تعليقاً على لمة البورداب الأخيرة...هل آن أوان تغيير شكل اللمة؟

...
السلام عليكم
....
هي المرة الأولى التي أشهد فيها لمة للبورداب (إذا استثنينا حضوري لجزء من حفلة زواج الأخ ناذر الخليفة)

ربما كان سقف طموحاتي للمة زائداً بعض الشيء ، ولكني صراحة كنت أأمل في أفضل مما شهدت
أنا هنا لا أنتقص الجهد المقدر الذي قام به الأخوة ، العوض والأخت داليا والأخ طارق الأمين وبقية المنظمين
فقد كانوا قمة في النشاط والإهتمام براحة الضيوف والحضور
ولكني انتقد شكل الحفل الموغل في التقليدية
ماذا يجمعنا كحضور لهذا اللقاء
حوارنا ،شراكتنا ،مناكفتنا وتواصلنا الإسفيري الذي رسم لنا صورة اسفيرية لكل من يكتب معنا
المطلوب هو التعرف على الصورة الحقيقية لمن نعرفهم اسفيرياً
جلسنا نستمع للغناء الذي لم ينقطع دقيقة واحدة
وكلكم يعرف انه لا يمكنك أن تحادث أحداً مع الصوت المرتفع للساوند سيستم الا أن تصيح بأعلى صوتك
منذ أن دخلت وحتى مغادرتي لم اسمع شيئاً
شبه كثير بحفلات الأعراس
فنان يغني بصوت ضخم بفعل الساوند سيستم والجميع يستمع ولا يستطيع أن يتكلم فليس هناك صوت يعلو فوق صوت الغناء
بعض المحاولات الخجولة من الأخ طارق الأمين لإضفاء روح من الكوميديا على الجو
ثم الأخ عبد الوهاب على الحاج (وهبة) والعروس حيمورة لتحريك الحضور
وهو ما فشلوا فيه الا قليلاً
وحتى قارب الحفل على نهاياته لم استطع أن أعرف من الحضور الا من شرفني الأخ الرقيق ياسر بيناوي بتقديمي إليهم
ولكنه بالرغم من ترحيبهم وودهم ولكنه كان كحوار الطرشان بفعل الصوت المرتفع للساوند سيستم
محاولاتي الأخيرة كانت بمحاولة الفوز بمقابلة د. بيان ولكني أيضاً فشلت في ذلك وأوضحت لي الأخت (أم رغيم) أنها ليست الأخت بيان
بعدها غادرت المكان فما جدوى بقائك في حفل مخصص للترحيب بعلامات لهذا المنبر وأنت لم تسطيع معرفة أشكالهم.
...
أظن أن (اللمة ) كان من الممكن أن تكون أفضل من ذلك
وما دام الغرض هو تعريف الناس ببعضها ، فلا بد من أن يترك مجالاً ولو ضئيلاً لهذا الغرض

شكري الجزيل للأخ الرقيق ياسر بيناوي على ترحيبه وتقديمي لعدة طاولات لتعريفي بهم وتعريفهم بي.
شكري أيضاً للأخ شول وقد حاول اختراق صمتي بمجاذبتي للونسة
وبرغم كل شيء فالجميع كانت تغلفه روح الصداقة والود
تمنياتي بلمات أخرى أكثر حيوية..

....

كلام سليم ولاينتقص شيء من جهد الذين قاموا بتنظيم هذه المناسبة ........

اهاااااااااا انا ما عرفت انو انت كنت هناك الا من البوست ده رغم اني كنت موجود .............

بالطبع لاندعو للتعارف التقليدي داك كل زول يقوم ويقول انا اخوكم فلان الفلاني من اهالي ............ وهكذا ...........

لكن يمكن ان توضع الطالات قريبة من بعض ويتحرك الاخوان من طاولة الى اخري وتكون الخلفية غناء او موسيقي بصوت منخفض حتى يسمع الناس بعضهم .....

تنبيهك مهم اخي الزوول اتذكر جيداً لمات البورداب ايام عمدة بورداب الخرطوم(المهندس) كنا نلتقي باستمرار ويتم التعارف والنقاش في امر المنتدي وامرنا نحن بورداب الخرطوم كانت هناك مصاحبات غنائية في بعض لقاءاتنا ولم تك تاخذ حيزاً من الوقت المخصص للتفاكر والتعارف
التقينا مع الرائع هاشم صديق في الاسكلا ولم يك هناك غناء
القينا بالاستاذ فضيلي جماع ولم يك هناك اي شي سوي الكلام وقليل من الشعر فتعرفنا عن قرب علي ضيوفنا وهناك عشرات اللقاءات تمت بنفس الطريقة
من هنا التحية لتجمع البورداب
دريمز
ملكة سبأ
فتحي البحيري
المهندس
ناجي الملك
ساندرا
اللورد
ودالعجمي
وبقية الاخوة والاخوات
اتمني الاخذ بملاحظات زووول في مقبل التجمعات

السلام عليكم
...

Quote: تنبيهك مهم اخي الزوول اتذكر جيداً لمات البورداب ايام عمدة بورداب الخرطوم(المهندس) كنا نلتقي باستمرار ويتم التعارف والنقاش في امر المنتدي وامرنا نحن بورداب الخرطوم كانت هناك مصاحبات غنائية في بعض لقاءاتنا ولم تك تاخذ حيزاً من الوقت المخصص للتفاكر والتعارف التقينا مع الرائع هاشم صديق في الاسكلا ولم يك هناك غناء القينا بالاستاذ فضيلي جماع ولم يك هناك اي شي سوي الكلام وقليل من الشعر فتعرفنا عن قرب علي ضيوفنا وهناك عشرات اللقاءات تمت بنفس الطريقة

شكراً أبا يسرا دعمك
والحقيقة أنني لست ضد الغناء في لمات البورداب
ولكني ضد أن لا يكون هنالك غيره
وكأننا في حفل عرس
مع الفرق الشاسع ..فأهل العرس ليسوا في طور ليتعرفوا ببعضهم البعض
ولكنهم يحتفلون بعرسهم وثمرة تعارفهم
أما نحن فلا نعرف بعضنا البعض الا اسفيرياً
أم انها الطريقة السهلة لبرمجة الحفلات ؟؟

Quote: من هنا التحية لتجمع البورداب دريمز ملكة سبأ فتحي البحيري المهندس ناجي الملك ساندرا اللورد ودالعجمي وبقية الاخوة والاخوات

ومعك أحيي هذاالعقد الفريد
وغيرهم من قدامى البورداب المنزوين
...

السلام عليكم
...

Quote: اهاااااااااا انا ما عرفت انو انت كنت هناك الا من البوست ده رغم اني كنت موجود .............

جنابو ازيك

أها شفت كيف؟

وأنا برضو ما عرفت انك موجود ... وغيرك كثير

مع انو كنت متخيل انو الناس الجايين من ميونخ ديل عندهم علامات خاصة ...


...

يا سلام عليك يا زوووول



ومرحب بيك في الخرطوم

رغما عن انك وعبدالرحيم منصور .. جبيتو لينا الزلازل معاكم ..


رأيك الفوق .. هو المطلوب من اللمات ..

الغنا .. دا شي ثانوي ..

عاوزين نعرف بعض وجها لوجه .. مش عبر الأسافير ...

دايرين نتونس .. ونحن بنأكل في الطعمية ...

عاوزين نتحاور .. نتغالط ... نختلف.. نتفق ...

تكون .. محبتنا مباشرة من القلب للقلب ..


لكن .. ابشرك ..

اللمة الجاية حتكون اجمل .. والقعدة اطول .. والغناء خفيف..


تسلم

لك كل المحبة والود

السلام عليكم
...
أحمد حنين ازيك

شفت المخاطبة الودودة الفوق دي
(أحمد حنين ازيك)
وكاني أعرفك من سنين
الحميمية دي البتظهر في تواصلنا هنا
أتعشم أن تكون أكثر منها ونحن نقابل بعضنا البعض وجهاً لوجه
كتيرة دي؟؟

...

تحياتي وشكري للدعم

...

Quote: تعليقاً على لمة البورداب الأخيرة...هل آن أوان تغيير شكل اللمة؟

ما دفعنى للدخول هنا هو معرفة من هم البورداب المعنيين فى عنوان البوست

فقبل الدخول لم أستطع أن اتبين هل هم بورداب الإمارات ، بورداب ماليزيا، بورداب القاهرة أو حتى بورداب الرياض

لجهلي طبعا الى أى بورداب ينتمي (الزول)

التحية،،




-----
لو فى طريقة إنو اللمات تكون بعود يكون جميل
حبذا ناذر فى حالة بورداب الخرطوم :)

مرحبا اخونا الزول وفعلا بعد انتهاء ذلك الحفل جلسنا مجموعة وناقشنا هذا الامر ,,
وناسف لاي تقصير قد لاحظته او لاحظه الاخوة الضيوف ..
وباذن الله ستكون هناك لمة قبل رمضان نتمني ان تختفي هذه الملاحظات السلبية ...
سعدت با التقيت بك ..

Quote: وناسف لاي تقصير قد لاحظته او لاحظه الاخوة الضيوف ..

ياشيخ العوض لا انت لا المجموعة المعاك مابتقصروا تب .........

الكلام فقط عن الفكرة وكيفية اخراج وترتيب مثل هذه المناسبات ولايوجد تقصير ابداً ............

الفكرة ( اطار إجتماعـــى )

الاخراج ( متروك للابداع البشــرى )

غير كــدا ( بننقـل المنتدى من اسفيرى الى منتدى حقيقــى )

وهذا ما لا يبحــث عنـه كثيرون .. وانا اولهم ..

Quote: الكلام فقط عن الفكرة وكيفية اخراج

الزول مــا ( الزول زاتو ) ازيك ياحبيــب تشرفا بشوفتك

السلام عليكم
...
بدر الدين اسحق ازيك

Quote: الفكرة ( اطار إجتماعـــى ) الاخراج ( متروك للابداع البشــرى ) غير كــدا ( بننقـل المنتدى من اسفيرى الى منتدى حقيقــى ) وهذا ما لا يبحــث عنـه كثيرون .. وانا اولهم ..

ولما يقارب ال7 سنين كنت أؤمن بنظريتك هذه
ولذا ستجد (الزوول) الذي ينتمي لهذا المكان منذ 2003 لا يعرفه أحد ولا يشارك أحداً (الا قليلاً)
والآن أؤمن بأن من أسمى نتائج هذا المنتدى
هو تحوله من منتدى اسفيري إلى منتدى حقيقي
وأظن أن هذا ما يبحث عنه كثيرون.. وقد صرت أولهم
...
تحياتي

...

أخي العزيز الزول

كنت أكثر حظا و سعدت بلقاء الكثيرين عندما عدت في 2008
و كان أول لقاء كبير بحديقة نادي التنس
سعدت به و بهم كثيرا جدا
أعادني لأجواء الرحلات المسائية القديمة مع الأهل و الاصدقاء
كنت افتقدها مثل رقاد الحوش و الطيبة و الالفة و جمال النفوس
تلتها برامج و حفلات و كل جميل
والله ما قدرت أشكر لليلة :(
ياخي ناس حلوين بحس الواحد بينهم بقيمة ما يخسر في غربته
كان أول بوردابي التقيه هو الأخ العزيز عبدالله عقيد الذي سارع الى لقائي و ضحك في ربطي لحزام الأمان ثم القلب النابض
و عادل و إنعام و إشراقة حيمورة و إنعام عبدالحفيظ و معتصم نيستا و العزيزة منال خوجلي و نادية السر و ريهان و لمات جوتة و عند حليوة
وزفاف سمرية و قوي و جلسات الأخ السني الفنية عند آل خوجلي و كذلك زفاف ملكة سبأ ..
حفل لليزا شاكر و مبدعة سودانية ألمانية بمركز الخاتم عدلان الذي قدمت الدعوة الينا فيه مشكورة د. شذى بلة.. رأيت فيه د.أبكر آدم اسماعيل و د.هالة
و الكثير الكثير
الشيئ الذي جعل خروجي أصعب من خلع الضرس في تلك المرة
كانت أيام سعيدة
أوصيك بشرب الشاي عند حليوة..
ضع رقمك هنا و سوف تندهش لحفاوتهم :)
I also appreciate and agree with your point of view
محبتي

Quote: تنبيهك مهم اخي الزوول اتذكر جيداً لمات البورداب ايام عمدة بورداب الخرطوم(المهندس) كنا نلتقي باستمرار ويتم التعارف والنقاش في امر المنتدي وامرنا نحن بورداب الخرطوم كانت هناك مصاحبات غنائية في بعض لقاءاتنا ولم تك تاخذ حيزاً من الوقت المخصص للتفاكر والتعارف التقينا مع الرائع هاشم صديق في الاسكلا ولم يك هناك غناء القينا بالاستاذ فضيلي جماع ولم يك هناك اي شي سوي الكلام وقليل من الشعر فتعرفنا عن قرب علي ضيوفنا وهناك عشرات اللقاءات تمت بنفس الطريقة من هنا التحية لتجمع البورداب دريمز ملكة سبأ فتحي البحيري المهندس ناجي الملك ساندرا اللورد ودالعجمي وبقية الاخوة والاخوات اتمني الاخذ بملاحظات زووول في مقبل التجمعات

سلام سلام عليكم يدوم ايها المارون من هنا


اها بالمناسبه (حنك زول داير ليهو فرقه) يفتل بيها الموضوع


بيت الفنون ببحري بعيييييد .. ام درمان (قندهار) بعيييييييييده

انطباع زول ساكن جبل اولياء

لكن عموما بي غناء بدونه زولك ده بتلقاهو تب والارواح جنود مجنده

والاسكلا سمحه

والكدرو فيها شاربوت

وتاني ناس جاييين من اخر الدنيا تحتفلوا بيهم بعيد من النيل دي كيف ؟؟؟
مش هو سليل الفراديس ياخي سوقوهو شويه لي بعض حتى !!!

(وفيها النيل بيلمع في الظلام زي سيف مجوهر بالنجوم من غير نظام)

(تفكير بصوت عالي)

العمده ود المسلمي زول حساس لانه زول (سمح بره وجوه)
لكن يا العمده يعني هسي لو زول ضحك زي ود الصائم ما بتطراهو وبذكرك ليهو
اها جنس ده بروحو الساوند

وكمان ونسه دقاقه بين اتنين قد تزيل الكثير من الصور الذهنيه المغلوطه البكونه التشاحن السايبري ...
وبرضو الحاجه دي ممكن تروحه عصبه غتيته في نص اللحمه
ولا لحمه دغيله ومدسية بين تفاصيل عضم متحالف معاها وانت تحلف يمين ما تتركها تذهب لحال سبيله

شفت كيف !!!!!!!!!!!!

وتاني شي انا اقعد الوك في (العضه ) ولا اتونس مع الجنبي (الله يقطع التبش ويقطع يومو البقى ثابته لاتقبل النكران)
وان كانت تستوجب البلع العلني وان قال صاحبها (كح) لان قوله ليس في ذمتنا والمثل الضروب ما بخارج معانا هنا

صبري ( تبا لك ) احححح تبا دي الليله لقيت ليها مكان


ونرجع تاني

بيت الفنون ببحري بعيييييد .. ام درمان (قندهار) بعيييييييييده





عفوا لحظه :

الزول حمد لله على السلامه ...


