عليك بالإستمتاع بالقهوة

وصلتي هذه الرسالة عبر البريد الإليكتروني ...
وأحببت أن أشرككم معي في تأمل الدروس والعبر التي تحويها ...

في إحدى الجامعات

التقى بعض خريجيها في منزل أستاذهم العجوز

بعد سنوات طويلة من مغادرة مقاعد الدراسة

وبعد أن حققوا نجاحات كبيرة في حياتهم العملية

ونالوا أرفع المناصب وحققوا الاستقرار المادي والاجتماعي

وبعد عبارات التحية والمجاملة

طفق كل منهم يتأفف من ضغوط العمل

والحياة التي تسبب لهم الكثير من التوتر


وغاب الأستاذ عنهم قليلا

ثم عاد يحمل أبريقا كبيرا من القهوة

ومعه أكواب من كل شكل ولون

أكواب صينية فاخرة

أكواب ميلامين

أكواب زجاج عادي

أكواب بلاستيك

وأكواب كريستال

فبعض الأكواب كانت في منتهى الجمال

تصميماً ولوناً وبالتالي كانت باهظة الثمن

بينما كانت هناك أكواب من النوع الذي تجده في أفقر البيوت

قال الأستاذ لطلابه

تفضلوا، و ليصب كل واحد منكم لنفسه القهوة

وعندما بات كل واحد من الخريجين ممسكا بكوب تكلم الأستاذ مجددا

هل لاحظتم ان الأكواب الجميلة فقط هي التي وقع عليها اختياركم

وأنكم تجنبتم الأكواب العادية ؟؟؟

ومن الطبيعي ان يتطلع الواحد منكم الى ما هو أفضل

وهذا بالضبط ما يسبب لكم القلق والتوتر

ما كنتم بحاجة اليه فعلا هو القهوة وليس الكوب

ولكنكم تهافتم على الأكواب الجميلة الثمينة

و بعد ذلك لاحظت أن كل واحد منكم كان

مراقباً للأكواب التي في أيدي الآخرين

فلو كانت الحياة هي : القهوة

فإن الوظيفة والمال والمكانة الاجتماعية هي الأكواب

وهي بالتالي مجرد أدوات ومواعين تحوي الحياة ونوعية الحياة

(القهوة) تبقى نفسها لا تتغير

و عندما نركز فقط على الكوب فإننا نضيع فرصة الاستمتاع بالقهوة


وبالتالي أنصحكم بعدم الاهتمام بالأكواب والفناجين

وبدل ذلك أنصحكم

(((( بالاستمتاع بالقهوة ))))

في الحقيقة هذه آفة يعاني منها الكثيرون

فهناك نوع من الناس لا يحمد الله على ما هو فيه

مهما بلغ من نجاح

لأنه يراقب دائما ماعند الآخرين

يتزوج بامرأة جميلة وذات خلق

ولكنه يظل معتقدا أن غيره تزوج بنساء أفضل من زوجته

ينظر الى البيت الذي يقطنه ويحدث نفسه أن غيره يسكن في بيت أفخم وأرقى

وبدلا من الاستمتاع بحياته مع أهله وذويه

يظل يفكر بما لدى غيره ويقول :
ليت لدي ما لديهم !!!!

قال رسول الله صلى الله عليه وسلم:

(من بات آمناً في سربه، معافاً في بدنه، يملك قوت يومه، فقد حيزت له الدنيا بحذافيرها)

وقال أحد الحكماء:

"عجبا للبشر!! ينفقون صحتهم في جمع المال فإذا جمعوه أنفقوه في استعادة الصحة،

يفكرون في المستقبل بقلق وينسون الحاضر فلا استمتعوابالحاضر ولا عاشوا المستقبل،

ينظرون إلى ماعند غيرهم ولا يلتفتون لما عندهم فلا هم حصلوا على ما عند غيرهم ولا استمتعوا بما عندهم،

خلقوا للعبادة وخلقت لهم الدنيا ليستعينوا بها فانشغلوا بما خلق لهم عما خلقوا له"


