Post: #1
Title: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 08:49 AM
لا شك عندنا في غناك وإعجابنا بكـ
منذ أن كنت تغني ثلاثي في المرغنية بحري !!
بس خلي الجلابيه السودانية في حالها ما تهبشـا
بي حاجات كدا وشرائط وألوان تجعلها فاقده للهوية
خلي الجلابية بي لونها الأبيض والخالي من آي مواد لافته !
فهي ما تبقى لنا من وطناً عزيزاً علينا !
يعني الجلابيه دي زي العلم ونشيد العلم ما تستهون بيها و( تبلقعها )
دا طلب خاص لأنو دي حاجه ما ساهله البتعملو بيها دا !
كتير من الأجيال الحا تشوفك لابس الجلابية بالشكل دا
حا يتجهوا للسوق وهاكـ يا تفصيل زي جلابيتك !!
والله دي غيره على الزي الوطني بس ..
|
Post: #2
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 08:53 AM
Parent: #1
البرنامج في حد ذاتو إضافه للإعلام
وللفن ..
عبر الرائع السر قدور ..
بس السر قدور وسع لفة الكراسي !
مفروض يبدل في النوع ويخلي العدد ثابت !
|
Post: #3
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 08:59 AM
Parent: #2
أخوي الصغير ما بعيد لمن يمشي بعد يومين
يخيط جلابية العيد الجاي يخيتها بي شريط زي حق فرفور دا !!
وعيد الضحية حا يكون كل الناس لابسه جلاليب ما تفهما كيف كدا !
قبل فتره كان اللون هو الموضـــه !
هسع جابت ليها حاجات كدا عجـيبة
بقى في أقمشه جلاليب ! جلابيه والا فستان ما تفرزها !!
الجلابية دي عِـز نحنا نرتديهو وغيرنا عارف شنو في داخل الجلابيه دي !
|
Post: #4
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 09:07 AM
Parent: #3
يا فرفور ما تعاين للناس التانين
خليكـ في ورقتكـ بس
يعني ما تعاين لي ناس بيلبسوها كيف والا ناس ...
ما عندكـ عاصم البنا ما جاها بالسديري ...
|
Post: #5
Title: Re: يا فرفور ياخ خلي الجلابيه في حالها !!
Author: نعمات حمود
Date: 08-22-2010, 09:11 AM
Parent: #3
يا هشام مضان كريم ..
فرفور لم يرتديوما جلابيه في البرنامج دي لبسات باكستان وبنغلاديش وكدا
يعني بتات اول امس دي كانت اجنبية فما تخاف هو زاتو لابسها نتيجة تاثر ثقافات وكدا
اسالني انا ...
لك احترامي وانت (تغير على قيم الوطن
محبتي
|
Post: #6
Title: Re: يا فرفور ياخ خلي الجلابيه في حالها !!
Author: طارق ميرغني
Date: 08-22-2010, 09:17 AM
Parent: #5
مفروض يبدل في النوع ويخلي العدد ثابت !
ده المفروض يحصل اخي هشام
ثم جلابية فرفور دي غايظاني بشكل
ما عارف لانو نحن كبرنا وما بنستحمل التغيير في موروثاتنا شانه
شان التلاعب باغاني كبار الفنانين
ياخي طيب البس ليك حاجه في راسك الزي القنقليسه ده !!!!!!!
في بوست اغاني واغاني واحده من الزميلات حاضره الحلقه
سالت والدتها : يا يمه مش ده البيجي يضبح لينا الخروف في العيد؟؟؟؟؟
اها نبقي لي جنس ده!!!!!
|
Post: #7
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 09:58 AM
Parent: #5
Quote: فرفور لم يرتديوما جلابيه في البرنامج دي لبسات
باكستان وبنغلاديش وكدا |
يا نعمات ياخي لو لبسها بنغاليه والا باكستانيه عديل ما عدنا مانع
بس هو بيبلقع في جلابيتنا وجلابية أولادنا وأبواتنا !
شكراً لي مرورك يا نعمات ورمضانك كريم
|
Post: #8
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 10:09 AM
Parent: #7
Quote: ما عارف لانو نحن كبرنا وما بنستحمل التغيير
في موروثاتنا شانه |
والله يا طارق جلابية امس دي بس .. ( فُُستان حبشـية !!
وفرفور دا قاري جامعه ( يعني متعلم ) ولا بنصـقع ولا برضع العرقي ..!!
