Post: #1
Title: هنا بوست لانتقاد المظاهره والاستفاده من الاخطاء ان وجدت فتفضلو
Author: طارق الأمين
Date: 08-04-2010, 10:29 AM
عذرا لمن ازعجناهم بالمظاهره
نستمع الان لانتقاداتكم هنا
حتي لاتضطرون الي تشتيت جهودنا بملاحقه بوستات الراي الاخر
وانتم لاتقصدون ذلك بكل تأكيد
وكلنا اذان صاغيه
او عيون واعيه
وافر الاحترام
|
Post: #2
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: GamarBoBa
Date: 08-04-2010, 10:49 AM
Parent: #1
لا والله يا طارق لا ازعاج ولا شي
وتراه الهكر برضو عادي قاعد يجي ويبرمج بينا بدون موضوع مرة شعيرية ومرة كفتة
ويوم يسبنا
كتر خيرك انت اقلاه عندك موضوع وقضية
لكن السؤال انت مالك مستعجل للتقييم كدة...ما يادوب المظاهرة ليها تلاتة ساعت ولسة ناس اميركا ما صحوا
فاديها صنة وكم يوم يمكن الموضوع يلقي رواج اعلامي في الصحف والاعلام الخارجي
لحدي هسة ناو المستفاد من حملتك دي انو بكري بقي ناشط غايتو
|
Post: #3
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: خضر حسين خليل
Date: 08-04-2010, 10:56 AM
Parent: #2
| Quote: لحدي هسة ناو المستفاد من حملتك دي انو بكري بقي ناشط غايتو |
ياقمر بوبا ياخ خليك جادي الله يرضي عليك 
ــــــــ
|
Post: #4
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: عبدالعزيز حسين عبدالرحيم
Date: 08-04-2010, 11:10 AM
Parent: #3
الأعلان عن المظاهرة الاسفيرية أدى لعزوف الأعضاء عن الكتابة وأصبح المنبر رتيب
المواضيع هزيلة
أتمني ما تتكرر تاني الحركة دي
ممكن موضوع واحد مسنود بحقائق ومدعم بوجهات نظر علمية وقانونية وشرعية يكفي عن مليون بوست
|
Post: #5
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: GamarBoBa
Date: 08-04-2010, 11:45 AM
Parent: #4
| Quote: ممكن موضوع واحد مسنود بحقائق ومدعم بوجهات نظر علمية وقانونية وشرعية يكفي عن مليون بوست |
لا اتفق معك الاخ عزيز في ذلك...
الغاغة والتكرار الكتير بدي زخم اعلامي...المواضيع الهادفة والمسنودة دي مافي زول بعير ليها اهتمام
_
يا خضر انا جادي...طارق مستعجل
|
Post: #6
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: عبدالعزيز حسين عبدالرحيم
Date: 08-04-2010, 12:00 PM
Parent: #5
قمر بوبا مرحب وبرضه رايك جميل
Quote: لا اتفق معك الاخ عزيز في ذلك...
الغاغة والتكرار الكتير بدي زخم اعلامي...المواضيع الهادفة والمسنودة دي مافي زول بعير ليها اهتمام |
صح كلامك الغاغة بتلفت الأنتباه لكن لفترة مؤقته وترجع حليمة لقديمه ومن غير فايده وأغلب البوستات شغاله نقد كنت أتمني القى بوست يحلل ويشرح ويوضح الخلل لأنو المشكلة الكبيرة في المنفذين ويجيب حلول وخيارات ووجهات نظر ونطلع منه بي فايده ويستمر فترة ويلقى أهتمام من المسؤولين من الشغلانة دي هسع البوستات دي زي الفقاعات بكرة ما حا نلقاها وتمشي الارشيف ويتنسي الموضوع كانه ما في حاجه ولمن تحصل حاجه تانية ينكتوها أويجتروها ونقعد في الموال دا طوالي
|
Post: #8
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: طارق الأمين
Date: 08-04-2010, 12:08 PM
Parent: #6
ياقمر بوبا سلام
الامر ليس استعجالا للتقيم
لكنه محاوله لتفادي فتح بوستات كتيره من قبل المنتقدين من شأنها عمل اذدحام في الصفحه الاولي
الان بهذا البوست تفادينا كثره البوستات تلك
الاخ عبد الرحيم
سلامات ونأسف لازعاجكم
من المؤكد في حاله وجود تظاهرات تصاب الحياه العاديه والروتينيه بالتعطل
كنا نفرح في المدرسه الاوليه لوجود المظاهرات ولا نعرف اسبابها
لكنا نعرف ان بدايتها تعني ان يصيح فينا الناظر المرحوم عثمان فريني رحمه الله
يلا يا اولاد
بيوووووووووووووووووووووووووووووووووت
التظاهر كسر لليومي السائد كما في كل مكان
اكرر اسفي لك كواحد من متضرري هذه المظاهره
وتقبل تحياتي
|
Post: #9
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: محمد أبوالعزائم أبوالريش
Date: 08-04-2010, 12:13 PM
Parent: #6
| Quote: كنت أتمني القى بوست يحلل ويشرح |
نوعية البوستات دي موجودة .. وبتوقع تكون موجودة بعد النشاط بتاع الليلة.
