يا خوانا عليكم الله..لو لقيتو ليكم سوداني..عرفوني بيهو !!!!!!!!!

بالمناسبة..انا ما مغترب..

وكمان..ما مهاجر..

انا ساكن في شمال بحري..

أظني..المواطنين الهنا سودانيين..
.
.
وكمان بمشي لحاادي الخرتوم..
وباحوم فيها..
وأظني .. المواطنين الحوالي سودانيين..
.
.
لاااكن..ما أظني!!!
.
.
ليييه؟؟؟؟

باقعد مع جماعات مختلفة من الشباب..

تلقاهم بسبو وبلعنو، ويقولو:

ما أصلو السودانيين ديل مرض!!!!

.
.

أمشي اقعد مع جماعات من المهندسين..يقولو لي:


ما اصلو السودانيين ديل شعب متخلف..وما ما عندهم اي مقدرات فنية!!!
.
.
وكتير منهم بقو يجيبو عمالة فنانة من بلاد برة..
.
.
.
وتاااني؟؟

نواصل...

ولا يقول ليك السودانيين ديل شعب كسلااااان!!!
.
.
.
المشكلة كل الكلامات دي يقولوها في وجودي..

تعرفو السبب شنو؟؟؟

أولا كل البيقولو كدة ما سودانيين..لأنهم لو سودانيين
حا تشملهم كل الصفات دي..
والتاني.. انا ما سوداني..
لأنو لو كنت سوداني.. كان ما شتمو شعب السودانيين الأنا منهم قدامي..
.
.
.
نواصل

ولا الواحد يا خد ليهو يومين تلاتة برة السودان..ويجي يقيف في صف

جوازات المطار..ويبدأ يتأفف..

خلاس رجعنا للشعب المتخلف دة..أفففف

و لا يقول ليك..

دة جو دة؟؟؟

نحنا عندنا هناااك.......في وفي وفي..

وفقا لملاحظتي يا خوانا..

انا البقعد معاهم كلهم ما بيحسبوني سوداني..لأنهم بشتمو السودانيين في وجودي..

وتانيا كلهم ما سودانيين..لأنو ما ممكن الواحد يشتم نفسو !!!!!

فعليكم الله لو لقيتو ليكم واحد من الجماعة ديل شاورو لي عليهو..

لأني اكتشفت اني بعد عمري دة كلو ما لاقيت الناس الإسمهم( السودانيين) ديل !!!!

وين يا علاء رمضانك كريم

الراجل غادر القرية لزيارة خالته في اطراف العاصمة وقعد سبعة يوم وعاد للقرية

الظاهر طبعو خرب مشي الدكان اظنو اتعود في الخرتوم كل يوم ياكل جبنة

لف دكاكين كل الحلة ما لقي جبنة وقال

انعل ابو دي حلة جبنة مافيها

حالتو مشي اطراف العاصمة ما عارف لو مشي المنشية كان قال شنو

وقس علي ذلك

رمضانك اكرم يا خليل..
قلت لي دة نكر بلدو بس بزيارة اطراف الخرتوم؟؟؟

عليك الله ساعدني في تذكر السبايب البنسبها للشعب التخيلي الإسمو السودانيين دة..
تعرف حركة ظريفة:

تطلع برة (السيستم) تشتم..وترجع راجع!!!!!

Quote: تطلع برة (السيستم) تشتم..وترجع راجع!!!!!

المغترب جاء الحلة لقي الجماعة كلهم عندهم ملاريا

قال ليهم هووي دا جوع ساكت

بعد تم شهرين وفلس ضربتو ليك ملاريا ابو طيرة

من سخانة الملاريا لما بقي (يرعف ) رعاف شديد

جاهو عمك يس يكفر ليهو وعمك يس دا (تمتام ) قال ليهو


ما ما ما قلت دا جوع ساكت انت انت مالك

شريحه بسيطه من السودانيين الزعلانين
بعد ما يتبلبلوا > طوالى بيقولوا ليك >









انعل ابو ده بلد الكلها مطر

Quote: انعل ابو ده بلد الكلها مطر

كوتش سلامات..ورمضانك كريم..
.
الواحد هو وجوا يشتم..بس الطيارة ترك بيهو في مطار برة يبدأ يتنخج ويقشقش في مخاخيتو..الحنية
كاتلاهو..
ياخد ليهو سنة يدلي البلد..يقول ليك..جينا للبلد القرف دي!!!!
.
.
الجوة يشتم في السودانيين والبرة يشتم في السودانيين..

