رشيد المهدية يقول لاتوجد ضربة جزاء

دا هو الناقص ي ارشيد

ما كنت قايل وصلت للدرجة دي

يعني تعليق كمال حامد وهو المريخي الصارخ كان أهون وهو يرد عليك


قال كمال حامد: حتي ولو الهدف غير صحيح ...إحنا إتظلمنا كتير...دا ممكن يرد ولو شوية من حقوقنا


كتر خيرك يا كمال برضو



ويخص يا رشيد

الرشيد الماهية لا يرى في الهلال اي شئ جميل

يتملق عند التحليل للوصيف الدائم و يتغزل فيه باشياء لا يملكها بينما يسعى دائما للتقليل من شأن سيد البلد.

اما من الناحية التحليلية فهو ضعيف و لا يملك مقومات المحلل القدير. يكثر من المجاملات و إرضاء كل الاطراف خاصة إذا كان أحد طرفي اللقاء المريخ الوصيف.


الشباب في منتديات الهلال يسمونه الرشيد الماهية.

للاسف الصورة وضحت خالص يا عمار


اذن الرشيد غير محايد ولا يصلح للتحليل

اللعبة ضد سادمبا من ناحية أنها مخالفة فهي مخالفة لانو المدافع ضربه و كان ممكن الحكم يتساهل عندها و لا يمنحه ضربة الجزاء و لكن في هذه الحالة سوف يمنح سادمبا كرت اصفر للتمثيل و يكون ظلمه مرتين لذلك المدافع لم يترك اي فرصة للحكم سوى إحتساب ضربة الجزاء.

كان من الممكن للرشيد (الماهية) ان يكون أكثر لباقة و ان يقول انو اللعبة مشكوك فيها و ان الهلال لا يحتاجها اصلا و لكنه كرر اكثر من مرة إنو الهلال محظوظ لانه منح ضربة الجزاء.

لايمكن بأي حال الجزم بصحة ضربة الجزاء من عدمه وانت جالس امام تلفزيون ...خاصة وهو اللاعب الكبير السابق


المخالفة واضحة....كان ممكن يقول إنو حالة إشتباه او يقول لو كنت الحكم ماكنت حأحتسبها...أما إنك تجزم بأنها غير صحيحة فهنا مربط الفرس.....دي سقطة واضحة

الاخ ياسر


تحياتي


رشيد المهدية شنو ال بتديهو اعتبار وقيمة


الزول مريخابي التحليل


الحكم ماعندو طريقة غير يحسب ضربة الجزاء


صحيح الهلال غير محتاج لضربة جزاء ولكن ليس من العدل معاقبة لاعبنا

المعترض عليه داخل منطقة الجزاء

سلام سيف

Quote: الزول مريخابي التحليل

المعلومة دي جديدة علي.....طيب كان يختشي ياخ...ويجيب أي كلام ديبلوماسي

واضح جدا أن الرشيد المهدية لم يكن سعيدا ولم يخف ذلك بينما إجتهد كمال حامد في إخفاء حزنه..عكس الزميل د. محمد حسين كسلا الذي إنفرجت أساريره وبدا طبيعيا و سعيدا جدا...


حقيقي التعليق والتحليل من المكملات الجمالية للكورة ...عفوا الرشيد ...أرجو ألا تكلف نفسك وتحلل للهلال إذا لم تكن سعيدا لفوزه...لقد كنت لاعبا محبوبا من كل جماهير الهلال...ولكن لا ادري ماذا حدث

الاخ ياسر والاخوة المتداخلون

تحية زرقاء

يا جماعة انتو الرشيد المهدية دا بحلل في ياتو قناة ؟

والقناة دي سيدها منو ؟




وتييب

Quote: ...ولكن لا ادري ماذا حدث

الحدث الماهية

قلت ليك اسياد البلد سموه الرشيد الماهية.
بعدين الراجل ده عاش في مصر كثير و تأثر بيهم
و المصريون معروفون على دين صاحب المال و ولي نعمتهم

