يا بت الزمن الغُني ... يا ريت لو فيني غنية بتشبه رقصتك ...

أشتقت لي صولة تفاصيلك المكتّحة بالنضار
و إنتي مارقة من حفلة جواي
ياريت لو فيني غنية بتشبه رقصتك !

جواي مزاج أعزفلك
بين رمشة قصيدة و غنية طفلة
و الصفقة إرهاص للرقيص !

هابشاني فيك روعة وتر لاقيتوا في السكة النشيد !

كسرة
يا دمعي الإتشتّت يا دمعي الغلبوا اللقاط !

مؤخرة موسيقية

ترلملم
لم أتعب كثيراً حتي أعيد توزيع صمتك في صراخي
و لكني وجدتني أصرخ عندما نامت في سريري قصيدةٍ عزراء
لم تكن تريد أن تغويني لشئٍ في نفسِ بت هوفن !
ولكنها فقط أرادت أن تصبح علي أغنية !

عزف منفرِد

ما أجمل موسيقي هذا الصباح
فعندما بدأتي الدوزنة في أنصاف اوتاري التي ما عادت تعزف
ولكنهاكانت تنزف حزناً عندما يوقّع علي صمتها موسيقي معتزل
تابت أصابعهُ من غوايةِ الكمنجات !
ولم تجد حروفه الموسيقية من يطقطق لها أصابع تعبها المضني
ومع ذلك يا يا لحني الأول
ما يزال هنالك متّسعاً من الغني !


إيقاعات أفريقية

يزأرُ في صدري إيقاع الطبول الأفريقية
أتحسّسُ دقّات قلبي
أجدني ممدداً بين طبلةٍ و دُف !
أهرب من هذا الضجيج
يتبعثر الصراخ من قفصي الصدري

دق .. دق ... دق

أعلن عليكِ الحب الأفريقي
فأضيعُ في غابةٍ من دقّات طبولك التي تخبرني بأنكِ أغنيتي القادمة !

كمنجة

حِنينة وطيبانة
مرقت حفيانة تهبِش بي ندي خطواتا
المطر النازل هسة
الغيم الشايل هسة
وعشان حِنينة و طيبانة
تهديني حُرقة حشاها شان ترطّب مسامي بي دلع القصايد !

أوركيسترا

هابي بيرث داي تو يو
يغلط الكورال مصححاً

هابي (لوف) داي تو يو !!
فأمضي في محاولاتي الغنائية غير مبالياً بالنشاز الذي تحدثهُ المنافي بداخلي
فقط أطفئ شمعة لحني الجديد
و اولد علي يديكِ أغنية!

كورال

لم يكُن حبّك مجرّد أغنية
فرجاءاً أسمحي لي برقصة !
بين قوسي كمنجة
و غيثارة
بين قوسين..
النقدة و الما بتصفق ما معانا !

قفلة

ساعود إن بقي في العمر مزيداً من الغُني !


إهداء إلي أغنية سمعتها هسة !!!

إهداء ثاني :

إليها ...

هي أنثى ما تعودت أن تخلع الكعب العالي لضحكتها ، لحظة تمشي على حزن رجل !

تجتاحها حمى الرقص ،تلقيك على أقرب زاوية ، وتواصل الرقص حافية منك !

تتمنى حينها أن يخفت صوت كل موسيقى الكون ، والى الأبد .. لترقص على إيقاع دقات قلبك الذي أدمته ، علّه يستريح!

حبيب نورة ، شكرا حزينا !

Quote: هي أنثى ما تعودت أن تخلع الكعب العالي لضحكتها ، لحظة تمشي على حزن رجل ! تجتاحها حمى الرقص ،تلقيك على أقرب زاوية ، وتواصل الرقص حافية منك !

حسن بكري نجود

إذن هي مثل غنيتي
ما تعوّدت أن تخلع الكعب العالي لموسيقاها
تداعب خصلات شعرها القصائد
وتبحث عن من يشاركها رقصتها الأولي !

شكرن جميلن!

اجمل كتابة اقراها مؤخرا
شكرا حميما يا حبيب نورة

ياسلام ياحبيب نورة ابداع وجمال رائع ، نأمل اتحافنا بهذه الدرر ، تحياتى ومودتى .

Quote: ياسلام ياحبيب نورة ابداع وجمال رائع ، نأمل اتحافنا بهذه الدرر ، تحياتى ومودتى .

تسلم كتير يا هاشم

ربنا يخليك يا رب وتشكر علي الطلّة الحلوة
شكرن كتيرن!

Quote: اجمل كتابة اقراها مؤخرا شكرا حميما يا حبيب نورة

سلوم
تشكري يا عسل وكل سنة و إنتي اجمل و أنبل و أفضل
ويارب مية شمعة

Quote: فعندما بدأتي الدوزنة في أنصاف اوتاري التي ما عادت تعزف ولكنهاكانت تنزف حزناً عندما يوقّع علي صمتها موسيقي معتزل

حبيبا وحبيبنا سلللللللللللللام
تعرف مرات كده بيكون في جواك حاجات زي البركان الخامل، يقوم يجي زول يكتب زي كلامك ده يخليهو نار الله الموقدة!.
أنت مش ممنوع من الكتابات الزي دي؟
نص بديع يا مان واصل.

محبتي

Quote: ياريت لو فيني غنية بتشبه رقصتك !

انتو بتجيبو الكلام ده من وين ........