عليكم الله وروني..السودانيين البتشتمو فيهم ديل منو؟؟؟؟؟!!!!!

ممكن كل واحد يسأل نفسو السؤالين ديل:

- كم مرة شتم الشعب المسكين الإسمو السودانيين؟؟
- كم مرة شتم البلد المغلوب الإسمو السودان؟؟

سلامات يا حاج علاء

الناس البتشتم السودانيين .. وهم سودانيين ( بغض النظر عن ماهية الانتماء)
كلامهم فيهو منطق واحد..
انو الواحد البشتم اهلو وناسو اصلو .. احق بانه يُشتم
وهو الحصل ؛ انو لما شتم ما شتم الانفسو البتستاهل الشتيمة

السودانيين النحن ما منهم
والسودان الما حقنا

Quote: بلادي امان بلادي حنان وناسا حُنان يكفكفوا دمعة المفجوع يحبوا الدار يموتو عشان حقوق الجار يخوضو النار عشان فد دمعة كيف الحال لو شافوها سايلة دموع ديل اهلي ديل اهلي يبدو الغير علي زاتم يقسموا اللقمة بيناتم يدو الزاد حتى ان كان مصيرم جوع ديل اهلي البقيف في الدارة وسط الدارة واتنبرواقول للدنيا ديل اهلي عرب ممزوجة بي دم الزنوج الحارة ديل قبيلتي لمن ادور افصل للبدور فصلي اصحاب روحي والاحساس وسافر في بحار شوقم زمان عقلي اقول بعضي الاقيهم تسربو في مسارب الروح يقو كلي محل قبلت القاهم معاي معاي زي ضلي وكان ما جيت من زي ديل واسفاي وا ماساتي وا زّلي تصور كيف يكون الحال لو ماكنت سوداني واهل الحارة ما أهلي

للاسف ده الواقع المرير البعض لا يعرف قيمة معنى ان يكون لك وطن
ما اجملك يا سودان رغم وجود الكيزان

يا اما شتائمنا دي حقايق، وبالتالي الشعب دة محتاج لعلاج سريع...

أو الكلام البتقال دة افترا علي شعب كامل وبالتالي البيرددوه محتاجين
لبتر او علاج..

شكرا خطاب..
شكرا وليد.


نواصل،،،

Quote: أو الكلام البتقال دة افترا علي شعب كامل وبالتالي البيرددوه محتاجين لبتر او علاج..

الاخ علاء...رمضان كريم

هى ثقافة مجتمع....حالة نفسية...استهجان ...صرخة ...كبت وضيق

بالمناسبة انا سمعت شعوب كتيرة بتسب وتلعن فى نفسهاعلى منوال اياك اعنى فاسمعى ياجارة

تم الالغاء للتكرار

الاخ/ علاء الدين
نخلتف في كل شئ
لكن يجب أن نجتمع
علي حب الوطن ووحدته
اللهم أدم الامن والاستقرار والرخاء
ربوع بلادنا الحبيبه

Quote: بالمناسبة انا سمعت شعوب كتيرة بتسب وتلعن فى نفسها

أخونا حامد..
ما في شعب ما فيهو عيوب..وما في انسان ما فيهو اختلاف من اخوه الأنسان..
وقمة الحضارة انو الناس تناقش عيوبها بالواضح عشان تصل لنقاط الإختلاف..

