قدر ما فكرت اكتب كيف وابدا كيف ما عرفت قلت احاول اول اكتب و انمق الكلام و بعدين انزلو لكن وين مافى طريقه اساسا صعب
ح اكتب هنا طوالى لانو فى ناس كده صحى شكرهم ما بتقدر والله عالم كلمات فى الدنيا تعبر ماااافى
الراجل الجميل احمد التجانى واميمه ووليداتهم الحافظ الله انشألله وود مصارين خالتى اليمن البيض عبدالرازق سعيد والراجل الهميم اخو الاخوان والاخوات الفحل وزوج اخته تتعدل عليهو شقيش ما يقبل الاحباب القداااام الدكاتره عزالدين و منال ووليداتهم الحافظ الله انشألله ومعاهم بت العم سلمى المجمر و زوجها الذى اجهزت علية مكاوة وكان لى الاحباب الجداد محمد الجلاد وهالة لهم جميعا ما عندى كلام غير اقول ما عندى كلام اسأل الله ان يجعلكم جميعا و ذريتكم من من طالت اعمارهم و حسنت اعمالهم اسال الله ان يقدرنى اوفيكم حقكم فى الخيروالسمح يالله والله وشهد الله ما عندى كلام وصحى اقول شنو؟؟؟؟؟؟؟؟؟؟؟؟
Post: #2 Title: Re: تانى اقول شنو؟؟؟ Author: عاطف عمر Date: 07-18-2010, 11:36 AM Parent: #1
تحياتي وسلامي سهام عمرة مقبولة إن شاء الله تحياتي لكل من ذكرت من الكرام والكريمات
Post: #3 Title: Re: تانى اقول شنو؟؟؟ Author: محمد عبد الماجد الصايم Date: 07-18-2010, 11:47 AM Parent: #2
عاطف عمر والله انت زاتك ما هين والله واتصالك بى و متابعتك لى حالى و حال اسرتى يثلج صدرى اتمنى ان يتقبل الله العمرة و يصبرنى واخلى البشتنه الانا فيها دى بس خليها على الخلقنا و قول امين
ود الصايم تعيش وانت زاتك فى رقبتك دى ما قصرت اضحك الله سنك وثبت الله لك الفرح فى الدنيا والاخرة
Post: #5 Title: Re: تانى اقول شنو؟؟؟ Author: أم سهى Date: 07-18-2010, 11:59 AM Parent: #3
يا سهام ناس سودانيز ديل موش اصحاب ... ديل قبيلة وخبرتهم قبل هذا اليوم سندا في محنتي 4 سنوات لم يكلو او يبخلو قولي ربنا يدوم المحبة البين الناس قولي ربنا يقوينا على تحمل الشدائد قولي اللهم لا تحرمنا وصل احبتنا وانا ارددها معكي سهام عمرة مقبولة انشاء الله
Post: #6 Title: Re: تانى اقول شنو؟؟؟ Author: حليمة محمد عبد الرحمن Date: 07-18-2010, 12:04 PM Parent: #5
عمرة مقبولة وعودا حميدا... مرحب بالعزيزة سهام بين اخواتها واخوتها في حوش بكري الواسع والماهل.
الحبيبة سهام بركة الرجعتي طيبة .. وعمرتك مقبولة ان شاء الله وربنا يخليك لاسرتك واهلك البحبوك وانت تستاهلي كل الخير .. عشان كده ربنا خت ليك الناس الطيبين في دربك ربي يجعل ايامك خير وبركة وعافية دائمه والتحية والتقدير لكل من ذكرتيهم ربنا يسعدهم ديمه ويديهم قدر يرضيهم وزى ما قالت ليك الاخت الحبيبة سهي اسرة سودانيز قبيلة بي حالها ربنا يقرب النفوس ويجمع الاحبة فى الفرح دائما ان شاء الله
** بت طه المُجمر. ** مساءك خير.. ## عُـمـره مقبوله ,, وناس الحوش دا زى ناس بحرى بقو للواحد أكثر من أهل ودائماً مانجدهم فى إى مكان نحل به ,, الشُكر معك لكل من ذكرتيهم والشكر لولدنا عبدالرزاق ود سعيد ود خالتى اليمن .. (ودامت الموده والإلفه بين الجميع) (ابو محمد فؤاد)
اما المتصلين تلفونيا فقد اخجلونى وابكونى بشدة والله العظيم ماكنت فى بعض اللحظات انا ببكى على شنو والا شنو؟؟؟