وفي راســو دا لو سوا ليهو طاقية سااااي يكون ما قصر
لأنو دي قناه تُشاهد في الدنيا كلها وبكون في ناس بيدعوا
أصدقاء ليهم غير سودانيين يشوفوا القنوات دي !
وكلنا بقينا نسمي قناة النيل الازرق قناة السودان
لأنو فيها شوية نضاره كدا وتنسيق برامجي ما زي ...
والشروق برضو بي جمالهم ورواكيبهم ديك ...
إنت فوزية جّدعـت العـده والا لسه ؟؟؟؟
|
Post: #9
Title: Re: يا فرفور ياخ خلي الجلابيه في حالها !!
Author: طارق ميرغني
Date: 08-22-2010, 10:20 AM
Parent: #8
إنت فوزية جّدعـت العـده والا لسه
انت عارف يوم فطور بورداب الرياض شلنا باسطه
الناس اكلت الصحن وخلت الباسطه!!!!
بعدين النسوان وقعن حجز في العده القديمه
لمن غيرت رايا
|
Post: #10
Title: Re: يا فرفور ياخ خلي الجلابيه في حالها !!
Author: وليد عبد اللطيف
Date: 08-22-2010, 10:39 AM
Parent: #7
الاخ طارق ميرغني ( ابو الفن )
Quote: ثم جلابية فرفور دي غايظاني بشكل
ما عارف لانو نحن كبرنا وما بنستحمل التغيير في موروثاتنا شانه
شان التلاعب باغاني كبار الفنانين |
الان معي واحد في المكتب قال والله صاحبك فرفور لابس جلابية بايخة جدا
طبعا نحن كشعب سوداني لانعرف ثقافة كل مكان وكل مناسبة ليها زيها الخاص
والملائم حسب البرنامج
الان تلاقي الحريم معنكشات بالدهب في بيوت العزاء واحيانا يعملوا ليهم حنة مخصوص
واسمع كمان ليها حنه مخصوصة في بطن الرجل
الرجال ممكن واحد يجيك بجلابية افريقية في التلفزيون او باكستانية
او ممكن يجي المكتب بجلابية والزرارة الفوق مفتوحة و الرقبة مكسورة ومن غير طاقية
ودي اشياء غير محببه ومنفره صراحة
ياخي المناسبات لها لبس معين
المكاتب لها لبس معين
بيوت العزاء لها لبس معين
لقاءات التلفزيون لها لبس معين
الحلة والجلوس في الكراسي لها لبس معين
---------------------------
هشام ابراهيم .. تصوم وتفطر على خير
|
Post: #11
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 10:49 AM
Parent: #10
Quote: الان معي واحد في المكتب قال والله صاحبك فرفور
لابس جلابية بايخة جدا |
أول : جيتنا هـنا متاخر ليه ؟ وتقديري ليكـ ..
تاني : يعني يا وليد انا ما غـلطان أهـو شاهـد من طرفكم !
تالت : كّلموهـو فرفور دا ..
|
Post: #12
Title: Re: يا فرفور ياخ خلي الجلابيه في حالها !!
Author: نادر النور آدم
Date: 08-22-2010, 11:00 AM
Parent: #11
سبحان الله أمبارح أثناء الحلقة اتكلمنا عن الموضوع دا في البيت
وفعلاً الجلابية شكلها مشوه تماماً
وغير كدة ما لابس معاها أي شي تاني / طاقية/ عمة / شال
أنا عن نفسي اعتبرتها عدم احترام للمشاهد والحضور المعاهـ
والزول الما بحترمك مؤكد إنك ما حا تحترمو
تحياتي
|
Post: #13
Title: Re: يا فرفور ياخ خلي الجلابيه في حالها !!
Author: طارق ميرغني
Date: 08-22-2010, 11:14 AM
Parent: #12
اخوتي وليد ونادر
لو حدث مثل هذا في زمن محمد صالح فهمي
او فهمي بدوي
كان طرد من الاستوديو
ما هو دور المخرج ولماذا يسمح بظهور فنان في برنامجه بهذا الشكل
|
Post: #14
Title: Re: يا فرفور ياخ خلي الجلابيه في حالها !!
Author: Tabaldina
Date: 08-22-2010, 11:28 AM
Parent: #13
..
.
صراحة فرفور _ صاحب وليد _ بقى يزودها ..