Quote: فأمضي في محاولاتي الغنائية غير مبالياً بالنشاز الذي تحدثهُ المنافي بداخلي

نشاز الغربه ده خلو لينا تب وارحل بنا الي حيث تريد

شكرا حبيب نوره

Quote: نشاز الغربه ده خلو لينا تب وارحل بنا الي حيث تريد شكرا حبيب نوره

الله يخليك يا شقدي

مشكور كتير

Quote: انتو بتجيبو الكلام ده من وين ........

عمر عثمان
الكلام بجيبنّوا هِن ما نحن

وقع ليك؟

شكرن كتيرن!

أأأأوبببببببببببببح
باقي الولد ده بيجي الصباح
كلامكـ الحلو ده مشي الصفحة خرتمية

Quote: أأأأوبببببببببببببح باقي الولد ده بيجي الصباح كلامكـ الحلو ده مشي الصفحة خرتمية

وحاتك يا عمران مع بوستات النظام العام دي مش يكون في الصفحة خرتمية وبس
لكن كتر خيرك ياخوي
انا بحب الدخلة للبورد الليل و آخرو
أخير لي من زحمة النهار دي

شكرن كتيرن!

Quote: تعرف مرات كده بيكون في جواك حاجات زي البركان الخامل، يقوم يجي زول يكتب زي كلامك ده يخليهو نار الله الموقدة!. أنت مش ممنوع من الكتابات الزي دي؟ نص بديع يا مان واصل.

الفاتح

علي اليمين في بالي هسة كنت عايز أشوت ليك مسينجر
طلعت ود حلال لكن ..
عارف الكتابات دي يا فاتح
أنا طولت منها ولو ملاحظ فترة طويلة أنا كنت مركز علي السرد
والسيرة الذاتية وحاجات من واقعي وحوامتي و كدة

ما عارف البت دي مالها معاي اليومين ديل
الشكية لي أب إيداً قوية

يا عمران

دي وحاتك ما شفتها ولا عرفتها

لكن برضو تشكر يا حبيب

Quote: أشتقت لي صولة تفاصيلك المكتّحة بالنضار و إنتي مارقة من حفلة جواي ياريت لو فيني غنية بتشبه رقصتك ! جواي مزاج أعزفلك بين رمشة قصيدة و غنية طفلة و الصفقة إرهاص للرقيص ! هابشاني فيك روعة وتر لاقيتوا في السكة النشيد !

كم انت شقي بالشعر وكم
هو حفي بك
==================

يوم بجي اجضم ليك اضنينك ديل في مصر
يامتمرد

Quote: كم انت شقي بالشعر وكم هو حفي بك ================== يوم بجي اجضم ليك اضنينك ديل في مصر يامتمرد

ات عارف ياموصلى والله الود دا مدفون بس وهن الاندفوا شويه فى ؟؟انا ماداير
اقول الوطن العربى المهم
حبيب نوره زول يجيد كل شى جميل حتى الصعلقه

Quote: ات عارف ياموصلى والله الود دا مدفون بس وهن الاندفوا شويه فى ؟؟انا ماداير اقول الوطن العربى المهم حبيب نوره زول يجيد كل شى جميل حتى الصعلقه

والله ياخالد حبيب نوره ده يخيل لي مكون من قلب فقط
زول تحس بي كلامو نابع من قرار عميق
لك الود

Quote: والله ياخالد حبيب نوره ده يخيل لي مكون من قلب فقط زول تحس بي كلامو نابع من قرار عميق لك الود

ربنا يخليك لي يا موصلي يا جميل

ح أقول شنو يعني ؟؟

Quote: ات عارف ياموصلى والله الود دا مدفون بس وهن الاندفوا شويه فى ؟؟انا ماداير اقول الوطن العربى المهم حبيب نوره زول يجيد كل شى جميل حتى الصعلقه

المحرب الجميل
ياخي تسلم علي حسن الظن

ونأسف لتأخير الرد أصلاً مشيت مشوار أسلم علي البحر

إسكندرية يا رائع بتشبهك

تحياتي للأولاد

وربنا يخليك يا رب

هسع كنت بسمع في ابوداؤد وهو يغرد :
آلفني في البرهة القليلة
وفارقني ما بين يوم وليلة
جيت داخل المنبر لقيتك بتقول زي كلامو وزي لحنو كمان ..
نلقاها منك ولــ من ابوداؤد ولــ من البشير العوير
جننتونا ذاااتو

حضور ومتابعه وصمت عميق
وسلام بحجم تلك الكتل المرتميه علي عمق ذلك الشئ
كيفنك اخي يسسسسسن وكل من معاكم

Quote: حضور ومتابعه وصمت عميق وسلام بحجم تلك الكتل المرتميه علي عمق ذلك الشئ كيفنك اخي يسسسسسن وكل من معاكم

رشيدة

كيفنك أختي

طولت منك ومن أخبارك

إنشاء الله تكوني بخير ياخ

طمنيني عليكي

Quote: هسع كنت بسمع في ابوداؤد وهو يغرد : آلفني في البرهة القليلة وفارقني ما بين يوم وليلة جيت داخل المنبر لقيتك بتقول زي كلامو وزي لحنو كمان .. نلقاها منك ولــ من ابوداؤد ولــ من البشير العوير جننتونا ذاااتو

يا منعم يا جميل
ياخي وكتين الله جابك بيجاي مالك ومال السيرة دي!
لا البوست دة طاهر و ح يفضل طول عمرو طاهر

حسدتك طبعاً في أب داؤود
عندي ليه شريط مبالغة بس ما عارف أسمعوا وين وسط الحصار التكنلوجي دة

ما عندك لي مسجّل !!