بدرالدين اسحق لم تكن العفويه دوما دليل عافيه
وخوفنا على الجمال يجعلنا في موضع الدب وصاحبه






مدخل للخروج :
ايهما اجمل الصور المتخيله ام الحقيقية



بوردابي من منازلهم

تحياتي وسلام للزول

ولي كل زول قطع مشوار

ومرحبتين حبابكم

كل ضيوف الصيف وبالزوار

اما بعد

اتذكر

وكتين لمه البورداب نقاش وحوار

كان مابمشي زول مبسوط وكان الجو بولع نار

يقوم من الكراسي غبار

يقرب يجونا ناس ( الدار )

واتذكر

كم كم من نقاش حار دار

في الاول تشوفو هظار

لكنو الشرار في حافه الانهار

يفتش وبين قلوب الناس يسوي جدار

وتشتعل المدينه شمار

داك ختاها لي داك في حنانو

وكرهو البوبار

وديلاك في الحنك شطار

وديلاك لسه شفع

في السياسه سغار

لاناقصين صواتات ساس ديك و يسوس

لاناقصين عدم

احساس

واستقرار


قلنا العود مع المزيقا امكن يروق الاشرار

وتبقي الدنيا حلوه معانا لا استفزاز ولا استهتار

قلنا الخطوه حبه تسوقنا

تبقي محطه استحضار

تذكرنا الحنان والالفه والجوديه والاخيار

صوت العود اخير من صوت كلام الاشتر الحقار

خطوه وخطوه نتعارف حرام الجار يحارب الجار

حرام الدنيا تصبح شكله

في نص النهار الحار

حرام الضيف دا يسمع كلمه

في نص الضيوف ينهار

حرام الغبن يسكن

في قلوب الناس بدون ايجار


قلنا نسوي مزيكا

ونبدا الخطوه في المشوار

مشوار البلد متشابك الايدين ومامنهار

مشوار نعرف البين بين

منو الصادق

منو الكضاب

منو الجزار


دمتم يا الاحبه جميع

بلد متماسك الاسوار

معقل للشفافيات

بلا غبن وبدون اسرار

عينكم للبعيد خلونا من ناس قندهار والصار

ايدكم في القريب الدنيا ماعدمت من الافكار

السلام عليكم
....
تحياتي طارق الأمين
....


سلام يا قريبنا سيد الدار
ليك تحية ... وسلاماً حار
...
ما انتقدناكم وانتو جملة الأخيار
بس ملحوظة قلنا نعدل المشوار
وماب تأبا الزيادة ...صرة الأنهار
وما كضب الزمان القالو ...
انعم من عقل وفاز الزويل الشار
....
سأئلين العظيم الواحد الستار
تسلموا انتو من أقدار
عشم الخير ...للبعيد والجار

...

السلام عليكم
...
أبو السعود ازيك

Quote: كنت أكثر حظا و سعدت بلقاء الكثيرين عندما عدت في 2008 و كان أول لقاء كبير بحديقة نادي التنس سعدت به و بهم كثيرا جدا أعادني لأجواء الرحلات المسائية القديمة مع الأهل و الاصدقاء كنت افتقدها مثل رقاد الحوش و الطيبة و الالفة و جمال النفوس تلتها برامج و حفلات و كل جميل والله ما قدرت أشكر لليلة :( ياخي ناس حلوين بحس الواحد بينهم بقيمة ما يخسر في غربته كان أول بوردابي التقيه هو الأخ العزيز عبدالله عقيد الذي سارع الى لقائي و ضحك في ربطي لحزام الأمان ثم القلب النابض و عادل و إنعام و إشراقة حيمورة و إنعام عبدالحفيظ و معتصم نيستا و العزيزة منال خوجلي و نادية السر و ريهان و لمات جوتة و عند حليوة وزفاف سمرية و قوي و جلسات الأخ السني الفنية عند آل خوجلي و كذلك زفاف ملكة سبأ .. حفل لليزا شاكر و مبدعة سودانية ألمانية بمركز الخاتم عدلان الذي قدمت الدعوة الينا فيه مشكورة د. شذى بلة.. رأيت فيه د.أبكر آدم اسماعيل و د.هالة و الكثير الكثير الشيئ الذي جعل خروجي أصعب من خلع الضرس في تلك المرة كانت أيام سعيدة أوصيك بشرب الشاي عند حليوة.. ضع رقمك هنا و سوف تندهش لحفاوتهم :) I also appreciate and agree with your point of view محبتي

...
وأنت تستحق مثل هذا الإحتفاء
بل وأكثر
ملاحظ يا أبو السعود أن كل الأسماء التي ذكرت في مداخلتك (الحنينة)
لم أرى منهم في لمة البورداب الأخيرة
يا ربي بورداب الخرطوم ديل شغالين معانا بنظام الشفتات
ولكن برغم انتقادي للشفت المخصص لينا
فالشهادة لله
لم أرى منهم الا الود والبشاشة والترحاب
والود الصادق
...
ياخي ليك وحشة

...

السلام عليكم
...
الريس العوض

Quote: مرحبا اخونا الزول وفعلا بعد انتهاء ذلك الحفل جلسنا مجموعة وناقشنا هذا الامر ,, وناسف لاي تقصير قد لاحظته او لاحظه الاخوة الضيوف .. وباذن الله ستكون هناك لمة قبل رمضان نتمني ان تختفي هذه الملاحظات السلبية ... سعدت با التقيت بك ..

يا راجل تقصير شنو؟
يقصر الملح
لم أسمع قبل لقائي بكم الا كل خير
ولم أشهد بعد لقائي بكم الا كل خير
هي ملاحظات ... توطيداً للصداقة وتدعيما لأواصر الود
ليس الا

...

تحياتي وإمتناني للحفاوة

...

السلام عليكم
...
وليد طه ازيك

Quote: ما دفعنى للدخول هنا هو معرفة من هم البورداب المعنيين فى عنوان البوست فقبل الدخول لم أستطع أن اتبين هل هم بورداب الإمارات ، بورداب ماليزيا، بورداب القاهرة أو حتى بورداب الرياض لجهلي طبعا الى أى بورداب ينتمي (الزول)

..
معليش على التضليل الغير مقصود
(أظن أن البعض يلجأ اليه ليجذب الناس للدخول للبوست)
وأنا سعيد فعلاً لدخولك البوست
وتضامنك معي

....

نعم اخى الزول انا اتفق معك تمام انا جيت الحفلة وغادرت بسرعة لانه كنت فاهمة انه الغرض من الحفل لمة بورداب لكن لقيت القصة حفلة عامةمع انه فى مجهود مقدر من القايمين بالحفل لكن ما اظن الغرض من اللمة حفل وغناء وبس ودى ممكن تلقاها فى نادى اكرر الاشادة بالتنظيم والمجهود الجبار واتمنى تلافى الانتباه لمثل هذه الملاحظات شكرا الزول

الزوول.. تحياتي لك و لحضور البوست و للأعزاء بورداب الخرطوم..

زمان يا الزوول كان نفسي متين أرجع و ألاقي الناس و أتعرف بيهم و أشاركم بعض النشاط.. كان فكرتي و حلمي للمة بورداب سودانيز مختلف.. و طرحت الفكرة وقتها لبكري ..لأنو كان في السودان و كان في تجهيز لحفلة... لكن يمكن كان وقتها مشغول.. ما عارفة.. المهم الفكرة للآن نفسي تتطبق..
يعني يا جماعة بصراحة.. و أتمنى كلامي ما يكون تقيل على نفوسكم.. قصة لمة لرحلة..أو لمة لحفلة.. تأثيرها بيكون محدود جداً.. بهجة و فرحة للناس الاتلمت.. و يمكن تتطور ببعض البورداب لتأسيس صداقة أكثر من قرابة الدم.. أو حتى تأسيس عش زوجية سعيد... لكن بيظل الأثر محصور شديد.. و ما بيضيف كتير لبلد نحن كل يوم هنا.. بنحكي عن وجعو و عن الناقصو..

ايه رأيكم لو لمة البورداب عند حليوة.. بقت للتنسيق لتنظيف ميدان ما.. مستشفى ما.. شارع ما..؟ و كل زول يجي شايل مقشاشاتو من بيتو.. عشان لمن تشيل من ناس بيتكم مقشاشة انت المثقف الواعي و القيافة ..تمرق عشان تنظف بيها ميدان.. يمكن يسخروا منك المرة الأولى.. بس يمكن المرة الجاية أخوك أو أختك يشيل واحدة و يمشي معاك..!
ايه رأيكم لو بقت للتنسيق لترميم مباني مدرسة ما؟ ..ما تلموا ليها قروش..و تدوا الشغل لناس تانيين..لا.. براكم بايديكم.. تخلطوا المونة و تشيلوا الطوب ..و تليسوا بالمسطرينة..و يوم ما ينتهي الانجاز.. تكون الحفلة جوة المدرسة مع الطلاب.. يغنوا ليكم و ترقصوا معاهم و يكونوا اتعلموا منكم انو لو الحكومة ما صلحت ليهم.. بايديهم بيبنوا بيتم و مدرستم..و بتبقو ليهم أجمل قدوة!
أو .. أو.. خدمات مجتمع كتيرة.. ما من النوع بتاع الحفلة الخيرية أو جمع تبرعات بس .. على عظم الأعمال دي و الحوجة المستمرة ليها.. لكن بقترح عليكم تضيفوا ليها شكل تاني.. شكل بتاع شغل ايدكم و ضراعكم.. و إعادة غرس مفاهيم ما جديدة.. لكن يمكن الناس نستها.. أو بقت ما بتديها الأهمية البتستحقها.. مفاهيم النظافة و النظام.. نظافة المكان القاعدين فيهو ما محصور في حيشان بيوتنا.. و مفاهيم التعاون و مفاهيم تعليم أجيال جاية أهمية العناية بمحيطها!

في بلدان العالم الأول.. يخرج الموظفون في أعمال تطوعية لخدمة المجتمع لا يتخلف عنها حتى المدراء..
في اليابان على سبيل المثال لا يوجد ساعي أو فراش.. الطلاب و المدرسون بمديرهم هم من ينجزون كل الأعمال..و الموظفين في كل الشركات..

البلدية لا تنظف الأحياء.. كما يفعل أهل الخليج.. أو كما (ينتظر) أهل السودان.. نظافة الحي مسؤولية قاطنيه.. لو واقفة قدام بيتك رولز رويس.. أنت مثل الجميع.. تجيك من لجنة الحي اعلان بيوم النظافة.. تشيل مقشاشتك و تطلع تنظف الشارع.. أو الخور .. أو الجنينة الفي الحي..!

اتخيلوا لو انتو بتشتغلوا الشغل دا لابسين أوفرول واحد في ظهرو شعار سودانيز أونلاين دوت كوم.. اتخيلوا تأثير الحاجة دي على الناس الحولكم.. غالبية الناس عارفة انو سودانيز دي فيها ناس من خيرة مثقفي و علماء البلد.. قادرين تتخيلوا الناس البيعتبرو صفوة.. كيف ممكن يصنعوا قدوة بعمل زي دا؟

طيب لو طارق الأمين (سلام و احترام يا طارق) .. ألف ليكم أغنية تبقى شعار.. شعار لسودانيز.. بتحمل معاني بأهمية العمل البتعملو فيهو .. تغنوها و انتو بتشتغلو.. قادرين تتخيلوا تأثيرها لما يسمعوها منكم الناس.. ويحفظوها و يشيلوها الأطفال من مكان لمكان؟

ما في داعي ننتظر الحكومة.. و نعلق فوق شماعة تقصيرها تقبلنا نحن للحياة بدون فاعلية حقيقية.. خلونا نغير ما بأنفسنا عسى أن يغير الله ما بنا..
و ما أظن الحكومة حتمنعكم.. خاصة و انو عمل زي دا يا ريت يجمع كل الأطياف السياسية البتجتمع هنا.. و بالتالي ممكن الناس الموالين للحكومة يكون جزء من مسؤولياتهم تسهيل أمور العمل و التصدي لما يمكن أن تتعرضوا له من مضايقات من الأجهزة الأمنية (إن حدث!).. لأنو (و ياريت يكون) عمل خدمة للمجتمع.. لا نشاط سياسي ..

تحياتي و أتمنى تجد الفكرة شيء من العناية منكم..

يا ناذر


بالله بس ورينا

كيف بتعمل سكته بدون اي مازوره زي الفوق دي ؟

طارق ..

Quote: كيف بتعمل سكته بدون اي مازوره زي الفوق دي ؟

دا إسمو إجماع سكوتي على كل الدار في البوست ..


يا شباب ..

صراحة كلام أخونا الزول هنا فيهو الكتير من الصحيح .. والغريبة في نهاية الحفلة قعدنا ومجموعة من البورداب ووصلنا لي نفس الفهم وحكمة ربنا الزوولما كان معانا لكن جينا هنا لكيناهو وصل للدايرين نقولو ..

صراحة التعارف مفيد ومهم .. حتى الناس المحتفى بهم وأساميهم كانت في اللافتة في كتار من البورداب الحاضرين وغيرم ما شافوهم ولا قابلوهم ولا عرفوهم زاتو ...

وأنا والله كنت شايل هم الفنانين البيغنو ..!!

ما في زول سامعم بيغنو بيقولو في شنو .. لأنو كل تلاتة أربعة تنفار ماسكين بعض في زاوية وبيتونسوا وبيتكلموا أو بيتعارفو .. غايتو وليد الفنان بيكون شعر بي ضيق شديد في الحتة دي ...

صنفرة :

كدي نعمل مقترحات سريعة ونفعلا على أرض الواقع ونشوف اللمة الجاية ممكن تطلع كيف ..!

.

Quote: ايه رأيكم لو لمة البورداب عند حليوة.. بقت للتنسيق لتنظيف ميدان ما.

.

Quote: و كل زول يجي شايل مقشاشاتو من بيتو..

انا غايتو بجيب مقشاشتى وحاجزه شارع حليوة

عشان كل ما اتعب اقعد اضرب اللقيمات والشاى باللبن ....لوووووووووووووووووول


الزول ازيك واثنى على كلامك ...

Quote: انا غايتو بجيب مقشاشتى وحاجزه شارع حليوة عشان كل ما اتعب اقعد اضرب اللقيمات والشاى باللبن

و مالو يا منال.. ممكن البداية تكون من شارع حليوة.. على الأقل كل رواد مقهى حليوة حيلمسوا الأثر العظيم للعمل دا..
بس حقو تخلو الشاي باللبن للاحتفال بالانجاز بعد ما يتم..
المقشاشة من البيت دي مسألة رمزية.. ممكن تلقوا ليها حلول بديلة لو حبيتوا..

سناء ...

Quote: ايه رأيكم لو لمة البورداب عند حليوة.. بقت للتنسيق لتنظيف ميدان ما.. مستشفى ما.. شارع ما..؟ و كل زول يجي شايل مقشاشاتو من بيتو.. عشان لمن تشيل من ناس بيتكم مقشاشة انت المثقف الواعي و القيافة ..تمرق عشان تنظف بيها ميدان..

صراحة إقتراحك من جانبي مرفوض تماماً ..!!

يا خي معقول البورداب ديل يكون دورم كدا !!

والفهم شنو ؟ والمغزى شنو ؟؟ وقروش النفايات بتمشي وين البتشيلا المحلية ؟!!

يعني هسي البورداب ديل (المهندس - الدكتور - الفنان - المسرحي - المدير - الغفير - الوزير - العازف - السمسار - الحفار - النجار - الشمشار - الطالب - الخريج) يشيلو مقاشيش ويحوموا في الشوارع !!

ما إحتقار لي مهنة عامل النظافة لكن المغزى شنو ؟ والغرض شنو ؟!!

بدل الكلام دا كان تقولي أي واحد من البورداب يدفع من جيبو خمس جنيهات ونسجل كمية من العاطلين عن العمل في ورقة ونوفر ليهم الاليات بتاعت النظافة ونخليهم ينظفوا الشوارع !!

بي كدة بنكون ضربنا عصفورين بي حجر ..ووفرنا دخل شريف للجماعة ديل ونظفنا الشوارع !!
دا لو ما ناس المحلية ضربونا في الأول عشان بنتدخل في شغلهم !!

ما في طريقة لإستثمار التخصصات البوردابية الجبارة دي في عمل خدمي وإنساني أحسن من قش الشوارع !!

صنفرة :

قش إيه وبطيخ إيه الي جاي تقول عليه !!

منال ...!!!

Quote: انا غايتو بجيب مقشاشتى وحاجزه شارع حليوة

يا خي بطلو المجاملات البتسوو فيها دي !!

