محمود عبدالعزيز ... فلنبداء من هنا .. من سودانيز ون لاين

محتاج للوقوف معه ...

غصبا عنه لانه هو ملك الجمهور .. ولا .. يعتزل ..

يلا .. كل واحد يعمل المقدور عليهو ..

اكيد فى حد قريب ليهو .. مكن يوصل ليهو المقترح ده ..

عندنا هنا كل التخصصات والحمدلله ..

يا وليد عبداللطيف .. شوف لينا فرفور ممكن يساعد ..

يا ياسر تمتام ده زميلك ونحن زملاك هنا .. يلا اتحرك ..

يا عاصم البنا .. انت مش معانا هنا .. ايدك معانا ..


تعالوا نشوف محمود ماله ونقيف معاهو وكل شيء ممكن مافى شيء مستحيل باذن الله ..


اها .. رائكم شنو ...؟

شكر ا ليك يا عفاف


فقد كنت افكر في هكذا بوست

ولكني الأن .. معك بكل ما املك ..


ومعي الكثير من المعجين هنا ..

وخارج هذا الدار ..


اتمني التواصل .. لنبدا خطوة .. خطوة ..


ادعو الأخوان ..

صالح تبلدينا

محمد عكاشة

ناجي الملك

المبدع طارق ود اللمين

الفنان .. ياسر تمتام

الاستاذ. طارق مرغني ..

الأخ جني

للحضور هنا .. والمساهمة في ضربة البداية

احمد حنين .. صباحك زين

Quote: اتمني التواصل .. لنبدا خطوة .. خطوة .. ادعو الأخوان .. صالح تبلدينا محمد عكاشة ناجي الملك المبدع طارق ود اللمين الفنان .. ياسر تمتام الاستاذ. طارق مرغني .. الأخ جني للحضور هنا .. والمساهمة في ضربة البداية

يلا اعتبر البوست بتاعك وكلم الناس ديل باي وسيلة إتصال ..

عشان محمود وفن محمود ولو محمود ما عاجبه البحصل هنا ده يبقى عندنا كلام تاني ..

والاهتمام بالفنان هو اهتمام بالفن والحكاية ما شخص محمود ..

الحكاية انقاذ جبل إبداع ..

يلا يا حنين يا اخوي يدك معانا ..

وكلم الباشمهندس بكري يرفع البوست فى السماء ..

من هنا يكمن الترابط وتتلاحم خيوط التأخي والتوادد في غياهب الزمن الجميل
من أجل فنان محبوب ذو صوتٌ شجي قدم لنا الكثير ويحتاج منا القليل ...
.
.
كامل التضامن للوقوف خلف هذا الفنان القامه ...
.
.
ولك الشكر أختي عفاف لهذه المبادرة

بوست يحمل وفاء جميل.

محمود مبدع نثر الكثير من الدرر والافراح لمعجبيه، ومنذ امد طويل مازال يواصل عطائه
الابداعي، محمود لديه معجبيين يسدون قرص الشمس
فقط اتسأل ماهي ازمة محمود او مشكلته، افيدونا اذا المسالة بهذه الخطورة.


رمضان كريم.

كم أسعدنا هذا الفتي .. وليتنا نستطيع أن نرد له ولو قليلاً مما منحنا!

لا علم لي بحقيقة مرضه ولكني أقترح أن تتكون لجنة تبدأ بالإتصالات والترتيبات لعلاجه بالخارج ومعرفة التكاليف ..
حتى ولو أضطر الأمر للإستعانة بكل أهل الفن لإقامة إحتفالات لدعم علاجه!

خلونا عمليين شوية ... نضع الإقتراحات ونعدّل فيها ثم نشرع في التنفيذ يا شباب!
________________

عفاف الصادق .. رمضان كريم يا ملكة

شكرا عفاف
معا من اجل محمود الفنان




up

يلا ياشباب ..
ألحقوا لينا الزول دا .

Quote: يلا ياشباب .. ألحقوا لينا الزول دا .

السيد .. سلام يغشاك فى القبل الاربعه ..

يلا يدك معانا بالمقدور وعارفاك ما بتقصر ..

Quote: شكرا عفاف معا من اجل محمود الفنان up

مرحب معاوية ...

محمود يستاهل ما قصر نهائي .. بس فى حق روحه قصر ..

الشاب المبدع محمود عبدالعزيز صاحب الحنجرة المميزة

كم أسعدنا وهو يتغنى بصوته الشجي ولكم أحياء العديد

من الحفلات الخيرية دعماً للغلابة ...

لكناالسؤال هل هو مريض ؟؟؟ أم يحتاج لدعم نفسي ؟؟؟

الاخت عفاف
معليش
نحنا مسطحين
الحاصل شنو للاستاذ محمود عبد العزيز
ترك الغنا
ول شنو؟
معليش مشغوليات رمضان وكدا

رمضان كريم

فل نساعد هذا الفنان ماستطعنا نعم لدعم محمود ماديا او نفسيا

Quote: الاخت عفاف معليش نحنا مسطحين الحاصل شنو للاستاذ محمود عبد العزيز ترك الغنا ول شنو؟ معليش مشغوليات رمضان وكدا رمضان كريم

محمد النيل .. رمضان كريم عليك ..

الحاصل انه محمود عبدالعزيز الفنان القامة زعلانين عليهو شديد

لانه ظهر فى برنامج اغاني واغاني بصورة هزيله جدا وتدل على انه بعاني من شيئا ما ..

وفى حلقة اخرى ظهر بنفس المستوي .. يعنى لا صوته ولا شكله زي ما كانو زمان ..

والحكاية دي كانت ملاحظة بي صورة لافته حتى لغير السودانيين ...

يعنى انا معاي صديقاتى من اجناس مختلفة حضروا معاي الحلقة وكانت تعليقاتهم واضحة ..

عشان كده قلنا من هنا من سودانيز ون لاين نعرف الحاصل شنو ولو فى مساعدة نقدر نقدمها نقدمها ومافى شيء مستحيل ..


يلا لو فى طريقة عندك قول ..

وداعا محمود عبد العزيز .. ان لا تحترم نفسك فانت حر .. ...م فنك وتحرمنا جمهورك


عفاف كل سنة وإنتي طيبة ورمضان كريم

Quote: عفاف كل سنة وإنتي طيبة ورمضان كريم

شول مشكووووووور وانت طيب يا الغالي ..

عليك الله شفته وجع محمود !!

شيء مؤسف والله ..

حبيبنا السفاح ... وين يا رجل؟ مشتاقون بالجد
وكل عام وأنت والأهل كلهم بخير يا حبيب

Quote: لكناالسؤال هل هو مريض ؟؟؟ أم يحتاج لدعم نفسي ؟؟؟

ذكرت في مداخلتي السابقة إنه لا علم للكثيرين عن سبب مرضه الحقيقي ولكن في كل الحالات
محمود يحتاج لمباشرة طبية سواء كان يعاني من مرض عضوي أو مرض نفسي!

محبتي

Quote: حبيبنا السفاح ... وين يا رجل؟ مشتاقون بالجد وكل عام وأنت والأهل كلهم بخير يا حبيب

الحبيب أمير ( ابو سارة )

مشتاقين كتير يا حبيب

والشوق فات حد الوصف

Quote: ذكرت في مداخلتي السابقة إنه لا علم للكثيرين عن سبب مرضه الحقيقي ولكن في كل الحالات محمود يحتاج لمباشرة طبية سواء كان يعاني من مرض عضوي أو مرض نفسي! محبتي

جهمور محمود العريض قلق لما وصل اليه محمود

ويظهر ذلك من خلال شكله العام ... وكل من يشاهده

على التلفاز يبادر بالسؤال .. انتو محمود دا مالو ؟؟

في كل الأحوال كما ذكرت اخي أمير محمود يحتاج لدعم محبيه

أن كان المرض عضوي او نفسي ليعود كما عرفناه مبدع متفرد

أرجو من الأخ بكري أن يعلق هذا البوست عاليا .






ــ
عفاف رمضان كريم .

شكراً عفاف الصادق
ورمضان كريم ..
نحييك على هذه اللفتة البارعة من خلال لفتك لانتباه
كل المعشوقين والمحبين لهذا الفنان المبدع العظيم
محمود عبدالعزيز صاحب الحنجرة الذهبية الذى غنى
لهذا الوطن ونتمنى أن يقف الجميع معه سنداً ودعماً
حتى يماثل الشفاء.آدم جمال أحمد

الفنان محمود عبد العزيز شاب في مقتبل عمره الفني

ليش يعتزل ؟؟!!!!!

لابد ان يراجع نفسه

شكرا عفاف

لمهالك الشر أودعوك.

معا للمحافظة على مواهبنا الشابة

غايتو محمود لو شاف البوست دا حا يضرف كف بي كف ويتعجب ويقول :

الناس ديل قايليني مجنون ولا شنو ؟؟!!

دا لو ما قال :

مالكم ومالي يالشايلين حالي يا الخاشين توش طوالي ..!!

يا جماعة محمود ماشي بي بيت الشعر البيقول :

هو اللي إختار دنيتو .. هو المخير في إختيارو ..!

كدي خلي واحد من المشفقين البيكتبوا هنا ديل يتشجع ويمشي لي محمود ويعرض عليهو المساعدة والعون ..!!

يمين بالله كان ما شلتو وكفتو ولبعوا وزعمطوا تعالوا أسألوني ..!!

ولكم في الفنان صلاح الولي أسوة حسنة ..!!

ناذر الخليفه .. يسعد صباحك نور ..

معليش خليني امسك كلامك ده واحده واحده :-

Quote: غايتو محمود لو شاف البوست دا حا يضرف كف بي كف ويتعجب ويقول : الناس ديل قايليني مجنون ولا شنو ؟؟!!

حتى الان يا ناذر مافي حد قال حاجة عن محمود صعب علينا حاله فقط ..
ودي ملاحظة كل العالم فكر فيها .. ومحمود مش ملك نفسه .. ولا ما كده ..