ياخ ده كرهنا التحليل زاتو

عمار

Quote: ياخ ده كرهنا التحليل زاتو

مظبوط

Quote: يا جماعة انتو الرشيد المهدية دا بحلل في ياتو قناة ؟ والقناة دي سيدها منو ؟

سلامات عبدالله

لو كان الهلال يلعب محليا ضد المريخ ( نادي سيد القناة)

يمكن نلقي ليهو عذر ونقول المعايش جبارة


لكن يقوم ينسي نفسو كدا والمباراة دولية.....طيب ياخي أسكت وزوغ من الكلام ...أو قول أي كلام والسلام


ياعيب الشوم

الرشيد غير محايد ولا يصلح للتحليل
ويسعي لارضاء والي المريخ
وهو زعلان لان مجلس نادي الهلال اختار الوزير طارق احمد ادم مساعدا للمدرب
ولم يختاره هو!!!!!!!!!!!!!!!قوم لف

أفرحوا ساى !!
بس :
إنشاء الله تجيبو الكاس ...
زى ما جابوا قبال كدى سيدكم المريخ .....
كسرة :
عيييك ! هو يعنى الحكايه كان فيا ( دفرة حكم ! ) بضربة جزاء ؟؟؟
و ( البسيب ! )عادتو ! بتقل سعادتو !!!

اخرسوا يا شمات
مافي داعي تعملوا فيها هلالااب
وتكتبوا عن الرشيد
الكورة اللعبها الرشيد في الهلال
انتو ما قدرها عشان تكتبوا عن الرشيد
امشوا اقروا في مدرسة الرياضة وتعالوا اكتبوا عن التحليل
الكورة بتاعة سادومبا فيها مشكلة فنية
والحكم كان بعيد
شنو الخطاء التاريخي في انو الرشيد اقول انها ما بنلتي ؟؟
كثير من خبراء الكرة قالوا انها ما ضربة جزاء
بالرغم من كده نقول النتيجة 4/0
اها ايه الاتغير يا شمات
امشوا شوفوا ليكم
حمام ميت ادفنوه

محمد السني دفع الله






الليق الليق يا عواليق



دا هتاف جمهور المريخ للاعبيه أول أمس

عبد الماجد تربيع



ياخوي كدي الحق جيشنا يا جيش الهنا الحرق مالنا ودمنا


الباقي هين

الرشيد المهدية في تحليل الأمس بجانب عدم حياديته
فقد فارق ( المهنية ) تماماً .. ونسى مهمته الأساسية
في التحليل ( الفني ) لمجريات المباراة . . وتعامل
كمشجع عادي ( مغبون ) .
في كل القنوات وفي كل الأستديوهات التحليلية لا نجد
محلل يبدي رأيه في التحكيم ويقولوا نترك إبداء الرأي
للحكام ولكن يبدو أن الغرض مرض فعندما لم يجد الرشيد
ما ينتقد به الهلال بالأمس لجأ لشماعة التحيكم .
بعدين عايزين نفهم الرشيد ده شنو ؟؟
محلل فني . . مدرب . . مقدم برامج . . حكم . .
ياخ ده الكرفتة ما بعرف يربطها ..

السيد احمد

Quote: وتعامل كمشجع عادي ( مغبون ) .

مغبون ....في شنو؟؟ ولي شنو؟؟؟؟


مساعد مدرب؟؟؟ماعايزنو


هو لن يطول الوزير طارق قامة......


تحليل: فليقل خيرا...أو بلاش

Quote: ويسعي لارضاء والي المريخ

الحاج سلامات



بعيد مننا

محمد سنى دفع الله

جناح النقر ,,,,هههها هههها

كلام الشباب ديل كلام انتصار

الرشيد ولدنا ونحن ما بنديوه

يادكتور ياسر

خلى الرجل يجد القوم سبيل فرح

قنبلة الهلال الموقوتة



الرشيد دا زمان كنا بنتابعو...لبق و كليم....بس مؤخرا كدي قلب لينا ظهر المجن...