هسي ياخي قلمك الجميل الكتب كمية من البوستات الأثارت الجدل والعملت ردود أفعال مبالغ فيها ما حصلت في تاريخ المنابر السودانية ...ترميهو وتشيلي بدلو مقشاشة ؟؟؟؟!!!

والله يا منال إنتي بالذات ما ظنيتك بتكنسي حوش بيتكم خلي من شارع حليوة !!!


يا سناء إنتي قايلة بورداب الخرطوم ديل أعضاء في الكشافة ؟!!

الكلام دا قوليهو لي ناس سنة تامنة ياخ !!!

ناذر..

خدمة المجتمع عمل تطوعي.. سآتي بإذن الله لتفصيل ما أوجزته في مداخلتي السابقة عن فائدته و الغرض منه.. و أتركك مع بعض الصور لموظفي و مهندسي و إداريي (Executives يا ناذر) شركات توشيبا و باناسونيك .. الذين يدفعون ما يقارب 40% من دخلهم ضريبة للحكومة اليابانية .. و مع ذلك لا يترفعون عن المساهمة في نظافة محيطهم..
يا ناذر.. إن لم يكن بوسعك المساهمة.. فرجاء لا تثبط من عزيمة الآخرين.. من تراهم أمامك في هذه الصور ليسوا كشافة و لا عمال نظافة.. و لا طلاب ابتدائي.. !












و إلى حين عودة بإذن الله أتمنى أن تعيد النظر و التفكير في أهمية الأمر..

Quote: لمــــة كــانت حلـــوة ورايـعــة بـــس .. ماعرفته من البـــورداب غير الاخــت / فتحيــة شـــامى (اتشرفته كتير بمعرفته .. اتمنى المــرا الجايه تكون من غير فنـــان او يكون قريب للنهــاية عشان يكــون فى فــرصة الــواحد يتعــرف على الناس البشاركم اغلب اللحظات .... رغمأعن ذلك كانت حلــوة تحيــة للمنظمــين

الاخ / الزوول

دى مداخله بذات المعنى كتبتها فى بوست الاخ/ عبدالرحيم ...

اتمنى اللمات الجايه تكون فى شكل جديد وبذات الروح الحلوة ....

!!!!

Quote: و مع ذلك لا يترفعون عن المساهمة في نظافة محيطهم..

يعني هسي محيطنا نضيف خلاص ما فيهو أي حاجة فضلت غير نظافة الشوارع ؟؟؟!!

وينو محيطنا دا من البطالة الماليا البلد ؟!!

وينو محيطنا دا من أطفال المايقوما الكلو يوم في إذدياد بفعل جرائم الإغتصاب والنزوح !!

خلينا من شركات توشيبا وباناسونيك .....

أهنديلاك فروعم في السودان في المنظقة الصناعية وشارع الحرية ...

خليهم يطلعوا في يوم واحد من الأسبوع ينضفوا محيط شغلهم أو سكنهم ...

كان ما شكوا ليك من رسوم النفايات البيدفعوها شهري من غير عربة النضافة تجيهم تعالي أسعليني ..!!


يا خي ما تقارني بين واقعنا وواقع اليابان وتوشيبا وبا ناسونيك ....!!!

بينا ملايين السنوات الضوئية !!!

ليه ما تخلينا في توظيف القدامنا دا(تخصصات متنوعة للبورداب) في مشاريع تعود فائدتا لاكبر كمية من الناس والمواطنين ؟!!!

ولا شنو ؟؟؟!!!

جزائرى قبل مغادرته للسودان-بجوار مطار الخرطوم- عقب مباراة مصرXالجزائر


الصورة مأخوذة من موقع Sudanradio.com

بالنسبة لموضوع البوست:
أقترح فى أى تجمع للبورداب، ان يعلق اى بوردابى ديباجة على صدره توضح اسمه او النك نيم الذى يكتب به فى الموقع..







----
I am a virtual member and I will never appear in real world

..
.

الجزائرى دا _ لو _ كنت انا مدير الامن
كنت كنستو المطار كلو لانه على الوســخ العلينا هم الوســخـو و المطار وكسروهو
كما تعلم ام لا تعلم ..؟؟

-----------
اها وبعد دا يا دكتور انت لمن عضو خفى .. البكنس معانا منو ؟؟
ولا نكنس برانا .. وتحسب معانا

Quote: اها وبعد دا يا دكتور انت لمن عضو خفى .. البكنس معانا منو ؟؟ ولا نكنس برانا .. وتحسب معانا

ابدا ما قلت أنا عضو خفى..قلت أنا عضو virtual يعنى سودانيزاونلاين ينتهى بمجرد ال sign out..
ولو لقيت زمن ابدا ما حأضيعوا فى ونسة وتعارف وهجيج فى حفلة..لكن لو فى حملة نظافة أو أى عمل اخر
يمكن أن افيد بيهو الاخرين ساتقدم الصفوف..




الزمن صعب شديد يا تبلدينا بس ربك يهون الامور...

Quote: لو لقيت زمن ابدا ما حأضيعوا فى ونسة وتعارف وهجيج فى حفلة..لكن لو فى حملة نظافة أو أى عمل اخر يمكن أن افيد بيهو الاخرين ساتقدم الصفوف..

حسي الجاب نظافة الشوارع ولا الكواش ولا المجاري ولا ما عارف شنو داك في البوست دا شنو
في ناس كدة عجيبة وغريبة ما بتفرق بين كوشة العرس وكوشة ال........
حكمة اليوم
لمة التعارف والترفيه والونسة ما ليهو علاقة بلمة نظافة الشوارع والمجاري والاسواق

---------

Quote: حسي الجاب نظافة الشوارع ولا الكواش ولا المجاري ولا ما عارف شنو داك في البوست دا شنو في ناس كدة عجيبة وغريبة ما بتفرق بين كوشة العرس وكوشة ال........ حكمة اليوم لمة التعارف والترفيه والونسة ما ليهو علاقة بلمة نظافة الشوارع والمجاري والاسواق

تعليقك للأسف يفتقر إلى الحكمة يا بلير..
ما المانع في أن تكون لمة التعارف و الترفيه و الونسة متزامنة مع جهود لخدمة المجتمع و غرس قيم نبيلة فيه؟

المحترمة سناء

Quote: ما المانع في أن تكون لمة التعارف و الترفيه و الونسة متزامنة مع جهود لخدمة المجتمع و غرس قيم نبيلة فيه؟

كل شي له وقته........
حكمة اليوم
عمل شيئين في وقت واحد يقلل من فرصة أنجازهما جيدآ

Quote: المطلوب هو التعرف على الصورة الحقيقية لمن نعرفهم اسفيرياً

الــزول ... ســـلام
اقتراحاتك وجيهة جدا .. وطرحك أيضا للمشكلة راقي وهادي
وعشان كدا جاءت مداخلات الأعضاء متسقة مع ما ذهبت إليه من خلال ملاحظاتك على اللمة
يجب ان تكون اللقاءات أكثر حميمية وودية ... لأنو الرش في اللقاءات الاسفيرية دي لا يؤسس لعلاقات اجتماعية
كتابات الأعضاء في البــورد قد لا تنقل الصورة الحقيقية عن شخصياتهم الواقعية .. واللمات دي فعلا فرصة للتعرف على الأعضاء عن قرب
والتأسيس لعلاقات اجتماعية راسخة في جو من الإخـــوة الصادقة ...
أحييك على الطرح وعلى حرصك على البورداب ... وقيادتك للبوست بمســــؤولية

ودي

Quote: حسي الجاب نظافة الشوارع ولا الكواش ولا المجاري ولا ما عارف شنو داك في البوست دا شنو في ناس كدة عجيبة وغريبة ما بتفرق بين كوشة العرس وكوشة ال........ حكمة اليوم لمة التعارف والترفيه والونسة ما ليهو علاقة بلمة نظافة الشوارع والمجاري والاسواق

بلير لافض فوك

الاخت نساء الم تلاحظي ان موضوع النظافه الذي اثرتيه كان جانبيا
بقدرة قادر بقى موضوع رئيسي يعني هسي انا جايي اتعرف علىى الزول ده
ما القى طريقه الا اشيل ماهو كيس واحد ولا نتبادل في (مقشاشه ) واحده



ياخي الفكره سمحه لكن ده ما مكانه وتاني شي المحتفي بيهم ديل تطير عيشتهم
الجايين من اخر الدنيا يسلموا على الناس نضيفهم بي مقاشيش

بلا مستوبيشي بلا بطيخ


مدخل للخروج :
تبا لك صبري مرة اخرى

..
.

Quote: لو لقيت زمن ابدا ما حأضيعوا فى ونسة وتعارف وهجيج فى حفلة..لكن لو فى حملة نظافة أو أى عمل اخر يمكن أن افيد بيهو الاخرين ساتقدم الصفوف..

شكرا ليكـ يا امبدة لتوضيح وجهة نظركـ بكل وضوح وشفافية باعتباركـ من بورداب الداخل
والتى وجدت تشجيع وتثنيه وصفقة من احد بورداب الخارج ونظرتهم للعلاقات الاجتماعية واواصر المودة
بين الداخل والخارج .. والاحتفاليات التى يقومون بها هؤلاء الذين بلا شغل ولا مشغله ..
وهذا بالضبط مشابه لما ردده صبرى الشريف .. واخرون كما اسلفت ..
ودى رسالة واضحة ارسلها لبورداب الخرطوم لتعرفوا وجهه نظر بورداب الخارج
بانكم تضيعون وقتكم فى ونسه وتعارف وهجيج وحفلات .. وهذا هو الراى الخامس رغم انه صدر من الداخل
لكن ايده بوردابي من اخر الدنيا (اليابان )..
تانى شن قولكم .. عشان تعرفوا فعلا .. انكم مجرد فارغين فى نظر بورداب الخارج
وفاضيين شغل ومشغله .. منتظرينهم يجوا عشان تبرمجوا بيهم وهم يبرمجوا ويضحكوووووووون ..

عموما انا شايف تانى حق الخرفان والحفلات والهجيج دا نلمو ونديهو لنعيم على لاجل كهرباء بيت المايقوما
ولا نتبنى لينا اطفال ولا اشيلو لمستشفى السرطان والله عمل خير وتطوعى .. اقل شئ بنلقاهو فى الاخره
ونخلى النظافة والكنس للنحلية والبلدية ..

وشكرا ليك صبرى الشريف فقد فتحت عيوننا على غبائنا ..
شكرا للجميع من الخليج للمحيط الهادى .. شرقا وغربا .. على تبصيرنا بما خفى عنا
----------------

والله كن نشيل مقاشيش ونكس الشوارع ما عاااارف
ياخى لا .... .

بكل بساطة.

يجب أن ندع بورداب الداخل يحتفلون ببورداب الخارج بالطريقة التي يختارونها وتناسبهم هم.

!!!!

Quote: يا ناذر.. إن لم يكن بوسعك المساهمة.. فرجاء لا تثبط من عزيمة الآخرين

الأخرين ديل منو يا سناء ؟؟!!!

نعيم علي مشغول بي أطفال المايقوما ... نقول ليهو بطل البتسوي فيهو دا وتعال اكنس لينا شارع الحرية ؟!!

محمد صباحي مشغول بي دار المسنات نقول ليهو يامان بطل الفارغة وتعال هاكا المقشاشا دي أكنس لينا شارع الحوادث ؟؟!!

دكتور والي الدين الفكي مشغول جدا بي علاج الاطفال وبيقطع من زمنو ومزمن أسرتو.. نقول ليهو أرمي السماعة دي والحقنة دي وتعال اكنس لينا شارع المطار ؟؟!!!

إنتي يا سناء قايلة بورداب الخرطوم ديل عطالة وما عندهم شغلة ولا شنو ؟؟!!

كدي بطلي التنظير والفرغلية البتسوي فيها دي وتعالي الخرطوم ...

ليك علي أتبرع ليكي بي مقشاشتين وجردل بلاستيك وتقومي تقشي لينا شارع عبيد ختم من صينية كوبر لي جامعة إفريقيا ..!!

صنفرة :

بورداب الخرطوم ..

إنتو لسع ما لاحظتو بعض بورداب الخارج بيتعاملوا معاكم وكأنكم عطالى ما لاقين اليوجهكم ؟؟؟!!!
متين حا تنتبهوا للنقطة دي ؟؟؟!!!!

ناذر و تبلدينا.. بالله أكان عندكم رسايل و لا أي فهم دايرين توصلوه لبورداب الخرطوم .. عليكم الله صوغوه من كلامكم انتو.. ما تلبسوه في كلامي بالغصب.. أنا كان دايره أقول حاجة لزول بأقولها عديل و ما بتلفت.. و رأيي في بورداب الخرطوم و أنشطتهم ما أظنهم جايين يعرفوه من كلامكم انتو..شغل المديدة حرقتني هنا ما بيلفق!
و ما عارفة صبري الشريف قال شنو.. و لا الأربعة التانيين؟؟ لكن لو كانوا طرحو فكرة إضافة خدمة المجتمع لأنشطة البورداب.. يكونوا عداهم العيب و أكيد أنا بدعم الاتجاه دا..
و تاني بحيي في د.أمبدة.. ايثارو لتعميم البسمة لوجوه و قلوب عدد أكبر من الناس..
البصاص .. و الله أنا طرحت فكرتي من وحي عنوان البوست.. و بما لا يتعارض في رأيي مع مضمونه.. كونو بقى موضوع رئيسي فالفضل يرجع ليكم لأني زول واحد البناقش فيكم.. و باسمي فقط.. و انتو كل واحد فيكم بيجي يرد باسم كيان كامل.. يبقى انتو الدفعتو الموضوع دا لواجهة البوست.. و مشكوين..

يا جماعة ما تفتكروني بتكلم معاكم من برج عاجي.. نحن أحوج منكم للونسة و أظمأ منكم للهجيج و اللمة مع الأصحاب و الأحباب.. لكن خدمة المجتمع بالنسبة لينا هنا أمر عادي.. بل و واجب كمان .. عشان كدا الزول ممكن يتكلم عنها بكل بساطة... و يعتبر انكم ممكن جداً تعلموها لناس تانيين.. مش بس تنفذوها انتو!

مهندسين ميتسوبيشي يا بصاص.. و الما عطالة يا ناذر.. قبل أسبوعين ضحوا بعطلة نهاية الأسبوع.. و شالوا مكانسهم من بيوتهم.. و طلعوا مع أسرهم و أطفالهم ينظفوا شوارع الحي... و الشاطيء المجاور..و الناس بيعملوا الحاجة دي بتفاني شديد.. المدير ماسك الكيس لواحد من موظفينو عشان يكب ليهو فيهو القمامة.. و لو ما بتعرفهم شخصياً ما حتتعرف على مدير أو غفير.. لما على امتداد سنوات طويلة تعايش تفاصيل زي دي.. بتعرف ليه هم مشوا قدام و نحن بنرجع وراء.. و بتعرف انو القصة ما بتبدأ من فوق.. لا.. بتبدأ من وسط الناس العاديين.. بعمل قد يبدو بسيط.. أو متواضع جداً.. لكن أكيد بيكون مؤثر جداً.. خلوا نعيم يعمل في البيعمل فيهو.. ما مقصر.. لكن انت يا ناذر بعد تنتهي من النظافة .. أقعد ارتاح و شيل عودك خفف بيهو على الناس التعب.. و أنا و الله ما عندي أي مانع تستقبلوني بمقشاشة و جردل..:)) لكن أكيد ما بفترض انو دا الشكل البيفضلوه كل الناس.. و يا دينق.. كلامي ما عن احتفالات الاستقبال لبورداب الخارج.. كلامي عن التنويع في شكل اللمة.. بحضور ضيوف أو بدونهم..

..
.

Quote: ناذر و تبلدينا.. بالله أكان عندكم رسايل و لا أي فهم دايرين توصلوه لبورداب الخرطوم .. عليكم الله صوغوه من كلامكم انتو.. ما تلبسوه في كلامي بالغصب.. أنا كان دايره أقول حاجة لزول بأقولها عديل و ما بتلفت.. و رأيي في بورداب الخرطوم و أنشطتهم ما أظنهم جايين يعرفوه من كلامكم انتو..شغل المديدة حرقتني هنا ما بيلفق!