شكرن للحضور

شكرن كتيرن!

Quote: كم انت شقي بالشعر وكم هو حفي بك ================== يوم بجي اجضم ليك اضنينك ديل في مصر يامتمرد

يا موصلي
ما قلت بتجينا يا راجل
مالك كبّرت اللفة ياخ!

أخبارك و صحتك طبعاً اليومين ديل مزازيكنا لي رب السما
كان تجي مع دكتور الفاتح حسين
والله كانت ح تكون حاجة ممتعة جداً
تعال كدي وجضّم زي ما عايز

أتابع يالحبيب



يلفني الهدوءُ والسكونْ
كأنما السكونُ في صلاه

up

شكرن كتيرن!


يرفعوك وليداتك

لكن انت ياخوي جيت قاصد
واللا غلتان في العنوان؟

عموماً مرحبا

الحبيب

ياخي والله جيتك دي بالدنيا

كيفنك وكيفن طارق أخوي و باقي الجنيات
ال في الهند و السند


وأمي كيفنها نعلّها طيبة

قول ليها إنشاء الله الهند تضوي ليك

يا ريت

لو فيني غنية بتشبه رقصتك !

اخي حبيب نورة
تصوم وتفطر على خير
والتحية للاهل جميعا

ربنا يخليك يا مكاشفي

وانت كمان كل سنة طيب و شديد

تصوم وتفطر علي خير وخليك قريب في الخيمة

كورال

لم يكُن حبّك مجرّد أغنية
فرجاءاً أسمحي لي برقصة !
بين قوسي كمنجة
و غيثارة
بين قوسين..
(النقدة و الما بتصفق ما معانا ! )



____
خليك جادي بلاهي و كمل لينا القصة القصيدة

خدر يا عسل

كدي أسمع معاي الفاصل الجايي دة

وبعدين بهدي ليك صندلة

فيها شي من ريحتك

غنيتوا معاك بي أجمل لون
رقّصنا سوا الناس في الكون
أديتِك فال
ما تجيني شِوي في رُبع التون !

في الفاصل الجاي
والدنيا غُنا
وقّعتك لي حلمين ومُني
الوتر النام
صحّيتوا أنا
ولقيتك ترقصي لي
في حتة هنا

صندلة


ساعة مرق صندل نداك
أبنوسة نامت في الخدار
تضحك تطِل في الكون شمس
غرقانة في الليل و النهار
لونك تفاصيل المطر
مين حنّن الغيم بالسمار

صوتك ضجيج الضحكة في نُدرة فرح !
ضحكة قصايد نايمة في خاطراً سرح
زمناً سمِح .. أتغتّي بي أقواس قُزح

دانت قطوف حسنك بكي
ناحت عليك مُقلة سحاب
قشّت دموع سنبل حزين
الريح تكتّحوا بالتراب
جيتي ومعاك صُرّة عشم
قمراً رحل من ليلنا غاب


قنّن حليب شمسك عصُر
مرتاح علي طيب صندلِك
أتقريف عليك نجم السما
بالقمرة يوم ما بدّلِك
صندل يدُوخ من طيب نداك
يعدِل مزاجوا قُرنفُلِك




يللا أرقص معاي يا خدر

حبيب نورة

وهاك من اجمل ما قرأت لمحمد عبيد الفاضلابى





طيره جميله
ونزلت من عالي الذكرى وللأيام
في طريقه نزلت
في الأرض
ومعاها النور
والمطره جداول
والتنور ..
مخزن لي صور الرحله مع زينب
زينب في قامة عرش
علي ساحل
كانت جنحاتها بترسل نسّام
وكل ما نقير الصوت في المطره
يفتح رحم البذره
أشعر بي طعم الدنيا عميقه
وتستاهل
في الرحله كتير
نمشي ل ِ قدام
زينب طائر
محروس بالغيم
طاهر
عائش برحيق العشب
كافل حقل الأشواق
عصفور يعرف نفسو العصفور
لا ضاق في رحلتو للذكرى
لا سلّم روحو الأحلام
زينب طائر غرّد
وإتفرّد
نمرق منو الألحان
طائر ممكن يتنوّت
إذا حتى النوته
ف ِ قانون الفنان .. ضيقه
و حَ تحرج بعض الأنغام
... ... ...
زينب طائر ... ... ( والد )
أنواع النسمه
وصانع ألوان الرسمه
من ريشو بتمرق تعريشه
تضلل
زينب والسحب المافيشه
ألوان زينب ألوان
سفره ... ومغنى ... وطفلين
ألوان في عين القمر
الدرّه خيوط وسلام
... معنى الحريّه
وصادقه
زينب طائر من صلّى ...
من يوم ما زارنا
وحلا
طالع بالعطر قيام
صحّ المنحاز وإتخلى
والغير منحاز وإتخلى
ما مرقت شوفها ومارقه
إلا ونزلت ألواح ..
جلست محفوظه من الله
زينب عصفور ويغني
شمس المحتاج للضوء
درب الأفواج للعرفه
ياطائر ياخ يا زينب
ما نبني العالم تاني
ب طريقه جديده وحرفه
ومحروسه بعام ورا عام
يا طائر ياخ يا زينب ...
يا طيره جميله ونزلت
من عالي الذكرى وللأيام
إستني شويه
إمكن لو إنك عارفه
لي حال الدنيا وصيه
ح تكون الأرض وصيه
مادام إنتي توصيها
بالخير والحُب
ياطائر يا زينب .