حزنت انى عند اتصال بعضهم زى الاخ صلاح غريبة ما كنت سامعة الصوت كويس يا ريت تلقو لى العذر هو ربنا زاااتو ح يعذرنى لانو كان معاى اتنين الله يحفظهم ما خلو العمرة تركز بين الاضانين بس ربك كريم لولاهم انا كان ودرت زمان احيانا افكر ربما ازداد شغبهم فى الفترة الاخيرة لانهم ما قادرين يعبرو عن حزنهم ومن ناحية تانية اقول يمكن رحمه من ربنا عشان يلهينا من التفكير الما منو فايده
يعنى يا جنى يااخوى توصينى بالصبر وانت ما عندك صبر ما الصف جاييك انت والسمانى وزوجته اها برضو ما عندى كلام اقولو والله انت كنت خايفة من لقاك تقول تجلدنى بعد كل تلفوناتك الداعية للتصبر والسمانى والله كنت جد جد شايله هم لقائه والله ما كنت قايلة بقدر اقيف طولى و اعزيهو بس ربك كريم والله ما بنقدر نوفى شكرو و حمدو الله يصبرنا و ربنا يجمعنا معه واسرته فى الخير
جنى انت انشألله خوتك خوة لكل مضطر و جازع الله يخدر ضراعك ويوسع رزقك
العزيز عبدالله شمس الدين الله يجازيك الف خير على كلامك الطيب يا ام سهى والله وعليم الله المصيبه فوقنا طاقة فهمنا بس الحمدلله ان امسك لساننا عن ما يوجب غضبة دى براها نعمة كبيييرة
يا عصام جبرالله شتارتك عينه ياخ هيجت على ذكريات مع ديدى الله يرحمها عجيبة سبحان الله بس الحمدلله يا عصام على ما اراد الله والحمدلله على شتارتك
فى انتظار تلفونك وبطل خوف ده ياهو حال الدنيا كم من حبيب تولى عنا لا يلوى على شىء وتركنا فى حال ما يعلم بيهو الا رب العالمين والله يا عصام انه لامتحان عصيب ما بنفع معاهو نوع مذاكرتى الانت بتعرفها ديك وقراية الجابات الله كريم يا عصام انا ما بعلم اكتر من الخلقنى والخلقنى قال لا يكلف الله نفسا الا وسعها وقوله قول الحق عليه الحصل ده فى وسعى القضية يا عصام يا ود امى وسعى ده انا اتعرف عليهووالقاهو كيف؟؟؟ بس راجية الرحمة من عندو
تتذكر يا عصام لما ديدى كانت بتتغدى وانا وانت قاعدين نتفرج فيها ونقطع فيها وهى ما جايبه خبر..ياخ دى كانت طيبة طيبه غريبه تصدق يا عصام لما جاتنى المشكلة الما مفهومه فى القلب ديك انا كان جزء من همومى انو لو امر الله حصل على البت دى بحصل عليها شنو؟؟؟ كنت بفكر انو الزى غادة دى صعب يعيش مع ناس الدنيا ديل من غير ما يكون معاهو زول يحميهو وكنت دايما اقول ليها يا بت لازم تتعلمى تضعى حدود للناس فى التعامل معاك وما تبقى مسكينه فى النهاية ح يقولو عليك غنماية ساااى وكم كنت احزن و انا افكر انو الناس ح تاكل و تقش فى طرفها وهى دايما ح تلقى ليهم العذر شوف هسه العلينا ده يا عصام يا اخوى مرات كتيرة بقول ده من رحمة ربنا بيها لانو هى بشهادة كتير من المعزييين انها ما كانت زولة دنيا وزى ما قال صاحبك مج الاشارات كانت كتيييرة لكن نحن ما شفناها
كنت اتحايل علي نفسي .. استبطأها ..واعود متمترسا بالبعد المكاني شقي اتصال العزاء, ولما حضرت بيننا تهيبت اللقيا , نعم تهيبتها حقيقة ولكن لابد فحضورك للعمرة وانتفاء البعد المكاني يجعل الامر عيبا , والتقيتك , ووجدت لنفسي العزاء في صبرك رغم مرارة الذكري الا ان صبرك والاخ مجتبي كان له الاثر الكبير في تطمينا وبث روح الرضا بقدر الله اسال الله ان يثبت قلبك ومجتبي وان يجملنا بلقياكم مرات قادمات
العزيزة سهام اعرف انها تجربة مافى امر منها فى الدنيا لانى ضقت مرارتها قبل تلاتة سنين ومازال طعمها كما اول يوم ، لقد فجعت مثلك فى ابنتى وحسيت كانه الزمن وقف ولكن ايقنت اخيرآ انها سنة الحياة . ياختى قولى اللهم اجرنى فى مصيبتى واخلف لى خيرآ منها .
