المجنون بعد ما فرش مرتبته جنب عامود النور قعد متمحن كيف يطفي اللمبة الفووووق ديك عشان ينوم
قام سأل مجنون أجن منه ماري بجنبه : اللمبة بتطفوها كيفن ؟؟
قام ضحك وقاليهو والله أنا مش من البلد دي !!! ..
ـــــــــــــــــــــــــــــــــــــــــــــــــــ ـــــــــــــــ
دحين أعذروني يا جماعة لو قلت ليكم أنا ما من البلد ديك قرابة الثلاثون عاماً ونيف
وبالتأكيد العمر مش ياهو الثلاثون عام الأخيرة ديه
فقد عاصرت قبلها أحداثاً وأحداث فيها الحلوة والمرة ويبدو أن إسم الحلو مر بتاع رمضان السودان
مشتق من هذه الفترات الحلوات والمرات عبر الأزمان
وحكاية الأزمان دي ياها بيت القصيد !!!
فمنذ بزوغ فجر الاستقلال (المفترى عليه) نحن في دخلت نملة أخذت حبة وخرجت
يجي عبدالله خليل يفوت عبدالله خليل
يجي أزهري يفوت أزهري
يجي عبود يفوت عبود
تجي ديمقراطية أكتوبر ونغني الملحمة وتفوت كما فات غيرها
يجي الصادق المهدي يفوت الصادق المهدي
يجي نميري يفوت نميري
يجي البشير .. وما فات حتى إشعار آخر
فقولوا لي بصراحة
السودان أصلاً استقل من منو ؟؟
وبعدها من مين ولا مين ولا مين ولو قعدنا نحسب
حنلقاها (مينات) متساءلة ما تديك الدرب وبلا إجابة
وبحساب السنين وحساب الدهورة الحاصلة لبلد
فيهو من الأحزاب والتيارات السياسية ما يكفي
خمسين دولة أفريقية وعربية من اللي كانوا بينظروا للسودان كأمل
يتمركز في كونه سلة غذاء العالم (عربي وأفريقي) وتوووووف جووا مارين
بجنبنا وخلال هذا المرور قطعوا خطوات شاسعة جبارة من تنمية وبنية تحتية
بشرية ورياضية (لناس الكورة دي) أصلو يا عيني من الوكت داك الشعب
يرموا ليهو كورة ينسى نفسه وينسى الزمن وينسى الأكل والشراب طالما
أن هلال مريخ بخير فهو على اعتقاد جازم خيرهم من خير البلد .. ما علينا !!
طيب يا جماعة وأنا بتكلم ببساطة ود البلد وليس السياسي المحنك اللي
كسر حنك السودان وغير من عبارة (ربنا ما شق حنكاً ضيعو) ووداهو في أبونكلة
ونحن لسع ياها النملة وياها المرقة والدخلة
وزمان كان نملتنا أقصد زيتنا في دقيقنا .. هي قعدة واحدة (بالشاي والقهوة) طبعاً
مع فرقاء يتحولوا بعدها لسمن على عسل ويا دار ما دخلك شر
هسع دقيقنا وزيتنا سمنه إتفرق بين القبائل ومن القبائل للعالمية (ما شاء الله وأنعم وأكرم)
شيء تدخل أمريكي شيء حنيه أوروبية عاملة فوكس على الخيرات اللي هنا وقياسها باللي هناك
وغرايشن يطلع
وباسولي ينزل من دون (بوس)
شيء نيفاشا وطرشقت وغازاتها ملت كروشنا الأصلها مليانه بالمغسة
ومازال الوقت مبكراً على نيفادا
شيء أبو جا وريحتها اللي عملت لينا زكمة مسرطنة
وشيء أبو ما جا ومش حيجي (علقوها لي في حلمة أضاني) وأنا وإنتوا في
والطاهر المرضي تلفزيون السودان الخرطووووووم !!!
والحال ياهو نفس الحال
نملتنا ما زالت تدخل وتخرج
وياها الحبة الشايلاها دي
ولحدي أسع ما عرفنا الحبة دي
ياتو نوع هل هي غله ولا فله
والنملة ذاااتها سمنت وطقطقت من الدخلة والمرقة والحبة في قدومها
وهسع بقت لمان تجي ماشة تتضرع وتتبختر وعامله ليها فيونكات .. مين زيها
ولسع نحن يانا نحن
لا غيرتنا ظروف ..........
وتمامة الأغنية أخليها ليكم
ويوم قسموك يا هم ..............
وأقعدوا إنتوا في قت لي وقت ليك
وطارق الأمين الهيلاهوب كان أشطر
وياهو الفضل
يا نا نرقص .. يا نرقص
ونتبع أولوا الأمر فينا
الراقصين على أشلاء وطن ..
لم يتبق فيه
إلا هو وزمرة الأكيلة الهتيفه
والباقين ناس نحن وناس (تلنا)
يطفوا النور
ويقفلوا الباب
طالما
أن الغربة ضاربة على الأطناب
حتى في الوطن
يبقى ما فرق أكان بره ولا جوه
هي الغربة
فابكوا معنا ..