بخاف المطرة
وكتاباتكـ
ونبراس بت الشواطين الفنون
لوختيتوني ما بتجيني عوجة
برقد وأستقر على خطة حياة
بس !!!

عارفك ماك نصيح
اني آمنت بالله

Quote: عارفك ماك نصيح اني آمنت بالله

ود جبرين السمح

تسلم لي إنت
وحاتك جيتك براها حفلة

ربنا يديك العافية يا جميل

يا زول انا تعبت منك ..كلما القاك واقول خلاص فجأة تبعد وفص ملح وداب

بس لو حتقول كلام جميل زى كدة احسن خليك بعيد وانضم يا حبيب

تحياتى ...انا سافرت

Quote: قنّن حليب شمسك عصُر مرتاح علي طيب صندلِك أتقريف عليك نجم السما بالقمرة يوم ما بدّلِك صندل يدُوخ من طيب نداك يعدِل مزاجوا قُرنفُلِك

حبيب نورة المشوطن

بريدك في الله كدا

كلام زي دا مش يرقص
دا يكمل كل الهجيج الفي العصب

Quote: حبيب نورة المشوطن بريدك في الله كدا كلام زي دا مش يرقص دا يكمل كل الهجيج الفي العصب

أشرف السر يا غالي
ويعلم الله كلامك دة نزل علي برداً وسلاماً

يفتر حيل غناي

وما ألقي البشبهك


تسلم كتير

ولي قدام

شكرن كتيرن!

Quote: يا زول انا تعبت منك ..كلما القاك واقول خلاص فجأة تبعد وفص ملح وداب بس لو حتقول كلام جميل زى كدة احسن خليك بعيد وانضم يا حبيب تحياتى ...انا سافرت

حامد يا سيد الناس
وحاتك ضربت ليك كنت عايز أسمعك غنية
قالوا لي الرقم دة ممنوع من الرقصة حالياً

أصلك شقي وماليك في الغني نصيب

أبقي طيب

Quote: بخاف المطرة وكتاباتكـ ونبراس بت الشواطين الفنون لوختيتوني ما بتجيني عوجة برقد وأستقر على خطة حياة بس !!!

أحمد موسي
ما أمطرهذا الصباح!!
المطرة دي ما تُمتُم السما

بحكي ليك عنها في الفاصل الجاي

خليك قريب والتحية كمان لنبراسكا

شكرن كتيرن!

Quote: طيره جميله ونزلت من عالي الذكرى وللأيام في طريقه نزلت في الأرض ومعاها النور والمطره جداول والتنور .. مخزن لي صور الرحله مع زينب زينب في قامة عرش علي ساحل كانت جنحاتها بترسل نسّام وكل ما نقير الصوت في المطره يفتح رحم البذره أشعر بي طعم الدنيا عميقه وتستاهل في الرحله كتير نمشي ل ِ قدام زينب طائر محروس بالغيم طاهر عائش برحيق العشب كافل حقل الأشواق عصفور يعرف نفسو العصفور لا ضاق في رحلتو للذكرى لا سلّم روحو الأحلام زينب طائر غرّد وإتفرّد نمرق منو الألحان طائر ممكن يتنوّت إذا حتى النوته ف ِ قانون الفنان .. ضيقه و حَ تحرج بعض الأنغام ... ... ... زينب طائر ... ... ( والد ) أنواع النسمه وصانع ألوان الرسمه من ريشو بتمرق تعريشه تضلل زينب والسحب المافيشه ألوان زينب ألوان سفره ... ومغنى ... وطفلين ألوان في عين القمر الدرّه خيوط وسلام ... معنى الحريّه وصادقه زينب طائر من صلّى ... من يوم ما زارنا وحلا طالع بالعطر قيام صحّ المنحاز وإتخلى والغير منحاز وإتخلى ما مرقت شوفها ومارقه إلا ونزلت ألواح .. جلست محفوظه من الله زينب عصفور ويغني شمس المحتاج للضوء درب الأفواج للعرفه ياطائر ياخ يا زينب ما نبني العالم تاني ب طريقه جديده وحرفه ومحروسه بعام ورا عام يا طائر ياخ يا زينب ... يا طيره جميله ونزلت من عالي الذكرى وللأيام إستني شويه إمكن لو إنك عارفه لي حال الدنيا وصيه ح تكون الأرض وصيه مادام إنتي توصيها بالخير والحُب ياطائر يا زينب .

والله يا محمد كمال ما عرفت أعمل كوتيشن لي شنو
و أخلي شنو
كلام جميل جداً يا حبيب
التحية عبرك للشاعر الجميل محمد عبيد الفاضلابي
ربنا يخليك يا رب
صباح بي لون زينب

عزفت غنيوات المطر
ما المطرة تُم تُم السما
شدّولوا ورِكِب في بيت شِعِر
في حبوا غرقان ما سِكِر
ضمّاها بي قُبلة حنين
بي حضنوا قالد أنجُما
ُ

ما المطرة تُم تُم السما


صفّق مع الغيم النشيد
شاغل سماوات الطرب
رشّاها مزيكة ونغم
قال للخدار جرسك ضرب
رويانة بيك غابة نخل
ما غالتت تمراتو تب