فعليك بالاستمتاع بالقهوه

بعد ما إسْتقريت في البُطانة ، فعلاً بقيت أستمتِع بِالأشياء ... بِالشمس ... الزيفه ... الليل ... القمر .. النجوم ... وإسْتغتيت إلا قليل عن الفلوس ... بقيت في مزرعتي البزرعو باكلو ... كُنت حريص مثلاً أن أصطاد طيرتين تلاته بس ، أتجنب المِيع البِكون الطير فوقا في تجمُعات كبيرة لأن طلقة الخرطوش الواحدة مِمكِن تِصطاد 20 طيره دفعة واحدة ... السمك بصطاد حق الوجبه بس ... وده برضو بيحصل في المحس فوق هِناك ... ولو الواحِد بِقى ده دَيْدنو بِتلقاهو بقى يِسْتمتع بِالقهوة أخيرًا

ود كسلا كيف حالك؟ علك طَيِب

الاخ /عبد الله كسلا
السلام عليكم

المادة فيها من الحكمة ما فيها علنا نعى ونستفيد

الاخ / عزام
سلام واحترام
كُنت حريص مثلاً أن أصطاد طيرتين تلاته بس ، أتجنب المِيع البِكون الطير
فوقا في تجمُعات كبيرة لأن طلقة الخرطوش الواحدة مِمكِن تِصطاد
20 طيره دفعة واحدة ... السمك بصطاد حق الوجبه بس
دا كلاماً زين
لكن بصراحة مامطبق فى بوستاتك
ففى بوست واحد او مداخلة واحدة اراك تصطاد العشرات
والمئات من المعجبين وباحثى المعرفة والتعلم والطرح الهادف
كما هو الحال تماماً مع المخالفين والملحدين وغيرهم ..

أحمد أمين
كيف حالك؟ علك طَيِب

Quote: دا كلاماً زين لكن بصراحة مامطبق فى بوستاتك ففى بوست واحد او مداخلة واحدة اراك تصطاد العشرات والمئات من المعجبين وباحثى المعرفة والتعلم والطرح الهادف كما هو الحال تماماً مع المخالفين والملحدين وغيرهم ..

إتْ عارِف يا وداللمين الفِجه دي مِتِل سوق الشمِش البِنْعقِد في دِيوم بحري ... تلقى البشر جايين بِبِضَاعَةٍ مُّزْجَاةٍ ، والزبايِن، فيهُم البِشَنِفو ، وفيهُم البِشْترو بعد مُفاصله تمرِق روحك ، وفيهُم البِتاوِق ساااي حرم قِرِش أحمر في جيبو ماف ... أها ده مِتْلي ... أقوم أسيلي عمود مُعْتدِل القَوام بِدون عَوج ، يِنُط لي ملقوف يِمْسح بيك الواطا ... تقنِب تحاحي فوقو لامِن يِشتِت لي كورتك تااااب ... فآلَيتُ على نفسي الآتي : أكيل لِلمُتداخِل مِن جِنس ماعونو وأراعي رغم ذلِك مقامي وأهلي ... مِتِل الله تعالى بِسوو في أمر خلقو ، أنا بسَوو ، الله جل وعلا ، بِسلِط على الخلق البِشبهُم ... يعني مِتِل سِوار الدهب ما مُمكِن يِحْكُم شعب مِتِل شعب العِراق ... ديلاك قُساة ... عُصاة ... وسِوار الدهب زول دِرْويش ... هَيِن ... لَيِن ... نِسْتاهلو نِحْنا ديل ما غيرنا ... ولامِن بطرنا ... سلط عليناالمَولى ، عُمر البشير و زمرتو ... نان كَدي أنا بِقيت البِهابِشِني بقع فوقو بِحيلي تااااب أنا أخوك ... وأنا عِندي والوكِت والوكِت عِند سواد الناس عزيز ... البِقولي السلام عليكُم ... بقولو السلام عليكُم ... البِنبِذني بِتْسلط عليهو لامِن يِعْرِف حاجة أنا أخو السارة ... يا زول العدا ما حبابو ... حرم ما حبابو ... عِلا أكان العدا وصل لا عِنْدي حرم ما بتغابا فوقو العِرفا ... بتلهمو ساااي والتبقى اللتبقى ومِحل رقيقة التِنْقد ...

