هل يقدر اثرياؤنا علي فعل كهذا كما فعل الامريكان ؟؟؟

Quote: BBC Arabic اربعون ميليارديرا امريكيا يتبرعون بنصف ثروتهم تعهد 40 من ميليارديرات الولايات المتحدة وعائلاتهم منح اكثر من نصف ثرواتهم لمنظمات خيرية في مبادرة اتخذها الميليارديران بيل جيتس مؤسس شركة مايكروسوفت ووارن بفيت وهو كبار المستثمرين في مجال الاعلانات. وتضم مجموعة الاثرياء التي وافقت على هذا التعهد مؤسس شبكة سي ان ان الاخبارية الامريكية تيد ترنر وعمدة نيويورك مايكل بلومبرج ومؤسس شركة اوراكل لاري اليسون والمخرج جورج لوكاس. استجابة مشجعة وقد جرى الاعلان عن هذه المبادرة منذ ستة اسابيع واطلق عليها اسم "تعهد العطاء" وتهدف الى اقناع اكبر عدد ممكن من كبار الاثرياء بعطاء اكثر من نصف ثرواتهم لجمعيات خيرية. وقال بفيت وجيتس في بيان مشترك صدر الاربعاء ان "التعهد هو بمثابة التزام اخلاقي ولا تنطبق عليه مواصفات القضائية للعقود". واضاف البيان ان "الحملة بدأت منذ فترة وجيزة، ولكن حتى الآن، فان الاستجابة لها مشجعة جدا"، مشيرا الى ان "اساس هذه المبادرة هو الطلب من الاسر الغنية جدا من مناقشة ثرواتها بجدية وكذلك الاموال المتبرع بها ومعرفة كيف سيجري صرفها".

ده لانهم اتبرعو لمنظمات نظيفه ما وهميه عاوزه تسرق وكفي

في مسؤوليه هناك مش متلنا مافي زول هاميه الوطن

شكرا عباس

Quote: ده لانهم اتبرعو لمنظمات نظيفه ما وهميه عاوزه تسرق وكفي

وفي ظل مؤسسات دستورية تحمي الحق العام والخاص

الشعب الأمريكى من أكثر الشعوب إنسانية فى العالم، وأكثرهم شجاعـة وإيثارا وتضحيات من أجل الأخر.

هـذه الحقيقة لا ينفيها إلا من لم يعش وسطهم أو مكابـر.

أبو بكر

Quote: تعهد 40 من ميليارديرات الولايات المتحدة وعائلاتهم منح اكثر من نصف ثرواتهم لمنظمات خيرية في مبادرة اتخذها الميليارديران بيل جيتس مؤسس شركة مايكروسوفت ووارن بفيت وهو كبار المستثمرين في مجال الاعلانات.

شرعاً لا يجوز وهب أكثر من ثلث الميراث بعد دفع الديون ومستحقات الغير. تاني هام: منو القال ليك عندنا أغنياء من نوع بل قيتس . لا أعني المقدرة المالية طبعاً الفرق كبير. لكن هل تعلم أن أغنى 37 سوداني محكوم عليهم بالإعدام الإقتصادي. أي ما معناه لا تتعامل معهم البنوك ولا مع زوجاتهم ولا ابنائهم. ولو كان بإمكاني إيراد الأسماء لشاب رأسك .
أسماء يشار إليها بالبنان من الناحية المالية ولكنهم مطالبين ما بين 29 مليون جنيه بالجديد و589 مليون دولار أميركي ومابينهما. وعليه طلبك فيه نوع من الإستحالة. والله أعلم.

(العوج راي والعديل راي)

اسمع بأن هناك مليارديرات, وليس مليونيرات, في السودان يتعاملون بمليارات
الدولارات.. ولكن هؤلاء لا يمكن أن يتبرعوا لمنظمات خيرية لمساعدة الفقراء والمساكين
ولكنهم على النقيض من ذلك يسعون بكل الطرق لسرقة أموال الشعب الغلبان الأموال
العامة لأن المراجع العام للحكومة يده مغلولة ولا يستطيع توجيه الاتهامات دون أوامر من
مراكز القوة التي تحيط بالسلطة التنفيذية...