Quote: دا لو ما قال : مالكم ومالي يالشايلين حالي يا الخاشين توش طوالي ..!!

مافي حد خشه تووش ودي محبة لي محمود ليس إلا لانه بينا وبين محمود فن سوداني راقى
وبالنسبة لينا محمود داخل كل بيوتنا فلذلك من حقنا ندخل توش زي ما هو دخل مساماتنا ..
وبعدين مافي زول شال حاله لانه حاله يغنى عن السؤال حتى .. وكل شيء باين ..

Quote: يا جماعة محمود ماشي بي بيت الشعر البيقول : هو اللي إختار دنيتو .. هو المخير في إختيارو ..!

ما اختلفنا يختار دنيته .. لكن ما يقحمنا بي فنه وإبداعه .. فليعتزل إذا ..

Quote: كدي خلي واحد من المشفقين البيكتبوا هنا ديل يتشجع ويمشي لي محمود ويعرض عليهو المساعدة والعون ..!! يمين بالله كان ما شلتو وكفتو ولبعوا وزعمطوا تعالوا أسألوني ..!!

شوف يا ناذر يا اخوي انا واحدة من المشفقين عليه وكانه ولدته أمي ..
وقسما عظما لو انا فى السودان أصله لغاية عنده وواضح ليهو وجهة نظري دي ..
وبعد كده لو ممكن يعمل الانت قلته ده يبقى هو ما فنان لانه الفن إحساس ..
ولا ما كده .. ؟؟ ولو هو اصلا مستواهو كده يبقى يبعد من الفن ووسائل إعلامنا ..
ويمسك نفسه فى بيته لانه الفن رساله ساميه وسفير لشعوب كتيره ..






كل المتداخلين .. لكم من الود ما تعلمون واكتر ..

معليش البداية كانت رد لي الاخ ناذر لانه في نفس المجال وما شجع ..

اب قلبا وقالبا من اجل محمود

البصاص ...

خلاص يا أب قالب وقلب أرحكاكا لي محمود في بيتو عشان تساعدوا في محنتو البتقولوا عليها دي ..!!

لمن نطلع كان ما قلت لي وديني القسم عشان تعمل أولرنيك تمنية تعال أسألني ..!!

يا جماعة النصيحة لله شوفوا ليكم شغلة تانية أقضوها بعيد عن محمود دا ..!!

للاسف اصدقاء السوء الورطوا محمود
لكل البسالوا عن صحة الفنان محمود
الراجل للاسف تدهورت صحته من الاشياء الكان بتعاطاه
هداه الله وكل من سلك هذا الدرب
لكن سمعت انه تاب ورجع لنفسه وده منانا طبعا
محمود فنان شاب وله قاعدة جماهيرية عريضة
يستاهل جمهوره يقيف معاه

الشكر ممتد جسور محبة ومودة للغالية عفاف
كل سنة وانتي طيبة يا حبيبة
ورمضان كريم عليك واسرتك يا رب

اختنا عفاف

في النهاية محمود يعلم علم اليقين ان الناس ساعيه لمصلحته اولا

ولامكانياته التي لا يشك فيها احد

ولمصلحة الجميع

لذلك اخي حنين اقترحت من قبل بعض الاسماء التي ربما تجد تجاوب معه

انا بحكم ان بحري منطقتي اعرف كميه من اولاد حلته كما يقولون

وهم بالتاكيد محل تقديره

يمكنني عمل الاتصالات اللازمة مع بعضهم لاعرف اراءهم

ربما تقابل الناس بعض الصعوبة في البداية لكن الناس لا تقف مكتوفه اليدين

اتمني من الاخ وليد عبد اللطيف الاتصال بفرفور لمعرفة رايه

معليش... عدل لتعديل الاسم

الاخت / عفاف سلام

بوست رائع لفنان رائع قدم الكثير

كامل التضامن للوقوف خلف محمود عبد الالعزيز الفنان الجميل

مودتى ...

كامل التضامن
شكرا عفاف .. الموضوع بحاجة لتنسيق

ناذر يا فنان ..

Quote: يا جماعة النصيحة لله شوفوا ليكم شغلة تانية أقضوها بعيد عن محمود دا ..!!

؟؟؟؟؟؟؟؟؟؟!!!!!!!!!!!!!!!!!

Quote: لكناالسؤال هل هو مريض ؟؟؟ أم يحتاج لدعم نفسي ؟؟؟

عبدالله السفاح .. يسعد صباحك ..

ما معروف الحاصل شنو ..؟

نحن هنا عشان نعرف الحاصل شنو ؟؟

Quote: كم أسعدنا هذا الفتي .. وليتنا نستطيع أن نرد له ولو قليلاً مما منحنا! لا علم لي بحقيقة مرضه ولكني أقترح أن تتكون لجنة تبدأ بالإتصالات والترتيبات لعلاجه بالخارج ومعرفة التكاليف .. حتى ولو أضطر الأمر للإستعانة بكل أهل الفن لإقامة إحتفالات لدعم علاجه! خلونا عمليين شوية ... نضع الإقتراحات ونعدّل فيها ثم نشرع في التنفيذ يا شباب!

أمير .. يا أمير ..

كفيت ووفيت ..

يلا بسرعه ننقذ ما يمكن انقاذه .. فليكن عمليا كما قلت ..



الله اكرم يا امير .... تسلم

Quote: فقط اتسأل ماهي ازمة محمود او مشكلته، افيدونا اذا المسالة بهذه الخطورة.

الفاضل .. كيفنك يا اخوي ..

والله ما عارفين بالضبط شنو مشكلة محمود لكن وضعه ما عاجبنه نهائي ..

نسأل الله أن يكون الامر هين .. يلا كيف حا ننقذ محمود ..؟؟

Quote: من هنا يكمن الترابط وتتلاحم خيوط التأخي والتوادد في غياهب الزمن الجميل من أجل فنان محبوب ذو صوتٌ شجي قدم لنا الكثير ويحتاج منا القليل ... . . كامل التضامن للوقوف خلف هذا الفنان القامه ...

معتز زيزي .. تسلم من كل شر ..

لافائدة فينا إن لم نصلح خطاء احبابنا ..

يلا يا معتز يدك معانا باي وسيله تشوفها ..

ما عايزين كتابة فقط ورفع البوست ..

يلا المداخله الجايه يكون فيها جديد .. سمح ..

تحية طيبة يا عفاف
وسنتك سعيد
وسلامي للجميع هنا ....

يا جماعة الخير كتبته في بوست (أغاني و أغاني) ما يخص هذا الموضوع
وكائن من كان ومن شاهد محمود بيكون مستغرب مما حاصل ليه لكن لعلمكم
ولمصلحة هدفكم ده لازم تعرفوا انو محمود عبد العزيز يملك شخصية قوية
مسيطرة ويعرف تمام التمام ما يريده وما لا يرده ولازم تعرفوا تمام برضو
انو مليون شلة ومليون صديق سوء ما ممكن يقنعوا محمود بي حاجة هو ما
مقتنع بيها ... يا اخوانا محمود ده فنان فنااااان قلق ويعيش حياته
بهذا القلق العذاب وهو انسان حركي لا يهداء ولا يهمد ولازم تعرفوا انو
محمود انسان بطبيعة حاله مُقل في الشكية وما يفكر فيه بشكل شخصي يظل
حبيس صدره حتي ينفذه بالطريقة التي يعتبرها هو سليمة ... لازم تعرفوا
انو محمود يملك هذه الروح المعذبة التي يمتلكها الفنان الحقيقي وهذه
الروح هي التي تشقيه ويبحث لها عن اجابات بشكل دائم ووسط هذه تمضي
حياته بين الاستقرار وعدمه .
يعني قاصد اقول ليكم مسعاكم ما بطال وجيد لكن لو بتفتكروا انكم
حريصين علي محمود اكتر من حرصه هو علي نفسه فانتوا غلطانين ومسعاكم
حيفشل لانكم من البداية حتغلطوا في المدخل لمحمود ذات نفسه .

والله يشهد صدق وحسن نية توجيهي
و أتمني ان تفهموه جيداً.
اخوكم
سفيان

Quote: يعني قاصد اقول ليكم مسعاكم ما بطال وجيد لكن لو بتفتكروا انكم حريصين علي محمود اكتر من حرصه هو علي نفسه فانتوا غلطانين ومسعاكم حيفشل لانكم من البداية حتغلطوا في المدخل لمحمود ذات نفسه .

سفيان .. يسعد صباحك ..

اظنك اللحظة دي متواجد ويلا تعال نتناقش في الموضوع ده بكل وضوح ..

بما انى في الدوام والدوام لله ..

اظن تربطك علاقة بي محمود لانك وضحته تفاصيل دقيقه عن شخصيته ..

لكن عليك الله مافى حتى بصيص آمل عشان الناس تدخل ليهو ..

بعدين محمود المفروض يعرف انه لو لا الناس الكتبت دي ما كان محمود من اصله ..

عشان كده يجب عليه ان يحترم رائ الناس البتحبه ..

ولو ما قدر الناس العايزه مصلحته يبقى ما قدر حتى نفسه ..

بعدين ياخ نحن عايزين نقاسمه ثروته هههههههههه ..

فى النهائة خوفنا على سفير فنى ومرسال لفن سودانى اصيل ..