ثم ثانياً الرشيد ده شاف الكورة دي من زاوية واحدة
وبالنقل التلفزيوني حقنا التعبان ده .. يعني الحكم
أبعد منك يالرشيد .. ياخ بتبالغ والله .

Quote: الرشيد ده شاف الكورة دي من زاوية واحدة وبالنقل التلفزيوني حقنا التعبان ده

مظبوط يا السيد..ماليهو حق يجزم بخطأ الضربة

ياسر
العزيز وغالي
انتو نسيتو الكلمة الاخيرة القالها الرشيد
نهاية البرنامج
قال ده الهلال العايزنو
الهلال شرف الكرة السودانية
معناتو الراجل غيور على الهلال وعايز فريق بمستوى الفرق العالمية
لانو الهلال ما اقل منهم
مودتي
ــــــــــ
قلت لي قالوا ليهم الليق يا شنو

محمد السني الاغلي


سمعت اليوم في صدي الملاعب تعليق مدين (وهو سوري الجنسية علي ما أعتقد) قال سادومبا تحصل علي ضربة جزاء بكل فنية وحرفنة.....أخونا الرشيد لو كان قال كلام زي دا مش كان برد حشانا شوية....هيك ولا مو هيك؟؟؟

سلام يا شباب

ضربة الجزاء صحيحة مية المية

والمدافع إصطدم بكامل جسمه مع سادومبا

صحيح هو كان رافع يديه للأعلى وأقدامه ثابتة لكنه حرك وسطه وإعترض سادومبا


إذن يا الرشيد ما ليك حق ...

Quote: اخرسوا يا شمات مافي داعي تعملوا فيها هلالااب وتكتبوا عن الرشيد الكورة اللعبها الرشيد في الهلال انتو ما قدرها عشان تكتبوا عن الرشيد امشوا اقروا في مدرسة الرياضة وتعالوا اكتبوا عن التحليل الكورة بتاعة سادومبا فيها مشكلة فنية والحكم كان بعيد شنو الخطاء التاريخي في انو الرشيد اقول انها ما بنلتي ؟؟ كثير من خبراء الكرة قالوا انها ما ضربة جزاء بالرغم من كده نقول النتيجة 4/0 اها ايه الاتغير يا شمات امشوا شوفوا ليكم حمام ميت ادفنوه

شكرا السنى
انصفت الرجل
فنحن جيل أمتعنا الرشيد بفنه ولعبه
ولا يمكن للرشيد الا ان يكون هلالابيا
وقد جاء للتحليل بكل حرفنته ولعبه وثقافته الرياضية
هنالك حملة منظمة ضده وبكل اسف حتى من كتاب الأعمدة في الصحف الهلالية الهوى
ولم يقدم احد منهم ولا واحد من مائة مما قدمه الرشيد للهلال
لماذا هو مطلوب من المعلق او المحلل عدم الحياد
انتهى دوره كلاعب في الهلال واتى كمحلل متخصص
يحلل حسب المشهد الذي امامه بتجرد ونزاهة
اليس ذلك ما هو مطلوب من المحلل
لماذا الهجوم عليه ؟
شكك في ضربة الجزاء من وجهة نظره
نتفق او نختلف معه
لكنا نحترمه كلاعب وكمتخصص
قد تكون مشكلة الرشيد في التحليل
سرعة حديثه وعدم وضوح مخارج الحروف
وليته تاني في الحديث حتى يتمكن جمهوره من المتابعة
غير ذلك فهو راجل فاهم كورة
ومن حقه التحليل
عمار وياسر سيد الخيط
اقر بهلاليتكما ولكن خفو على الراجل شوية

Quote: انصفت الرجل فنحن جيل أمتعنا الرشيد بفنه ولعبه ولا يمكن للرشيد الا ان يكون هلالابيا