اسمعنى يا سناء ..
انا فهمى وصلتو ورأى بقول .. وبصيغو بالطريقة الانت شايفاها وبدير رسالتى كما أ,د
انت قلت كلام ولا بتلفحى ساااى ؟؟
القال الكلام د. امبده ..
انت جيت اثنيت .. وايدت .. وصفقت كمان .. وعبرت عن رأيك فى بورداب الخرطوم
بانو لو عندك زمن فاضى ما بتغضيه ونسه وهجيج وحفلات .. صاااحولا انا غلطان ..
انا رسالتى فهم بورداب الخارج لبورداب الخرطوم فى مسالة الهجيج والحفلات والقعدات
وانت اوضحت بدعمك لراى امبده بهذاالفهم .. يعنى يا ناس الخرطوم انتو لو عندكم زمن فاضى ما تغضوهو
ونسه ولمات وحفلات هجيج .. اعمل عمل لخدمة المجتمع بلا الفارغة وحتى لو تكنسوا الشوارع .. داالفهم ولا انا غلطان ..!!!؟؟
وارجو لا داع للكلام الفارغ وانا ما زول مديدة حرقتنى لو انت عورة بقول ليك عورة جوه عينك ..
والاتكلم عن اقتراحك ( الساذج ) بتاع شيلو مكانس وتعالو نضفو ميدان وشركة بانسونيك سوت وشركة
عمو تايوتا نظفت دا رد عليك فيهو ناذر ..

Quote: يا جماعة ما تفتكروني بتكلم معاكم من برج عاجي.. نحن أحوج منكم للونسة و أظمأ منكم للهجيج و اللمة مع الأصحاب و الأحباب.

كويس عرفت انك بتتكلمى من برج عاجى .. وخارج نطاق المجتمع
ومن دولة زى اليابان .. حسي فى زول ايدك فى اقتراحك دا حتى دينق
مش عشان سوء الاقتراح ولكن ................. لكن دى شغلى فيها مخكــ ..
فيما يخص نشاطات عمل الخير وخدمة المجتمع فبدل من نعيم يشتغل براهو افضل الناس تشتغل معاهو ونشوف ناس تانيين لكنس الشوارع دي ..
شن قولك ..!!؟؟

---------------

عموما ناذر اتبرع يجهز ليك مقشاشة وجردلين ومساحة كمااان
انا بزيد عليهم هوفر .. عشان يشفط ليك الاتربه بسرعة

قال ما عارفه صبرى الشريف قال شنو ..

قال ...كـــــــه

الزول سلامات
وفكرتك جميله...انت مشتاق لونستهم ومعرفتهم
وهم محتاجين يرفهوا على روحهم اولا قبل الآخرين.



شكرا بورداب الخرطوم

واتفق مع دينق قلبا وقالبا

Quote: بكل بساطة. يجب أن ندع بورداب الداخل يحتفلون ببورداب الخارج بالطريقة التي يختارونها وتناسبهم هم.

ويا البصاص
هم يا اخوي ما قصروا معاك
وحضرنا لهم رحلات لجبل اولياء....لكن برضك كنت غائب!

Quote: بيت الفنون ببحري بعيييييد .. ام درمان (قندهار) بعيييييييييده انطباع زول ساكن جبل اولياء

شكلك كسلان يا زول وما فضل لهم الا يعلموا لك النشاط في بيتكم مش كده(ههههه)!!

Quote: .. و يا دينق.. كلامي ما عن احتفالات الاستقبال لبورداب الخارج.. كلامي عن التنويع في شكل اللمة.. بحضور ضيوف أو بدونهم..

سناء خالد . بما أنني أحد الذين أحتفى به بورداب الخرطوم من قبل ؛ دعيني أقول لك أن فكرتك غير عملية وغير واقعية تماما. لأن بورداب الخرطوم نفسهم لديهم أنشطة تطوعية أخرى. وموضوع الأحتفاء بالضيوف هذا لا يستحمل اي شئ أخر سوى الأحتفاء بهم بهذه الطريقة المتبعة.

دينق.. مصر تتكلم عن الاحتفاء و هو ما موضوعي.. لكن في كل الأحوال.. أي اقتراح لأي فئة.. بورداب الخرطوم أو أي بورداب.. لمجموعة أو لفرد.. يبقى في الآخر اقتراح.. لهم أن يأخذوا به أو يتركوه.. ليس لأحد منا وصاية على الآخر.. و لا طرح الأفكار يعني الانتقاص من الجهود المبذولة أصلاً.. بعدين غير واقعية دي غريبة تجي من زول عايش في أمريكا و لا بد عارف دور ما يسمى بخدمة المجتمع في تنمية المجتمعات.. قبيل أنا ثبت قصة أهمية الأعمال الخيرية.. و الاستمرار فيها.. و تمنيت عليهم توسيع و تكبير دورهم ليقوموا بدور رائد ينشروا به الوعي بين الناس بأهمية هذا المجال..

لا حولاااااا..هسة العلاقة بين كلامي و كلام صبري الشريف شنو؟

تباً لصبري يا قولكم... و تباً جداً..

.. يا الزوول تعال أمسك بوستيك و آسفة على توقيت الطرح الغير مناسب.. أدوني ورقتي السمحة دي (عا########ي و متمسكة بيها)..
حأرفعها في محل بعيد.. زي ما رفعتها قبل خمسة سنين!! و أعيد طرح الموضوع ليكم تاني إن شاء الله في فرصة تكون أفضل..
و يمكن لو بقيت من بورداب الخرطوم في مستقبل ليس ببعيد بإذن الله.. و بشكل عملي ..

مع خالص تقديري لكيان بورداب الخرطوم.. و مجهوداتهم المقدرة..

Quote: منال يا خي بطلو المجاملات البتسوو فيها دي !! هسي ياخي قلمك الجميل الكتب كمية من البوستات الأثارت الجدل والعملت ردود أفعال مبالغ فيها ما حصلت في تاريخ المنابر السودانية ...ترميهو وتشيلي بدلو مقشاشة ؟؟؟؟!!! والله يا منال إنتي بالذات ما ظنيتك بتكنسي حوش بيتكم خلي من شارع حليوة !!!

اتخيلنى جايه داخله ليكم بتوبى الاسود وشايله مقشاشتى وجردلى



الزول الحق بوستيك سناء حمتو وغيرت ليهو

سلام يا الزول ..

عارف مرات بنعمل الاحتفال في حدائق المطار ، أها ونقوم نعمل دائرة كبيرة .. وبعد شوية يبدأ التعارف ..

وكل زول يقيف على حيله يقول اسمه وساكن وين (حركة الجامعات ديك) ..


اها لقيناهو شكل تقليدي ..


اتطورنا في احتفالاتنا وبقت بالشكل الخرج بيه الاحتفال الاخير دا .. (يعني غيرنا كتير) في نظرنا..


كان ممكن تكون في فقرة تعارف بالمايك ..



---
سناء خالد .. تحياتي ليك ..

في الثمانينات .. كانت في حينا (مربع 29 في الصحافة) إمراة (خالتي جمال) الله يرحمها ويرحم زوجها عمو جلال ..

عارفة كانت بتجي تدق الباب لي كل بيت وتشيل منهم قروش وتعمل اعمال خيرية كتيرة جدا في الحي النضافة التشجير والجمعية الخيرية للمربع بتدعما من قروش الناس وقت ازمات السكر والعيش بتدعم المخابز بتجيب ليهم الدقيق ..

وافنت عمرها في خدمة الحي ..


--
والله يا سناء من كم يوم بفكر انو احرك ناس شارعنا في الحي الجديد السكنت فيهو لانو فيه انقاض كتيرة وشايلة هم الخريف لو جاء نمرق كيف اذا الشارع ما اتنضف وما جات الكراكة جرتو ..

المهم البعملوا بقولا ليك ..

--

مقترحاتك جميلة وفعلا افردي ليها بوست ..

والله يا حليلكم يا بورداب الخرطوم دايرين ينضفوا بيكم الشوارع ويشذبوا بيكم الاشجار !!
الحكومة تستقطع منكم الضرايب والعوائد والاتاوات لخدمتكم ولا تخدمكم وبورداب الخارج يريدون منكم ان تقوموا بدور الحكومة في كنس الشوارع وردم الحفريات وشق الخيران
بورداب الخرطوم تطير عيشتهم , السودانين ينجلدوا في لبنان يطلعوا يكوركو براهم , بورداب الخارج دايرين بورداب الخرطوم يحولوا ليهم السودان يابان اخري لان بورداب الخارج تعودا علي نظافة وحسن مناظر اليابان , التيس الفقد سوائل في امريكا دايرنكم تعلفوا تبش وعجور في امبدة .
والله الواحد جاهو احساس كانه بورداب الخارج ديل قاعدين يصرفوا رواتب لبورداب الخرطوم , وكانه بورداب الخرطوم ديل ما عندهم حياة غير خدمة بورداب الخارج
ياخ اول مرة اشوف لي ضيوف بجحين ووجوهم خالية من مياء الحياء !
دعوا بورداب الخرطوم ينظمون امورهم كيفما شائوا يا عباد الله , فهؤلاء هم الوحيدون الانقياء من امراض الغربة التي ضربتكم حتي النخاع
ولا تفترضوا في انفسكم اوصياء علي من رضي طائعا استقبالكم والاحتفاء بكم وهو لا يجمعه بك سوى كليمات في منبر حوار وقد تكون جلها كليمات مسمومة
ــــــــــ

يا سناء يبدو ان بوست تربية الاطفال قد فاض وطغي علي قلمك وطفقتي تنشدين اعادة تربية البورداب .


ــــــ
الزول ملاحظاتك وجيهة في حال قدر بورداب الخرطوم او اي بورداب في الدنيا العمل بها

..
.

Quote: والله يا حليلكم يا بورداب الخرطوم دايرين ينضفوا بيكم الشوارع ويشذبوا بيكم الاشجار !!

ما عطاله بتاعين لمات وحفلات ورحلات وهجيج ...

Quote: الحكومة تستقطع منكم الضرايب والعوائد والاتاوات لخدمتكم ولا تخدمكم وبورداب الخارج يريدون منكم ان تقوموا بدور الحكومة في كنس الشوارع وردم الحفريات وشق الخيران

500 جنيه شهريا غير حق المحلية

Quote: بورداب الخرطوم تطير عيشتهم , السودانين ينجلدوا في لبنان يطلعوا يكوركو براهم , بورداب الخارج دايرين بورداب الخرطوم يحولوا ليهم السودان يابان اخري لان بورداب الخارج تعودا علي نظافة وحسن مناظر اليابان

وليد دارفور براهم .. ضد التدخلات الاجنبية براهم - ضد الانفصال برضو براهم ..الخ

Quote: والله الواحد جاهو احساس كانه بورداب الخارج ديل قاعدين يصرفوا رواتب لبورداب الخرطوم , وكانه بورداب الخرطوم ديل ما عندهم حياة غير خدمة بورداب الخارج

يار يت كنا على الاقل لحسنا الشوارع لحس من التراب

Quote: دعوا بورداب الخرطوم ينظمون امورهم كيفما شائوا يا عباد الله , فهؤلاء هم الوحيدون الانقياء من امراض الغربة التي ضربتكم حتي النخاع

--------------

..
.

Quote: اتخيلنى جايه داخله ليكم بتوبى الاسود وشايله مقشاشتى وجردلى

بالله يا منو جيبى لى معاكـ خرقة قماش ولا بشكير كدا..
حاكون مباريك افوط ليك الترتوار والانتر لوكـ ..

------------------

اهم شئ البوزع البارد منو ؟؟
والكلام دا لازم فى احتفالية يوم العمال العالمى ..
بالتنسيق مع شركة سوزوكى اليابانية

..
.

Quote: سناء خالد . بما أنني أحد الذين أحتفى به بورداب الخرطوم من قبل ؛ دعيني أقول لك أن فكرتك غير عملية وغير واقعية تماما. لأن بورداب الخرطوم نفسهم لديهم أنشطة تطوعية أخرى.

لا لا .. يا دينق
ما عندى اى انشطة ولا شغل ولا مشغله .. بس هوام من الناس حايمين
لا بنعرف خدمة مجتمع لا عمل طوعى ولا وظائف نسترزق بيها ولا حياة اخرى
غير انتظار مقترحات وافكار بورداب الخارج النيرة التى تتعلق بنظافة البلد وكنسها من الاوساخ
والاحتفال بهم فى ونسه وحفلات هجيج

Quote: بعدين غير واقعية دي غريبة تجي من زول عايش في أمريكا و لا بد عارف دور ما يسمى بخدمة المجتمع في تنمية المجتمعات.. قبيل أنا ثبت قصة أهمية الأعمال الخيرية.. و الاستمرار فيها.

فهم والله

---------------

شكرا دينق .. لتوضيح ان لبورداب الخرطوم انشطة لم يسمع بها البعض
شكرا بورداب الخارج للفهم الراقى
شكرا سناء خالد
شكرا صبرى الشريف

شكرا للمحلية والبلدية على عدم قيامهم باعمالهم على اكمل وجه ..

معاك حق يا بلير.. حكمة في محلها..تسلم

الحلوات منال...سناء
ايدكم معاى نمشى ننظف بعض ما نستطع فى معسكر مانديلا جنوب مايو
الالية المستخدمة بتختلف

!!!!!

Quote: مهندسين ميتسوبيشي يا بصاص.. و الما عطالة يا ناذر.. قبل أسبوعين ضحوا بعطلة نهاية الأسبوع.. و شالوا مكانسهم من بيوتهم.. و طلعوا مع أسرهم و أطفالهم ينظفوا شوارع الحي... و الشاطيء المجاور

تااااني جيبتينا لي ناس ميتسوبيشي وناس دال للسيارات ..!!

سناء يا خي ما تكوني واقعية معانا شوية !!!

Quote: لكن انت يا ناذر بعد تنتهي من النظافة .. أقعد ارتاح و شيل عودك خفف بيهو على الناس التعب..

وأكون بغني وهم يجو يبشرو لي بي مقاشيشم وجرادلم مش ؟؟!!!


صنفرة :

معليش يا الزوول ... بوستك دا أظن إحتكرناهو أكتر من اللازم ..

تعال واصل في فكرتك ....

..
.

Quote: وأكون بغني وهم يجو يبشرو لي بي مقاشيشم وجرادلم مش ؟؟!!!

قرقر قرقر قرقر
ويقوم واحد شاميك يلبسكـ الجردل ..!!
.

-------------

ابشروا وسكتو الخشامه ..
يا بورداب ..

..
.

غايتو لو شوارعنا زى شوارعهم دى .. وعندا قلوفز ومعانا اكياس معقمة وحاجة زى الكمشة تشيل بيها
الوســخ.. مالو .. !!؟
برنامج الواحد يكون ماشى الحجل بالرجل
مع مديرو بتاع شركة يوكاهاما والشمس قمرية والنسيم عليل ..

--------------

بالله الناس ديل من اول الشارع ما ملو كيس بس علبه صايدر وصفقتين شجر
غايتو كيسى الا يشيلو لى ناذر ..

عموما يا بورداب الخرطوم
دا مقترحات من الخارج .. بس صراحة مقترح الزوول
ممكن يتنفذ وشكلاللمه والتعارف مهم .. وعمل الديباجة كما ذكر امبده
بس موضوع الكنس دا انا عندى ازمه وما بقدر على الهبباى فى عز الصيف :)

..

Quote: بالله يا منو جيبى لى معاكـ خرقة قماش ولا بشكير كدا.. حاكون مباريك افوط ليك الترتوار والانتر لوكـ ..

وما تنسى ياصالح تجيب لي معاك قزازتين بارد عشان كل شويه اقعد لي فى طوبه ابرد حبه ..

اتخيلنى انا بقش والسيارات وراى طابور واقفه ...لووووووووووووول ..

Quote: اتخيلنى انا بقش والسيارات وراى طابور واقفه ...لووووووووووووول ..