الاخت عفاف

تحية طيبة


لا اشك في صفاء نيتك اتجاه الفنان محمود عبد العزيز

ولكن


اجد نفسي اقف مع الاخ ناذر في الفكرة العامة



ذكرت ان الاخ محمود بحاجة الى مساعدة



بمعنى انو عندو مشكلة


والمشكلة دي حسب مافهمتها منك

او من سياق البوست لاتخرج من انها

اما عضوية او نفسية


طبية في الحالتين


طيب المطلوب من الاعضاء شنو في الحالة دي


واحد: اما مساعدة مادية


ودي غير واردة لانو من الميسورين بحمد الله


او مساعدة معنوية


وهذه تندرج في باب النصح والنصيحة


وعشان اي زول يتقبل النصيحة لابد من تغليفها بقالب معين حتى يصل المعنى المطلوب ايصاله للمنصوح


قال الامام الشافعي

تعهدني بنصحك في انفرادي وجنبني النصيحة في الجماعه

فإن النصح بين الناس نوع من التوبيخ لا أرض استماعه

فإن خالفتني وعصيت قولي فلا تغضب إذا لم تُعط طاعه




لا اشك مطلقا في حسن النية

ولكن اصدقك القول لم توفقي في الاسلوب




واعتقد جازما ان هذا البوست لو كان لاحد الاعلاميين او الفنانيين المشاركين في البورد


لتم فهمه على انه نوع من التشهير والحرب الاعلامية بين الفنانين




تحياتي وان شاء الله اكون خفيف

Quote: الاخت عفاف تحية طيبة لا اشك في صفاء نيتك اتجاه الفنان محمود عبد العزيز ولكن اجد نفسي اقف مع الاخ ناذر في الفكرة العامة ذكرت ان الاخ محمود بحاجة الى مساعدة بمعنى انو عندو مشكلة والمشكلة دي حسب مافهمتها منك او من سياق البوست لاتخرج من انها اما عضوية او نفسية طبية في الحالتين طيب المطلوب من الاعضاء شنو في الحالة دي واحد: اما مساعدة مادية ودي غير واردة لانو من الميسورين بحمد الله او مساعدة معنوية وهذه تندرج في باب النصح والنصيحة وعشان اي زول يتقبل النصيحة لابد من تغليفها بقالب معين حتى يصل المعنى المطلوب ايصاله للمنصوح قال الامام الشافعي تعهدني بنصحك في انفرادي وجنبني النصيحة في الجماعه فإن النصح بين الناس نوع من التوبيخ لا أرض استماعه فإن خالفتني وعصيت قولي فلا تغضب إذا لم تُعط طاعه لا اشك مطلقا في حسن النية ولكن اصدقك القول لم توفقي في الاسلوب واعتقد جازما ان هذا البوست لو كان لاحد الاعلاميين او الفنانيين المشاركين في البورد لتم فهمه على انه نوع من التشهير والحرب الاعلامية بين الفنانين

معاذ .. تصوم وتفطر على خير ..
معليش اقتبسته كتاباتك للاهمية ..

تعرف يا معاذ يا اخوي انا فهمته قصدك كله ومعاهو كلام الامام الشافعى ..

لكن البوست بعنى المحبة الزائده لمحمود وخوفنا عليهو من اللاحظنا فيهو ..

ومن حق اي فنان يتقبل اي نقد مهما كان نوعه ..

ومحمود لولا الناس البتحبه ما كان محمود فلذلك لازم يكون فى تقدير لاي وجهة نظر ..

الحاصل لي محمود كان ملاحظ .. يعنى ما شيء بعنى اسرته ولا إجتماعياته ولا لبسه ولا طريقة كلامه ..

الحاصل بعنى انه محمود شكله وطريقته الشفناها دي بتنذر بخطر يداهم محمود ..

يعنى نحن هنا ما إتدخلنا فى زواجه او طلاقه او خصوصياته ..

البوست من باب الخوف على محمود وصدقنى ولدي الصغير لاحظ لشكله وطريقة غناهو ..

والحاصل لي محمود لا بسر ولا بعجب حتى العدو ..

نحن قصدنا فقط انه محمود يعرف انه فى ناس بتحبه وبتخاف عليهو ..

انا فتحت البوست ده وبتمنى انه محمود عبدالعزيز نفسه يدخل سودانيز ون لاين ويقراء البوست ..

واكيد اكيد يكون فى خبر عنده بالحاصل .. والناس فى النهائه قصدها تنقذ وضع غير مريح لفنان شاب

منتظر منه الكتير .. وانا شخصيا بنتظر محمود لو عنده طريقه يرد على وحتى لو عمل فينى اي شيء وقال

تشهير برضو انا على استعداد لمجاراته وخوفى عليهو ...

وزي ما زكرته وحسب فهمى انا كان ممكن انصحه هو فقط من غير ما اعمم الموضوع ..

لكن ما تنس يا معاز يا اخوي محمود ما كان فى حفلة خاصة .. محمود كان في قناة فضائية بتوصل اكتر من

بلد وزي ما ذكرته حتى غير السودانيين لاحظو حالة محمود ..

بعدين كلامك صحيح .. محمود ما محتاج لى مساعده ماليه إطلاقا .. بل أنا قصدي انه يشعر بانه فى ناس

بتهتم بيهو ودي ممكن تعدل النفسيات عديل كده ..



معاز ود الهادي ليك من الود أطنان ..

رمضان كريم ياعفاف والجميع ..


طبعا كلامكم كلام محبة ما في كلام وانا برضو من محبينو ..


لكن بتصور انو الصدمة النحن فيها دي أنو اول مرة نشوف محمود بشكل متكرر في برنامج وده العزز الشعور ، لكن يا عفاف محمود قد لا يقبل التدخل في شأنو الخاص وقد لا يكون الشخص البتفهم الحب ده بشكل مجرد أو ممكن يفهموا نوع من الشفقة أويكون زول حساس أو حتى خجول أو او ألخ ، وطبعا إذا رفضو (حقو )، شخصيتو البرة فنو ما بعرفوها إلا المقربين منو ، ده ماإحباط لكن محاولة لفت نظر أنو نتعامل مع الموضوع بشكل تاني بعيدا عن عرض المساعدة ويكون الموضوع (مناشدة محبة من معجبينو) ..، مرات الحاجات بتنقلب للضدياعفاف ، وفي الأخر ده كلام ما ملزم ..

ورأي الشخصي أنو مجرد ظهور محمود في الحلقات وإحتكاكو بفنانين تانين مهتمين بفنهم ومدينو حقو وملمعين ونايرين بينما هم في الحقيقة أقل من مقدراتو ـ مع إحترامي للجميع ـ حيغير فيهو وده زعم مني طبعا والله اعلم ..

شكراً عفاف وكل عام وانت بخير ...


نسال الله الهداية لنا وللفنان محمود ..وإن الله لايغير مابقوم حتى يغيروا مابأنفسهم ..

!!!!

Quote: وبعد كده لو ممكن يعمل الانت قلته ده يبقى هو ما فنان لانه الفن إحساس .. ولا ما كده .. ؟؟ ولو هو اصلا مستواهو كده يبقى يبعد من الفن ووسائل إعلامنا .. ويمسك نفسه فى بيته لانه الفن رساله ساميه وسفير لشعوب كتيره ..

كدة نحن متفقين ..

لكن خلي بالك لي كلام سفيان دا كويس ..

يا نابري ..

مذكر أول مرة أقابلك في قاعة الصداقة ومعانا صاحبنا المشترك داك ..؟!!

الزول داك عارف البير وغطاها .. عليك الله أمشي أسألو عن رايو في الحاصل دا ..

وشوف حا يقول ليك شنو ..!!

داليا عروستنا الحارساها الملائكه .

بركة بالطلة يا حبيبة .. وتصومى وتفطري على خير

Quote: لكن بتصور انو الصدمة النحن فيها دي أنو اول مرة نشوف محمود بشكل متكرر في برنامج وده العزز الشعور ، لكن يا عفاف محمود قد لا يقبل التدخل في شأنو الخاص وقد لا يكون الشخص البتفهم الحب ده بشكل مجرد أو ممكن يفهموا نوع من الشفقة أويكون زول حساس أو حتى خجول أو او ألخ ، وطبعا إذا رفضو (حقو )، شخصيتو البرة فنو ما بعرفوها إلا المقربين منو ، ده ماإحباط لكن محاولة لفت نظر أنو نتعامل مع الموضوع بشكل تاني بعيدا عن عرض المساعدة ويكون الموضوع (مناشدة محبة من معجبينو) ..، مرات الحاجات بتنقلب للضدياعفاف ، وفي الأخر ده كلام ما ملزم ..

يا داليا يا حبيبة .. نحن نهائي ما اتدخلنا في شأنه الخاص .. دي ملاحظة عاااامة ..

يعنى الليله لو لقيت محمود عامل عمليه تجميل لي أنفه ما بتدخل لانه ده شأن خاص ..

اما اشوف صحته متدهوره وما قادر حتى يتسند على روحه من الاعياء الظاهر ..

ابسط شيء يا داليا بقول ليهو كفاره والبيك يزول .. ولا ما كده ..

عشان كده يا داليا شوفى البوست من حتة نحن خائفين على محمود ..

والمفروض يعرف انه هو ما ملك نفسه .. هو عنده جمهور ما ساهل المفروض يفرح ..

وفي النهائة المطلوب من محمود رجوعه زي ما كان .. ومافى مستحيل أظن وإلا إرادة الله ..




يابت مشتهين شوفتك ما بتشرفينا فطور رمضان .. ؟
ده لو ربنا سهل لينا حضور الفطور ..
تحياتى لي هبانيك ..

Quote: اظن تربطك علاقة بي محمود لانك وضحته تفاصيل دقيقه عن شخصيته ..

يا عفاف علاقة المحب المعجب زايد اصحاب كتااار مشتركين
زايد انتباه دقيق واهتمام بمعرفة روح هذا الكائن الجميل
من خلال متابعة احواله العامة وتحليلها (معليش ده اهتمام
شخصي ما عايز ادلقوا علي العام بتاعكم) - المعجبين عندهم
تصرفات تخصهم زي ما انتو عارفين- .

Quote: لكن عليك الله مافى حتى بصيص آمل عشان الناس تدخل ليهو ..

الشاب ده فنان فنن شديد وبيحب الناس يا عفاف بصورة تفوق الوصف
بس المدخل كيف ؟ ده السؤال اتنو حساس جدا .

يا عفاف ضحكني كلام ناذر شديد وناذر عايز يقول ليكم نفس كلامي
بس ال(صيام) حرقوا ههههههههههه

محمود فنان والفنان شخص قلق وغير مستقر ومحمود يملك من القلق
اضعاف ما تتخيلونه .

ومحبة شديدة يا صديقة .