أميرة السيد

Quote: اسمع بأن هناك مليارديرات, وليس مليونيرات, في السودان يتعاملون بمليارات الدولارات

دا كلام ساكت ومدفوع الأجر. وحاتك يا بتي لو قلت فلان الفلاني العندو الحاجات الكتيرة ديك وعنده شنو وشنو مطلوب 589 مليون دولار من بنك واحد أجنبي وما عرفوا ليهو حل بس متماشين معاه. وكل من تسمعي عنهم أنهم مليونيرات حتى بالجنيه الجديد كذبة كبيرة ليست بيضاء. ممكن هنالك واحد إثنين لكن البقية وحاتك إشاعة. بعضهم فضّل كايرو والبعض في سجون كوبر والهدى.
أما ما تقولين عنهم أنهم هبروا من المال العام فديل لا دخل لهم بالرأسمالية التي نتحدث عنها. ديل جماعة أضرب وأهرب. ولا يمكن أن يتبرعوا لأنهم قاموا في فقر مدقع ويتوقعون لو أنهم تبرعوا لعاد إليهم الفقر من الشباك.

(العوج راي والعديل راي)

الباشمهندس ابوبكر,
هولاء همهم هو ال "legacy" بتاعهم فى مجتمعاتهم. علشان تعرف ان الاعمال الخيرية هى التى تجر عجلة هذه المجتمعات, عليك فقط بقراء obituaries فى اى جريدة محلية هنا: لمن يموت واحد منهم, عائلته ينصح بالتبرع لمراكز ابحاث السرطان بانواعه المختلفة, إذا كان هو سبب الوفاة او لامراض القلب اذا مرض الراحل من القلب او التبرع لجميعته الخيرية المفضلة.

ألأخ أبوبكر
ألـمجتمع ألأمريكي راسخ وراكز في هكذا فعل إنساني وفكرة التبرع(Philanthorpy) عمرها يتجاوز ألـمائتين عام ويفتخرون بها أي أفتخار وتدرس في ألـمدارس والجامعات وهل تعلم أن ميزانية الـمنظمات ألأمريكية العامله في الـمجال ألإنساني تفوق الـمائتين بليون دولار...وبيل قيتس هذا تبرع بثلاثمائة مليون دولار لدعم التعليم في عشرة مدن أمريكية من ضمنها مدينة ممفيس حيث أقيم.. فيا باشمهندس الـمجتمع ألأمريكي دا يفيض بالإنسانية فجاري مباشرة وإسمه مستر قريج ويشتغل في مجال الـمياه ألزول دا سافر عشرات الـمرات وبجهده ألخاص لدارفور ليحفر العديد من ألآبار وأنا السوداني متبلد ألإحساس تجاه أهلي بدارفور..شابه لـم تتجاوز العشرين ربيعا جاءتني لأعلمها العامية السودانية لأنها ستسافر هذا الصيف إلي دارفور لتقدم خدمات طبيه!! فتأمل

يا صحبى الجميل
المليونيرات العندنا مافاضيين لينا
ديل ناس عم دهب
تعرف عم دهب بتاع ميكى ماوس ؟
وعلى ذكر الامريكان
ديل ناس عباقرة اجتماعيا
فى زولة عملت حاجة سمحة
هى طالبة فى المرحلة الثانوية
عزمت مجموعة من المواطنين السودانيين فى مطعم سودانى فى مدينة ايوا
وطلبت منهم انه يتكلمو عن مشكلة دارفور
بعد الكلام انتهى جمعت من كل واحد مية دولار
وكانت قبل كدا اخدت من مواطنين امريكان مبالغ من المال
وركبت طيارة ومشت دارفور وقدمت الكان عندها من مساعدات للنساء هناك
لا مؤتمر ولامراوح ولا اوراق وترابيز واجتماعات ولا هم يحزنون
اجمل حاجة فى المجتمع الامريكى التكافل على اصوله قائم بين الناس