أها نحن الرشيد ده ما شفناه بيلعب

ولا سمعنا إنه كان في جيل 87 الوصل بالهلال للنهائي ولا جيل 92 الكرر نفس الإنجاز

ولا حتى في عظمه الجيل الما شفناه زي الدحيش وجكسا وقاقارين

لكن سمعنا إنه كان لاعب مزاجي ومشاغب ومتحدي للقارات الإداريه

عندك معلومات غير دي تعال ورينا

وهسه الشايفنه في الرشيد إنه بيحاول يتمسح في جوخ الوالي

Quote: أها نحن الرشيد ده ما شفناه بيلعب ولا سمعنا إنه كان في جيل 87 الوصل بالهلال للنهائي ولا جيل 92 الكرر نفس الإنجاز ولا حتى في عظمه الجيل الما شفناه زي الدحيش وجكسا وقاقارين لكن سمعنا إنه كان لاعب مزاجي ومشاغب ومتحدي للقارات الإداريه عندك معلومات غير دي تعال ورينا وهسه الشايفنه في الرشيد إنه بيحاول يتمسح في جوخ الوالي

يا فدياس
يا زول انت بي صحك

حرررررررم الرشيد ده لو لبس هسه ونزل الملعب يقعد سيدا كنب ( مع الاعتذار لي سيدا)

الرشيد ده آخر لاعب حريف سوداني شفناهو في حياتنا

الرشيد لا يلعب الكورة ولكنه يعزفها

واذكر له اننا كنا في الثمانينات في مدرسة الخرطوم الجديدة

قام مدرب فريقنا القومي ( الالماني الجنسية) باختيار خمسة لاعبين او ستة

لتدريبهم صباحا بنادي الاسرة

واللاعبين هم على ما تذكر

مصطفى النقر
الرشيد المهدية
عصام ابو الجاز
احمد حامد
محمود صالح حارس المرمى
وتاني اتنين ما متذكرهم

وكنا نترك المدرسة لنستمتع بالتمرين

وكان في نهاية كل تمرين يطلب محمود من المدرب
ان يطبق اللاعبين مهارة الانفراد بالحارس ومحاورته ثم وضع الكرة في المرمى

يعني اللاعب يحاور الحارس

كل اللاعبين كان محمود صالح ينجح في الامساك بالكرة قبل الهدف
حتى المدرب كان يفشل في ذلك

إلا الرشيد فهو الوحيد الالذي ينجح
كان يداعب الكرة برجله بطريقة يحاور فيها محمود صالح الذي يفشل في كل مرة من منع الرشيد من تسجيل الهدف

بل يحاوره عدة مرات

وكما استمتعنا بالرشيد في السودان مع الهلال

استمتعنا به في الزمالك مع عباقرة الكرة المصرية زمن ابراهيم يوسف ومجدي طلبة وطارق يحي وشلبي
كان الرشيد رقم كبير في الزمالك حقق لهم الكثير من الانتصارات

ولم نرى لاعب حريف كورة في السودان بعد الرشيد سوى فايز نصرالدين ولكنه ذو مهارة غير مفيدة للفريق مهارة استعراضية فقط لا تفيد الهلال لذا تم شطبه وهو في قمة شبابه

Quote: أها نحن الرشيد ده ما شفناه بيلعب

ممكن اقول ليك نص عمرك ضائع
حسع في ناس بتمشي الاستاد عشان تشوف هيثم مصطفي مش كده برضه
زمان كان الواحد يمشي الإستاد عشان يشوف الدحيش او جكسا او كسلا او النقر
ولغاية جيل تنقا ووليد طاشين الناس العندها حرفنة اللعيبة اللي بتمتعك باللعب ناس باص وخانة زمان
اها لرشيد دا من عينة لاعب بيمشو يتفرجو عليه ويخشو ليه مباريات عشان يستمتعو بلعبه