قبال كدا قلنا خفيف وبتخافف .. شوية كدا طلع عامل فيها سارح ما شغال بالاداء الكورالى
فى بعض المقاطع .. شوية كدت جايب ليهو بدلة بتاعت نواز شريف ..
حسي بقى يهبش فى الجلابية ويطرزها بستان لبنى ولا شنو ما عارف ..
ياخى انصحوهو الزول دا ..
-----------
جلابية زى فستان النوم
|
Post: #15
Title: Re: يا فرفور ياخ خلي الجلابيه في حالها !!
Author: Amany Elamin
Date: 08-22-2010, 12:03 PM
Parent: #14
أخونا هشام, ووليد وطارق ميرغني (أبو الفن),,
كيفنّكم ورمضان كريم,,
جلابية فرفور تطريزها غريب فعلا ومع ذلك ما مشكله التطريز, في ناس كتار بيطرّزوا طرف الشال أو العمه وشكلها بيطلع جميل,
المشكله في انه الجلابيه السودانيه زي قومي وعنده تبعاته, يعني لااااازم معاها طاقيه وياحبذا لو كان معاها شال,
لكن من غير طاقيه من باب بيتكم مفروض ما تطلع بيها, وجوه البيت لو جاك زول بتلبس طاقيتك حتي تمشي تسلّم عليهو,
مش طالع في التلفزيون بدون طاقيه !!!!!!!!
بعدين فرفور ده أكتر من يغنّي للمؤتمر الوطني تاني خلّي شنو ؟!!! 
|
Post: #16
Title: Re: يا فرفور ياخ خلي الجلابيه في حالها !!
Author: وليد عبد اللطيف
Date: 08-22-2010, 12:15 PM
Parent: #14
Quote: صراحة فرفور _ صاحب وليد _ بقى يزودها ..
قبال كدا قلنا خفيف وبتخافف .. شوية كدا طلع عامل فيها سارح ما شغال بالاداء الكورالى
فى بعض المقاطع .. شوية كدت جايب ليهو بدلة بتاعت نواز شريف ..
حسي بقى يهبش فى الجلابية ويطرزها بستان لبنى ولا شنو ما عارف ..
ياخى انصحوهو الزول دا ..
-----------
جلابية زى فستان النوم |
هههههههههههههههه
تبلدينا ياخي ضحكتني ضحك شديد
لكن زمان لما كنت معه في السودان لو طالعين حفلة
لو اي شيء ماعجبنا بتكلم فيهو
الان ياخي احيانا كلمات اغاني يحذفها يقول بقرار من لجنة النصوص
اقوم ازعل ادقدق ليهو تلفونات
اقول ليهو ياخي يا تغني الاغنية زي ماغنوها اصحابها او تخليها لاتزيد ولاتنقص كما قال ( العطبراوي )
تبلدينا ان بقت على اللبس هين
|
Post: #18
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 12:52 PM
Parent: #14
| Quote: جلابية زى فستان النوم |
أقرب ليـ كلامكـ دا
تبلدينا
كنا نتمنى مروركـ علينا في بوست احسن من كدا ،،
|
Post: #17
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 12:49 PM
Parent: #12
Quote: أنا عن نفسي اعتبرتها عدم احترام للمشاهد
والحضور المعاهـ |
دا كلام سليم يا نادر وسلمت من كل بليه ورمضانك كريم
|
Post: #19
Title: Re: يا فرفور ياخ خلي الجلابيه في حالها !!
Author: Hisham Ibrahim
Date: 08-22-2010, 01:03 PM
Parent: #17
Quote: جلابية فرفور تطريزها غريب فعلا ومع ذلك ما مشكله
التطريز, في ناس كتار بيطرّزوا طرف الشال أو العمه وشكلها
بيطلع جميل, |
يا اماني اول تقديري لعبورك من هنا
وتانياً : كيف التطريز ما مشكله ؟
مشكلة ونص لمن يكون شكلها بقى زي ما كتبت انا هنا وكتب غيري !
وزيق في الأطراف والكرشليت ( محل الزراير) ... ( فُُستان مُرضع )
زي البرامج دا خلاص تاني ما بتزحزح من اليوتيوب والا من تسجيلات القناه نفسها !
بعد 50 سنه نحنا بره الفلم ، عيالنا يشوفوا الجلابية يقولوا عليها شنو ؟؟
حقو ما نحرف موروثات أصـيله تبعنا !!
|
|