سلمى الشيخ سلامة

Quote: فى زولة عملت حاجة سمحة هى طالبة فى المرحلة الثانوية عزمت مجموعة من المواطنين السودانيين فى مطعم سودانى فى مدينة ايوا وطلبت منهم انه يتكلمو عن مشكلة دارفور بعد الكلام انتهى جمعت من كل واحد مية دولار وكانت قبل كدا اخدت من مواطنين امريكان مبالغ من المال وركبت طيارة ومشت دارفور وقدمت الكان عندها من مساعدات للنساء هناك لا مؤتمر ولامراوح ولا اوراق وترابيز واجتماعات ولا هم يحزنون

إنت مالك ما سويتي زيّها؟ بس فالحين في الكلام والوصف بس؟ وتشكروا الأمريكان.

(العوج راي والعديل راي)

ما مطالبة اوريك سويت شنو يا كانتونا
والعملتو الله بعرفو ما بتكلم بيهو لانه قدرى ما اكتر ولااقل
قدر قدرتى بسوى
بعدين انت زول قاعد فى بريطانيا
احكى لينا عملت شنو للسودان ؟
على الاقل فى ناس بعرفو اننا عملنا شنو ؟
على الاقل فى عشرين زول بعرفونا فى السودان
انت بعرفك منو ؟
وبحذرك دى المرة التانية اكتب حاجة تجى ناطى لى فيها
حسك عينك اكتب حاجة تعلق عليها
قاعدة فى المنبر دا من سنة 2003 ما اتكلمت مع زول كلام ماياهو
كل زول بحترمنى وبحترمه
بعمل المفروض يتعمل
وتانى مرة ورينا انت يا استاذ عملت شنو ؟

بعدين الامريكان ديل يا محترم عرفونا نحترم بعض كيف ؟
ونحترم حقوق الاخرين
بل علمونا من جديد كيف نحب بلادنا الاصلا ما طلعنا منها الا على مستوى الجسد
فلو سمحت حل عن سمايا
B]

Quote: سلمى الشيخ سلامة: ما مطالبة اوريك سويت شنو يا كانتونا والعملتو الله بعرفو ما بتكلم بيهو لانه قدرى ما اكتر ولااقل قدر قدرتى بسوى بعدين انت زول قاعد فى بريطانيا احكى لينا عملت شنو للسودان ؟ على الاقل فى ناس بعرفو اننا عملنا شنو ؟ على الاقل فى عشرين زول بعرفونا فى السودان انت بعرفك منو ؟ وبحذرك دى المرة التانية اكتب حاجة تجى ناطى لى فيها حسك عينك اكتب حاجة تعلق عليها قاعدة فى المنبر دا من سنة 2003 ما اتكلمت مع زول كلام ماياهو كل زول بحترمنى وبحترمه بعمل المفروض يتعمل وتانى مرة ورينا انت يا استاذ عملت شنو ؟ بعدين الامريكان ديل يا محترم عرفونا نحترم بعض كيف ؟ ونحترم حقوق الاخرين بل علمونا من جديد كيف نحب بلادنا الاصلا ما طلعنا منها الا على مستوى الجسد فلو سمحت حل عن سمايا