دي ما المشكلة..
المشكلة انو اي واحد فينا لمن يبدأ يشتم في الشعب المسكين دة اول حاجة بيعملها
انو يطلع نفسو منهم..يقول ليك (ما اصلو السودانيين ديل...) كانو هو جايي من المريخ..
ولا اقول ليك عشان ناس خليل ما يزعلو..كأنو جايي من (الهلال)!!
.
.
المصريين مثلا لمن يحبو يتكلمو عن عيب فيهم يقولو:
(دووت احنا المصريين...)..يعني هو جوة!!!!

Quote: نخلتف في كل شئ لكن يجب أن نجتمع علي حب الوطن ووحدته

عبدالرحيم..انا معاك نختلف..لأنو لو ما اختلفنا ما بنكون مجتمع من أصلو..

لكن لمن نحب نظهر سيئاتنا، ما نتنصل منها ونعمل فيها نحنا ما معاهم!!!
الوطنية بتبدأ من هنا..الإعتراف بالإخطاء ولو علي أنفسنا..

ما في مجتمع مثالي..
وما في مجتمع ما فيهو عيوب..

لكن ما صاح انو الناس تعمل فيها انها (ما مننا)..

علاء الدين
رمضان كريم

ياخي مافي زول بيشتم نفسه ويقول ( نحنا شعب متخلف ومرض ...الخ )

تانيا الزول ما بيشوف عوجة رقبته تلقاهو مكمل الغلط ويقعد ينظر ويسب التانين


انا برجع الحكاية دي لي انه انحنا شعب سلبي ما بنراجع اخطاءنا ونصلحها طوالي نبدا النقه

ولكن لو جيت للجد (انحنا ) شعب يمرض



تحياتي لك ولكل اهل ام القري

الرائع علاء الدين وكل المتداخلين:بوست اكتر من رائع
مثلك اخي ناقشت هذه المشكله-ان صح تسميتها كذلك مع الكثيرين-
والعجيب نفس الاشخاص الذين يشتمون السودانين...يمكن ان تسمعهم بعد لحظات من ذلك وهم
يجعلون من السودانيين افضل جنس في العالم:الافارقه...ديل عبيد ما بفهمو
اخليجين ديل عرب متخلفين...المصريين الحلب الما عارف شنو...الخواجات ال....
ونحن الرواد في كل المجالات!!!!!
هم البسوك دثار خز ناعم الانغام....
سموك تاج العز...فخر العز.. عز العز...صبو في دماك عصاره الكذب المخيف
المشكله في رائي ذات شقين:
اطلاق الكلام علي عواهنه وهذه سببها الاساسي البداوه وغالبييتنا ما زلنا بدو_عرب ساكت_
وان سكنا في المدن وتعاطينا مع التكنلوجيا-ترييف المدن
والمشكله الثانيه:مشكله مركبه ما بين السياسه والاداره والثقافه,فالسودان منذ استقلاله وحتي الان
لم يستقر سياسيا...ونتيجه لذلك تدهور تدهور مريع في الجوانب الاداريه...وبهت صوره الشخصيه السودانيه
ورجعنا القهقري الي زمن القبيله وخشم البيت!!!!!
ما هو الحل؟؟
نواصل انشاء الله

Quote: والمشكله الثانيه:مشكله مركبه ما بين السياسه والاداره والثقافه,فالسودان منذ استقلاله وحتي الان لم يستقر سياسيا...ونتيجه لذلك تدهور تدهور مريع في الجوانب الاداريه...وبهت صوره الشخصيه السودانيه ورجعنا القهقري الي زمن القبيله وخشم البيت!!!!!

ابو هريرة ...كلام جميل يعنى الموضوع اكبر من تراشق بالالفاظ وشتائم

ونواصل

الاستاذ علاء لك التحية و التقدير و رمضان كريم

أعتقد ان المسألة لا تخرج من كونها تقليد اعمى ..

فيسمع المرء شخصا ما يتحدث بطريقة ما

فيقلده فى اليوم التالى

, طبعا ده لو ما بدأ فى تقليده بعد دقيقة واحدة

"مجردانتهاء الاول من كلامه" .