لوووووول الهينة دي !!

Quote: ياخ اول مرة اشوف لي ضيوف بجحين ووجوهم خالية من مياء الحياء !

مياء دي يا أساسي قطع شك جميع ماء

مرقت سناء خالد - بمعجزة - من دحديرة بوست
المعايير فوقعت في حفرة بوست تغيير شكل اللمة*

____
* أو بوست النفايات اختصاراً.

Quote: اتخيلنى انا بقش والسيارات وراى طابور واقفه ...لووووووووووووول ..

تليشة:
الجية للخرطوم بقت ما مشجعة
اتقلبت مقاشيش وخور ابو عنجة

Quote: اتخيلنى انا بقش والسيارات وراى طابور واقفه ...لووووووووووووول

السيارات هينة .. المشكلة لو جو ناس الاحتياط المركزي!!!

حمد لله على السلامة يا حسين!

Quote: مياء دي يا أساسي قطع شك جميع ماء

اووو صاحبنا الكان مختفي

تصدق وتامن بالله كتبتها مياه ولما جيت راجع قريت المداخلة قبل الارسال قلت اخليها ماء وفعلا غيرت الهاء الي همزة وفات علي حذف الياء
ـــــــ
اخشي ما اخشاه يا ملاسي اشوف صورك وانت بتنضف قدام بيت بوردابي زائر من الخارج اذا قدر لهذا الامر يكتمل
من اسع انا حاجز ناذر الخليفة زول فنان ويده نضيفة وبخلص الشغل من سكات


ياخ جاني ليك احساس انه بورداب الخرطوم ديل من خلال الاقتراحات المقدمة حيطلب منهم احضار اولياء امورهم في اللمات الجاية

يا شباب

خلاص بقينا ناس مقشاشة ولا لسه ..



اخوكم

القشاش الأعظم

Quote: الحلوات منال...سناء ايدكم معاى نمشى ننظف بعض ما نستطع فى معسكر مانديلا جنوب مايو الالية المستخدمة بتختلف

سلام يا تهاني..

مهما كانت الآلية بتلقي يدي معاك بإذن الله..

ذكرتني اقتراحات سناء - و ليس سناء – أكرر اقتراحات سناء و ليس سناء – بتلك السيدة السودانية
التي عادت مطلع التمانينات مع زوجها بعد انتهاء بعثته الدراسية لأمريكا؛ حيث كانت تخرج عصر
كل يوم لتنزه ######ها في الحدائق الملحقة و المجاورة لكلية الزراعة بشمبات.

ذكرتني اقتراحات سناء - و ليس سناء – أكرر اقتراحات سناء و ليس سناء – بتلك السيدة السودانية
التي عادت مطلع التمانينات مع زوجها بعد انتهاء بعثته الدراسية لأمريكا؛ حيث كانت تخرج عصر
كل يوم لتنزه ك.ل.ب.ها في الحدائق الملحقة و المجاورة لكلية الزراعة بشمبات.

أما أمبدة فلم يذكرني إلا بأمبدة.

Quote: سناء خالد .. تحياتي ليك .. في الثمانينات .. كانت في حينا (مربع 29 في الصحافة) إمراة (خالتي جمال) الله يرحمها ويرحم زوجها عمو جلال .. عارفة كانت بتجي تدق الباب لي كل بيت وتشيل منهم قروش وتعمل اعمال خيرية كتيرة جدا في الحي النضافة التشجير والجمعية الخيرية للمربع بتدعما من قروش الناس وقت ازمات السكر والعيش بتدعم المخابز بتجيب ليهم الدقيق .. وافنت عمرها في خدمة الحي .. -- والله يا سناء من كم يوم بفكر انو احرك ناس شارعنا في الحي الجديد السكنت فيهو لانو فيه انقاض كتيرة وشايلة هم الخريف لو جاء نمرق كيف اذا الشارع ما اتنضف وما جات الكراكة جرتو .. المهم البعملوا بقولا ليك .. -- مقترحاتك جميلة وفعلا افردي ليها بوست ..

يا سلام عليك يا انعام .. و ألف رحمة على خالتي جمال..و زوجها..
عشان كدا يا نعومي أنا قبيل قلت انها ما قيم جديدة.. لكن الناس اتناستها للأسف.. و معليش عشان توقيت الكلام دا جاء في جو ما مناسب..
نحن زمان في المدارس في الحلة.. كان نظافة الفصول و المدرسة علينا.. و نظافة الداخلية لما كنا في رفاعة الثانوية..
اتذكرت الحاجات دي لما شفت صور ميز الطبيبات أيام الاضراب و استأت منها جداً.. و استغربت انهم قعدوا فيه كيف..!
لما رجعت مدني قبل تلاتة سنين.. شفت منظر السوق (الأكشاك) و المنطقة حولها بحال عمري زمان ما شفتو عليها..
ما بتشوفي الأرض و الحصحاص.. بتشوفي ورق و أكياس البلاستيك فارشة الشارع كلو..
حاجة مبالغ فيها.. و الأسوأ انو أصحاب الدكاكين ما حاسين بأي مسؤولية تجاه الحاصل..
الحكومة الله يلعنها في القبل الأربعة.. و لكن القاعدة أن الله لا يغير ما بقوم حتى يغيروا ما بأنفسهم..

المهم يا ناعومي.. أديتيني أمل كبير في انو الحاجة دي ممكن تتحقق.. و متشوقة أشوف الفرق الحيحصل في حيكم.. و إن شاء الله يا انعام تنتقل العدوى الكويسة من العمل دا و يبغروا منكم ناس الحي الجنبكم و كدا.. و لمن أجي يا انعام بإذن الله نتحرك سوا في نطاق تاني..
ترميم المدارس برضو شايفة الناس ما اشتغلت بيهو.. و يا ريت يا انعام لو تقدمي الدعوة انت.. لأنها ممكن تلقى استجابة أكبر ..أو على الأقل ما حتتشاف انها غير واقعية.. أو تتأخد على انها نقد..
و أمانة عليك يا انعام أشركينا بالصور قبل و بعد..و يديك ألف عافية و نتفاكر زيادة لقدام إن شاء الله

..
.

.

Quote: احن زمان في المدارس في الحلة.. كان نظافة الفصول و المدرسة علينا

زمااااان .. حسي ما على الطالب عدا فى بعض الاصقاع النائية
البلد مشت خطوة للامام او هكذا يقولون .. اقدر حسي انااكون استاذ اقول لولدك _انت _ اكنس..
والله يضربنى تاكندو ومعاه مدير المدرسة

Quote: ما رجعت مدني قبل تلاتة سنين.. شفت منظر السوق (الأكشاك) و المنطقة حولها بحال عمري زمان ما شفتو عليها.

نظرة طبيعية من لكل المهاجرين والمغتربين من السودان تبدأ من المطار ولا تنفكـ الدهشة الا فى مطار هيثرو او كنيدى او حلتهم الجديدة

Quote: و لمن أجي يا انعام بإذن الله نتحرك سوا في نطاق تاني.

اللهم حضرنا يوم Green Sudan دا .. يا رب
بعد ما تكنسوا .. مرحلة التشجير والتخضير دا خلوها لينا .. سمح
-------------

ناذر بالله عليك من مغلق المليون صنف جهز لينا مساهمتنا من المكانس
والجرادل واكياس الزباله ..
المكانس ما تكون قش لازم بلاستيك بعصاية منو دى عندها غضروف

Quote: وأكون بغني وهم يجو يبشرو لي بي مقاشيشم وجرادلم مش ؟؟!!!

اتخيلت المنظر !!!

غايتو حساسية (المعيار) الله يعينكم عليها...

Quote: ذكرتني اقتراحات سناء - و ليس سناء – أكرر اقتراحات سناء و ليس سناء – بتلك السيدة السودانية التي عادت مطلع التمانينات مع زوجها بعد انتهاء بعثته الدراسية لأمريكا؛ حيث كانت تخرج عصر كل يوم لتنزه ك.ل.ب.ها في الحدائق الملحقة و المجاورة لكلية الزراعة بشمبات.

انت ذاتك بقيت تقرأ باضنيك يا حسين..

عوجة!

سناء ..!!!

Quote: مهما كانت الآلية بتلقي يدي معاك بإذن الله..

يدك دي حا ترسليها ليها بالبلوتوث !!

إنتي في اليابان والنضافة في مانديلا ..!!

غايتو تنظيرك وإستسهالك للأمور دي عينة يا سناء ..!!

صنفرة :

يا جماعة وين الزوول صاحب البوست ؟؟!!

Quote: اخشي ما اخشاه يا ملاسي اشوف صورك وانت بتنضف قدام بيت بوردابي زائر من الخارج اذا قدر لهذا الامر يكتمل

لومني إن لم نصل لذلك تحت قيادة العوض المسلمي الرشيدة!

Quote: am a virtual member and I will never appear in real world

امبدة صديقي الــvirtual

Quote: ولو لقيت زمن ابدا ما حأضيعوا فى ونسة وتعارف

كدي راجع كلامك دة ...
للمنبر ذاكرة لا تنسي ..

الليلة لاقيت ليكم نجمة هههههههههههههه
وما تقول لي ما لقيتا من اجل التعارف باعتبار عضويتا هنا
بالعكس دي حاجة رائعة
طبعا بعد تفحيص وتمحيص هههههه


ــــــــــــــــــــــــــــــ
Invisible Man , you know that i'm joking

غايتو!!!!



سناء دي باعتبارا عضوة ادت نفسها الحق انها تقترح ..المشكلة شنو؟؟
ما عجبكم اقتراحا ممكن ترفضوا بدون تريقة وشببان في الحلق..
لانها لمن جات اقترحتو ما كانت بتتريق ..كانت جادة ..
لو حاسين بيها بتنظر وعايشة في عالم وهمي ممكن براحة تخلوها في وهمتا دي وترفضوا اقتراحا..

شكرا للاقتراح يا سناء .. لكن الفكرة غير مقنعة ..

ــــــــــــــــــــــــــــــــــــــــــــــــــــ

الداير يحتفي بي انا سارة علي يا ريت يحتفي بي عند (عمر بوش في بانت )
دل دل دل وحفلات ما بتنفع معاي .. لو جيت هدفي كلو من الاجازة آآكل بوش واشرب بزيانوس ..
الناس (الدايرا تحتفي بي) ترسل لي توريني الفكرة دي مناسبة ولا لا ..

Quote: دينق.. مصر تتكلم عن الاحتفاء و هو ما موضوعي.. لكن في كل الأحوال.. أي اقتراح لأي فئة.. بورداب الخرطوم أو أي بورداب.. لمجموعة أو لفرد.. يبقى في الآخر اقتراح.. لهم أن يأخذوا به أو يتركوه.. ليس لأحد منا وصاية على الآخر.. و لا طرح الأفكار يعني الانتقاص من الجهود المبذولة أصلاً.. بعدين غير واقعية دي غريبة تجي من زول عايش في أمريكا و لا بد عارف دور ما يسمى بخدمة المجتمع في تنمية المجتمعات.. قبيل أنا ثبت قصة أهمية الأعمال الخيرية.. و الاستمرار فيها.. و تمنيت عليهم توسيع و تكبير دورهم ليقوموا بدور رائد ينشروا به الوعي بين الناس بأهمية هذا المجال..

Quote: كلامي عن التنويع في شكل اللمة.. بحضور ضيوف أو بدونهم..

سناء خالد. كلامك الفوق ده أنا فهمته في صياغة العمل التطوعي الذي أقترح. صححينب اذا كنت مخطئ.
بعدين يا سناء أنا علاقتي بالعمل الطوعي قديمة جدا ولقد عرفت العمل الطوعي قبل هجرتي لأمريكا.

يا سناء . أنا لمن زرت السودان حضرت لبورداب الخرطوم أنذاك بعض الأعمال الطوعية التي كانوا يشروفون عليها وتلك الأعمال هي:

حملتي جمع تبرعات للصحفية الدارفورية عواطف ولعلاج العزيزة غادة نوري. ولقد شاركت انا شخصيا في بعض الأجتماعات التي كانت تشرف على تلك الأعمال الخيرية. أرجوا منكم أن تدعون بورداب الخرطوم أن يديروا شأنهم بالطرق التي يرونها تناسبهم هم.

تبلدينا ..

Quote: ناذر بالله عليك من مغلق المليون صنف جهز لينا مساهمتنا من المكانس والجرادل واكياس الزباله .. المكانس ما تكون قش لازم بلاستيك بعصاية منو دى عندها غضروف

المكانس جاهزة والله بس منتظر سناء تجي من اليابان عشان نبدأ الحملة ..



سارة علي ...

Quote: لانها لمن جات اقترحتو ما كانت بتتريق ..كانت جادة ..

مين قالك كانت جادة ؟!!

والله أنا غايتو شاعر بيها كتبت كلاما دا وهي بتضحك ....

Quote: الداير يحتفي بي انا سارة علي يا ريت يحتفي بي عند (عمر بوش في بانت )

أمبارح أنا متعشي عندو .. فتة ترد الروح ..!!
تحبي أرسل ليك بارسيل ؟؟!!

صنفرة :

أول مرة أعرف عمر بوش في منو نسائي ؟!!!

الحاجة الحيرتني منال كانت جادة مع سناء في موضوع كنس الشوارع دا ..!!

لكن أظنها بعد مراجة نفسها والمداخلات تبين ليها خستكة الفكرة فعملت خط رجعة ؟!!

Quote: الحاجة الحيرتني منال كانت جادة مع سناء في موضوع كنس الشوارع دا ..!!

معناها انت ما متابع منال كويس ياناذر

كدى راجع كلامى تانى .....

Quote: سناء دي باعتبارا عضوة ادت نفسها الحق انها تقترح ..المشكلة شنو؟؟ ما عجبكم اقتراحا ممكن ترفضوا بدون تريقة وشببان في الحلق.. لانها لمن جات اقترحتو ما كانت بتتريق ..كانت جادة .. لو حاسين بيها بتنظر وعايشة في عالم وهمي ممكن براحة تخلوها في وهمتا دي وترفضوا اقتراحا.. شكرا للاقتراح يا سناء .. لكن الفكرة غير مقنعة ..

حاسين شنو يابت اجرى انكتى بوست المعايير كبى كلامك ده هناك
غايتو نفسى يوم اشوفك كاتبه كلمه حلوة

ولا اااااه ما بتعرفى ...لوووووووووول

تهانى ابوسن:

Quote: ايدكم معاى نمشى ننظف بعض ما نستطع فى معسكر مانديلا جنوب مايو

ليه لا..ممكن الناس نمشى معسكر مانديلا جنوب مايو وتقيم يوم علاجى مجانى. هناك ثلة طيبة من الاطباء
عموميين وأخصائيين وكذلك صيادلة وتقنى معامل، فى هذا البورد ولا أشك لحظة فى إستعدادهم وتطوعهم لاقامة ذاك اليوم ..


التأفف من الاعمال اليدوية وعدم تعظيم قيمة العمل مهما كان بسيطا هو سبب من اسباب تخلفنا عن ركب الحضارة.(in my view).
السودان غير صالح لسكن البشر ولا زلنا نعيش فى وهمة باننا فى أحسن ما يكون ونهيص كمان.
لابد أن نشمر السواعد ونبنى بلدنا ونغرس حب الوطن فى قلوب أبناءنا ونشجعهم على العمل منذ الصغر..
الحكومات هى سبب تخلفنا. لا اتفق فى ذلك. هناك دول مثل ليبيا، سوريا، مصر..الخ لم تشم رائحة الديمقراطية يوما
ولكن نجد بلدانهم قد انطلقت ولديهم على الاقل بنية تحتية سليمة..فليخدم كل منا بما يستطيع ..

امثلة:

* حملة تشجير فى الحى:
قبل 20 عاما وأمام منزلنا فى أمبدة وجدنى جار لنا وأنا أغرس شجرة نيمة أمام المنزل. إشتريت النبتة بمبلغ زهيد من الجناينى.
ضحك منى جارنا العزيز وقال ان تلك النبتة عاوزة ليها سنون عددا حتى تلقى ظلها على الأرض.ونصحنى بشراء شجرة أكبر حجما
ونقلها. لم اسمع نصحه والان بعد عشرون عاما شجرتى وارفة يستظل بها من هجير الشمس الغاشى والماشى.

