهم بما نعتتهم به وبالجملة والكلام الفارغ هو الدفاع من منطلق عاطفي بمعنى أن كل ما يكتبه فلان صحيح لأنه صديقي أو صديق صديقي وكل ما يكتبه فلان خطأ لأنه ليس في حزبي أو تنظيمي أو لأن هناك جزئية في حديثه تنتقد موقف من مواقفي أو مواقف أصدقائي إن الشلليات في الكتابة والحوار هي مثلها مثل الإنتماء الطائفي الذي يتبع دون تفكير وإنما لمحبة وصداقة وعواطف شخصية وهكذا هذا ليس أي كلام والسلام هذه وجهة نظر وكلام أنا مقتنع به زي ما إنت مقتنع بإنتقادات الكاتبة للمثقف الشمالي والبخلي كلامي هذا كلام أي كلام والسلام بخلي كلامك لا طعم له ولا رائحة هذا رأيي وأنا مقتنع به رضيت أم ابيت لما أقول ليك بتكتب اي كلام والسلام بكون صادق لما شكل ردك يكون بالطريقة القدامي ده. طائفية شنو وشلة منو وأصدقاء ياتم؟؟!! إنت يا عاصم بتتكلم كيف يا زول!!! رأيك البتقول عليهو إنو المثقف الجنوبي دخل أهلو حروبات متتالية ده رأي للأسف خارم بارم ... المثقف الجنوبي ده جا شال سلاحو في أم مرحي ولا في المدينة عرب؟؟!!! المثقف الجنوبي ده جيتوهو بالدانات وبالانتنوف ورجمتوهو رجم السنين وداير ما يحاربك؟ لا ... كان لازم يحاربك والحرب ده أجبر عليه لانو مطالبو العادلة والموضوعية البيطالب بيهو المثقف الجنوبي بتترفض من قبل الحكومات المتعاقبة من قبل الإستقلال وحتي نيفاشا 2005م ... وللأسف جاي بكل بساطة تقول لي رأي ومقتنع بيهو؟! لما تجي تتكلم لي عن العمارات الفارهة وما أدراك ... ده يسموهو شنو؟ ده عندي إسنو أي كلام والسلام لانو القريشات ما حكر علي الشمال والشماليين كما تعلم. لو لاحظت لسع ما أديت رأي في كتابة للي أكول بس شكرتها علي المقال كمجهود. ممكن توريني شلتي ناس منو ومنو علي الاقل أعرفهم! Quote: Quote: عاصم!!! ماذا تعرف عن الجنوب؟! ما أعرفه عن الجنوب كثير وما أعرفه عن الجنوبين أكثر وهذه أيضاً تريد أن ترمي كلاماً على عواهنه فيها دون أن تعرف أني أعرف أم لا وكمان بعلامات تعجب، أنا أعرف عن الجنوب الكثير وليس عن الجنوب فحسب بل كل السودان من جنوبه إلى شماله ومن شرقه إلى غربه ولعلمك فقط أنا لست من أولئك الذين كانوا معلبين في حي من أحياء السودان لما سالتك قلت ليك ماذا تعرف عن الجنوب ولم أقل أنت لا تعرف شئ عن الجنوب واظن في فرق كبير وواضح. بس برأيك المبسوط هنا بخصوص المسائل الشائكة يتضح عدم معرفتك للجنوب وإنسانها للأسف الأكيد. Quote: مع تحياتي وإحترامي لرأيك عاصم فقيري الإحترام متوفر وبكميات وكل سنة وإنت طيب. علي فكرة ما رديت لسع علي كلامك الفوق ده قلت بس الحق السوق لغاية ارجع البيت ونبدأ الرد الجد جد. لي قدام ---------------- حمور وحياة الله الكلام البكتبو كتر كتر ده يا عمك ما بيتخارج مع أخوك ... إنت ما تصبر نرد ليك الأول مالك لاحقو بالتاني؟! أمورك كيف ياخ؟