حليمة سلامات و ما بنقول الا كما قلتى اللهم اجرنى فى مصيبتى واخلف لى خيرا منها
الخير بعلمو رب العالمين والله ينزلو لينا
صفية حكمتك فى محلها و زى ما قلت ليك ما انت براااك انا عندى اصحاب و صاحبات بطلونى عدييييل كده لانهم ما قادرين و زى ما قالت لى واحده من صحباتى قالت لى اصلو الزول لما يشوفك بيعاين طوالى لطرف توبك لانو غاده طوالى بتكون عندو
والله مصيبة غادة ما حقتى براى و برضو زى ما قالت لى ناهد جبرالله اخت المشاتر عصام يا ما شفنا فى الدنيا من موت و فقد واحزان لكن زى حزن غادة الاتقسم على الكل ده ما شفناهو
اعلم انا الله بصير بى والله يصبر الجميع من اخوانى واخواتى واصحابى و صحباتى لغاية اى زول اتعامل مع المرحومة فى اى شى الناس ممكن تتفكر انى ما صابرة و انى ساخطة لكن يعلم الله كونو انى عايشة لسه ده و كمان باكل و بشرب و بمشى فى الاسواق وازور الناس وا جاملهم و وشدة ما الله ادانى كمان بضحك الله عالم وانشالله ربنا بيقدرنى زيادة يا صفية اى زول يقول انا ما صابرة ده بيكون مجرد تصور ليه؟؟؟؟ لانو عارف ديدى عندى محلها وين دى بت المصارين البيض قاعدة بين الضلوع ومحكرة فى كبدتى قولى الله كريم
صبرى الشريف تسلم يا زول من كل شر
عمو اساسى الله عالم حالنا كيف لكن لقانا بثبت انو ربنا رحيم صبرنا وقدرنا على ان نعزى بعضنا وياها بتكم تسلم انت وزوجتك وبلغها تحياتى والاولاد
تماضر وسارة على شنو دايرين تتصاحبو لى فى البوست وانا لسه ما تميت شكر الناس و ما عارفة زاتو اشكر هم كيف؟؟؟ على كل حال انا زاتى مصاحباكم ويا تماضر شيلى الصبر الخبر بيجيك واعتقد ما ح تقصرى لا انتى لا سارة على دى
تسلمن
يا بنات بدل صاحبتينى و صاحبتك ساعدونى فى الكتابة والله انا فى كمية من الناس اتصلت بى تعزينى و تشد من ازرى وكلماتهم كانت تقع على زى الموية السااااااااقطة ناس من كل بقاع الدنيا والله 95 من المكالمات بتبدأ ياخ انا ما بعرفك لكن عاوز/ة اعزيك والله الناس ديل غلبنى عدييييل كده اوصل ليهم شكرى بالكلمات لغتى عاجزة تماما... خايفة يا بنات ابدأ اقول اسماء ويسقط منى اسم واكون ضبحت احساسى اتجاة مكالمة الزول/ة بيدى والله والله والله على ما اقول شهيد انا جد عاجزة تماما عن التعامل مع خلق الله السمحة الحنينة المطمئنة ديل يمسكو القلب يعصرو و يرقدو فى محلو قولن يا بنات امى ترا ناس سودانيز اون لاين ديل انا فى نصهم وبتى شاركت معاهم مرة واحده قبل وفاتها بايام قليلات وبقى فى صله من نوع ما اتخيلى احساسى يا تماضر ويا سارة زول يضرب ليك يقول ليك انا فثط متصفح لكن عاوز اعزيك والا زوله تضرب ليك و هى بتبكى و تقول ليك والله انا ما عضوة فى سودانيز لكن بتك دى وجعتنى شديد يااااااخ نحن ناس حلوين ويا قول ابوى الله يرحمو بعد ما يحكى ليك قصه عن اهلو يختمها بضحكة ويقول والله نحن اهلنا حلوين
عليكن الله ساعدونى الناس ديل الهنا والبره هنا انا اعبر عن امتنانى كيف؟؟؟ والله انا ما مستهبلة بالجد جد غالبنى وحاسة بالذنب والعجز
____________________ ياخ ده بوست اسمو انا ما بعرف اكتب؟؟؟
سبحان الله يا سارة امبارح فتحت الفيس بوك لقيت فى اخت كريمة طالبه نفس طلبك ده اهاستجابة ليكن الاتنين غيرتو لكن برجع ليك تانى
Post: #30 Title: Re: تانى اقول شنو؟؟؟ Author: Omar Bob Date: 07-21-2010, 09:31 AM Parent: #29
سلامات يا سهام: عمره مقبوله ان شاء الله قررت بيني وبين نفسي الا اكرر الاتصال حتي التقيكم وجها لوجه في جيتي للسودان الكان مفروض تكون الشهر ده لكن ربك ما سهل السفر وتاجل لشهر تسعه عشان كده لامن عرفتكم في العمره حاولت الاتصال كم مره لكن التلفون كان مقفول. ساحاول الاتصال ان شاء الله فانا لم استطع التحدث معاك ولا مع مجتبي في الاتصتال الاول وغلبني الكلام زي ما شفتي
Post: #31 Title: Re: تانى اقول شنو؟؟؟ Author: خضر حسين خليل Date: 07-21-2010, 09:55 AM Parent: #30
تحياتي عزيزتي سهام عمرة مقبولة منذ فترة وانا قاطع منك لكن والله في البال ـ السبب انو تلفوني القديم اتسرق وبالتالي معظم الارقام راحت في حق الله ـ ده تلفوني الجديد ارجوا صادقاً التواصل من خلاله وربنا يقبل عمرتكم وتحياتي لمجتبي وللاسرة الكريمة
خضر حسين
Post: #32 Title: Re: تانى اقول شنو؟؟؟ Author: عمران حسن صالح Date: 07-21-2010, 10:03 AM Parent: #30