ما المطرة تُم تم السما

سِهرت معاك في ضُل وتر
رقصت حِداك غابة وشجر
عزفت غناك نجمة و قمر
والدنيا فرحك ناغما

ما المطرة تُم تُم السما

يا مدوزن بالسماح
يا معطون فى ريحة فكره
قاعده مربعه جوه الروح
يا فرحة أمس
يا غنوة بكره
يا ترانيم المسا
يااااااااااااااااااااااا

كل أوراد الصباح

حبها وحبيبنا

داير اقول ليك شنو

أنا متأكد الله حيوديك الجنة

ويزيدك خدار على الخدار الفيك

مكونات الوجود الشفافة ,كل ما تمدد هذا المكون وازدادت مساحته فى النفس كلما ازدادت سعادة الروح وهذا ينعكس بدوره على كل المحيط , ابسط انواع الحب هو التعبير بالكلمات الجميلة والاحساس بالموسيقى ودرجاته تترقى فى النفس

Quote: مكونات الوجود الشفافة ,كل ما تمدد هذا المكون وازدادت مساحته فى النفس كلما ازدادت سعادة الروح وهذا ينعكس بدوره على كل المحيط , ابسط انواع الحب هو التعبير بالكلمات الجميلة والاحساس بالموسيقى ودرجاته تترقى فى النفس

أحلام

ما أبيض هذا الصباح و أنتِ تغمريني بهذا الدعاش!

تكفي روحك الجميلة دي
عشان يفوح الطيب هنا

سعدت كتير بوجودك في أون لاين

ومتابعك بشغف


تسلمي لي

وشكرن كتيرن!

يخدّر ضراعك يا مطر


قلبك الطيب دة دايماً بمرق المطرة

ياخي في قصيدة جميلة

رايحة مني

والله لو جبتها لينا هنا واللا بيهناك

تكون ما قصّرت تب

الله يذكرني ليها

صباح الخير ياحبيب نورة

الصباح الباهي لونك


وضاحة يا فجر المشارق

طلباتك أوامر يا مشوار سمحنا

إنت بس اتذكر ياتو قصيدة
وحاضرين حاضرين
للناس الحلوين


وأنا بتذكرك وكت الكلام يصبح حديقة

زى ما بقول أحمد شاويش

المطر

عارف إحساس الزول النسي فجاةً كدة سورة الحمدو
بعد تكبيرة الإحرام !

بالضبط دة حالي

و أنا عارف من غير القصيدة دي
بتبطل صلاة إحتفالي بي نشيدك!

يا الله!

باقي لي فيها حاجة زي
كان طعمها أزرقاً مثل الغيمة حين تهم بعناقِ الطين!


كدي قوقِل لي جواك

وأتلافاني بيها

عليك الله يا حبيب

فى زول بقدر ينسى لون الله المفضل ؟

لكين يا مطموس دى ما قصيدة

ده كان نضمى ساى لى البت اللونا أزرق زى نية الغيمة

نية الغيمة ساعة تتجمل وتقشر وتسرح ضفائر الرذاذ الفيها

وتنوى زيارة الواطا

بجيبا ليك تب

اصبر لى عاد النفتش ليها راقدة وين

Quote: فى زول بقدر ينسى لون الله المفضل ؟

ههههههههه
عسل والله

الله يديك العافية و أنا راجيك
علي اليمين شدّة ما موزونة ومكيفاني قايلا قصيدة

لميت فيها يا حبنا

اجيبها ليك هنا

ولا اخليها تصب براهافى حتة تانى ؟

دي يا مطر غيمة


تمطر محل ماعايزة
طالما خِراجها سيعودُ لي !

قريبا من ذات المكان
بين خد المساءٍ ورمش النجمة، تواعدنا جهراً
قال القمر:
قوموا إلى عشقكم يرحمكم الله
فقمنا
كان طعمها أزرقًا مثل نوايا الغيمة حين تهم بعناق الطين
كان الوقت بلا طعمٍ ولا لون، فقد فضحته لمعة الحزن فى العينين، وما عاد يحالف سوى الفراغ، كبل الفراغ بكل ما فيه من سفور وتعب لا يصادق إلا العتمة

قمنا
ونحن فى كامل سذاجتنا الخضراء، مثل "شتلات نيم" صبية تحلم بأعراس العصافير العاشقة وبفساتين النسمات المزركشة بالعطر

قمنا

توارى الوقت خلف وجهه ، ثمة قلقِ كان يربض فى خاطرِ الهواءِ
وبعض ضيقٌ، حسرة ربما، فى صدرِ السماءِ
قلتُ
يا سيدتى
خبئى هذا الليلَ فى عينيكِ، وأنا سأخبئ الأحلام فى "مخلاية" القصيدةِ
قلتُ، ونحن على أهبةِ الدخول إلى فناء النشيد، والتهيوء للرجوع إلى مشيمةِ البدءِ
هتفت سراً فى آذان المصابيح الطروبة
غداً نلتقى يا ايها الضوء الصديق
فقط دع هذا التعب، يتعب قليلا، وموعدنا مشرقِ الأرواح
ف حى على البقاءِ
حى على الرجاءِ
ثم ولما تمطى ليلُ النشيدُ لينامَ
تأهبَ القمرُ لإحتضان ظلال الساهرين، أشرع نوافذَ الضياءِ و"تحكر" فوق فضته الوثيرة
كان كحل الشوق فى عيون الأغنيات يتوهج مثل ضحك الزهرات أمام مرآة الشمس
كان موغلاً فى الفرح، و كنت مستغرقا فى موتى