سفيان .. سلام تانى

Quote: عفاف علاقة المحب المعجب زايد اصحاب كتااار مشتركين زايد انتباه دقيق واهتمام بمعرفة روح هذا الكائن الجميل من خلال متابعة احواله العامة وتحليلها (معليش ده اهتمام شخصي ما عايز ادلقوا علي العام بتاعكم) - المعجبين عندهم تصرفات تخصهم زي ما انتو عارفين- .

ايوووووووووه الشرك قبض .. يعنى في اصحاب كتتتتار مشتركين بينك وبين محمود صاح ..؟

يلا خليهم يمشو عليهو ويقولوا ليهو شوف سودانيز ون لاين ..

ولانه يا سفيان روحه جميله وبحب الناس لازم يحب نفسه ويحافظ عليها عشان الناس ..

عليك الله يا سفيان اهتمامك الشخصي حاول بيهو كيف تقدر توصلنا لي محمود وتعرض عليهو الحاصل هنا ده..

وزي ما انت عارف انه المعجبين عندهم تصرفات بتخصهم .. اها انا خصوصياتى في فتح البوست ده ههههههه

Quote: الشاب ده فنان فنن شديد وبيحب الناس يا عفاف بصورة تفوق الوصف بس المدخل كيف ؟ ده السؤال اتنو حساس جدا .

والله انا لو هناك اخش ليهو فى اي مكان واي وقت والبحصل يحصل


سفيان .. ياخ تسلم من اذى محمود ..

Quote: سفيان .. ياخ تسلم من اذى محمود ..

هاهاهاهاهاها اذى شنو ياخ والله الشاب ده وديع
وبسيط ومرح مرح عجيب (الغنماية تاكل عشاهو)
بس اي انسان بيهبش خصوصيته بيفهم حاجة لووووول .

اي واحد فيكم يخت نفسه مكان محمود الان ويجي يقرا البوست دا , اعتقد شخصيا ان مثل هذه الامور لا تعالج هكذاا في الاعلام المفتوح , بالطبع الجميع قلبهم مع محمود ولكن هذا الطريق غير صحيح الذي تتبعوه .
طريقة تقديم المساعدة تختلف من وضع الي اخر , لا يمكن ان تكون مساعدة محمود علي نفسه بطريقة تقديم العون لضحايا طوكر ؟؟
المساعدة التي يريدها محمود هي اعادة التاهيل للتخلص من العادات السيئة . لا اعرف مراكز تقدم هذه المساعدة في السودان سوى مصحة كوبر الموجودة في سجن كوبر
امشوا كدا بربطة المعلم وقولوا لمحمود انحنا في سودانيز اون لاين عملنا لجنة ودعينا فيها فلان وعلان دايرين ندخلك مصحة كوبر عشان تتعالج من الادمان .
ونتقابل بعد داك

عدل للتكرار

Quote: اي واحد فيكم يخت نفسه مكان محمود الان ويجي يقرا البوست دا , اعتقد شخصيا ان مثل هذه الامور لا تعالج هكذاا في الاعلام المفتوح , بالطبع الجميع قلبهم مع محمود ولكن هذا الطريق غير صحيح الذي تتبعوه . طريقة تقديم المساعدة تختلف من وضع الي اخر , لا يمكن ان تكون مساعدة محمود علي نفسه بطريقة تقديم العون لضحايا طوكر ؟؟ المساعدة التي يريدها محمود هي اعادة التاهيل للتخلص من العادات السيئة . لا اعرف مراكز تقدم هذه المساعدة في السودان سوى مصحة كوبر الموجودة في سجن كوبر امشوا كدا بربطة المعلم وقولوا لمحمود انحنا في سودانيز اون لاين عملنا لجنة ودعينا فيها فلان وعلان دايرين ندخلك مصحة كوبر عشان تتعالج من الادمان . ونتقابل بعد داك

اساسي .. سعيده بتداخلك هنا واظن دي اول مره تداخل معاي .. (دي نوثقه سمح)
انا بخت نفسي مكان محمود .. انا عفاف زميلتكم انتو فى سودانيز ون لاين .. اوكي ..

اي واحد فيكم اخوي وبقدر تقدير خاص .. صاح .. مهما اختلفنا بنتفق فة حتة الانسانية ..

ودي ما فيها شك نهائي .. لو شفته اي عيب فينى وقلته لي .. لو انا بحبكم بقدر كلامكم ..

ولو ما بحبكم وما اقتنعته بى كلامك وهو عين العقل بكون انا الخسرانه ..

طريقة فتح البوست نهائي ما ليها صلة بتقديم مساعده تشبه مساعدات طوكر وشاكلتها ..

لو نظرة للبوست من ناحية محبين لمحمود وخائفين عليهو ممكن تغير نظرتك وتشوف البوست من الزوايا

المقصوده .. لانه هنا ما مطلوب مساعدة مالية ومحمود ما محتاج لي مال .. ولغاية الان نحن ما عارفين

محمود محتاج لي شنو عشان نقدر نساعده بيهو ..

انا طرحت نفسي محبه لى محمود وفنه وبعتبر انه محمود ملك الكل .. احساسي فى لحظات نظرتى ليهو فى

اغاني .. ودي ما كانت خافيه على اى زول .. معجب او غير معجب ..

والبرنامج خلاني افكر طول الوقت بانه محمود محتاج لدعم .. بس الدعم ده نوعه شنو انا ما حددته لانه

انا اصلا ما عارفه الحاصل ليهو شنو ؟ ومن شنو ؟؟ ..

بالعكس انا ما شايفه انى جرحت محمود باي نوع من الجروح الممكن تآثر على وضعه الحالى ..

بل بالعكس طرحت ملاحظة وكانت عامة ...

بعدين انا شخصيا ما حددته انه محمود محتاج لى مصحة ولا محتاج لى نقاهه ولا علاج معين من مرض معين ..

بل انا قلته شوفوا محمود ماله والممكن يتقدم ليهو شنو .. ؟ عشان يطلع من الهئية العجيبة الشفناها

بيهو دي ..

وصدقنى حتى محمود ما مقتنع بالحاصل ليهو وده من طريقة ظهروا في البرنامج .. وعلى فكره انا ما عندي

اي فكره عن الطب النفسي عشان احدد انه هو كان ماله بس نظرة العامة كانت انه محمود ما طبيعي ..

ومن هنا يا اساسي انا بطلب منك مساعدة محمود لو عرفته اساسا هو مالو .. ؟ وبعانى من شنو .. ؟

والسبب شنو .. ؟..

عشان محمود حقنا كلنا ( اقصد معجبي فنه ) وعشان ما يضيع ويكون اللوم علينا ..





مودتى التى لا تعلمها ..

Quote: اي واحد فيكم يخت نفسه مكان محمود الان ويجي يقرا البوست دا , اعتقد شخصيا ان مثل هذه الامور لا تعالج هكذاا في الاعلام المفتوح , بالطبع الجميع قلبهم مع محمود ولكن هذا الطريق غير صحيح الذي تتبعوه . طريقة تقديم المساعدة تختلف من وضع الي اخر , لا يمكن ان تكون مساعدة محمود علي نفسه بطريقة تقديم العون لضحايا طوكر ؟؟ المساعدة التي يريدها محمود هي اعادة التاهيل للتخلص من العادات السيئة . لا اعرف مراكز تقدم هذه المساعدة في السودان سوى مصحة كوبر الموجودة في سجن كوبر امشوا كدا بربطة المعلم وقولوا لمحمود انحنا في سودانيز اون لاين عملنا لجنة ودعينا فيها فلان وعلان دايرين ندخلك مصحة كوبر عشان تتعالج من الادمان . ونتقابل بعد داك

أساسي والله الموضوع أسهل مما إنت متخيل ..
يعني مجموعة من الشباب ممكن يمشوا لي محمود بإعتبارهم رابطة محبي محمود في سودانيز ..
المهم .. طالما ان الغرض سليم بتبقي مسألة الإقناع دي حاجة ساهلة .. إذا قدروا يبدوا معاهو بداية سليمة .
ولازم الناس تحاول وتحاول .. ولو ربنا كاتب علي يدنا حاجة ح تحصل بإذن الله .


ـــ
محبتي التي تعلم

الأخت عفاف والجميع ..


لا احد ينكر صعوبة المهمة وحساسية الفنان تجاه ذلك ..

وايضا يا نازر وسفيان ..

نعرف جيدا شخصية محمود القوية ..


ونعرف جيدا ان هناك اشخاص حاولوا قبلنا وفشلوا ..

لأسباب عديدة ..

منها تلك الشخصية القوية .. التي يملكها محمود..


ولكن لكل شخصية مفتاحها...

ولكل شخص مدخل يهتم به ويسمح له..


وربما المعجبين بهذا الفنان .. يمكنهم فعل ذلك ..

فمحمود عبد العزيز ليس ملكا لنفسه ...

فهو شخصية عامة .. يجب علي الجميع الأهتمام بها ورعايتها....


نرمي قدام ..

الاستاذ / طارق مرغني ..

ارجو ان ترسل تلك الأسماء من ابناء المزاد والاصدقاء..

وسوف يتم الأتصال بهم .. كما تم تكليف البعض يالاتصال بالفنان جمال فرفور

[email protected]

00249919315181

00249111007536

من أجل محمود...

..
.

Quote: الشاب ده فنان فنن شديد وبيحب الناس يا عفاف بصورة تفوق الوصف بس المدخل كيف ؟ ده السؤال اتنو حساس جدا .

وعنيد يا عفاف وراسو قووى ..!!

--------------

بتفق مع ناذر واساسي الموضوع ما بتعالج كدا ..
يعنى المسالة دايره دبلوماسية وعلاقة وثيقة جدا ..
من زول محمود ممكن يستمع ليهو ويتقبل الكلا الشين دا منه
وطبعا مافى شئ شيتن زى تقول لزول انت عيان ومحتاج علاج _ بغض النظر عن المرض _
اعتقد الموضوع بحتاج لوسيلة ارفع من كدا ..

وشكرا يا عفاف
والله كلنا مع محمود بس المشكلة \
فى الوعى وتقبل النصيحة ...

