المجنون بعد ما فرش مرتبته جنب عامود النور قعد متمحن كيف يطفي اللمبة الفووووق ديك عشان ينوم
قام سأل مجنون أجن منه ماري بجنبه : اللمبة بتطفوها كيفن ؟؟
قام ضحك وقاليهو والله أنا مش من البلد دي !!! ..
ـــــــــــــــــ
دحين أعذروني يا جماعة لو قلت ليكم أنا ما من البلد ديك قرابة الثلاثون عاماً ونيف
وبالتأكيد العمر مش ياهو الثلاثون عام الأخيرة ديه
فقد عاصرت قبلها أحداثاً وأحداث فيها الحلوة والمرة ويبدو أن إسم الحلو مر بتاع رمضان السودان
مشتق من هذه الفترات الحلوات والمرات عبر الأزمان
وحكاية الأزمان دي ياها بيت القصيد !!!
فمنذ بزوغ فجر الاستقلال (المفترى عليه) نحن في دخلت نملة أخذت حبة وخرجت
يجي عبدالله خليل يفوت عبدالله خليل
يجي أزهري يفوت أزهري
يجي عبود يفوت عبود
تجي ديمقراطية أكتوبر وملحمتها تفوت كما فات غيرها
يجي الصادق المهدي يفوت الصادق المهدي
يجي نميري يفوت نميري
يجي البشير .. قاعد في نفسنا حتى تاريخه
فقولوا لي بصراحة
السودان أصلاً استقل من منو ؟؟
وبعدها من مين ولا مين ولا مين ولو قعدنا نحسب
حنلقاها (مينات) متثائبة ما تديك الدرب
وبحساب السنين وحساب الدهور والدهورة الحاصلة لبلد
فيهو من الأحزاب والتيارات السياسية ما يكفي
خمسين دولة أفريقية وعربية من اللي كانوا بينظروا للسودان كأمل
يتمركز في كونه سلة غذاء العالم (عربي وأفريقي) وتوووف جووا مارين
بي فوقنا حووووفا وقطعوا خطوات شاسعة جبارة من تنمية وبنية تحتية
بشرية ورياضية (لناس الكورة دي) أصلو يا عيني من الوكت داك الشعب
يرموا ليهو كورة ينسى نفسه وينسى الزمن وينسى الأكل والشراب طالما
أن هلال مريخ بخير فهو على اعتقاد جازم خيرهم من خير البلد .. ما علينا !!
طيب يا جماعة وأنا بتكلم ببساطة ود البلد وليس السياسي المحنك اللي
كسر حنك السودان ووداهو في أبونكلة ونحن لسع ياها النملة وياها المرقة والدخلة
وزمان كان زيتنا في دقيقنا .. هي قعدة واحدة مع فرقاء يتحولوا بعدها لسمن على عسل
هسع دقيقنا وزيتنا سمنهاوبيضهاإتفرق بين القبائل ومنها على العالمية عدل شيء تدخل أمريكي
شيء حنيه أوروبية عاملة فوكس مظبط بالأقمار على الخيرات اللي هنا وقياسها باللي هناك
وغرايشن يطلع
وباسولي ينزل (بوسه واحده ما ضقناها)
شيء نيفاشا وما أدرائك ما نيفاشاالطررررررررررشقت
ومازال الوقت مبكراً على نيفادا
شيء أبوه جا وريحته اللي عملت لينا زكمة مسرطنة
وشيء أبوه ما جا ومش حيجي (علقوها لي في حلمة أضاني) أنا وإنتوا في
والطاهر المرضي تلفزيون السودان الخرطووووووم !!!
والحال ياهو نفس الحال
نملتنا ما زالت تدخل وتخرج
وياها الفرد حبة الشايلاها دي
ولحدي أسع ما عرفناها ياتو نوع هل هي غله ولا فله ولا حلة بليلة
والنملة ذاااتها سمنت وطقطقت من الدخلة والمرقة زي أم العروس
والحبة ياها الحبة ألفي قدومها البي ذااااتو وصفااااته
وكمان من حر الله ما أداها بقت لمان تجي ماشة تتضرع وتتبختر وعاملة فيونكات مين زيها
ولسع نحن يانا نحن
لا غيرتنا ظروف ولا هزت وسطنا محنة
وتمامة الأغنية أخليها ليكم
فيا ساده يا كرام
أقعدوا إنتوا في قت لي وقت ليك
وطارق الأمين الهيلاهوب كان أشطر
وإما
يا نا نرقص .. يا نرقص
ونتبع أولوا الأمر فينا
الراقصين على أشلاء وطن ..
لم يتبق فيه
إلا أنه ناسو
البقو كرورة رأس في جتت كان يا ما كان
ويااااهو الفضل
يطفوا النور
ويقفلوا الباب ولا يتاقووووا ما بيفرق
طالما أن الغربة ضاربة على الأطناب
حتى في الوطن
يبقى مافي فرق أكان بره ولا جوه
هي الغربة
فأبكو معنا