---

Post: #32 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: ايمن التاج Date: 09-06-2010, 11:03 AM Parent: #30 شكرا يا تراجي في البدء لايراد المقال وشكرا لكاتبته فما قالت الا رايها وما تعتقده .. ولي تعليق بسيط .. اصبحت الحساسيه في سياقات الوحده والانفصال مفرطه من كل الاطراف ، لا تغير في ماض ولا تعالج حاضر ولا ترسم لمستقبل آت .. السياسي منفصل تماما هنا عن الثقافي !! ارادت كاتبة المقال حسم قضية المثقفين (الشماليين) في خط سياسي بعيد عن المواقف الحقيقيه للمثقفين وانهالت الاراء التاليه تعقب على المقال من نفس المنظور الخاطي وهو انه لا يمكن عقد محاكمه وان كانت فكريه خارج حدودها التاريخيه ومصوغاته الموضوعيه فكلا الطرفين مجحف تمام الاجحاف في تناول الموضوع رغم اهميته وموضوعيته واثره : فكاتبة المقال لم تلف نفسها عناء الرصد والتدقيق حتى في تطوير خلفيه موضوعيه للراي الذي تبنته وسطرته بشكله اعلاه .. وحمور واخرين ارادوا التوضيح والتصدي لموضوع يحمل حساسيه بحساسيه اكبر فتحول الموضوع الى تناقض .. بين الموضوع والحوار المبذول حوله . ما تعابت عنه كاتبة المقال ان حركة المثقفين السودانيين لم تشهد من قبل هكذا تصنيف وتقسيم ، فحتى المثقفين الجنوبيين لم يقفوا موقفا عدائيا او رافضا للمثقف الشمالي من قبل ولكن تطورت الحركه الثقافيه السودانيه وهي مدركه بل قبل السياسي بخطورة الوضع في الجنوب والماساه وعبرت عن ذلك في انشطتها الثقافيه ، واحتفى الطرفان بانتصارات كبيره معا بوعي مبكر لما آل اليه الوضع الآن . اكبر خطا في هذا الحوار هو تناولنا للمثقف في ظل السياسي دون تفريق ، رغم ان ما عاناه المثقفين الشماليين والجنوبيين سواء خلال فترات الحكم الديكتاتوريه والعسكريه عقب الاستقلال لم يمنح المثقف حتى الفرصه في اتخاذ اي موقف يمكن محاكمته عليه في ضوء ما يدور الآن من تداعيات لازمة الجنوب . سينجح تحويل مجرى الحوار هنا الى شيء مفيد اذا نجح الطرفان في تبني وجهات مبنيه على امثله للسياقات المطروحه واعتقد انها ستفيد القاريء بعيدا عن تلك العاطفيه والحساسيه التي نتناول بها هذه الموضوعات هذه الايام . ـــــــــــــــــــــ ايمن تابر

---

Post: #33 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: doma Date: 09-06-2010, 11:41 AM Parent: #30 Quote: لماذا فقط الشمالي هو المسؤول عن تربية الأبناء من الجنوب والتضحية من أجلهم ودفع فواتير سابقة منذ عهود الإستعمار الإنجليزي دا كلام غريب وعجيب خالص ارجو من كاتبه المحترم عاصم فقيري ان يشرح لنا ما يقصده بتربيه ابناء الجنوب والتضحيه من اجلهم ودفع الفواتير السابقه منذ عهود الاستعمار دي

---

Post: #34 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: شول اشوانق دينق Date: 09-06-2010, 01:49 PM Parent: #33

---

Post: #35 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Deng Date: 09-06-2010, 02:41 PM Parent: #34 Quote: سلام لكاتبة المقال وسلام لتراجي وسلام الأخوة الأفاضل وسلام للأخ حمور وسؤالي أنا ايضاً: ماذا فعل المثقف الجنوبي للجنوب وماذا فعل لأهله في الجنوب ألم يزج بهم في حروبات متتالية وكلما يصل لإتفاق يستكين في الخرطوم في العمارات الفارهة ولا يقدم لهم مقومات الحياة الأساسية!!؟؟ لماذا فقط الشمالي هو المسؤول عن تربية الأبناء من الجنوب والتضحية من أجلهم ودفع فواتير سابقة منذ عهود الإستعمار الإنجليزي هذا إذا تناولنا الحديث بنفس مرآة (مرايا) كاتبة المقال ولكن إذا أردنا أن نتحدث عن سودان واحد قد يكون أو لا يكون فيجب التجرد قليلاً وعدم الإنحياز العرقي عند تناول القضايا الوطنية أما إذا كانت هذه العرقية والعنصرية لن تزوول وستبقى توقر الصدور فهذا أمر آخر !!! مع التحية والإحترام عاصم فقيري مثال حي للمثقف الشمالي الذي تحدثت عنه الاستاذة ليلي أكول.

---

Post: #36 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Tragie Mustafa Date: 09-07-2010, 00:41 AM Parent: #35 شكرا لكل المرور وليبقى عاليا لحين عوده.

---

Post: #37 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Tragie Mustafa Date: 09-08-2010, 02:24 AM Parent: #36 .

---

Post: #38 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: شول اشوانق دينق Date: 09-09-2010, 12:26 PM Parent: #37 كل سنة وكلكم طيبين.

---

Post: #39 Title: Re: lily.akol تكتب مره آخري باحرف من نار(المثقف الشمالي: اسئلة ليس للاجابه)! Author: Tragie Mustafa Date: 09-10-2010, 04:43 AM Parent: #38 وفوق كمان لاجل ليلي اكول.