الاخت عفاف

Quote: بتفق مع ناذر واساسي الموضوع ما بتعالج كدا .. يعنى المسالة دايره دبلوماسية وعلاقة وثيقة جدا .. من زول محمود ممكن يستمع ليهو ويتقبل الكلا الشين دا منه

والله ماشفت البوست إلا الان
ولكن كلام تبلدينا دا جميل جدا
ومن الان سوف ابدا الاتصالات

البوست يحمل فكرة خرقاء

فأرجو حفظ ماء الوجه بطلب سحبه سريعا من السيد بكري

الاخت عفاف ( دايما اصيلة )
الان اتصلت على سكرتير جمال فرفور ( محمد عوض 00249912344866موبايل )
لكي احاول اجيب رقم محمود عبد العزيز
حتى ناس الخرطوم يتصلوا به ويكون مدخل هادي
ومن غير اعلان ..
انا بشوف
الناس تبدا من بيت الفنون وعن طريق جلسة صغيرة بواسطة طارق اللامين
وبعض اعضاء المنبر بالخرطوم ودا افضل مدخل ياجماعة لان محمود الان بصراحة بعاني
والاعلان عن هذا الموضوع ممكن يعمل له شوشرة .








وفقكم الله في مسعاكم الطيب

Quote: لان محمود الان بصراحة بعاني والاعلان عن هذا الموضوع ممكن يعمل له شوشرة .

والله البوست ده يا وليد يا اخوي نهائي ما إعلان عن اي شيء ..

اللهم وضع محمود ما عجبنا ودي ملاحظة وربما تودي لمعالجة الحاصل ..

يلا اسعى معانا ..


والله وراء القصد

Quote: والله ماشفت البوست إلا الان ولكن كلام تبلدينا دا جميل جدا ومن الان سوف ابدا الاتصالات

وليد .. كيفنك ..

فيك الخير يا وليد .. وانا طالبتك بالاسم لعمل الممكن ..

والله وراء القصد ..

أساسي ..

Quote: امشوا كدا بربطة المعلم وقولوا لمحمود انحنا في سودانيز اون لاين عملنا لجنة ودعينا فيها فلان وعلان دايرين ندخلك مصحة كوبر عشان تتعالج من الادمان . ونتقابل بعد داك

والله تاني كان إتقابلنا بعد داك تعال أسألني ..!!

ناذر

Quote: والله تاني كان إتقابلنا بعد داك تعال أسألني ..!!

اصلا يا نادر منو القال امشو سيره لى محمود ودقو بابه وقولو ليهو تعال طالع لينا بره ..

ياخ انت فنان واكيد عندك دبلوماسية ومخرج .. ليييه ماسك فى حتة انه الموضوع تجريح ..

ولييييه تدينا احساس انه محمود ده جماد ..

بعدين اساسي مع احترامي لي رائه ولى فهمه للبوست ده ما قاصده انه الناس توصل لى محمود بالتجريح

والاهانة ..

المقصود يا نادر واساسي انه محمود محتاج لينا وعلينا مد اليد ليهو باي طريقه ممكنه ...

اكرر من غير تجريح لى محمود ...

عفافنا كل رمضان وانت والاسرة بالف خير ...
وشكرا لوفائك ...

اما حوده ...ملك الطرب والتطريب ..في زمن جدب الحناجر والمزامير ..
رغم سوء (الحاله )او الطلة التي لم تروق لي من حوده او ربما لم اهئ نفسي لها ولكن يظل محمود
ساحر الحلقات ..وقد اطفى رونق وبهجه على البرنامج ..
لكن ما اعرفه عن محمود ..حساس ومفرط في حساسيته مما يدخله في العديد من الازمات
وصدقوني لو اطلع على ه>ا البوست لتازم اكثر ..
فهو قليل الكلام والطعام ..ل>لك يبدو هزيلا والله من اول يوم الحلقه الاولى هميت حالته
وتساءلت اهو مريض ام هناك مصيبه اصابته ام هو عامل السن
وحقيقه هو حاول تغير (اللوك تبعو )فربما لم يروغنا الشكل الجديد
وبعدين لاحظت انه يجلس بصعوبه ولا يقوى على الوقوف لا ادري خجلا ام مريضا ام رافضا (للجوغى )
المهم نحن معاك
بالمال
بالراي
بالدم ...ما كتير عليهو ..
قلتو نجيبو معانا فترة نقاها برضو معاك
وشكرا لانسانيتك
والله من وراء القصد
ويظل حوده ملك الطرب ...ملك (محبوب )..
لك محبتي

تبلدينا .. كيف حالك ياخ .. شايفاك منور فى برنامج ليالى الخرطوم ولا ده ماأنت ؟؟؟

Quote: وعنيد يا عفاف وراسو قووى ..!!

كده بكون ظلم نفسه وفنه ..

Quote: بتفق مع ناذر واساسي الموضوع ما بتعالج كدا .. يعنى المسالة دايره دبلوماسية وعلاقة وثيقة جدا .. من زول محمود ممكن يستمع ليهو ويتقبل الكلا الشين دا منه وطبعا مافى شئ شيتن زى تقول لزول انت عيان ومحتاج علاج _ بغض النظر عن المرض _ اعتقد الموضوع بحتاج لوسيلة ارفع من كدا ..

انا بتفق مع اي واحد عايز يوصلنا لي حل لعلاج محمود من غير ما نجرح محمود ..

وانا ما قلته امشو دقو الباب لمحمود وقولوا ليهو انت زول ما قويم ونحن جينا نقومك ..

لالالا يا تبلدينا انا طلبته من انه اي زول بقدر يعمل شيء يعمله من غير تجريح لي محمود ..

وانا قلته شوفو الناس القريبين لي محمود عشان يوصلوا ليهو المعنى بطريقة ممتازه ..


يلا يا تبلدينا لو عندك اي وسيله ارفع زي ما ذكرته يبقى ده المطلوب ..

وماتنسوا يا اخونا افهمو قصد البوست ده كويس أنا طالبه مساعدة محمود من غير تجريييييييييييح ..

كلام الأخ وليد عبد اللطيف

هو المدخل الصحيح..

وقد ناقشت الامر مع طارق اللمين

ووعد بتجهيز جلسه هادئه مع محمود في بيت الفنون..

بس يا وليد ..

قبل الجلسة .. لازم نتلاقي ونحدد .. اهدافنا ووسيلتنا الغير جارحة


مع التحية

كلام الأخ وليد عبد اللطيف

هو المدخل الصحيح..

وقد ناقشت الامر مع طارق اللمين

ووعد بتجهيز جلسه هادئه مع محمود في بيت الفنون..

بس يا وليد ..

قبل الجلسة .. لازم نتلاقي ونحدد .. اهدافنا ووسيلتنا الغير جارحة


الاخ حنين ..

أسأل الله ان يوفقكم لما فيهو الخير .. والله اعلم بما فى قلوبنا ...

كل المقصود أن نطئين على محمود وأن يصبح فنه متواجد بدواخلنا ..

واكيد بيت الفنون مدخل ل>رع الخير فى شتى المجالات ..

نسأل الله بحق ه>ا الشهر العظيم ان ينعم محمود بالصحة ..

والحكومة رايها شنو هسي؟؟

يعني بس فالحة في إقامة حد السكر والجلد في الفاشر؟؟


موش ممكن بوست عفاف دا يخلي معالي وزير الثقافة ووفد من إتحاد الفنانين مصحوباً بقوة مداهمة مدججة بالسلاح يتحركوا في مهمةلاقتلاع محمود من مكان تواجده وما يسيبوهو إلا في أحسن مستشفى في الدنيا ويتلقى أفضل أنواع العلاج؟؟

معليش كلامي المشاتر دا والله أنا كتبتو وأنا قاعد أبكي والأغنية بتاعة خدعوك شغااااااااااالة...


لك الله يا محمود يا سميي

الحاجات العايز تعملها كلها عملتها

عايز تثبت إنك راجل شجاع.. أثبتها تماماً وبنسبة مليون في المية..

عايز تثبت إنك عنيد.. أثبتها تماماً بنفس النسبة..

ما محتاج تثبت إنك فنان عظيم.. دي أثبتوها الناس ومحبتهم ليك ولفنك..

بس كمان الناس ما مستعدة تديك قلوبها وتتفاجأ بعد داك إنك مستهتر بكل هذه القلوب..

الناس منحوك قلوبهم هذه المرة شفقةً وتعاطفاً ..

لأنك في المرة السابقة سرقت تلك القلوب المحبة لفنك ..

ياخي انعل أبو أي حاجة زاتو..

لن يستطيع احد انتشال محمود الا محمود نفسه

يجب ان يتخلص من العادات الضارة لان لياقته لا تسعفه لفعل تلك الاشياء


ركوب الفيل والخندريش تحتاج لي زول صبي

والراجل دا زي القشة ام روح

مالك الجاك ..

Quote: البوست يحمل فكرة خرقاء فأرجو حفظ ماء الوجه بطلب سحبه سريعا من السيد بكري

أنا كنت داير أصل للحتة دي في تسعة خطوات ويا دوب أنا في الخطوة التالتة ..!!

مالك منزلا تللللللللللللللل كدة ...!!

وليد :

Quote: والاعلان عن هذا الموضوع ممكن يعمل له شوشرة .

بالغت يا وليد .... يعني هسي الموضوع دا لسع ما معلن ؟؟؟!!

يا ناذر

هنالك بعض الأمور التي يحسن التدرج في طرحها

و لكن

* أن يجعل شخص نفسه وصيا على شخص آخر
* أن يظن شخص أنه أفضل من شخص ما
* أن يعلن شخص نيته في مساعدة آخر لا علم له به إلا من الوسائل الإعلامية في تشهير واضح
* أن يحدد شخص ما لآخر مرضه و علاجه و هو ليس ذو اختصاص


كل أعلاه يجعلني أن أصف فكرة هذا البوست بالخرقاء و هي صفة لا تتنزل بعد على أصحابها
إلا إذا استمروا في طرحها

نواصل طرح الفكرة ..