إنت يا زول إن شاءالله طَيِب ... وناسك علهُم طَيبين ...

أخي أحمد الأمين ..

الكلام فعلاً جميل .. ومليئ بالعبر والدروس ... علنا نستفيد منها ...

وكلامك عن أخونا وحبيبنا عزام برضو جميل وعجبتني الحتة دي بالذات ...

Quote: ففى بوست واحد او مداخلة واحدة اراك تصطاد العشرات والمئات من المعجبين وباحثى المعرفة والتعلم والطرح الهادف

وأنا واحد من المعجبين ديل ...

شكراً ليك كتير أخي أحمد ...

كلام فلسفي بديع وفيه عبر ودروس مفيدة لكيفية الاستمتاع بالحياة
والله يديك العافية
مع وافر الشكر والتقدير

تحياتي عزام ...

ود القاضي
كيف حالك؟ علك طَيِب

كتر خيرك ... إتْ زول أخو أخوان حرم ... وزول نَصاحَ وكلامك بِنزِل فوق القلب مِتِل السكينة ... شُكرًا ... نصرتني في ذات نفسي الأمارة بِالسوء

فايز ود القاضي ...

إنت أكيد جابتك ريحة البن ... ما إنتو ناس كسلا .. ناس البن والقهوة ..

بس لكن شنو ياخي دخلت ... ومرقت .. ورجعت دخلت .. ومرقت تاني ..

لا سلام ولا كلام .. ولا حتى تعليق على قهوتنا الشربتها دي ...

بس تشرب وتمسح شنبك وتمشي ...

مالك؟ مستعجل ماشي لناس "سارة" بهناك وله شنو ...

حبابك ألف .. ومرورك بالجد أسعدني ..

وشكراً على تنبيهك لحبيبنا عزام ..

الأخت أميرة ...

شاكر ليك كتير ومقدر مرورك علينا و"الإستمتاع بتناول قهوتنا" ...

الكلام حقيقة جميل .. وكله دروس وعبر .. نتمنى إنه الناس تقرأه .. وتعمل بيهو ..

الحياة جميلة ... ولكن الأمر يتوقف حسب المنظار الذي ينظر به الشخص لحياته ..

وقديماً قيل "القناعة كنزاً لا يفنى" ..

شكراً ليك ياأميرة مرة أخرى ..

وربنا يمتعك بالصحة والعافية ...

عزام حسن فرح حته واحدة ... يا الله يا الله ...

يشهد الله يا عزام .. أنا واحد من المعجبين الذكرهم ليك أخونا أحمد الأمين ديل ...

بحب أقرأ ليك ... وبستمتع بمتابعة طريقتك في الحكي ... والسرد ...

حتى وإنت بتخاصم ... بتكون فارس في الخصومة ...

الله يمتعك بالصحة بقدر إمتاعك لمعجبينك ...

مرورك أسعدني كتير يا عزام يا أخوي ... شكراً ليك ...

Quote: عليك بالاستمتاع بالقهوه

المثل ده بنطبق على أهلنا زمان
تلقى جبنة الصفيح مطفقة بالجنبات
وفناجين الصينى حوافها مترَمة من مطاقشة الغسيل الكتيرة
وكيف على الآخر
أين نحن منه الآن ؟؟؟
كانوا حِكمْ تمشى على رجلين
الله يديك العافية يا عبد الله

نعم أخي الفاتح ... كانت للقهوة طقوس وشعائر ...

بدونها لا يكتمل الكيف ...

ويحلو معها السمر والشمارات ...

شكراً على مرورك البهي ...