قلتُ
يا سيدتى
كيفَ بعدها المزار، وكل هذه الدروب معبأة بحصى النشيجِ
يا سيدتى
كيفَ الصباحُ غريبٌ هكذا، وكيفَ تخاصمنا محطات الوصول، تشيح بوجوهها
والقلب باسط جنباته بوصيد الأمنيات

يا سيدتى
لمى إليكِ جدايل هذا الأصيل وأغزلى لنا أمنيةً
من عسجد الشفق، فهذا الليلُ لم يعد وفياً كما كان من قبل
لم تعد النجوم على عهدها القديم

يا سيدتى
قد اصبح، والله، هذا العشقُ أطلالاً من وميضٍ
لا تستطيع الصمود بين نيرانِ القبيلة
والأمل معلقٌ على مشاجبِ الغيوم، فلا السيفُ أصدقُ ولا الكلام
بل العشقُ أولاً

يا سيدتى

قتل اصحاب القلوب، النار ذات ال ----

وجفنُ القصيدة يرفُ ويراقبُ الصباح
وما تبقى من نبوءة لا رائحة فيها
تتمتم
غداً شروقُ شمسكم عدم
غداً غروبُكم جراحْ

إذن
خذى بقوة ما تبقى من وعثاء هذا الغناء
ودعينى استريح قليلا فوق موقد الإنتظار

فقد تشابه علينا الزهر والجمر

بعد دة خليني أصلي براي


وقطع شك أول ما أنتهي من فروضي


بجي أتنفّل هنا



يااااااااااااااااااه

مرتاح مكوِّع فوق ضل كمنجــة

حتّي في مسامعو ... صفق الوتر الضليل !!

متلفـِّح ورقــة التوت يستر بي نغيمــا نشاز حر الضنـ\ـي

نقرش النسام يدوزن في العصب ... أيقاعو كان تُم تُم خفيف!!

رقَّص الدنيا وهبش... عالي التضاريس المخصمة المزازيك والغنـا!


مقطوعة جيتك ....

أشتر رحيلك قطع مصارين الوتر

يحرق حشا النوتة ويعطِّش غابة كمنجـــات الحنين

كُبـــِّي مزيكة أنينك يحرد الناي النواح

شدي اوتار حنينك ..... الليل بقول ما داير صباح

خلي كل الكون سجينك نهتف نقول حي علي الفلاح!


أضبطي الأيقاع علي شهيق وجع النصوص

خلي الحروف كورال نشيد....... زمناً نشيد من جزيل حزنو

أوركسترة فرح!!


خاتفـة لونين من زفيرك

حارقة دمك أنو زفــــَّة الغنيات جوقــة جروح لمن تجيك سيرة المحن!


نغمك يخش يغشي المسام ... يبقي الكلام صفقة ونغم

أيقاعو كان تُم تُم خفيف !

رقصك يرد أعتبار طمبور حزين .. أوتارو كان لابسات سواد

مشدودة لي زمن الحداد!


حاجة تطرب ....!

أليمة زي وجع طلقــاً صناعي في رحم فاصل موسيقي!

صولة جيتك!! سلم الشوق الخماسي ... رابع مستحيلات النشاز

مثلث أضلاعو شوقين وانت!

وتاني حسك يمرق علي الخلا ويقول

أول حروف أسمك ...دو ري مي

يابت القوافي الطاعمة دي !

مرتاح مكوِّع فوق ضل كمنجــة

تشاغلك بي نديـَّات الثمر

تعزف بي فروعا نغمة تطرب العالم نسيم

تحلم تقيِّل في مسرح الزولة الموسيقي .... متوسد الناي حلم

تتمني في زمناً جميل !

حسك طبلة .... وماك دلوكــة !

لو قسمتي علي ربع التون بديك الفاصل الجاي !

ولسة الليل شافعاً بحبي

اللحظة السمحة بتعدي في سرعة تُم تُم خفيف !

زي سوبرانو بِطل من صوتك ... بايع روحو عشان مزيكـة !


ونحن نلم في كراسي الحفلة !

ولمة ناس راجيين الجرتق ... شايفك مرتاح

مكوِّع فوق ضل كمنجــة !

متلفح ورقة التوت تستر بي نغيما نشاز حر الضني

نقرش النسام يدوزن في العصــب

أيقاعـو كان تُم تُم خــفـيف !

ياصاحب القوافى الطاعمة

Quote: حاجة تطرب ....!

و كفي

الزغرودة يا بت اليمني

ما تخمينا ساهي

وحاة الله لابيني لا بينك

يعني القطاعة

يعني الحرابة

شايفك اون لاين من الصباح ونصت نهار
اظنك مشغول بى تجهيز الخيمه احجز جنب ست الجبنه
متابعه لصيقه

Quote: شايفك اون لاين من الصباح ونصت نهار اظنك مشغول بى تجهيز الخيمه احجز جنب ست الجبنه متابعه لصيقه

المحرب الجميل
ياخي كل سنة وانت طيب

الخيمة السنة دي ذكريات ومواقف وطرائف و بلاوي متلتلة

والجبنة دي جايب ليها شيخة ومشيّخة

خليك متابع بس

واللهِ يا الحبيب صاحبك قُتْ ليهو ما تكتر لها

الدولارات..أخلعه بالروبيَّه....ما سِمِع كلامي

قالوا كلام القِصيِّر ما بنسمع

أها خالتك من كاني كوماري لي بنقلور لي إسلام اباد

والحين في دلهي ومتوجِّهه التاج محل.