يا مالك الجاك ..

محمود ليس شخصا عاديا .. مثلك .. لكي نتدخل في خصوصياته ..


محمود فنان .. له معجبين ولدية قاعدة جماهيرية من كل الأعمار ..

اذن شخصية عامة ,,, او ثروة قومية يجب الحفاظ عليها .. ما استطعنا

ولن نألوأ جهدا في ذلك ..

وبصراحة .. موضوع الأعلان .. ومراعاة الخصوصية.. نحن متنبهين اليها جيدا..

اما كون هذا البوست اعلانا ..

فليس بقدر الاعلان عن حالة محمود يوميا .. في نجوم الغد .. وبأعلي نسبة مشاهدة ...


اذن ..

نواصل .... فكرتنا ...

Quote: محمود ليس شخصا عاديا .. مثلك .. لكي نتدخل في خصوصياته .. محمود فنان .. له معجبين ولدية قاعدة جماهيرية من كل الأعمار .. اذن شخصية عامة ,,, او ثروة قومية يجب الحفاظ عليها .. ما استطعنا ولن نألوأ جهدا في ذلك .. وبصراحة .. موضوع الأعلان .. ومراعاة الخصوصية.. نحن متنبهين اليها جيدا.. اما كون هذا البوست اعلانا .. فليس بقدر الاعلان عن حالة محمود يوميا .. في نجوم الغد .. وبأعلي نسبة مشاهدة ...

وهو كذلك

ناذر محمد الخليفة

Quote: بالغت يا وليد .... يعني هسي الموضوع دا لسع ما معلن

محمود ليس من رواد سودانيز واكيد للان لم يطلع بما مكتوب هنا
وحتى اذا اطلع ما مكتوب هنا مافيها حاجة والناس دي كلها بهمها محمود وبتحب محمود
وعلى راسهم الاخت عفاف الصادق معروف عنها في سودانيز لاتقصر بعمل الخير
وعلى قول واحد من الاخوان قال : اعضاء سودانيز متخيلنها ممكن تقلب او تغير حكومة

Quote: البوست يحمل فكرة خرقاء فأرجو حفظ ماء الوجه بطلب سحبه سريعا من السيد بكري

انت البالغت ياناذر اذا بتأيد فكرة البوست خرقاء وعايز توصلها لينا
في تسعة خطوات ومثل هذا الكلام عادي ممكن يتقال للفنان حتى واذا
قيل له في اجهزة الاعلام .
لانه اصبح ملك الجمهور وليس بغني في الحمام لنفسة ..
مثال : واحد مشى حجز عبد الله البعيو بتكليف في مناسبه تخصهم
وقال له اذا انت غنيت انا مابحضر الحفلة لاني لا احبك
عبد الله البعيو قال وهذا فعلا ما حصل لم يحضر الشخص الحفل
يعني عادي ياجماعة اشياء كثيرة بتحدث مع الفنانيين ...

البوست يحمل فكرة خرقاء

فأرجو حفظ ماء الوجه بطلب سحبه سريعا من السيد بكري

معليش ما قادرة اقتبس ..

لكن يا مالك يا اخوي ده رائك ورائك محل تقدير وإحترام ..

إذا فليعمل الباشمهندس بكري ما يراهو مناسب ..


المهم أنت تكون بخير .. وايضا محمود قلبنا عليهو ..

مودتى

..
.

Quote: تبلدينا .. كيف حالك ياخ .. شايفاك منور فى برنامج ليالى الخرطوم ولا ده ماأنت ؟؟؟

والله لقيتك شوافه .. اها ليلة عقد الجلاد ولا حسين شندى

-----------------

مع احترامى الشديد لحسن النية بتاعك يا عفه
واتفاقنا معاك بضرورة الوقوف مع الحوت ..
بعد ان تعاطف معه كل محبيه ومعجبيه .. اثر ظهوره الاخير
ولكن يبدو جلياً ان عدد من الاراء
اجمع ان هذا الاسلوب .. غير ناجح وقد ياتى بنتائج سلبية ..
انا شايف المسالة دى تتناقش عبر الهاتف او الايميلات ..
زى قروب الايميل .. عشان نبعد عن الاراء او الحساسية الامر
مجرد راى يعنى ..
وارى من لديه علاقة وثيقة بالحوت .. يعنى اقوى من معرفتنا به
ويود ان يفيدنا التواصل عبر الايميل ..
وممكن بعد شوية يكون فى مجموعة تتناقش بوسيلة اخر ببعيدة
عن لقاء المكاشفه هذا ..
for_sas@ yahoo.com

شكرا يا عفاف

والعايز اقوله بصورة جلية انه كلنا متفقين حول حوجة محمود للدعم في هذه المرحلة ولكن قلت سابقا ان الطريقة هذه غير مثلي
اقتراح الاخ تبليدينا عن انشاء قروب خاص او مجموعة بريدية هو الانسب والاسلم لحفظ ماء الوجه
مع المطالبة بحذف هذا البوست
فلو قراه محمود لاعياه الامر زيادة علي ما هو عليه

Quote: يا نابري .. مذكر أول مرة أقابلك في قاعة الصداقة ومعانا صاحبنا المشترك داك ..؟!! الزول داك عارف البير وغطاها .. عليك الله أمشي أسألو عن رايو في الحاصل دا .. وشوف حا يقول ليك شنو ..!!

يا ناذر يا فردة كيفك ؟

ياخ هو داك يوم بتنسي!!!!!!!
وما بمشي اسألو ولا حاجة لاني عارف رايوا حيكون شنو .

يا جماعة الخير كلام ود الجاك حار (احتمال) بس عاينو ليهو
بنظرة وزاوية تانية هي انو ما عايزكم تتكلموا وتعملوا
اعلام يضر بالهدف وكذلك اساسي ختاها ليكم وااااضحة وده كلامي
انا وكلام ناذر وكلام تبلدينا فياخ بتمني انكم تلقوا طريقة
تواصل لنقاشكم ده غير سودانيز اون لاين لانو سودانيز دي
(العربي الراكب حمارتو في )الصحراء بين سنار والدمازين
بيعرفه أو كما قال صاحبي مامؤن التلب.

والله من وراء القصد.

يبقى الحوت احد المبدعين القلايل الذي يملكون الموهبة .,,,

بعد ما قريت كل المداخلات في هذا الخيط ,,, حب الحوت يبدو في كل المداخلات وكذلك سماحة النية تجاه الحوت ,,,

واشير هنا الى مداخلات المقربين الذي يؤكدون صعوبة المهمة بالاضافة الى تحفظ البعض في عملية فتح بوست مثل هذا البوست الذي ربما تكون نتايجه عكسية ,,,

اقترح بانشاء ايميل للمجموعة ويسمح للحادبين على الامر والمقربين للحوت ,,,

للتواصل والبدء في خطوات عملية محكمة حتى لا تكون كسابقتها من المحاولات ,,,

اذا وجدت هذه الفكرة القبول ممكن انشئ القروب ونفتحه للحادبين بغيدا عن الخيوط ,,,

لكم محبتي ,,,

Quote: فلو قراه محمود لاعياه الامر زيادة علي ما هو عليه

المصيبة لو قروه معتوهي الصحافة الفنية ناس كابو ومن على شاكلته
العايشين على انقاض انسانية المشاهير و تتبع عوراتهم

والحق يقال :
محمود جانا فى هولندا دى
وقبل كل حديثنا وكان فيه الكثير مما يتناول خصوصياته
بس اعرفو تدخلوا للفنان الراقى الوديع محمود كيف.
ومنو البقوم بالمهمة دى.

والحق يقال :
محمود جانا فى هولندا دى
وقبل كل حديثنا وكان فيه الكثير مما يتناول خصوصياته
بس اعرفو تدخلوا للفنان الراقى الوديع محمود كيف.
ومنو البقوم بالمهمة دى.


ضياء الدين .. يسعد مساءك ..

ده خيط جميل جدا وبصيص آمل بان محمود يعرف انه فى ناس بتحبه ..

فعلا نحن قصدنا انه الناس توصل ليهو محبتنا ليهو اولا هو جزء من حياتنا ..

المصيبة لو قروه معتوهي الصحافة الفنية ناس كابو ومن على شاكلته
العايشين على انقاض انسانية المشاهير و تتبع عوراتهم

الموضوع يا ود البشري ما محتاج يقروهو هنا ..

الموضوع كان على فضائية وعلى الملا ..


والله العظيم محمود جبل أشم وما عايزنه يتهداء ..

محمود حقنا كلنا دخل بيوتنا وقدم لينا الفرح ..

يا عفاف ما قصدي حالة محمود نفسها
لكن اتخيّلي عنوان في صفحة فنية " اعضاء موقع الكتروني شهير يقودون حملة لعلاج .. إلخ "
قلت الكلام دا لأني قريت في عمود رئيس تحرير قوون اليوم تعليق عن اشادة موقع سودانيز اونلاين ببرنامح في فضائية قوون
الموقع مقري يا عفاف و قد يستغل من يريد اذى محمود المشاعر الطيبة و النية الحسنة المتوفرة هنا

عفاف الصادق


شكرا علي المبادرة التي اتت في وقتها تماما
شكرا دوما يامبدعة ومعك قلبا وقالبا للاخ محمود عبد العزيز درة التسعينات

محمود-----------ابشر اخوي جوك ناس الحارة زااااااااااااتها


شكرا عفاف

تسلمي الحبيبة عفاف وتسلم إنسانيك ورهافة شعورك
وكل عام وانت أسرتك بالف خير ..

الغرض الرئيسي من البوست دا هو مبادرة صادقة من الناس عشان تتفاكر وتتوصّل مع بعض لطرق أو طريقة تقدر "تحافظ" بيها على محمود عبدالعزيز وتحفظ ليهو فنه ومكانته العالية كفنان عظيم ليهو بصمتو الواضحة في أكتر من جيل ... والخطوة دي جات بعدما الملايين من الناس شافوه في حلقات أغاني وأغاني وأجمعت الغالبية العظمى منهم على أنو محمود بيمر بظروف إستثنائية صعبة وممكن تكون خطيرة ... وبالتالي من الواجب على الناس إنها على الأقل تقيق جنبو وتدعمو بالشي البتقدر تقوم بيهو!