بس الفكرة إنو دي ((مظاهرة)) يعني إحتجاج بالهتاف والشعارات .... والبتتكلم عنو إنت ده ((ندوة)) أو حلقة نقاش.
|
Post: #7
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: GamarBoBa
Date: 08-04-2010, 12:07 PM
Parent: #5
ملاحظة اخري يا طارق
في تشكليين وفناناين معانا هنا كان ممكن يصمموا بعض البوسترات والبروفايلات ويتم نقلها للفيس بوك وتويتر وغيرها من المواقع عشان الانشار الاكبر بهناك
التصاميم كان ممكن تعتمد علي صور ضحايا حقيقيين للنظام العام ودي متوفرة في الانترنت عشان يحصل تضامن ومظاهرة جد جد.
اتحملنا شوية يا طارق ..معليش
|
Post: #10
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: GamarBoBa
Date: 08-04-2010, 12:16 PM
Parent: #7
تمام يا عزيز...
طيب خلينا نلقي حتة نص
تحصل غاغة زي الحاصلة دي لكن بجهد مرتب اكتر
يعني التشكليين يصمموا= الوسائل...والقانونين يحللوا= المعين العملي + يورونا مكامن الخلل وين ونحن نتظاهر...تقسيم الادوار برضو ما كعب
لانو بالطريقة دي برضو الناس حتمل بعد يوم واحد وممكن المسألة تجيب نتائج عكسية
|
Post: #11
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: طارق الأمين
Date: 08-04-2010, 12:21 PM
Parent: #10
عزيزي قمر بوبا
تحياتي
هذه المظاهره ملك للجميع
وهي مظاهره سلميه
وعلي المتظاهرين التصرف كما يريدون طالما هي كذلك
اوافق عن نفسي علي مقترحاتك
ويدك معانا ويد التشكيليين
محبتي
|
Post: #14
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: عبدالعزيز حسين عبدالرحيم
Date: 08-04-2010, 12:38 PM
Parent: #11
الأخ طارق الأمين
Quote: الاخ عبد الرحيم
سلامات ونأسف لازعاجكم
من المؤكد في حاله وجود تظاهرات تصاب الحياه العاديه والروتينيه بالتعطل
كنا نفرح في المدرسه الاوليه لوجود المظاهرات ولا نعرف اسبابها
لكنا نعرف ان بدايتها تعني ان يصيح فينا الناظر المرحوم عثمان فريني رحمه الله
يلا يا اولاد
بيوووووووووووووووووووووووووووووووووت |
يا طارق يا أخوي لو الحكاية فيها تأسف عن الإزعاج أتأسف للناس البتابع المنبر دا أول حاجه وبعد داك الأعضاء
| Quote: لتظاهر كسر لليومي السائد كما في كل مكان |
وهل دا حاجه إيجابية ولا كويسه رغم أنو سودانيز أون لاين مدرسة لكن الأعضاء ديل ما شفع والعاوز بيوت ما بيجي يفتح الموقع من أصله
| Quote: لكنه محاوله لتفادي فتح بوستات كتيره من قبل المنتقدين من شأنها عمل اذدحام في الصفحه الاولي |
يا طارق يا أخوي ما تهتم بالموضوع خليك في موضوع مظاهرتك الأسفيرية وهي حريتك ومافي زول اتسبب في تعطيلها وقامت لكن كمان حاجاتهم الهم حرين فيها خليهم يرفعوا يعملو زحمه يسوا العاوزنه
هسع أنت ما ملاحظ أنك عامل برضه زحمه
http://هنا نحصر اسماء من يخرب تظاهرتنا للتاريخ
والبوست دا ما كان في داعي ليه أصلا
يا طارق الأمين أرجو انو ما تتحسس لانو أنت براك فتحت بوست وقلت تعالوا أنتقدوا
وتحياتي ليك برضه
|
Post: #12
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: جعفر خضر
Date: 08-04-2010, 12:32 PM
Parent: #10
الفكرة جيدة
فكرة من هنا وفكرة من هناك حتى تكون في أبهى صورها
أرى أن يلتزم كل متظاهر بزمن محدد في رفع البوستات (أنا ألتزم من 10ـ12 مساء بتوقيت السودان) إن شاء الله الكهرباء ما تقطع
|
Post: #15
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: بدر الدين اسحاق احمد
Date: 08-04-2010, 12:50 PM
Parent: #13
Post: #17
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: عبود عبد الرحيم
Date: 08-04-2010, 01:07 PM
Parent: #15
