Post: #1
Title: عرض حال
Author: ادريس خليفة علم الهدي
Date: 07-13-2010, 08:47 PM
Quote: شاقى الحلة فى نص اليل
ماشى ورايا كلاب الشارع
سامع حفلة ودقة طبلة
صوت قدامى وضحكة شلة
وانا ماشى افكر واتذكــــــــــــــر
عيدين مرن زى الكفين
ماكلين بايت عيدنا قديــــــــــم
مبروك تطلع زى سب الديـن
ناس تتهادى وناس تتباوس
والشفع الحسو فى السكين
اتذكر واعجز واتمطق
والوداعية تقول مكتوب
وانا ممحى يا نــــــــــــــاس
كيف تحسدنى على الانفاس
ما كله خلاص..
البيت والناس
البلد اتقسم بالاجناس
والمال اتوزع بالرصاص
وانا استاذك عبدك وسيدك
شاعر سرى بدون كراس
السما بتنقنق
وانا ماشى انقنق
نص اليل فى نص الشارع
حافى وقالع
والمطرة تغسل فى الحلة
وطفلة بتنده بابا المطرة
بابا الراقد زى الشولة
حاضن النملة كريمة الدولة
لمن اطلع شغله اودع
ولمن ارجع بيته اصفق
الا المطرة تكون جبخانة
عشان ما بابا اقوم علشانه
بابا الاصبح بابا نويل
فى كتفه بقالة وسوبر ماركت
طالع نازل وغصبا" ضاحك
بابا عايش ارتجال
لا عنده حق لا عنده مال
لا عنده كشك لا شاف دكان
واقف فى الحــر
مؤجر ضله من السلطان
برضو مطارد كالحيــــــوان
كان استاذ الفن والفكرة
وأصبح نكره
فى بلد امتلك الدنيا بحالها
اصبح عالة
الا المطرة تكون جبخانة
عشان ما بابا اقوم علشانة
السما بتنقنق
وانا ماشى انقنق
شاقى السوق ابكى ومخنوق
تحت الامطار شماشى صغيــــــــــر
طالب الانقاذ
اتحدى الشاف شماشى عجوز
كان كلو مناه
رزقا" مايزيد عن حق الفول
ومرضا" مايزيد عن البندول
لكن مافيش
ولا حتى ضرا
كل نصيبه من البترول فى قطنه
وخايف المطرة تبل القطنة
وتهدم قصره....
والسما بتنقنق
وانا ماشى انقنق
ولمن تبرق فى جوايا
واشوف الجاى
اقرأ الفاتحة قابض بونية
واسب فى سرى
اصلو الجاى كله بلاوى
وخايف اقول الكلمة الجلة
واطلع كافر يا ناس الله
احسن اقعد انم فى روحى
ازيد حسناتى
واعد فى جروحى
والسما بتنقنق
وانا ماشى انقنق
ادعو واسب فى ســــــــــــرى
غــــــــــــازى محمد ناصر
|
|
Post: #2
Title: Re: عرض حال
Author: محمد عبد الماجد الصايم
Date: 07-14-2010, 07:20 AM
Parent: #1
_
الشقي تعتر لي بوستاتو!
|
Post: #3
Title: Re: عرض حال
Author: ادريس خليفة علم الهدي
Date: 07-14-2010, 01:26 PM
Parent: #2
| Quote: الشقي تعتر لي بوستاتو! |
يا عمك .. العترة بتصلح المشية
|
Post: #4
Title: Re: عرض حال
Author: ود الباوقة
Date: 07-14-2010, 11:46 PM
Parent: #3
الكع
قلت اخير تجرب الشعر
خربانة ام بناية قش ...
|
Post: #5
Title: Re: عرض حال
Author: ادريس خليفة علم الهدي
Date: 09-05-2010, 12:02 PM
Parent: #4
(*)
|
Post: #6
Title: Re: عرض حال
Author: ادريس خليفة علم الهدي
Date: 09-07-2010, 11:50 PM
Parent: #5
(*)
|
|