Quote: وهسه الشايفنه في الرشيد إنه بيحاول يتمسح في جوخ الوالي

في الحتة دي اقرا كلام كابتن الرشيد
السؤال: هل سيعود المحلل المتميز “الرشيد المهدية” لأيامه الأولى في التحليل مع كابتن “عمر النقي” أم يعود لأيامه التالية في التحليل الممزوج بالمجاملة والمدح المكرر بحق النادي الذي يرأسه “جمال الوالي” ومالك القناة التي يود العمل بها ؟؟
http://www.alestad.com/?p=904
جمال الوالى، رئيس مجلس إدارة القناة ورجل أكبر من أن يتملقه الآخرين فهو ليس بهذه البساطة والسذاجة حتى تفوت عليه أن يرى الأمور بمثل ما وصفت!. الأراء التى أطرحها، فنية بحتة وبعضها وجهات نظر وقراءات قد تخطى وقد تصيب، فليس فى ذلك خروج عن المألوف، ولعل قبول ذلك بيّن وهذا ما جعلنى اليوم أتلقى هذا الكم الهائل من الاسئلة ومن ضمنها سؤالك، أما تقييمك للتحليل الفنى فهذا يخصك لوحدك ولك مطلق الحرية فى فهم الأمور كما تشاء. انا مثلى مثل الهداف الذى احرز أهدافاً اطربت الكثيرين فليس من الضرورى أن تطربك! أنت مثلك مثل بعض الصحفيين المشجعين المتعصبين لفرقهم، لا يروون إلا الهلال فى الكون فريقاً للكرة وهذا خطأ. أحب الهلال أكثر منك وصببت العرق فى ملعبه دفاعاً عن شعاره ولا اخالك فعلت ذلك ولكننى الآن أجلس فى مقعد القاضى عند تقييمى للأمور، لذلك أرى المريخ هلالاً فى كثيرٍ من الأحايين!

Quote: لكن سمعنا إنه كان لاعب مزاجي

الرشيد العبيد (المهدية) هو واحد من أميز اللاعبين الذين أنجبتهم حواء السودان بعد أن فرض نفسه كموهبة قبل أن يبلغ سن الرشد بروابط المهدية ونادي الحي الأمر الذي جعل أعين القمة تتسابق وتنافس عليه فظفر به الهلال واقتحم التشكيلة وما زال في العقد الثاني من عمره انضم للمنتخب الوطني الأول كأصغر لاعب في تاريخ المنتخبات فتألق مع المنتخب بالجزائر ورغم ضعف الإعلام وعدم وجود القنوات الفضائية خطفه نادي الزمالك وخاض تجربة احترافية ناجحة ولعب بجوار الجيل الذهبي للكرة المصرية المعلم حسن شحاتة وفاروق جعفر وابراهيم يوسف فأحبته جماهير الزمالك التي كانت تغني له (أدلع يا رشيد) وختم حياته في الهلال وهو في قمة مجده وأهل نفسه في مجال دراسات كرة القدم ونال أعلى الشهادات ودخل مجال التحليل الرياضي عبر قناة دبي ثم ART والسودان وتألق في التحليل كما تألق في الملاعب وهو الآن يقدم برنامج (الكرة مع الرشيد) بقناة الشروق.

المشكلة مش في إنو قال أنها ليست ضربة جزاء

الرشيد المهدية قال إنو الهلال محظوظ انو منح هذه المخالفة.
أرجعوا لشريط المباراة هذا ما قاله بالضبط

نسى ان الهلال كان متفوقا و ممتلكا للكرة و زمام المباراة بالكامل
و أنهى الشوط الاول ب 4 اهداف من غير ان تكون ضده إلا هجمة واحدة خجولة.

لم يستخدم لباقة التعليق بان لا يفسد على المشاهدين كل هذه المتعة.
كان من الممكن ان يقول رأيه و يجمله بان الهلال ما كان محتاج لهذه المخالفة اصلا.
أصر ان يمارس هوايه الدائمة في التعليق الاشتر ليجامل و يغازل اولياء نعمته.

فعلا الرشيد الماهية

عثمان الخير


شكرا وكلام مضبوط



السندا: الرشيد راجل فنان ولعاب...لكن أرجو ان ينصف الهلال