Post: #1
Title: يا ناس الشيشة سيبوا الخرطوم والله النظام العام ليكم مكتوب
Author: بلدى يا حبوب
Date: 08-07-2010, 03:07 PM
والي الخرطوم أعلن عن قرار حكومة الولاية بمنع تدخين وتداول الشيشة فى الأماكن العامة والشوارع والساحات وعدم التصديق بأي محلات تقدم الشيشة
وبارك رئيس الجمهورية خطوة ولاية الخرطوم بمنع تدخين الشيشة فى الأماكن العامة
المصدر سونا
----------
والى الخرطوم الخضر ده فى القضارف منع اكياس النايلو وفى الخرطوم ودخل الباصات الخضر المتل جرادة الخريف (الطهارة)وللناس الما بتعرفها هى جرادة طويلة الساقين واليدين محل الكفين تحمل مشرطتين وفى زمن الخريف الكان بقوم السنمكاوالحنضل وكمان التبش البشوفه حسه معروض فى مكان الخضارات فى الرياض والمنشية بالخرطوم وحى الروضة وامتداد بيت المال بامدرمان كانت الجرادة لو قرصتك ما عليك الا تشيل دفتر الشفخانة بتاع الطلاب وتتحصن بحبوب السلفة على فكرة زمان السلفة وليس السفه ما اجى واحد من الحناكيس ويقول ناس زمان كانوا بتعالجوا بالسفة او يكون فى زول خرمان فى الشتات يقراها غلط ويقوم يهاجم تعرفوا الزول لو عنده طه القرشى او صداع او وجع بطن بسبب اكل الشطه مع دقة القنقليز واكثر الاطفال كانوا مداومين على اكلها وديل اولاد الحارات اما اولاد الملازمين وحى العرب والمسالمة كان وجع البطن بجيهم من اكل التفاح ابو خمس بتعريفة فى سوق امدرمان وده حسه اصبح موقف خاص لعربات اى مرض كانوا بعالجوه بالسلفه الامريكية يا حليل زمن العلاج مجانى ومربة السمك البدوها زيادة لزوم صحة المريض .
باصات الوالى هى الاخرى بتهاجم ولها جسم طويل ومقدمة متوحشة متى راتها حافلات الخرطوم بتجنب على طول ومدلعة بتمشى جنب النيل وتقطع جسر امدرمان الخرطوم وفى كبرى المك نمر الطريق ليها مفتوح وما تنسوا ضربتها موجعة على الجيوب كل حاجة بجنيه لو نازل الدايات او عوضية للاسماك او السلاح الطبى انا ماعارف الجنيه ده محسوب نص للتذكرة والنص الاخر تكييف والله شنو يا جماعة اهو الخضر جاب الباصات الخضر (بضم الخاء والضاء )
نجى لناس الشيشة الطلع قرارها فى افتتاحه لمجمع خاتم المرسلين بمنطقة جبرة : رئيس الجمهورية يشيد بخطوة ولاية الخرطوم بمنع تدخين الشيشة فى الأماكن العامةتتاح جامع بجبره وده دايره الواحد ياخد نفسه شوية وارجع تانى
نواصل
|
Post: #2
Title: Re: يا ناس الشيشة سيبوا الخرطوم والله النظام العام ليكم مكتوب
Author: Ashraf el-Halabi
Date: 08-07-2010, 03:15 PM
Parent: #1
سلامات بلدي
القرار دا بدواعي بيئية ولا تأصيلية؟
|
Post: #3
Title: Re: يا ناس الشيشة سيبوا الخرطوم والله النظام العام ليكم مكتوب
Author: بلدى يا حبوب
Date: 08-07-2010, 05:38 PM
Parent: #2
اشرف
القرار افتكر تاصيلى وذلك بمهره فى افتتاح مسجد ومركز اسلامى والجماعة ديل ما عندهم شغله بالبيئة الا يكون الحاجة فيها قروش والدليل منع التدخين فى باصات الولاية وعدم منعه فى الحافلات العامة
تحياتى
|
|