Post: #1 Title: عبد الفتاح وسوسن ..... شمار حاااااااااااااااااار Author: ياسر بيناوي Date: 08-02-2010, 03:15 PM
تجدهم في لغوهم يتهامسون بمتعة من ملكوا مفاتيح خزائن الأسرار ، ومن شدة الفرح وكأن كل منهم ما هو إلا المكتشف العظيم ( كولمبوس) وقد أكتشف كل الدنيا بحالها ! يتبادلون المعلومة إن كانت صحيحة أو مغلوطة وكأنها سر عظيم من أسرار دولة العدو الغاشم التي قد هُتك سترها و سيُهدم عرشها لا محالة في غضون ساعات ( نميمة) يتبادلها الأصدقاء قبل الأعداء !! يسافرون بالطائرات لأجل استقصاء الخبر واستجلاء الأمر ( القنبلة) ومن لا يستطع للسفر سبيلاً يهدر دماء (الدينارات) وحصيلة الشقاء اليومي ليعرف آخر أخبار ( الشمارات) عبر أسلاك الهاتف !! يتنافسون وكل منهم يؤكد انه يملك من المعلومات عن القصة مالا يملكها غيره ! كل منهم يرص الكلمات كبنيان بالطوب الأحمر الفاخر ليكون الأكثر لفتاً للانتباه والأنظار ولإثبات انه يعرف أكثر من غيره !! أصحاب الخيال الخصب يكسبون العديد من جولات ( القوالات) بما يتخيلونه ويسردونه من قصص يندهش منها الخيال بذات نفسه !! ذوي الأجندات الشخصية يستبدلون ( كوز المويه) الذي يمكن أن يسكبوه بداخل وعاء الأحداث بـ ( زير عديل) حتى تكون القصة أكثر سيولة ودهشة ومتعة !! من يعشقون سرد الحكايات على نار هادئة يضعون حلة ( رزهم) ولا يستعجلون خروج المقطوعات اللحنية النميمية على عجل حتى لا يكون الإيقاع نشازا وتكون رواياتهم غير قابلة للتصديق السريع !! جماعة ( القطر قام) ينتظرون قطارات أخرى ولا يهمهم شئ بقدر أهمية خروج الطبخة أكثر ( تسبيكا) وبطعم السمنة البلدي !! وفيما كل هذه الزوبعة والهيلمانات وهل مستوى ( الشمار) يستحق كل هذا العناء الذي يبذله الشماشرة والشمشارات ؟!! وأين يجد هؤلاء القوم وقتاً لمتابعة تفاصيل خصوصيات غيرهم بهذا النهم العجيب ولماذا وما هو الشئ المستفاد من السعي وراء أخبار الغير ؟! ونجد أن من أكثر ( الشمارات) التي تستهوي من ابتلاهم الله بحب تتبع خصوصيات وأخبار الناس هي على التوالي أخبار العلاقات الغرامية والزواج ، أخبار الانتماءات السياسية والحزبية ، أخبار الدرجات العلمية ، أخبار الثروات الشخصية وغير القومية وغيره وغيره !! وأكثر ما يثير حيرتي في موضوع الـ ( شمارات) هذا هو سعي البعض بدون كلل ولا ملل لمعرفة (فلان) يحب من و(علانة ) ستتزوج بمن !! ولا أدري ما هو وجه الإثارة في هذين الأمرين على وجه الخصوص فالحب والزواج أمور عادية جداً وقائمة منذ قيام الدنيا ولا جديد في ذلك !! تجد الشخص ( الشمشار) يتحدث بزهو من فتح عكا ، بل من وجد فانوس علاء الدين السحري ، بل من إمتلك مفاتيح الغيب بيده وهو يسرد في شبق للشمارات عجيب !! الو .. الو أيوة ياخ أنت وين ما بترد على التلفون عندي ليك شمار رهييييييب لسة أخدر مندي !! شنو ؟ لا لا يا عمك ماااااابنفع بالتلفون ده شمار عاوز ليهو شيشة كاااربة في قهوة ( سلفني أضانك ) ومعاها قهوة صاموتية يلا مواعيدنا بعد ساعة أوكيه ؟ أهااااا الليلة يا صحبي مفروض موش تسلفني أضانك بل حواسك كلها لأنو الشمار خطيييير شديد !! شنو ياخ ما تصبر مالك مكتول كدا .. هههههههاي !! عارف كاتلك الشمار لكن خليني أكمل حجري ده ياخ رأسي دي لازم تتزبط في الأول تماااام عشان أرص الرصة صااااح يا وهم !! اها هات أضانك قريييب وإستعد للقنبلة !! بتعرف عبد الفتاح طبعاً ؟! شنو ياخ ركز ماتطير لي الحجر من رأسي (عبد الفتاح عبد القيوم عبد الصمد عبد الستار ) صاحبنا في الشركة ياخ ما بتعرفو ؟! أيوة .. أيوة أها المفاجأة المذهلة عارف طلع ( مجكس ) منو ليهو تلاتة سنين ومتفقين على الزواج ونحنا ماعارفين ؟! ياخ أصبر لي الحجر التاني ده أهم من الأول انت مالك شفقان وراك شنو ؟! ياخ ما تجوط لي في رأسي أنا حر حجر تفاح وحجرين معسل حتى رأسي يزبط أنت مشاركني في جمجمتي ياخ ؟ هسة بقوم ومابوريك عبد الفتاح مجكس منو وأخليك تدور تلفونات الليل كلو وما بتعرف شئ لانو الشمار ده بالذاااات أنا منبعو ومصبو ولسة ما فكيتو لباقي البشرية الوهم الزيك ديل فاهم ؟! طيب خلاص ما تصر وشك ده زي فردة الكبك البدون شراب .. بوريك بس أكمل قهوتي دي ! أها ياعمك القنبببببببببببببلة .. تاك تاك تااااااااااااك !! عبد الفتاح مجكس مجكس مجكس مجكس سووووووسن !! موش شمار رهيب بالله ؟! يا الله منك ركز ما تجننا ياخ .. سوسن السمحة ديك ياخ أم عيون كباااار وجضوم منفخات وكرعين زي طفايات القاعة وايدين زي الكلاشنكوف ونخرين زي برج الفاتح وكدا ياخ البت الشغالة في الحسابات ديك ما بتعرفا ؟! أي والله تصدق ؟! انت مالك عرفت كيف ولا بتاع المهم عرفت وأنا زول خطير إنت عارفني !! أها يا عمك الموضوع ده خبطة الموسم عديل حانفت الشمار ده على الدول العربية والأوربية والأسيوية كييييييف ؟! كلامك صاح ماسنجرات وفيس بوك واسكايبي ورسائل أس أم أس سريعة وبتقضي الغرض لأنو الناس ديل كان ما لحقناهم قبل ما يعرسوا وفتينا موضوع جكيسهم القصة ماااابتكون زابطة وبيكون شمار من النوع العادي ما الاخدر ومدقق ولا شنو ؟! خلاص يا فردة يبقى نقسم المهام والدول بالوسائط المتعددة ونتلاقى بالليل وانت زبط لينا الحلة بالله .. عديلة ؟! خلاص يا صحبي وأنا بجيب معاي الشامبيون والكوتشينة وحبة تسالي وفول حجات ودوم و النبق النبق النبق النبق !! ويظل السؤال معلقاً بلا إجابة ومحيراً ما هو الشئ المثير في اكتشاف أن عبد الفتاح على علاقة حب مع سوسن وينتوي الزواج بها ؟! وما سر اللذة والمتعة في تتبع (البعض ) لخصوصيات غيرهم والبحث وراء علاقاتهم الغرامية وأسرار حياتهم الشخصية وقصصهم وحكاياتهم وأخطاءهم العادية ؟! و تسك خبر الشمار وناسي القبر والنار سيب نبش الديار لي كل بيت أسرار وكان جوك ينبشوك ببقى الشمار ليك حاااااااار !! و حفظنا الله وإياكم ! نادية عثمان مختار http://www.nadiamukhtar.com/
بالمناسبة نادية فقد الباسوورد يابكري
خالص الود
Post: #2 Title: Re: عبد الفتاح وسوسن ..... شمار حاااااااااااااااااار Author: ياسر بيناوي Date: 08-02-2010, 03:29 PM Parent: #1
Post: #3 Title: Re: عبد الفتاح وسوسن ..... شمار حاااااااااااااااااار Author: ياسر بيناوي Date: 08-02-2010, 04:14 PM Parent: #2