Post: #1
Title: رحلة مع المـــــــــوج الصباحية
Author: ابراهيم احمد سليمان
Date: 09-04-2010, 10:53 AM
مع الموج الصباحية هى مقطع من اغنية جملية لأستاذنا الرائع وردى أستشفها اليوم لوصف حال رحلتى منذ صبيحة اليوم من مدينة الصحفيين بالوادى الأخضر وحتى تقاطع الشرقى بالطائف .
أأى ماشى حلة كوكو رداً على سائق الهايس
هو : كيف عاملين مع المطر
أنا : والله الحمدلله بس الطين شديد والشوارع مافيها تصريف مع إنو الحى جديد المفروض .... صمت ثم حوار داخلى يا إبراهيم خلى الدنيا تصح وبلاش نقة من الصباح
هو : والله أنا بالتلتلة وصلت الظلت لو كنت عارف كدا كان بيت العربية فى الظلت
أنا : لا تعليق طبعاً دايرة تصبح
ظهر أخر مؤشراً بيديه مبتل الجلباب توقت العربة ثم ركب
أخر : السلام عليكم
هو وأنا : عليكم السلام
الأخر: والله أنا جاى من مربع 15 والله جيت ماشى فى السيل لحدى نصى فى السيل .
أنا : والله المفروض يعملو ليكم كبرى ديل إنتو أولاد الشهداء وأولياؤهم
الاخر : يا خى إتكلمن لحدى ما زهجنا ولا عليهم والله البلد دى ذاتها اللهم إنى صايم ... يهمهم
وعندما وصلنا شارع الحاج يوسف الردميه سأل السائق
هو : يا اخوانا وين الظلت والله البلد دى ماعرفنا فيها حاجة الظلت بحالو مافى دا أظنو خور هههههه
أنا : سراً شر البلية مايضحك
أخر : نازل لو سمحت يا سواق
هو : ينزلوك ووين ؟ فى الموية دى ؟
أخر : يا خى شوف ليك حتة شوية تكون .....
هو : بالله شارع وا حد (شارع بالحاج يوسف ) اخير منو شارع الردمية ما كان فى داع الواحد يطلع من البيت بس المعايش جبارة
أخر : إنتو يا أخوانا باصات الوالى الجديدة دى ليه ما جات الوادى الأخضر
أخر : والله سمعنا قالوا صدقوها بس ماعارفين تانى الحاصل ايه شكلوا الناس ديل بيخدرو فينا ساكت
|
Post: #2
Title: Re: رحلة مع المـــــــــوج الصباحية
Author: ابراهيم احمد سليمان
Date: 09-04-2010, 11:19 AM
Parent: #1
وصلنا حلة كوكو نفس المطر ونفس الموية والطين
بعد تلتلة الواحد لقى ليهو حافلة ماشه العربى (الخرطوم)
وعنما ركبت مواصلات الكبرى بشارع عبيد ختم متجها الى تقاطع الشرقى بالطائف
والله الجزء الأيمن من الظلت غرقااااااااان عديييل .
عمك كبير : ويين المهندسيين النفذو الشغل ديل مايجو يغرفو الموية دى فى ظلت بيعملوه كدا ؟ والإستلم منهم الشغل دا منو والله دا لعب . وعاين كمان تلاتة عربات شفط للموية من الظلت والله دا ماسمعنا بيهو
شاب : يا عمنا المجرى الرئيسى ماهو دا .
عمنا : ماكبو الزفت دا ومشو مافى زول فتح منهول ولا مجرى ولا غيرو قال مهندسين دى الجامعات الزى الهم دى أهو دى النتائج . والله البلد أمسكها يومين أخليها سكة حديد
بعض الركاب : هههههههه
عمنا : والله العظيم جد هو الاعوج دا داير مستشارين ووالى وقومة وقعدة المحل الداير شغل ما واضح والزول الشغلو كعب واضح والله شغل زى دا الا ........ أأأأأخ
|
Post: #3
Title: Re: رحلة مع المـــــــــوج الصباحية
Author: عبد الواحد أبراهيم
Date: 09-04-2010, 02:01 PM
Parent: #2
| Quote: عمنا : والله العظيم جد هو الاعوج دا داير مستشارين ووالى وقومة وقعدة المحل الداير شغل ما واضح والزول الشغلو كعب واضح والله شغل زى دا الا ........ أأأأأخ |
كلام عمك دى هو الكلام الصاح.
المهم الناس باحتصار حرامية كبار يبلغوا اى شى حتى ناقة صالح نفسها
ارقد عافية
|
Post: #4
Title: Re: رحلة مع المـــــــــوج الصباحية
Author: ابراهيم احمد سليمان
Date: 09-04-2010, 03:28 PM
Parent: #3
شكرا الاستاذ/ عبد الواحد
ومعا من أجل نهضة المدن ومحاسبة المقصرين والمتهاونيين بأرواح وممتلكات
الغلابة
|
Post: #5
Title: Re: رحلة مع المـــــــــوج الصباحية
Author: ابراهيم احمد سليمان
Date: 09-05-2010, 09:01 AM
Parent: #4
رجعت البيت فى المساء ونحن فى برش الفطور عزفت البعوضة عزفها المزعج المزدوج
يعنى لو ناس مكافحةالبعوض ما حصلوها فى أيام الدفء دى حاتعمليها فرقة موسيقية
|
Post: #6
Title: Re: رحلة مع المـــــــــوج الصباحية
Author: ابراهيم احمد سليمان
Date: 09-06-2010, 11:40 AM
Parent: #5
up
|
|