بس قول يا الحبيب إن شاالله ما تعرف درب(بوليود)

Quote: واللهِ يا الحبيب صاحبك قُتْ ليهو ما تكتر لها الدولارات..أخلعه بالروبيَّه....ما سِمِع كلامي قالوا كلام القِصيِّر ما بنسمع أها خالتك من كاني كوماري لي بنقلور لي إسلام اباد والحين في دلهي ومتوجِّهه التاج محل. بس قول يا الحبيب إن شاالله ما تعرف درب(بوليود)

و أنا بقزقِز في فريع العنب الدقاق جيت غاشي البوست
علي الإيمان أول ما قريت كلامك قرّبت أتفنقل من الضحك
حتي أسأل العنبة !
ياخي صاحبي أنا كلّمتوا ووريتوا
هسة تاخد ليها كم يوم هناك
تجي تشبكك مِي توم سِي بيار كرتا هُو !!
و أنت طبعاً ما ناقِش أبو النوم
(جلدِي جلدِي) تقول ليك وهي بتلولِح فوق راسها علي الطريقة البليودية
الخايفين منها!
صديق أوردو جانتا نهِي !
و إنت طبعاً (نهِي) لمّن بيهناك مافي معلوم ومُخ تعبان !
والعجب لو شافتك مبحلق في المزيعة بتاعة أخبار العربية الشبه حليمة بولند
الساعة التقول ليك شادِي نهِي !

إنت ذاتك لمّن تتأكد من الغزو الثقافي الهندي!
يازول ها كان صاطت ليكم حلّة ساهي
أعدم نظري تهرِد مصارينكم بالشطة والفلفل الحار
تقوم تقول يا ود يا أبوطارق ما أخش لي كورس مكثف في الأوردو
لكني صدقني غلتان غلتاً يتونّسوا بيه
أنا لو في بكانك أول حاجة أسويها
أحزف قناة زِي أفلام و أرفض التطبيع بكلِ أشكالهِ مع بوليود!

بوليود تطير عيشتا!!

كلو من طارق كان يكتّر ليها في الروبيات

منعول أبو دي (زاندكي)

انت لسه صاحي يا حبيب ..
انا بسببي .. انت مالك ؟

يا منعم

نفس السبب المسهرك

أنا حاميني النوم!

يا حبيب الكل ..كتابة جميلة ,وروح أجمل تدل على ذكاء وتسامح لا حد له ..
أكتب ياخي وزي ما قال حبيبنا الموصلي

Quote: كم انت شقي بالشعر وكم هو حفي بك

Quote: يا حبيب الكل ..كتابة جميلة ,وروح أجمل تدل على ذكاء وتسامح لا حد له .. أكتب ياخي وزي ما قال حبيبنا

روزمين الصياد

أفتقدك كثيراً هنا و أتطلع إلي المزيد من الإبداع

قرأتُ لكِ اليوم في الفيس بوك ما تركني أسيراً لتلك اللغة الطازجة
التي ترسمين بها !


أشكر لكِ هذه الإطلالة المميزة

وكل سنة و إنتي أجمل و أنبل و أفضل

كوني بخير

صوتك رنين الضحكة في نُدرة فرح

فوووووووووق
عشان الناس دي تفهم حاجة :)



--
جهجهته باكات الخيال ذاتو
اكتب خلينا نغط في اللاوعي عشان نوعى

حسبو يا جميل
تكفيني كلماتك لكي أصنع من دمائي وسادةً ورقية
تتكئُ عليها جميع كتاباتي

التي يكفيها بؤساً أنها دون هاماتكم

و المعزة

أحبكم

وهو قسمٌ لو تعلمون عظيم

انا في العيد معـــــــــــــــاكم في القاهرة ..........

وحاجز منكم يا ناس القاهرة التلاتة يوم الاولي ( في الغرام)

Quote: انا في العيد معـــــــــــــــاكم في القاهرة .......... وحاجز منكم يا ناس القاهرة التلاتة يوم الاولي ( في الغرام)

عمر الحاج


ناوي تعملهم ليناعيدين

يا سيدي خير وبركة


تشرفنا
كتير


شكرن للعيد الجايي

ياخ طريقة نخرمج بيها البوست زاتو ما لقينا!!
طقطقتنا عديل يا عمكـ! أي والله!!














_
شكرا لساعي البريد!

Quote: ياخ طريقة نخرمج بيها البوست زاتو ما لقينا!! طقطقتنا عديل يا عمكـ! أي والله!! _ شكرا لساعي البريد!

ود الصايم أعمل نايم

زي ما ساعي البريد عجبوا الكلام نايم عمل!

ياخي طلّتك دي بالدنيا كلها
ياسيدي تسلم وكل سنة وانت طيب

لكن تعال بكرة خرمج معاي في الخيمة الرمضانية
بس تعال لي بعد الفطور

بالنهار ما حبابك

يا ريت لو فيني غنية بتشبه رقصتك!