* تطوع باعطاء حصص فى المدارس التى لديها نقص فى المعلمين.
* عمل ندوات أو حتى مؤتمرات علمية بواسطة بورداب الخارج الذين ياتون إجازة. كفاءات علمية تأتى خلسة للسودان تدخل وتخرج
ولا أحد يستفيد منها..
(حضرت مؤتمر طبى فى دولة عربية . المتحدث بروفيسور كندى من اصول عربية. هذا الرجل تحدث فى المؤتمر ثمانية ساعات بذل فيها
جهدا مقدرا.. فيما بعد علمت بأنه اتى إجازة لبلده الام وان كل ذاك العمل تطوع منه لخدمة بلده.)

--
خلاصة:
*يعنى عمل الخير ليس فقط أن تدخل يدك فى جيبك وتخرج ما فيها.أو تجمع تبرعات لعمل ما..
* اتمنى كلامنا دة يلقى اذان صاغية من بورداب الخرطوم ؟؟؟؟ او بمعنى اصح بورداب الخرطوم الذين يظهرون على الواجهة.


---

سارة على

Quote: كدي راجع كلامك دة ... للمنبر ذاكرة لا تنسي ..

طيلة ثمانية أعوام لم ألتق سوى بعضوين ينتميان لهذا المكان. ووثقت لذلك.
والصدفة هى التى جمعتنى بهما وليس (بعد تفحيص وتمحيص)..

كويس انك ما اتيت بالوجوه الخضراء الضاحكة. اصبت بحساسية من تلك الوجوه وما عارف السبب شنو..


طبعا المداخلة دى مصحوبة بوجه ضاحك بس خفى وما ظاهر

Quote: الداير يحتفي بي انا سارة علي يا ريت يحتفي بي عند (عمر بوش في بانت )

فى المشمش

كان زمان وجبر ....لووووووووووووولين (يابت بهظر معاك )

Quote: طبعا المداخلة دى مصحوبة بوجه ضاحك بس خفى وما ظاهر

كلي وكلك نظر ههههه

Quote: لومني إن لم نصل لذلك تحت قيادة العوض المسلمي الرشيدة!

!!

..
.

Quote: اتمنى كلامنا دة يلقى اذان صاغية من بورداب الخرطوم ؟؟؟؟ او بمعنى اصح بورداب الخرطوم الذين يظهرون على الواجهة.

البروفيسير الكندى عمل كدا ..انت عملت شنو ؟؟
تعال شاركـ واتبنى التيار دا .. واعمل يوم علاج مجانى فى مايو وسوق سته وتأكد من العشرات حيلبسو اليونيفورم باسم سودانيز اون لاين ويكونوا مساعدين ليك
اوكمان تعال شيل مكشاشة ولا كرك مع سناء وبرضو حتلقى تشجيع من البعض ..

Quote: يعنى عمل الخير ليس فقط أن تدخل يدك فى جيبك وتخرج ما فيها.أو تجمع تبرعات لعمل ما..

وعمل الخير برضو ما كنس شوارع وجمع الاوساخ .. ولا انت شايف شنو ؟؟

Quote: التأفف من الاعمال اليدوية وتعظيم قيمة العمل مهما كان بسيطا هو سبب من اسباب تخلفنا عن ركب الحضارة.. السودان غير صالح لسكن البشر ولا زلنا نعيش فى وهمة باننا فى أحسن ما يكون ونهيص كمان .

مافى زول بتأففف من الاعمال اليدوية لكن الطرح لمن يكون غير منطقى وغير مغنن ولا مؤسس ونظرى
زى بتاعك الصفقو ليهو بورداب اليابان دا ببقى دا التخلف والسذاجة فى حد زاتها.._ مع الاسف للشفافية والصراحة_

------------------

ما تقعد خلف الكواليس وتنظر لينا يا دكتور .. زى بورداب الخارج ..
تعال وخليك من اصحاب الافكار النيرة وقادة الراى ..اتبناها وادعمها وخت ليها البلان والفترة الزمنية والمسار
الصحيح والناس بتمشى وراكـ يعنى لمن تتكلم من الخفاء كأنك بتصيغ فى انقلاب عسكرى ولا
مطلوب القبض عليكـ .. وتقدم طرح مافى زول بقبلو لانو صاحب الفكرة انفيسبل مان !!
ياخى رسلها ايميل افكارك وتيميك الممكن يشتغل مع الناس ما دام انت محرج ..

بالمناسبة كلمة خفى الحشرتها ليك دى كانت عن قصد
لا علاقة لها بعلاقتكـ بتعامل مع المنبر ..

Quote: أول مرة أعرف عمر بوش في منو نسائي ؟!!!

يا ناذر لمن كان ناس بيتنا يجوا (الكلام دة قريب لي الخمسة سنة ) كنا ما بنتعشي الا هناك
اخوي يلمنا كلنا في امجاد ونمشي نتضاري وراء الامجاد لانو المكان ما بشيلنا
ناكل ونشرب ونشيل معانا حق الفطور..

ياخ ايام (حلوة) ..ربنا يعيدا تاني يا رب



ـــــــــــــــــــــــــــــ
يا ناذر الايامات دي باخد في دروس يوغا فبالتالي جلدي بقى تخين ههههههه
الغنماية بقت تأكل بوشي هههههه
بحكي ليك قصتا بعدين

التحية والتجلة لبورداب الخرطوم..


--
معليش الزوول (صاحب التوقيع : هالك بن هالك)..
تغولنا على البوست..فى النهاية دة كلو داخل فى مضمون البوست وهو اقتراح تغيير شكل اللمة، كما هو عنوان البوست

..
.

Quote: بعدين لو شايف انو امسح اقتراحاتى الفوق دى وارسلا بالايميل ما فى مشكلة

ابدا والله يا دكتور ..
انا ما عايزكـ تمسحها انا عايزكـ تشرف عليها وتطبقها تطبيق عملى ما نظرى
انا 12 عام مما تعدون .. سمعت اقتراحات وافكار ونظريات فى المنابر دى للان
ما شفت واحد طبقها على ارض الواقع ..
ما يطبق على ارض الواقع هو لصيق بالواقع
وما ينظر لى فى المنبر يبقى فى المنبر ..

----------------

ترجع بالسلامة ومن حسي عشان اقتراحكـ واقتراح سناء فى مشروع اطلقناها منذ شهور قلائل باسم
GO Green - Sudan
يعنى بالنظافة والتشجير والتعليم والصحة والتصحر .. اها منتظرنكم فيهو ..

.
.
.
بوست منقه بس

شكرا الزول صاحب البوست ببساطه يضع بورداب الخرطوم
في مواجهة ( الاخر ) المفتون بالبيئه المغايره والمناخ الثقافي المغاير
والفهم المغاير للمحيط السوداني وعلى طريقه التلفزيون

نقول : بورداب الخرطوم يرحبون باراء واقتراحات المشاهدين



ثم تانيا انتو يابورداب الخرطوم مش مرقتوا للعمل العام والله الفكره لاتثريب عليها
زي مسيرة لبنان وزي وزي كتير من المشاريع القمتو بيها ونجحت ممكن الناس تبلور الافكار دي
لمشاريع الغرض منها استنهاض (الاخرين) ديل خلاف (الاخر) الفوق داك .....

يعني لو جبتو كم مقشاشه لكن بعد ماتقروا عنها عند عبد الغني كرم الله وكم كيس واخدتو ليكم شارع
وجبتو العدسات والتلفزيونات يمكن تدخلوا من باب الدال على الخير ولا ما كده



تبلدينا
ياخي ممكن تلخص لينا البوست ده ينوبك ثواب
لانه احلى بوست في الربع ده مقدما من هسي

ناذر بي تحت تحت من مشيت المحلي فكت منك
ماتبقى تنقطع كتير على الاقل اهو في مصالح مشتركه

هههه




مدخل للخروج :
منال مازلت عند قولي البتسوي فيهو ده عبط
انتهي

منال سلام ..

Quote: معناها انت ما متابع منال كويس ياناذر كدى راجع كلامى تانى .....

ما بيحتاج لي مراجعة .. لكن بيحتاج لي إجابة محددة وقاطعة :

هل إنتي مستعدة تكنسي الشوارع (وتسيبي القدامك ووراك عشان خاطر عيون بورداب المتسوبيشي والإستاكوزا) وأنا إتخيلك شايلة مقشاشة بالمنظر القلتيهو دا :

Quote: اتخيلنى انا بقش والسيارات وراى طابور واقفه ...لووووووووووووول ..

ولا لع ؟؟؟!!!

!!!

Quote: يا ناذر الايامات دي باخد في دروس يوغا فبالتالي جلدي بقى تخين ههههههه الغنماية بقت تأكل بوشي هههههه بحكي ليك قصتا بعدين

والله يا سارة علي إنتي ألذ زولة في البوست دا

لا حظي أنا قلت البوست دا مش المنبر دا عشان راسك ما يكبر ساكت علي حسابي ..!!

صنفرة :

البوست دا فيهو كم زولة !!! والمنبر دا فيهو كم زولة ؟!!

ناذر

لمن جيت السودان قبل سنتين, مشيت لي جماعة قرايبنا,
بعد انتهيت من العصير شلت الكباية ختيتا في المطبخ وجيت قعدت
ست البيت قالت لي مالك يا زول, دا شنو دا البتسوي فيهو دا؟
نط شافعا اللميض معلقا:
"انتي قايلاهم في امريكا شغالين شنو؟ ما ياهو بغسلو في العدة وينضفو في الشوارع"

خستكتو بي البوست و طلعتو عينو.. :)

غايتو!

مشيت السودان مرتين في النصف التاني من عمري ده،،
و لاقيت عدد قليل جداً من البورداب،، بالصدفة..
يا كافي البلا لا لمة لا حفلة لا رحلة!!!
و اسع دي زعلة ولي حركات زول خرمان ونسة و حفلة ما عارف.. :D

:

Quote: هل إنتي مستعدة تكنسي الشوارع (وتسيبي القدامك ووراك عشان خاطر عيون بورداب المتسوبيشي والإستاكوزا) وأنا إتخيلك شايلة مقشاشة بالمنظر القلتيهو دا :

لا طبعا (اكذب يعنى واقول بكنس)

لكن لو سناء وسارة جو من برا وشالو مقاشيشن وكنسو ممكن اشرف عليهم

وياويلكم يابنات البلقى قشها ######ان (بتتحرم من شاى حليوة فهمتو )



المعايير يابنات المعايير عايزين قش نضيف ........(وش ؟؟؟ وبس )

منال :

Quote: لا طبعا (اكذب يعنى واقول بكنس) لكن لو سناء وسارة جو من برا وشالو مقاشيشن وكنسو ممكن اشرف عليهم

طبعا حتى ولو جات سناء دي ما حا تخليك تكوني مشرفة !!
إنتي نسيتي إنك بوردابية خرطوم ولا شنو ؟



!!!

الزوول إنت الظاهر عليك ما جايي ..ّّّ!!


معليش حا إستلم بوستك دا شوية ...!!

معروف !!!

Quote: نط شافعا اللميض معلقا: "انتي قايلاهم في امريكا شغالين شنو؟ ما ياهو بغسلو في العدة وينضفو في الشوارع"

سوميتا ..!!!

Quote: مشيت السودان مرتين في النصف التاني من عمري ده،، و لاقيت عدد قليل جداً من البورداب،، بالصدفة..

طبعا بالصدفة بتشمل شخصي الضعيف القابلك في المسرح القومي اليوم داك ..!!
ويرضو بتشمل شخصي الضعيف العزف طبلة لي سيف الجامعة يوم حنتك ديك ..!!

مشكلتك جيتي في زمن قصير جدا والترتيب لي لمات كبيرة عايزة زمن طويل ومعرفة مسبقة بالمواعيد ..

ولا شنو ؟؟!!!!

يا ناذر انا اجازتي السنوية قاربت ولكن بعد قراءة هذا البوست محتار في امران:
ان اقوم بتأجيل الاجازة الي حين البت في امر كنسكم الشوارع
ان احضر الي اجازتي السنوية واعتذر عن ملاقاة بوردابها
كل هذا خوف ان تكونوا وقتها قررتم ازالة كوشة الجبل واخوك عنده الازمة زي ما انت عارف

اب

لان هذا البوست يؤرخ لما قبله وما بعده

Quote: اتخيلنى انا بقش والسيارات وراى طابور واقفه ...لووووووووووووول ..

منال

في زول قال ليك قبل كده قال ليك البتسوي فيهو ده عبط ؟؟!!

..
.
اها يا جماعة انحنا بقينا على يوم العلاجى المجانى
ولا حملة كنس الاوساخ من الشوارع ...

---------------

بالله حددوا وادونا خبر عشان نجهز الكمامات
فى كلا الاحوال

البصاص ...

Quote: ناذر بي تحت تحت من مشيت المحلي فكت منك ماتبقى تنقطع كتير على الاقل اهو في مصالح مشتركه

الحمد لله المحلي زماان فارقتو فراق الطريفي لي جملو عشان ما أعملو سبب ..

صنفرة :

ارفع رجلك من الابنص شوية بالنسبة لي منال ..!!

ما تلعب ضاغط شديد ..!!

يا أساسي ..

Quote: يا ناذر انا اجازتي السنوية قاربت ولكن بعد قراءة هذا البوست محتار في امران: ان اقوم بتأجيل الاجازة الي حين البت في امر كنسكم الشوارع ان احضر الي اجازتي السنوية واعتذر عن ملاقاة بوردابها

ونحن زاتنا قررنا تأجيل كنس الشوارع لحين حضور سناء عشان حا تشحن لينا معاها الهوفرات والذي منو ..!!

بعدين الأزمة ما تعملا سبب .. يعني حتى لو كنسناالشوارع ناس الأمة معفيين من الكنس معانا ....



















لكن حا نخليهم يمسحو الشوارع وطبعا الأزمة هنا هاس نوثنق تو دو وز ذيس ..!!

!!!!!

Quote: اها يا جماعة انحنا بقينا على يوم العلاجى المجانى

اللخو دكتور ؟؟!!!!!!

تبلدينا إنت بالذات المقشاشة محمداك ؟!!

سارة ازيك.. ياخي الديموقراطية برضو بتتطلب انو الناس تخضع الفكرة للنقاش.. و بعدين تقول انها ما مقنعة.. لكن من الباب للطق كدا دي ديموقراطية خيار واحد!... أنا كنت متخيلة انو في أمريكا الحاجة دي عادية.. بس ردك و رد دينق خلاني أشك..!

ناذر.. أنا جادة جداً و الله و الموضوع لو فيهو أي شيء مضحك فهو تعليقاتكم.. و ما عندي أي مانع تنتظروني بالموضوع دا.. و و الله يزيدني شرف.. لأني كل ما أطلع مع الناس هنا.. بتمنى يوم أشوف و أشارك في حاجة زي دي في بلدي..

تبلدينا .. لو انت أستاذ ولدي و طلبت منو ينظف مكان حيقول ليك حاضر بكل أدب و حينظفو بكل همة و أريحية.. لأنو متعود على كدا.. دي الحاجة الهو و زملاؤه هنا بيعملوها كل يوم عادي.. بينظفو و بيمسحو مدرستهم .. و قطعتين المسح بتاعينهم بيطلبوا منهم يجيبوهم معاهم مع كل بداية سنة دراسية.. زيها زي الأقلام ..و معاها مشابك غسيل تثبت القطعة اللينة في أسفل كرسيه عشان تنشف.. قلت ليك انو ما عندهم فراشين في المدرسة.. فنظافة المدرسة كلها بكفتيريتها و ملاعبها و حماماتها ..مسؤوليتهم هم و أساتذتهم.. و ينطبق الكلام دا حتى على بتي الفي سنة أولى ابتدائي.. مع العلم انها مدرسة خاصة..!