_____________

التعدل بسبب التصحيح

Quote: ياخي مافي زول بيشتم نفسه ويقول ( نحنا شعب متخلف ومرض ...الخ ) تانيا الزول ما بيشوف عوجة رقبته تلقاهو مكمل الغلط ويقعد ينظر ويسب التانين

رمضان كريم يا بكري..

تتفق معاي انو ما في فرد وبالتالي ما في شعب ما عندو عيوب؟؟

المشكلة ما في العيب..المشكلة في التنصل الفردي من العيوب الجماعية!

علما بانو كل شئ نسبي..

هل ممكن نبقي صادقين ولو مع انفسنا؟؟؟؟؟؟؟؟؟؟؟

الشحنات السالبة بتقود لنتائج سالبة..

اخوانا في الخليج بيكونو عارفين كيف في صراع الوجود هناك بيستغلو ضدنا
ما بنرددو عن انفسنا (الكسل)، لحد انو بدلا مما كان زمان السوداني بيمتاز
بالأمانة، حسي بيقي (كسلان) لحد يقول ليك اول حاجة يعملها السوداني لمن يصحي
من النوم، يرتاح شوية..
.
.
اي فرد بيضع قدامو مثال، ويمشي عليهو، وكذلك الشعوب..

الأخ قريمان..رمضانك كريم

فعلا التقليد الأعمي كارثة..
اي مجتمع عندو مميزاتو الخاصة الممكن ما تكون مقبولة في مجتمع تاني..
ما لأنها ما كويسة، ولا لأنو المجتمع التاني ما قبلها عشان هو متخلف..
لكن بس عشان هم مجتمعين مختلفين......وكذلك الثقافات القبلية..

الأخ العزيز ابوهريرة..

Quote: مثلك اخي ناقشت هذه المشكله-ان صح تسميتها كذلك مع الكثيرين-

هي ما مشكلة وبس..هي كارثة..

الحضارات بتبدأ صياغتها من (صغار) الكلمات..وكذلك (زوالها)..

نحنا بنحطم في أنفسنا من دون وعي..

Quote: لم يستقر سياسيا...ونتيجه لذلك تدهور تدهور مريع في الجوانب الاداريه...وبهت صوره الشخصيه السودانيه ورجعنا القهقري الي زمن القبيله وخشم البيت!!!!! ما هو الحل؟؟

طول ما عندنا رغبة في اننا نكون عايشين كسودانيين، لازم يكون في حل..

الحل بيبدأ من الصدق مع انفسنا، ورغبتنا الجادة في ايجاد حل..

هل الصفات البنقول فيها دي فعلا فينا؟؟

هل فعلا هي صفات سيئة؟
هل فعلا عندنا رغبة نغيرها؟؟

لو دة كلو في..يبقي في الأول نرصها كلها قدامنا ونعرف اكتسبناها من وين، ونعرف
عاوزين نكون شنو......

Quote: والعجيب نفس الاشخاص الذين يشتمون السودانين...يمكن ان تسمعهم بعد لحظات من ذلك وهم يجعلون من السودانيين افضل جنس في العالم:الافارقه...ديل عبيد ما بفهمو اخليجين ديل عرب متخلفين...المصريين الحلب الما عارف شنو...الخواجات ال.... ونحن الرواد في كل المجالات!!!!!

العزيز ابو هريرة..

دة انفصام شخصية عدييييل..
.
.
.

