الجماعة يغنوا (عشميق الاصم) وماتكلمونى ...

البجيبا منو ...

خليل جيبا وبطل الحسادة ...اخد ليك (تبة) (تبتين) ..السمح سمح ...

حاضرين با محمد


ابشر بالخير

/v/0w4zHIOn5UM?fs=1&hl=en_US">[/IMG]

شكرا ياخليل ..


اداء جيد ..لكن يظل بادى محمد الطيب اكثر من اجاد فى ادائها ..على العموم
اغنية الحماسة عند بادى لها طعمها الخاص ..(الواعى مابوصو) و(بتجيد اللطام)
(ودابى البركة) و(عشميق الاصم) تعبتر من ملاحم اغانى الفراسة التى رفد بها
بادى التراث السودانى ...له الرحمه والمغفره وجعل الله قبره روضه من رياض الجنة ..

ياريت كمان نسمعها بصوت بادى

خلينا نغتطس جووة المدينة ونشوفا بصوت بادي

منتظرنك تجيبا بصوت (حاج طه) ..ولو جا عبدالمنعم عمر حائم بهنا بتكون
مشكلتنا اتحلت ..

Quote: اداء جيد ..لكن يظل بادى محمد الطيب اكثر من اجاد فى ادائها ..على العموم اغنية الحماسة عند بادى لها طعمها الخاص ..(الواعى مابوصو) و(بتجيد اللطام) (ودابى البركة) و(عشميق الاصم) تعبتر من ملاحم اغانى الفراسة التى رفد بها بادى التراث السودانى ...له الرحمه والمغفره وجعل الله قبره روضه من رياض الجنة .. ياريت كمان نسمعها بصوت بادى

والله يا محمد عبد الرحمن
يوم اتغنت ده نار جهنم انطلقت فيني القعده ذاتو غلبتني
قسماً بالله العيون اتملت تب ودرجة السخانة ارتفعت استغفر
الله العظيم ... ده كلام برا ياخ ...

وبادي وخلف الله حمد يظلوا علامة فارغه لن تتكرر في غناء
الحماسة .
طبعاً بادي يفرق كتير من خلف الله حمد في موسوعية الحفظ
لكل اغاني الحقيبة والحماسة وبنسختها الاصلية وبمحبتو
الشخصية للغناء في عضموا .
يا محمد عبد الرحمن بادي الله يرحموا بوظ لي الاستماع لي
انسان بيغني حقيبة واتربع لوجده في (كنكوج) الحقيبة جواي .

الله يتقبلوا ياخ .

في الختام ...
كيفك ياخ ولينا طولة شديدة
وعمر الحلاوي وين ياخ وسط الهيصة دي ؟

سفيان حبابك ورمضان كريم ..

البسمع الغناء دا لازم سخانتو ترتفع مافى ذلك شك ..
خلف الله حمد برضو ماساهل ..والجميل فى غناء الحماسه
دا انو الناس ديل بتمجد المعانى والقيم ..اعادة
(تدويرها) مرة اخرى بساهم فى الحفاظ على القيم
البدات فى التلاشى ...

بادى محمد الطيب قامة سامقة فى الاغنية السودانية ..
يغنى فيطرب نفسه ويطرب الاخرين ..صوته والتطريب
توامان لايفترقان ..

عمر الحلاوى ياسيدى متزوج ومستقر فى الامارات فى
واحدة من الصحف الاماراتية ..واعتقد انه متابع بصورة
غير منتظمة لسودانيز اون لاين ..

تحياتك له تصل ان شاء الله

ابشروووووا ...

عليك بجر النم يا دقر الحرائق
أصبحت كارف السم عشميق الأصم

شدولو ركب فوق اصهبا مو ربيك
الهوى والشرق شرفا بعاينن ليك

العاقر ديك تقول بتلدى وتسمي عليك
يا عيد الضحية البفتحولو البيت
رايو مكملو كسار قلم ماكميك

عليك بجر النم يا دقر الحرايق أصبحت كارف السم

الليله البلد اتباشرو ناسو
يا بحر المحيط مين عبرو وقاسو
بريطانيا الترك ما لينو راسو
ابا العضم الكبير كسرو وشرب ساسو

شدولو ركب فوق اصهبا حبشي
رايو مكملو وكلامو ما هبشي
هادى أديتا ألامانه متقنعه وتمشى
حايدانى الامانه ضيف الهجعه يتعشى
ما بجالس الهفوف ولدا قبيل منسي
عكليتا كبير ماكميك جنى هكسى

قومن شكرنو يا الكلكن قاعدات
دا اب صيتا طلع شال المسافر وفات
حمدالله بالسلامة يا زمام الكليات

ليك بجر النم يا دقر الحرايق اصبحت كارف السم

عشميق الأصم هو الشيخ عبد الله ود جادالله شيخ قبيلة الكواهلة في شمال كردفان. والذي اشتهر بكسره لقلم ماك مايكل - ينطقها الناس ماكميك- حين دخل مع مدير مديرية كردفان وقتها مستر ماك مايكل في مشكلة. وهدده المدير بأنه سيرفته. ودار بينهما الحوار التالي:
المدير: أنا حأرفتك .
الشيخ عبد الله: ترفتني كيف؟ أنا ما شغال معاك. أنا شغال ناظر فوق أهلي الكواهلة. حترفتني بشنو؟
المدير: حأرفتك بقلمي هذا. يكتب فيه تقرير للحاكم العام.
ودخل الفعل محل الكلام. خطف الشيخ القلم من يد المدير وكسره نصفين وقذف به في رمال كردفان. وقال للمدير: كان ما رفتني الشجرة دي فيك. وأظنها شجرة تبلدي كبيرة من تبلدي كردفان المشهور. وصار مشهوراً بكسّار قلم ماكميك.
للعلم هو جد السيد الصادق المهدي وأخوانه لأمهم السيدة رحمة بت عبد الله ود جاد الله. وجد السيد أحمد المهدي وشقيقاته لأمهم السيدة سكينة بت عبد الله ود جاد الله. فالسيدين الإمام الصديق عبد الرحمن المهدي ووالده الإمام عبد الرحمن المهدي عُدلاء بزواجهما من كريمات الشيخ عبد الله ود جاد الله كسّار قلم ماكميك.
هل بقي في السودان رجال من أمثال عبد الله ود جاد الله؟ الله أعلم.

كبـّـاشي الصـّـافي

(العوج راي والعديل راي)