انت قلت الناس في السودان مشت خطوة لقدام و خلت الحاجة دي.. و بالمقياس دا.. تبقى اليابان دي ماشة متخلفة و للوراء حثيثاً !!

البصاص.. أنا في البلد دي لي اتناشر سنة بالتمام و الكمال.. يعني حتى لو كنت مبهورة في الأول .. بعد كدا مفروض تكون بقت الحاجات بالنسبة لي عادية مش؟ ما في دهشة بتدوم.. دا غير انو احساسي الأول ما كان انبهار.. كان صدمة .. و بعدين بقى تأقلم.. و هسة أصبح تعود.. و أنا كتير كتبت عن السلبيات الفي البلد دي.. لكن كمان الايجابيات ما بتخطئها عين.. و يا ريت نتعلم منها.. و لو بعد العمر دا كلو.. طلعت منهم صفر الفكرة و الخبرة.. تبقى خسارة كبيرة ..

تعليقاتكم نبهتني لحاجة مهمة..انو بذكر المقشاشة كل واحد فيكم اتخيل روحو مدنقر في الواطة بالمقشاشة التقليدية و هو حوش بيتو ما بيدنقر فيهو.. و في دي معاكم حق.. لأنو دي ما حاجة عملية و لا معقولة شوارع مدينة قدر الخرطوم تتنظف بالطريقة دي.. لكن أنا برضو ما اتخيلت غير شغل مرتب.. صحي و فيهو مراعاة للهايجين.. التصور الأنا خاتاه (بمكنسة) من النوع الوصفو تبلدينا دا.. و حتى دا مرحلة تانية.. بعد ما في الأول نلملم الورق و الأكياس و القمامة الكبيرة كبيرة.. و باستعمال قفازات..و ماشات.. و ماسكات (masks) للعايز كمان...

في ناس استنكرت ضرب المثل بباناسونيك و ميتسوبيشي.. مع انو ذكرهم جاء رداً على كلام ناذر عن تخصصات و مؤهلات البورداب..عشان أثبت انو في ناس لا يقلون كفاءة و خبرات.. إن لم يزيدوا.. بيعملوا الحاجات دي و بمبادرة ذاتية.. و جبت ليكم أمثلة يابانية..

مع انو في أمثلة قاعدة وسطنا.. و شكراً جداً لدكتور أمبدة و إنعام و تهاني..لأنو أثبتوا انو نحن برضو بلدنا والدة.. و انو فيها ناس حس المسؤولية عندهم عالي وأهل همة.. و نفوس كبيرة..

أي زول شايف انو دي حاجة مستحيلة و غير واقعية .. أنا ما عندي أي رغبة أقنعو.. و ما ملزم بإنو يشتغل بالكلام دا خالص...و لأنو العمل .. أي عمل.. ناهيك عن لما يكون طوعي.. لو ما عملوا الانسان برغبتو.. يا ما تماه.. أو ما جوّده..

و البيقول انها صعبة.. بقول الصعب شنو.. تعالوا نحاول نخليهو ساهل..و العندو الرغبة و الارادة بنقول ليهو مرحب بيك و ايد على ايد تجدع بعيد...

في النهاية على قدر أهل العزم تأتي العزائم..

و مع اني قبيل مسكت ورقتي دي و طبقتها.. لكن حماس د. أمبدة و انعام و تهاني بيخليني أفتحها تاني.. و بآليات مختلفة هم أشاروا ليها.. و يا ريت نتفاكر فيها زيادة.. خاصة و انو في لسة كتيرين ما سمعنا رأيهم..

..
.
سناء ؛

Quote: نت قلت الناس في السودان مشت خطوة لقدام و خلت الحاجة دي.. و بالمقياس دا.. تبقى اليابان دي ماشة متخلفة و للوراء حثيثاً !!

خطأ و غير صحيح .. ويقع فى دائرة رمى الحديث جزافا
انا قلت :

Quote: البلد مشت خطوة للامام ..او هكذا يقولون اقدر حسي انااكون استاذ اقول لولدك _انت _ اكنس.. والله يضربنى تاكندو ومعاه مدير المدرسة

بالاحمر دا تعبير .. لا يخلو من التعجب والسخرية .. !!
والمعنى : زماااااااااااان فى المدرسة كان كل فصل فيهو 6 صفوف ( كنبات ) كان كل يوم نظافة الفصل على صف او كنبه
فناء المدرسة ( الحوش ) كان قبل طابور لصباح والإذاعة المدرسية ونشيد الوطن وتفتيش النظافة من مشرف ( ابو) الفصل
يتحرك فصل واحد يلف الحوش يلقط الصفق ينظف ومدرسة البنات الكانت امى الله يرحمها مديرتها كل طالبة عندها مكنسه ( مقشاشة )
لانهم كانو برشو الحوش وبكنسوا بعد داك ..
حسي مع تربية ناس بره ومدارس الخارج _ باستثناء اليابان طبعا _ والتعليم الخاص الدخل البلد والطالب البدفعو ليهو 2000 - 25 الف دولار للسنة
ودلع الامهات وغياب الاباء والمعلم الخايف على رزقو .. والاستلاب الثقافى .. والفضائيات
مافى استاذ يقدر يقول لطالب اكنس .. لانو امه حتجى وتمسح بالمدير الارض كيف وهى بتدفع بالدولار
والولد جاى من دول الاغتراب _ برضو باستثناء اليابان_ ما متعود على تربية وطنية زى دى .. وممكن قبال ما تصلى المدرسة _ اقصد الام او الاب_ بكون
التلميذ سمعك تلتين كلمة فارغة وبالانجليزى عدا تلاميذ بعض الفقراء فى بعض المدارس الحكومية فى الاصقاع النائية للسودان ..
وحتى لو ابنك جاى من ثقافة اليابان* المتعودين يكنسوا وينظفوا ممكن يتأثر بالحاصل واحتمال امو تسبقو فى درجة التأثير لانو ولد فلانة العلانية ما بسمحوا بكدا ..
ودى مدرسة شنو البتكنس اولادن .. وبندفع ليه ... الخ
وتستمر القصة ..
وقع ليك ولا اشرح لسه ..
نوع المقشاشة الجبنها مخصوص لناس الغضروف اضفنا ليهو هوفرس .. وماكينات شفط وعربات تشغل الشارع بعد الواحدة صباحا ..
رأيك شنو بتنجحوا ..؟؟

Quote: و انو فيها ناس حس المسؤولية عندهم عالي وأهل همة.. و نفوس كبيرة.

دى ما حلوة منك لانو فيها اسقاطات بائنة ..
ولو دا معياركـ فى المسئولية اعتقد سوف تحتاجين مرة اخرى لاعادة تقييم معيارى..!!
المسؤولية يا استاذة ما معناها .. اقول تعالو نكس الشوارع والكوش .. بس ولا دى بتعنى دا المجال الوحيد خدمة مجتمع
دا فى نظرى لا زال اقتراح ساذج .. وكنت اتمنى تقول لى ليه ساذج .. !!؟؟
عشان اشرح ليك البنية التحتية للسودان ..بعد غياب طال 12 عام باستثناء اجازات قصيرة :
ولننظر مثلا ...الطرق .. الطقس الحار والملئ بالاتربة المتقلب ..طوال اليوم .. . تشجير البلد باشجار كالنيم ( دى واضحة مش )
مياه لا تكفى المواطن فكيف تستقى بها الاشجار .. الخطأ فى شارات المرور ( فهمت دى ) .. ضيق الشوارع .. الازدحام طوال 19 ساعة من 7 ص - الى 2 صباحا ..
عدم وجود قوانين تحكم المواطن ويتم تطبيقها فعليا .. ( يعنى لو نضفت الليلة الصباح عشرات التشيس والمناديل والاوراق .. وعلب البارد ومخلفات الشركات والمحلات
.. الاكياس ..والانقاض ..الخ
تجديها فى الشارع .. لا مسؤول ولا جهه تحاسب ولا توجه ..
ثم هناكـ غياب المحلية والبلدية وعدم توفر براميل الاوساخ بصورة كافية فى الشوارع والاعمدة او اى محل عشان نرمى فيها الوسـخ
غياب التوجية والتوعية والتثقيف الصحى .. غياب الاعلام المرئى والمقروء والمسموع والذى سيلعب دورا فى ذلك ... ( حافظ على نظافة مدينتك )
عدم سفلت الفراغات او المساحات غير الميدانية او المخضرة ..
عدم وجود الخضرة (من نجيلة وازهار واشجار تقلل من نسبة الاوساخ والتصحر او النظافة ..( هنا لازم تركزى معانا فى Go Green
ثم عدم توفر الصرف الصحى ..
ورغم هذا فى شركات النظافة البتكنس كل يوم بالاف العمال .وتعطل الحركة وتوقف العربات صف كما ذكرت منو
وبعد دا كانك يا زيد لا غزيت ولا شفت الكنس ... يعنى شغالين وبكنسو الليل كلو .. والصباح تشوفى العجب ولاحياة لمن تنادى ..ليه ..!!
دا برنامج يا استاذة .. محتاج لخطة عشريه بميزانية لا تقدر من الدولة لانها تكلف الملايين والاولويات ترجع لجيوب الساسة ..!!
ويجب ان تشتمل على استراتيجية .. خطة اعلامية - تربية وطنية - توعية صحية - تنوير اعلامى وتثقيفى.. تركيز وسائل الاعلام لخدمة هذا البرنامج
تليه تبعات واجراءات .. ووتصاديق ودولارات هبطرش .. وجهات رسمية دستورية وشعبية.. دى نظافة بلد بحالها
ولازم يسبقها مسئولية اجتماعية ووحس وطنى من المسؤؤولين والشركات والجهات الشعبية والتنفيذية .. ومراقبة وعدم تلاعب وسرقه فى البرنامج
ومتابعة وتقييم .. والكلام اللعلمى والتطبيقى الكتيررررررررر دا .. واشياء اخر ...لا تحصى ولا تعد ..
متخيلى معااااى .. البرنامج وتمدداته ..!!؟

عموما

Quote: و البيقول انها صعبة.. بقول الصعب شنو.. تعالوا نحاول نخليهو ساهل..و العندو الرغبة و الارادة بنقول ليهو مرحب بيك و ايد على ايد تجدع بعيد...

الفوق دا انا بختو فى قائمة الصعب والصعوبة ..!!
وبند تحقيق المستحيل
فقرة الخيال اللجامح ..
تعالى بالسلامة .. وبعد شهر اتصلى على ورينى شارع بيتكم بس..
ما عشان اجى اشرب شاى المغرب ..!! ابدا
عشان اشوف انجازكـ فى شارع البيت ووصل لاى درجه ..
والتجاوب والمسؤولية ..وهل البروجكت بتاعك دا ( بس فى الشارع ) استمر وهل الاستجابة فعالة ؟؟
وهل الاوساخ الانت لميتيها
جات العربية شالتها ..؟؟ وتانى مافى أوساخ ؟؟
كيف حليت مسالة الصرف الصحى .. وعملت شنو مع الجيران الما عندهم سايفون
والبلاعات السايلة .. والهواء البجى فجاة بشيل جميع قاذورات البلد او بالشارع المجاور وجلبها لشارعكم
وهل ولدك كنس معاك بدون ما يجيهو سعال والتهاب ..( بعد الشر طبعا ) ؟؟
ونسوان الشارع اتفهموا المووضوع دا عاادى ؟؟ ورجالهم خلوهم يكنسوا الشوارع ؟؟
الثقافة فى شارعكم اتغيرت ولا لسه ننتظر قرن اخر من الزمان ؟؟
وهل .. وهل .. وهل
وعن و وعن وعن نظافة السودان اسال ولا تمل ... :)
دا طبعا ما احباط ..!!؟
ولا تكسير مجاديف .. ولا قتل عزيمة .. بس دا الواقع ..واقعنا ما واقع اليابان السعيد ..!!
ما بقول نتفرج ..!! لكن دا مسؤولية دولة .. بحالها ... ترصد له من المحليات والبلديات
والميزانيات ملايين الدولارات ..!!
وما معناه نقيف نتفرج ..!! لا الحملة ممكن تبدأ باسلوب اخر ..متحضر ومتدرج !!
قولى لى كيف ..!! اقول ليك ..
تبدى بمقابلة جهات مسؤولة . تقديم افكار .. تحفيز وتشجيع المواطن بالتوجيه .. التثقيف الصحى .. الاتصال بالاعلام لاجل ا.نجاح الحملة .
التنسيق بين وزير الاعلام والوالى وبين وزارة الصحة وناس المحلية ..
تكوين لجنة وتقديم مشروع متكامل للولاية .. اشراك وزارة الزراعة بحمله تشجير فى البدء .. وتخضير البلد .. تخليهم يتبنو مشروع Go Green 4 Suadn
jتقابلى وزير الرى وهيئة مياة ولاية الخرطوم .. ما عايزين الموية طبعا للاشجار ولا كيف
تقابلى وزير التعليم . ومدراء المدارس - تبعدى من مدارس كيبس وكيدز والذى منو _ ديل مجتمع بعيد من الحاجة دى
تحركى حملات فى . الاحياء ..بحملات تشجير ..بس المشكلة البسقيها منو ودا برنامج فى حد زاتوو ..( الا ناس هيئة المياة يعيدو شبكة الماء فى البلد _
يا استاذة ؛؛؛
المسالة ما تعالو شيلو المقاشيق وها ك يا كنس .. كنست الليلة ووبكره .. وبعده .. بعد شهر بتقيفى ..ليه .. وحتستمرى لمتين ؟؟
لانو مافى وعى .. مافى مشاريع ملازمة تحافظ على مجهودك ... كالتشجير .. التصريف .. العربات .. مافى مويه للسقى الشجيرات والنجيلة ...البلد
ما مرصوفة ..الشوارع زى مصران الخروف الضال .. المساحة المرصوفة بالانترلوك لا توجد .. مافى ميزانية .. مافى خطة ..
مافى راعى ..مافى وزارة تخطيط مدن .. مافى ..مافى ..الخ
دا الانا بقول ليك اسمو : Go Green - Sudan
بحتى فى النت .. اقرى برنامج اوباما .. اطلعى على خطة اليابان بعد الحرب للتنمية ..
سياسة هولندا .. تاريخ فينا ...بتعرفى نقتى دى يعنى شنووووووووو!!؟؟

* بالجد محيرنى ناس اليابان البكنسو الفصول ديل ..!!
يا ربي بالربووت ؟؟ ولا كيف يا ربي ؟؟
------------------

سناء؛
سمعت باغنية اسمها ( الحالم سبانا )

اسمعيها وبجيكـ تانى ..

تعديل كتير لانوورقة العمل ارتجالية

..
.

Quote: تبلدينا ياخي ممكن تلخص لينا البوست ده ينوبك ثواب لانه احلى بوست في الربع ده مقدما من هسي

بالمناسبة يا بصاص الفووق دا الملخص ..
ناس اليابان ديل ملخصاتهم ورقة عمل عديل ..


------------

غايتو لو داير تلخيص السودان انتظر ناذر او ملاسي واخوه اساسي

والله يا تبلدينا مشكور على المحاضرة الفوق دي ..

يا خي دا تلخيص أعظم منو ما في بالنسبة للفكرة ككل ..

أها يا سناء .. كلام تبلدينا دا أقريهو بي مهلة ..

لأنو بعديهو ما أظن في كلام تاني يتقال لا من جهتي لا من جهتك إلا غايتو يكون مكاجرة ساي ..!!

إستودعدكم لي الله ..

صنفرة :

الزوول معليش ياخي .. الجاتك في بوستك سامحتك ...!!

Quote: غياب التوجية والتوعية والتثقيف الصحى .. غياب الاعلام المرئى والمقروء والمسموع والذى سيلعب دورا فى ذلك ... ( حافظ على نظافة مدينتك )

Quote: عدم وجود قوانين تحكم المواطن ويتم تطبيقها فعليا ..