إتضح من الناس القريبين من محمود أو البعرفوا عن محمود أشياء يجهلها العامة إنو المسلك دا ممكن يجيب نتائج عكسية سواء إنو محمود نفسه يرفضه أو ينزعج منه أو حتى يصيبو منه ضرر بصورة مباشرة أو غير مباشرة .. والرأي الأخير دا واحد من حسنات التفاكر في البوست دا لأنها فتّحت عيون الناس على أشياء ما كانت شايفاها كان ممكن تنسف المبادرة دي كلها .. وكمان قدمت بدائل قيّمة ممكن الناس تصل بيها لنفس الغرض الرئيسي! إذن رغم تباين الآراء لكن مافي واحد هنا رافض المبادرة دي من حيث المبدأ والمضمون وإنما المطلوب هو تعديل المسار وعدم التمسك بطريق أوحد للوصول للهدف المنشود خصوصاً لو الطريق دا ممكن ما يوصل الناس للهدف!

يبقى النقاش الآن محصور في: هل الناس متفقة على أن يتم إنشاء قروب خاص أو مجموعة بريدية مغلقة وقفل هذا البوست زي ما قال أساسي؟ أو تشوف إقتراحات تانية؟؟! لو الناس إتفقت يبقى يتم تكليف شخص بعمل القروب او المجموعة البريدية دي!


عذراً للإطالة

لا قروب خاص لا مجموعة بريدية ..!!

هسي يا أخوانا رايكم حا يكون شنو لو قلت ليكم محمود عبد العزيز بيرفض أي محاولة للتدخل في خصوصياتو أو تصرفاتو ..!!

حا تقولوا لا لا ولا علي كيف محمود وحا نوريهو الطريق القويم جوة عينو ؟!!

وكمان في مقترحات لتوسيع الشغلة ومجموعة بريدية وقروبات وبطيخ ..!!


يا جماعة .. أهندااااك بيت محمود .. العندو معاهو موضوع أو مناصحة يمشي ليهو في بيتو ويتكلم معاهو ..!!

أسلوب الناس الدايرة تطلع مظاهرات هنا دا ما بينفع ولا بيقدم ولا بيؤخر ...!!

Quote: ووعد بتجهيز جلسه هادئه مع محمود في بيت الفنون..

كدي النسمع ونشوف وعد محمود ....!!!

ناذر يا صاحب أخوي ... رمضان كريم وتصوم وتفطر على خير

Quote: هسي يا أخوانا رايكم حا يكون شنو لو قلت ليكم محمود عبد العزيز بيرفض أي محاولة للتدخل في خصوصياتو أو تصرفاتو ..!!

كلامك سليم يا ناذر ... هو من حقو يرفض (وأنا كتبت الكلام دا في أول مداخلة لي في البوست دا) .. ومن حقنا أننا نعبّر عن أهتمامنا بيهو ومحبتنا ليهو بالطريقة العايزينها طالما مافيها إيذاء وجرح لمشاعره ... عشان كدا معظم الناس هنا شبه متفقة على إيجاد المدخل السليم! حكاية المناصحة وخصوصيته دي يا ناذر الناس ما في زول جاب سيرتها هنا .. والناس ما ماشة تفرض عليهو حاجة بقدر ما عايزة تعرفه مالو وممكن تقدم ليهو شنو عرفاناً بالجميل ليس أكثر ولا أقل!

مودتي

اخي احمد حنين

راجع الماسسنجر

كلام زي السكر يا عفة

سلام للجميع

وانا لا لست بمعجب بالفنان محمود عبدالعزيز ولا اتذكر انني استمعت لاغنية كاملة له
ولا راي لي اساسا في غنائه
لكنه انسان في المقام الاول ولم يعجبني منظره في برنامج اغاني واغاني وحزنت عليه كثيرا

واذا عرف العجب بطل العجب

انتو دايرين صحتهايا كانت النفسية او العضوية تكون كويسة كيف وهو بنجلد في نص النهار؟؟

فنان ينجلد

فنان ينجلد

اعلم ان اهل المنبر فتحوا من البوستات ما يمكن ان يرفع من معنوياته حينها ولم يقصر الشباب
في المنبر

لكن هل فكرتم في معالجته حينها؟؟

تحياتي

Quote: الغرض الرئيسي من البوست دا هو مبادرة صادقة من الناس عشان تتفاكر وتتوصّل مع بعض لطرق أو طريقة تقدر "تحافظ" بيها على محمود عبدالعزيز وتحفظ ليهو فنه ومكانته العالية كفنان عظيم ليهو بصمتو الواضحة في أكتر من جيل ... والخطوة دي جات بعدما الملايين من الناس شافوه في حلقات أغاني وأغاني وأجمعت الغالبية العظمى منهم على أنو محمود بيمر بظروف إستثنائية صعبة وممكن تكون خطيرة ... وبالتالي من الواجب على الناس إنها على الأقل تقيق جنبو وتدعمو بالشي البتقدر تقوم بيهو! إتضح من الناس القريبين من محمود أو البعرفوا عن محمود أشياء يجهلها العامة إنو المسلك دا ممكن يجيب نتائج عكسية سواء إنو محمود نفسه يرفضه أو ينزعج منه أو حتى يصيبو منه ضرر بصورة مباشرة أو غير مباشرة .. والرأي الأخير دا واحد من حسنات التفاكر في البوست دا لأنها فتّحت عيون الناس على أشياء ما كانت شايفاها كان ممكن تنسف المبادرة دي كلها .. وكمان قدمت بدائل قيّمة ممكن الناس تصل بيها لنفس الغرض الرئيسي! إذن رغم تباين الآراء لكن مافي واحد هنا رافض المبادرة دي من حيث المبدأ والمضمون وإنما المطلوب هو تعديل المسار وعدم التمسك بطريق أوحد للوصول للهدف المنشود خصوصاً لو الطريق دا ممكن ما يوصل الناس للهدف! يبقى النقاش الآن محصور في: هل الناس متفقة على أن يتم إنشاء قروب خاص أو مجموعة بريدية مغلقة وقفل هذا البوست زي ما قال أساسي؟ أو تشوف إقتراحات تانية؟؟! لو الناس إتفقت يبقى يتم تكليف شخص بعمل القروب او المجموعة البريدية دي!

تسلم يا أمير ..

والله وراء القصد ...

أمير ...

Quote: ومن حقنا أننا نعبّر عن أهتمامنا بيهو ومحبتنا ليهو بالطريقة العايزينها طالما مافيها إيذاء وجرح لمشاعره

ما فيها إيذاء وجرح لمشاعر محمود ..

لكن فيها إيذاء وجرح لمعجبي محمود وأصدقائه العارفين قوة شخصية محمود وسطوته على رأيه ..

ودي هنا الإشكالية ..

Quote: ما فيها إيذاء وجرح لمشاعر محمود .. لكن فيها إيذاء وجرح لمعجبي محمود وأصدقائه العارفين قوة شخصية محمود وسطوته على رأيه .. ودي هنا الإشكالية ..

ياناذر انت جادي
ام بتدور الناس دي وبس

لكن فيها إيذاء وجرح لمعجبي محمود وأصدقائه العارفين قوة شخصية محمود وسطوته على رأيه ..


يا ناذر .. صدقنى ما قدرته افهمك يعنى شنو نجرح معجبين محمود ...

يعنى حا نجرح نفسنا !!! شيء عجيب ..


ودي هنا الإشكالية ..

الاشكالية فى عدم فهم البوست وغرضه أساسا ..


معليش عندي مشكلة اقتباس ..

يا عفاف ويا شباب ..

معليش أمكن ما قدرت أوصل الفهم صاح ..!!

لكن كلامي بيجيكم بعد ما نشوف الحايحصل شنو في أول جلسة مع محمود ...!!

Quote: هل الناس متفقة على أن يتم إنشاء قروب خاص أو مجموعة بريدية مغلقة وقفل هذا البوست زي ما قال أساسي

ياريت الناس تلجأ للسريه فى عمل الخير خصوصا اذا كان معنون لشخص ما
وانا بتفق مع اساسى فى سحب البوست ده طبعا اذا اختنا عفاف وافقتنا ويكون
سرييييع سريييييع >> والناس تتناقش من خلال الايميلات للذى يمكن فعله
>>>>>>>> انا شخصيا لو كنت مكان محمود عبد العزيز ما كنت
حاقبل مناقشة خصوصياتى بهذا الشكل مهما كانت المبررات
مع التامين على حسن النيه وعمل الخير الذى هو بدواخلكم
النقيه .........

+
كتييير من الفنانين ولانهم يملكون احساس آخر ليس كاحساسنا نحن
احساس مرهف شدييييد >> مروا بنفس التجارب و امكن اغلبكم
يعلم بذلك ( بدون ضرب امثال يا شباب ) ولكنهم دائما يرجعون
لمعجبينهم و عشاقهم و هم اكثر بريقا وباروع مشهد
وانشاء الله الفنان محمود عبد العزيز واحد منهم


احتراماتى للجميع

الاخ طارق مرغني


تم اللازم

سوف نوافيك بتفاصيل قريبا




..

يلا نرمي قدام ...

مع كامل احترامنا لكل وجهات النظر.. مهما اختلفت معنا ففيها تبصير لنا

مع ودي للجميع

انا شخصيا لو كنت مكان محمود عبد العزيز ما كنت
حاقبل مناقشة خصوصياتى بهذا الشكل مهما كانت المبررات

يا طارق يا قريبي .. يسعد مساءك

ياطارق انت فهمته المقصود من البوست ولا نشرحه تاني ..

انت ما تعاين للمداخلات الفهمتها منها البوست ..

ادخل اول البوست وافهمه كويس .. انا ما ذكرته انه محمود مريض ودخلته فى خصوصياته ..