يا طارق الأمين
سلام
مع تأكيد رفضي وادانتي لما حدث من اعتداء
لكن معليش في تقديري أنك تريد من خلال (مظاهرتك) هذه الانتصار لذاتك
وأعتقد أن بيت الفنون ليست (مسجد) ولا (كنيسة) حتي يكون بمعزل عن النظام العام وأمن المجتمع
واذا كانت هناك تجاوزات في تنفيذهم للقانون فان المحاكم مفتوحة للتقاضي
أما مظاهرتك دي فلم يكن لها داعي .. وفي الوطن قضايا أكبر وأعظم من اقتحام بيت الفنون
|
Post: #16
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: محمد الامين محمد
Date: 08-04-2010, 12:54 PM
Parent: #1
طارق الامين بعرض الاعمال الدارامية في تلفزيون السجم تلفزيون النظام العام وبنتقد النظام العام قمة التناقض
نحسبها ليك حساب حبوبة ما معادلة
التلفزيون يدفع لطارق فلوس
اعمال طارق تعرض بمقابل مادي
المقابل المادي من تلفزيون الدولة
تلفزيون الدولة بمعمل دعاية تجارية مدفوعة القيمة
التلفزيون يورد فلوس للدولة
فلوس الدولة تدعم النظام العام
النظام العام يضرب المساكين
اذأً طارق الامين موجود في المعادلة اعلاة
الذي يحارب الدولة يحاربها بكليتها
ليس جزاً
في السودان خيران لاثالث لهم ياطارق يافنان
اما تاخذ حقك بيدك
واما تعمل ناااااااااااايم
المظاهرة ما مشكلة
بكرة حيجك
1- بتاع النفايات
2- بتاع الضرائب
3- بتاع الزكاة
4- بتاع القيمة المضافة
5- بتاع الفاقد الضريبي
6- بتاع دمغة الجريح
7- بتاع المصنفات الولائية والقومي
8- بتاع النظام العام
9- يتاع السجل التجاري
10- بتاع المحلييييييييييييييييييية
11- وايييييييييييييييييييييييييييييييييييييييييك
|
Post: #18
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: محمد البشرى الخضر
Date: 08-04-2010, 01:51 PM
Parent: #16
| Quote: أرى أن يلتزم كل متظاهر بزمن محدد في رفع البوستات (أنا ألتزم من 10ـ12 مساء بتوقيت السودان) إن شاء الله الكهرباء ما تقطع |
اها دي المافي ليها داعي
فقط رفع البوستات بأب و فوق و غيرها من ادوات الرفع بدون اضافة حقيقية للبوست و الموضوع المطروح فيه دا غلط
وحيفقد المظاهرة معناها , حتبقى زيها و زي حركات هباني لما مزاجو يكون عالي او ذو اليد قبل الأرشفة
______________________________
الفكرة عموما جميلة ومبتكرة
الحاجة الكويسة في القضية دي تحديدا انها عامة و الكل - تقريبا - مجمع عليها ومشارك فيها من دون ما تعودنا عليه من احتكار تيار معين او معسكر للموضوع
و القصة تبقى هلال مريخ بين التيارين
فكرة تصميم لوقو او بوستر به شعار مهمة وممكن يتم وضعو في البروفايلات او تثبيته في المداخلات بواسطة بكري و رفعه اعلى البورد
او جعله في خلفية المداخلات
ممكن برضو الاتفاق على لون معين الناس المشاركين في المظاهرة يكتبو بيه او ممكن تتغير بيه خلفية البورد لليوم دا فقط
الحاجة المهمة الموضوع دا يطلع برة سودانيز اونلاين ودا دور الإعلاميين و ناس الصحافة
حاجتين سلبيات :
توقع طارق حدوث تخريب و استبق الموضوع ببوست شال بيه وش القباحة ساي
التانية بكري راح رافع اي بوست فيه قولة نظـ ... ساي , لدرجة رفع بوست لأساسي بتهكم على غلب الهلال من مازمبي الكلام دا السنة الفاتت
دخّليك الأسد صم وير من الوزة
|
Post: #19
Title: Re: هنا بوست لانتقاد المظاهره والاستفاده من الاخطاء ان وجدت فتفضلو
Author: جعفر خضر
Date: 08-04-2010, 06:04 PM
Parent: #18
| Quote: أما مظاهرتك دي فلم يكن لها داعي .. وفي الوطن قضايا أكبر وأعظم من اقتحام بيت الفنون |
الأخ عبود
هي مظاهرتنا (نا)
والاعتداء على بيت الفنون هو في حقيقة الأمر قضية حريات وقضية كرامة
ودي قضية كبيرة وعظيمة
يسقط النظام العام
|
|
|