سلامات علاء ورمضان كريم
كثير من السودانيين الـ فى نيورك عندما تجمعهم مناسبة ينزلوا شتيمة فى البلد والحكومة ويرجعون سبب تخلف البلد الـلى هى السودان الى انعدام الحرية والديمغراطية ويقولوا لو كان السودان فيهو حرية وديمقراطية كان الناس ابدعت وكانالناس عملت وعملت وعملت وعملت. انا دائما اقول لهم :
اها انتوا العايشين فى بلد الحرية والديمقراطية دى عملتوا لنفسكم شنو?
والله ياعلاء الدين لينا سنين نجمع فيهم عشان نعمل رابطة تخدم الناس الـ مقيمة فى نيويورك غير تكسير المقاديف مالقينا منهم شئ ,, بس فلاحتهم السفير قال السفير فعل السفير ترك ,, المؤتمر الوطنى خبز والمؤتمر الوطنى رمد ,, ياخوانا نحن دايرين نعمل حاجة للناس القاعدة هنا السياسة ماعندنا بيها دخل ,, راسن والف سيف علا السياسة تنحشر وسطهم ,, وسبحان الله كل واحد فيهم عندو حل لمشاكل السودان وبيفهم فى السياسة.
علا تحت تحت ياعلاء ورنى السمح عندنا شنو عشان انت تزعل قدر ده ,, امسكها من الكورة لغاية التعليم ,, بس عيب الناس اللى انت بتقول عليهم ديل انو الواحد فيهم بسل نفسو من الموضوع زى الشعرة من الخمارة.
انا فى راى نجيب وزراء محترفين ونديهم الجنسية السودانية زى ناس كلتشى وده لزوم الإحتكاك الإدارى وكده ,, وكت اصلو نحنا غلبتنا.

الأخ الفاضلابي:

Quote: ياخوانا نحن دايرين نعمل حاجة للناس القاعدة هنا السياسة ماعندنا بيها دخل ,,

Quote: علا تحت تحت ياعلاء ورنى السمح عندنا شنو عشان انت تزعل قدر ده ,, امسكها من الكورة لغاية التعليم.... . ز . . ,, بس عيب الناس اللى انت بتقول عليهم ديل انو الواحد فيهم بسل نفسو من الموضوع زى الشعرة من الخمارة.

أخونا عبدالعزيز..

وفقا لمشاركتك، انت من المهاجرين..مش كدة؟؟؟!!!

امريكا بتفرق من دول الخليج في انها بعد زمن معين واجراءات محددة بتحولك لمواطن كامل..صاح؟؟

نفترض انك مواطن امريكي كامل الحقوق..
هل نسيت وطنك؟
هل حاولت تتخلي عنو؟؟..طبعا انا جوابي انو (ما اظن).. لأنو الإنتماء بينمو مع الأنسان، يعني اولادك قطعا انتماؤهم
حا يكون لوطنهم (امريكا)، والحاجة دي ممكن تأرقك وتأرق كثيرين امثالك..
عشان كدة انا زعلان..لأنو عندنا البلد الممكن يلمنا لكن بنشيل ونشتم فيهو، بدل ما نحاول نصلح نفسنا....

والواحد بيشتم وزي ما قلت ينسل زي الشعرة من الخمارة..مش كدة عيب؟؟؟

لو لقيت ليك نفر معاك وحاولتو تعملو حاجة مفيدة للجماعة الهناك..الناس بتبدأ تتلم..لأنو الإنسان بتحركو المصلحة
وليس العواطف...