1- زي ما إنت ما بتوريني أنك سويتي شنو أنا برضو ما بوريك سويت شنو! دقة بدقة والبادي أظلم.
2- تحذريني ليه هو أنا نطيت حيطة ولا نطيت مخدة؟ بدخل البوست الدايرو وبكتب العاجبني لا إنت ولا 100 من نوعك بقدر يمنعني أكتب زي ما عاوز. والرهيفة التنقد.
3- أنا لم أقل عليك أو لك بعدم الإحترام بس سألتك سؤال. السؤال ما عجبك مافيش مشكلة. أنسي السؤال وصاحبه معه. لكن لهجة التهديد دي لا بتودي ولا بتجيب.
4- العلموك ليهو الأمريكان دا نحن رضعناه مع الحليب. وهنا نقول عديلة على السبب والكان السبب الوداكم للأمريكان عشان يعلموكم إحترام بعض واحترام حقوق الغير. وكمان علموكم حب بلدكم.. كتّر خير الأمريكان وإن شاء الله إيدهم ما توجعهم.
5- الناس الإتعلموا حب السودان من الأمريكان وباقي الحب المذكور أعلاه أنا ما بجي بأرضهم ناهيك عن سماهم. أنا أرقى من كدا كتير. أمريكا الفرحانة بيها دي أنا لمن زرتها ودرست فيها إنت من أم طرقن عراض ما جيتي.
هوي يا بت الناس كلام المنبر نحن بنسميه كلام بنات معديات بنات (دا فلكلور) يعني لا بودي ولا بجيب. لا بنزعل من زول ولا بنحاول نزعِّل زول. وكان الزول في المنبر بدلنا بالفول نحن بنبدله بقشر الفول. وإنتِ لكي تكوني مرتاحة من بوستاتي ما تقريها ولا تردي عليها وأعملي أضان الحامل طرشاء. لكن أنا بدخل البوست العاوزو وبكتب الكلام العاجبني وما بهتم بالناس بقولوا شنو!

(العوج راي والعديل راي)

صحبي الجميل دائما سلمي تشكراتي

Quote: اجمل حاجة فى المجتمع الامريكى التكافل على اصوله قائم بين الناس

تكافل ساهم في ان يجعل بلدهم القوة الاعظم في العالم

عبد الله الشيخ

Quote: باشمهندس الـمجتمع ألأمريكي دا يفيض بالإنسانية فجاري مباشرة وإسمه مستر قريج ويشتغل في مجال الـمياه ألزول دا سافر عشرات الـمرات وبجهده ألخاص لدارفور ليحفر العديد من ألآبار وأنا السوداني متبلد ألإحساس تجاه أهلي بدارفور..شابه لـم تتجاوز العشرين ربيعا جاءتني لأعلمها العامية السودانية لأنها ستسافر هذا الصيف إلي دارفور لتقدم خدمات طبي

مالك متبلد الإحساس؟ ما بتعرف معنى المعاناة ولا كسل السودانيين البقولوا عليهو ناس الخليج شلتوا معاكم للدنيا الجديدة كمان؟
خلي كتر الكلام وأعمل حاجة لناس دارفور بدل الحكي الماجايب همه دا من فضلك.

(العوج راي والعديل راي)

الاخ cantona_1

خبرني قليلاً عن ما فعلته أنت لكي أقتدي بك.

حبيبنا ابوبكر

اطلب الخير من بطون شبعت ثم جاعت ؛ فالخير فيها باقِ . ولا تطلب الخير من بطونٍ شبعت بعد جوع ؛ فالشح فيها باقِ.

Quote: شرعاً لا يجوز وهب أكثر من ثلث الميراث بعد دفع الديون ومستحقات الغير

.
الأخ كانتونا..
العبرة فى مبدأ التبرع والتطوع فى حد ذاته وليس فى الكم...اما من حيث موضوع الأنصبة الشرعية وكدة , فكدى يموت لينا بالأول وبعد داك نشوف .

يا قريبي قلقو شكرا

Quote: العبرة فى مبدأ التبرع والتطوع فى حد ذاته وليس فى الكم

ثقافة تترجم فعلا لا قولا وشعرا

Quote: خبرني قليلاً عن ما فعلته أنت لكي أقتدي بك.