يا طارق يا ود عمي كل ما فى الامر انه وضع محمود كان ملاحظ لاي شخص وكان فى فضائية عامة ..

يعنى انا ما شفته فى بيته او فى بئيته الخاصه .. بعدين انا ما طلبته من الناس تمشي وتقول لي محمود

انت غلط من اصلك ... يا طارق انا بكرر .. لاحظته انا وكل البشرية البتشاهد اغاني واغاني وضع محمود ...

وما رضيت نهائي بوضعه لانه بهمنى وضعه كفنان ملك لمعجبينه ...

يا طارق كدي راجع مداخلاتي كلها وشوفنى انا جرحته محمود بي شيء ولا اتدخلته فى خصوصياته ؟؟؟؟




طارق يا كوتش .. لك من الموده اطنان من هنا للعفاض ...

Quote: طارق يا كوتش .. لك من الموده اطنان من هنا للعفاض ..

تحية للجميع

أزمة محمود هي أزمة النور الجيلاني
وأزمة ابو عركي وأزمة كثير من المفكرين والشعراء والناس العاديين
هي أزمات الوطن الذي يوشك على الضياع ولا نملك سوى أن نتفرج
هي أزمة (أبكباس) الجاثم على صدر الوطن والناس
هي أزمة غول اسمو المؤتمر الوطني
هي داء اسمو الانفصال والتشرزم وذهاب ريحكم
يا اخوانا ما تستهينوا بالكلام دا
أنا شخصيا- كواحد من الناس العاديين-
الأزمة دي أثرت على حياتي وعلى أدائي العام في كل المناحي
وكلما اقترب العام 2011 استفحلت
محمود فنان مهموم بالوطن والناس والحرية
وأزمة محمود هي أزمة الوطن

Quote: وأزمة محمود هي أزمة الوطن

وازمتنا كلنا يا معاز ... الله يرفع محمود ...

بت الصادق >>> ده واحده من ردودك لاحد الزملاء

Quote: محمد النيل .. رمضان كريم عليك .. الحاصل انه محمود عبدالعزيز الفنان القامة زعلانين عليهو شديد لانه ظهر فى برنامج اغاني واغاني بصورة هزيله جدا وتدل على انه بعاني من شيئا ما .. وفى حلقة اخرى ظهر بنفس المستوي .. يعنى لا صوته ولا شكله زي ما كانو زمان ..

صوته اوكى شى عام باعتباره مغنى ... لكن شكله ؟؟؟؟؟
تعريف
الشكل هو حسب فهمنا بيشمل اما
1- صحة الانسان الجسمانيه > وهنا مستبعد والا كان وجوده
فى المستشفى بدل التلفزيون ليتلقى علاج الملاريا او ما شابه ذلك
وهو امر خاص وعمل الخير فيهو برضك بحتاج لسريه كاااامله .. او
2- اللبس و المكياج و التسريحه > وهذا الامر مسئولية مخرج البرنامج
ولا يحتاج لفتح بوست مثل هذا ............................................ او
3- صحة الانسان النفسيه > وهذا امر خاص وحساس جدا جدا ..........
...........
وبرضو ذكرت لك فى المداخله السابقه امكانية عمل الخير لوجه الله تعالى ولكن بسريه تاااامه
لان هذه الامور و المتعلقه بحدوث تغيير فى شكل اى بنى آدم تقع داخل حدود الاشياء الخاصه جدا و الحساسه جدا جدا


..........
عوض عيد بالله انت معانا هنا يا مراحب و اشواقنا كيمان

قريبي .. ود الكوتش .. بت الصادق ود بلال بترسل ليك السلام ..
وتعال النقول ليك بعد كلامك ده :

Quote: صوته اوكى شى عام باعتباره مغنى ... لكن شكله ؟؟؟؟؟

الفنان فنان .. بكل المقاييس بداية من الغناء ونهاية بشكله وهندامة و ا وا .. الخ

بس محمود كان صوته تعبان عشان كده كمحبين لمحمود لاحظنا الشيء ده ..

يعنى البوست ما كان من عدم أصلاً ..

Quote: - صحة الانسان الجسمانيه > وهنا مستبعد والا كان وجوده فى المستشفى بدل التلفزيون ليتلقى علاج الملاريا او ما شابه ذلك وهو امر خاص وعمل الخير فيهو برضك بحتاج لسريه كاااامله .. او

يا طارق يا اخوي انت ليييه ما عايز تقتنع انه محمود كان ظهوره بصورة هزيله ومشفقه ..

نحن متعودين على محمود صاحب البسمه الوديعه والنشاط الحلقومى .. محمود تعبه كان ظاهر ..

بعدين انا ما عندي اي شيء كيدي عشان افتري على محمود واشيل حاله ..

يعنى ذي ما ظهر على العامة فى فضائية بشاهدوها اكتر من مليون شخص .. ولاحظو الحاصل ..

انا برضو لاحظته الحاصل وقلته من غير خصوصية لانه محمود حق الكل ..

وعمل الخير ما بالضروري يكون بالخصوصية الانت قاصده لانى انا ما شلته قرعتى لى محمود ..

كل ما فى الامر طلبته من المقربين لى محمود يشوفو ماله ويعتنو بيهو اكتر ده كل ما فى الامر ..

Quote: - اللبس و المكياج و التسريحه > وهذا الامر مسئولية مخرج البرنامج ولا يحتاج لفتح بوست مثل هذا ............................................ او

يا طارق يا ود اهلي الحنان ..

عليك الله انا اتدخلته فى طريقة لبس محمود ولا اناقته . ؟؟

انا نهائي ما اتطرقته لاي طريقة لبس او تسريحة او غيره ...

بل بالعكس محمود كان ظهوره بكامل الاناقة .. انا ما عارفاك كتبته دي بالذات لييييه ؟؟

Quote: 3- صحة الانسان النفسيه > وهذا امر خاص وحساس جدا جدا ..........

لمن الانسان يكون عااااد ذيييي كده ممكن مرضه يخصه براهو او اصحابه الحوله ..

ذي حالة اي بوردابي او بوردابية هنا بتتوكع ويتفتح ليهام بوست للدعاء بالشفاء ..

كتار من الفنانيين مرو بوعكات صحية واعلنته كل الوسائل وتم علاجهم ورجوعهم ذي الفل ..

Quote: لان هذه الامور و المتعلقه بحدوث تغيير فى شكل اى بنى آدم تقع داخل حدود الاشياء الخاصه جدا و الحساسه جدا جدا

عاد يا طارق بااالغته البنى ادم ده ما أنسان صاح ... والإنسانية بتحتم علينا أن نراعي لي بعض ...

بمعنى أنه محمود إنسان وما إنسان عادي فنان بمعنى فنان .. أعطى الكثير والكثير جدا ..

ويكفى أنه أسمه بلمع فى أي مكان .. وكونه نراعى ليهو ونندخل فى خصوصياته ذي ما انت سميتها خصوصيات .

لانه ده من باب انه هو ملك لكل المعجبين ومن حقهم يشوفو فنانهم فى صوره بهية ..

وأكيد لو لا الحب البينهم ما اتدخلوا فى خصوصياته .. بما انه دي ما كانت خصوصيات .. اكرر ..


طارق .. واصل .. ثمح

عفاف
معك في مبادرتك معك من اجل محمود الانسان
ومحمود الفنان محمود الذي ادهشنا زمن طويل باغنياته المميزة التي سكنت الجميع
تحدث الكثيرين عن السرية ولكني لا اري في ماذهبت اليه الاخت عفاف مايدعو للسرية
نحن هنا بورداب الخرطوم وكل المشاهدين لاحظو الاجهاد علي محمود
وتسال الكثيرين مابال محمود ومافيه هل هو مرض نفسي ام جسدي ام ماذا وبغض النظر
عن ما الم بمحمود فيجب ان تكون وقفتنا معه لدعمه معنويا ونفسيا وكما ذكر احد الاعضاء محمود
لايعاني من مشكلة واعسار مادي محمود يحتاج للدعم النفسي واحسب وانا متابع للبرنامج انه بداء الاعياء
يبارح جسده فملامحه بدات تعود لطبيعتها وبدات علامات الاعياء تزول نترقب الحوت الذي نعرفه قويا
مبدعا صلبا مقاتلا بالكلمة والاغنية المتفردة واللونية الرائعة لاغنياته الجميلة
وبعد الغياب عاد الحبيب المنتظر عودا حميدا مستطاب

بالنسبه لصوته وهو الذى يعنينا :

الليله عمل ليهو حتة شغل
يعلم الله شغل يعجب
حاجه كده مبااالغه مباااالغه

اداء وصوت قوى بلونيته المعروفه

بالمناسبه كصوت مقارنه بالمجموعه هو رقم 1
وبدون اى منافس من باقى المجموعه
والكلام ده اكادوا اليوم بالدليل

ونشكر شهادة الملحن الكبير بشير عباس

يعنى حتى فى الصوت فاظنكم تسرعتم لان
الحكم فى برامج جماعيه صعب وغير عادل
والدليل اغنيه الليله .....................

...........
بت ابوى فتك بعافيه ونلتقى فى بوستات اخرى
ده طبعا غير الزياره الاسريه القادمه > بس خليك قريييبه
ولك من التحيات و الاحترامات اكواااام

بالنسبه لصوته وهو الذى يعنينا :

طارق ود اهلى ..

محمود كووووووله بهمنا صوته وشخصيته وكله شيء فيهو بهمنا ..

نحن عايزين محمود بتاع حلاته زننننننننوبة والصرخه العجيبة ..

عايزين الحوووووووووت قوي ويبلع كل الفى طريقه ..

-----------------------------------


محمود اليوم إبدااااع .. ايوه كده لازم محمود يلاقى تشجيييع زي بتاع بشير عباااس ده ..

الحووووووووت عاجبنه بكل شيء فيهو .. وبرضو بنطالب بالكل الوقفه مع محمود ..

عشان يبدع ذي اليوم دهى...

----------------------------------------




دحين يا قريبي زيارتك دي انا ما سامعابه من رمضان الفات ... يهون الله ..........ههههههههه