الأخ علاء الدين محمد بابكر ... سلامات ولك الشكر على غيرتك على الوطن وسكانه. إليك هذه القصة التي حدثت في طرابلس الغرب في العام 1982. لا داعي للأسماء لأنها شخصيات أصبحت معروفة. زرت صديقي الذي كان يعمل طبيباً في مستشفى في طرابلس ليبيا. صادف تلك الأيام وصول عمالة سودانية للعمل في بلدية طرابلس ككناسين للشوارع وجمع القمامة. أشهد الله أن أولئك العمال كانت ظروفاً قاهرة جعلتهم يقبلون بتلك الوظائف. كنت عندما أمر أمام أحدهم تجده يتجه الجهة الأخرى محاولاً إخفاء معالمه حتى لا تعرفه، خجلاً من وظيفته والتي أعلم أنها وظيفة شريفة ومال حلال.
وجدت شخصاً سودانياً يقوم بالحلاقة لصديقي الدكتور. كان الرجل ماهراً في عمله. قلت له من باب المداعبة: حقو يا فلان تفتح ليك دكان حلاقة في طرابلس لأن الحلاقين التوانسة ما بعرفوا يحلقوا شعرنا الخشن دا. ردّ الرجل بصلف وغرور كبيرين بدرجة أذهلتني. قال: ديل سودانيين الكرور ديل. ديل الواحد ما يتشرّف يسلِّم عليهم. شغالين أعمال واط.... واصل مكملاً: أنا لي سبع سنين في ليبيا ولم أتعرف على أي سوداني جديد. ولا يشرفني أعرف النوع دا من الناس.
كلام الزول حرقني ولكن قلت الصبر طيِّب. سأبدأ معه بالمنطق وأكمل معاه بالفارغة والمقدودة. سألته قائلاً: قلت ليك كم سنة ولم تتعرّف على سوداني واحد، ما هي مواصفاتك لتتعرّف على السودانيين؟ وسأبدأ لك بنفسي يا ترى هل أنا ممن يستحقون معرفتك أم لا؟ وصفت له نفسي قائلاً:
أعطيته الاسم كاملاً. مكان عملي: شركة بترول أمريكية تعمل في ليبيا. تخرجت في الجامعة. درست هندسة بترول في هيوستن بتكساس. أمي بت عم أبوي. حافظ في القرآن لحد سورة النور. طولي مترين. ووزني 90 كجم. أها أنا دا بستحق معرفتك ولا كيف؟ لم يجر جواباً.
وفي نبرة تحد لأن الراجل زعلني قلت له: إنت ما قريت في الجامعة. ولا قريت في المعهد الفني.(على زمننا لا توجد جامعات- كانت هنالك الجامعة والفرع والمعهد الفني (اسمه جامعة السودان حالياً). وأتحداك جيب شهادة مرتبك ومرتب الدكتور البتحلق ليهو دا وصاحبو القاعد معاهو دا وأجمعها كان ما لقيت مرتبي أكثر منها جميعاً أنا أديك مرتب شهر. وأنا مرتبي بالدولار وإنت بتاخد بالدينار. وأتحداك أثبت أنك عندك فلوس في أي بنك في العالم والله لو الشيكات الشايلها في جيبي ما طلعت أكتر من رصيدك أعطيك إيّاها. يا أخي ما تخلّوا الخلق لخالقها.
تدخل صديقي الدكتور وحاول فض الإشتباك. فقلت له: يا دكتور فلان نحن من ابناء الريف. أتيحت لنا فرصة التعليم ووجدنا وظائف ممتازة، لكن ما هي الوظيفة المناسبة لزول لا يفك الخط ورمت به الظروف في الغربة؟ يشحت أم يسرق؟ الناس بتخدم ضراعها فلماذا يتنمّر عليها مثل صاحبك هذا ... هو كان زولاً فاهم ما بقيس الناس بوظائفها. أنت سيد العارفين جراح المخ يحتاج للزبال أكثر من حوجة الزبال له. وعليه قِس. كثيرون بُلي بهم الوطن يتأففون منه وهم لا حيلة لهم غيره. أعتبرهم مساكين وفاقدين هوية. خاصة أن الإغتراب ساوى بين الناس حيث أصبح الإغتراب مهنة. العريس شغال شنو؟ مغترب. والآن جات موضة المهاجرين. واحدين أتوهموا لدرجة أنهم بهجرتهم أصبحوا حاجات تانية حامياني. والواحد فيهم ما عرف التكتح وكمان جايي يتفاصح ويقول شنو وشنو ما عارف.
وأخيراً أقول لك: لو لم أكن سودانياً لتمنيت أن أكون سودانياً. وأهل الحارة ديل أهلي. والوطنية مربوطة بالفهم والفهم قسمة ونصيب. قول يا كريم وربّك يُسهِّل. وفتناك بعافية على أمل أن يصحى ضمير الموهومين

كبـّـاشي الصـّـافي

(العوج راي والعديل راي)