درب غناك
موجا مارق
من بحر الليل
طالع من وجع الفجه
وماشى فى مجرى الشهيق
مخدوش مخربش بالأسى
وانت سادر
طاشى عدمان الرفيق
لا زواده ولا دليل
حزنو طامح زى مناك
كلما يوسع يضيق
يا
صبحك فات
بى ليلو
سبعة ضحكات
بى ليلو
ويا
فرحك مات
بى ليلو
سبعة نجمات
بى ليلو
يا
عمرك طال
بى سنينو الراحت
تايهة ما لاقيه الطريق
يا
حالك حال
مسجون فى غياهب الغبشه
كاسيهو الرماد
وجمر الريده من جوه
ملهلب فى حشا الحلم الصديق
كلما يرتاح
تتاوره غبينة الشوق والبعاد
وكلما ينعس يفيق
وأماتك الدافقه الحنان
تعبت
تفتش فوق جزاير الريح
تفتش ليكا فى وعر الدرب
باركه فى حضن الضريح
تنده تقالد
فى رواكيب الزمان
تطيب خاطر العمر الكسيح
ما عارفه ضلك من رهابك
حننت قلب المكان
ما فارزه جيتك من غيابك
عطشانه زى عيش الشتا
والمويه دساها الحريق
والموج سليل المويه
المويه يا دم البحر يجرى
جنب العيون الكايسه دمعاتا
جوه العروق الودرت
فى موت روحها نبضاتا
والواطا بت الكون
مرقد الناس المشت بدرى
الليل غنوة الخايفين
ساكت يعاين فى الودار
الموت عديل
اخير كتير
اخير كتير من الفزع
مين البورينا الدرب
مين البخت الجمره
فى مويه الوجع
ديدابك معلق فى السما
وسماك مكتفه بالغبار
وقلب مراكبك بشتهى
الجوه فى خاطر السواحل
وبره فوق برش النهار
الموج قرباب المويه
المويه يا روح الروا
ويا الله هوى
حس الكلام مليان عطش
يا يمه هوى
الريق يباس المشتهى
اسقينا من تيبار صفاك
نادينا نتونس سوا
يا يمه هوى
كبى القصائد فينا
ناولينا الدوا
وبين سلوكة الملح
البتيرب من دمانا
وبين مطامير النوى
حليلا قريفة القعاد
فوق الحكاوى الصابه عينه
وبين ريحة البن الرمانا
قايمة حيشان من وِلف
فترانه نيمات الوداد
بين ريحة الملح
السكن جنب القلب
قفل دروبك بالسهاد
رشرش صقيعة الروح نزِف
وسكة الشوق الحمانا
نفرد جناحو
نبلو فى الضل السمح
نعطنو فى النيل النِشِف
راقدة كيمان العباد
الجاورت نبع الأسى
الموية يا عطشى القديم
الموية يا روح الروا
قيف الغريب بايت القوا
والشوق شراع
فرزع غناويهو الهوا