كان شلت من طيفك شبّال
كان شلت نداك موّال

سمار اللون شموس دبلت مع المغرِب
سحر لونك سمار في قافية متسرّب
جمال مجنون مغتغت بي أدب وفنون
معاهُ عيون تشرِّق فينا و تغرِّب


نغم ضحكك في صحية نجوم الليل
ملاذ الضّي فوق قمراً قدل في النّيل
يفتش ليك زمن بحلم بجيّاتك
يتاوق ليك ..عالم جميل و نبيل
توشوِش لي .. بيوت شِعرك
و ترقُص غنية لي و تميل


صِحت في الدم شرايينك
و ضحكت لي عيون طفلة
معاك بحلم بضُل الشمس
بفتش لي زمن أحلا
عيونك إنتي تفرح بي
وترقص ليّ في الحفلة
سمار اللون بسيمات البنيّة الريد
كلام نجمة ومرور نسمة وصباح الفُل
زفاف غيمتين و شوق زهرة
حنين المطرة لما تصُب و تسقي الكُل
ملاذ صُرّة عشم دفّاي
وصوت غنّاي
وقعدة ضُل

سمار اللون قلبي بيك مفتون ياسمار اللون

Quote: ما عارف البت دي مالها معاي اليومين ديل الشكية لي أب إيداً قوية

يا الحبيب يسن الحنين
والشوق الدمدم صوتها
والنبرة الفضحت لونها
شهقت مرتين وشهقة تالتة
جاطت كل حسابتها
والسبب مكوم بين حروفك المهجومة
هجمتها وفي رواية اخري خلعتها
والشكية لي ال لا نام لا اكل الطعام

الحبيب دحين ات كت صايم لما رصيت جنك دا آ جنا
اللهم اني صاااااااااااااااااائمة

Quote: والسبب مكوم بين حروفك المهجومة هجمتها وفي رواية اخري خلعتها والشكية لي ال لا نام لا اكل الطعام الحبيب دحين ات كت صايم لما رصيت جنك دا آ جنا اللهم اني صاااااااااااااااااائمة

سومة

يا جغمة برتكان ترطّب حيرقان المسافات
عارفة أخطر لحظة عاقلة هي البتمرق من لاوعيك

لاوعي الزول قنديل من وعيو ونبض الحلم المارق منو
فيه ملامح من صحيانو!


النبي فوقك كان ما جيتي تاني

كدي أفطري وتعالي


البت السمورة دي طاااعمة ياخ

سمار اللون

.....

صدقني يا حبيبها ، وددت أن أكتب لكني خشيتُ أن أُكتَب عندها صِدِّيقا.
ما تقيف،
خليك موهط في واطاتك دي،
زي ما القدم ليو رافع
القلب والقلم كمان.

محمد يا مرتضي

في حضرة جلالك يطيب الجلوس

أما أنا فتكفيني إطلالتك السمحة دي
ما كلام الكون بحالو

تسلم لي وربنا يجبر بي خاطرك

Quote: النقدة و الما بتصفق ما معانا !

طق طق طق طققققققققققققق

اها

Quote: طق طق طق طققققققققققققق اها

فادية اليمني

دي زي صفقةناس أم درمان وكل شئ تمام

بالجمبة كدة

تحية خاصة

لنرقص معا ونخرج من ضوء لضوء اخر
نركل ما تبقى من حزننا لامرأة من ضجيج الحنين
غنى ياحبيب نورة

حبيب نورة

ياريتني لو أنا أنت وأنت ما أنا
ياخ كلام يلخبط أي دنيا .. أغرف وأدينا الله يديك الفي مرادك

قاعد متفن وحفيان زى المشرد
جاك البلاء فى شكلك وكتابتك البتكتبا هنا
اها يعنى بتفرح كان زول مات ليه فى جمله؟؟
غايتو عليك جنس بشتنه،،،

Quote: قاعد متفن وحفيان زى المشرد جاك البلاء فى شكلك وكتابتك البتكتبا هنا اها يعنى بتفرح كان زول مات ليه فى جمله؟؟ غايتو عليك جنس بشتنه،،،

هاهاهاهاها
الموج يا عسل
والله ضحكت جنس ضحك غريب الوجه واليد واللسان
قلت لي!
لاحولا لا حولا ياخ
الله يجبر بي خاطرك يا سيد الناس
والله كلامك دة بالدنيا كلها

تسلم تسلم تسلم

Quote: حبيب نورة ياريتني لو أنا أنت وأنت ما أنا ياخ كلام يلخبط أي دنيا .. أغرف وأدينا الله يديك الفي مرادك

منتصر

دي شنو السماحة والحلاوة دي ؟؟

ياخي والله أنا فرحان ومبسوط بيك كتير

ربنا يخليك لي يا جميل

تشكرات أفندم تشكرات

Quote: لنرقص معا ونخرج من ضوء لضوء اخر نركل ما تبقى من حزننا لامرأة من ضجيج الحنين غنى ياحبيب نورة

يا سمارة

لنترك الأمنيات السمحة تقدِل وتسكت الخشّامة
و تنزل في العوازل كي

و أنا كمان بقدِل بي طعم فرحتي بي طلتك السمحة دي
شكرن كتيرن!

Quote: حِنينة وطيبانة مرقت حفيانة تهبِش بي ندي خطواتا المطر النازل هسة الغيم الشايل هسة وعشان حِنينة و طيبانة تهديني حُرقة حشاها شان ترطّب مسامي بي دلع القصايد !

اتحفنا كمان و كمان

Quote: اتحفنا كمان و كمان

سناااااااااااااااء
يا ستي أشكرك علي المرور اللطيف
والكلام كِمِل وحاتك
ما فضل لي إلا أبني ليك قُبّة من صلصال غناي



تسلمي تسلمي تسلمي

ولكِ الحبَّ أجزله