ولا أي حاجة ، الأخ كانتونا عامل فيها أبو العريف وشغال وعظ في الأمة يمين وشمال ، مفتكر الناس دي أميين . الزول دا عايش في بريطانيا ومستمتع بكل الحريات والمنجزات الانسانية للغرب وفي بوست مجاور لقيتو كاتب أتمنى العرب يقطعوا البترول عن الغرب عشان أشوف البريطانيين ديل حيعملوا شنو ! تفتكر زول بيفكر بالطريقة دي حيكون فيهو فايدة عشان زول يقتدي بيهو ؟

Quote: شرعاً لا يجوز وهب أكثر من ثلث الميراث بعد دفع الديون ومستحقات الغير

اليسمع الكلام دا يقول الأغنياء عندنا أصـلاً متبرعين بالتلت وما منعهم يتبرعوا بي نص ثرواتهم إلا لوجود هذا النص الشرعي ! دي عقلية بتاعت زول حاقد وحاسد ومليء بعقد النقص ومفتكر عندو حاجة وهو التكتح ما عندوا، عايش في الغرب وحاقد عليهم من جوه قلبوا الأسـود، وكل ما زول يقول حاجة كويسة عن الغربيين يجي ناطي عشان يفندها، ياخي وكت ما عاجبنك الناس ديل، وشايف انو ناسك أخير منهم ما تجي راجع لي أهلك العباقرة الفايتين الكبار والقدرهم ، المقعدك من الأوربيين قليليين المروة ديل شنو ؟ ولا قاعد هناك عاوزهم يستفيدوا من علمك وفهمك زي ما نحنا مستفيدين هنا في سودانيزأونلاين ؟

والله البوست دا ذكرني يا باشمهندس بوست اخونا ناظم إبراهيم (هل يدخل عظماء الانسانية النار) بالله فتشت في النت عن الى اين تذهب هذه الاموال وهل هي لمجموعات دينية محددة او لفئات عرقية محددة عشان متأكد انه في البعض حيجي ويقولك دي تبرعات للنصاري!!!!!!!
ياربي من المحيط الى الخليج ياخي من باكستان الى المغرب في واحد بس بيعملها؟
الشرق الاوسط ناشرة الخبر على يمين الصفحة الاولى وعلي يسارها طوالي تقرير تاني عن ان سيدات الشرق الاوسط يمتلكن ربع ثروات العالم اي ما قيمته تقريباً 500 مليار دولار!!!!

Quote: سيدات الشرق الاوسط يمتلكن ربع ثروات العالم

الأخ محمد عمر ..
سيدات بالجد ولا فى خطأ مطبعى؟

الأخ الأستاذ أبوبكر

نقلت لكم وصلة بوست أمريكا الجميلة .. وسوف أنقل وصلة بوستكم إلى هناك حتى تعم الفائدة.

أمريــكا الجميلة (1) .. America, The Beutiful

بريمة

عزيزي بريمة

Quote: نقلت لكم وصلة بوست أمريكا الجميلة .. وسوف أنقل وصلة بوستكم إلى هناك حتى تعم الفائدة.

خالص شكري فلقد كنت اتابع ما تكتب انت توضيحا لواقع عشته وعايشته وبموضوعية وحق

شكرا عزيزي محمد

Quote: والله البوست دا ذكرني يا باشمهندس بوست اخونا ناظم إبراهيم

وكذلك مقال عبدالله عثمان الاول والثاني :
نقلا عن سودانيزاونلاين:مقال واجب القراءة لعبدالله عثمان

وموضوع اخونا بريمة "امريكا الجميلة "

عزيزي ودشاموق ...الحقيقة تفرض واقعها فعلا ونتيجة

Quote: الاخ cantona_1 خبرني قليلاً عن ما فعلته أنت لكي أقتدي بك.

أخبرك يا أشرف عن شنو في شنو؟ الجملة غير مفيدة. لو شرحت لي يكون كتّر خيرك. ولك التحايا. أرجو الا يكون سؤالك بالإنابة عن شخص آخر.


العوج راي والعديل راي