Quote: ويجب ان تشتمل على استراتيجية .. خطة اعلامية - تربية وطنية - توعية صحية - تنوير اعلامى وتثقيفى.. تركيز وسائل الاعلام لخدمة هذا البرنامج

Quote: دى نظافة بلد بحالها

تبلدينا ..

جمعية شباب حيمورة عملت ندوة عن السلوك الحضاري وكان عنوان الندوة (السلوك الحضاري ) وناقشت العديد من المحاور ..
الحديث بلباقة والمحافظة على النظافة ..

وطلعنا منها بي توصيات عديدة انو كل زول يلتزم هو ويكلم عشرة على الاقل بالمحافظة على النضافة

مثال يكلم عشرة ما يفتحوا القزاز يرموا حاجة في الشارع ..

وفي كل الدول العربية وخاصة الامارات في فرض غرامة (500) درهم لو زول جدع ليه منديل في الشارع ..


مالوا يا تبلدينا لو بدينا من سودانيز حملات التوعية دي بي بوسترات ومخاطبة الجهات المعنية وممكن من خلال منظمة تنادينابالتنسيق مع المنظمات الخدمية رصد ميزانية لنظافة ولاية الخرطوم وممكن نبدأ بي منطقة منطقة .. يوم امدرمان ويوم بحري ويوم الخرطوم ..

وممكن تنفيذ الحملة يكون يوم الجمعة والسبت ايام الاجازات ..


يعني الناس تتحرك وتعمل حاجة ياخ ..

والله يا تبدلينا امس بديت الكلام مع جارتي بالحيطة لقيتها بتنضف في الشارع وبتملأ في الاشجار .. وتحمست للفكرة خالص وباذن الله حا نبدأ وبديكم خبر اليوم دا ان شاء الله ..


خلونا نكون ناس مفيدين للمجتمع ولانفسنا .. الحكومة دي كان رجيناها ما بتعمل لينا حاجة ..

نقدم القليل خير من ان لا نقدم ...

شكرا سناء وشكرا تبلدينا ..

..
.

Quote: مالوا يا تبلدينا لو بدينا من سودانيز حملات التوعية دي بي بوسترات ومخاطبة الجهات المعنية وممكن من خلال منظمة تنادينابالتنسيق مع المنظمات الخدمية رصد ميزانية لنظافة ولاية الخرطوم وممكن نبدأ بي منطقة منطقة .. يوم امدرمان ويوم بحري ويوم الخرطوم ..

ما دام ايدت حملات التوعية والاعلام والتنسيق ورصد ميزانية ..الخ
يبقى انحنا متفقين ..!!؟
بس ما ممكن يجى امبده وتجى سناء ويقولو لي نشيل مقاشيش نكس.. معقولة يا خلق ..!!
الاقتباس الفوق دا دى الطريقة المفترض الناس تتبنى بيها مشروع ضخم زى دا ..
ولسه فى الخطة .. وما يتبعها ..

الغرامات فى الدول الاخرى واللوائح والنظم دى واحدة من الأليات للمحافظة على نظافة البلد
والحاجة دى ما متوفرة هنا وهناك تلاعب بالقانون ..

------------

صدقينى لا مقترحات جمعية شباب حيمورة
لا جارتك بالحيطة بيقدروا يحلو الإشكال دا
دا ببقى تحصيل حاصل ..( من واقع تجربة)
دى قضية بلد بحالها .. وما مشروع يوم واحد..

Quote: وممكن تنفيذ الحملة يكون يوم الجمعة والسبت ايام الاجازات ..

معقولة نظافه مربع فى يوم واحد ما بالك بالصحافة ؟؟وجنوب الخرطوم؟؟؟ والعاصمة .. وانت ماشة حتى رهيد البردى  ..

الله يوفقكم انا دا خلونى مع المايقوما
وكفالة الايتام ومستشفى السرطان .. نظافه دى بتعمل لي التهاب رئوى ..
وركزى مع سناء عشان ما تنسى الهوفرز وماكينات الشفط و5 ربوتات يكونا مشرفين آليين

يا تبلدينا ايوة نحن متفقين وانا عارفة قصدك شنو تمام في كل كلمة كتبتها ..


وبرضو ديل

Quote: المايقوما وكفالة الايتام ومستشفى السرطان

قضية بلد بحالها ونحاول نساهم مع البلد فيهم صاح ؟

Quote: معقولة نظافه مربع فى يوم واحد ما بالك بالصحافة ؟؟وجنوب الخرطوم؟؟؟ والعاصمة .. وانت ماشة حتى رهيد البردى ..

قول شارع بس .. يعني كل ناس شارع لو عملوا اسوة بي ناس الشارع التاني وهكذا بنلقى رهيد البردي ذاتها اتنضفت ..

--
ان نفعل شي خير من ان لا نفعل (عليك الله دا ما شعار جميل لحملة التوعية والنضافة واللذي منو) ..

تسلم كتير

يا انعام و الله شكراً ليك انت و لجمعية شباب حيمورة عبرك..

ما شاء الله يا انعام و ربنا يزيدكم من فضلو و يبارك فيكم يا رب..

انعام.. ورقتي المتواضعة جداً كفكرة قدام مجهودات حقيقية انتو بادينها و ماشين فيها أولريدي.. اعتبريها تحت تصرفك.. أعيدي صياغتها و بلورتها ..أو قطعيها..
المهم.. أنا وضعت كل حماسي و جهدي لدعم مجهودكم دا.. و شاوري و بتلقيني بإذن الله رهن الاشارة.. و زي ما قلتي.. أن تضيء شمعة خير من أن تلعن الظلام..
رفعت يدي من الطرح يا انعام عشان يشوف النور.. لكن ما معناها اني رفعتها من آلياته البتشوفوها مناسبة.. لو مكنسة أو طوب أو مونة.. (النسوان هنا برضو بيبنوا البيوت.. لكن بالخشب.. و شغل بمرتب ما تطوع..:)))

تسلمي و يسلموا شباب حيمورة..

Quote: ان نفعل شي خير من ان لا نفعل

قصدي الشعار دا يا انعام (بالشمعة و الظلام)..
شعار جميل..

تبلدينا..و ناذر ..(بما انكما متفقان)
ما دام اتجاوزتو مرحلة انو العمل دا ما بيليق بناس سودانيز.. لمرحلة طرح التحديات (سواء كان بغرض التعجيز أو التنوير)..

يبقى برضو كويس..

باقي الكلام الفي مداخلتك .. مصيره نفس مصير ما سبقه و ما لحقه منذ بداية البوست!

Quote: اتخيلنى انا بقش والسيارات وراى طابور واقفه ...لووووووووووووول ..

منال

الله يديك الفي مرادك

..
.

Quote: تبلدينا..و ناذر ..(بما انكما متفقان) ما دام اتجاوزتو مرحلة انو العمل دا ما بيليق بناس سودانيز.. لمرحلة طرح التحديات (سواء كان بغرض التعجيز أو التنوير).. يبقى برضو كويس..

بصراحة .. طوال زمالة المنبر ما كنت اعتقد انك بتتميزى بميزة
تحريف الكلام كما رأيت الان .. فمن القائل انه لا يليق بسودانيز ..!!؟؟ سبحان الله انك لمن الظالمين ..
لقد سعينا لتنويركـ من ان شتان بين مجتمع اليابان وبيئة السودان ..
ولم يكن تعجيزا بقدر ما هو تبيانا للفكرة وتصحيح للطرح واضاءة للدرب ..عن امر نراه لا يتناسب
مع واقع السودان .. _ بحمل مقاشيش وكنس الشوارع - اوضحنا لك الملابسات والمسار
لكن يبدو جلياً .. عدم تقبلك لهذا المنطق .. رغم سعينا لكى تسيرى فى هذاالمشروع بنجاح وتحضرين كل العتاد من خطط وافكار ولقاءات
ومكانس ورشاشات ..

Quote: باقي الكلام الفي مداخلتك .. مصيره نفس مصير ما سبقه و ما لحقه منذ بداية البوست!

دا شنو حسي ..!!؟
التجاهل ..
التجاهل ..
ولاكيف ..
يبدو جلياً يا سناء انك لم تأت لحوار
او منطقكـ عاجز ..
او حجتى قووية ..
( اختارى الاجابة المناسبة )
----------------

فى العافية بس عليكـ الله لمن تجى تورينى
شارع بيتكم عشان نشوف البرجكت ..

بدون زعل؛

Quote: بصراحة .. طوال زمالة المنبر ما كنت اعتقد انك بتتميزى بميزة تحريف الكلام كما رأيت الان .. فمن القائل انه لا يليق بسودانيز ..!!؟؟ سبحان الله انك لمن الظالمين .. Tabaldina 14-07-2010, 02:07 م

Quote: سناء ... صراحة إقتراحك من جانبي مرفوض تماماً ..!! يا خي معقول البورداب ديل يكون دورم كدا !! والفهم شنو ؟ والمغزى شنو ؟؟ وقروش النفايات بتمشي وين البتشيلا المحلية ؟!! يعني هسي البورداب ديل (المهندس - الدكتور - الفنان - المسرحي - المدير - الغفير - الوزير - العازف - السمسار - الحفار - النجار - الشمشار - الطالب - الخريج) يشيلو مقاشيش ويحوموا في الشوارع !! ما إحتقار لي مهنة عامل النظافة لكن المغزى شنو ؟ والغرض شنو ؟!! بدل الكلام دا كان تقولي أي واحد من البورداب يدفع من جيبو خمس جنيهات ونسجل كمية من العاطلين عن العمل في ورقة ونوفر ليهم الاليات بتاعت النظافة ونخليهم ينظفوا الشوارع !! بي كدة بنكون ضربنا عصفورين بي حجر ..ووفرنا دخل شريف للجماعة ديل ونظفنا الشوارع !! دا لو ما ناس المحلية ضربونا في الأول عشان بنتدخل في شغلهم !! ما في طريقة لإستثمار التخصصات البوردابية الجبارة دي في عمل خدمي وإنساني أحسن من قش الشوارع !! صنفرة : قش إيه وبطيخ إيه الي جاي تقول عليه !! ناذر محمد الخليفة 11-07-2010, 05:35 م

يا حليلك يا ناذر،، ياخ انا ما كنت جادة بدليل جملتي الاخيرة من المداخلة..
و فعلاً إتلاقينا المرة الاولي صدفة أو بي الاصح لمقابلتكم لماما سلمي،،
لكن يوم حنتي و يوم عرسي ما ناسية إنو ناس كتيرة جات و برضو لمجاملة ماما سلمي،، بس كان لي الشرف بحضورهم.


بعدين البوست ده إنعوج شديد كدة من الطرح الاول و يا الزوول إستعوض الله كنت في تعارف بقيت في شغلة تانية..
مع العلم انا عندي حساسية ضد التراب و في الاساس كنت بمسح السبورة يوم تكون النضافة علي كنبتنا.

Quote: تصدق وتامن بالله كتبتها مياه

مياه دى الا فى مياه المدن بس
بالانجليزى اظنها بلاك ووترز
(ماحقت العيون)

Quote: وفعلا غيرت الهاء الي همزة وفات علي حذف الياء

ما كان اسهل تطلع بالواحد

سناء كيفك؟؟

يا سناء سودانيز دي علمتني حاجة كعبة خلاص
علمتني اجيب الكلام من الاخر..
فمعليش عشان ما وضحتا ليك الفكرة ما مقنعة ..

يا سناء الفكرة ممتازة ..لكن ما لاستقبال ضيوف ..
يعني مفروض تكون منفصلة خالص من قصة الاحتفاء ببورداب الخارج ..
مفروض تكون فكرة زيها وزي فكرة (تنادينا )..

سوميتا ...

Quote: يا حليلك يا ناذر،، ياخ انا ما كنت جادة بدليل جملتي الاخيرة من المداخلة..

عارفك يا بت الناس ....

إنتي مالك تكتيكك الإسفيري ضعيف كدة ؟!!


والله ما قصدي غير المشاغلة بس ..!!


وحقك علي والله ....!!

سارة علي :

Quote: يا سناء سودانيز دي علمتني حاجة كعبة خلاص علمتني اجيب الكلام من الاخر..

دي حالتو الحاجة الكعبة ...!!!

بالغتي والله ...!!

هو دي ألذ حاجة إتعلمناها في سودانيز دي والإنترنيت دا من ما خلقو حاجة إسمها WWW

Quote: يا سناء الفكرة ممتازة ..لكن ما لاستقبال ضيوف .. يعني مفروض تكون منفصلة خالص من قصة الاحتفاء ببورداب الخارج ..

دا الكلام يا سوميتا ...

Quote: دا الكلام يا سوميتا ...

صحح ..


اعد..

Quote: يا سناء الفكرة ممتازة ..لكن ما لاستقبال ضيوف .. يعني مفروض تكون منفصلة خالص من قصة الاحتفاء ببورداب الخارج .. مفروض تكون فكرة زيها وزي فكرة (تنادينا )..

سرو.. أنا أصلو ما طرحتو كشكل استقبال لبورداب الخارج أو احتفائية.. أنا طرحتو كإضافة لأشكال اللمة و التجمع..
سواء كان هناك ضيوف حضوراً أم لا.. يعني على رأيك زي شغل تنادينا.. بس مجهود ذاتي باليد أكتر من الشكل التقليدي للتبرعات.. عشان يكون دور الجميع الغني و الفقير.. من يملك المادة و من لا يملكها.. يعني هنا العمل من الجميع و للجميع.. ما فئة مساهمة و فئة متلقية للمساهمة ..أو مانح و ممنوح.. عمل من الجميع ليفيد الجميع..و ما بس للنظافة .. نظافة و تعمير و ترميم..و مجالات كتيرة مفتوحة لخدمة المجتمع ..عشان يدوم و تبقى ثقافة مجتمع و بلد بحالو.. يبقى تقليد متبع في كل حي.. و كل شارع.. يعني نحن نقطة البداية.. و نشجع الناس كلها عشان تعمل زينا.. و قلت انو لما يبدوها المثقفين و المتعلمين و أصحاب الكفاءات بيبقوا قدوة للجميع.. و بيقى ساهل الناس تقلدهم و تمشي في طريقهم..


ناذر..

Quote: دا الكلام

دا ما كان كلامك..
لكن أي تغيير إيجابي مرحب بيهو..

*

اتمنى ان نقرأ بعقول مفتوحة تتقبل الاراء والأفكار الخلاقة:

Quote: مجهود ذاتي باليد أكتر من الشكل التقليدي للتبرعات.. عشان يكون دور الجميع الغني و الفقير.. من يملك المادة و من لا يملكها.. يعني هنا العمل من الجميع و للجميع.. ما فئة مساهمة و فئة متلقية للمساهمة ..أو مانح و ممنوح.. عمل من الجميع ليفيد الجميع..و ما بس للنظافة .. نظافة و تعمير و ترميم..و مجالات كتيرة مفتوحة لخدمة المجتمع ..عشان يدوم و تبقى ثقافة مجتمع و بلد بحالو.. يبقى تقليد متبع في كل حي.. و كل شارع.. يعني نحن نقطة البداية.. و نشجع الناس كلها عشان تعمل زينا.. و قلت انو لما يبدوها المثقفين و المتعلمين و أصحاب الكفاءات بيبقوا قدوة للجميع.. و بيقى ساهل الناس تقلدهم و تمشي في طريقهم..

Sana Khalid

تحياتي د. أمبدة..

أتمنى أن تبقى جذوة الحماس متقدة فينا جميعاً .. و أن لا ترتبط بأسماء أشخاص إن غابوا خمدت تلك الجذوة..
هل من أمل في أن يرى مشروع حي مانديلا النور على يديك و يدي تهاني أبو سن و إنعام؟
أرجوك واصل.. شتلتك دي محتاجة منك السقاية برضو.. و يا ريت نشوفها بحجم و عطاء تلك النيمة..
إنعام أخبرتني أنها مصرة على المضي قدماً في رعاية مشروع (المقشاشة) كما أسمته و ضحكتها تملأ الدنيا..
رجاء .. لا تتوقفوا .. و إلا سيبقى مشوار الألف ميل .. بعيداً بألف ميل

فائق تقديري و احترامي